1-2. (a) Eunike olye, nokwa li e na eshongo lini e li omuvali? (b) Gandja etyokosha kethano ndyoka li li kombanda yoshifo.

 NONANDO Ombiimbeli inayi popya kombinga yeninginitho lyaTimoteus, yina, Eunike, oku na okukala a li a nyanyukwa noonkondo esiku ndyoka. (Omayel. 23:25) Kala andola wa fa wu mu wete ti imemeha e uvite uuntsa, sho Timoteus a thikama momeya a tetela mo oshiya. Sho ti imemeha, Loide, yinakulu yaTimoteus, okwe mu kwata komapepe. Eunike okwa fudha kashona e ta mwena po sho Timoteus a tulwa kohi yomeya. Sho a zi kohi yomeya, ogi inyenge muule, e ta tameke okwiimemeha. Eunike okwa tameke okulila omolwenyanyu. Okwa li a vulu okulonga omwanamati a kale e hole Jehova naJesus Kristus, nonando kasha li oshipu. Omashongo geni a li a sindi sho te shi ningi, sigo Timoteus a thiki poshitsa shokuninginithwa?

² Timoteus okwa putukila megumbo mu na aavali ye li momalongelokalunga ga yoolokathana. He okwa li Omugreka, omanga yina nayinakulu ya li Aajuda. (Iil. 16:1) Timoteus otashi vulika a li e na omimvo omulongo nasha, sho Eunike naLoide ya ningi Aakriste. Ihe nonando ongawo, he natango okwa li e li melongelokalunga li ili. Mbela Timoteus okwa li ta ka hogolola po elongelokalunga lini? Pethimbo ndyoka otashi vulika a li a koka nokuninga etokolo kuye mwene. Mbela okwa li ta yi melongelokalunga lyahe ngoka kee shi omwiitaali? Mbela okwa li ta ka kala momithigululwakalo dhAajuda mono a putudhilwa okuza kuunona? Nenge okwa li ta ka ninga omulanduli gwaJesus Kristus?

3. Shi ikolelela kOmayeletumbulo 1:8, 9, Jehova okwa tala ko ngiini iilonga mbyoka hayi longwa kaavalakadhi ya kwathele oyana ya ninge ookuume ke?

³ Aavalakadhi Aakriste kunena nayo oye hole aanegumbo yawo. Komeho gaayihe, oya hala okukwathela oyana ya kale ye  na uukuume wa kola naJehova. Okwa lenga oonkambadhala ndhoka haya ningi. (Lesha Omayeletumbulo 1:8, 9.) Jehova okwa kwathela aavalakadhi oyendji ya kwathele oyana ya taambe ko oshili.

4. Aavalakadhi yamwe oye li momashongo geni kunena?

⁴ Oshi li paunshitwe sho aavalakadhi omathimbo gamwe hayi ipula ngele oyana otaya ka longela ngaa Jehova, ngaashi Timoteus a li a ningi. Aavali oye shi wo kutya oyana ohayi iyadha taya thiminikwa muuyuni mbuka tawu pangelwa kuSatana. (1 Pet. 5:8) Shimwe ishewe, aavalakadhi oyendji ohaya mono oshidhigu okuputudha oyana, molwaashoka kaye na aasamane nenge ye na aasamane, ihe ihaya longele Jehova. Pashiholelwa, omumwameme Christine * okwa ti: “Omusamane gwandje okwa li omuvali e li nawa nohe tu sile nawa oshimpwiyu megumbo, ihe kali e shi hole nandonando sho tandi putudha aanona yetu ya ninge Oonzapo dhaJehova. Onda lila iikando oyindji uule womimvo, tandi ipula ngele uunona wandje onawu ka longele ngaa Jehova.”

5. Oshike tatu ka kundathana moshitopolwa shika?

⁵ Ngele owu li omuvalakadhi Omukriste, oto vulu lela okupondola ngaashi Eunike. Moshitopolwa shika otatu ka kundathana nkene to vulu oku mu holela mokulonga aamwoye okupitila mwaashoka ho popi nomwaashoka ho ningi. Otatu ka tala wo nkene Jehova ta vulu oku ku kwathela.

6. Ngaashi sha popiwa muTimoteus omutiyali 3:14, 15, oshe ende ngiini Timoteus a ninge Omukriste?

⁶ Sho Timoteus a li okamatyona, yina okwa li a ningi ngaashi ta vulu e mu longe “omanyolo omayapuki,” ngaashi Aajuda ya li ye ga uvite ko. Odhoshili kutya kali e na ontseyo oyindji, molwaashoka kali e shi sha kombinga yaJesus Kristus. Ihe shoka Timoteus a li i ilongo mOmanyolo, osha li tashi vulu oku mu kwathela a ninge Omukriste. Mbela osho ngaa a li ta ka ninga? E li omumati omugundjuka, okwa li e na uuthemba wokuhogolola ngele ota ningi Omukriste. Kapu na omalimbililo kutya okwa li wo a “tompwa i itaale” (NW) oshili kombinga yaJesus kuyina. (Lesha 2 Timoteus 3:14, 15.) Eunike kali tuu a nyanyukwa sho a vulu okulonga omwana kombinga yaJehova, nonando kasha li oshipu! Eunike okwa kala shili metsokumwe nedhina lye, ndyoka lya za koshitya tashi ti “omusindani.”

7. Eunike okwa li a kwathele ngiini omwana a tsikile okuninga Omukriste e li hwepo konima sho a ninginithwa?

⁷ Eninginitho olyo lya li onkatu ya simana monkalamwenyo yaTimoteus, ihe Eunike okwa li natango e na omaipulo. Okwa li ti ipula kutya omwana ngoka ota ka longitha ngiini onkalamwenyo ye ayihe? Mbela ota ka kala e na ookuume aawinayi? Mbela ota ka ya kosikola yokuAtena e ta ka taamba ko omalongo gaafilosofi aapagani? Mbela ota ka longa a ninge omuyamba, a hepithe owala ethimbo lye, oonkondo dhe nuugundjuka we? Eunike kali ta ka ningila Timoteus omatokolo, ihe okwa li ta vulu oku mu kwathela. Ngiini mbela? Okwa li ta ka tsikila oku mu longa a kale e hole Jehova noonkondo nosho wo Omwana, Jesus Kristus. Aavali mboka ye na ookuume kawo kopandjokana ihaaya longele Jehova hayo owala haye shi mono oshidhigu okukwathela oyana ya kale ye hole Jehova. Naavali mboka ye li moshili, nayo ohaya vulu oku shi mona oshidhigu okulonga oyana, opo ya ninge aapiya yaJehova aadhiginini. Oshike aavali taya vulu okwiilonga koshiholelwa shaEunike?

8. Ongiini omuvalakadhi ta vulu okukwathela omusamane gwe ngoka e li Onzapo a longe oyana kombinga yaJehova?

⁸ Konakona Ombiimbeli naamwoye. Aamwameme, ngele omusamane gwoye oku li moshili, Jehova okwa hala wu mu kwathele sho ta longo  oyana yeni ya kale ye hole Jehova. Omukalo gumwe to vulu oku shi ninga omokuyambidhidha aluhe Elongelokalunga lyUukwanegumbo. Kala ho popile muuwanawa elongekidho ndyoka, nokutala kutya oshike to vulu okuninga, opo li kale tali nyanyudha notali ningwa momukalo gwombili. Oto vulu wu kwathele omusamane gwoye a longekidhe oproyeka yi ikalekelwa yokukonakona Ombiimbeli. Shimwe ishewe, ngele aanona yeni yamwe oya koka nomu wete kutya otaya ka mona mo uuwanawa ngele oya konakona paumwene embo Kala nonkalamwenyo ombwanawa sigo aluhe, oto vulu okukwathela omusamane gwoye e ya kwathele ye li konakone paumwene.

9. Omuvalakadhi ngoka e na omusamane kee shi Onzapo ota vulu okwaadha peni ekwatho?

⁹ Aavalakadhi yamwe oyo haya konakona noyana Ombiimbeli, molwaashoka otaya putudha oyana oyo ayeke nenge aasamane yawo kaye shi Oonzapo dhaJehova. Ngele osho shi li ngawo maandjeni, ino kala to ipula nasho unene. Jehova ote ku kwathele. Longitha iilongitho iiwanawa mbyoka e tu pa okupitila mehangano lye, wu konakone naamwoye. Omolwashike wo itoo pula aavali mboka ye na owino ye ku pe omaetopo gankene to vulu okulongitha iilongitho mbyoka pelongelokalunga lyeni lyuukwanegumbo? * (Omayel. 11:14) Jehova ota vulu wo oku ku kwathela wu kale ho kundathana naamwoye. Mu pula e ku kwathele wu popye nayo momukalo ngoka tagu ya ningitha ya popye shoka shi li momadhiladhilo nomomitima dhawo. (Omayel. 20:5) Epulo ngaashi: ‘Eshongo lini enene wu na kosikola?’ otali vulu oku mu ningitha mu ye moonkundathana moka te ke ku lombwela oshindji.

10. Omomikalo dhimwe dhini to vulu okukwathela aamwoye yi ilonge kombinga yaJehova?

¹⁰ Kala ho kongo oompito dhi ili nodhi ili wu longe aamwoye kombinga yaJehova. Popya kombinga yaJehova nosho wo kombinga yiinima iiwanawa mbyoka e ku ningila. (Deut. 6:6, 7; Jes. 63:7) Shika osha simana, unene tuu ngele iho vulu okukonakona aluhe Ombiimbeli naamwoye megumbo. Christine, ngoka a popiwa petameko, okwa ti: “Kanda li handi kala ndi na oompito odhindji ndi popye naamwandje kombinga yaJehova, onkee onda li nda longitha ompito kehe ndjoka tu na. Otwa li hatu ka enda nenge tu dhuge okawato tu popye kombinga yeshito lyaJehova ekumithi niinima yilwe oyindji kombinga ye. Sho aanona yandje ya koko, onda li nde ya ladhipike ya konakone Ombiimbeli paumwene.” Shimwe ishewe, kala ho popile muuwanawa ehangano lyaJehova nosho wo aamwatate naamwameme. Ino popila muuwinayi aakuluntugongalo. Shoka ho popi kombinga yawo, otashi vulika shi ningithe aamwoye ya popye naakuluntugongalo nenge kaaye shi ninge uuna ya pumbwa ekwatho.

11. Shi ikolelela kuJakob 3:18, omolwashike sha simana okuhumitha komeho ombili megumbo?

¹¹ Humitha komeho ombili megumbo. Kala ho ulike pandjigilile kutya owu hole omusamane gwoye nosho wo aamwoye. Popya kombinga ye momukalo gwombili nogwesimaneko, e to kwathele wo aamwoye ya ninge sha faathana. Ngele osho wa ningi, otashi ka kala oshipu megumbo kaamwoye yi ilonge kombinga yaJehova. (Lesha Jakob 3:18.) Tala koshiholelwa shaJozsef, ngoka e li omukokolindjila i ikalekelwa moRomania. Sho ta putuka, he okwa li e shi ningitha oshidhigu noonkondo kuyina naamwayina ya longele Jehova. Jozsef okwa ti: “Meme okwa li ha kondjo a mana mo, opo megumbo mu kale mu na ombili. Uuna tate a geya unene, meme okwa li ha kala a ngungumana. Ngele okwa mono kutya oshidhigu kutse okusimaneka  tate nokuvulika kuye, okwa li ha kundathana natse Aaefeso 6:1-3. Opo nduno okwa li ha popi natse kombinga yuukwatya watate uuwanawa nokwe tu kwathele tu mone kutya omolwashike tu na oku mu simaneka. Okwe tu kwathela tu kale tu na ombili, uuna megumbo mwa li mwa holoka oonkalo odhindji itaadhi nuwa omeya.”

12. Shi ikolelela kuTimoteus omutiyali 1:5, oshiholelwa shaEunike osha li sha gumu ngiini Timoteus?

¹² Lesha 2 Timoteus 1:5. Eunike okwa li a tulile po Timoteus oshiholelwa oshiwanawa. Oku na okukala a li e mu longo kutya eitaalo lyashili ohali ulikwa miilonga. (Jak. 2:26) Kapu na omalimbililo kutya Timoteus okwa li wo a mono kutya yina oha katuka oonkantu ti inyengithwa kohole ye ya kola yokuhola Jehova. Osha yela wo kutya Timoteus okwa li a mono kutya okulongela Jehova okwe etela yina enyanyu. Oshiholelwa shaEunike osha li sha gumu ngiini Timoteus? Ngaashi omuyapostoli Paulus e shi ndhindhilike, Timoteus okwa li e na eitaalo lya kola lya fa lyayina. Ihe eitaalo ndika kali owala e li mono ombaadhilila. Timoteus okwa li ha tala nawa koshiholelwa shayina, shoka sha li she mu inyengitha e shi landule. Sha faathana kunena, aakulukadhi oyendji kunena oya adha omitima dhaantu yaandjawo ‘inaaye shi ninga noohapu.’ (1 Pet. 3:1, 2) Nangoye oto vulu okuninga sha faathana. Ngiini mbela?

13. Omolwashike omuvalakadhi e na okupititha komeho ekwatathano lye naJehova?

¹³ Kala wa pititha komeho ekwatathano lyoye naJehova. (Deut. 6:5, 6) Ngaashi aavalakadhi oyendji, nangoye oho ningi omaiyambo ogendji. Oho longitha ethimbo lyoye, iimaliwa yoye, nethimbo limwe iho kotha. Owa etha po wo okuninga iinima yimwe, opo wu sile oshimpwiyu aanona yoye palutu. Ihe ino kala unene ho kala wi ipyakidhila niinima mbyoka e to kala ihoo koleke ekwatathano lyoye naJehova. Kala aluhe ho itulile po ethimbo wu galikane paumwene, wu ninge ekonakonombiimbeli lyopaumwene nokwiilongekidhila okugongala. Ngele osho wa ningi, ekwatathano lyoye naJehova otali ka kola noto ka tulila po yaandjeni nosho wo yalwe oshiholelwa oshiwanawa.

14-15. Owi ilongo shike koshiholelwa shaLeanne, Maria, naJoão?

¹⁴ Natu ka taleni kiiholelwa yimwe yaagundjuka mboka yi ilongo okukala ye hole Jehova noku mu inekela mokutala koshiholelwa shooyina. Leanne, omwanakadhona gwaChristine, okwa ti: “Ka twa li hatu vulu okukonakona Ombiimbeli ngele tate omo e li megumbo. Ihe meme okwa li hayi aluhe kokugongala. Nonando ka twa li tu shi oshindji kombinga yOmbiimbeli, shoka a li ha ningi oshe tu kwathele tu kale tu na eitaalo lya kola. Otwa li tu shi kutya Oonzapo dhaJehova ohadhi longo aantu oshili, manga nokuli inaatu tameka okuya kokugongala.”

¹⁵ Maria, ngoka he omathimbo gamwe a li he ya geele uuna ya yi kokugongala, okwa ti: “Meme oye gumwe gwomaamwameme mboka ndi shi ye na uulaadhi. Sho nda li okanona, omathimbo gamwe onda li handi tindi okuninga iinima molwaashoka nda tila kutya yamwe otaya tile ndje ngiini. Ihe sho nda li handi mono meme e na uulaadhi nankene a pititha aluhe Jehova komeho monkalamwenyo ye, osha kwathele ndje ndi sinde uumbanda wokutila aantu.” João, ngoka he a li he ya keelele kaaya popye kombinga yaJehova megumbo, okwa ti: “Oshinima shoka ndi wete sha kwathela ndje osho kutya meme okwa li e na ehalo lyokweetha po kehe shimwe, kakele kekwatathano lye naJehova, opo a uvithe nawa tate.”

16. Oshiholelwa shomuvalakadhi otashi vulu ngiini okuguma yalwe?

¹⁶ Aavalakadhi, dhimbulukweni kutya oshiholelwa  sheni otashi vulu okuguma yalwe. Ngiini mbela? Tala nkene oshiholelwa shaEunike sha li sha gumu omuyapostoli Paulus. Okwa li a nyola kutya Timoteus okwa li e na eitaalo lya kola ‘ongaandyoka lyayina Eunike.’ (2 Tim. 1:5) Uunake Paulus a li a mono kutya Eunike oku na eitaalo? Otashi vulika pethimbo lyolweendo lwe lwotango lwuuyendi sho a tsakanene naLoide nosho wo naEunike muListra, notashi vulika a li e ya kwathele ya ninge Aakriste. (Iil. 14:4-18) Dhiladhila owala kwaashika: Sho Paulus a ka nyolela Timoteus konima yomimvo 15, okwa dhimbulukwa iilonga yuudhiginini yaEunike nokwe mu popi kutya oku li oshiholelwa oshiwanawa! Osha yela kutya oshiholelwa shaEunike osha li sha tsu omukumo omuyapostoli Paulus noonkondo nosho wo Aakriste yalwe oyendji mboka ya li ko pethimbo ndyoka. Ngele oto putudha aamwoye ongoye awike, nenge omusamane gwoye kee shi Onzapo yaJehova, kala wu na uushili kutya oshiholelwa shoye shuudhiginini otashi vulu okutsa yalwe omukumo noku ya ladhipika.

17. Oshike wu na okuninga ngele owu wete kutya okamwoye oto ka kwathele, ihe inaka hala okulongela Jehova?

¹⁷ Ongiini nduno ngele oto ningi ngaashi to vulu wu kwathele omumwoye, ihe ita ningi po sha? Dhimbulukwa kutya okuputudha okanona ohaku pula ethimbo. Ngaashi sha ulikwa methano, uuna wa kunu sha, omathimbo gamwe otashi vulika wu kale wa limbililwa ngele otashi ka mena ngaa e tashi ningi omuti hagu imi. Nonando iho kala wu shi wo ngele omuti ngoka otagu ka ima, oho tsikile oku gu tekela, opo gu koke nawa. (Mark. 4:26-29) Sha faathana, wu li  omuvali, omathimbo gamwe otashi vulika wu kale wa limbililwa ngele oho adha ngaa omitima dhaamwoye. Odhoshili kutya ito vulu oku ya ningila omatokolo. Ihe ngele owa tsikile oku ya kwathela, oto ya pe ompito ombwanawa ya ninge ookuume kaKalunga. — Omayel. 22:6.

18. Jehova ota vulu ngiini okukwathela aamwoye ya ninge ookuume ke?

¹⁸ Okuza pethimbo lyOmbiimbeli, Jehova okwa kwathela aagundjuka oyendji ya ninge ookuume ke. (Eps. 22:9, 10) Ota vulu wo a kwathele aamwoye ya ninge ookuume ke, ngele osho ya hala. (1 Kor. 3:6, 7) Nonando aamwoye otaya monika taya yi kokule naJehova, Jehova ota kala aluhe e ya hole. (Eps. 11:4) Ngele oya ulike owala nando okashona kutya “oya halelela oku ka mona omwenyo gwaaluhe,” Jehova ota kala aluhe i ilongekidha oku ya kwathela. (Iil. 13:48, NW; 2 Ondjal. 16:9) Ota vulu wo oku ku kwathela wu popye iinima yu uka pethimbo lyo opala, ano pethimbo ndyoka aamwoye ya pumbwa lela oku yi uva. (Omayel. 15:23) Nenge otashi vulika i inyengithe omumwatate nenge omumwameme gumwe megongalo lyeni a ulike ohokwe muyo. Nonando aamwoye oya ka ninga aakuluntu, Jehova otashi vulika e ke ya dhimbulukithe oshinima shontumba shoka we ya longa. (Joh. 14:26) Ngele owa tsikile okuputudha aamwoye okupitila moohapu nomiilonga, Jehova ote ke ku yambeka.

19. Omolwashike to vulu okukala wu na uushili kutya Jehova okwe ku hokwa?

¹⁹ Jehova oku ku hole, ihe ohole ye ndjoka inayi ikolelela komatokolo ngoka aamwoye haya ningi. Oku ku hole molwaashoka owu mu hole. Ngele oto putudha aamwoye ongoye awike, Jehova oku uvaneka kutya ota kala He yaamwoye nOmugameni gwoye. (Eps. 68:5) Ito vulu okuthiminika aamwoye ya longele Jehova nenge kaaye mu longele. Ihe ngele owa tsikile okukala wi ikolelela muJehova nokuninga ngaashi to vulu, ota ka kala e ku hokwa.