1-2. (a) Uno Yunese apwile iya, kaha ukalu muka amwene hakuwana nge apwile chisemi? (b) Hanjikenu hamuvwimbimbi wahalipapilo lyahelu.

 NUMBA tuhu Mbimbiliya kayahanjika vyalumbapachiso lwaChimoteuko, oloze twafwelela ngwetu naye Yunese evwile kuwaha chikuma halikumbi vambapachishile Chimoteu. (Vishi. 23:25) Achishinganyekenu ocho kuwaha evwile hakumona mwanenyi Chimoteu nemana mumeya mangana vamumbapachise. Yunese ali nakumwesamwesa kukanwa, kaha kaka yaChimoteu Lowise nakwate mwanenyi Yunese halihye. Yunese nalakika mwono omu mwanenyi Chimoteu vanakumujimika mumeya. Kahomu navamufwapula mumeya, Yunese himwaputuka kusotola masoji akuwahilila hakumona mwanenyi walunga vanamumbapachisa. Chikupu vene, Yunese awahililile chikuma! Akilikichile chikuma hakukafwa mwanenyi alinangule kuzanga Yehova naMwanenyi Yesu Kulishitu numba tuhu kachapwile chachashi kulinga ngochoko. Uno ukalu muka apwile nakumona Yunese hakunangula mwanenyi?

² Chimoteu akolelele mutanga yakwitava chakulihandununa. Ise apwile kaHelase, kaha naye nakaka yenyi vapwile vaYuleya. (Vili. 16:1) Chasoloka nge Chimoteu apwile kanyike halwola naye Yunese nakaka yenyi Lowise valumukile nakupwa vaka-Kulishitu. Chipwe ngocho Ise kalumukile nakupwa muka-Kulishituko. Uno Chimoteu atelelele kusakula kulondezeza ise tahi nyi naye? Hakuwana nge pamo kapwile kanyike chikumako, ngocho ivene atelele kulisakwila vyakulinga. Uno alondezezele ise tahi? Kutala asakwile kukakachila kuvisemwa vyavaYuleya vize vamunangwile kufuma kuunyike tahi? Nyi asakwile kupwa muka-Kulishitu?

3. Kweseka naVishimo 1:8, 9, uno Yehova amona ngachilihi mulimo veji kuzatanga visemi vamapwevo hakukafwa vana vavo vapwenga masepa jenyi?

³ Namakumbi ano visemi vaka-Kulishitu vamapwevo vazanga jitanga javo. Chuma chachilemu vafwila kulinga shina kukafwa vana vavo vapwenga masepa jaYehova. Kalunga amona kukilikita chava  visemi kupwa chachilemu chikuma. (Tangenu Vishimo 1:8, 9.) Yehova nakafwe visemi vamapwevo vavavulu vanangule vana vavo muchano.

4. Ukalu muka vali nakumona visemi vamapwevo makumbi ano?

⁴ Visemi vamapwevo veji kulizakaminanga numba nge vana vavo navakasakula kuzachila Yehova ngana muze alingile Chimoteu. Veji kulizakaminanga mwomwo yakumona ukalu vali nakuhitamo vana vavo mukaye kano kaSatana. (Petu. 1, 5:8) Kaha nawa visemi vamapwevo vavavulu cheji kuvakaluhwilanga kulela vana vavo mwomwo yakuhona kupwa nalunga chipwe pamo mwomwo lunga lyavo kazachila Yehovako. Tutalenu chakutalilaho chandumbwetu wapwevo Christine, * ambile ngwenyi: “Lunga lyami apwile mutu wamwenemwene chikuma kaha nawa azakaminenga tanga, oloze kasakilenga ami ngunangule vana vetu vapwenga Vinjiho jaYehovako. Hamyaka yayivulu ngwalililenga chikuma hakushinganyeka numba nge vana vami navakazachila Yehova mukuyoya chavo nyi chiku.”

5. Vyuma muka natushimutwila muchihande chino?

⁵ Enu visemi vaka-Kulishitu vamapwevo, tachikizenu ngwenu nayenu munahase kunangula vana venu vazange Yehova nakumuzachila ngana muze alingile Yunese. Muchihande chino natushimutwila omwo munahase kulondezeza Yunese hakunangula vana venu kuhichila muvyuma namulinga namuhanjikiso yenu. Natushimutwila nawa omwo Yehova mwamikafwa hakuzata milimo kana.

6. Kweseka namazu ahali WaChimoteu 2, 3:14, 15, uno Chimoteu ejile nakupwa ngachilihi muka-Kulishitu?

⁶ Omu Chimoteu apwile kanyike, naye akilikichile hakumunangula atachikize “mikanda yajila” kweseka namuze vayivwishishililemo vaYuleya. Chipwe ngocho, Yunese apwile nachinyingi chachindende mwomwo nachuma atachikijile hali Yesu Kulishitu vene chauchi. Oloze vyuma vyamuVisoneka vamunangwile Chimoteu vyatelele kumukafwa asakule kupwa muka-Kulishitu. Kutala asakwile kupwa muka-Kulishitu tahi? Chimoteu apwile nalisesa lyakusakula kupwa muka-Kulishitu. Twafwelela chikupu ngwetu nakukilikita chanaye nawa ‘chamukunywile etavile’ muchano wakuvuluka Yesu. (Tangenu WaChimoteu 2, 3:14, 15.) Yunese awahililile chikuma hakunangula mwanenyi vyaYehova numba tuhu chapwile chachikalu kulinga ngocho. Chikupu vene Yunese ateselemo ulumbunwiso walijina lyenyi lize lyalumbununa “kufungulula.”

7. Uno Yunese akafwile ngachilihi mwanenyi atwaleho lika kuzovoloka nahanyima yakumumbapachisa?

⁷ Omu Chimoteu vamumbapachishile ateselemo chuma chachilemu chikuma mukuyoya. Chipwe ngocho naye atwalileho lika kulizakamina. Pamo alihulishilenga ngwenyi: ‘Uno mwanami mwazachisa ngachilihi kuyoya chenyi? Kutala mwalikata navatu vavapi tahi? Uno mwakaya kushikola yakuAtene nakulinangula mangana autu nakuwafwelela tahi? Kutala mwenyeka lwola lwenyi, nangolo jenyi, naukweze wenyi hakuzata chikuma nangolo apwenga naluheto tahi?’ Numba tuhu Chimoteu atelelele kulisakwila ivene vyakulinga, oloze naye amukafwile asakule kanawa vyakulinga mukuyoya. Amukafwile ngachilihi? Atwalileho lika kuzata nangolo akafwe mwanenyi azange chikuma Yehova, naMwanenyi Yesu Kulishitu nakuvasakwilila havyuma vavalingililile mwatanga. Visemi vaze vatwama mumalo navakamahyavo vaze kavazachila Yehovako keshi vakiko kaha vali nakumona ukalu hakulela vanako. Numba vene nge visemi vosena vapwa Vinjiho jaYehova, chinahase kupwa chachikalu kunangula vana nakuvaheta  hamichima mangana vakazachile Yehova mukuyoya chavo chosena. Jino vyuma muka navalinangula visemi kuli Yunese?

8. Uno chisemi wapwevo nahase kukafwa ngachilihi lunga lyenyi uze apwa Chinjiho chaYehova omu mwanangulanga vana vyaYehova?

⁸ Nangulenu vana venu Mbimbiliya. Enu vandumbwetu vamapwevo, kachi nge lunga lyenu apwa Chinjiho chaYehova, kaha tachikizenu ngwenu Yehova ali nakusaka muzachile hamwe hakukafwa vana venu kushipilitu. Jila yimwe munahase kulingilamo ngocho shina, kukundwizanga lunga lyenu hakuwahisa vyuma vyakupandama kuKulemesa Kalunga mwaTanga. Hanjikiso yenu yatela kusolola hatoma nge mwamona Kulemesa Kalunga mwaTanga kupwa chuma chachilemu chikuma. Kaha nawa mwatela kushinganyeka havyuma munahase kulinga mangana vosena vaze navapwa kuKulemesa Kalunga mwaTanga valivwise kuwaha. Munahase kukafwa lunga lyenu kunoneka vyuma namukashimutwila chipwe vize namukalinga haKulemesa Kalunga mwaTanga. Kaha nawa kachi nge vana venu vanatemo kulinangula Mbimbiliya kuzachisa mukanda waLivwise Kuwaha Kuyoya Haya Myaka, kaha munahase kulongesa kanawa vyuma mukafwe lunga lyenu atesemo mulimo wakunangula vana.

9. Vyuma muka navikafwa chisemi wapwevo anangule vana venyi numba tuhu lunga lyenyi kapwa Chinjiho chaYehovako?

⁹ Visemi vamwe vamapwevo veji kunangulanga vana vavo Mbimbiliya pamo mwomwo yakuhona kupwa nalunga, chipwe pamo lunga lyavo kapwa Chinjiho chaYehovako. Kachi nge omu mukiko chili nakuli enu, kaha kanda namulizakaminako, Yehova mwamikafwa. Zachisenu vinoma vize Yehova Kalunga atuhana kuhichila muliuka lyenyi mangana munangule vana venu. Munahase kuhulisa nawa visemi vaze vapwa vasachitetahundu mangana vamikafwe mutachikize mwakuzachishila vinoma kana haKulemesa Kalunga mwaTanga. * (Vishi. 11:14) Yehova nahase nawa kumikafwa mutachikize omwo munahase kushimutwila kanawa navana venu. Mulombenu amikafwe mwijive vihula munahase kuvahulisa mangana mutachikize vishinganyeka vyavo. (Vishi. 20:5) Munahase kuvahulisa chihula chakufwa nge, ‘Ukalu muka waunene uli nakumona kushikola?’ Kumuhulisa mujila kaneyi chinahase kumikafwa mushimutwile nakutachikiza kanawa vishinganyeka vyenyi.

10. Vyuma muka vikwavo munahase kulinga mangana mukafwe vana venu valinangule vyaYehova?

¹⁰ Wanenunga jijila jakunangwilamo vana venu vyaYehova. Lwezenunga vana venu vyaYehova navyuma vyavivulu vize namilingila. (Lushi. 6:6, 7; Isa. 63:7) Kulinga chuma kana chapwa chachilemu, chikumanyi nge cheji kumikaluhwilanga kunangula vana venu nge muli hembo. Ndumbwetu Christine uze twavulukanga hakavanga ambile ngwenyi: “Chapwile chachikalu chikuma kunangwila vana vami vyaYehova hembo, ngocho ngwavanangwilenga kala kwosena okwo twayilenga. Twayilenga nakwolola mahinji chipwe kunyina muwato nakuzauka nakuya hasali mangana tukashimutwile havyuma atenga Yehova navyuma vyeka vyakushipilitu. Omu valingile vana vami hivanakoloko lyehi, ngwavakolezezele valinangule Mbimbiliya hauka wavo.” Kaha nawa hanjikenunga vyuma vyamwaza haliuka lyaYehova nahali vandumbwenu vosena, kamwatela kuhanjikanga vyavipi hali vakulwane muchikungulwiloko. Vyuma namuhanjika vinahase kulingisa vana venu vakahase kupwa vakukasunuka kulweza vakulwane ukalu navakahitamo chipwe chiku.

11. Kweseka namazu ahali WaYakova 3:18, mwomwo ika chapwila chachilemu kuneha kuunda hembo?

¹¹ Twamenunga mukuunda hembo. Lingenunga vyuma vize navisolola nge mwazanga lunga lyenu  navana venu. Hanjikenunga hali lunga lyenu mujila yalikoji nakalemesa, nakunangula vana venu nawa valingenga mwomumwe. Nge namulinga ngocho kaha nachipwa chachashi chikuma kukafwa vana venu valinangule vyaYehova. (Tangenu WaYakova 3:18.) Talenu chakutalilaho chaJozsef uze apwa payiniya wakulipwila muRomania. Omu apwile kanyike, ise afwililile kuvahonesa mutanga yovo kuzachila Yehova. Kaha Jozsef ambile ngwenyi: “Mama azachile nangolo jenyi josena mangana anehe kuunda hembo. Tata apihilililenga chikuma kaha nawa mama asolwelenga chikuma muchima walikoji. Omu mama amwenenga ngwenyi ami navasongo jami chinakutukaluhwila kuvumbika tata nakumwononoka, mama ashimutwililenga nayetu chisoneka chaWavaka-Efwesu 6:1-3. Kaha ahanjikilenga vilinga vyamwaza atwama navyo tata nakutukafwa tumumone kupwa wamulemu. Evi vyuma alingilenga mama vyakafwile tanga yetu yitwame mukuunda.”

12. Kweseka namazu ahali WaChimoteu 2, 1:5, uno vilinga vyaYunese vyakafwile ngachilihi Chimoteu?

¹² Tangenu WaChimoteu 2, 1:5. Yunese ahanyine chakutalilaho chamwaza kuli Chimoteu. Twafwelela amunangwile ngwenyi, lufwelelo lwetu lwamuchano twatela kulusolola kuhichila muvilinga. (Yako. 2:26) Chimoteu amwene chikupu ngwenyi vyuma vyosena vize alingilenga naye avilingile mwomwo yakuzanga chikuma Yehova. Amwene nawa ngwenyi naye awahilililenga mwomwo yakuzachila Yehova. Uno vilinga vyaYunese vyakwachile ngachilihi hali Chimoteu? Kweseka namazu aze ahanjikile kaposetolo Paulu, Chimoteu apwile nalufwelelo lwakukola ngana lwanaye. Chikupu vene, lufwelelo lwenyi kalwalijililile luveneko, oloze alondezezele kanawa vilinga vyanaye. Chochimwe nawa namakumbi ano, visemi vamapwevo vavavulu vanakafwe jitanga javo vazachile Yehova “chakuzeneka mazu.” (Petu. 1, 3:1, 2) Nayenu munahase kulinga mwomumwe. Mujila muka?

13. Mwomwo ika chisemi wapwevo atela kumona usoko wenyi naYehova kupwa waulemu chikuma?

¹³ Mwatela kumona usoko wenu naYehova kupwa waulemu. (Lushi. 6:5, 6) Ngana mwavisemi vamapwevo vavavulu, nayenu mweji kulisuulanga kuzachisa lwola lwenu, najimbongo jenu, navyuma vyeka mangana mutondele vana venu vyuma vyakulikafwa navyo mukuyoya. Kutondatonda vyuma kanevi kachatela kumilingisa muliule usoko wenu naYehovako. Mwatela kuwanangako lwola lwakulomba, nalwakulinangula Mbimbiliya nalwakupwanga kukukunguluka. Nge namulinga ngocho, kaha namuzama kushipilitu nakuhana chakutalilaho chamwaza kutanga yenu nakuli vandumbwenu.

14-15. Vyuma muka munalinangula kuli Leanne, naMaria, naJoão?

¹⁴ Tushimutwilenu hali vanyike vaze vazangile Yehova nakumufwelela mwomwo yakulondezeza visemi javo vamapwevo. Mwana Christine wapwevo walijina lyaLeanne ambile ngwenyi: “Nge tata ali hembo katwalinangwilengako, oloze mama atwalileho lika kupwanga kukukunguluka. Numba tuhu katwapwile nachinyingi chachivulu chamuMbimbiliyako, oloze vilinga vyamwaza vyamama vyatukafwile tupwenga nalufwelelo lwakukola. Shimbu kanda tuputuke nakuyanga kukukunguluka, twatachikijile ngwetu vyuma afwelelele mama vapwile vyamuchano.”

¹⁵ Ise yaMaria azangamishilenga tanga yenyi mwomwo yakusaka kuya kukukunguluka. Kaha Maria ambile ngwenyi: “Mama apwa wakuhamuka ngana mwavandumbwetu vamapwevo vamwe vaze ngwatachikiza. Omu ngwapwile ngukanyike, shimbu jimwe ngwakanyinenga kulinga vyuma vimwe mwomwo ngwalizakaminyinenga havyuma navahanjika vakwetu, oloze kumona omu mama omikilenga nakuhaka chatete  Yehova kulutwe mukuyoya chenyi, changukafwile nguhone kwivwa woma vatu.” Ise yaJoão akanyishilenga tanga kushimutwila vyuma vyakushipilitu. Kaha João ambile ngwenyi: “Chuma changukafwile shina kumona omu mama alisuwile kulinga vyuma vyosena mangana evwise tata kuwaha, oloze kamuhonesele kuzanga Yehovako.”

16. Uno chakutalilaho chavisemi vamapwevo chinahase kukafwa ngachilihi vakwavo?

¹⁶ Enu visemi vamapwevo tachikizenu ngwenu chakutalilaho chenu chinahase kukafwa vakwenu. Mujila muka? Achishinganyekenu omu vyuma alingile Yunese vyakwachile kaposetolo Paulu kumuchima. Asonekele ngwenyi Chimoteu apwile nalufwelelo lwakuzeneka kulyonga ‘luze lwavangilile kupwa muli naye Yunese.’ (Chimo. 2, 1:5) Lwola muka lwatete Paulu amwene lufwelelo lwaYunese? Pamo alumwene haungeji wenyi watete waumishonali omu akamuwanyine naLowise munganda yaLusutala. Kaha nawa pamo avakafwile vazovoloke nakupwa vaka-Kulishitu. (Vili. 14:4-18) Omu Paulu asonekele awa mazu kuli Chimoteu, mwahichile myaka kafwe 15. Paulu anukile vilinga vyalufwelelo apwile navyo Yunese. Nakuhanjika ngwenyi ahanyine chakutalilaho chamwaza chize vatelele vakwavo kulondezeza. Chasoloka nge chakutalilaho chenyi chakolezezele kaposetolo Paulu pamo navaka-Kulishitu vavavulu vamulikulukaji lyamyaka lyakulivanga. Kachi nge mwapwa muchisemi, kaha muli nakulela vana uka wenu, chipwe nge mwatwama mutanga yakwitava chakulihandununa, kaha tachikizenu ngwenu chakutalilaho chenu chamwaza chili nakukolezeza nakukafwa vakwenu vaze vali nakumimona.

17. Namulinga ngachilihi nge mwanenu kate kwitavila kuzachila Yehova numba tuhu munakilikita nangolo kumunangula?

 ¹⁷ Uno namulinga ngachilihi nge mwanenu keshi nakwakula kuvyuma muli nakumunangulako? Anukenu ngwenu kunangula mwana cheji kumbatanga lwola. Ngana muze vanasolola mumuvwimbimbi, kachi nge namutumba mbuto shimbu jimwe munahase kuhuhwasana numba nge jize jimbuto najikakola nakulovola mihako. Numba tuhu kamweshi nangolo jakujisokesako, oloze nge namutwalaho lika kujitukumwina kaha jinahase kukola. (Mako 4:26-29) Chochimwe nayenu visemi nawa shimbu jimwe munahase kuhuhwasana numba nge vyuma muli nakunangula vana venu navivaheta kumichima nyi chiku. Numba tuhu kamweshi kuvasakwila vyakulinga mukuyoyako, oloze kutwalaho kuvanangula nachivakafwa vapwenga masepa jaKalunga.—Vishi. 22:6.

18. Uno Yehova nahase kukafwa ngachilihi vana venu vazovoloke kushipilitu?

¹⁸ Kufuma vene kushikulu Yehova nakafwenga vakweze vavavulu vapwenga masepa jenyi. (Samu 22:9, 10) Shikaho nahase nawa kukafwa vana venu vazovoloke kushipilitu kachi nge vanasake kulinga ngocho. (Koli. 1, 3:6, 7) Numba tuhu vana venu kaveshi nakuzachila Yehova namuchima wavo wosenako, oloze Yehova mwatwalaho lika kuvazanga. (Samu 11:4) Kala lwola navasolola ‘muchima wamwaza’ wakuzanga Yehova, mwavakafwa vapwenga masepa jenyi. (Vili. 13:48; Miji. 2, 16:9) Yehova mwamikafwa muhanjike mazu akwoloka halwola luze vana venu navasakiwa kwivwa mazu kana. (Vishi. 15:23) Kaha nawa Yehova nahase kuzachisa kala ndumbwetu muchikungulwilo mangana akafwe vana venu. Shikaho omu navakakola vana venu, Yehova nahase kukavakafwa vakanuke vyuma vize mwavanangwile omu vapwile vanyike. (Yowa. 14:26) Kachi nge namutwalaho kunangula vana venu kuhichila muvilinga vyenu nakuvanangula Mazu aKalunga, kaha Yehova mwamikisula.

19. Mwomwo ika mwatela kufwelela ngwenu Yehova mwamivwila uselewa?

¹⁹ Kumivwila kuwaha kuli Yehova kachapendamina havyuma vize navasakula vana venu kulingako. Yehova amizanga mwomwo nayenu mwamuzanga. Kachi nge mwapwa muchisemi wamujike, kaha tachikizenu ngwenu Yehova amishika ngwenyi mwapwa Sevo yavana venu, kaha nawa mwapwa muka-kumikinga. (Samu 68:5) Kamweshi kuhasa kushinjila vana venu vasakule kuzachila Yehova chipwe chiku. Nge namutwalaho kuzata nangolo nakupendamina hali Yehova, kaha mwamikafwa nakumivwila uselewa.