1-2. (a) Euniki chu tu nge ni a, nu a nih angin eng harsatnate nge a hmachhawn? (b) A kâwma milem aṭang hian sawi duh i nei em?

 BIBLE chuan Timothea baptisma chan chungchâng târ lang lo mah se, chumi nîa a nu Euniki hlim dân tûr chu kan mitthla thei a. (Thuf. 23:25) Kâwng thleng vêla thûk tuia Timothea a din laia a nu’n chhuang taka a lo thlîr lai chu han mitthla teh. Euniki chu Timothea pi Loisii’n a pawm lai chuan a nui sâng mai a. Timothea tuia hnim pil a nih lai chuan a nu Euniki chuan zawi têin thâwk a han la a. Tui aṭanga Timothea a rawn chhuah leh chuan a lâwm lutuk chu a mittui a tla hial a ni. Awlsam lo hle mah se, Euniki chuan Timothea chu Jehova leh a Fapa Isua Krista hmangaih tûrin a zirtîr a. Baptisma chang thei tûra a fapa a zirtîrnaah eng harsatnate nge a hmachhawn?

² Timothea chu rinna thuhmun lo chhûngkuaa seilian a ni a. A pa chu Grik mi a ni a, a nu leh a pi chu Juda mite an ni. (Tirh. 16:1) Euniki leh Loisii Kristian an rawn nih lai chuan Timothea chu tleirâwl a nih tawh a rinawm. A pa erawh chu Kristian a ni lo. A nih chuan, Timothea’n eng kawng nge a zawh ang? Ani chu mahnia thu tlûkna siam thei khawpin a puitling tawh ngei ang. Ring lotu a pa sakhua chu a zui ang em? A naupan têt aṭanga zirtîrna a dawn Judate hnam dân chu a zui ang em? Nge ni a, Isua Krista hnungzuitu a ni zâwk dâwn?

3. Thufingte 1:8, 9-naa sawi angin, engtin nge Jehova’n a ṭhiante ni tûra fate ṭanpuitu chhûngkaw nute thawhrimna chu a thlîr?

³ Chutiang bawkin, tûn laia Kristian chhûngkaw nute chuan an chhûngkua chu an hmangaih a. Thil dang zawng aiin, an fate chu Jehova nêna inlaichînna ṭha nei tûra ṭanpui chu an  duh a ni. Pathian Jehova chuan an thawhrimnate chu a ngaihlu hle a. (Thufingte 1:8, 9 chhiar rawh.) Ani chuan chhûngkaw nu tam tak chu thutak pawm tûra an fate an zirtîrnaah a ṭanpui a ni.

4. Tûn laia chhûngkaw nu tam takin eng harsatnate nge an hmachhawn?

⁴ Chhûngkaw nu ber chuan Timothea anga a fate’n Jehova rawng an bâwl dâwn leh dâwn loh ngaihtuah châng a nei ṭhîn a. Dik tak chuan, nu leh pate chuan an fate’n Setana khawvêla nêksâwrna an tawh nasatzia chu an hria a. (1 Pet. 5:8) Chu bâkah, chhûngkaw nu tam tak chuan pasal tel lovin, a nih loh leh Jehova chibai bûk lotu an pasalte nêna an fate enkawl seilennaah harsatnate an hmachhawn a ni. Entîr nân, Unaunu Christine-i b chuan: “Ka pasal chu pa ṭha tak leh chhûngkaw ngaihsak tak ni mah se, Jehova Thuhretute ni tûra kan fate ka enkawlna kawngah nasa takin min dodâl a. Ka fate hi Jehova betute an rawn nih dâwn leh dâwn loh ngaihtuahin kum tam tak chhûng chu ka mittui a tla zing hle,” tiin a sawi.

5. He thuziakah hian eng nge kan sawiho vang?

⁵ Kristian chhûngkaw nu ber i nih chuan Euniki angin i hlawhtling ve thei a ni. He thuziakah hian i thusawi leh thiltih hmanga i fate i zirtîrna kawnga a entawn tûr siam i zui theih dânte kan sawiho vang a. Jehova’n a ṭanpui theih dân che pawh ka sawiho bawk ang.

6. Timothea thawn hnih 3:14, 15-naa sawi angin, engtin nge Timothea chu Kristian a rawn nih?

⁶ Euniki chuan Timothea naupan laiin Juda mite’n “Lehkha Thianghlimte,” tia an hriat Hebrai Pathian Lehkha Thu chu theih tâwp chhuahin a zirtîr a. Mahse, Isua Krista chungchâng hriat a neih loh avângin a hriatna chu a beitham hle a. Chuti chung pawhin, Pathian Thu aṭanga a thu zirte chuan Timothea chu Kristian ni thei tûra a mamawh hriatna a neihtîr a ni. Mahse, Kristian a ni ang em? Ṭhalai a nih angin, Kristian nun kawng a zawh dâwn leh dâwn loh chungchângah duh a thlang thei a. Timothea chuan Isua chungchânga thutak a ‘hriat,’ a nih loh leh a rin nachhan chu a ṭhenah chuan a nuin Lehkha Thianghlimte hre thiam tûra a lo ṭanpui tawh vâng a ni tih a chiang hle. (2 Timothea 3:14, 15 chhiar rawh.) Jehova chanchin hre tûra theih tâwp chhuaha a fapa a zirtîrna a hlawhtlin avângin Euniki chu a va hlim dâwn tak êm! Ani chu “hnehtu,” tih awmze nei a hming phuin a nung tak zet a ni.

7. Engtin nge Euniki’n a fapa chu baptisma a chan hnu pawha hmasâwn zêl tûra a ṭanpui theih?

⁷ Timothea’n baptisma a chan khân, a nunah thiltum pawimawh tak a hlen a. Mahse, Euniki chuan a fapain baptisma a chan hnuah pawh hlauhthâwnna a la nei reng a ni. A fapa chuan eng nun kawng nge a zawh zêl dâwn? Ṭhian sualte a kâwm ang em? Atheni khuaah school kalin, khawvêl mi fingte zirtîrna chu a pawm ang em? A hun leh tha leh zungte bâkah, a vânglai nîte chu hausakna bawiha awm nân a hmang ral mai mai ang em? Euniki chuan a fapa Timothea tân thu tlûkna a siamsak thei lo va; mahse, a ṭanpui thei a ni. Engtin nge? Jehova hmangaihna thûk tak nei tûr leh a Fapa Isua chunga lâwmna nei tûrin theih tâwp chhuahin a ṭanpui zawm zêl thei a ni. Rinna thuhmun lo chhûngkuaa awmte chu Jehova hmangaih tûra an fate ṭanpuina kawnga harsatna tâwktu awm chhun an ni lo va. Nupaa thutaka awmte tân pawh Jehova chhiahhlawh rinawm tak ni tûra fate ṭanpui chu thil awlsam a ni lo. Nu leh pate’n Euniki entawn tûr siam aṭangin eng nge an zir theih?

8. Engtin nge nu berin ringtu a pasal chu an fate thlarau lam mamawh ngaihsaknaa a ṭanpui theih?

 ⁸ I fate chu Bible zirpui rawh. Unaunute u, in pasalte chu thutaka awm an nih chuan, in fate thlarau lam mamawh an ngaihsakna kawngah in pasalte ṭanpui tûrin Jehova’n a duh che u a. Chutianga ṭanpui theih dân kawng khat chu Chhûngkuaa Pathian Biakna neih huna thlâwp ziah hi a ni. Chhûngkuaa Pathian Biakna chungchâng chu a ṭha lamin sawi ula, boruak muanawm tak leh hlimawm tak hnuaia in neih theih nâna in tih theihte chu ngaihtuah ang che u. Bible zirnaa thil eng emaw ti tûra ruahmanna siamnaah in pasalte chu in ṭanpui thei a ni. Chu bâkah, in fate zînga ṭhenkhat chu mi mala an inzirnaa Chatuanin I Hlim Thei! tih lehkhabu hlâwkpui thei khawpa puitling tawh an nih chuan, an mamawh ṭanpuinate pe tûrin in nupain in thawk dûn thei a ni.

9. Ring lotu pasal nei chhûngkaw nu ber chuan khawi aṭangin nge ṭanpuina a hmuh theih?

⁹ Nu ṭhenkhat chuan kawppui an neih tawh loh avângin, a nih loh leh an pasalte chu ring lotu an nih avângin fate nêna Bible zirhonaah hma an hruai a ngai a. Chutiang dinhmuna in awm a nih chuan, lungngai lutuk suh ang che u. Jehova’n a ṭanpui dâwn che u a ni. In fate nêna zirhona in neih hunah inawpna pâwl buatsaih zirtîrna hmanrua ṭha tak takte chu hmang ṭangkai ang che u. Chûngkuaa Pathian biaknaa chûng hmanruate hman dân chungchâng hriat nân, engvângin nge thiltawn ngah nu leh pa dangte chu in zawh loh vang? c (Thuf. 11:14) Jehova chuan in fate nêna in inbiak pawhnaah a ṭanpui thei che u a ni. In fate thinlung leh rilrua awmte hre thei tûrin Jehova hnênah a ṭanpuina dîl ang che u. (Thuf. 20:5) ‘School-a i harsatna tawhte zîngah eng nge hmachhawn harsa i tih ber?’ tih ang chi zawhna mâwlmang takte chuan inbiak pawhna ṭha a neihtîr thei che u a ni.

10. Eng kawng dangin nge i fate chu Jehova chungchâng zir tûra i ṭanpui theih?

¹⁰ Jehova chungchâng i fate zirtîr tûrin hun remchâng zawng rawh. Jehova chanchin leh i tâna thil ṭha tam tak a tihte chu hrilh ang che. (Deut. 6:6, 7; Is. 63:7) Hei hi i fate nên in lama Bible zirhona in nei ziah thei lo a nih chuan a pawimawh lehzual a ni. A chunga kan târ lan tâk Christine-i chuan: “Thlarau lam thilte sawipuina hun remchâng ka neih tlêm ṭhin êm avângin, hun remchâng ka neih apiang chu ka hmang ṭangkai a. Jehova thil siam ropui tak takte chungchâng leh thlarau lam thilte sawipui tûrin kan lêng chhuak ṭhîn a, a nih loh leh lawnglêngahte kan chuang ṭhîn. Ka fate an lo puitlin chhoh chuan mahnia Bible zirna nei tûrin ka fuih a ni,” tiin a sawi. Chu bâkah, Jehova inawpna pâwl leh unaute chungchâng chu a ṭha lam chauh sawi ṭhîn la. Kohhran upate chu sawisêl suh ang che. An chungchâng i sawite chuan i fate’n ṭanpuina an mamawh huna upate hnêna ṭanpuina an dîl dâwn leh dâwn loh a hril thei a ni.

11. Jakoba 3:18-a sawi angin, engvângin nge ina boruak muanawm tak siam chu thil pawimawh tak a nih?

¹¹ Inah boruak muanawm tak siam rawh. I pasal leh i fate hnênah i hmangaihzia hrilh ṭhîn la. I pasal chu zah thiam tak leh hmangaihna nei takin be ṭhîn la, i fate pawh chutianga ti ve tûrin zirtîr ang che. Chutianga i tih chuan, inah Jehova chanchin zir theihna boruak muanawm tak i siam a ni ang. (Jakoba 3:18 chhiar rawh.) Romania rama special pioneer nia rawngbâwl Unau Jozsef-a entawn tûr siam hi han ngaihtuah teh. A rawn puitlin chhoh chuan a pa chuan amah leh a nu  leh a unaute tâna Jehova rawngbâwl tiharsa tûrin thil a ti ṭhîn a. Jozsef-a chuan: “Ka nu chuan inah boruak muanawm tak a awm theih nân theih tâwp a chhuah a. Ka pa a râwng poh leh ka nu chu a zaidam lehzual a ni. Ka pa zah leh a thuawih chu kan tân a harsa tih a hriat chuan Ephesi 6:1-3-a thute chu min sawihopui a. Tichuan, ka pa mize ṭhate chu min hrilhin, a chunga zahna kan lantîr a ngaih chhante hre thiam tûrin min tanpui a. Chutiang chuan boruak so sâng thei tam tak chu a tidai a ni,” tiin a sawi.

12. Timothea thawn hnih 1:5-a sawi angin, Euniki entawn tûr siamin Timothea chungah eng nghawng nge a neih?

¹² Timothea thawn hnih 1:5 chhiar rawh. Euniki chuan Timothea tân entawn tûr ṭha a siam a. Rinna dikah chuan thiltih a tel tih a fapa chu a zirtîr ngei ang. (Jak. 2:26) Timothea pawhin a nu thiltihte chu Jehova a hmangaih tak zet avânga ti a ni tih a hriat ngei a rinawm. A nu hlim chhan chu Jehova rawng a bâwl vâng a ni tih pawh a hmu bawk. Euniki entawn tûr siam chuan Timothea chungah eng nghawng nge a neih? Tirhkoh Paula sawi angin, Timothea chuan a nu angin rinna nghet tak a nei a ni. Chu chu thilthleng palh mai a ni lo. A nu entawn tûr siam chu a hmu a, entawn a duh a ni. Chutiang bawkin, tûn laia chhûngkaw nu ber tam tak chuan “thu lovin” an chhûngte chu Jehova rawngbâwl tûrin an ṭanpui a. (1 Pet. 3:1, 2) Nang pawhin chutiang chuan i ti thei a ni. Engtin nge?

13. Engvângin nge chhûngkaw nu ber chuan Jehova nêna an inlaichînna chu a dah pawimawh ber ang?

¹³ Jehova nêna in inlaichînna chu dah pawimawh ber rawh. (Deut. 6:5, 6) Nu tam tak ang bawkin, mahni inpêkna nasa tak i nei a. I fate tisa lam mamawh phuhhrûk nân i hun te, sum te, mut hun te, leh thil dangte i sêng a. Mahse, Jehova nêna in inlaichînna chân khawpin chûng thilahte chuan i buai lutuk tûr a ni lo. Mi mal taka ṭawngṭaina te, mi mala Bible zirna te, leh kohhran inkhâwmte atân hun insiam ziah ang che. Chutianga i tih chuan, Jehova nêna in inlaichînna i tinghet lehzual ang a, i chhûngkaw tân leh mi dangte tân pawh entawn tûr ṭha i siam bawk ang.

14-15. Unaunu Leanne-i leh Maria-i leh Unaupa João-a te entawn tûr siam aṭangin eng nge i zir?

¹⁴ Jehova hmangaih a, rinchhantu leh an nute entawn tûr siam zuitu ṭhalai unaute entawn tûr siam ṭhenkhat hi han ngaihtuah teh. Christine-i fanu upa ber Leanne-i chuan: “Ina ka pa a awm chuan Bible kan zirho thei lo. Mahse, ka nu chu kohhran inkhâwmahte chuan a tel ziah a. Bible chungchâng hre tlêm hle mah ila, a thiltihte chuan rinna nghet tak nei tûrin min ṭanpui a ni. Kohhran inkhâwma kan tel hma aṭang daih tawhin hei hi thutak a ni tih kan hria,” tiin a sawi.

¹⁵ Maria-i pa chuan a chhûngte chu an inkhâwm ṭhin avângin hrem chângte nei mah se, Maria-i chuan: “Ka nu hi ka hriat tawh azawnga unaunu huaisen berte zînga pakhat a ni. Ka naupan lai chuan, mi dangte’n min sawisêl ka hlauh avângin thil ṭhenkhat tih duh loh chângte ka nei a. Mahse, ka nu huaisenzia leh a nuna Jehova a dah hmasak dân ka hmuhna chuan mihring hlauhna ka neih chu hneh tûrin min ṭanpui a ni,” tiin a sawi. Pa berin a chhûngkua chu inah thlarau lam thute sawi lo tûrin khap bet mah se, a fapa João-a chuan: “Ka thinlung khawih bertu nia ka hriat chu ka nu hian ka pa tilâwm tûrin—Jehova a hmangaihna tih loh chu—engkim kalsan a inhuamna hi a ni,” tiin a sawi.

16. Chhûngkuaa nu ber entawn tûr siamin mi dangte chungah eng nghawng nge a neih theih?

¹⁶ Nute u, in entawn tûr siamin mi dangte chungah nghawng a nei tih hre reng ang  che u. Engtin nge? Euniki entawn tûr siamin tirhkoh Paula chunga nghawng a neih dân hi han ngaihtuah teh. Vervêkna tel lo Timothea rinna chu ‘a tîrin Euniki-ah chuan a awm a,’ tiin a ziak a ni. (2 Tim. 1:5) Engtik khân nge Paula’n Euniki rinna chu a hriat ṭan? Missionary nia a khual zin hmasak ber ṭum khân, Lustra khuaah Loisii leh Euniki chu a hmuin, Kristian rawn ni tûrin a ṭanpui a ni ngei ang. (Tirh. 14:4-18) Han ngaihtuah teh: Paula’n a hnu kum 15 vêla Timothea hnêna lehkha a ziah khân, Euniki rinna thiltihte chu a la hre reng a, entawn tûr ṭha tak atân a hmang a nih chu! A entawn tûr siam chuan tirhkoh Paula leh kum zabi khatnaa unau dang tam takte chu a tichak tih a chiang hle. I fate chu pasal tel lovin emaw, rinna thuhmun lo chhûngkuaah emaw i enkawl seilian a nih chuan, i entawn tûr siam ṭha tak chuan i chhehvêla mite chu a tichakin thil ti tûrin a chêttîr thei tih hre reng ang che.

17. I fain i thawhrimna chu a chhâng lêt lo anga a lan chuan eng nge i tih ang?

¹⁷ A nih leh, i fain i thawhrimna chu a chhâng lêt lo anga a lan chuan engtin nge ni ang? Fate zirtîr tûr chuan hun tam tak sên a ngai tih hre reng ang che. Milema târ lan angin, thlai chi i tuh hunah a rawn ṭiakin rah a chhuah dâwn leh dâwn loh chungchângah hlauhthâwn châng i nei thei a. Rah a chhuah ngei dâwn tih sawi thei o mah la, a ṭhan chhoh zêl theih nân tui i pe zawm zêl a ni. (Mk. 4:26-29) Chutiang bawkin, nu i nih angin, i fate thinlung thlen khawpa i zirtîr  leh zirtîr loh chungchângah hlauhthâwn chângte i nei mai thei. I fate thu tlûkna siam tûr chu i thunun thei lo. Mahse, theih tâwp chhuaha i zirtîr zawm zêl hian thlarau lama ṭhan chhoh theihna hun remchâng ṭha ber i pe a ni.—Thuf. 22:6.

18. Engtin nge Jehova’n i fate chu thlarau lama ṭhang chho tûra a ṭanpui theih?

¹⁸ Bible hun lai aṭangin, Jehova chuan ṭhalai tam tak chu a ṭhiante ni tûrin a lo ṭanpui tawh ṭhîn a. (Sâm 22:9, 10) I fate pawhin a ṭhian nih an duh phawt chuan thlarau lama ṭhang chho tûrin a ṭanpui thei a ni. (1 Kor. 3:6, 7) I fate chuan thinlung takin Jehova rawng an bâwl lo anga a lan hunah pawh, Ani chuan a la hmangaih zawm zêl ang. (Sâm 11:4) “Rilru put hmang dik” chhe tê an lantîr hunah, Jehova chu anmahni ṭanpui tûrin a inpeih reng ang. (Tirh. 13:48 NWT; 2 Chro. 16:9) Ani chuan a hun taka thu dik tak—i fate hriat atâna hun ṭha bera—sawi tûrin a ṭanpui mai thei che a ni. (Thuf. 15:23) A nih loh leh, i fate chunga ngaihsakna lantîrtu tûr kohhrana ngaihsakna nei tak unau tu emaw chu a chêttîr thei bawk a. I fate an puitlin hnuah pawh, Jehova chuan tûn hmaa anmahni i zirtîr thu ṭhenkhat hre chhuah leh tûrin a ṭanpui thei a ni. (Joh. 14:26) I thusawi leh entawn tûr siamte hmanga i fate i zirtîr zawm zêl chuan Jehova’n nasa takin mal a sâwm ang che.

19. Engvângin nge Jehova duhsakna i dawng tih i chian theih?

¹⁹ Jehova’n a hmangaihna che chu i fate duh thlanna siamah a innghat lo. Amah i hmangaih avânga hmangaih che a ni a. Nu leh pa mal ṭan i nih chuan Jehova’n i fate tâna Pa ni tûr leh nangmah Vênghimtu ni tûrin a intiam a ni. (Sâm 68:5) I fate’n Jehova rawng an bâwl dâwn leh dâwn loh chu i thunun thei lo. Mahse, Jehova ṭanpuina i rinchhan zawm zêl a, nangma lama theih tâwp i chhuah phawt chuan a duhsakna i dawng ang.