1-2. (a) Yunisi wadiña hinyi, nawa kukalanyi kwamweniyi chineli wadiña mama yawantu? (b) Hoshenu hamwevulu wudi hakava.

 HELA chakwila Bayibolu yashimuna wanyi chipapatishu chaTimotewu, ilaña tunateli kufwikija muzañalu watiyiliyi mama yindi, Yunisi, hadina ifuku. (Yish. 23:25) Fwikijenu nazañalali, iku nakumutala Timotewu nemani mumenji anamushiki mumbunda. Natumbi chimwemweta, iku nkaka yaTimotewu wamumbanda, Lowisi, wudi mukamwihi. Yunisi nakwoki mpepela hampinji yinamujimikiwu Timotewu mumenji. Chinamutumpuliwu mumenji, nadili muloña nazañalali chikupu. Hela chakwila chadiña chapela wanyi, Yunisi natweshi kumudizisha mwanindi kumukeña Yehova niMwanindi, Yesu Kristu. Kukalanyi kwamweneñayi hakwila nawu amudizishi mwanindi?

² Anvwali jaTimotewu adiña ambokelamu mukwitiya. Tata yindi wadiña kaGiriki, nawa mama yindi ninkaka yindi Lowisi adiña aYudeya. (Yilw. 16:1) Timotewu wadiña kansi hampinji Yunisi niLowisi yekaliliwu akaKristu. Hela chochu, tata yindi hekalili mukaKristuku. Timotewu wukulondela hinyi? Wadi kufuukulahu yomweni chineli wadiña wakula dehi. Wukutondahu kulondela tata yindi wabula kwitiya? Wukulondela tushidikilu twawaYudeya twamudizishiliwu kufuma kuwansi windi? Tahindi wukwiteja kwikala kambanji kaYesu Kristu?

3. Kwesekeja naYishimu 1:8, 9, Yehova wamonaña ñahi mudimu wazatañawu amama jawantu wakukwasha anyanawu ekali amabwambu jindi?

³ Amama jawantu akaKristu niwena makonu akeña yisaka yawu. Akeñaña kukwasha anyanawu ekali nawubwambu wawuwahi naYehova kubadika chuma chidi chejima. Nawa Nzambi  yetu watiyaña kuwaha chazatañawu nañovu. (Tañenu Yishimu 1:8, 9.) Yehova nakwashi amama jawantu amavulu kukwasha anyanawu kumukeña nikumukalakela.

4. Kukalanyi kwamonañawu amama jawantu makonu?

⁴ Mpinji jikwawu, mama yawantu nateli kujinoka neyi anyanindi akutondahu kumukalakela Yehova, neyi cheliliyi Timotewu. Anvwali eluka kukala kwamonañawu anyanawu mukanu kaayi kaSatana. (1 Pet. 5:8) Kubombelahu, amama jawantu amavulu chayikalilaña kukulisha anyanawu chakadi iyala hela neyi iyala hadifukulaña kudi Yehovaku. Chakutalilahu, muhela Christine * wahosheli nindi: “Nfumwami wadiña tata yawantu wamuwahi nawa wakameneneña chisaka, ilaña wankanishileña kukulisha anyanetu kulonda ekali aYinsahu jaYehova. Nadilili hadi yaaka yayivulu, nakutoñojoka nami kwiji anyanami akadifuukulahu kudi Yehova.”

5. Yumanyi yitukuhanjekahu muchinu chibaaba?

⁵ Neyi mudi mama yawantu mukaKristu, munateli kukwasha anyanenu kumukeña nikumukalakela Yehova, neyi cheliliyi Yunisi. Muchinu chibaaba, tukuhanjeka chitunateli kumwimbujola kudizisha anyanenu kuhitila muyuma yimwahoshaña niyimwelaña. Tukuhanjeka cheñi Yehova chinateli kuyikwashayi.

6. Neyi chinamwekeshiwu ha 2 Timotewu 3:14, 15, Timotewu wekalili ñahi mukaKristu?

⁶ Timotewu hadiñayi kansi, mama yindi wazatili nañovu kulonda amudizishi “nsona jajila,” kwesekeja nachajilukiliwu aYudeya. Hela chochu, wadiña weluka wanyi yuma yayivulu muloña wachidiña kanda amwiluki Yesu Kristu. Dichi, yuma yadiziliyi Timotewu muNsona yamukwashili kwikala mukaKristu. Komana wekalili mukaKristu? Chineli wadiña mukwenzi, wadiña nawuswa wakutondahu kwikala mukaKristu. Chakadi nikujina, Timotewu ‘amushinjilili kukuhwelela’ chalala hadi Yesu muloña mama yindi wazatili nañovu. (Tañenu 2 Timotewu 3:14, 15.) Yunisi wazañaleli nankashi muloña wamudizishili mwanindi kumwiluka Yehova hela chakwila wamweneña kukala. Yunisi wazatili kwesekeja namwatalisha ijina dindi datalisha mukwila nawu “kushinda.”

7. Yunisi wakwashili ñahi mwanindi nihanyima yakupapatishewa?

⁷ Timotewu chapapatisheweliyi welili chuma chachiwahi muchihandilu chindi, ilaña Yunisi watwalekelihu kwakama. Yumanyi yikwilañayi muchihandilu chindi chejima? Komana wukutachika kudikunda nawantu atama? Komana wukwiteja kuya kushikola kuAtenisi nikwiteja ntañishilu yawantu abula kumwiluka Nzambi? Komana wukukalakelaña maheta nakumanisha mpinji yindi, ñovu yindi niwukwenzi windi? Yunisi hamufuukwilili Timotewuku, ilaña wamukwashili kufuukula mwamaana. Munjilanyi? Watwalekelihu kuzata nañovu kumudizisha mwanindi kumukeña chikupu Yehova nikusakilila hayuma yeliliyi Mwanindi Yesu. Anvwali akweti enikwawu abulaña kumukalakela Yehova hidiwu hohu amonaña kukala kwakukulisha anyanaku. Hela chakwila anvwali ejima hiyakaKristu, chinateli kuyikalila kuyishika anyanawu hamuchima kulonda ekali ambuña aYehova ashinshika. Anvwali anateli kudizilaku yumanyi kudi Yunisi?

8. Indi mama yawantu wukweti nfumwindi wetiya nateli kukwasha ñahi nfumwindi kukwasha anyanawu kulonda amwiluki Yehova?

⁸ Dizenuña Bayibolu hamu nawanyanenu. Enu ahela, neyi anfumwenu adi muchalala,  Yehova nakukeña nindi mukwasheña anfumwenu kudizisha anyana kulonda amwiluki. Njila yimu yimunateli kwila mwenimu hikukwasha Kudifukula kwaChisaka mafuku ejima. Hoshenuña yuma yayiwahi kutalisha hakudifukula kwachisaka nawa toñojokenu hayuma yimwatela kwila hakwila kudifukula kwachisaka kuwaheña. Hadaha munateli kukwasha anfumwenu kufuukula yuma yimwakadiza hakudiza Bayibolu. Kubombelahu, neyi kudiza mukanda waMunateli Kwikala naMuzañalu Haya Nyaaka kunateli kukwasha anyanenu anakuliku, hadaha munateli kukwasha anfumwenu kulonda anyanenu adizeña muniwu mukanda.

9. Mama yawantu wukweti iyala wabula kwikala Chinsahu nateli kuwana wukwashu kudihi?

⁹ Amama jawantu amakwawu adizaña Bayibolu nawanyanawu, muloña wakwila adana iyala, indi kwiji iyala hiChinsahu wanyi. Neyi dichidi chisaka chenu, bayi mwakama nankashiku. Yehova wukuyikwasha. Zatishenu yozelu yaloñeshayi kuhitila mukuloñesha kwindi hakuyidizisha anyanenu. Munateli kwihula anvwali eluka chakuzatisha iyi yozelu hakudizisha anyanawu hakudifukula kwachisaka. * (Yish. 11:14) Mulombenu Yehova nawa mulejenu ayikwashi. Nawa mulejenu ayikwashi kuzatisha malwihu atelela anateli kuyikwasha kwiluka chinakutoñojoka anyanenu nichinakutiyawu. (Yish. 20:5) Munateli kwihula lwihu lwapela ludi neyi, ‘Kukalanyi kwasweja kumwamonaña kushikola?’ kunateli kuyikwasha kwiluka yuma yayivulu yinakutoñojoka anyanenu.

10. Njilanyi yikwawu mumunateli kukwashila anyanenu kulonda amwiluki Yehova?

¹⁰ Zatishenuña njila jamboka-mboka hakudizisha anyanenu kumwiluka Yehova. Hanjekenuña hadi Yehova niyuma yayivulu yinayililiyi. (Kuhit. 6:6, 7; Isa. 63:7) Dichuma chalema chimwatela kwilaña neyi himwatweshaña kudiza mpinji yejima kwitalaku. Christine, itwatena, wahosheli nindi: “Nadiña wanyi nampinji yeneni yakuhanjeka nawu yuma yakuspiritu, mpinji yidi yejima yikumwekana diyinahanjekeleña nawu. Twayileña nakwenda hela kukandama muwatu nawa twendeleña kuchikumu chakaloña iku tunakuhanjeka hayuma yaleñayi Yehova niyuma yinateli kuyikwasha kwikala nawubwambu nayena. Chakuliliwu anyanami, nayikolesheli kudiza Bayibolu halwawu.” Kubombelahu, hoshenuña yuma yayiwahi hakuloñesha nihadi amanakwenu niahela. Bayi muhoshaña mazu atama hadi akulumpiku. Yuma yimwahoshaña hadi wena yinateli kuletesha anyanenu kuhanjika nawu neyi anakukeña wukwashu hela nehi.

11. Kwesekeja naYakoba 3:18, chalemenadi kuleta kuwunda hetala?

¹¹ Letenuña kuwunda hetala. Mpinji yejima mwekeshenuña nenu mwayikeña anfumwenu nianyanenu. Hoshenuña hadi anfumwenu munjila yayiwahi nawa yakalemesha, nawa dizishenu anyanenu kwila chochimu. Neyi mwila mwenimu, chikwikala chaswayi anyanenu kumwiluka Yehova. (Tañenu Yakoba 3:18.) Talenu chuma chamumwekeneni Jozsef, payiniya wadimena muRomania. Chakulileñayi, atata yindi amukañesheleña yena, amama yindi nianakwindi kumukalakela Yehova. Jozsef wahosheli nindi: “Amama azatileña nañovu kulonda mwitala mwikali kuwunda. Neyi atata asweja kukalisha amama niwena  ekalileña amwovu chikupu. Neyi amona nawu tunakuyilemesha wanyi atata nikuyovwahila, ahanjekeleña nanetu AEfwesesa 6:1-3. Nkumininaku ahanjekeleña nanetu hayilwilu yayiwahi yadiña nawatata nawa atukwashileña kwiluka muloña waweni chitwatela kuyilemeshela. Chumichi chakwashili chisaka chetu kwikala mukuwunda.”

12. Kwesekeja 2 Timotewu 1:5, yuma yeliliyi Yunisi yamukwashili ñahi Timotewu?

¹² Tañenu 2 Timotewu 1:5. Yunisi welileña yuma yayiwahi yaletesheli Timotewu kudizilaku. Watela wamudizishili nindi chikuhwelelu chalala twatela kuchimwekeshela muyuma yitwelaña. (Yak. 2:26) Chakadi nikujina, Timotewu wamweni nindi yuma yelileñayi mama yindi wayilileña muloña wakumukeña Yehova. Timotewu wamweni nindi kumukalakela Yehova kukumuzañalesha mama yindi. Yuma yayiwahi yeliliyi Yunisi yamukwashili ñahi Timotewu? Neyi chashimwiniyi kapostolu Pawulu, Timotewu wadiña nachikuhwelelu chakola neyi mama yindi. Chumichi hichadiñi mululakenu wamuvu nankayiku. Timotewu wamweneña yuma yelileñayi mama yindi nawa wamwimbujoleleña. Munjila yoyimu makonu, amama jawantu amavulu anakwashi antu amuchisaka “chakadi izu.” (1 Pet. 3:1, 2) Ninenu munateli kwila mwomumu. Munateli kwila ñahi?

13. Muloñadi mama yawantu chatela kusambilayi kukolesha wubwambu windi naYehova?

¹³ Sambilenuña kukolesha wubwambu wenu naYehova. (Kuhit. 6:5, 6) Kufwana amama jawantu amavulu, mwadihanaña chikupu. Mwazatishaña mpinji yenu, mali enu, mwakamaña wanyi nawa mwelaña yuma yikwawu kulonda mwakameni anyanenu kumujimba. Ilaña bayi mumbaña mpinji yeneni kuniyi yuma chakwila mukañanyeña nikwikala nampinji yakukoleshelamu wubwambu wenu naYehovaku. Mpinji yejima ikalenuña nampinji yakulomba nkawenu, kudiza Bayibolu nkawenu nikupompa. Chimwela mwenimu, mukukolesha wubwambu wenu naYehova nawa chisaka chenu chikuyimbujolaña niantu amakwawu.

14-15. Yumanyi yimunadizili kudi Leanne, Maria niJoão?

¹⁴ Talenu yakutalilahu yantesha yawatwansi amukeñeli Yehova nikumukuhwelela kuhitila mukumona chinakwilawu amama jawu. Mwana kaChristine, Leanne wahosheli nindi: “Twadizileña mukuswamujoka. Ilaña amama apompeleña mpinji yejima. Hela chakwila hitwelukili nsañu yayivulu yamuBayiboluku, yuma yelileñawu yatukwashili kwikala nachikuhwelelu chakola. Twelukili netu ichi dichalala henohu kanda tutachiki nikupompa.”

¹⁵ Maria, wukweti atata yindi ayibabesheleña mpinji yikwawu neyi anayi nakupompa, wahosheli nindi: “Amama adi hakachi kawahela ahamuka chikupu. Hinachidiña kansi, mpinji yikwawu nakañenyeña kwila yuma yikwawu muloña natiyileña woma chikuhoshawu akwetu. Ilaña chinamweni nami amama ahamuka chikupu nawa mpinji yejima amutwamijileñaku Yehova chankwashili kuleka kutiya antu woma.” João, wukweti atata yindi ayikañeshaña kuhanjeka hansañu yamuBayibolu, wahosheli nindi: “Chuma chankwashili hikumona amama chazatileñawu nañovu kulonda ayitiyisheña atata kuwaha, kufumishaku hohu kukeña kwamukeñawu Yehova.”

16. Yuma yelañayi mama yawantu yinateli kukwasha ñahi antu amakwawu?

¹⁶ Amama jawantu, anukenuña nenu yuma yimwelaña yinateli kukwasha antu amakwawu. Munjilanyi? Talenu yuma yayiwahi yeliliyi  Yunisi chiyamukwashili kapostolu Pawulu. Wasonekeli nindi chikuhwelelu chaTimotewu chakadi wunfwikiji “chasambilili kwikala mudi . . . Yunisi.” (2 Tim. 1:5) Mpinjinyi yasambililiyi Pawulu kumona chikuhwelelu mudi Yunisi? Hadiñayi halwendu lwindi lwatachi lwawumishonali hadiwaniniyi naLowisi niYunisi kuLisitira, nawa hadaha wayikwashili kwikala akaKristu. (Yilw. 14:4-18) Toñojokenu hachumichi: Hampinji Timotewu yamusonekeleliwu mukanda kudi Pawulu, henohu munahiti dehi yaaka 15, Pawulu wachidiña kwanuka chikuhwelelu chaYunisi nawa wazatishili chakutalilahu chindi kulonda tumwimbujoleña. Chakadi nikujina, chakutalilahu chindi chamukolesheli kapostolu nankashi nawa hadaha niakwawu akaKristu amavulu adiñaku hayina mpinji. Neyi munakukulisha anyana chakadi iyala hela neyi mwambokelamu mukwitiya ilukenu chikupu nenu yuma yimweleña yakoleshaña nikusañumuna antu ayimonaña.

17. Chumanyi chimwatela kwila neyi mumona nenu mwanenu nakukeña wanyi kumukalakela Yehova hela chakwila munazati nañovu kumudizisha?

¹⁷ Mukwila ñahi neyi mwanenu nakwila wanyi yuma yimunakumudizisha? Anukenu nenu hahitaña mpinji yeneni hakwila mumudizishi mwana. Neyi chinamwekeshiwu hamwevulu, neyi mutumba lubutu, mpinji jikwawu munateli kujinoka neyi chakwila kakakula nakwikala mutondu nakutachika kusoña nyikaabu. Hela chakwila muneluki wanyi chakafumamu, mukutwalekahu nakuwutukumwina  kulonda wukuli chiwahi. (Maku 4:26-29) Munjila yoyimu, mama yawantu nateli kujinoka neyi chakwila nakuyishika anyanindi hamuchima. Tuneluki wanyi yuma yikafumamu. Ilaña neyi mutwalekahu kuzata nañovu kuyidizisha, mukuyikwasha ekali amabwambu jaNzambi.—Yish. 22:6.

18. Yehova nateli kukwasha ñahi anyanenu kwikala amabwambu jindi?

¹⁸ Kufuma tuhu kunyima, Yehova nakwashi atwansi amavulu kwikala amabwambu jindi. (Mas. 22:9, 10) Nateli cheñi kukwasha anyanenu kwikala amabwambu jindi neyi dichuma chinakufwilawu. (1 Kor. 3:6, 7) Hela chakwila anyanenu anakukeña wanyi kumukalakela Yehova namuchima wejima, wukutwalekahu kuyikeña. (Mas. 11:4) Neyi amwekesha chanti nawu adi “nanyichima yashinshika,” wukuyikwasha kulonda ekali amabwambu jindi. (Yilw. 13:48; 2 Kushi. 16:9) Nateli kuyikwasha kuhosha yuma yayiwahi hampinji yatelela, yinakukeña kutiyawu anyanenu. (Yish. 15:23) Hadaha nateli kuzatisha manakwetu hela muhela muchipompelu kulonda ayikwashi. Hela chakwila anakuli dehi, Yehova wakayikwashaña kwanuka yuma yimwayidizishili kunyima. (Yow. 14:26) Yehova wakayikiswila neyi mutwalekahu kuyidizisha anyanenu kuhitila muyuma yimwahoshaña niyimwelaña.

19. Muloñadi chimwatela kwilukila nenu Yehova wayitiyaña kuwaha?

¹⁹ Kukeña kwayikeñayi Yehova hikwashindamena hayuma yatela kufuukulawu anyanenuku. Wayikeña muloña ninenu mwamukeña. Neyi mudi anvwali abula enikwawu, Yehova nayikani nindi wukwikala Tata yawanyanenu nawa wukuyikiñaña. (Mas. 68:5) Mukuyikaanisha wanyi anyanenu kufuukulahu kumukalakela hela nehi. Ilaña neyi mutwalekahu kumushindamena Yehova nakuzata hakumina ñovu jenu, niyena wukuyitiya kuwaha.