1-2. (a) Ken Eunise tabata, i ki difikultatnan el a enfrentá komo mama? (b) Deskribí loke bo ta mira riba e plachi di portada.

 AUNKE Beibel no ta papia tokante Timoteo su boutismo, nos por imaginá kon kontentu su mama Eunise tabata riba e dia ei. (Pro. 23:25) Su kara tabata bria ora ku e tabata wak Timoteo pará den awa. Eunise tin un smail djaki te aya segun ku su mama, Loida, wela di Timoteo, ta pará banda di dje. Ku suspenso Eunise ta wak Timoteo bai bou di awa i bin bèk ariba ku asina un smail. Eunise ta asina kontentu ku e no por kontené su lágrimanan mas. Aunke no tabata fásil, el a logra yuda Timoteo stima Yehova i su Yu Hesukristu. Ki difikultatnan Eunise mester a superá?

² Timoteo su mayornan no tabatin e mesun religion. Su tata tabata griego i su mama i wela tabata hudiu. (Echo. 16:1) Probablemente ora Timoteo tabata un tiner, Eunise i Loida a bira kristian, pero su tata sí nò. Kisas Timoteo tabata basta grandi pa tuma su mes desishonnan. Kiko lo el a disidí? Lo e skohe religion di su tata? Lo e pega na e tradishonnan hudiu ku el a siña for di chikitu? Òf, lo e bira kristian?

3. Segun Proverbionan 1:8 i 9, kon Yehova ta mira tur e esfuersonan ku mamanan ta hasi pa yuda nan yunan bira su amigu?

³ Ta bisto ku mamanan den kongregashon ta stima nan famia. Anto mas ku tur kos, nan ke yuda nan yunan bira amigu di Yehova. Yehova sigur ta balorá nan esfuerso.  (Lesa Proverbionan 1:8, 9.) Danki na Yehova su konsehonan, hopi mama a logra siña nan yunan pa stima i sirbi Yehova.

4. Kiko ta e reto ku mamanan ta haña nan kuné awendia?

⁴ Ta di komprondé ku tin biaha un mama lo por puntra su mes: ‘Mi yu lo skohe pa sirbi Yehova meskos ku Timoteo a hasi?’ Mayornan sa kuantu preshon Satanas su mundu ta pone riba nan yunan. (1 Ped. 5:8) Ademas, algun mama tin e reto di tin ku lanta nan yunan sin un kasá òf ku un kasá ku no ta sirbi Yehova. Wak e ehèmpel di un ruman ku yama Christine. * El a bisa: “Mi kasá ta un bon tata, i e ta stima su famia. Pero, el a pone pia abou ku e no ke pa mi lanta e muchanan komo Testigu di Yehova. Pa basta aña mi tabata yora i puntra mi mes si mi yunan lo skohe pa sirbi Yehova un dia.”

5. Kiko nos ta bai mira den e artíkulo akí?

⁵ Si bo tin yu, bo por siña nan stima Yehova, meskos ku Eunise a hasi. Den e artíkulo akí, lo bo wak kon pa imitá Eunise i siña bo yunan ku bo palabranan i ku bo ehèmpel. Lo bo mira tambe kon Yehova lo yuda bo.

6. Manera nos ta mira na 2 Timoteo 3:14 i 15, kon Timoteo a logra bira un kristian?

⁶ For di tempu Timoteo tabata mucha su mama a hasi esfuerso pa siñ’é “e skrituranan santu” segun e komprondementu ku e hudiunan tabatin. Klaru ku Eunise su konosementu tabata limitá pasó e no tabata sa nada tokante di Hesukristu. Asina mes, loke el a siña Timoteo tabata sufisiente pa yud’é bira un kristian. Pero lo el a bira un kristian? Timoteo tabatin edat pa disidí pa su mes si lo el a bira un kristian. Ta bisto ku el a keda konvensí di e bèrdat tokante Hesus. Anto esei, en parte, ta danki na su mama. (Lesa 2 Timoteo 3:14, 15.) Bo por imaginá bo kon kontentu Eunise a sintié ku el a logra siña su yu tokante Yehova i Hesus! Di bèrdat bèrdat Eunise a duna onor na su nòmber, ku ta bini di un palabra ku ta nifiká “vense.”

7. Kon Eunise a yuda su yu progresá despues di su boutismo?

⁷ Timoteo a tuma e paso importante di batisá. Pero Eunise su preokupashonnan no a kaba ei. Kon lo para ku su yu? Lo el a skohe amigu ku lo tin mal influensia riba dje? Lo el a skohe pa bai skol na Aténas i aseptá e siñansanan pagano di e filósofonan einan? Lo el a gasta su tempu, energia i hubentut koriendo tras di rikesa? Eunise no por a disidí pa Timoteo, pero e por a yud’é sí. Kon? Loke e por a hasi ta di sigui hasi esfuerso pa siñ’é haña amor pa Yehova i apresio pa tur loke Hesus a hasi pa nan famia. Pero e reto di siña un yu stima Yehova no ta bini solamente den famia kaminda un mayor so ta den e bèrdat. Asta famia ku tin tur dos mayor den e bèrdat ta haña nan ku e reto ei. Kiko mayornan por siña for di Eunise?

8. Kon un mama por yuda su esposo ku ta den e bèrdat pa siña nan yunan tokante Yehova?

⁸ Studia Beibel ku bo yunan. Si bo esposo ta den e bèrdat, Yehova ke pa bo yud’é siña boso yunan tokante djE.  Un manera ku bo por hasi esei ta di apoyá boso Adorashon Komo Famia tur siman. Papia bon tokante e areglo ei, i pensa kon bo por krea un ambiente trankil i dushi. Kisas bo por yuda bo esposo plania proyektonan spesial ku boso por hasi durante Adorashon Komo Famia. Ademas, si un di e yunan ta grandi sufisiente pa haña estudio for di e buki Bo Por Disfrutá di Bida pa Semper!, apoyá bo esposo den esei.

9. Ki yudansa tin pa un mama ku no tin un kasá den e bèrdat?

⁹ Pero kiko si un mama ta esun ku mester studia ku su yunan pasobra sea e no ta kasá òf su kasá no ta den e bèrdat? Si esei ta bo kaso, no wòri. No tin nodi di ansha. Yehova ta bai yuda bo. El a perkurá mediante di su organisashon hopi material ku bo por usa pa studia ku bo yunan. Tambe, bo por papia ku otro mayornan ku tin éksito usando e kosnan ei durante nan Adorashon Komo Famia. * (Pro. 11:14) Ademas, pidi Yehova yuda bo komuniká mihó ku bo yunan. Pidié yuda bo saka afó kiko tin den nan mente i kurason. (Pro. 20:5) Tin biaha, djis un simpel pregunta manera: ‘Kiko ta e kos di mas difísil ku bo ta haña bo kuné na skol?’ por habri kaminda pa un bon kòmbersashon.

10. Kiko mas bo por hasi pa siña bo yunan tokante Yehova?

¹⁰ Buska oportunidat pa papia ku bo yunan tokante Yehova. Laga nan mira e klase di persona ku Yehova ta i konta nan tur e bon kosnan ku el a hasi pa bo. (Deu. 6:6, 7; Isa. 63:7) Esei ta bira mas importante ainda si bo no por studia regularmente na kas ku bo yunan. Christine, menshoná na paragraf 4, a bisa: “Kasi mi no tabatin oportunidat pa papia ku mi yunan tokante Yehova. P’esei mi no tabata laga niun chèns pasa mi forbei. Por ehèmpel, ora nos tabata bai kana òf bai rema den kanoa, mi tabata probechá pa papia tokante Yehova su bunita kreashon i tokante otro kosnan spiritual. Asina ku nan a bira sufisiente grandi, mi tabata animá nan pa studia Beibel riba nan mes.” Ta importante tambe pa bo papia bon di Yehova su organisashon i di bo rumannan. No kritiká e ansianonan. Loke bo bisa tokante nan lo determiná si bo yunan lo aserká nan ora nan tin mester di yudansa.

11. Segun Santiago 3:18, dikon ta importante pa krea un ambiente di pas na kas?

¹¹ Krea un ambiente di pas. Hasié bo kustumber pa bisa bo esposo i bo yunan kuantu bo ta stima nan. Papia bon di bo esposo, mustra ku bo tin rèspèt p’e i yuda bo yunan hasi meskos. Di e manera ei, lo bo krea un ambiente di pas i lo ta mas fásil pa bo yunan siña tokante Yehova. (Lesa Santiago 3:18.) Wak kiko a pasa ku Jozsef, un pionero spesial na Rumania. Ora e tabata mas chikitu, su tata tabata masha kontra pa e, su mama i rumannan sirbi Yehova. Jozsef a konta: “Mi mama a hasi hopi esfuerso pa tene pas den kas. Mas strèng mi tata a bira, mas amabel mi mama a  bira. Anto asina ku Mama ripará ku nos tabatin difikultat pa respetá i obedesé Tata, e tabata analisá Efesionan 6:1-3 ku nos. Djei, e tabata menshoná Tata su bon kualidatnan i tabata yuda nos mira pakiko nos tin ku stim’é.”

12. Segun 2 Timoteo 1:5, ki efekto Eunise su ehèmpel tabatin riba Timoteo?

¹² Lesa 2 Timoteo 1:5. Eunise a pone un bon ehèmpel pa Timoteo. Siguramente, el a siñ’é ku berdadero fe ta kompañá ku obra. (Sant. 2:26) Sin duda, Timoteo a mira for di e kosnan ku su mama tabata hasi, ku e tabata stima Yehova masha hopi mes. Tambe, e por a mira ku su mama tabata hopi felis sirbiendo Yehova. Ki efekto Eunise su ehèmpel tabatin riba Timoteo? Manera Apòstel Pablo a menshoná, Timoteo tabatin un fe fuerte meskos ku esun di su mama. Anto no ta pa kasualidat su fe tabata fuerte. El a mira e bunita ehèmpel di su mama i a hasi esfuerso pa imit’é. Di mes manera, hopi mama awe a logra yuda nan yunan sirbi Yehova “sin papia ni un pia di palabra.” (1 Ped. 3:1, 2) I abo por hasi meskos. Kon asina?    

13. Dikon un mama mester pone su amistat ku Yehova na promé lugá?

¹³ Pone bo amistat ku Yehova na promé lugá. (Deu. 6:5, 6) Meskos ku hopi mama, bo ta dispuesto na sakrifiká tempu, plaka, soño i otro kos pa e bienestar di bo muchanan. Pero nunka bo mester ta asina drùk ku bo no tin tempu pa fortalesé bo amistat ku Yehova. P’esei, saka tempu pa bo hasi orashon na Yehova, pa estudio personal i pa bo reunionnan. Asina ei bo ta fortalesé bo amistat ku Yehova i lo bo ta un bon ehèmpel pa bo famia i pa otro hende.

14-15. Konta kiko bo ta siña for di e eksperensia di Leanne, Maria i João.

¹⁴ Hopi hóben a siña stima i konfia Yehova danki na e ehèmpel di nan mama. Leanne, yu muhé di Christine, a bisa: “Nos no por a studia ora mi tata tabata na kas. Pero nunka mama tabata falta su reunionnan. Aunke nos no tabata sa hopi kos tokante Beibel, mama su ehèmpel i determinashon a yuda nos pa nos tin un fe fuerte. Nos tabata konvensí ku esaki tabata e bèrdat hopi tempu promé ku nos a bai reunion.”

¹⁵ Den e kaso di Maria, su tata tabata grita, zundra i bati nan tur pasó nan tabata bai reunion. El a bisa: “N’ami konta bo algu di mi mama. E ta un di e hende muhénan ku mas kurashi ku mi konosé! Tin biaha na mucha, mi no tabata ke hasi sierto kos pasobra mi tabatin miedu di kiko otro hende lo a bisa. Pero mi a vense esei ora mi a mira mama su kurashi i kon semper el a pone Yehova na promé lugá den su bida.” João su tata a prohibí nan di papia tokante Yehova i Beibel na kas. João a konta: “Tabata hopi bunita pa mira kon dispuesto mi mama tabata pa sakrifiká kasi tur kos pa hasi mi tata felis. Ku eksepshon di su amor pa Yehova.”

16. Ki efekto un mama su ehèmpel por tin riba otro hende?

¹⁶ Mamanan, kòrda ku boso ehèmpel tin efekto riba otro hende. Kon asina? Wèl, pensa riba e efekto ku e ehèmpel di Eunise tabatin riba Apòstel Pablo. El a  skirbi ku Timoteo su fe sin hipokresia “a biba promé den . . . Eunise.” (2 Tim. 1:5) Probablemente ta durante Pablo su promé biahe komo misionero, el a topa Loida i Eunise na Listra. Kisas ta e mes a yuda nan bira kristian. (Echo. 14:4-18) Pensa riba esaki: Un 15 aña despues, ora ku Pablo a skirbi su promé karta pa Timoteo, ainda e tabata kòrda e fe ku Eunise a demostrá i tambe su ehèmpel. Ta bisto ku Eunise su ehèmpel a laga un bon impreshon riba Pablo i probablemente riba otro kristiannan tambe. Si bo ta lanta bo yu bo so òf bo kasá no ta den e bèrdat, sea sigur ku bo ehèmpel di fieldat ta fortalesé i animá esnan rònt di bo.

17. Kiko bo tin ku hasi si ta parse ku apesar di tur bo esfuersonan, bo yu no ke sirbi Yehova?

¹⁷ Kiko si ta parse ku apesar di tur bo esfuersonan, bo yu no ke sirbi Yehova? Kòrda ku no ta djawe pa mañan un yu ta ser entrená. Manera bo ta mira riba e plachi, ora bo planta un simia, bo no sa sigur sigur si e mata ku sali lo pari fruta òf nò. Aunke no ta dependé di bo si e mata ta bai pari fruta, tòg bo ta sigui dun’é awa pa e tin mihó chèns pa krese. (Mar. 4:26-29) Di mes manera, komo mama, tin biaha bo ta puntra bo mes si tur e esfuersonan ku bo ta hasi lo yuda bo yu stima Yehova. Ta bèrdat ku bo no por disidí pa bo yunan. Pero, si bo sigui hasi tur loke bo por pa train nan, nan lo  tin e mihó chèns pa bira amigu di Yehova.—Pro. 22:6.

18. Kon Yehova por yuda bo yunan bira su amigu?

¹⁸ For di den tempu di Beibel, Yehova a yuda masha hopi hóben bira su amigu. (Sal. 22:9, 10) Pues, lo e yuda bo yunan tambe bira su amigu si ta esei ta loke nan ke. (1 Kor. 3:6, 7) Asta si ta parse ku bo yunan ta desviá, no wòri. Yehova lo sigui tira bista riba nan pasobra e ta stima nan. (Sal. 11:4) Asina ku nan djis mustra, pa kon chikitu ku esei por parse di ta, ku awor nan ta dispuesto pa aseptá e bèrdat, Yehova lo ta kla pa yuda nan bira su amigu. (Echo. 13:48; 2 Kró. 16:9) Yehova por yuda bo bisa nèt e kos korekto na e momento ku bo yunan mester di dje. (Pro. 15:23) Òf, Yehova por usa un ruman den kongregashon pa mustra interes den nan. I asta ora nan bira grandi, Yehova por yuda nan kòrda algu ku nan a siña den pasado. (Huan 14:26) Ora bo sigui hasi bo esfuerso pa siña bo yunan ku bo palabranan i bo ehèmpel, bo por tin sigur ku Yehova lo bendishoná bo.

19. Dikon bo por tin sigur ku bo tin Yehova su aprobashon?

¹⁹ Yehova ta stima bo pasobra abo ta stim’é. Su amor pa bo no ta mará na e echo ku bo yunan ta sirbié òf nò. Si bo ta un mama soltero, Yehova ta bai ta un Tata pa bo yunan i un Protektor pa bo. (Sal. 68:5) Ta bèrdat ku bo no por disidí si bo yunan ta bai sirbi Yehova òf nò. Pero, si bo sigui dependé riba e yudansa di Yehova i hasi tur bo esfuerso, sigur sigur lo bo tin su aprobashon.