1-2. (1) Wõn in Eunis, im ta wãween eo epen ear iioone ãinwõt juon jinen baam̦le? (2) Kwal̦o̦k kõn pija eo ilo kilin bok in.

 MEÑE Baibõl̦ ejjab kõnono kõn iien eo Timote ear peptaij, bõtab ejjab pen ñan ad pijaikl̦o̦k ewi joñan an Eunis, kõrã eo jinen, maroñ kar lukkuun m̦õn̦õn̦õ ilo raan eo. (JK. 23:25) Pijaikl̦o̦k an Eunis lukkuun m̦õn̦õn̦õ bũruon ke ej lo an Timote jutak ilo dãn eo. Ej mejãn ettõñdikdik ilo an Lois, lel̦l̦ap eo jibwin Timote, dãpiji ak ej jutak iturin. Kiiõ ej menono liktak jidik im dãpij kũtuon ke Timote ej jakol̦o̦k ium̦win dãn eo. Ainikien dãn ko rej wal̦o̦k ke Timote ej jãde lõñtak ak ej lukkuun ettõñdikdik, im joñan an Eunis lukkuun m̦õn̦õn̦õ ejjab maroñ dãpiji an jañ. Meñe ear jab pidodo, ak Eunis ear maroñ katakin l̦adik eo nejin ñan yokwe Jeova im eo Nejin, Jesus Christ. Ta wãween ko reppen Eunis ear aikuj anjo̦ ioer bwe en maroñ lo an men in wal̦o̦k?

² Timote ear dik im rũttol̦o̦k ilo juon baam̦le me ear oktak kabuñ ko aer jãn doon. Em̦m̦aan eo jemãn ear juon ri-Grik, im kõrã eo jinen im lel̦l̦ap eo jibwin rar ri-Ju. (Jrb. 16:1) Timote emaroñ kar juon jo̦dikdik ke Eunis im Lois rar jino kobal̦o̦k im erom uwaan juon kabuñ ekããl—Kũrjin ro. Meñe ãindein, ak jemãn Timote ear jab kobal̦o̦k ippãer im erom juon Kũrjin. Kiiõ kabuñ ta eo Timote enãj kar kããlõte? Ilo tõre in, em̦õj an rũtto im emaroñ kar make pepe ta eo en kõm̦m̦ane. Enãj ke kobal̦o̦k ippãn jemãn, eo me ejjab juon rũttõmak? Enãj ke l̦oore wõt m̦anit ko an ri-Ju ro me kar katakini kaki jãn ke ear dik? Ak enãj ke kobal̦o̦k ilo kabuñ eo ekããl im erom juon ri-kal̦ooran Jesus Christ?

3. Ekkar ñan Jabõn Kõnnaan 1:8, 9, ewi wãween an Jeova watõk aolep jerbal ko an kõrã ro me rej jipañ ajri ro nejier ñan erom ro jeran?

 ³ Rainin, kõrã ro me rej jinen juon baam̦le im rej Kũrjin, el̦ap aer bareinwõt yokwe baam̦le ko aer. Ilõñin men otemjej, rekõn̦aan jipañ ajri ro nejier bwe ren ejaak juon jem̦jerã epaak ippãn Jeova. Im Anij eo ad elukkuun kaorõk er kõn aer kate er ilo wãween in. (Riit Jabõn Kõnnaan 1:8, 9.) Em̦õj an Jeova jipañ elõñ jinen baam̦le ko ilo aer jipañ ajri ro nejier ñan bõk m̦ool eo.

4. Ta wãween ko reppen me kõrã ro rej jinen juon baam̦le rej jelm̦aiki rainin?

⁴ Ewõr iien kõrã ro rej jinen juon baam̦le remaroñ make pãd im l̦õmn̦ak el̦aññe ajri ro nejier renaaj kããlõt ñan karejar ñan Jeova ãinwõt kar Timote. Ilo m̦ool, rũtto ro rejel̦ã ewi joñan an ajri ro nejier iioon ijjiped ko ilo jukjukun pãd in an Setan. (1 Pit. 5:8) Bareinwõt, elõñ kõrã ro rej jelm̦ae apañ eo ñan lale ajri ro nejier kõnke ejjel̦o̦k rejetaer ak emaroñ kõnke l̦õm̦aro ippãer rejjab kabuñ ñan Jeova. Ñan waanjoñak, juon jeid im jatid kõrã etan Christine * ej ba: “L̦eo ippa ear juon jemãn em̦m̦an im el̦ap an yokwe baam̦le eo am̦ro, bõtab ear lukkuun dike aõ katakin ajri ro nejũm̦ro bwe ren erom Ri-Kõnnaan ro an Jeova. Ium̦win elõñ iiõ ko in aõ jañ im kõl̦mãnl̦o̦kjen̦ kõn ewi wãween an ajri ro nejũ naaj maroñ oktak im erom ro rej kabuñ ñan Jeova.”

5. Ta ko jenaaj etali ilo katak in?

⁵ El̦aññe kwõj juon jinen baam̦le, kwõmaroñ bar lo tõprak ãinwõt kar Eunis. Ilo katak in, jenaaj etale ewi wãween kwõmaroñ anõke joñak eo an ilo am̦ katakin ajri ro nejũm̦ ikijjeen men ko kwõj ba im men ko kwõj kõm̦m̦ani. Jenaaj bareinwõt lale ewi wãween an Jeova naaj jipañ eok.

6. Ãinwõt an 2 Timote 3:14, 15 kaalikkar, ewi wãween an kar Timote erom juon Kũrjin?

⁶ Ke Timote ear juon l̦addik jidikdik, jinen ear kate joñan wõt an maroñ ñan katakini “kõn jeje ko rekkwõjarjar,” ekkar ñan wãween an ri-Ju ro mel̦el̦e kõn jeje ko. Alikkar bwe ear jab l̦ap joñan jel̦ãl̦o̦kjen̦ ko ippãn kõnke ear jab jel̦ã kõn Jesus Christ ñan jidik. Meñe ãindein, ak men ko Timote ear katak jãn Jeje ko rar jipañe bwe en wõr juon an pedped epen ñan erom juon Kũrjin. Bõtab eñin ke men eo enaaj kar kõm̦m̦ane? Ãinwõt juon likao, ear wõr an maroñ ñan kããlõt el̦aññe enaaj erom juon Kũrjin. Ejjel̦o̦k pere bwe juon iaan un ko me “kar kõm̦akũt [Timote] ñan [an] tõmaki” katak ko rem̦ool kõn Jesus ej kõn an kar jinen kate im katakini. (Riit 2 Timote 3:14, 15.) Eunis emaroñ kar lukkuun m̦õn̦õn̦õ kõnke ear maroñ lo tõprak ilo an katakin l̦adik eo nejin kõn Jeova meñe ear jab pidodo! Ãt eo etan Eunis ej itok jãn juon naan me ej mel̦el̦ein “anjo̦” im alikkar bwe ear jejjet ãt in ñane.

7. Ewi wãween an Eunis maroñ kar jipañ l̦adik eo nejin ñan kõm̦m̦an wõnm̦aanl̦o̦k ko ãlikin an peptaij?

⁷ Meñe peptaij ear juon buñtõn ne eaorõk ilo mour eo an Timote, ak ear jab jem̦l̦o̦k an Eunis inepata kõn l̦adik eo nejin. Enaaj ewi wãween an Timote kõjerbal mour eo an jãn kiiõ m̦aanl̦o̦k? Enaaj ke oktak im aetõl ro renana? Enaaj ke etal im jikuul̦ ilo Atens im jino tõmaki katak ko an ri-peikan ro remãlõtlõt? Enaaj ke oktak im ko̦kkure iien ko an, maroñ ko an, im iien eo kiiõ ke ej juon jo̦dikdik ñan koorl̦o̦k m̦weiuk? Eunis ear jab maroñ kõm̦m̦an jokãlõt ko ñan Timote, bõtab ear maroñ jipañe. Ewi wãween? Emaroñ wõnm̦aanl̦o̦k wõt im kate ñan jipañ l̦adik  eo nejin ñan kam̦wilal̦l̦o̦k yokwe eo an ñan Jeova im kwal̦o̦k an kam̦m̦oolol ñan eo Nejin. Ijoke, wãween ko reppen rejjab wal̦o̦k wõt ñan baam̦le ko me eoktak kabuñ ko aer jãn doon. Meñe jemãn im jinen juon baam̦le rej jim̦or pãd ilo m̦ool eo, ak emaroñ pen ñan tõpar bũruon ajri ro bwe ren erom ri-karejar ro retiljek an Jeova. Ta ko jemãn im jinen ajri ro remaroñ katak jãn joñak eo an Eunis?

8. Ewi wãween an juon jinen maroñ jipañ l̦eo pãleen me ej juon rũttõmak ñan katakin ajri ro nejierro kõn Jeova?

⁸ Katak Baibõl̦ ippãn ajri ro nejũm̦. Kõrã ro, el̦aññe l̦eo pãleem̦ ej pãd ilo m̦ool eo, Jeova ekõn̦aan bwe kwõn jipañe l̦eo pãleem̦ ñan katakin ajri ro nejimiro kõn E. Juon wãween kwõmaroñ kõm̦m̦ane men in ej ikijjeen am̦ rejetake Iien Kabuñ an Baam̦le. Kõnono kõn men ko rem̦m̦an kõn laajrak in, im l̦õmn̦ak kõn ta ko kwõmaroñ kõm̦m̦ani bwe iien in en juon iien em̦m̦an im elem̦õn̦õn̦õ. Bõlen kwõmaroñ jipañ l̦eo pãleem̦ ñan kõpooje juon bũrojããk ejejuwaan ñan ami katak Baibõl̦ ippãn doon. Bareinwõt, el̦aññe jet iaan ajri ro ebwe aer rũtto im remaroñ bõk tokjãn jãn aer jenolo̦k im katak kõn bok eo etan Enjoy Life Forever!, bõlen kwõmaroñ jipañ l̦eo pãleem̦ ñan kajejjet aikuj in aer.

9. Ia eo me juon jinen baam̦le emaroñ bõk jipañ jãne el̦aññe l̦eo pãleen ejjab juon rũttõmak?

⁹ Jet iaan kõrã ro me rej jinen juon baam̦le rej aikuj tõl ilo aer katak Baibõl̦ ippãn ajri ro nejier, emaroñ kõnke ejjel̦o̦k pãleer ak kõnke l̦eo pãleer ejjab juon rũttõmak. El̦aññe eñin wãween eo kwõj iioone, en jab l̦e jãn joñan am̦ inepata. Jeova enaaj jipañ eok. Kõjerbal kein jerbal ko el̦ap tokjãer me ear liwaj ikijjeen doulul eo an ñan katak ippãn ajri ro nejũm̦. Kwõmaroñ kajjitõk ippãn jet jemãn im jinen baam̦le ko me el̦ap imminene ko ippãer kõn wãween kwõmaroñ kõjerbal kein jerbal kein ilo iien kabuñ an baam̦le. * (JK. 11:14) Jeova emaroñ bar jipañ eok ñan kõnono im bwebwenato ippãn ajri ro nejũm̦. Kwõmaroñ jar ñan E im kajjitõk ippãn bwe en jipañ eok ñan kwal̦o̦k kajjitõk ko rejejjet bwe kwõn maroñ jel̦ã ta ko ilo l̦õmn̦ak ko im bũruon ajri ro nejũm̦. (JK. 20:5) Kwõmaroñ kwal̦o̦k kajjitõk ko ãinwõt ‘Ta apañ eo epentata kwõj iioone ilo jikuul̦?’ im men in emaroñ kõpel̦l̦o̦k iien ñan amiro kõnono im jipañ eok ñan katak elõñ men ko kõn ajri eo nejũm̦.

10. Ta wãween ko jet me kwõmaroñ jipañ ajri ro nejũm̦ ñan katak kõn Jeova?

¹⁰ Pukot wãween ko repel̦l̦o̦k ñan katakin ajri ro nejũm̦ kõn Jeova. Kõnono kõn Jeova im aolep men ko rem̦m̦an em̦õj an kõm̦m̦ane ñan kwe. (Dut. 6:6, 7; Ais. 63:7) El̦apl̦o̦k an men in aorõk el̦aññe kwõjjab maroñ katak aolep iien ippãn ajri ro nejũm̦ ilo m̦weo im̦õm̦. Christine, eo me kar kwal̦o̦k kake m̦oktal̦o̦k, ej ba: “Joñan an jeja iien ko repel̦l̦o̦k ñan aõ kõnono kõn Jeova ippãn ajri ro nejũ, iar lukkuun kortokjãn jabdewõt iien ko me rar pel̦l̦o̦k ñan ña. Kõmij kijoñ etetal ak uwe ilo juon kõrkõr im aõn̦õn̦ metol̦o̦k bwe kõm en bwebwenato kõn menin kõm̦anm̦an ko rekabwilõñlõñ an Jeova im kõn men ko jet me renaaj jipañ er ñan epaakel̦o̦k Jeova. Ke ajri ro nejũ rar rũttol̦o̦k, iar rõjañ er bwe ren katak Baibõl̦ ippãer make.” Kobal̦o̦k ippãn men in, kõnono kõn men ko rem̦m̦an kõn doulul eo an Jeova im kõn ro jeim̦ im jatũm̦ ilo tõmak. Jab kõnanaik em̦m̦aan ro rej lale eklejia. Men ko kwõj ba kõn er enaaj l̦ap an jelõt ajri ro nejũm̦, emaroñ kõm̦m̦an bwe en pen ak pidodo aer kepaak er ilo iien ko rej aikuj jipañ.

11. Ekkar ñan Jemes 3:18, etke eaorõk ñan kõm̦m̦an bwe en wõr aenõm̦m̦an ilo m̦õko im̦õd?

 ¹¹ Kõm̦m̦an bwe en wõr aenõm̦m̦an ilo m̦weo. Keini am̦ kwal̦o̦k yokwe ñan l̦eo pãleem̦ im ajri ro nejũm̦. Ñe kwõj kõnono kõn l̦eo pãleem̦, kõnono ilo juon wãween ejouj im ej kwal̦o̦k am̦ kautiej, im katakin ajri ro nejũm̦ bwe ren bar ãindein. Ñe kwõnaaj kõm̦m̦ane men in, kwõnaaj kõm̦m̦an bwe en wõr aenõm̦m̦an ilo m̦weo im emaroñ pidodo am̦ katakin ajri ro nejũm̦ kõn Jeova. (Riit Jemes 3:18.) L̦õmn̦ak kõn Jozsef, eo me ej jerbal ãinwõt juon jipejel̦ bainier ilo Romania. Ilo an kar rũttol̦o̦k, jemãn ear kõm̦m̦an bwe en lukkuun pen ñan an Jozsef, jinen, im ajri ro jein im jatin karejar ñan Jeova. Jozsef ej ba: “Jinõ ear kate bwe en wõr wõt aenõm̦m̦an ilo m̦weo im̦õm. El̦ak l̦apl̦o̦k an jema jab kwal̦o̦k jouj, el̦apl̦o̦k an jinõ kwal̦o̦k jouj. Ñe jinõ ej kile bwe epen ammim kwal̦o̦k kautiej im pokake jememmim, ej bwebwenato ippemmim kõn Epesõs 6:1-3. Innem ej kõnono ippem kõn kadkad ko rem̦m̦an an jemem im jipañ kõm ñan mel̦el̦e etke kõmij aikuj kaorõke. Ilo an ãindein, ear kõm̦m̦an bwe en wõr wõt aenõm̦m̦an ilo baam̦le eo am.”

12. Ekkar ñan 2 Timote 1:5, ewi wãween an kar joñak eo an Eunis jelõt Timote?

¹² Riit 2 Timote 1:5. Eunis ear likũt juon joñak em̦m̦an ñan Timote. Emaroñ kar katakini bwe juon ej kaalikkar bwe em̦ool an tõmak ikijjeen kõm̦m̦an ko an. (Jem. 2:26) Ejjel̦o̦k pere bwe Timote ear lo bwe yokwe eo el̦ap an jinen ñan Jeova ear kõm̦akũti ñan kõm̦m̦ani men ko ilo mour eo an. Timote ear lo bwe an jinen karejar ñan Jeova ear kõm̦m̦an bwe en lukkuun m̦õn̦õn̦õ. Ewi wãween an kar joñak eo an Eunis jelõt Timote? Ãinwõt an kar rijjilõk Paul kaalikkare, ear kajoor tõmak eo an Timote ãinwõt jinen. Men in ear jab jide im wal̦o̦k. Timote ear lale joñak eo an jinen im men in ear kõm̦akũti ñan anõke. Ejja ãindeinl̦o̦k wõt ilo raan kein, elõñ kõrã ro me rej jinen juon baam̦le rar maroñ tõpar bũruon ro uwaan baam̦le ko aer “meñe ejjel̦o̦k naan [ko rej] ba.” (1 Pit. 3:1, 2) Kwõmaroñ bar kõm̦m̦ane ejja men in wõt. Ewi wãween?

13. Etke juon jinen ej aikuj kõm̦m̦an bwe kõtaan eo an ippãn Jeova en men eo eaorõktata?

¹³ Kõm̦m̦an bwe kõtaan eo am̦ ippãn Jeova en men eo eaorõktata. (Dut. 6:5, 6) Ãinwõt kõrã ro jet me rej bar jinen juon baam̦le, elõñ men ko kwõj kaarmejjeteiki. Kwõj kaarmejjeteik iien ko am̦, jããn ko am̦, iien am̦ kiki, im men ko jet ñan kabwe aikuj ko an ajri ro nejũm̦. Bõtab ejjab aikuj l̦e jãn joñan am̦ poub ñan kabwe aikuj ko aer ñan joñan eo me ekõm̦m̦an am̦ kõjekdo̦o̦n kõtaan eo am̦ ippãn Jeova. Ekkeini am̦ kõm̦m̦an iien ñan am̦ jar, katak Baibõl̦ ippam̦ make, im pãd ilo iien kweilo̦k ko an eklejia. Ilo am̦ ãindein, kwõnaaj kõkajoorl̦o̦k kõtaan eo am̦ ippãn Jeova im likũt juon joñak em̦m̦an ñan baam̦le eo am̦ im ro jet.

14-15. Ta ko kwõj katak jãn joñak ko an Leanne, Maria, im João?

¹⁴ L̦õmn̦ak kõn joñak ko an jet ro reddik me rar katak ñan yokwe im lõke Jeova ikijjeen aer lale joñak ko an ro jineer. Ledik eo nejin Christine etan Leanne ej ba: “Kõmar jab maroñ katak Baibõl̦ ñe jema ej pãd ilo m̦weo. Bõtab jinõ ear lukkuun tiljek ilo an etal ñan iien kweilo̦k ko. Joñak eo an im an kar lukkuun tõmak ear jipañ kõm bwe en kajoor tõmak eo am meñe kõmar jab lukkuun jel̦ã kõn Baibõl̦ eo. Kõmar jel̦ã bwe eñin kar m̦ool eo m̦oktal̦o̦k wõt jãn am kar maroñ jino etal ñan iien kweilo̦k ko.”

¹⁵ Maria, eo me jemãn ekõn kajeik baam̦le eo aer kõn aer etal ñan iien kweilo̦k ko, ej ba:  “Jinõ ej juon iaan kõrã ro jeid im jatid ijel̦ã kake me elukkuun l̦ap an peran. Ke iar dik, jet iien ikõn m̦akoko in kõm̦m̦ani jet men ko kõn aõ mijak kõn ta ko ro jet renaaj ba. Bõtab ilo aõ kar lo joñan an jinõ peran im an aolep iien likũt Jeova m̦oktata ilo mour eo an, men in ear jipañ eõ bwe en jako aõ mijak armej.” João, eo me jemãn ear kõmo̦ik an baam̦le eo aer kõnono kõn Jeova ak Baibõl̦ eo ilo m̦weo im̦weer, ej ba: “Bõlen men eo el̦aptata an kar kõkajoor eõ ej an kar jinõ m̦õn̦õn̦õ in kaarmejjeteik aolep men ñan kabuñbũruon jema, ijello̦kun wõt yokwe eo an ñan Jeova.”

16. Ewi wãween an joñak eo an juon jinen maroñ jelõt ro jet?

¹⁶ Kom̦ ro jinen juon baam̦le, keememej bwe joñak ko ami rej jelõt ro jet. Ewi wãween? L̦õmn̦ak kõn wãween an kar joñak eo an Eunis jelõt rijjilõk Paul. Ear kile bwe tõmak eo em̦ool an Timote ej “ejja tõmak eo wõt ear wõr ippãn . . . Eunis.” (2 Tim. 1:5) Ñããt eo Paul ear jino loe im kile tõmak eo an Eunis? Emaroñ kar ilo tũreep in mijinede eo an kein kajuon ke ear iioon Lois im Eunis ilo Listra, im emaroñ kar jipañ er ñan erom Kũrjin. (Jrb. 14:4-18) Baj l̦õmn̦ak m̦õk: Ke Paul ear jejel̦o̦k ñan Timote—emaroñ kar 15 iiõ ko tokãlik—Paul ear keememej wõt an Eunis kwal̦o̦k an tiljek im ear kõjerbal joñak eo an ãinwõt juon joñak em̦m̦an ñan l̦oore! Alikkar bwe joñak eo an Eunis ear lukkuun kõkajoor rijjilõk Paul im elõñ iaan Kũrjin ro ilo kar tõre ko an rijjilõk ro. El̦aññe kwõj juon eo me ej make iaan ilo an kõkkaajiririik ajri ro nejin ilo m̦ool eo kõnke  ejjel̦o̦k rejetam̦ ak eo pãleem̦ ejjab juon rũttõmak, kwõmaroñ lõke bwe joñak eo am̦ kõn tiljek ej kõkajoor im kõketak ro jet.

17. Ta eo kwõmaroñ kõm̦m̦ane el̦aññe kwõl̦ak lale ãinwõt ajri eo nejũm̦ ejjab em̦m̦akũt kõn men ko kwõj kate eok ñan katakini?

¹⁷ Ta el̦aññe kwõl̦ak lale ãinwõt ajri eo nejũm̦ ejjab em̦m̦akũt kõn men ko kwõj kate eok ñan katakini? Keememej bwe ebõk iien ñan katakin juon ajri. Ãinwõt an wal̦o̦k ilo pija eo, ñe kwõj kalibwin juon ine, ewõr iien ko kwõmaroñ l̦õmn̦ak el̦aññe enaaj eddekl̦o̦k im tokãlik kalle. Meñe kwõjjab jel̦ã el̦aññe menin eddek eo enaaj kalle, ak kwõj wõnm̦aanl̦o̦k wõt im utdikdiki bwe en maroñ em̦m̦an an eddekl̦o̦k. (Mark 4:26-29) Ejja ãindeinl̦o̦k wõt, ãinwõt juon jinen, jet iien kwõmaroñ l̦õmn̦ak el̦aññe am̦ kate eok ñan jipañ ajri ro nejũm̦ ej tõpar bũrueer. Kwõjjab maroñ jel̦ã ta eo ro nejũm̦ renaaj kããlõt ñan kõm̦m̦ane. Bõtab el̦aññe kwõj wõnm̦aanl̦o̦k wõt im kate eok joñan wõt am̦ maroñ ñan katakin er, kwõnaaj maroñ jipañ er bwe en em̦m̦an aer eddekl̦o̦k ilo tõmak.​—JK. 22:6.

18. Ewi wãween an Jeova maroñ jipañ ajri ro nejũm̦ bwe ren eddekl̦o̦k ilo tõmak?

¹⁸ Jãn iien ko etto ilo Baibõl̦, em̦õj an Jeova jipañ elõñ ajri ro ñan erom ro jeran. (Sam 22:9, 10, UBS) Emaroñ bareinwõt jipañ ajri ro nejũm̦ bwe ren eddekl̦o̦k ilo tõmak, el̦aññe eñin kõn̦aan eo aer. (1 Kor. 3:6, 7) Meñe ajri ro nejũm̦ remaroñ jebwãbwe, ak Jeova enaaj wõnm̦aanl̦o̦k wõt im yokwe im lale er. (Sam 11:4, UBS) El̦aññe ewõr jidik kõkal̦l̦en bwe rej jet iaan ro me “em̦m̦an bũrueer,” Jeova enaaj pojakin jipañ er. (Jrb. 13:48; 2 Kro. 16:9) Emaroñ jipañ eok ñan ba men ko rejejjet ilo iien eo ejejjet—ilo iien eo ajri ro nejũm̦ rej lukkuun aikuji. (JK. 15:23) Ak emaroñ kõm̦akũt juon jeid im jatid em̦m̦aan ak kõrã ilo eklejia eo ñan kwal̦o̦k an lukkuun itoklimo kõn er. Meñe ajri ro nejũm̦ remaroñ kiiõ rũtto, ak Jeova emaroñ kakeememej er kõn juon men me kwaar katakini er ilo kar m̦okta. (Jon 14:26) Ñe kwõnaaj wõnm̦aanl̦o̦k wõt im katakin ajri ro nejũm̦ ikijjeen naan ko am̦ im joñak ko am̦, Jeova enaaj kõjeraam̦m̦an eok.

19. Etke kwõmaroñ lõke bwe ebuñbũruon Jeova ippam̦?

¹⁹ Yokwe eo an Jeova ñan kwe ejjab pedped ioon jokãlõt ko an ajri ro nejũm̦. Ej yokwe eok kõnke kwõj yokwe e. El̦aññe kwõj juon eo ewõr nejin im ejjel̦o̦k rejetan, Jeova ej kallim̦ur bwe enaaj juon Jemãn ñan ajri ro nejũm̦ im juon ri-Kõjparok ñan eok. (Sam 68:5, NW) Kwõjjab maroñ kõm̦m̦an bwe ajri ro nejũm̦ ren kããlõt ñan karejar ñan Jeova. Bõtab el̦aññe kwõnaaj wõnm̦aanl̦o̦k wõt im atartar ioon jipañ eo an Jeova im kate eok joñan wõt am̦ maroñ, enaaj buñbũruon ippam̦.