1-2. (a) Udat na bin Yunis, ɛn wetin mek i nɔ bin izi fɔ am fɔ tich in pikin bɔt Jiova ɛn Jizɔs? (b) Tɔk bɔt di pikchɔ we de na di frɔnt pej.

 PAN ɔl we di Baybul nɔ tɛl wi bɔt di tɛm we Timoti baptayz, i nɔ at fɔ imajin aw in mama, Yunis, bin gladi da de de. (Prɔv. 23:​25) Imajin aw i bin gladi fɔ Timoti we i bin tinap insay di wata. Yunis de smayl, ɛn Timoti in grani we na Lɔis, tinap nia am ɛn ol am. Yunis in at kɔt smɔl as Timoti de go ɔnda di wata. Timoti kɔmɔt insay di wata wit big smayl na in fes, ɛn in mama bigin fɔ kray bikɔs i rili gladi. Pan ɔl we i nɔ bin izi, Yunis bin ebul fɔ tich in pikin fɔ lɛk Jiova ɛn in Pikin, Jizɔs Krays. Wetin nɔ bin izi we i bin de tray fɔ tich in pikin bɔt Jiova ɛn Jizɔs?

² Timoti bin mɛn na os usay in mama ɛn papa nɔ de na di sem rilijɔn. In papa na bin Grik, ɛn in mama ɛn grani na bin Ju. (Akt 16:​1) I go bi se Timoti bin de arawnd 13 to 19 ia we Yunis ɛn Lɔis bin bi Kristian. Bɔt in papa nɔ bin bi Kristian. So us rilijɔn Timoti go pik? I go bi se i bin dɔn rich di ej fɔ disayd fɔ insɛf. Fɔ se i go pik in papa in rilijɔn? Fɔ se i go fala di Ju dɛn tradishɔn we dɛn bin dɔn tich am frɔm we in na bin pikin? Ɔ i go gri fɔ bi Jizɔs Krays in disaypul?

3. Akɔdin to Prɔvabs 1:​8, 9, aw Jiova de si di wok we mama dɛn de du fɔ ɛp dɛn pikin dɛn fɔ bi in padi?

³ Kristian mama dɛn tide dɛnsɛf lɛk dɛn famili. Di tin  we impɔtant to dɛn pas ɔl na fɔ ɛp dɛn pikin dɛn fɔ gɛt tayt padi biznɛs wit Jiova. Ɛn wi Gɔd rili valyu di tray we dɛn de tray. (Rid Prɔvabs 1:​8, 9.) Jiova dɔn ɛp bɔku mama dɛn fɔ tich dɛn pikin dɛn fɔ lɛk ɛn sav Am.

4. Wetin nɔ kin izi fɔ mama dɛn tide?

⁴ I nɔmal sɔntɛnde fɔ lɛ mama dɛn de wɔnda if dɛn pikin dɛn go disayd fɔ sav Jiova, lɛk Timoti. Mama ɛn papa dɛn no se Setan in wɔl de rili mɔna dɛn pikin dɛn. (1 Pit. 5:​8) Pantap dat, i nɔ izi fɔ bɔku mama dɛn fɔ mek dɛn wangren mɛn dɛn pikin dɛn ɔ wit man we nɔ de wɔship Jiova. Fɔ ɛgzampul, wan sista we nem Kristin * bin tɔk se: “Pan ɔl we mi man na gud papa ɛn i lɛk wi famili, i bin de stɔp mi fɔ mɛn wi pikin dɛn fɔ bi Jiova Witnɛs dɛn. A bin de kray bɔku tɛm ɛn de wɔnda if mi pikin dɛn go ɛva wɔship Jiova.”

5. Wetin wi go tɔk bɔt insay dis atikul?

⁵ If yu na Kristian mama, yu go ebul fɔ tich yu pikin dɛn fɔ lɛk Jiova ɛn sav am lɛk aw Yunis bin du. Insay dis atikul, wi go tɔk bɔt aw yu go falamakata Yunis in ɛgzampul we yu de tich yu pikin dɛn bay wetin yu de se ɛn wetin yu de du. Wi go tɔk bak bɔt aw Jiova go ɛp yu.

6. Akɔdin to wetin de na 2 Timoti 3:​14, 15, aw Timoti bin kam fɔ bi Kristian?

⁶ We Timoti na bin smɔl bɔbɔ, in mama bin du in bɛst fɔ tich am “di oli tin dɛn we dɛn rayt,” akɔdin to di we aw di Ju dɛn bin ɔndastand dɛn. Na tru se in mama nɔ bin sabi natin bɔt Jizɔs Krays. Bɔt stil, wetin Timoti bin lan frɔm di Skripchɔ dɛn bin gi am wetin i bin nid fɔ no we go ɛp am fɔ bi Kristian. Bɔt i go gri fɔ bi Kristian? As yɔŋman, i bin gɛt di rayt fɔ disayd if i go bi Kristian. Wan dawt nɔ de se wan pan di tin dɛn we bin “ɛp [Timoti] fɔ biliv” di tru tin bɔt Jizɔs na bikɔs ɔf di tin dɛn we in mama bin du. (Rid 2 Timoti 3:​14, 15.) Yunis bin rili gladi we i si se i dɔn ebul fɔ tich in pikin bɔt Jiova, pan ɔl we i nɔ bin izi. Yunis in nem kɔmɔt frɔm wan wɔd we min “fɔ win,” ɛn i bin rili win.

7. Aw Yunis bin ɛp in pikin fɔ kɔntinyu fɔ go bifo afta i baptayz?

⁷ Timoti rich wan impɔtant gol na in layf we i baptayz, bɔt dat nɔ bin mek Yunis stɔp fɔ wɔri. Aw in pikin go liv in layf? Fɔ se i go fala bad padi dɛn? Fɔ se i go go skul na Atɛns ɛn bigin biliv wetin di pegan masta sabi bukman dɛn de tich de? I go west ɔl in tɛm ɛn trɛnk fɔ gɛt bɔku mɔni? Yunis nɔ go ebul fɔ disayd fɔ Timoti, bɔt i go ebul ɛp Timoti fɔ disayd fɔ du di rayt tin. Aw? I go kɔntinyu fɔ wok tranga wan fɔ tich in pikin fɔ rili lɛk Jiova ɛn gɛt tɛnki fɔ ɔl wetin Jiova ɛn Jizɔs dɔn du fɔ dɛn famili. Nɔto mama ɛn papa dɛn nɔmɔ we dɛn man ɔ wɛf nɔ de sav Jiova kin gɛt prɔblɛm fɔ ɛp dɛn pikin dɛn fɔ lɛk Jiova. Pan ɔl we sɔm mama ɛn papa kin de na di trut, i stil nɔ kin izi fɔ ɛp di yɔŋ wan dɛn fɔ sav Jiova fetful wan. Wetin mama ɛn papa dɛn kin lan frɔm Yunis in ɛgzampul?

8. Aw mama go ɛp in man we de na di trut fɔ tich dɛn pikin dɛn bɔt Jiova?

 ⁸ Stɔdi di Baybul wit yu pikin dɛn. Sista dɛn, if yu man de na di trut, Jiova want yu fɔ ɛp am fɔ tich yu pikin dɛn bɔt Am. Wan we aw yu kin du dat na bay we yu de sɔpɔt di Famili Wɔship arenjmɛnt ɔltɛm. Tɔk fayn bɔt dis arenjmɛnt, ɛn tink bɔt tin dɛn we yu go du fɔ mek una ɛnjɔy da tɛm de. Sɔntɛm yu kin ɛp yu man fɔ plan spɛshal Baybul stɔdi projɛkt. Dɔn bak, if yu pikin dɛn dɔn rich ej we dɛn go ebul fɔ bɛnifit frɔm pasɔnal Baybul stɔdi na di Ɛnjɔy Layf Sote Go! buk, sɔntɛm yu kin ɛp yu man fɔ mek yu pikin dɛn ebul du di stɔdi.

9. Usay mama we gɛt man we nɔ de sav Jiova go ebul fɔ gɛt ɛp?

⁹ Sɔm mama dɛn nid fɔ de bifo fɔ stɔdi di Baybul wit dɛn pikin dɛn bikɔs dɛn nɔ gɛt man ɔ bikɔs dɛn man nɔ de sav Jiova. If na so i bi fɔ yu famili, nɔ wɔri tumɔs. Jiova go ɛp yu. Yuz di fayn tul dɛn we in ɔganayzeshɔn dɔn mek fɔ stɔdi wit yu pikin dɛn. Yu kin aks ɔda mama ɛn papa dɛn bɔt aw dɛn dɔn yuz dɛn tul dɛn de fɔ du dɛn famili wɔship. * (Prɔv. 11:​14) Jiova go ɛp yu bak fɔ sabi aw fɔ tɔk wit yu pikin dɛn. Aks am fɔ ɛp yu fɔ no wetin fɔ se so dat yu go no wetin de na dɛn at. (Prɔv. 20:​5) Wan simpul kwɛstyɔn we yu kin aks na ‘Wetin na wan big chalenj we yu kin gɛt na skul?’ Dis go ɛp yu fɔ lan bɔku tin bɔt dɛn.

10. Us ɔda we yu go ɛp yu pikin dɛn fɔ lan bɔt Jiova?

¹⁰ Luk fɔ difrɛn we dɛn fɔ tich yu pikin dɛn bɔt Jiova. Tɔk bɔt Jiova ɛn di bɔku gud tin dɛn we i dɔn du fɔ yu. (Dit. 6:​6, 7; Ayz. 63:​7) Dis rili impɔtant if yu nɔ ebul fɔ stɔdi wit yu pikin dɛn na os ɔltɛm. Kristin, we wi bin dɔn tɔk bɔt, tɔk se: “A nɔ bin gɛt bɔku chans fɔ tɔk bɔt Jiova, so a bin de yuz ɛni chans we a gɛt. Wi bin de go waka ɔ wi bin de yuz bot fɔ krɔs di wata jɔs fɔ tɔk bɔt di wɔndaful tin dɛn we Jiova dɔn mek ɛn bɔku ɔda tin dɛn we go ɛp dɛn fɔ bi Jiova in padi. We mi pikin dɛn bin dɔn big smɔl, a bin ɛnkɔrej dɛn fɔ stɔdi di Baybul fɔ dɛnsɛf.” Dɔn bak, tɔk fayn bɔt Jiova in ɔganayzeshɔn ɛn yu brɔda ɛn sista dɛn. Nɔ tɔk bad bɔt di ɛlda dɛn. Wetin yu go se bɔt di ɛlda dɛn go mek yu pikin dɛn tɔk to dɛn we dɛn nid ɛp.

11. Akɔdin to Jems 3:​18, wetin mek i impɔtant fɔ ɛp fɔ mek pis de na di os?

¹¹ Ɛp fɔ mek pis de na di os. Mek yu man ɛn pikin dɛn no se yu lɛk dɛn ɔltɛm. Tɔk wit rɛspɛkt bɔt yu man ɛn tren yu pikin dɛn fɔ du di sem tin. We yu du dis, pis go de na di os ɛn i go izi fɔ mek yu pikin dɛn lan bɔt Jiova. (Rid Jems 3:​18.) Tink bɔt di ɛgzampul bɔt Josɛf, we na spɛshal payɔnia na Romenia. We i bin de gro ɔp, in papa bin mek i nɔ izi atɔl fɔ lɛ in, in mama, wit in big sista ɛn tu smɔl brɔda dɛn sav Jiova. Josɛf tɔk se: “Mi mama bin de tray tranga wan fɔ mek shɔ se pis de na di os. Di mɔ we mi papa bin de biev ash we, na di mɔ mi mama  bin de du gud to am. We i si se i nɔ izi fɔ mek wi rɛspɛkt ɛn obe wi papa, i bin de tɔk to wi bɔt Ɛfishians 6:​1-3. Dɔn i go tɔk to wi bɔt Papa in gud kwaliti dɛn ɛn ɛp wi fɔ ɔndastand wetin mek wi fɔ lɛk am. Dis bin de ɛp fɔ mek pis de na di os.”

12. Akɔdin to 2 Timoti 1:​5, wetin Yunis in ɛgzampul bin mek Timoti du?

¹² Rid 2 Timoti 1:​5. Yunis bin sɛt fayn ɛgzampul fɔ Timoti. I go dɔn tich am se fɔ gɛt fet min se yu nid fɔ du sɔntin. (Jems 2:​26) Timoti go dɔn si se na bikɔs in mama rili lɛk Jiova na dat mek i bin de du di tin dɛn we i bin de du. Timoti go dɔn si bak se in mama bin gladi bikɔs i de sav Jiova. Wetin Yunis in ɛgzampul mek Timoti du? Apɔsul Pɔl bin tɔk se Timoti bin gɛt di sem kayn fet we in mama bin gɛt. Dis nɔ bin apin bay chans. Timoti bin de wach in mama in ɛgzampul, ɛn dat bin mek i falamakata am. Semweso tide, bɔku mama dɛn dɔn ebul ɛp dɛn famili dɛn fɔ sav Jiova pan ɔl we dɛn “nɔ tɔk natin.” (1 Pit. 3:​1, 2) Yusɛf go ebul du di sem tin. Aw?

13. Wetin mek mama dɛn fɔ mek dɛn padi biznɛs wit Jiova bi di tin we impɔtant pas ɔl na dɛn layf?

¹³ Mek yu padi biznɛs wit Jiova bi di tin we impɔtant pas ɔl na yu layf. (Dit. 6:​5, 6) Lɛk bɔku mama dɛn, yu de mek bɔku sakrifays dɛn. Yu de giv-ɔp yu tɛm, mɔni, slip, ɛn ɔda tin dɛn fɔ gi yu pikin dɛn wetin dɛn nid. Bɔt yu nɔ fɔ ɛva bizi te yu nɔ gɛt tɛm fɔ mek yu padi biznɛs wit Jiova tayt. Mek tɛm fɔ pre, du yu pasɔnal stɔdi, ɛn atɛnd di mitin dɛn ɔltɛm. We yu du dis, yu padi biznɛs wit Jiova go tayt, ɛn yu go sɛt fayn ɛgzampul fɔ yu famili ɛn fɔ ɔda pipul dɛn.

14-15. Wetin yu lan frɔm Lian, Maria, ɛn Zwau dɛn ɛgzampul?

¹⁴ Tink bɔt sɔm ɛgzampul dɛn bɔt yɔŋ wan dɛn we dɔn lan fɔ lɛk Jiova ɛn trɔst am bay we dɛn de wach wetin dɛn mama de du. Kristin in big galpikin we nem Lian, tɔk se: “Wi nɔ bin ebul fɔ stɔdi di Baybul we wi papa de na os. Bɔt Mama bin de atɛnd di mitin dɛn ɔltɛm. Pan ɔl we wi nɔ bin no bɔku tin bɔt di Baybul, di tin dɛn we i bin de du bin ɛp wi fɔ gɛt strɔng fet. Wi bin no se dis na di trut ivin bifo wi stat fɔ go di mitin dɛn.”

¹⁵ Maria, we in papa bin de pɔnish di famili sɔm tɛm dɛn we dɛn kin kɔmɔt mitin, tɔk se: “Mi mama na wan pan di sista dɛn we a no we rili gɛt maynd. We a bin smɔl, sɔntɛnde a nɔ bin de gri fɔ du tin dɛn bikɔs a bin de fred wetin ɔda pipul dɛn go se. Bɔt we a si aw mi mama bin gɛt maynd ɛn aw i bin de put Jiova fɔs na in layf ɔltɛm, dat bin ɛp mi fɔ lɛf fɔ fred mɔtalman.” Zwau, we in papa bin stɔp dɛn nɔ fɔ tɔk bɔt Jiova ɔ di Baybul na os, se: “Sɔntɛm wetin rili tɔch mi na we Mama bin rɛdi fɔ giv-ɔp ɔltin fɔ mek mi papa gladi, bɔt i nɔ ɛva giv-ɔp in lɔv fɔ Jiova.”

16. Aw mama dɛn ɛgzampul kin afɛkt ɔda pipul dɛn?

¹⁶ Mama dɛn, una mɛmba se una ɛgzampul de afɛkt ɔda pipul dɛn. Aw? Tink bɔt aw Yunis in ɛgzampul  bin afɛkt apɔsul Pɔl. Pɔl bin rayt se na ‘Yunis fɔs bin gɛt’ di kayn fet we Timoti gɛt. (2 Tim. 1:​5) Ustɛm Pɔl fɔs notis Yunis in fet? I go bi se na di tɛm we Pɔl du in fɔs mishɔnari wok, i mit Lɔis ɛn Yunis na Listra, ɛn na in go dɔn ɛp dɛn fɔ bi Kristian. (Akt 14:​4-18) Jɔs tink bɔt dis: We Pɔl bin rayt to Timoti afta i dɔn pas lɛk 15 ia, Pɔl stil mɛmba di tin dɛn we Yunis du fɔ sho se i gɛt fet, ɛn i bin yuz Yunis as ɛgzampul we pipul dɛn fɔ falamakata. In ɛgzampul bin rili ɛnkɔrej di apɔsul ɛn sɔntɛm bɔku ɔda Kristian dɛn we bin de da tɛm de. If na yu wan de mɛn yu pikin dɛn ɔ yu man nɔto Jiova Witnɛs, biliv se yu fetful ɛgzampul de ɛnkɔrej ɛn mek ɔda pipul dɛn we de arawnd yu gɛt strɔng fet.

17. Wetin yu fɔ du if i tan lɛk se yu pikin nɔ want fɔ sav Jiova pan ɔl we yu de tray tranga wan fɔ tren am?

¹⁷ Wetin yu fɔ du if i tan lɛk se yu pikin nɔ want fɔ sav Jiova pan ɔl we yu de tray fɔ ɛp am? Mɛmba se fɔ tren pikin de tek tɛm. Akɔdin to wetin de na di pikchɔ, we yu plant sid, sɔntɛnde yu kin wɔnda if i go ɛva gro to tik we de bia frut. Pan ɔl we yu nɔ ebul fɔ kɔntrol wetin go apin, yu kin kɔntinyu fɔ wata am fɔ gi am di bɛst chans fɔ mek i gro. (Mak 4:​26-29) Semweso, as mama, sɔntɛm yu go de wɔnda if yu de rili ɛp yu pikin dɛn fɔ lɛk Jiova. Yu nɔ go  ebul fɔ kɔntrol wetin yu pikin dɛn go disayd fɔ du. Bɔt if yu kɔntinyu fɔ du ɔl wetin yu ebul fɔ tren dɛn, yu go gi dɛn di bɛst chans fɔ bi Jiova in padi dɛn.—Prɔv. 22:​6.

18. Aw Jiova go ɛp yu pikin dɛn fɔ bi in padi?

¹⁸ Frɔm di tɛm we dɛn bin de rayt di Baybul, Jiova dɔn ɛp bɔku bɔku yɔŋ wan dɛn fɔ bi in padi. (Sam 22:​9, 10) I go ɛp yu pikin dɛnsɛf fɔ bi in padi, if na dat dɛn want. (1 Kɔr. 3:​6, 7) Ilɛksɛf yu pikin dɛn nɔ de sav Jiova wit ɔl dɛn at, i go kɔntinyu fɔ lɛk dɛn. (Sam 11:​4) If dɛn du smɔl tin fɔ sho se dɛn rili “want fɔ gɛt layf we go de sote go,” Jiova rɛdi fɔ ɛp dɛn fɔ bi in padi. (Akt 13:​48; 2 Kro. 16:​9) I go ɛp yu fɔ tɔk di rayt tin ɛn di rayt tɛm we yu pikin dɛn go nid fɔ yɛri am. (Prɔv. 15:​23) Ɔ i go muv wan nays brɔda ɔ sista na di kɔngrigeshɔn fɔ sho dɛn se i bisin bɔt dɛn. Pan ɔl we yu pikin dɛn go dɔn big, Jiova go ɛp dɛn fɔ mɛmba sɔm tin dɛn we yu bin dɔn tich dɛn trade. (Jɔn 14:​26) We yu kɔntinyu fɔ tren yu pikin dɛn bay wetin yu de se ɛn bay yu ɛgzampul, Jiova go blɛs yu fɔ dat.

19. Wetin mek yu shɔ se yu de mek Jiova gladi?

¹⁹ Di lɔv we Jiova gɛt fɔ yu nɔ gɛt natin fɔ du wit wetin yu pikin dɛn go disayd fɔ du. I lɛk yu bikɔs yu lɛk am. If na yu wan de mɛn yu pikin dɛn, Jiova prɔmis fɔ bi Papa to yu pikin dɛn ɛn fɔ protɛkt yu. (Sam 68:​5) Yu nɔ go ebul fɔ disayd if yu pikin dɛn go sav Jiova ɔ dɛn nɔ go sav am. Bɔt if yu kɔntinyu fɔ abop pan di ɛp we Jiova de gi yu ɛn du yu bɛst, yu go mek i gladi.