1, 2. а) Евникӕ ка адтӕй ӕма ин ӕ фурти гъомбӕл кӕнун зин цӕмӕн адтӕй? б) Радзорӕ, ӕндаг цъари хузӕбӕл ци уинис, уой.

 ТИМОФЕЙ донаргъуд куд райста, уой туххӕй Библий неци финст ес. Фал уӕддӕр нӕ бон ӕй федарӕй зӕгъун, ӕ мадӕ Евникӕн е амондгун бон ке адтӕй (Ӕмб. 23:25). Дӕ цӕститӕбӕл рауайун кӕнӕ: дони билӕбӕл лӕугӕй Евникӕ кӕсуй, Тимофей донмӕ куд бахизтӕй, уомӕ. Ӕ фуртӕй хъӕбӕр сӕрустур ӕй, ӕма ӕ цӕсгон ниххортӕ-мӕйтӕ ’й. Тимофеййи нана Лоидӕ дӕр Евники фарсмӕ лӕууй. Евникӕн ӕ зӕрдӕ ӕ реуи фурцийнӕй кафуй. Гъема Тимофеййи донӕй ку фелвастонцӕ ӕма ин Евникӕ ӕ ходгӕ цӕсгон ку фӕууидта, уӕд ӕ цӕстисугтӕ бауорамун ӕ бон нӕбал иссӕй. Кӕд Евникӕ берӕ зиндзийнӕдтӕбӕл исӕмбалдӕй, уӕддӕр ин бантӕстӕй ӕ фуртӕн Йегови ӕма Киристей бауарзун кӕнун. Цума цӕхуӕн зиндзийнӕдтӕбӕл исӕмбалдӕй? Гъӕйдӕ ӕркӕсӕн.

² Тимофеййи бийнонтӕ еу динбӕл хуӕст н’ адтӕнцӕ. Ӕ фидӕ адтӕй грекъаг, ӕ мадӕ ӕма ӕ нана ба – дзиуиттӕгтӕ (Гъуд. 16:1). Тимофей ма ӕригон адтӕй, ӕ мадӕ ӕма ӕ нана киристӕнттӕ ку иссӕнцӕ, уӕд. Фал ӕ фидӕ Киристей фӕдбӕлдзӕуӕг не ’ссӕй. Цума Тимофей ба цӕхуӕн над равзардзӕй? Уӕди рӕстӕги Тимофей сувӕллон нӕбал адтӕй, ӕма унаффӕ ӕхуӕдӕг гъӕуама рахастайдӕ. Цума ӕ фиди дин равзардзӕй? Кенӕ ба сувӕллонӕй хуарз ке зудта, еци дзиуиттаг ӕгъдӕуттӕбӕл хуӕст уодзӕй? Ӕви ӕ мадӕ ӕма ӕ нанай хузӕн Киристей фӕдбӕлдзӕуӕг исуодзӕй?

3. Йеговӕ ци цӕстӕй кӕсуй, сӕ сувӕллӕнтти рӕстдзийнади надбӕл исӕвӕрунбӕл ка архайуй, еци хуӕрти хъиамӕтмӕ? (Ӕмбесӕндтӕ 1:8, 9).

³ Абони дӕр, сувӕллӕнттӕ кӕмӕн ес, еци хуӕртӕ сӕ бийнонти берӕ уарзунцӕ. Сӕ устурдӕр бӕллец ӕй сӕ сувӕллӕнттӕн Йегови бауарзун кӕнун. Ӕма еци гъуддагбӕл куд уодуӕлдаййӕй архайунцӕ, уой туххӕй си Йеговӕ сӕрустур  ӕй. (Бакӕсӕ Ӕмбесӕндтӕ 1:8, 9.) Йеговӕ хъӕбӕр берӕ мадтӕлтӕн банхус кодта сӕ сувӕллӕнтти рӕстдзийнади надбӕл исӕвӕрунмӕ.

4. Еуӕй-еу хуӕртӕ сувӕллӕнтти гъомбӕл кӕнгӕй цӕхуӕн зиндзийнӕдтӕбӕл исӕмбӕлунцӕ?

⁴ Сувӕллон Тимофеййи хузӕн Йеговӕн лӕггадӕ кӕнун райдайдзӕй ӕви нӕ, уобӕл мадӕ ке фӕттухсуй, уоми дессагӕй неци ес. Ниййергутӕй хуӕздӕр ӕй неке зонуй, сӕ сувӕллӕнттӕн Сайтани дуйней цӕйбӕрцӕ цӕмӕйдӕрти фӕууй тӕссаг, уой (1 Пет. 5:8). Уомӕй уӕлдай ма еуӕй-еу хуӕртӕн сӕ лӕгтӕ Йеговӕн нӕ фӕллӕггадӕ кӕнунцӕ кенӕ ба сӕ сувӕллӕнтти еунӕгӕй фӕгъгъомбӕл кӕнунцӕ. Ӕркӕсӕн еу хуӕрӕ Кристини b хабармӕ. Е загъта: «Мӕ сӕрихецау дзӕбӕх бийнойнаг ӕма фидӕ адтӕй. Фал ӕй хъӕбӕр нӕ фӕндадтӕй, цӕмӕй нӕ сувӕллӕнттӕ Йегови Ӕвдесӕнтӕ иссайуонцӕ. Ку ’й зониайтӕ, цӕйбӕрцӕ цӕстисуг фӕккалдтон, нӕ кизгуттӕ ӕма нӕ биццеу Йеговӕн лӕггадӕ кӕнун райдайдзӕнцӕ ӕви нӕ, уобӕл мӕтӕ кӕнгӕй».

5. Аци статьяй дзурд цӕбӕл цӕудзӕй?

⁵ Хуӕртӕ, кӕд сумахӕн дӕр сувӕллӕнттӕ ес, уӕд уӕ бон ӕй Евники хузӕн фӕнзуйнаг мадтӕлтӕ ун. Аци статьяй базондзиайтӕ, уӕ бон куд ӕй Евники фӕнзун ӕма уӕ сувӕллӕнтти дзурдӕй дӕр ӕма гъуддагӕй дӕр ахур кӕнун. Уомӕй уӕлдай ма ӕркӕсдзиан, еци гъуддаги уин Йеговӕ куд ӕнхус кӕнуй, уомӕ.

6. Тимофеййӕн киристон исунмӕ ци банхус кодта? (2 Тимофеймӕ 3:14, 15).

⁶ Евникӕ Тимофеййи ӕ минкъийӕй фӕстӕмӕ ахур кодта, «сугъдӕг Финстити» ци адтӕй, уобӕл. Фал ӕхуӕдӕг дӕр берӕ нӕ зудта, уомӕн ӕма Киристей туххӕй неци ма фегъуста. Фал уӕддӕр Тимофеййӕн ци байамудта, е ин гъӕуама банхус кодтайдӕ Киристей фӕдбӕлдзӕуӕг исунмӕ. Ӕ цард кӕцирдӕмӕ исараздзӕй, уой гъӕуама ӕхуӕдӕг ниллух кодтайдӕ. Дзубанди дӕр ибӕл нӕййес, Тимофей киристон ке иссӕй, уоми ӕ мади хъиамӕттӕ дӕр берӕ адтӕй. (Бакӕсӕ 2 Тимофеймӕ 3:14, 15.) Гъема Тимофей рӕстдзийнади над ке равзурста, уобӕл Евникӕ хъӕбӕр цийнӕ кодта. Ном Евникӕ ци дзурдӕй равзурдӕй, е нисан кӕнуй «уӕлахез кӕнун». Мадта, ӕцӕгӕйдӕр, ӕ ном ӕ уӕле ӕй! Кӕд ин ӕнцон н’ адтӕй, уӕддӕр ӕ фуртӕн рӕстдзийнадӕ бауарзун кодта.

7. Евники бон куд адтӕй Тимофеййӕн донаргъуди фӕсте дӕр ӕнхус кӕнун?

⁷ Кӕд Тимофей донаргъуд райста, уӕддӕр е уобӕл дзорӕг нӕма адтӕй, ӕма нур Евники тухсун нецӕбӕл бал гъӕуй. Цума Тимофей ӕ цард идарддӕр куд араздзӕй? Лӕгъуз ӕмбӕлттӕ ин нӕ фӕззиндзӕй? Афинити скъолай ахур кӕнун ӕй ку бафӕндӕуа ӕма уоми аллихузи философти мӕнгӕ ахурӕдтӕбӕл ку фӕццӕфса, уӕдта? Е ’ригон бонтӕ ӕма ӕ хъауритӕ гъӕздугдзийнадӕмӕ не ’сараздзӕй? Евникӕн Тимофеййи бӕсти унаффӕ рахӕссуни барӕ н’ адтӕй, фал ин ӕ бон адтӕй идарддӕр дӕр ӕнхус кӕнун, цӕмӕй Йегови хъӕбӕрдӕр бауарзтайдӕ ӕма Киристей нивонди туххӕй боз адтайдӕ. Ӕ сувӕллӕнтти еунӕгӕй ка гъомбӕл кӕнуй, айдагъ уонӕн нӕ фӕууй зин. Дууӕ ниййерӕги дӕр Йеговӕн кӕми фӕллӕггадӕ кӕнунцӕ, уӕхӕн бийнонти дӕр сувӕллони рӕстдзийнади надмӕ исаразун ӕнцон нӕ фӕууй. Мадта ниййергутӕн Евники хабар куд банхус кӕндзӕй?

8. Хуӕртӕн сӕ бон куд ӕй сӕ лӕгтӕн ӕнхус кӕнун сувӕллӕнтти рӕстдзийнади гъомбӕл кӕнунмӕ?

⁸ Сувӕллӕнтти хӕццӕ Библи ахур кӕнтӕ. Хуӕртӕ, Йегови фӕндуй, цӕмӕй уӕ лӕгтӕн  ӕнхус кӕнайтӕ уӕ сувӕллӕнтти рӕстдзийнади надбӕл аразунмӕ. Уомӕн уин хуарз мадзал уодзӕй Библий ахур. Уӕ дзурдтӕй бӕрӕг уӕд, еци ахур уӕхе зӕрдӕмӕ дӕр ке цӕуй. Расагъӕс кӕнтӕ, уӕ бон ци ӕй кӕнун, цӕмӕй уӕ сувӕллӕнтти зӕрдӕмӕ бийнонти ахур фулдӕр цӕуа ӕма имӕ еу хаттӕй иннӕ хатмӕ ӕнгъӕлмӕ кӕсонцӕ. Уӕ бон ӕй уӕ лӕгтӕн ӕнхус кӕнун, цӕмӕй еци ахур игъӕлдзӕгдӕр цӕуа. Еумӕ нӕуӕг еститӕ ӕргъуди кӕниайтӕ. Кӕд уӕ сувӕллӕнттӕ минкъийтӕ нӕбал ӕнцӕ, уӕдта уӕ бон ӕй уӕ лӕгтӕн ӕнхус кӕнун алке хӕццӕ дӕр си Библи хецӕнӕй ахур кӕнун киунуги фӕрци «Радуйтесь жизни сейчас и вечно!».

9. Сувӕллӕнтти еунӕгӕй ка гъомбӕл кӕнуй, уӕхӕн хуӕртӕн устур ӕнхус ци фӕууй?

⁹ Ӕ сувӕллӕнтти еунӕгӕй кӕ гъомбӕл кӕнуй кенӕ ӕ сӕрихецау Йегови Ӕвдесӕн кӕмӕн нӕй, еци хуӕртӕн сӕхе фӕгъгъӕуй сӕ сувӕллӕнтти хӕццӕ Библи ахур кӕнун. Кӕд дӕу хабар дӕр уотӕ ’й, уӕд, дӕ хуарзӕнхӕй, ӕгӕр ма тухсӕ. Йеговӕ дӕ еунӕгӕй нӕ ниууадздзӕй! Ӕ организаций фӕрци нин дуйне ахургӕнӕн ӕрмӕг дӕттуй. Пайда си кӕнӕ. Уомӕй уӕлдай ма дӕ бон ӕй иннӕ ниййергути дӕр рафӕрсун, бийнонти ахур уадзун хуӕздӕр куд уайдӕ, уобӕл (Ӕмб. 11:14) c. Йеговӕ дин ӕнӕмӕнгӕй ӕнхус кӕндзӕй, цӕмӕй дӕ сувӕллӕнтти хӕццӕ кӕрӕдзей лӕдӕрайтӕ. Корӕ си, цӕмӕй дӕ бон уа сӕ зӕрдитӕмӕ над иссерун (Ӕмб. 20:5). Зӕгъӕн, уӕхӕн хумӕтӕг фарста сӕмӕ ку раттай, скъолай хъӕбӕрдӕр цӕбӕл фӕттухсис, зӕгъгӕ, уӕд, ка ’й зонуй, сувӕллон дӕр раргом кӕндзӕй, ӕ зӕрди ци ес, уой.

10. Уӕ бон ма ци ӕй кӕнун, цӕмӕй уӕ сувӕллӕнттӕ Йеговӕмӕ хӕстӕгдӕр кӕнонцӕ?

¹⁰ Сувӕллӕнттӕн Йегови туххӕй дзорунмӕ фадуӕттӕ агоретӕ. Дзориайтӕ син, Йеговӕ цӕхуӕн Хуцау ӕй ӕма уин цӕйбӕрцӕ хуарздзийнӕдтӕ искодта, уой туххӕй (Дук. з. 6:6, 7; Ис. 63:7). Е уӕлдай ӕхсидзгӕ ӕй, сувӕллӕнтти хӕццӕ Библи хӕдзари ахур кӕнуни фадуат кӕмӕн нӕййес, еци хуӕртӕн. Минкъий раздӕр ке кой искодтан, еци хуӕрӕ Кристинӕ зӕгъуй: «Мӕ лӕги рази мин Йегови туххӕй дзорӕн ке н’ адтӕй, уомӕ гӕсгӕ ӕндӕр фадуӕттӕ агурдтон. Мӕ сувӕллӕнтти ескумӕ райерхӕфсунмӕ ку рахонинӕ, уӕд мин фадуат фӕззиннидӕ, цӕмӕй син дзорон, ӕрдзӕ куд дессаги конд ӕй, уой туххӕй ӕма ма син Йегови туххӕй ӕндӕр аллихузи хабӕрттӕ кӕнон. Минкъий ку фӕуустурдӕр ӕнцӕ, удта сӕ разӕнгард кодтон, цӕмӕй Библи сӕхуӕдтӕ ӕртастайуонцӕ». Уомӕй уӕлдай ма хъӕбӕр ӕхсидзгӕ ’й сувӕллӕнттӕн Йегови организаций ӕма нӕ хуӕртӕ ӕма ӕнсувӕрти туххӕй хуарз дзорун. Хестӕр нӕлгоймӕгти фудкой син макӕд кӕниайтӕ, кенӕ ба сӕ ӕнхус ку багъӕуа, уӕд сӕмӕ нӕ бацӕудзӕнцӕ.

11. Иакови 3:18 куд финст ӕй, уомӕ гӕсгӕ фарнӕ багъӕуай кӕнунбӕл цӕмӕн гъӕуама архайӕн?

¹¹ Архайетӕ, цӕмӕй уӕ хӕдзари фарнӕ уа. Хуӕртӕ, уӕ лӕгтӕн ӕма уӕ сувӕллӕнттӕн арӕхдӕр дзориайтӕ, ке сӕ уарзетӕ, уой. Уӕ лӕгтӕмӕ уотӕ хӕларзӕрдӕ ӕма сӕ нимайетӕ, удта уӕ сувӕллӕнтти дӕр уобӕл ахур кӕнтӕ. Уӕд уӕ бийнонти астӕу уодзӕй фарнӕ. Уотемӕй ба сувӕллӕнтти рӕстдзийнадӕбӕл ахур кӕнун дӕр ӕнцондӕр уодзӕй. (Бакӕсӕ Иакови 3:18.) Ӕркӕсӕн, Румыний сӕрмагонд пионерӕй ка лӕггадӕ кӕнуй, еу уӕхӕн ӕнсувӕр Йожефи хабармӕ. Минкъий ма ку адтӕй, уӕд сӕ сӕ фидӕ Йеговӕн лӕггадӕ кӕнун нӕ уагъта. Йожеф радзурдта: «Нӕ мадӕ ӕгас хъауритӕй архайдта, цӕмӕй нӕ бийнонти астӕу фарнӕ адтайдӕ. Нӕ фидӕ куд карздӕр фӕууидӕ, уотӕ имӕ нӕ мадӕ ба фӕлмӕндӕр адтӕй. Еу рӕстӕг  нин имӕ игъосун ӕма ’й нимайун хъӕбӕр зин адтӕй. Ӕма уӕд нӕ мадӕ нӕ хӕццӕ ӕркастӕй, Ефесӕгтӕмӕ 6:1–3 ци уагӕвӕрд ес, уомӕ. Уой фӕсте ба нин нӕ фиди хуарз менеугутӕ ранимадта ӕма нин балӕдӕрун кодта, цӕмӕн ӕй гъӕуама уарзӕн, уой. Уотемӕй нӕ берӕ мӕститӕй багъӕуай кодта».

12. Евники цӕветтон Тимофеййӕн куд банхус кодта? (2 Тимофеймӕ 1:5).

¹² Бакӕсӕ 2 Тимофеймӕ 1:5. Евникӕ Тимофеййӕн фӕнзуйнаг адтӕй. Ӕвӕдзи ’й Евникӕ ахур кодта, ӕцӕг ӕууӕндундзийнадӕ гъуддӕгтӕй ке гъӕуама уа бӕрӕг, уобӕл (Иак. 2:26). Тимофей ӕй уидта, ӕ мадӕ ӕцӕгӕйдӕр Йегови берӕ ке уарзуй ӕма ин ке лӕггадӕ кӕнуй, уой фӕрци ӕцӕг амондгун ке ӕй. Цума Тимофеййӕн ӕ мади цӕветтон куд банхус кодта? Апостол Павел загъта, Тимофеййӕн дӕр ӕ мади хузӕн федар ӕууӕндундзийнадӕ ке адтӕй. Ӕма уотӕ ӕнай-ӕнойти нӕ рауадӕй. Ӕ мадӕ ин адтӕй фӕнзуйнаг, ӕма уомӕ кӕсгӕй Тимофеййи ӕхе дӕр бафӕндадтӕй Йеговӕн лӕггадӕ кӕнун. Гъе уотӕ абони дӕр хуӕртӕй беретӕ «ӕнӕ дзурдтӕй» сӕ хеуӕнтти зӕрдитӕмӕ над иссерунцӕ (1 Пет. 3:1, 2). Ӕма е дӕуӕн дӕр бантӕсдзӕй! Цума дӕ уой туххӕй ци гъӕуй кӕнун?

13. Мадтӕлтӕн фиццаг бунати ци гъӕуама уа ӕма цӕмӕн?

¹³ Йегови хӕццӕ дин ци лимӕндзийнадӕ ес, е дӕ царди уӕд фиццаг бунати (Дук. з. 6:5, 6). Сувӕллӕнтти гъомбӕл кӕнгӕй мадӕ ӕхе берӕ цӕмӕйдӕрти фӕццох кӕнуй. Цӕмӕй уӕ сувӕллӕнттӕ маци гъӕуагӕ уонцӕ, уой туххӕй уӕ берӕ бахъиамӕт кӕнун фӕгъгъӕуй. Кӕмидӕр фӕллайгӕ бакӕнтӕ, кӕмидӕр ба ӕнӕхуссӕг дӕр фӕууотӕ. Кӕд уотӕ ’й, уӕддӕр ма бауагътӕ, цӕмӕй, Йегови хӕццӕ ци рӕстӕг гъӕуама рарветайтӕ, еци рӕстӕг уин хӕдзари хабӕрттӕбӕл кенӕ ӕндӕр уӕхӕн гъуддӕгтӕбӕл рандӕ уа. Рӕстӕг иссериайтӕ, цӕмӕй алли бон дӕр Йеговӕмӕ ковайтӕ, Библи кӕсайтӕ ӕма ’й ӕртасайтӕ, удта ӕмбурдтӕ дӕр ма цох кӕнайтӕ. Уотемӕй уе ’ууӕндундзийнадӕ федарӕй-федардӕр кӕндзӕй, ӕма еци гъуддаги уӕ бийнонтӕн дӕр ӕма иннетӕн дӕр фӕнзуйнаг уодзиайтӕ.

14, 15. Лианӕ, Марийӕ ӕма Жоауи дзурдтӕй цӕбӕл ахур кӕнис?

¹⁴ Гъӕйдӕ нур ба ӕркӕсӕн, сувӕллӕнттӕ сӕхуӕдтӕ ци дзорунцӕ, уомӕ. Уонӕн сӕ мадтӕлтӕ банхус кодтонцӕ Йегови бауарзун ӕма ибӕл сӕ зӕрдӕ дарун. Кристини кизгӕ Лианӕ зӕгъуй: «Библи ахур кӕнун ӕргом нӕ бон н’ адтӕй. Фал нӕ мадӕ уӕддӕр ӕмбурдтӕ некӕд цох кодта. Ӕма кӕд мӕ хуӕрӕ ӕма ме ’нсувӕри хӕццӕ Библий туххӕй берӕ нӕ зудтан, уӕддӕр нӕ мадӕмӕ кӕсгӕй не ’ууӕндундзийнадӕ федар кодта. Ӕмбурдтӕмӕ цӕун ку нӕма райдӕдтан, уӕд дӕр ӕй зудтан, айӕ рӕстдзийнадӕ ке ӕй».

¹⁵ Иннӕ хуӕрӕ Марийӕ ба радзурдта, сӕ фидӕ сӕ хъӕбӕр ке бафхуӕридӕ, ӕмбурдтӕмӕ ке рандӕуиуонцӕ, уой туххӕй. Е радзурдта: «Ци нифсхаст хуӕрти зонун, уонӕй сӕ еу ӕй мӕ мадӕ. Минкъий ма ку адтӕн, уӕд хъӕбӕр тарстӕн, иннетӕ ци зӕгъдзӕнцӕ, уомӕй. Уомӕ гӕсгӕ, кӕнгӕ ци адтӕй, уой нӕ кодтон. Фал мӕ мадӕ ба хъӕбӕр нифсхаст адтӕй ӕма ин царди Йеговӕй ӕхсидзгӕдӕр неке ӕма неци адтӕй. Уомӕ кӕсгӕй ӕз дӕр фӕннифсхастдӕр дӕн». Еу ӕнсувӕр Жоауӕн ба сӕ фидӕ Йеговӕ ӕма Библий кой уотид искӕнун дӕр нӕ фӕууадзидӕ. Жоау зӕгъуй: «Мӕ зӕрдӕбӕл тӕккӕ хъӕбӕрдӕр ци бамбалдӕй, уой зонетӕ? Мӕ фиди зӕрдӕ барохс кӕнуни туххӕй мӕ мадӕ цийфӕнди раттунмӕ дӕр цӕттӕ адтӕй, Йегови хӕццӕ ин ци лимӕндзийнадӕ адтӕй, уомӕй уӕлдай».

16. Сувӕллӕнтти еунӕгӕй ка гъомбӕл кӕнуй, уӕхӕн хуӕрти цӕветтонтӕ иннетӕн пайда цӕмӕй фӕуунцӕ?

 ¹⁶ Хуӕртӕ, уӕ зӕрдӕбӕл даретӕ: уӕ цӕветтон айдагъ уӕ сувӕллӕнттӕн нӕй фӕнзуйнаг. Расагъӕс кӕнтӕ, Евники хабар апостол Павели куд бафедар кодта, уобӕл. Е ниффинста, Тимофеймӕ ци «ӕнӕхийнӕ ӕууӕндундзийнадӕ адтӕй», уӕхӕн ӕууӕндундзийнадӕ ӕ мадӕ Евникӕмӕ ке адтӕй (2 Тим. 1:5). Е уотӕ ке ӕй, уой Павел кӕцӕй зудта? Ӕ фиццаг игъосун кӕнуни балций Павел адтӕй Листри. Ӕма, ӕвӕдзи, гъе уӕд фиццаг хатт фембалдӕй Лоидӕ ӕма Евникӕбӕл. Ка ’й зонуй син киристӕнттӕ исунмӕ дӕр ӕхуӕдӕг банхус кодта (Гъуд. 14:4–18). Расагъӕс кӕнӕ, уобӕл 15 анземӕй фулдӕр рацудӕй, ӕма Павел ӕ финстӕги Евники ӕууӕндундзийнадӕ иннетӕн цӕветтонӕн ӕрхаста. Дзубанди дӕр ибӕл нӕййес, Евники цӕветтон айдагъ Павели нӕ, фал ма уӕди рӕстӕги берӕ ӕндӕр киристӕнтти дӕр ке бафедар кодта. Мадта, хуӕртӕ, кӕд сумах дӕр уӕ сувӕллӕнтти еунӕгӕй гъомбӕл кӕнтӕ кенӕ ба уӕ сӕрихецау Йегови Ӕвдесӕн нӕй, уӕд ӕй федарӕй зонетӕ: сумах цӕветтон дӕр иннетӕн фӕнзуйнаг ӕй ӕма сӕ федар кӕнуй.

17. Де ’гас хъауритӕй ку архайай, фал дӕмӕ уотӕ ку кӕса, ӕма дӕ сувӕллони ӕууӕндундзийнадӕ нӕ ирӕзуй, уӕд дӕ бон ци ӕй кӕнун?

¹⁷ Де ’гас хъауритӕй ку архайай, фал дӕмӕ уотӕ ку кӕса, ӕма дӕ сувӕллони ӕууӕндундзийнадӕ нӕ ирӕзуй, уӕд дӕ бон ци ӕй кӕнун? Дӕ гъудий дарӕ: сувӕллони гъомбӕл кӕнун еунӕг бони гъуддаг нӕй. Хузӕмӕ де ’ргом раздахӕ. Адӕймаг нӕмуг ку ниййаразуй,  уӕд е уобӕл дзорӕг нӕма фӕууй, ӕма исирӕздзӕй, удта рӕзӕ дӕттун райдайдзӕй. Е адӕймагӕй кӕнгӕ нӕй. Мах ибӕл гъӕуама дон кӕнӕн ӕма имӕ зелӕн, цӕмӕй ирӕза (Мар. 4:26–29). Гъе уотӕ ’й сувӕллӕнттӕн се ’ууӕндундзийнади хабар дӕр. Еуӕй-еухатт мадӕ фӕттухсуй, рӕстдзийнадӕ ӕ сувӕллони зӕрдӕмӕ гъаруй ӕви нӕ, уобӕл. Сувӕллон ци унаффӕ рахӕсдзӕй, е мадӕй кӕнгӕ нӕй. Фал мадӕ ӕгас хъауритӕй ку архайа, цӕмӕй сувӕллон Йегови бауарза, уӕд зӕгъӕн уодзӕй, ӕма ин ӕ зӕрди ци нӕмуг ниййаразта, уомӕ дзӕбӕх зелуй (Ӕмб. 22:6).

18. Йегови бон куд ӕй уӕ сувӕллӕнттӕн банхус кӕнун рӕстдзийнади надбӕл къахдзӕфтӕ кӕнунмӕ?

¹⁸ Йеговӕ хъӕбӕр берӕ ӕригӕнттӕн банхус кодта киристӕнттӕ исунмӕ (Пс. 22:9, 10). Ӕма сумах сувӕллӕнттӕн дӕр банхус кӕндзӕй се ’ууӕндундзийнадӕ федар кӕнунмӕ, ӕрмӕстдӕр сӕ фӕндгӕ кӕнӕд (1 Кор. 3:6, 7). Кӕд ин неци уотӕ зингзӕрдӕй лӕггадӕ кӕнунцӕ, уӕддӕр сӕ Йеговӕ берӕ уарзуй (Пс. 11:4). Минкъий естӕмӕй дӕр бӕрӕг ку уа, «ӕносон царди надбӕл» цӕун сӕ ке фӕндуй, уӕд сӕмӕ Йеговӕ е ’нхуси къох ӕрбадардзӕй (Гъуд. 13:48; 2 Анз. 16:9). Йеговӕ дин банхус кӕндзӕй, цӕмӕй дӕ сувӕллонӕн зӕгъай гъӕугӕ дзурдтӕ гъӕугӕ афони (Ӕмб. 15:23). Кенӕ ба ӕмбурди хуӕрӕ кенӕ ӕнсувӕри баразӕнгард кӕндзӕй, цӕмӕй имӕ уӕлдай ӕргом раздаха ӕма ин хуарз ӕмбал исуа. Ку исустур уонцӕ, уӕддӕр син Йегови бон ӕй банхус кӕнун, минкъийӕй сӕ цӕбӕл исахур кодтайтӕ, уони ӕргъуди кӕнун (Иоан. 14:26). Цӕмӕй Йеговӕ уӕ сувӕллонӕн рӕстдзийнади надбӕл къахдзӕфтӕ кӕнунмӕ ӕнхус кӕна, уой туххӕй сумахӕй кӕнгӕ ци ӕй, уой кӕнтӕ: ахур сӕ кӕнтӕ дзурдӕй дӕр ӕма гъуддагӕй дӕр.

19. Хуӕртӕн сӕ бон цӕмӕн ӕй федарӕй ӕууӕндун, Йеговӕ си сӕрустур ке ӕй?

¹⁹ Йеговӕ дӕ уарздзӕй ӕви нӕ, е дӕ сувӕллӕнттӕ ци унаффӕ рахӕсдзӕнцӕ, уомӕй кӕнгӕ нӕй. Е дӕ уарзуй, уомӕн ӕма ’й ду уарзис. Кӕд ду дӕр дӕ сувӕллӕнтти еунӕгӕй гъомбӕл кӕнис, уӕд дин Йеговӕ зӕрдӕ ӕвӕруй, дӕ сувӕллӕнттӕн сӕ Фидӕ ке уодзӕй, дӕуӕн ба – дӕ Сӕрбӕлдзорӕг! (Пс. 68:5). Дӕ сувӕллӕнттӕ рӕстдзийнади над равзардзӕнцӕ ӕви нӕ, еци унаффӕ сӕ бӕсти рахӕссун дӕ бон нӕй. Фал Йегови ӕнхусбӕл дӕ зӕрдӕ ку дарай ӕма, дӕуӕй кӕнгӕ ци ӕй, уой ку кӕнай, уӕд ди Йеговӕ ӕнӕмӕнгӕй сӕрустур уодзӕй!