1-2. (a) Yunisi ke mo go le mang fote o yye a gahlana le dintshitshire tsa mošaga mang ka gore ke mmane? (b) Bolabolela sethombhe sa ka tawong.

 LE MO Bhayibele yi sa hlaye gore go makegiye ying nakwela Thimothi a kolobetsiwa, di šupa nkare mmane wage Yunisi ke mo a jabodiye ka matla ka tšatši lolone. (Diy. 23:25) O fo mo nagana sefahlego sage se šupetsa gore o titeya sekguba ka yene, mo Thimothi a kene a yemme hala teng ga meetši ya gore ke mo ma teya ho masekeng. Mmane yewa o fo ngwalangwala mo kokwane wa Thimothi ye ba reng ke Luwisa a kene a yemme ho thina gage. Yunisi o wonela gedimo tsa nkare o felela ke moya mo a kene a lebelele Thimothi a phinya ka ku meetšing. Mo a yinuga hala meetšing ke mokane a nyarela a kene a ngwalangwala mmane wage o šitega go titshwara ke mokane a fo yela dinepedi. Yunisi o phomelele ga taba ya go karakara ka matla gore a tšhutise morwayi wage gore ga Jehova le ga Morwayi wage Jeso Kreste, a kwane nabo ka matla. Ke dintshitshire difeng tso mmane yewa a yyeng a gahlana natso?

² Thimothi o gudisiye ke babelegi ba gore a ba tshwane ka sedumedi. Papage ke mo go le Legerika, mara mmane wage le kokwane wage ke mo go le Majuda. (Meber. 16:1) Di ka makega gore Thimothi ne go sa le ye monyana nakwela Yunisi le Luwisa go ba Makreste. Le mo go le ka mokgonone, papa wa Thimothi a sanka gwa ba Mokreste. Mara Thimothi o nyoko fetsa a makiye byang? Di šupetsa nkare ne a gudiye tsa gore ne a ka segelela dipheto ka boyene mong. Ayitsano o nyoko yema le papage wa gore a yi Mokreste? Kela o nyoko fo ngangarela setšo sa Majuda so ba mo tšhutisiyeng sona go sa le ye monyana? Kela o nyoko ba lelata la Jeso Kreste?

3. Diyema 1:8, 9, yi re Jehova o wo tseya byang mmereko wo wo makang ke bommane mo ba kene ba gelepa bana ba bona gore ba thogo nghanelana naye?

 ³ Bommane bo go leng Makreste ba kwana ka matla le ba mitši ya bona. So se ba hlupang ka matla ke gore ba nyaka go gelepa bana ba bona gore ba be le senghana sa thina ka matla le Jehova. Fote taba yone ya gore baa karakara, Modimo aa yi tseyi ka gonyana. (Bala Diyema 1:8, 9.) Jehova o yetetsiye bommane ba go tlala mo ba kene ba gelepa bana ba bona gore ba yamogele nnete.

4. Bommane ba tshwaraganne le dintshitshire difeng lekgono?

⁴ A di makatse mo mmane a fela a tiputsisa gore ayitsano bana baka ba nyoko kgeta go berekela Jehova go tshwana le Thimothi. Babelegi baa di tšiba gore lefase lowa la Sathane le kgahleletsa bana ba bona go segela kaye. (1 Pet. 5:8) Go tokegela gana hone, bommane ba go tlala ba tshwaraganne le ntshitshire ya go gudisa bana go se na bopapa kela ba ba gudisa le bopapa ba gore a ba rapele Jehova. Mo re beyisa, mogageru ye mongwana wa mosadi ye ba reng ke Christine * o re: “Monnaka ke mo go le papa wa gabutši ka matla fote a šupetsa ba mutši waka gore o ba nyaka ka matla mara taba ya gore ke mo ke gudisa bana ba rune gore go be Dihlatse Tsa Jehova ke mo a sa kwane nayo le ka gonyana. Go fediye mengwaga ya go tlala ka matla nkene ke llela go kraya so se ka gelepang bana baka gore ba šinye ba berekele Jehova.”

5. Ga hlogotaba yowa re nyoko petapeta ka ying?

⁵ Mo nkare ke wene mmane wa gore ke Mokreste, le wene di ka go sepelela go fo tshwana le Yunisi. Ga hlogotaba yowa, re nyoko petapeta ka taba ya gore o ka wo kopisela ka mokgo mang mošupetso wage gore o tšhutise bana bago ka tso o di bolabolang le ka tso o di makang. Fote re nyoko lebelela ka mokgo Jehova a nyoko go gelepang ka gona.

6. Thimothi wa Bobedi 3:14, 15, yi re ke mo go rorebeng mo Thimothi a šinya a ba Mokreste?

⁶ Mo Thimothi go sa le ye monyana, mmane wage o yye a ganya dikobo gore a mo tlwayetse “mangwalo ya go hlawolega,” ka mokgo Majuda ne ma ma kwisisa. Nnete ke gore mmane yewa ne a sa tšibi tsa go tlala ka taba la gore ne a sa tšibi selo ka Jeso Kreste. Le mo go le ka mokgonone, tso Thimothi a di tšhutiyeng ka ho Mangwalong di yye dya mo gelepa gore a thogo ba Mokreste. Ayitsano o yye a maka ka mokgonone? Ka taba la gore ne go le mosogana, ne di šalele yene gore a kgete gore wa di nyaka go ba Mokreste kela byang. A re kamake gore se sengwana so se makiyeng Thimothi ‘gore a tshepe’ nnete ka Jeso ke gore mmane wage o yye a karakara ka matla. (Bala 2 Thimothi 3:14, 15.) Di šupa nkare Yunisi o yye a jabola ka matla go hlula dintshitshire tso ne a gahlana natso mo a kene a tšhutisa morwayi wage ka Jehova! Fote Yunisi o makiye tsa go yelana le lebitso lage la gore le rela “go hlula.”

7. Yunisi o mo gelepiye ka mokgo mang ga morwayi wage ka nthago ga mo a kolobetsiwwe?

⁷ Taba ya gore Thimothi o yye a kolobetsiwa ke mo go le ye kgolo mara tsotsone a di rele gore mathatha ya Yunisi ke mo ba fediye. Morwayi wage o nyoko maka ying ka lephelo lage? Ayitsano o nyoko nghanelana le batho ba go sa loka? Ayitsano o nyoko kena sekolo Athene ke mokane a tšhute dilo tsa matsaka tsa gore batho ba ro tikhandela? Ayitsano o nyoko lelekisana le dilo tsa majabajaba a sinya nako yage, matšhika yage le lephelo lage? Yunisi a ka sa mo kgetele ga Thimothi mara a ka mo gelepa. Byang mara? A ka ya mahlong a karakara ka matla gore a kikitele taba ya gore morwayi wage a mo nyake ka matla ga Jehova fote a leboge Morwayi wage Jeso. Dintshitshire a di fo nyarela ga mitši ya gore babelegi a ba ga sedumedi ka ssoši. Le mo babelegi ka babedi ga bona ba berekela Jehova, di ka thathafa gore ba tikise pelo ya ye wa gore o sa gula gore  a šinye a segela mo a bang lelata la go tshepega la Jehova. Babelegi ba ka tšhuta ying ga mošupetso wa Yunisi?

8. Mmane a ka mo gelepa byang ga monna wage wa gore ke Hlatse gore ba thogo tšhutisa bana ba bona ka Jehova?

⁸ Tšhuta Bhayibele le bana bago. Lune magageru ya basadi, mo nkare monna wago ke Hlatse, Jehova o nyaka le tshwarisane ga taba ya go tšhutisa bana ba lune ka yene. Mokgwa wo mongwana wo o ka wo berekisang ke gore o dule o thega Morapelo wa Mutši. Bolabola tsa gabutši ka taba yowa ya morapelo wa mutši fote o bone gore king tse dingwana tso o ka di makang gore morapelo wone wo jabodise. Kela o ka gelepa monna wago go lukiselela mebereko ye mengwana yo le ka yi makang mo le kene le tšhuta Bhayibele. Go tokegela gana hone, mo nkare bana bago ba bangwana ba šele ba gulagudiye gore ba ka gelepa ke taba ya gore ba tšhute Bhayibele ba le ntoši ba berekisa puku ya Tikwise ka Lephelo go ya go Yye!, o ka tshwarisana naye ga taba yonone.

9. Mmane wa gore monna wage a yi Mokreste a ka gelepa king?

⁹ Bommane ba bangwana di nyaka ba yeta mahlong ga taba ya go tšhutisa bana ba bona ka Bhayibele, go le ka taba la gore go fo ba bona babelegi ba le ntoši kela go le ka taba la gore banna ba bona a yi Makreste. Mo nkare ka mutšing gago go fo ba ka mokgonone, o sa šekele ka matla. Jehova o nyoko go gelepa. Berekisa dithulusi tso a go neyyeng tsona ka mokgahlong wage tsa gore di ka go berekela mo o tšhutisa bana bago. Ke ntaba o sa kgopele babelegi ba gore ke botala ba kene ba gudisa bana, o kwe gore bona ba bona nkare o ka di berekisa byang dithulusi tsowa ga morapelo wa mutši? * (Diy. 11:14) Fote Jehova a ka go gelepa gore o thogo bolabodisana le bana bago gabutši. Mo kgopele a go gelepe o thogo tšiba tso ba di naganang le tso di leng ka dipelong tsa bona. (Diy. 20:5) Putsiso ya go sa hlupe ya go tshwana le gore ‘King so go leng ntshitshire ye kgolo ku sekolong?’ yi ka maka gore le nape le thome go bolabodisana.

10. Mokgwa wo mongwana wa gore o ka tšhutisa bana bago ka Jehova ke wofeng?

¹⁰ Tithulele mašuba ya gore o tšhutise bana bago ka Jehova. Bolabola ka Jehova le dilo tsa go tlala tsa gabutši tso a yyeng a go makela tsona. (Dot. 6:6, 7; Jes. 63:7) Sosone ke sona so se nyakegang ka matla mo nkare a di kgonege ka moka nako gore o tšhute le bana bago le duli. Christine, yela wa gore re bolabodiye ka yene, o re: “Ke mo go sa thulege mašuba ya go tlala ya gore ke bolabole le bananyana baka ka tso tsa Modimo, byalo ke mo ke fo berekisa lešuba le lengwana le le lengwana lo le nyarelang. Ne re fela re sepela-sepela kela re kalama sekepe re se tlosa ho lerophong re thomisa go bolabola ka dilo tsa go bafala tso Jehova a di makiyeng re boya re bolabola ka tsa go tlala tsa gore di yelana le tso tsa Modimo. Mo bana baka ba šele ba gudiye, ne ke ba hlohletsela gore ba tipalele Bhayibele bona beng.” Go tokegela gana hone, bolabola tsa gabutši ka mokgahlo wa Jehova, fote le magageru o ma bolabole gabutši. O kganele kgole le taba ya go solasola bagolo. Tso o di bolabolang ka bagolo ke tsona tso di nyoko šupetsang gore ayitsano bana bago ba ka tšhabela ga bona mo ba nyaka wa go ba koramela kela byang.

11. Jakobo 3:18, yi re ke ntaba di nyaka re karakare gore re make gore go bebe ka ho mutšing?

¹¹ Maka gore ka ho mutšing go dule go bebiye. Dula o šupetsa monnago le bana bago gore o ba nyaka ka matla. Mo o bolabola ka monnago, bolabola tsa gabutši ka mokgwa wa go šupetsa gore wa mo hlompa o boye o tšhutise le bana bago gore ba make ka mokgonone. Mo o maka ka mokgonone o maka gore go bebe, fote tsotsone di nyoko maka gore le thogo tšhuta ka Jehova. (Bala Jakobo 3:18.) Lebelela mošupetso wa Jozsef,  wa gore ke mošupatsela wa go hlawolega hala Romania. Mo a sa gula, papage o yye a maka gore mosogana yewa, mmane wage le bana ba gabo ba goge thabeng mo ba kene ba berekela Jehova. Jozsef o re: “Mmane o liketsiye ka matla go maka gore go bebe ka ho mutšing. Mo papa a ntsha lešidi lage ka mokana ga lona, mmane yene ke mo a karakara ka matla go šupetsa gore o kwelana go baba. Mo mmane a di bona tsa gore di ya re thathafela go hlompa papa le go mo theetsela, o yye a bolabola le rune ka lengwalo la Maefeso 6:1-3. Ne a fela a bolabola le rune ka dilo tsa gabutši tso Papa a di makang a boya a re gelepa gore re thogo kwisisa gore ke ntaba di nyaka re mo tseyela gedimo. Ga go tlala ke mo a tima mollo ka mokgonone.”

12. Thimothi wa Bobedi 1:5, yi re mošupetso wa Yunisi wo mo makiye ying ga Thimothi?

¹² Bala 2 Thimothi 1:5. Yunisi ke mo go le mošupetso wa gabutši ga Thimothi. A ka fo ba a mo tšhutisiye gore tumelo ya mannete yi bonala ka tso motho a di makang. (Jak. 2:26) Thimothi ke mo a sa kamake le ka gonyana gore tso mmane wage a di makang ke mo a hlohletsela ke taba ya gore o mo nyaka ka matla ga Jehova. Le yene Thimothi ke mo a di bonne gabutši tsa gore mmane wage o jabodisa ke go berekela Jehova. Mošupetso wa Yunisi wo mo makiye ying ga Thimothi? Pawulo wa lepostola o yitseri, Thimothi o yye a tseya tumelo ya mmane wage. Phela tsotsone a di fo timakegela. Thimothi ke mo a lebelela mošupetso wa mmane wage ke mokane tsotsone dya mo tšhofa gore a mo kopisele. Le lekgono, bommane ba go tlala ba f’lo tikisa dipelo tsa ba mitši ya bona ba sa hlaya “lentsu.” (1 Pet. 3:1, 2) Le wene o ka maka ka mokgonone. Byang?

13. Ke ntaba di nyaka mmane a beye senghana sage le Jehova ka ku mahlong?

¹³ Senghana sago le Jehova o beye sona ka ku mahlong. (Dot. 6:5, 6) Le wene o tshwana le bommane ba go tlala, o tikona tsa go tlala. O berekisa nako yago, tšheleta yago, o tikona boroko le tse dingwana mo o kene o pasopa bana bago ka tso ba di gayelang. Mara a di nyake o tshwaragana ka matla ka dilo tsone la go šinya o lebala ka senghana sago le Jehova. Tipeyele nako ya wene mong ya go rapela, ya go tšhuta Bhayibele o le ntoši le ya go ya megahlanong ya phutego. Mo o maka ka mokgonone, o nyoko napa o tiyelela ga tso tsa Modimo fote o nyoko beyisela ba mutši wago le batho ba bangwana.

14-15. O tšhuta ying ga mošupetso wa Leanne, Maria le João?

¹⁴ Lebelela mošupetso wa ba bangwana ba gore ba sa gula ba gore ba yye ba tšhuta go mo nyaka ka matla ga Jehova ba boya ba mo tshepa ka go fo lebelela ga mešupetso ya bommane wa bona. Morwediya wa Christine ye ba reng ke Leanne o re: “Ke mo re sa di kgone go tšhuta re lukulugiye. Mara mmane ke mo a tshepega ka matla, a sa lofe megahlano. Mošupetso wage le taba ya gore aa thogathoge, di napiye di yeketsa le ga tsa gore ke mo re sa di tšibi. Re di tšibiye re soko thomisa le go ya megahlanong gore yowa ke mong yona nnete.”

¹⁵ Maria, wa gore papage ke mo a fela a ba tula mo ba yye megahlanong o re: “Mmane ke ye mongwana wa magageru ya basadi bo ke ba tšibang ba gore ba na le lešiši. Mo ke sa le ye monyana, ne ke fela ke gana go maka dilo tse dingwana ka taba la gore ke tšhaba gore ba bangwana ba nyoko ntseya byang. Mara mo ke lebelela ka mokgo mmane ne a šišimala a boya a yetisa Jehova mahlong mo a kene a phela, di yye dya n’gelepa gore ke hlule taba ya go tšhaba batho.” João, wa gore papage ne a ganela ba mutši wage gore ba bolabodisane ka tsa Modimo ka ho gaye o re: “Ke bona nkare so se yyeng sa ntikisa ka matla ke gore Mmane ne a tikemisele go lisetsa dilo ka mokana ga tsona gore a thogo jabodisa papa, mara gore a lisetse Jehova gona, ke mo go ka mpa gwa thuhluga mo go thuhlugang.”

16. Mošupetso wa mmane wo ka ba maka ying ba bangwana?

 ¹⁶ Lune bommane, le sa lebaleneng phela gore bangwana ba kene ba le lebelele. Byang? Lebelela gore mošupetso wa Yunisi wo yye wa mo tikisa ka mokgo mang ga Pawulo wa lepostola. O di bonne tsa gore tumelo ya Thimothi ya gore ke mo a sa timakisi “yi thomisiye ka . . . Yunisi.” (2 Thim. 1:5) Ke leng mo Pawulo a yyeng a thomisa go bona tumelo ya Yunisi? Di ka makega gore o yi bonne nakwela a le ga leyeto lage la mathomo go le morumiwa mo a gahlana le Luwisa le Yunisi ku Lisitara fote di ka makega gore o yye a ba gelepa gore go be Makreste. (Meber. 14:4-18) O fo nagana nje: Nakwela Pawulo a ngwalela Thimothi borifi ka nthago ga gana hala ga 15 ya mengwaga, Pawulo ke mo a sa na a gopola tso Yunisi a di makiyeng tsa go šupetsa gore wa tshepega fote ba bangwana ke mo ba ka tseyela gage! Di fo ba lekgwaying gore tso a di makiyeng di yye dya tikisa monna yewa wa lepostola ka matla, dya hlohletsela le Makreste ya mangwana ya ku botala gore ma make tsona. Mo nkare o tigudisela bana o le ntoši kela monna wago a yi Hlatse, o sa kamake gore tso o di makang tsa go šupetsa gore wa tshepega di tiyisa ba bangwana fote di ba hlohletsela go maka tsa gabutši.

17. O ka maka byang mo o bona nkare ngwanago aa di tseyele hlogong tso o mo tšhutisang?

¹⁷ Byalo, mo nkare ngwanago aa di tseyele hlogong tso o liketsang go di maka gee? O sa lebale gore di tseya nako go tšhutisa ngwana. Go fo tshwana le tso di nyarelang ho sethombheng, mo o gaša pewu, go gongwana o fela o tiputsisa gore ayitsano go nyoko ba le semelane, sa boya sa gula gore se thogo yengwa. Le mo o sa tšibi gore kela se ko guleng, o fo ya mahlong o tšheletsa o kene o nabela gore se gule. (Mar. 4:26-29) Ka  mokgonone le wene mmane, di ka makega gore o fela o tiputsisa gore ayitsano wa yi segelela pelo ya ngwanago. O ka sa di kgone go lawola ka mokgo dilo di makegang. Mara mo o kene o karakara gore o ba tšhutise, o ba thulela mašuba ya gabutši ya gore ba hluhlutele ga tso tsa Modimo.—Diy. 22:6.

18. Jehova a ka ba gelepa ka mokgo mang bana bago gore ba hluhlutele ga tso tsa Modimo?

¹⁸ Go tlugisela Bhayibele yi sa ngwadiwa, Jehova o gelepiye ba go tlala ba gore ba sa gula gore ba nghanelane naye. (Pis. 22:9, 10) Fote a ka gelepa bana bago gore ba gule ga tso tsa Modimo mo nkare ke so bona ba se nabelang. (1 Makor. 3:6, 7) Le mo di ka šupa nkare bana bago ba fo ya ba kene ba keketlela, Jehova a ka sa ba takisi maahlo. (Pis. 11:4) Mo a ka fo bona ba na le hlasenyana ya go šupetsa gore “ba tlalele” ga tsa gabutši, o nyoko ba a le gana hone thina gore a ba gelepe. (Meber. 13:48; 2 Dikor. 16:9) A ka go gelepa gore o bolabole tsa gabutši ka nako ya gona—ka matlamatla mo di nyaka gore bana bago ba di kwe. (Diy. 15:23) Kela a ka hlohletsela mogageru ye mongwana wa monna kela wa mosadi ka ho phutegong gore a hlupege ka matla ka bona. Le mo bana bago ba šele ba gudiye, Jehova a ka ba gopotsa se sengwana sa gore o yye wa ba tšhutisa sona ku botala. (Joh. 14:26) Mo o kene o tšhutisa bana bago ka tso o di bolabolang le ka tso o di makang, o maka gore Jehova a be le tsa go tlala tso a go rufang ga tsona.

19. Ke ntaba o yi tshepa taba ya gore wa mo jabodisa ga Jehova?

¹⁹ Taba ya gore Jehova o go nyaka ka matla a yi yi ka gore bana bago ba segelela dipheto tsa mošaga mang. O go nyaka ka matla ka taba la gore le wene o mo nyaka ka matla. Mo nkare ke wene mmelegi wa go tigudisela bana a le ntoši, Jehova o tshepisa gore go nyoko ba yene Papa wa bana bago fote o nyoko go koramela. (Pis. 68:5) O ka sa di kgone go lawola gore bana bago ba segelela dipheto tsa gabutši kela awwa. Mara mo o ka fo ya mahlong o tikokotlela ka Jehova o boya o maka so wene o ka se kgonang, o nyoko go yamogela.