1-2. (a) Uˇniˆ lehˬ a shu hpehꞈ ve le? Yaˇ htaꞈ Yaˬhoˉvaˬ leh Yeˍsuˆ ve awˬ lawn maˍ piˇ tuˬ aˬ htoꞈ ma te yawˇ awˬ pon maˇ sha ve le? (b) Awˬ htaꞈ hpawˇ ve awˬ han htaꞈ nyi sheˍ.

 Tiˆmoˉseˍ Baˆtiˆsaˬ haꞈ yuˬ htaˇ ve awˬ lawn Liꞈ hpu hkʼaw maˇ gʼa kʼoˆ laˇ taˍ ve htawˇ, oˇ ve teˇ nyi Tiˆmoˉseˍ ve awˬ e Uˇniˆ hkʼaˬ hkʼe taw ha lehˬ jaˇ ve htaꞈ ngaˬ hui dawˇ mawˬ gʼa ve yoˬ. (Tawˇ naˉ ve 23:25) Tiˆmoˉseˍ Baˆtiˆsaˬ haꞈ yuˬ˗a te htaˇ, Uˇniˆ yawˇ ve yaˇ paˍ htaꞈ ha lehˬ ha kʼa ve hkʼaw nyi chehˇ ve yoˬ. Tiˆmoˉseˍ ve awˬ pi Lawˇiˆ yawˇ awˬ paˇ lo huˉ chehˇ ve htaꞈ kaꞈ kʼehˇ˗ehꞈ te piˇ ve yoˬ. Tiˆmoˉseˍ htaꞈ iˉ kaˆ hkʼaw tuˍ kuiˬ piˇ htaˇ, Uˇniˆ lehˬ yawˇ ve yaˇ paˍ hkʼa shuˍ shaˉ tiˍ jehˇ taˍ ve yoˬ hehˉ. Tiˆmoˉseˍ lehˬ iˉ kaˆ hkʼaw tawˆ la htaˇ kaꞈ ha lehˬ ve yoˬ. Yawˇ ve awˬ e kaꞈ ha lehˬ jaˇ leh mehˆ guiˬ yaꞈ la ve yoˬ. Uˇniˆ lehˬ yawˇ ve yaˇ paˍ Yaˬhoˉvaˬ leh Yeˍsuˆ htaꞈ haꞈ tuˬ maˍ piˇ gʼa ve yoˬ. Yaꞈ hkʼaˇ, yawˇ chi hkʼe te gʼa htaˇ aˬ htoꞈ ma htaꞈ gʼa hpuˇ ve le?

² Tiˆmoˉseˍ lehˬ bon liˇ maˇ shuˍ daꞈ ve yehˬ kʼa hkʼaw uiˍ la ve yoˬ. Yawˇ ve awˬ pa Heˍlaˍsaˆ chaw hpehꞈ leh yawˇ ve awˬ e leh awˬ pi Yuˇdaꞈ chaw hpehꞈ ve yoˬ. (Tcuh yaˇ 16:1) Uˇniˆ leh Lawˇiˆ Yeˍsuˆ htaꞈ yonˍ la htaˇ, Tiˆmoˉseˍ yaˇ nehˬ hpehˬ ve yoˬ hehˉ. Yaꞈ hkʼaˇ, yawˇ ve awˬ pa Yeˍsuˆ htaꞈ maˇ yonˍ. Hkʼe kʼo, Tiˆmoˉseˍ hkʼa hpawˇ leuˆ yuˬ tuˬ le? Oˇ ve teˇ yanˇ Tiˆmoˉseˍ yawˇ hkʼaˇ yawˇ dawˇ cheˆ gʼa˗oˬ ve yoˬ hehˉ. Tiˆmoˉseˍ awˬ pa ve bon htaꞈ yonˍ tuˬ leuˆ˗aw laˇ? Yaꞈ hkʼaˇ, yawˇ yaˇ ehˉ htaˇ kaꞈ tanˬ leh te jaw ve Yuˇdaꞈ chaw ve awˬ liˇ awˬ hkʼaˇ htaꞈ yonˍ˗aw laˇ? Maˇ heˆ leh yawˇ Yeˍsuˆ htaꞈ yonˍ tuˬ leuˆ˗aw laˇ?

3. Tawˇ naˉ ve liꞈ 1:8, 9 hkʼaw kʼoˆ taˍ ve hkʼe, awˬ e te ve awˬ ceuˬ htaꞈ Yaˬhoˉvaˬ hkʼaˬ hkʼe dawˇ ve le?

 ³ Chi beuꞈ teˇ co˗e awˬ e hpehꞈ ve awˬ viˉ awˬ nyi kaꞈ yehˬ kʼa htaꞈ haꞈ ve yoˬ. Hkʼe te leh, yawˇ hui awˬ pon a yeˇ uiˍ jaˇ ve lehˬ, yaˇ Yaˬhoˉvaˬ htaꞈ haꞈ leh meuˆ daꞈ tuˬ ga piˇ gaˇ ve yoˬ. Leh yawˇ hui chi hkʼe te ve htaꞈ Yaˬhoˉvaˬ awˬ hpfuhˇ shiˍ ve yoˬ. (Tawˇ naˉ ve 1:8, 9 gʼaw sheˍ.) Awˬ e yaˇ htaꞈ ga piˇ leh yaˇ Yaˬhoˉvaˬ ve kanˉ te la tuˬ yawˇ hui htaꞈ daꞈ ve beˆ maˍ piˇ hkawˇ laiˉ ceuˬ cawˬ ve yoˬ.

4. Chi beuꞈ teˇ co˗e ve awˬ e shoꞈ shaꞈ ve aˬ htoꞈ ma gʼa hpuˇ ve le?

⁴ Awˬ e hpehꞈ ve awˬ viˉ awˬ nyi yaˇ uiˍ la htaˇ, yaˇ Tiˆmoˉseˍ hkʼa shuˍ Yaˬhoˉvaˬ ve kanˉ te tuˬ laˇ tehꞈ dawˇ htawˇ nawˬ dawˇ cawˬ ve yoˬ. Yaˇ Saˍtanˍ uˉ peunˍ ve awˬ hawˉ lo chehˇ ve pa taw, nyiˉ piˇ ve hkʼaˬ hkʼe taw gʼa hpuˇ ve htaꞈ awˬ pa awˬ e shiˍ ve yoˬ. (1 Peˍtruˆ 5:8) Chi hkʼoˆ kaꞈ, awˬ viˉ awˬ nyi awˬ e hpehꞈ ve yaˇ miˇ laiˉ gʼaˇ teˇ gʼaˇ ceh tiˉ yaˇ hu ve, awˬ hpawˇ Shaˉhkiˆhkanˍ ve chaw maˇ hpehꞈ ve yawˇ hui ve yaˇ uiˍ la htaˇ, Yaˬhoˉvaˬ htaꞈ haꞈ tuˬ maˍ piˇ ve haˍ jaˇ tehꞈ dawˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ Hkiˆte b kʼoˆ ve, “ngaˬ ve awˬ hpawˇ yehˬ kʼa htaꞈ haꞈ leh daꞈ ve awˬ pa hpehꞈ ve yoˬ. Yaꞈ hkʼaˇ, yawˇ lehˬ ngaˬ yaˇ htaꞈ Liꞈ hpu maˇ maˍ piˇ tcuh laˇ? Yaˇ Shaˉhkiˆhkanˍ ve chaw hpehꞈ la tuˬ, ngaˬ maˍ piˇ maˇ gʼa la ve htaꞈ kawˆ ve pa taw, ngaˬ laiˉ pawˆ hawˬ ve yoˬ.”

5. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁵ Nawˬ awˬ e hpehꞈ ve kʼo, Uˇniˆ hkʼa shuˍ nawˬ ve yaˇ Gʼuiˬ sha htaꞈ haꞈ leh yawˇ ve kanˉ te la tuˬ ga piˇ gʼa ve yoˬ. Nawˬ Uˇniˆ htaꞈ henˇ yuˬ leh nawˬ ve yaˇ htaꞈ hkʼa dehꞈ maˍ piˇ leh nawˬ ve awˬ lawn yaˇ htaꞈ hkʼaˬ hkʼe maˍ piˇ gʼa tuˬ teˇ geh henˇ tuˬ yoˬ. Leh Yaˬhoˉvaˬ nawˬ htaꞈ hkʼaˬ hkʼe ga laˇ gʼa tuˬ kaꞈ teˇ geh henˇ tuˬ yoˬ.

6. 2 Tiˆmoˉseˍ liꞈ 3:14, 15 hkʼaw kʼoˆ taˍ ve hkʼe, Tiˆmoˉseˍ Yeˍsuˆ htaꞈ hkʼaˬ hkʼe te yonˍ la gʼa ve le?

⁶ Tiˆmoˉseˍ yaˇ ehˉ htaˇ, oˇ htaˇ teˇ co˗e Yuˇdaꞈ chaw shiˍ ve hkʼe, Uˇniˆ lehˬ yawˇ ve yaˇ “daꞈ kehˬ ve Liꞈ hpu” htaꞈ shiˍ tuˬ coˇ caˇ leh maˍ piˇ ve yoˬ. Yaꞈ hkʼaˇ, yawˇ Yeˍsuˆ ve awˬ lawn htaꞈ maˇ shiˍ. Chi hkʼe hpehꞈ ve htawˇ, Uˇniˆ Tiˆmoˉseˍ htaꞈ maˍ piˇ ve awˬ ceuˬ kaꞈ Hkriꞈ yaˇ hpehꞈ la tuˬ awˬ hkʼaˇ cawˬ ve yoˬ. Yaꞈ hkʼaˇ, Tiˆmoˉseˍ yaˇ nehˬ hpehꞈ˗oˬ htaˇ, Hkriꞈ yaˇ hpehꞈ la tuˬ yawˇ hkʼaˇ yawˇ gʼa dawˇ cheˆ ve yoˬ. Leh hkʼawꞈ nawˉ htaˇ, yawˇ Hkriꞈ yaˇ hpehꞈ la ve yoˬ. Tiˆmoˉseˍ Yeˍsuˆ ve awˬ lawn htaꞈ ‘hkʼa dehꞈ yonˍ gʼa’ ve lehˬ awˬ e ga piˇ ve htaꞈ pa taw yoˬ. (2 Tiˆmoˉseˍ 3:14, 15 gʼaw sheˍ.) Uˇniˆ lehˬ yawˇ ve yaˇ Yaˬhoˉvaˬ ve kanˉ te la tuˬ maˍ piˇ gʼa ve ha lehˬ jaˇ! Uˇniˆ ve awˬ meh tcuhˉ kuiˬ lehˬ “gʼaˇ ve htaꞈ kʼoˆ gaˇ ve yoˬ.” Leh tuꞈ ve hkanˍ ve htaꞈ kaꞈ yawˇ gʼaˇ ve chi lehˬ yawˇ ve awˬ meh tcuhˉ kuiˬ htaꞈ keunˍ daꞈ jaˇ ve yoˬ.

7. Uˇniˆ yawˇ ve yaˇ paˍ Baˆtiˆsaˬ haꞈ yuˬ peuˬ hkʼawꞈ nawˉ, co ha hpawˇ uiˍ la mvuh la tuˬ hkʼaˬ hkʼe ga piˇ sheˍ ve le?

⁷ Tiˆmoˉseˍ Baˆtiˆsaˬ haꞈ yuˬ peuˬ hkʼawꞈ nawˉ, Uˇniˆ kaꞈ dawˇ haˍ chehˇ sheˍ. Awˬ gʼuˇ suhˍ hpawˇ yawˇ ve yaˇ paˍ hkʼaˬ hkʼe hpehꞈ tuˬ ve htaꞈ kaꞈ yawˇ dawˇ haˍ ve yoˬ hehˉ. Yawˇ maˇ daꞈ ve chaw htaꞈ awˬ chawˇ te tuˬ laˇ? Yawˇ Aˍhtenˍ venˇ lo liꞈ ca henˇ˗e htaˇ, oˇ kaˬ lo cuˇ yiˍ cawˬ paˍ maˍ ve htaꞈ yawˇ yonˍ tuˬ laˇ? Yawˇ yaˇ nehˬ hpehꞈ ve awˬ yanˇ leh awˬ gʼaˇ hpu shi mawˇ jeˬ htaꞈ gʼaꞈ ca tuˬ ve laˇ? Uˇniˆ leh Tiˆmoˉseˍ awˬ tan dawˇ cheˆ piˇ maˇ gʼa ve htawˇ, yawˇ yaˇ htaꞈ ga piˇ ve yoˬ. Yawˇ Tiˆmoˉseˍ htaꞈ hkʼaˬ hkʼe ga piˇ gʼa tuˬ le? Yawˇ ve yaˇ Yaˬhoˉvaˬ htaꞈ hkʼa dehꞈ haꞈ tuˬ maˍ ve, Yaˬhoˉvaˬ leh Yeˍsuˆ yawˇ hui awˬ pon te laˇ ve htaꞈ yawˇ awˬ hpfuhˇ shiˍ tuˬ kaꞈ maˍ piˇ ve yoˬ. Yehˬ kʼa hkʼaw bon liˇ htaꞈ yonˍ ve maˇ shiˍ daꞈ ve pa taw, yaˇ htaꞈ Yaˬhoˉvaˬ ve awˬ lawn maˍ piˇ ve lehˬ sha ve maˇ heˆ. Awˬ pa awˬ e Shaˉhkiˆhkanˍ ve chaw hpehꞈ ve htawˇ, yaˇ Gʼuiˬ sha ve kanˉ te la tuˬ ga piˇ ve lehˬ sha ve maˇ heˆ. Awˬ pa awˬ e Uˇniˆ htaꞈ hkʼaˬ hkʼe te henˇ yuˬ gʼa tuˬ le?

8. Awˬ hpawˇ yaˇ htaꞈ Yaˬhoˉvaˬ ve awˬ lawn maˍ piˇ tuˬ awˬ miˇ ma hkʼaˬ hkʼe ga piˇ gʼa ve le?

⁸ Yaˇ htaꞈ Liꞈ hpu maˍ piˇ ve. Awˬ viˉ awˬ nyi yaˇ  miˇ˗oˬ, nawˬ ve awˬ hpawˇ Shaˉhkiˆhkanˍ ve chaw hpehꞈ ve kʼo, Yaˬhoˉvaˬ lehˬ nawˬ ve awˬ hpawˇ yaˇ htaꞈ Yaˬhoˉvaˬ ve awˬ lawn maˍ piˇ htaˇ, nawˬ htaꞈ ga tcuh gaˇ ve yoˬ. Nawˬ te gʼa ve teˇ hpaˍ lehˬ, hkʼaˬ htaˆ kaꞈ yehˬ kʼa hkʼaw oˉ kʼoˍ pui ve htaꞈ awˬ gʼaˇ piˇ ve, daꞈ ve hpawˇ kʼoˆ tcuh gaˇ ve, pyawˍ leh awˬ bon cawˬ tuˬ hkʼaˬ hkʼe te gʼa ve htaꞈ kaꞈ dawˇ nyi tcuh gaˇ ve yoˬ. Yehˬ kʼa hkʼaw oˉ kʼoˍ pui htaˇ aˬ htoꞈ ma awˬ hkʼaˇ te gʼa tuˬ nawˬ awˬ hpawˇ htaꞈ ga piˇ gʼa ve yoˬ. Chi hkʼoˆ kaꞈ, yaˇ uiˍ la leh Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ henˇ gʼa˗oˬ ve kʼo, nawˬ ve awˬ hpawˇ geh tawˇ yaw daꞈ leh yaˇ htaꞈ ga piˇ sheˍ.

9. Awˬ e hpehꞈ ve chaw htaꞈ hkʼaˬ hkʼe hpawˇ ga laˇ gʼa sheˍ ve le?

⁹ Awˬ e teˇ gʼaˇ tiˉ yaˇ hu ve maˇ heˆ leh awˬ hpawˇ Shaˉhkiˆhkanˍ ve chaw maˇ hpehꞈ ve lehˬ, yehˬ kʼa hkʼaw oˉ kʼoˍ pui htaˇ yawˇ hui hkʼaˇ yawˇ hui sheh kʼai ve, maˇ heˆ leh yaˇ htaꞈ Liꞈ hpu yawˇ hui hkʼaˇ yawˇ hui gʼa maˍ piˇ ve yoˬ. Nawˬ chi hkʼe hpehꞈ ve kʼo, taˇ dawˇ haˍ. Awˬ lawn kʼo, Yaˬhoˉvaˬ nawˬ htaꞈ ga laˇ tuˬ yoˬ. Nawˬ yaˇ htaꞈ maˍ piˇ gʼa tuˬ Gʼuiˬ sha ve kanˉ hkʼaˇ laiˉ ceuˬ gu teh taˍ laˇ ve yoˬ. Maˇ heˆ leh awˬ hpawˇ awˬ miˇ ma yehˬ kʼa hkʼaw oˉ kʼoˍ pui ve hkʼaˬ htaˆ kaꞈ te gʼa ve chaw geh nawˬ htaꞈ beˆ maˍ laˇ tuˬ lawˬ gʼa ve yoˬ. c (Tawˇ naˉ ve 11:14) Chi hkʼoˆ kaꞈ, nawˬ ve yaˇ geh yaw daꞈ tuˬ Yaˬhoˉvaˬ ga laˇ tuˬ yoˬ. Yaˇ hkʼaˬ hkʼe dawˇ ve hkʼa dehꞈ na gʼa tuˬ, na sha ve na hkawˇ yehˇ puiˉ tuˬ, Yaˬhoˉvaˬ ga laˇ tuˬ bon lawˬ sheˍ. (Tawˇ naˉ ve 20:5) Nawˬ hkʼa sha sha˗ehˬ ve na hkawˇ htaꞈ yehˇ sheˍ. Tawˇ pa haˉ te kʼo, ‘yaˇ liꞈ henˇ kuiˬ lo aˬ htoꞈ ma htaꞈ dawˇ cawˇ ve maˇ cawˇ ve na piˇ sheˍ.’ Chi hkʼe na piˇ ve lehˬ, yaˇ nyi ma hkʼaw cawˬ ve awˬ ceuˬ kʼoˆ maˍ laˇ tuˬ yoˬ.

10. Yaˇ Yaˬhoˉvaˬ ve awˬ lawn henˇ ve ga piˇ tuˬ nawˬ aˬ htoꞈ ma te gʼa sheˍ ve le?

¹⁰ Yaˇ htaꞈ Yaˬhoˉvaˬ ve awˬ lawn coˇ caˇ leh hkʼa dehꞈ maˍ piˇ ve. Nawˬ yaˇ htaꞈ Yaˬhoˉvaˬ ve awˬ lawn teˇ hkui teˇ hkui kʼoˆ maˍ piˇ leh yawˇ nawˬ htaꞈ te laˇ ve awˬ ceuˬ kaꞈ yaˇ htaꞈ kʼoˆ maˍ piˇ sheˍ. (Bon maˍ ve 6:6, 7; Iˉsaˍyaˆ 63:7) Yaˇ htaꞈ aˉ hkʼaw Liꞈ hpu maˇ maˍ piˇ gʼa htaˇ, chi hkʼe te ve a yeˇ uiˍ jaˇ. Chi awˬ gʼuˇ suhˍ htaˇ henˇ kʼai peuˬ ve Hkiˆte kʼoˆ ve, “ngaˬ yaˇ htaꞈ Yaˬhoˉvaˬ ve awˬ lawn kʼoˆ maˍ piˇ tuˬ awˬ yanˇ maˇ cawˬ. Hkʼe te leh, te gʼa ve teˇ pawˆ le le yaˇ htaꞈ Yaˬhoˉvaˬ ve awˬ lawn kʼoˆ maˍ piˇ ve yoˬ. Teˇ pawˆ pawˆ ngaˬ hui teˇ geh juˇ guiˇ˗e ve maˇ heˆ leh haw loꞈ kʼoˍ ca gʼaꞈ guiˇ˗e ve yoˬ. Yaˬhoˉvaˬ hpanˍ taˍ ve daꞈ jaˇ ve awˬ ceuˬ ngaˬ yaˇ htaꞈ kʼoˆ maˍ piˇ ve yoˬ. Leh yaˇ Yaˬhoˉvaˬ htaꞈ awˬ chawˇ te la tuˬ awˬ nu ve awˬ hkʼaˇ kaꞈ kʼoˆ maˍ piˇ ve yoˬ. Yaˇ uiˍ la˗oˬ htaˇ, a shu yawˇ hkʼaˇ yawˇ Liꞈ hpu henˇ tuˬ ngaˬ ga piˇ ve yoˬ.” Chi hkʼoˆ kaꞈ, Gʼuiˬ sha ve kanˉ hkʼaˇ leh awˬ viˉ awˬ nyi htaꞈ caˉ daꞈ ve daꞈ ve awˬ lawn, nawˬ ve yaˇ htaꞈ kʼoˆ maˍ piˇ sheˍ. Nyi haꞈ shaˉ paˍ htaꞈ caˉ daꞈ ve maˇ daꞈ ve awˬ lawn nawˬ ve yaˇ htaꞈ taˇ kʼoˆ maˍ piˇ. Yaˇ shoꞈ shaꞈ ve awˬ lawn cawˬ htaˇ nyi haꞈ shaˉ paˍ geh kʼai tuˬ, maˇ kʼai tuˬ, nawˬ kʼoˆ ve awˬ lawn htaꞈ cawˬ ve yoˬ.

11. Yaˍkoˆ liꞈ 3:18 hkʼaw kʼoˆ taˍ ve hkʼe, yehˬ kʼa hkʼaw dawˇ sha gawˬ lehˍ ve cawˬ tuˬ aˬ htoꞈ ma te a yeˇ uiˍ jaˇ ve le?

¹¹ Yehˬ kʼa hkʼaw dawˇ sha gawˬ lehˍ ve cawˬ tuˬ te ve. Nawˬ awˬ hpawˇ leh yaˇ htaꞈ haꞈ ve tehꞈ teˇ hkui teˇ hkui kʼoˆ piˇ leh nawˬ yawˇ hui htaꞈ haꞈ ve tehꞈ shiˍ tcuh sheˍ. Nawˬ awˬ hpawˇ htaꞈ yawˆ yan ve hkʼaw tawˇ yaw piˇ leh yaˇ kaꞈ chi hkʼe te tuˬ maˍ piˇ sheˍ. Nawˬ chi hkʼe te ve kʼo, nawˬ ve yehˬ kʼa hkʼaw dawˇ sha gawˬ lehˍ ve cawˬ leh yaˇ Yaˬhoˉvaˬ ve awˬ lawn maˍ piˇ tuˬ sha ve yoˬ. (Yaˍkoˆ 3:18 gʼaw sheˍ) Roˬmaˇniˇ˗aˇ mvuhˇ miˬ lo chehˇ ve tcuh peu ve gʼuˇ suhˍ peuˍ ve te ve Yoˇsehꞈ kʼoˆ ve, “ngaˬ yaˇ ehˉ htaˇ, ngaˬ e, ngaˬ, leh yehˬ kʼa hkʼaw ve chaw Yaˬhoˉvaˬ ve kanˉ te ve htaꞈ ngaˬ pa tawˍ laˇ jaˇ. Yaꞈ hkʼaˇ, yehˬ kʼa hkʼaw dawˇ sha gawˬ lehˍ ve cawˬ tuˬ ngaˬ e coˇ caˇ jaˇ. Ngaˬ pa hehnˇ ve te htaˇ ngaˬ e nuˇ nehˬ ve hkʼaw te ve yoˬ. Ngaˬ hui ngaˬ pa htaꞈ hkʼa dehꞈ maˇ yawˆ yan leh yawˇ hkawˇ hkʼa dehꞈ maˇ na piˇ ve ngaˬ  e mawˬ htaˇ, Eˇfeˇsuꞈ liꞈ 6:1-3 hkʼaw ngaˬ e ngaˬ hui htaꞈ kʼoˆ maˍ laˇ ve yoˬ. Ngaˬ pa hkʼaˬ hkʼe hpawˇ daꞈ ve ngaˬ e ngaˬ hui htaꞈ kʼoˆ maˍ laˇ leh aˬ htoꞈ ma te ngaˬ hui ngaˬ pa htaꞈ gʼa haꞈ leh gʼa yawˆ yan cawˇ ve kaꞈ kʼoˆ maˍ laˇ ve yoˬ. Laiˉ pawˆ ngaˬ hui ve yehˬ kʼa hkʼaw hpehꞈ haˍ jaˇ ve htawˇ, ngaˬ e dawˇ sha gawˬ lehˍ ve cawˬ tuˬ te ve yoˬ.”

12. 2 Tiˆmoˉseˍ liꞈ 1:5 hkʼaw kʼoˆ taˍ ve hkʼe, Uˇniˆ ve awˬ lawn Tiˆmoˉseˍ henˇ yuˬ gʼa tuˬ hkʼaˬ hkʼe cawˬ ve le?

¹² 2 Tiˆmoˉseˍ liꞈ 1:5 gʼaw sheˍ. Uˇniˆ lehˬ Tiˆmoˉseˍ awˬ pon daꞈ ve henˇ yuˬ tuˬ hpehꞈ ve yoˬ. Yonˍ ve teˇ ceuˬ lehˬ gʼa te tawˆ la ve tehꞈ yawˇ yaˇ htaꞈ maˍ piˇ ve yoˬ. (Yaˍkoˆ 2:26) Tiˆmoˉseˍ awˬ e te ve awˬ ceuˬ htaꞈ mawˬ leh awˬ e Yaˬhoˉvaˬ htaꞈ haꞈ jaˇ ve kaꞈ mawˬ ve yoˬ. Awˬ e Yaˬhoˉvaˬ ve kanˉ te leh ha lehˬ jaˇ ve kaꞈ yawˇ mawˬ ve yoˬ. Uˇniˆ ve awˬ lawn Tiˆmoˉseˍ hkʼaˬ hkʼe henˇ yuˬ gʼa ve le? Tiˆmoˉseˍ lehˬ awˬ e hkʼa shuˍ yonˍ hkʼaˇ yonˍ yeˬ jaˇ ve tehꞈ Pawˇluꞈ kʼoˆ ve yoˬ. Chi lehˬ yawˇ hkʼaˇ yawˇ hpehꞈ la maˇ gʼa. Yawˇ awˬ e htaꞈ mawˬ leh henˇ yuˬ ve yoˬ. Chi beuꞈ teˇ co˗e kaꞈ hkʼa shuˍ shuˍ awˬ viˉ awˬ nyi yaˇ miˇ laiˉ gʼaˇ te hkʼaˇ dawˇ hkʼaˇ htaꞈ pa taw, “teꞈ chiˉ maˇ kʼoˆ maˍ piˇ ve kaꞈ” yehˬ kʼa hkʼaw ve chaw htaꞈ maˍ piˇ gʼa ve yoˬ. Leh yawˇ hui Yaˬhoˉvaˬ htaꞈ oˉ kʼoˍ pui la tuˬ kaꞈ maˍ piˇ gʼa ve yoˬ. (1 Peˍtruˆ 3:1, 2) Nawˬ kaꞈ yawˇ hui hkʼa shuˍ te gʼa ve yoˬ. Leh nawˬ aˬ htoꞈ ma gʼa te cawˇ ve le?

13. Aˬ htoꞈ ma te awˬ e Yaˬhoˉvaˬ geh meuˆ daꞈ tuˬ a yeˇ uiˍ jaˇ ve le?

¹³ Nawˬ Yaˬhoˉvaˬ geh meuˆ daꞈ ve a yeˇ uiˍ jaˇ ve. (Bon maˍ ve 6:5, 6) Yaˇ htaꞈ laiˉ ceuˬ hpawˇ nyi haꞈ shaˉ tuˬ, maˇ˗awˍ ve awˬ e lehˬ awˬ yanˇ, hpu shiˍ mawˇ jeˬ, zuhꞈ ve awˬ yanˇ, chi ve teˇ hpaˍ awˬ e yuˬ tanˇ ve hkʼe nawˬ kaꞈ gʼa yuˬ tanˇ ve yoˬ. Yaꞈ hkʼaˇ, nawˬ kanˉ maˇ jaˇ leh nawˬ Yaˬhoˉvaˬ geh meuˆ daꞈ tuˬ awˬ yanˇ maˇ cawˬ ve taˇ te tcuh. Leh nawˬ laiˉ ceuˬ hpawˇ awˬ yanˇ yuˬ tanˇ ve htawˇ, bon lawˬ tuˬ awˬ yanˇ, a shu yawˇ hkʼaˇ yawˇ Liꞈ hpu henˇ tuˬ awˬ yanˇ, leh hkʼaˬ htaˆ kaꞈ hpawnˬ da˗e tuˬ awˬ yanˇ shawˍ teh cawˇ ve yoˬ. Leh chi ve teˇ hpaˍ htaꞈ te tuˬ awˬ yanˇ maˇ cawˬ ve taˇ te piˇ. Chi ve teˇ hpaˍ htaꞈ nawˬ te ve kʼo, nawˬ Yaˬhoˉvaˬ geh hkʼa dehꞈ meuˆ daꞈ tuˬ yoˬ. Leh nawˬ ve yehˬ kʼa hkʼaw ve chaw leh awˬ nu ve chaw awˬ pon nawˬ daꞈ ve henˇ yuˬ tuˬ hpehꞈ ve yoˬ.

14-15. Len, Maˍriˆ, leh Chan ve awˬ lawn htaꞈ nawˬ aˬ htoꞈ ma henˇ yuˬ gʼa ve le?

¹⁴ Yawˇ hui ve awˬ e ve awˬ lawn htaꞈ pa taw, yawˇ hui Yaˬhoˉvaˬ htaꞈ haꞈ leh gʼaˇ va ve awˬ lawn htaꞈ teˇ geh nyi sheˍ. Hkiˆte ve yaˇ miˇ Len kʼoˆ ve, “ngaˬ pa aˉ hkʼaw chehˇ˗aˬ htaˇ, ngaˬ e ngaˬ hui htaꞈ Liꞈ hpu maˍ laˇ maˇ gʼa. Yaꞈ hkʼaˇ, ngaˬ e hpawnˬ daꞈ ve hkʼaˬ htaˆ kaꞈ kʼai ve ngaˬ hui mawˬ ve yoˬ. Ngaˬ hui Liꞈ hpu hkʼaw ve awˬ lawn hkʼa dehꞈ maˇ shiˍ ve htawˇ, ngaˬ e ve awˬ lawn ngaˬ hui yonˍ hkʼaˇ yonˍ yeˬ tuˬ te laˇ ve yoˬ. Ngaˬ hui hpawnˬ daꞈ ve maˇ kʼai sheˍ htaˇ kaꞈ chi ve awˬ tehˬ hpehꞈ ve tehꞈ shiˍ ve laiˉ hkʼawꞈ gaˬ˗oˬ.”

¹⁵ Maˍriˆ kʼoˆ ve, “ngaˬ leh ngaˬ e leh ngaˬ nyi ngaˬ nanˉ teˇ hpaˍ ngaˬ hui hpawnˬ daꞈ˗e ve kʼo, ngaˬ pa deˇ leh dawˆ laˇ ve yoˬ.” Yawˇ kʼawꞈ kʼoˆ ve, “ngaˬ e lehˬ haꞈ hanˉ jaˇ ve yaˇ miˇ hpehꞈ ve yoˬ. Ngaˬ yaˇ ehˉ htaˇ shu kʼoˆ guiˇ la ve htaꞈ ngaˬ kawˆ ve pa taw, laiˉ pawˆ kʼo ngaˬ teˇ ceuˬ ceuˬ maˇ te. Ngaˬ e haꞈ hanˉ jaˇ leh a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve ngaˬ gʼa mawˬ htaˇ, ngaˬ kaꞈ haꞈ hanˉ leh maˇ kawˆ˗o.” Awˬ viˉ awˬ nyi hawˉ hkʼaˆ Chan ve awˬ pa lehˬ, yehˬ kʼa hkʼaw ve chaw htaꞈ Yaˬhoˉvaˬ leh Liꞈ hpu hkʼaw ve awˬ lawn maˇ yaw daꞈ tcuh. Chan kʼoˆ ve, “ngaˬ dawˇ ve ngaˬ htaꞈ ga laˇ gʼa jaˇ ve, ngaˬ e lehˬ ngaˬ pa dawˇ cawˇ tuˬ teˇ ceuˬ le le te piˇ ve yoˬ. Yaꞈ hkʼaˇ, Gʼuiˬ sha ve awˬ lawn htaꞈ caˉ daꞈ ve kʼo, ngaˬ pa kʼoˆ ve htaꞈ ngaˬ e maˇ na. Ngaˬ e lehˬ Yaˬhoˉvaˬ htaꞈ haꞈ jaˇ.”

16. Awˬ e ve awˬ lawn awˬ nu ve chaw awˬ pon awˬ bon hkʼaˬ hkʼe cawˬ ve le?

¹⁶ Awˬ e hpehꞈ ve chaw˗oˬ, nawˬ ve awˬ lawn awˬ nu ve chaw awˬ pon awˬ bon cawˬ jaˇ tehꞈ tawnˇ taˍ sheˍ. Uˇniˆ ve awˬ lawn tcuh yaˇ Pawˇluꞈ awˬ pon  awˬ bon hkʼaˬ hkʼe cawˬ ve dawˇ nyi sheˍ. Pawˇluꞈ Tiˆmoˉseˍ htaꞈ liꞈ bvuhꞈ piˇ htaˇ, ‘nawˬ nyi ma awˬ tawˬ hkʼa gaˬ yonˍ ve teˇ ceuˬ htaꞈ ngaˬ dawˇ nawˇ ve yoˬ. Awˉ lawˉ htaˇ nawˬ ve awˬ e Uˇniˆ yonˍ ve cawˬ ve yoˬ.’ (2 Tiˆmoˉseˍ 1:5) Pawˇluꞈ Uˇniˆ yonˍ ve htaꞈ hkʼaˬ htaˆ mawˬ ve le? Yawˇ shu mvuhˇ miˬ lo miˍshenˍnaˍliˍ te ve awˉ lawˉ teˇ pawˆ htaˇ, Luˉtaˍraˆ venˇ lo yawˇ Lawˇiˆ leh Uˇniˆ htaꞈ mawˬ daꞈ ve yoˬ hehˉ. Leh Pawˇluꞈ kaꞈ yawˇ huiˉ maˬ Yeˍsuˆ htaꞈ yonˍ la tuˬ ga piˇ ve yoˬ hehˉ. (Tcuh yaˇ 14:4-18) 15 hkʼawꞈ peuˬ hkʼawꞈ nawˉ, Pawˇluꞈ Tiˆmoˉseˍ htaꞈ liꞈ bvuhꞈ piˇ htaˇ, Uˇniˆ ka tiꞈ yeˬ ve awˬ lawn htaꞈ yawˇ tawnˇ gʼa ve yoˬ. Leh Pawˇluꞈ kʼoˆ ve, Uˇniˆ lehˬ daꞈ ve henˇ yuˬ tuˬ hpehꞈ ve yoˬ. Oˇ htaˇ teˇ co˗e Pawˇluꞈ leh awˬ nu ve Hkriꞈ yaˇ teˇ hpaˍ lehˬ Uˇniˆ ve awˬ lawn htaꞈ dawˇ cawˇ jaˇ ve yoˬ. Leh Uˇniˆ ve awˬ lawn kaꞈ yawˇ hui htaꞈ awˬ gʼaˇ peꞈ piˇ jaˇ. Awˬ e teˇ gʼaˇ tiˉ yaˇ hu ve leh awˬ hpawˇ Shaˉhkiˆhkanˍ ve chaw maˇ hpehꞈ ve kʼo, awˬ nu ve chaw htaꞈ awˬ gʼaˇ piˇ leh yawˇ hui awˬ pon awˬ bon cawˬ ve tehꞈ yonˍ sheˍ.

17. Nawˬ maˍ piˇ ve htaꞈ yaˇ a yeˇ maˇ yuˬ ve tehꞈ mawˬ ve kʼo, nawˬ hkʼaˬ hkʼe te cawˇ ve le?

¹⁷ Nawˬ maˍ piˇ ve htaꞈ yaˇ a yeˇ maˇ yuˬ ve tehꞈ mawˬ ve kʼo, nawˬ hkʼaˬ hkʼe te cawˇ ve le? Yaˇ htaꞈ maˍ piˇ ve lehˬ awˬ yanˇ gʼa yehˇ ve tehꞈ tawnˇ taˍ sheˍ. Awˬ lawn chi ve hkʼaw ve awˬ han hkʼaw hkʼa shuˍ nawˬ awˬ yawˇ sheˍ ve kʼo, awˬ yawˇ oˇ ve awˬ cehˬ hpehꞈ la leh awˬ shiˍ nawꞈ la tuˬ yoˬ tehꞈ nawˬ maˇ yonˍ gʼa. Nawˬ lehˬ uiˍ la tuˬ nyiˉ piˇ maˇ gʼa ve htawˇ, awˬ yawˇ oˇ ve awˬ cehˬ hpehꞈ la leh awˬ shiˍ nawꞈ la tuˬ nawˬ caˉ leh iˉ kaˆ pfuhˍ piˇ ve yoˬ. (Maˍkuˆ 4:26-29) Chi ve hkʼa shuˍ shuˍ, awˬ e hpehꞈ ve chaw˗oˬ, yaˇ Yaˬhoˉvaˬ htaꞈ haꞈ tuˬ ga piˇ gʼa˗aw laˇ tehꞈ nawˬ hkʼa dehꞈ maˇ yonˍ gʼa ve yoˬ  hehˉ. Yaˇ Yaˬhoˉvaˬ htaꞈ haꞈ tuˬ nawˬ nyiˉ piˇ maˇ gʼa ve htawˇ, nawˬ caˉ leh yaˇ htaꞈ maˍ piˇ ve kʼo, yaˇ Yaˬhoˉvaˬ htaꞈ awˬ chawˇ te la tuˬ nawˬ ga piˇ chehˇ ve yoˬ.—Tawˇ naˉ ve 22:6.

18. Nawˬ ve yaˇ Yaˬhoˉvaˬ htaꞈ awˬ chawˇ te tuˬ hkʼaˬ hkʼe ga laˇ ve le?

¹⁸ Liꞈ hpu ve awˬ co˗e htaˇ tanˬ leh chi beuꞈ hkʼa gaˬ yaˇ Yaˬhoˉvaˬ htaꞈ awˬ chawˇ te la tuˬ yawˇ ga piˇ jaw˗oˬ. (Chiˇ mvuh ve 22:9, 10) Yaˇ hui ga laˇ tuˬ loˍ ve kʼo, nawˬ ve yaˇ kaꞈ Yaˬhoˉvaˬ htaꞈ awˬ chawˇ te la tuˬ yawˇ ga laˇ tuˬ yoˬ. (1 Kawˇrenˍhtuˆ 3:6, 7) Nawˬ ve yaˇ kaꞈ awˬ tehˬ ve htaꞈ maˇ yonˍ˗o htaˇ, Yaˬhoˉvaˬ kaꞈ yawˇ htaꞈ haꞈ leh nyi chehˇ sheˍ ve yoˬ. (Chiˇ mvuh ve 11:4) Yawˇ hui Yaˬhoˉvaˬ nyi hkʼaˇ suh tuˬ a ciˉ ceh tiˉ hpeuꞈ maw piˇ ve htawˇ, yawˇ hui Gʼuiˬ sha htaꞈ awˬ chawˇ te la tuˬ yawˇ ga piˇ tuˬ yoˬ. (Tcuh yaˇ 13:48; 2 Raˍsaˍvanˍ 16:9) Yaˇ htaꞈ aˬ htoꞈ ma yaw piˇ tuˬ leh hkʼaˬ htaˆ yaw piˇ tuˬ, nawˬ htaꞈ Gʼuiˬ sha ga laˇ tuˬ yoˬ. Awˬ yanˇ chi ve lehˬ yaˇ ga laˇ tuˬ loˍ jaˇ ve awˬ yanˇ hpehꞈ ve yoˬ hehˉ. (Tawˇ naˉ ve 15:23) Maˇ heˆ leh Hkriꞈ yaˇ awˬ moˍ hkʼaw ve awˬ viˉ awˬ nyi yawˇ htaꞈ a yeˇ yuˬ piˇ tuˬ, Yaˬhoˉvaˬ ga piˇ tuˬ yoˬ. Nawˬ ve yaˇ, yaˇ nehˬ hpehꞈ˗oˬ ve htawˇ, yawˇ yaˇ ehˉ htaˇ nawˬ yawˇ htaꞈ Yaˬhoˉvaˬ ve awˬ lawn maˍ piˇ ve teˇ lawn lawn htaꞈ yawˇ tawnˇ gʼa tuˬ Yaˬhoˉvaˬ ga piˇ tuˬ yoˬ. (Yoˇhanˬ 14:26) Nawˬ yaˇ htaꞈ hkʼa dehꞈ maˍ piˇ leh nawˬ ve awˬ lawn yaˇ htaꞈ caˉ leh maˍ piˇ ve kʼo, Yaˬhoˉvaˬ nawˬ htaꞈ awˬ bon naꞈ laˇ tuˬ yoˬ.

19. Nawˬ htaꞈ Yaˬhoˉvaˬ nyi hkʼaˇ suh ve tehꞈ aˬ htoꞈ ma te yonˍ gʼa ve le?

¹⁹ Yaˬhoˉvaˬ nawˬ htaꞈ haꞈ tuˬ maˇ haꞈ tuˬ, nawˬ ve yaˇ Yaˬhoˉvaˬ ve kanˉ te tuˬ dawˇ cheˆ ve htaꞈ maˇ cawˬ. Yaˬhoˉvaˬ nawˬ htaꞈ haꞈ ve lehˬ, nawˬ yawˇ htaꞈ haꞈ ve pa taw yoˬ. Nawˬ awˬ e hpehꞈ leh teˇ gʼaˇ tiˉ yaˇ htaꞈ hu ve kʼo, Yaˬhoˉvaˬ lehˬ nawˬ ve yaˇ awˬ pa te laˇ tuˬ yoˬ tehꞈ ka tiꞈ te laˇ taˍ ve yoˬ. Leh nawˬ htaꞈ kaꞈ haꞈ shaˉ laˇ tuˬ yoˬ. (Chiˇ mvuh ve 68:5) Nawˬ ve yaˇ dawˇ cheˆ leh Yaˬhoˉvaˬ ve kanˉ te la tuˬ nawˬ nyiˉ piˇ maˇ gʼa. Yaꞈ hkʼaˇ, Yaˬhoˉvaˬ ga laˇ tuˬ nawˬ gʼaˇ va leh caˉ leh yaˇ htaꞈ maˍ piˇ ve kʼo, nawˬ Yaˬhoˉvaˬ nyi hkʼaˇ suh tuˬ te piˇ ve yoˬ.