1-2. (a) Bekangubani uYunisi begodu ngiziphi iintjhijilo aqalana nazo njengomma? (b) Khuluma ngalokho okusesithombeni esisekuthomeni.

 Nanyana iBhayibheli lingahlathululi okungako ngokubhajadiswa kwakaThimothi, akusibudisi ukucabanga ngethabo ummakhe uYunisi abanalo ngelangelo. (IzA. 23:25) Akhumcabange, njengombana amehlwakhe avulekile azele ithabo aqale uThimothi ngemanzini, uyamomotheka njengombana ugogo kaThimothi uLowisi ambambe ngesandla. UYunisi udosa umoya ulinga ukuphefumula njengombana uThimothi asithela ngemanzini. Njengombana kuzwakala itjhada lamanzi, uThimothi uphuma ngemanzini begodu uyamomotheka, ummakhe ubhalelwa kuzibamba njengombana kwehla iinyembezi ebusweni bakhe. Kwamthabisa khulu uYunisi ukuthi uphumelele ukufundisa indodanakhe bona ithande uJehova neNdodanakhe uJesu Krestu. Ngibuphi ubudisi okwatlhogeka aqalane nabo bekabuhlule?

² UThimothi wakhuliswa emndenini oneenkolo ezingafaniko. Ubabakhe bekamGirigi, ummakhe nogogwakhe bamaJuda. (IzE. 16:1) Kungenzeka uThimothi bekasese msanyana lokha uYunisi noLowisi bakhetha ikolo ehlukileko, yobuKrestu. Nanyana kunjalo, umndeni wekhabo wahlala uhlukene ngokwekolo. Bekazokukhethani uThimothi? Kungenzeka besele akhule ngokwaneleko bona angazenzela iinqunto. Inga-kghani bekazokukhetha ukuba sehlangothini lakababakhe ongakholwako? Kghani bekazokunamathela emasikweni wamaJuda afundiswa wona asesemncani namkha bekazokwamukela ikolo etjha, akholelwe kuJesu Krestu?

3. NgokwezAga 1:8, 9, uJehova uyiqala njani imizamo yabomma yokusiza abantwana babo bona babe bangani bakhe?

 ³ Abomma abamaKrestu namhlanjesi bayayithanda imindenabo. Ngaphezu kwakho koke, bafuna ukusiza abantwana babo babe nobuhlobo obutjhideleneko noJehova. UZimethu uyayithokozela imizamo abayenzako. (Funda IzAga 1:8, 9.) UJehova unqophise abomma abanengi njengombana basiza abantwana babo bona bamukele iqiniso.

4. Ngiziphi iintjhijilo abomma abaqalana nazo namhlanjesi?

⁴ Kungokwemvelo bona umma ngezinye iinkhathi atshwenyeke ngokuthi, inga-kghani abantwabakhe bazokukhetha ukulotjha uJehova njengombana kwenza uThimothi. Kazi ababelethi bayazi ukuthi kungangani ukugandelelwa abantwababo abaqalana nakho ephasini lakaSathaneli. (1 Pit. 5:8) Ngaphezu kwalokho, kuba sitjhijilo kibomma abanengi nakufuze bakhulise abantwana babo ngaphandle kwabobaba namkha lokha ubaba nakangamlotjhiko uJehova. Ngokwesibonelo, udade ibizo lakhe linguChristine * uthi: “Ubabakwami bekangubaba omuhle begodu awuthanda umndenakhe kodwana bekaphikisana nokuthi sikhulise abantwana bethu njengaboFakazi bakaJehova. Eminyakeni edlulileko bengilokhu ngilila iinyembezi ngizibuza bona khuyini abantwabami abangayenza nabazakulotjha uJehova.”

5. Sizokucoca ngani esihlokwenesi?

⁵ Nange ungumma ongumKrestu, nawe ungaphumelela njengoYunisi. Esihlokwenesi, sizokucoca ngokuthi ungasilingisa njani isibonelo sakhe ekufundiseni abantwana bakho ngalokho okutjhoko nangalokho okwenzako. Sizokubona nokuthi uJehova uzokusiza njani.

6. Njengombana kuvezwe kweyesi-2 kaThimothi 3:14, 15, uThimothi waba njani mKrestu?

⁶ Lokha uThimothi nakasese msanyana, ummakhe wenza koke okusemandlenakhe bona amnikele ilwazi ‘lemitlolo ecwengileko,’ ngendlela amaJuda ebekayizwisisa ngayo. Iye khona ilwazi lakhe belilincani ngombana kuncani khulu ebekakwazi ngoJesu Krestu. Nanyana kunjalo, lokho uThimothi akufunda emiTlolweni kwamnikela isisekelo esihle sokwamukela ubuKrestu. Inga-kghani bekazobamukela? Njengesokana eliseselitjha, bekanelungelo lokukhetha bona uzokuphila njani ukuphila kwakhe njengomKrestu. Asizazi ukuthi uThimothi ‘wakholiswa bona akholelwe’ iqiniso ngoJesu begodu nalapho bekungebanga lemizamo kanina. (Funda yesi-2 kaThimothi 3:14, 15.) Ungacabanga bona kwamthabisa kangangani uYunisi ukuthi waqalana ngokuphumelelako neentjhijilo zokufundisa indodanakhe ngoJehova. Mbala uYunisi waphila ngalokho okutjhiwo libizo lakhe, elinehlathululo ethi, “ukuhlula.”

7. UYunisi bekangayisiza njani indodanakhe iragele phambili nokuthuthuka ngemva kokubhajadiswa?

⁷ Ukubhajadiswa bekuligadango eliqakatheke khulu ekuphileni kwakaThimothi nanyana kunjalo ukutshwenyeka kwakaYunisi bekungakapheli. Bekazibuza bona indodanakhe izokusebenzisa njani ukuphila kwayo? Kghani beyizozihlanganisa nabantu abambi? Kghani beyizokuya esikolweni e-Athene begodu yamukele iimfundiso zabantu abangakholwako namafilosofi wendawo? Kghani beyizokuba sigqila sezinto eziphathekako, imotjhe isikhathi, amandla nobutjha bayo? UYunisi bengeze amkhethele uThimothi kodwana bekangamsiza. Njani? Bekangaragela phambili nokufundisa indodanakhe ukuthanda uJehova begodu  athokoze neNdodanakhe uJesu. Iintjhijilwezi akusingezalabo abahlala emndenini ohlukene ngokwekolo kwaphela. Ngitjho nalokha ababelethi bobabili baseqinisweni, kungaba budisi ukufikelela iinhliziyo zabantwana babo abasesebatjha ukwenzela bona balotjhe uJehova ngokuthembeka. Khuyini ababelethi abangayifunda esibonelweni sakaYunisi?

8. Umma angamsiza njani ubabakwakhe afundise abantwabakhe ngoJehova?

⁸ Funda iBhayibheli nabantwana bakho. Bodadwethu, nangabe abalingani benu baseqinisweni, uJehova ufuna nibasize batlhogomele ubuhlobo babantwana benu noJehova. Enye indlela eningakwenza ngayo lokhu, kusekela qobe ihlelo lokuLotjha koMndeni. Khulumani izinto ezakhako ngelungiselelweli begodu nenze nanyana yini bona isikhathi sokufunda kube ngesithabisako begodu kubemnandi. Mhlamunye ungasiza ubabakwakho ahlele iimfundo ezikhethekileko namkha izinto eningazenza eziseBhayibhelini. Ngaphezu kwalokho, nangabe abanye babantwabenu bakhule ngokwaneleko bona bangazuza ngokufunda iBhayibheli basebenzisa incwadi ethi, Thabela Ukuphila Ngokungapheliko! kungaba kuhle ukubambisana nabalingani benu, ninikele abantwabenu isizo abalitlhogako.

9. Umma onendoda engakholwako, angalifumanaphi isizo?

⁹ Abanye abomma kutlhogeka badose phambili ekufundeni iBhayibheli nabantwana babo, lokhu kungabangelwa kukuthi bakhulisa abantwana babodwa namkha abobabakwabo abakholwa. Nangabe kunjalo ngawe, ungatshwenyeki khulu. UJehova uzokusiza. Sebenzisa amathulusi aphumelelako uJehova asinikele wona ngehlanganwakhe bona ufunde nabantwabakho. Kubayini ungabawi isizo kwabanye ababelethi abanelemuko bona ungawasebenzisa njani amathulusi la ekulotjheni komndeni? * (IzA. 11:14) UJehova angakusiza nangokuthi ukghone ukukhulumisana kuhle nabantwana bakho. Mbawe akusize ufumane lokho okusemkhumbulweni neenhliziyweni zabantwabakho. (IzA. 20:5) Umbuzo olula njengothi, ‘Khuyini ekunikela isitjhijilo khulu esikolweni?’ ungasiza khulu wenze nokuthi nicoce nangezinye izinto.

10. Ngiyiphi enye indlela ongasiza ngayo abantwana bakho bafunde ngoJehova?

¹⁰ Yakha amathuba wokufundisa abantwana bakho ngoJehova. Khuluma ngoJehova nangezinto ezinengi ezihle akwenzele zona. (Dut. 6:6, 7; Isa. 63:7) Lokhu kuqakathekile, khulukhulu nawungakghoni ukufunda qobe nabantwana bakho ekhaya. UChristine ekhekwakhulunywa ngaye phambilini uthi: “Amathuba wokukhuluma ngoJehova bekamancani khulu, yeke ngabona ithuba lokusebenzisa nanyana ngisiphi isikhathi engisifumanako. Qobe besinokuphuma sikhambe singene eenkepeni ezincani zemanzini siphehle siye ngemlanjeni, nasilapho besikhuluma ngendalo kaJehova nangezinto ezinengi ezihle ezingabenza babe bangani bakhe. Kwathi lokha abantwana bami sebakhule ngokwaneleko, ngabakhuthaza bona bazifundele iBhayibheli.” Ngaphezu kwalokho, khuluma kuhle ngehlangano kaJehova nangabafowethu nabodadwethu. Ungakhulumi kumbi ngabadala. Okukhulumako ngabo kungasiza abantwana bakho baye kibo nabatlhoga isizo.

11. NgokwakaJakopo 3:18, kubayini kuqakathekile ukuthuthukisa ukuthula ekhaya?

¹¹ Thuthukisa ukuthula ekhaya. Kwenze umukghwa ukukhuluma ngendlela omthanda ngayo ubabakwakho kunye nabantwana bakho. Khuluma nobabakwakho ngendlela ehloniphekileko  nenomusa begodu ubandule abantwana bakho ukuthi benze okufanako. Nawenza njalo, uzabe uthuthukisa ukuthula okuzokwenza bona kube bulula ukufunda ngoJehova. (Funda uJakopo 3:18.) Cabanga ngesibonelo sakaJozsef, oliphayona elikhethekileko eRomania. Lokha nakasakhulako, ubabakhe wenza kwababudisi bona yena, ummakhe nabantwana bekhabo balotjhe uJehova. UJozsef uthi: “Umma bekalinga ngamandla ukwenza ukuthula ekhaya. Lokha ubaba nakakhuluma amezwi abuhlungu umma bekaba nomusa ngasosoke isikhathi. Ngesikhathi abona ukuthi kubudisi ngathi ukuhlonipha besilalele ubaba, umma bekacoca nathi ngomtlolo webe-Efesu 6:1-3. Ngemva kwalokho, acoce nathi ngobuntu obuhle bakababa begodu wasisiza sazwisisa ukuthi kubayini nathi kufuze simthande. Ebujamweni obunengi bekasebenzisa umtlolo lo ukwehlisa ilaka lethu.”

12. Ngokweyesi-2 kaThimothi 1:5, ngimuphi umphumela isibonelo sakaYunisi esaba nawo kuThimothi?

¹² Funda yesi-2 kaThimothi 1:5. UYunisi wabekela uThimothi isibonelo esihle. Kungenzeka wamfundisa bona ukukholwa kwamambala kubandakanya izenzo. (Jak. 2:26) UThimothi bekangazazi ukuthi lokho ebekwenziwa ngummakhe bekungebanga lethando elidephileko analo ngoJehova. UThimothi wabona ukuthi ukulotjha uJehova bekumthabisa ummakhe. Isibonelo sakaYunisi saba namuphi umphumela kuye? Njengombana kwatjho umpostoli uPowula, uThimothi bekanokukholwa okufana nokwakanina. Lokhu akhenge kuzenzakalele. Kwatlhogeka ukuthi aqale isibonelo sakammakhe begodu lokho kwenza bona amlingise. Ngendlela efanako, namhlanjesi abomma abanengi bafikelele iinhliziyo zamalunga wemindenabo “ngaphandle kwelizwi.” (1 Pit. 3:1, 2) Nawe ungenza okufanako. Njani?

13. Kubayini umma kufuze enze ubuhlobo bakhe noJehova buze qangi?

¹³ Yenza ubuhlobo bakho noJehova buze qangi. (Dut. 6:5, 6) Njengabomma abanengi, kunengi ukuzidela okwenzako. Udela isikhathi sakho, imali, ukuphumula nezinye izinto bona utlhogomele umndenakho ngezinto ozitlhogako. Akukafuzi ube majadu khulu ngalokho bewungasakghoni ukutlhogomela ubuhlobo bakho noJehova. Qobe, bekela ngeqadi isikhathi sokuthandaza, sokuba nesifundo somuntu mathupha ufunda iBhayibheli nesokuya emihlanganweni yebandla. Ngokwenza njalo, uzokuqinisa ubuhlobo bakho noJehova begodu ubekele umndenakho kunye nabanye isibonelo esihle.

14-15. Khuyini oyifundako esibonelweni sakaLeanne, uMaria, noJoão?

¹⁴ Akhesicoce ngeembonelo ezimbalwa zabantu abatjha, abafunda ukuthanda uJehova nokumthemba ngokuqala kibommabo. Indodakazi kaChristine, uLeanne ithi: “Besingakghoni ukufunda iBhayibheli ubaba nakasekhaya kodwana umma bekazimisela begodu besiya qobe emihlanganweni. Nanyana bekungasikunengi ebesikwazi ngeBhayibheli kodwana izenzo zakhe zasisiza saba nokukholwa okuqinileko. Sazi kade ukuthi aboFakazi bakaJehova bafundisa iqiniso ngaphambi kokuthi sithome nokuya esifundweni.”

¹⁵ UMaria, ubabakhe ngezinye iinkhathi ebekababetha ngebanga lokuya esifundweni, uthi: “Umma ngomunye wabodade abanesibindi engibaziko. Nangisesemntwana, ngezinye iinkhathi bengingafuni ukwenza ezinye zezinto ngokusaba ukuthi abanye bazokuthini. Kodwana ukubona isibindi umma ebekanaso nendlela ebekathemba ngayo uJehova begodu ambeka qangi ekuphileni kwakhe, kwangisiza  ngahlula ukusaba abantu.” UJoão, ubabakhe ebekangavumi bona ekhabo kucocwe ngoJehova, uthi: “Okwangithinta khulu kukuthi umma bekazimisele ukulahlekelwa ngikho koke ngaphandle kwethando lakhe ngoJehova ngebanga lokuthi ufuna ukuthabisa ubaba.”

16. Ngimuphi umphumela isibonelo sakamma esingaba nawo kwabanye?

¹⁶ Bomma, khumbulani ukuthi isibonelo sakho siyabathinta abanye. Njani? Cabanga ngomphumela isibonelo sakaYunisi esaba nawo kumpostoli uPowula. Wakubona ukukholwa okunganabuzenzisi kwakaThimothi ‘okuthome kwanzinza. . . kuYunisi.’ (2 Thim. 1:5) UPowula wathoma nini ukubona ukukholwa kwakaYunisi? Kungenzeka bekungesikhathi asekhambweni lakhe lokuthoma njengesithunywa sevangeli nakahlangana noLowisi noYunisi eListra begodu kungenzeka wabasiza babamaKrestu. (IzE. 14:4-18) Akhucabange: Lokha uPowula nakatlolela uThimothi ngemva kweminyaka eli-15, bekasakukhumbula ukukholwa nezenzo zakaYunisi begodu wamsebenzisa njengesibonelo ekufuze silingiswe! Kuyakhanya ukuthi isibonelo sakhe samkhuthaza khulu umpostoli lo begodu kungenzeka sakhuthaza namanye amaKrestu ebekaphila ngesikhatheso. Nawukhulisa abantwana ngaphandle komlinganakho namkha emndenini ohlukeneko ngokwekolo, qiniseka ngokuthi isibonelo sakho sokukholwa siyabaqinisa begodu siyabakhuthaza labo abahlanu kwakho.

17. Khuyini ekufuze uyenze nakubonakala kwanga umntwanakho akasabeli kuhle ebandulweni omnikela lona?

¹⁷ Kuthiwani nangabe umntwanakho akasabeli  kuhle naphezu kwemizamwakho? Khumbula bona ukubandula umntwana kuthatha isikhathi. Njengombana kutjengiswe esithombeni, nawutjala imbewu ngezinye iinkhathi ungazibuza ukuthi, kghani izakhe ikhule na, ibe mumuthi othela iinthelo. Nanyana ungeze wakghona ukulawula umphumela, ungaragela phambili uthelelela ukwenzela bona uyinikele ithuba elihle lokukhula. (Mar. 4:26-29) Ngendlela efanako, njengomma, ngezinye iinkhathi ungazibuza ukuthi, inga-kghani uyayifikelela ihliziyo yomntwanakho na. Angekhe wakghona ukulawula umphumela kodwana nawenza koke okusemandlenakho ukubabandula, ubanikela ithuba elihle lokukhula babe nobuhlobo obuhle noJehova.—IzA. 22:6.

18. UJehova angabasiza njani abantwana bakho bakhule ebuhlotjeni babo naye?

¹⁸ Kusukela ngeenkhathi zeBhayibheli, uJehova usize abantu abatjha abanengi bona babe bangani bakhe. (Rhu. 22:10, 11, [9, 10 NW]) Angasiza nabantwana bakho bakhulise ubuhlobo babo naye, nangabe ngilokho abakufunako. (1 Kor. 3:6, 7) Ngitjho nanyana abantwana bakho babonakala ngasuthi baphuma endleleni, uJehova uzokuragela phambili nokubathanda. (Rhu. 11:4) Nabatjengisa itshwayo elincani ‘lokuzimisela’ ukuthabisa uJehova, uzokuhlala akulungele ukubasiza babe bangani bakhe. (IzE. 13:48; 2 Kron. 16:9) Angakusiza utjho into efaneleko ngesikhathi esifaneleko nasele kusikhathi sokuthi abantwabakho bakuzwe lokho. (IzA. 15:23) Kokhunye angasebenzisa umfowethu namkha udadwethu ebandleni bona abatjheje. Ngitjho nangemva kokuthi abantwana bakho bakhulile, uJehova angabuyisa emkhumbulwenabo into owabafundisa yona basesebancani. (Jwa. 14:26) Unikela uJehova okunengi angakubusisa ngakho nawuragela phambili nokubandula abantwana bakho ngamezwi nangesibonelo.

19. Kubayini ungaqiniseka ngokuthi uJehova uyakwamukela?

¹⁹ Ithando lakaJehova ngawe alikasami ekutheni abantwana bakho bakhetha ukwenzani. Uyakuthanda ngombana nawe uyamthanda. Nawungumbelethi okhulisa abantwana uwedwa, uJehova uthembisa ukuba Mvikeli noBaba ebantwaneni bakho. (Rhu. 68:5) Angeze walawula abantwana bakho bona benze iinqunto ezihle namkha awa kodwana nawuragela phambili uthembela esizweni lakaJehova begodu wenza koke okusemandlenakho, uzokwamukela.