1-2. (a) Siopa si Eunice, tan anto ran subok so inarap to bilang ina? (b) Komentoan so litrato ed apis.

 ANGGAPOY nabasa ed Biblia tungkol ed impanpabautismo nen Timoteo. Pero, seguradon malikeliket so nanay ton si Eunice diad saman ya agew. (Pro. 23:25) Imadyin mo pay Eunice ya pap-proud legan ya onlalasur ed danum si Timoteo. Anggad layag so imis dan dua nen Loida, ya bai nen Timoteo. Inmengas na aralem si Eunice legan ton babantayan ya ipapalseb da lay anak to. Tan kaimwas nen Timoteo, akalua si Eunice lapud liket to! Misatsalamat ta nambunga so sagpot to ya bangatan so anak to ya aroen si Jehova tan si Jesu-Kristo. Agawaan to itan anggano wala ray subok ya inarap to. Anto iratan ya subok?

² Mandumaan na relihyon so atateng nen Timoteo. Say ama to et Griego, pero say nanay tan bai to et Judio. (Gawa 16:1) Posiblin tinedyer lay Timoteo nen nagmaliw ya Kristiano si Eunice tan Loida. Agbalet nagmaliw ya Kristiano si ama to. Anton relihyon balet so pilien nen Timoteo? Wala lay kalakal to kanian makapandesisyon lan bukor. Kasin pilien toy relihyon nen ama to? Kasin agto la umanen so pananisia to bilang Judio ta atan lay abangonan to? O magmaliw met ya Kristiano, ya singa si nanay tan bai to?

3. Base ed Proverbio 1:8, 9, akin et nibaga tayon mabmabli ed si Jehova so pansasagpot na saray nanay ya pabalegen dad katuaan iray ananak da?

³ Saray nanay met natan ya lingkor nen Jehova et inar-aro day pamilya ra. No sakey kan ina, seguradon labay mo met ya magmaliw ya lingkor nen Jehova iray ananak mo. Kanian gagawaen moy anggaay nayarian mo ya bangatan ira ya aroen day Dios. Amin ya sagpot mo et mabmabli ed si Jehova. (Basaen so Proverbio 1:8, 9.) Diad tua, dakdakel lan nanay so tinulongan nen Jehova pian napabaleg dad katuaan iray ananak da.

4. Anto ran subok so aarapen na saray nanay ya lingkor nen Jehova?

 ⁴ Natural labat ya sankanonot na sakey ya ina no kasin manlingkor met ed si Jehova so anak to, ya singa si Timoteo. Lalo la natan ta agaylay irap so mamabaleg na anak ed sayan mundo nen Satanas. (1 Ped. 5:8) Wala ray sister ya bukbukor day mamapabaleg ed anak da ta single mother ira. Say arum balet et walay asawa ra, pero agmanlilingkor ed Jehova. Ontan so situasyon nen Sister Christine. * Oniay kuan to: “Maomaong so asawak tan agto papaulyanan so pamilya mi. Pero, babawalan to ak ya iyaralan iray ananak mi ta agto ra labay ya man-Tasi. Dakel ya taon ya iinum-inumen koy luak, ta agko amta no panon kon tulongan iray ananak ko pian manlingkor met irad si Jehova.”

5. Anto ray pantongtongan tayod sayan artikulo?

⁵ No sakey kan ina, makaseguro ka ya natulongan mo ray ananak mo ya aroen tan panlingkoran day Jehova, ya singa ginawa nen Eunice. Pantongtongan tayod sayan artikulo no panon mon naalig so alimbawa to, tan no panon mon naibangat iray ananak mo diad saray ibabagam tan gagawaen mo. Pantongtongan tayo met no panon kan tulongan nen Jehova.

6. Base ed 2 Timoteo 3:14, 15, panon ya nagmaliw ya Kristiano si Timoteo?

⁶ Nen ugaw ni si Timoteo, imbangat ed sikato nen Eunice iray “masanton sulat” na saray Judio. Aman ni labat so naibangat nen Eunice ed si Timoteo, ta diad saman et anggapo ni amta to tungkol ed si Jesu-Kristo. Pero akatulong iray naaralan nen Timoteo nen ugaw ni pian mainomay ton natalosan so bangat na saray Kristiano nen tinedyer la. Say tepet balet, kasin pilien toy magmaliw ya Kristiano? Walay karapatan ton mandesisyon parad sarili to ta baleg la. Ibabaga na Biblia ya si Timoteo et nagmaliw ya Kristiano ta akombinse o ‘atangguyor ya manisia’ ed si Jesus. Tan say sakey ya rason et lapud impanbangat ed sikato nen nanay to. (Basaen so 2 Timoteo 3:14, 15.) Seguradon misatsalamat si Eunice ta nagmaliw ya Kristiano si Timoteo! Anggano mairap so situasyon nen Eunice ta aliwan Kristiano so asawa to, sulit so impanbangat tod anak to. Dugaruga ed sikato so ngaran ton Eunice, ya inala ed salitan mankabaliksan na “manalo.” On, agnampatalo si Eunice ed saray subok ya dinalan to!

7. Antoy posiblin ginawa nen Eunice anggano abautismoan lay Timoteo?

⁷ Anggano abautismoan lay Timoteo, sankanonot nin siansia nen Eunice no antoy pansumpalan na anak to. Ompan naisip nen Eunice, ‘Anto kasi plano nen Timoteo ed bilay to? Siopa kasi ray pilien ton kakaaro? Kasin mangala na atagey ya edukasyon ed Atenas ya kawalaan na saray paganon managbangat? Kasin usaren toy panaon, biskeg, tan talino to pian manpayaman?’ Siempre, aga naidesisyonan nen Eunice si Timoteo, pero natulongan ton mandesisyon na duga. Antoy gawaen to ey? Kaukolan ton tuloytuloy ya panonotan so anak to ya aroen si Jehova tan Jesus, tan pablien toy amin ya kamaongan da. Diad panaon tayo, aliwan saray ateng labat ya bukbukor day Tasi so nanairapan ya mamabaleg ed anak da diad katuaan. Anggano parehon Tasi so atateng, aliwa itan ya garantiya ya magmaliw lan lingkor nen Jehova so anak da. Kaukolan day mansagpot pian napakiwas so anak da ya manlingkor met ed si Jehova. Antoy naaralan na saray atateng ed alimbawa nen Eunice?

8. No say asawa na sister et Tasi, panon ton natulongan pian naibangat da ray ananak da tungkol ed si Jehova?

 ⁸ Manaral na Biblia kaiba iray ananak mo. Sikayo ran sister, no say asawa yo et Tasi, labay nen Jehova ya tulongan yoy asawa yo ya ibangat iray ananak yo tungkol ed Sikato. Say sakey ya paraan et no suportaan mo so sinimban Family Worship yo. Paseseg mo ray ugugaw ya pablien da itan, ta parad pankaabigan da lanlamang. Tan manisip kay paraan pian na-enjoy yon amin so Family Worship yo. Singa bilang, suportaan moy asawam no walay plaplanoen ton Bible study project. Tan depende ed edad na ananak yo, ompan marakep no igapo yo lan iyaral ed sikara so libron Panliketan so Bilay ya Anggapoy Anggaan! Pantongtongan yon sanasawa no panon kayon mantulongan pian naiyaralan yo ray ananak yo.

9. Antoy makatulong ed saray sister ya single mother, o aliwan Tasi so asawa ra?

⁹ Wala ray sister ya sikaray mangiyaaral ed anak da ta single mother ira, o aliwan Tasi so asawa ra. No ontan so situasyon mo, agka mapaga ta tulongan ka nen Jehova. Wala ray intarya na organisasyon to ya makatulong ed pambangat mod anak mo. Tepetan mo ray maespiritual ya atateng ed kongregasyon yo no panon da iratan ya uusaren ed family worship da. * (Pro. 11:14) Ipikasim ed si Jehova ya tulongan to ka pian maong so komunikasyon mo ed anak mo. Singa bilang, kerew mod sikato ya tulongan to ka ya naamtaan moy iisipen tan nalilikna na anak mo. (Pro. 20:5) Anggan say simplin tepet ya ‘Kumustay school ey, nanairapan ka?’ et makatulong pian makapan-istoryaan kayo tan naamtaan moy nagagawad bilay to.

10. Anto ni ray sarag mon gawaen pian nabangatan mo ray ananak mo tungkol ed si Jehova?

¹⁰ Manggawa ka ni ray arum ya paraan pian nibangat mod ananak mo so tungkol ed si Jehova. Istoryam ed sikara iray kamaongan ya ginawa nen Jehova ed sika. (Deu. 6:6, 7; Isa. 63:7) Maabig no ontay gawaen mo lalo la no limitado labat so pamba-Bible study yo ed abung. Oniay imbaga nen Sister Christine ya abitlad parapo 4: “Mataltalag kamin makapan-istoryaan tungkol ed si Jehova diad abung kanian sasamboten koy amin ya pagkakataon. Itatagar ko ray ugugaw ya manakar-akar o man-baloto, insan mi pantongtongan iray balibalin palsa nen Jehova tan arum ni ran espiritual ya bagay. Nen wala lay kalakal na ananak ko, pinaseseg ko iran man-personal study.” Ontan met, dapat positibo iray ibabagam tungkol ed organisasyon nen Jehova tan saray agagi. Agmo babalawen iray elder. No positibo iray ibabagam tungkol ed saray elder, agmanalangan iray ananak mo ya onkerew na tulong ed sikara no walay problema da.

11. Base ed Santiago 3:18, akin et importante ya walay deen ed abung?

¹¹ Ipanengneng so panangaro tan respeto pian mansiansia so deen ed abung. Lanang mon ibaga ed si asawam tan ed saray ananak mo ya inar-arom ira. Agmo dederalan si asawam no iistoryaen mod arum, tan ipasal mo ray ananak mo ya respetoen day ama ra. No ontan so gawaen mo, mareen so abung tan mas labayen na ananak mo ya kabaten si Jehova. (Basaen so Santiago 3:18.) Imanoen so eksperiensya nen Brother Jozsef ya natan et espisyal payunir ed Romania. Apatira iran sanaagi, tan si nanay to labat so Tasi. Anggano kontran maong so tatay to ed pandadayew dad si Jehova, oniay nanonotan to: “Say labay nen  Nanay, mareen so abung. Agto labay so kolkol. Kanian anggano aliwliway pantrato nen Tatay, mabaibait nin siansia si Nanay. No nalikas nen Nanay ya agmi la italtalek si Tatay, bilinen to kami tan ipapanonot to may walad Efeso 6:1-3. Insan to istoryaen iray kamaongan nen Tatay, ta labay to ya respetoen tan aroen mi. Ontan so gagawaen nen Nanay pian naiwasan so kolkolan tan ebatan ed abung mi.”

12. Base ed 2 Timoteo 1:5, antoy epekto na alimbawa nen Eunice ed si Timoteo?

¹² Basaen so 2 Timoteo 1:5. Maong ya alimbawa so impanengneng nen Eunice ed si Timoteo. Seguradon imbangat tod anak to ya say tuan pananisia et nanengneng ed gawa. (Sant. 2:26) Seguradon anengneng nen Timoteo ya inar-aro nen nanay to si Jehova. Anengneng tod alimbawa nen Eunice ya maliket so manlingkor ed Dios. Antoy epekto to ’tan ed si Timoteo? Say pananisia to et singa pananisia met nen ina to. Pero, agbasta-basta awalaan na pananisia si Timoteo. Anengneng toy alimbawa nen nanay to tan inalig to. Dakel met so sister natan ya singa si Eunice. Atulongan dan magmaliw ya lingkor nen Jehova iray kapamilya da lapud “maabig a kagagawa [ra].” (1 Ped. 3:1, 2) Nagawaan mo met itan. Panon?

13. Akin et importantin saray nanay et iyuna day Jehova ed bilay da?

¹³ Iyunam si Jehova ed bilay mo. (Deu. 6:5, 6) Duga may kuan da ya saray nanay et masakripisyo. Akaparaan iran mankimey, manggastos, manpuyat, tan arum ni pian naasikaso day ananak da. Pero, komon ta say agmon balot isasakripisyo et say relasyon mod si Jehova. Agmo papaulyanay manpikasi, man-personal study, tan miaral. No ontan so gawaen mo, ag-onkapuy so espiritualidad mo tan lalo kan onapit ed si Jehova. Sakey ni, magmaliw kan maong ya alimbawa ed pamilyam tan ed saray agagi.

14-15. Antoy naaralan mo ed imbaga nen Leanne, Maria, tan João?

¹⁴ Imanoen so imbaga na pigaran kabataan ya nagmaliw ya lingkor nen Jehova lapud maabig ya alimbawa na nanay da. Oniay imbaga nen Leanne, ya anak nen Sister Christine ya abitla nen niman: “Agkami nayarin man-Bible study nen Mamak no wadtay Papak ed abung. Pero say pambiliban kod si Mamak, agan balot ona-absent ed aral. Kanian anggano daiset labat so amta min sanaagi tungkol ed Biblia, say mismon alimbawa nen Mamak so amabiskeg ed pananisia mi. Anggano agkami ni mimiaral, kombinsido kami la ya Saray Tasi nen Jehova so tuan relihyon.”

¹⁵ Say nanay nen Sister Maria so amabaleg ed sikaran sanaagi diad katuaan. Imbaga to ya nensaman kayari ran miaral, tatamian tan sasakitan ira nen tatay to. Oniay imbaga to: “Anggapoy makatalo ed pakpel nen Nanay ko. Nen ugaw ak, natatakot ak ed ibaga na arum. Pero lapud pakpel nen Nanay tan anengneng ko ya lanang ton iyuunay Jehova ed bilay to, alabanan koy takot ko ed too.” Oniay imbaga met nen Brother João, ya say tatay to et imbawal ton pantongtongan ed abung da so tungkol ed si Jehova o say Biblia: “Diad tua, inar-aron maong nen Mommy’k si Daddy’k. Akaparaan ya mansakripisyo parad si Daddy’k. Pero, agton balot tinaynan si Jehova pian labat napaliket toy Daddy’k. Atan so tinmatak ed isip ko.”

16. No say sakey ya nanay et maong so alimbawa to, antoy epekto tod arum?

¹⁶ Sikayo ran nanay, agyo komon lilingwanan ya say alimbawa yo et baleg so epekto to  ed arum. Imano yo pay epekto na alimbawa nen Eunice ed si apostol Pablo. Imbaga nen Pablo ya say pananisia nen Timoteo ya andiay pankunkunwari et “unonan impatnag nen . . . Eunice.” (2 Tim. 1:5) Kapigan kasi unonan naobserbaan nen Pablo so pananisia nen Eunice? Posible ya akabat toy Loida tan Eunice ed Listra diad unonan impanbiahe to bilang misionero. Tan posible ya sikato so sakey ed saray tinmulong pian magmaliw iran Kristiano. (Gawa 14:4-18) Isipen pa: Nen sinulatan nen Pablo si Timoteo, manga 15 taon lay linmabas manlapu la nen akabat toy Eunice. Pero agto alingwanan so pananisia na sayan agi, tan binitla tod sulat to so maong ya alimbawa to! On, anggan si apostol Pablo et apaseseg ed alimbawa nen Eunice, tan seguradon akaaral iray agagi ed mabiskeg ya pananisia to. No bilang ta single mother ka o aliwan Tasi so asawam, tandaan mo ya napapaseseg moy arum ed maong ya alimbawam.

17. Antoy gawaen mo no singa anggapoy epekto na pangibabangat moy katuaan ed anak mo?

¹⁷ Panon to balet no singa anggapoy epekto na pangibabangat moy katuaan ed anak mo? Tandaan, kaukolan so panaon antis mon nanengneng so bunga na sagpot mo. Singa nanengneng mod litrato, no mangisukit kay bukel ed dalin, ompan isipen mo no kasin ontubo itan tan manbunga. Siempre, diad unaan agka segurado, pero mas baleg so posibilidad ya ontubo tan manbunga itan no tuloytuloy mon salogen. (Mar. 4:26-29) Ontan met so situasyon mo bilang sakey ya nanay.  Ompan iisipen mo no maminsan no kasin onsasabi ed puso na anak mo iray ibabangat mod sikato tungkol ed si Jehova. Siempre, agmo naidesisyonan so anak mo. Pero no tuloytuloy mon ibangat, baleg so posibilidad ya aroen to met si Jehova.—Pro. 22:6.

18. Panon ya ontulong si Jehova ed iyaligwas ed espiritual na saray ananak mo?

¹⁸ Manlapu la nensaman ya anggad natan, agla nabilang so ugugaw ya tinulongan nen Jehova ya magmaliw ya kaaro to. (Sal. 22:9, 10) Kanian tulongan to met iray ananak mo ya onaligwas ed espiritual, no talagan labay da. (1 Cor. 3:6, 7) Anggano say pakaliknam et singa agda ipapapuso so katuaan, agka mapaga ta ag-ira sukoan nen Jehova tan tuloytuloy to ran bantayan. (Sal. 11:4) No walay anggan daiset ya pakapatnagan ya ‘duga so kipapasen na puso ra,’ sikatoy manggawa na paraan pian naiyasingger to ra tan magmaliw iran lingkor to. (Gawa 13:48; 2 Awa. 16:9) Ompan tulongan to kan makaisip na ibagam ya eksakto ed situasyon na anak mo. (Pro. 15:23) Ompan usaren toy sakey ya maespiritual ya brother o sister ed kongregasyon yo ya mamaseseg ed sikato. Tan anggano baleg la ray anak mo, ompan ipanonot ed sikara nen Jehova iray imbangat mo ed sikara nensaman. (Juan 14:26) No tuloytuloy mon bangatan iray ananak mo diad saray ibabagam tan ipanengneng moy maong ya alimbawa, iikdan moy Jehova na rason pian bendisyonan to ka.

19. Antokaman so magmaliw ya desisyon na ananak mo, akin et makaseguro ka ya walad sikay pabor nen Jehova?

¹⁹ Say panangaro nen Jehova ed sika et ag-akadepende no kasin awaten na saray ananak mo so katuaan o andi. Inar-aro ka nen Jehova lapud inar-arom met. No sakey kan single mother, tandaan mo ya si Jehova so manprotekta ed sika tan insipan to ya sikato so magmaliw ya Ama na saray ananak mo. (Sal. 68:5) Agmo naidesisyonan iray ananak mo no kasin manlingkor irad si Jehova o andi. Pero no tuloytuloy kan mantiwala ed tulong nen Jehova tan gawaen moy anggaay nayarian mo, makaseguro ka ya walad sika so pabor to.