1-2. (a) Yunike akaba ari oha, kandi akatunga buremeezi ki omu kworora omutabani? (b) Gamba aha kishushani ekiri aha kipampagare.

 N’OBU Baibuli eraabe etarikushoboorora bingi aha kubatizibwa kwa Timoseo, nyina orikwetwa Yunike aine kuba yaashemereirwe munonga aha izooba eryo. (Enf. 23:25) Teebereza oku kyabaire nikimwesiimisa kureeba Timoseo ayemereire omu maizi garikumuhika omu nyugunyu. Yunike ariyo naamwenya, obwo Loisi nyinenkuru Timoseo amuri aha rubaju. Yunike atandika kuhihira agarura omwitsyo omunda obwo arikureeba Timoseo arikwibikwa ahansi omu maizi. Bwanyima ya Timoseo kwihwa ahansi omu maizi arikumwenya, Yunike ayatika arira ahabw’okushemererwa. Yunike yaaba omusinguzi omu kwegyesa omutabani kukunda Yehova n’Omwana we Yesu Kristo. Akasingura buremeezi ki omu kwegyesa omutabani?

² Timoseo akakurira omu ka eyebaganiisemu omu diini. Ishe akaba ari Omugriika, kandi nyina na nyinenkuru bakaba bari Abayudaaya. (Byak. 16:1) Timoseo ashemereire kuba yaabaire ari omushogoyo obu Yunike na Loisi baaza omu Bukristaayo. Kwonka, Ishe tarahindukire. Mbwenu shi Timoseo akaba naija kuza mu diini ki? Naabaasa kuba yaabaire akuzire ekirikumara kwecweramu. Mbwenu shi akaba naija kuguma omu diini ya ishe? Akaba naija kuhamira aha migyenzo y’Ekiyudaaya ei yaayegyesiibwe kuruga omu buto? Nari akaba naija kukuratira enyegyesa nsya erikukwata ahari Yesu Kristo?

3. Kurugiirira aha Enfumu 1:8, 9, Yehova naareeba ata omurimo ogu baanyina abaana barikukora kuhwera abaana baabo kuba banywani be?

³ Baanyina abaana Abakristaayo, nabo nibakunda amaka  gaabo. Okukira ekindi kintu kyona, nibaba nibenda kuhwera abaana baabo kugira omukago murungi na Yehova. Kandi Ruhanga waitu okuteeraho kwabo naakutwara nk’okw’omuhendo. (Shoma Enfumu 1:8, 9.) Yehova ahweraire baanyina abaana baingi omu kwegyesa abaana baabo kukunda amazima.

4. Baanyina abaana nibatunga buremeezi ki?

⁴ N’ekya butoosha omukazi omuzaire kwebuuza yaaba abaana be nibaija kucwamu kuheereza Yehova, nka Timoseo. Ahakuba abazaire nibamanya gye oku baana baabo barikugyemeserezibwa omu nsi ya Sitaane. (1 Pet. 5:8) N’ekindi, baanyina abaana baingi nibamanya ku kigumire kworora abaana bataine baibabo, nari babaine kwonka batarikuheereza Yehova. Nk’eky’okureeberaho, munyaanyazi-itwe Christine b naagira ati: “Ibanyi akaba ari omushaija murungi orikukunda eka ye, kwonka akaba atarikwendera kimwe ngu nyorore abaana baitu kuba Abajurizi ba Yehova. Kumara emyaka, eki kikaba nikindiza munonga, ndikwebuuza oku abaana bangye baraije kuramya Yehova.”

5. Nituza kushwijuma ki omu kicweka eki?

⁵ Ku oraabe ori nyina abaana, noobaasa kuba omusinguzi nka Yunike. Omu kicweka eki, nituza kushwijuma oku orikubaasa kumutooreza omu kwegyesa abaana baawe, kurabira omu bi orikugamba n’ebi orikukora. Nituza n’okureeba oku Yehova araakuhwere.

6. Nk’oku kirikworekwa omu 2 Timoseo 3:14, 15, Timoseo akahinduka ata Omukristaayo?

⁶ Obu Timoseo yaabaire ari omwereere, nyina akakora eki arikubaasa kumwegyesa “ebyahandiikirwe ebirikwera,” nk’oku Abayudaaya baabaire nibabyetegyereza. Buzima, akaba atarikumanya bingi, ahakuba akaba atarikumanya ebirikukwata ahari Yesu Kristo. Kwonka, ebi Timoseo yaayegire omu Byahandiikirwe bikakora nk’omusingi gw’okwikiriza Obukristaayo. Kwonka shi buzima akaba naija kuba Omukristaayo? Omu butsigazi bwe, akaba aine obugabe bw’okwecweramu yaaba naayenda kuba Omukristaayo. Buzima, kimwe ekyahweraire Timoseo ‘kumanyira kimwe’ amazima agarikukwata ahari Yesu, n’okuteeraho kwa nyina. (Shoma 2 Timoseo 3:14, 15.) Yunike ka aine kuba yaashemereirwe ahabw’okusingura oburemeezi bw’okwegyesa omutabani ebirikukwata ahari Yehova. Buzima Yunike akakora ebirikuhikaana n’eiziina rye, eririkuruga omu kigambo ekirikumanyisa “okusingura.”

7. Yunike akahwera ata omutabani kugumizamu naatunguuka bwanyima y’okubatizibwa?

⁷ Okubatizibwa kwa Timoseo kukaba kuri eidaara rikuru, kwonka Yunike akaba akiine okwerarikirira. Omutabani akaba naija kugumizamu ari omwesigwa? Akaba naija kutunga emikago mibi? Mbwenu shi akaba naija kuza omu mashomero g’Aseene reero aikirize enyegyesa z’abahangu abakaafiire abaabaire bariyo? Akaba naija kwebembeza okusherura eby’obugaiga, ashiishe obwire bwe, amaani ge, n’obunyeeto bwe? Yunike akaba atarikubaasa kucweramu Timoseo, kwonka akaba naabaasa kumuhwera. Ata shi? Akaba naabaasa kugumizamu naakora n’amaani kumwegyesa kukunda Yehova n’Omwana we n’okusiima ebirungi ebi baabaire nibabaha. Oburemeezi nk’obu tiburikuhika aha babaganisiibwemu ediini bonka. Nangwa n’obu abazaire bombi baakuba bari omu mazima, nikibaasa kuguma kuhika aha mitima y’abaana, n’okubahwera kuba abaheereza ba Yehova abeesigwa. Abazaire nibabaasa kwegyera ki ahari Yunike?

8. Nyina abaana naabaasa kuhwera ata iba Omukristaayo kureeberera abaana baabo omu by’omwoyo?

 ⁸ Yegyesa abaana baawe Baibuli. Banyaanyazi-itwe, baabaroimwe ku baraabe bari omu mazima, Yehova naayenda ngu mubahwere omu kureeberera abaana baanyu omu by’omwoyo. Omuringo gumwe oku murikubaasa kukora eki, n’okushagika Okuramya kw’Eka butoosha. Mugambe gye aha ntebeekanisa egi, kandi muteereho kutaho embeera ezirikureetera abaana kukunda okuramya oku. Obundi nimubaasa kuhwera baabaroimwe omu kusherura eby’okwega. Kandi, bamwe aha baana baanyu baaba bakuzire ekirikumara kugasirwa omu kwega Baibuli murikukoresa ekitabo Yesiimire Amagara Ebiro Byona!, nimubaasa kuhwera baabaroimwe omu kubeegyesa.

9. Nyina abaana ou iba atari mu mazima naabaasa kwiha nkahi obuhwezi?

⁹ Baanyina abaana abamwe nibo barikuba baine kwegyesa abaana baabo Baibuli, obundi ahabw’okugira ngu bari bonka, nari baibabo tibari mu mazima. Eka yaawe ku eraabe nikwo eri etyo, oteerarikirira ekirenga. Yehova naija kukuhwera. Yegyesa omwana waawe orikukoresa gye ebikoreso ebi Yehova atuhaire omu kibiina kye. Noobaasa n’okubuuza abazaire abandi ababaasize kukikora, kukuha obukoryo busya bw’okukoresa ebikoreso ebi omu kuramya kw’eka. c (Enf. 11:14) Yehova naabaasa n’okukuhwera omu kugaaniira n’abaana baawe. Mushabe kukuhwera kukyenga ekiri omu mitima yaabo n’ebiteekateeko byabo. (Enf. 20:5) Ekibuuzo kyorobi nka, ‘niki ekirikukira kukugumira aha ishomero?’ nikibaasa kurugamu ekigaaniiro ky’omugasho.

10. Ni miringo ki endiijo ei orikubaasa kuhweramu abaana baawe kwega ebirikukwata ahari Yehova?

¹⁰ Sherura oburyo bw’okwegyesa abaana baawe ebirikukwata ahari Yehova. Guma noogamba ahari Yehova n’ebindi bintu bingi birungi ebi akukoreire. (Bir. 6:6, 7; Isa. 63:7) Na munonga eki ni kikuru waaba otarikubaasa kwegyeseza abaana baawe omuka butoosha. Christine, owaaba yaagambirweho, naagira ati: “Nkaba nyine emigisha mikye y’okwegyesa abaana bangye, n’ahabw’ekyo nkaba ninkoresa buri kaire aku naabona. Tukaba tugyendagyenda nari twerunda omu kaato twirira hangahari n’enkungu y’enyanja, kubaasa kugamba aha bihangirwe bya Yehova ebirikutangaaza, n’ebindi bingi eby’omwoyo. Ahonaaho abaana bangye ku baakuzire ekirikumara, nkabahiga kweyegyesa Baibuli ahabwabo.” Kandi, guma noogamba gye aha kibiina kya Yehova, n’ab’eishe-emwe. Oteetomboitera abareeberezi. Ebi orikubagambaho nibibaasa kureetera abaana baawe kugambira abareeberezi oburemeezi bwabo nari kutabubagambira.

11. Kurugiirira ahari Yakobo 3:18, ahabw’enki ni kikuru kureeta obusingye omuka?

¹¹ Reetaho obusingye omuka. Butoosha yoreka ngu nookunda baro n’abaana baawe. Gamba gye ahari baro, muhe n’ekitiinisa, kandi tendeka abaana baawe kukora nikyo kimwe. Waakora otyo, nooreetaho embeera y’obusingye, erikubaasisa abaana baawe kwega ebirikukwata ahari Yehova. (Shoma Yakobo 3:18.) Teekateeka ahari Jozsef, ori payoniya ow’omutaano omuri Romania. Obu yaabaire naanyeeta, ishe akataho amaremesa kugira ngu we, nyina, na beene ishe bataheereza Yehova. Jozsef naagira ati: “Maawe akaba naakora kyona ekirikubaasika kureeta obusingye omuka yaitu. Tata ku yaabaire ayongyera kutabuka, maawe akaba ayongyera kuba omunyambabazi.  Maawe ku yaabaire areeba ngu nitugumirwa kworobera tataitwe, akaba agaaniira naitwe aha Abaefeso 6:1-3. Kandi akaba agamba naitwe aha mitwarize mirungi ya tata, reero atuhwera kwetegyereza ahabw’enki twine kumwesiimisa. Akaturabya omu mbeera zimugire munonga omu muringo ogu.”

12. Kurugiirira ahari 2 Timoseo 1:5, eky’okureeberaho kya Yunike kikakwata kita ahari Timoseo?

¹² Shoma 2 Timoseo 1:5. Yunike akateeraho Timoseo eky’okureeberaho kirungi. Ashemereire kuba yaamwegyeise ngu okwikiriza okwabuzima nikutwariramu ebikorwa. (Yak. 2:26) Timoseo buzima akaba naareeba ngu ebikorwa bya nyina nibirugiirira ahari rukundo mpango ei yaabaire ainiire Yehova. Buzima Timoseo akaba naareeba ngu nyina ashemereirwe ahabw’okuheereza Yehova. Eky’okureeberaho kya Yunike kikakwata kita ahari Timoseo? Nk’oku entumwa Paulo yaagambire, Timoseo akaba aine okwikiriza nk’okwa nyina. Eki tikirabaireho bubaho. Timoseo akeetegyereza ebikorwa bya nyina, reero byamuhiga kumutooreza. N’obunaku obu, baanyina abaana baingi babaasize kuhika aha mitima y’ab’omu maka gaabo, “bataine kigambo kyona eki babagambiire.” (1 Pet. 3:1, 2) Naiwe noobaasa kukikora. Ota shi?

13. Ahabw’enki nyina abaana aine kwebembeza omukago gwe na Yehova?

¹³ Yebeembeza omukago gwawe na Yehova. (Bir. 6:5, 6) Kushushana na baanyina abaana baingi, naiwe nooyefeerereza bingi. Nooyefeerereza obwire, esente, oturo, n’ebintu ebindi kubaasa kureeberera abaana baawe omu by’omubiri. Kwonka toshemereire kwecurenga ekirenga kubareeberera omu by’omubiri, okahuga aha mukago gwawe na Yehova. Butoosha gira obwire bw’okushaba wenka, kweyegyesa Baibuli, n’okuza omu nteerane z’ekibiina. Waakora otyo, noija kuhama omu by’omwoyo, kandi noija n’okuteeraho ab’eka yaawe eky’okureeberaho kirungi n’abandi.

14-15. Nooyegyera ki ahari Leanne, Maria, na João?

¹⁴ Yetegyereze bamwe aha bato abaayegire kukunda Yehova n’okumwesiga ahabw’okureeba baanyinabo. Leanne muhara wa Christine naagira ati: “Tukaba tutarikwega butunu tata arikutureeba. Kwonka maawe akaba ari omwesigwa kyahika aha kuza omu nteerane. Eky’okureeberaho kye n’okwikiriza kwe atarikubangaanisa kikatwegyesa bingi. Tukaba nitumanya ngu aga n’amazima nangwa n’obu twabaire tutakagiire omu nteerane.”

¹⁵ Maria, ou ishe obumwe yaabaire naamufubira ahabw’okuza omu nteerane, naagira ati: “Maawe n’omwe aha bakazi Abakristaayo abu ndikumanya, abaine obumanzi. Obu naabaire ndi muto, obumwe nkaba nyanga kukora ebintu ebimwe ahabw’okutiina eki abandi baraagambe. Kwonka ahabw’okureeba obumanzi bwa maawe, n’oku yaabaire naayebembeza okuheereza Yehova, kikampwera kusingura okutiina abantu.” João, ou ishe yaabaire naazibira eka yaabo kugamba aha by’omwoyo baaba bari omuka, naagira ati: “Obundi ekyankwatsireho kukira ebindi byona, n’okugira ngu oyihireho okukunda Yehova, maawe akaba naayefeerereza buri kimwe kushemeza tata.”

16. Eky’okureeberaho kya nyina abaana nikibaasa kukwata kita aha bandi?

¹⁶ Baanyina abaana mwijukye ngu eky’okureeberaho kyanyu nikikwata aha bandi. Kita shi? Teekateeka oku eky’okureeberaho kya Yunike kyakwatsire aha ntumwa Paulo. Akaba naamanya ngu okwikiriza kwa Timoseo okutarimu buryarya ‘kukabanza kuba  omuri Yunike.’ (2 Tim. 1:5) Paulo akareeba ryari okwikiriza kwa Yunike? Obundi omu rugyendo rwe rw’obumiisani orw’okubanza, naabaasa kuba nibwo yaabugaine Loisi na Yunike omuri Lusitura, kandi naabaasa kuba niwe yaabahweraire kuba Abakristaayo. (Byak. 14:4-18) Teekateeka ahari eki: Obu Paulo yaahandiikira Timoseo bwanyima y’emyaka nka 15, Paulo akaba naakiijuka ebikorwa bya Yunike eby’okwikiriza, kandi akamukoresa nk’eky’okureeberaho ekihikire kutoorezibwa! Buzima, eky’okureeberaho kye kikagumya omuntu owaabaire ari entumwa n’abandi Bakristaayo omu kyasha ky’okubanza. Ku oraabe oine abaana kwonka otaine mukundwa, nari noobakuriza omu ka ebaganisiibwemu ediini, kimanye ngu eky’okureeberaho kyawe eky’okwikiriza nikigumya abandi, kandi nikibahiga.

17. Oine kukora ki kyaba nikireebeka ngu omwana tarikugasirwa omu kutendeka kwawe?

¹⁷ Kandi shi kyaba nikireebeka ngu ebi orikukora tibirikuhika omwana waawe aha mutima? Ijuka ngu okutendeka omwana nikitwara obwire. Nk’oku kirikworekwa omu kishushani, waabyara embibo, obumwe noobaasa kwebuuza yaaba neija kukura erugyemu ekimera ekirikwana ebijuma. N’obu oraabe otarikubaasa kugigyema kukura, nooguma noogiitirira amaizi kugihwera kumera n’okukura. (Mak. 4:26-29) Nikyo kimwe, naiwe obumwe noobaasa kwebuuza yaaba noohika abaana baawe aha mutima. Torikubaasa kumanya ebiraarugyemu. Kwonka waagumizamu  nookora eki orikubaasa kubatendeka, noija kuba waabateeraho omusingi gw’okukura omu by’omwoyo.—Enf. 22:6.

18. Yehova naabaasa kuhwera ata abaana baawe kutunguuka omu by’omwoyo?

¹⁸ Kuruga ira, Yehova atwire naahwera abato nyamwingi kuba banywani be. (Zab. 22:9, 10) Naabaasa n’okuhwera abaana baawe kukura omu by’omwoyo, kyaba nikyo kyetengo kyabo. (1 Kor. 3:6, 7) N’obu abaana baawe baakuba nibareebeka nk’endeme, Yehova naija kuguma abataireho eriisho rya rukundo. (Zab. 11:4) Baayoreka akamanyiso kakye ngu nibenda kushemeza Yehova, naija kuba ariho ayeteekateekire kubahwera. (Byak. 13:48; 2 Bus. 16:9) Naabaasa kukuhwera kugamba ekintu ekihikire omu bwire obuhikire, obu abaana baawe barikuba nibenda munonga kukihurira. (Enf. 15:23) Nari naabaasa kuhiga ow’eishe-emwe orikufayo nari munyaanyazi-itwe omu kibiina kuteeraho kubanywana. Na bwanyima y’abaana baawe kuba abantu bakuru, Yehova naabaasa kubaijutsya ekintu eki waabeegyeise ira. (Yoh. 14:26) Nooha Yehova ah’okwihirira kukuha omugisha waagumizamu nootendeka abaana baawe, kurabira omu bigambo byawe n’eky’okureeberaho kyawe.

19. Ahabw’enki orikubaasa kuhamya ngu noosiimwa Yehova?

¹⁹ Rukundo ei Yehova akwiniire terikwegamira aha bi abaana baawe barikucwamu. Naakukunda ahabw’okugira ngu noomukunda. Ku oraabe ori omuzaire omwe, Yehova naaraganisa kuba Ishe w’abaana baawe, kandi omuramuzi waawe. (Zab. 68:5) Torikubaasa kugyemesereza abaana baawe kucwamu kuheereza Yehova nari kutamuheereza. Kwonka waagumizamu nooyesiga obuhwezi bwa Yehova, kandi okakora ekirikukirayo oburungi eki orikubaasa, naija kukusiima.