1-2. (a) Ngtecha Eunice, e ngera el omelsemai a ble lechelebangel er ngii? (b) Mosaod er a siasing er a medal tia el babier.

 ME ALTA Biblia diak losaod er a Timothy er a bo lemetecholb engdi ngsebeched el melatk er a deurreng el lulebang a delal er a Eunice er sel sils. (Osi. 23:25) Ka di molatk er ngii el lomes er a Timothy el dechor er a ralm. Ngklikmechur e a delal er a Lois a dechor er bita er ngii. A Eunice a ta el lotuu a telil e ngmoduleb er a ralm a Timothy. E sola me duum el kmal klou a smelel, e a delal a mocha merael a iuechel a medal. A Eunice a mle sebechel mekurulii a Timothy el mo betik a rengul er a Jehovah me a Ngelekel er a Jesus Kristus alta ngkmal mle meringel. Ngera el ringel a ble lechelebangel er a loruul er tiang?

² A Timothy a mlukeroul er a delengchokl el kakerous a klechelid er ngii. A demal a mle chad er a Gris e a delal me a delal mechas a chad er a Judea. (Rel. 16:1) A Timothy a locha mle ngeasek er sel taem el Eunice me a Lois a mlo Kristiano. Me nguaisei engdi a demal a dimlak bo el Kristiano. Me a Timothy ngmo mekerang? Nglocha mla mo klou me ngsebechel el di ngii el melilt a bo loruul. Ngmo ngiltii a klechelid er a demal? Ngmo oltirakl a siukang er a Rechijudea el lemlukeroul lolab? Me a lechub e ngmo ta er a rultirakl er a Jesus Kristus?

3. A doltirakl er a Osisechakl 1:8, 9, e ngua ngera osengel a Jehovah el kirel aike el loruul a rechedil el ngosuterir a rengelekir el mo sechelil?

³ A Rekristiano el chedil er chelecha el taem me te dirrek el kmal betik a rengrir er a telungalek er tir. A ngaruchei er ngii, ngsorir el ngosuterir a rengelekir el mo er ngii a kmes el klausechelei  er tir me a Jehovah. A Dios er kid a kmal mengreos er a blakerreng er tir el meruul er tiang. (Monguiu er a Osisechakl 1:8, 9.) Ngmla omekrael er a rebetok el chedil el mo ngosuterir a rengelekir el mo kongei er a klemerang.

4. Ngera el omelsemai a lechelebangel a rechedil er chelecha el taem?

⁴ Nguaisei el chedil a locha mo melatk a lebebil er a taem el kmo a rengelekel te mo melilt el mo mesiou er a Jehovah el ua Timothy me a lechub e ngdiak. A ruungalek a medengei a orimel el lechelebangel a rengelekir el ngar tia el beluulechad er a Satan. (1 Pe. 5:8) Me a lmuut el tang, a rebetok el chedil a diak a rebecherir me a lechub a rebecherir a diak losiou er a Jehovah e kirir el omekeroul er a rengelekir. El ua tiang, a odos el Christine * a kmo: “A bechik a kmal mle ungil chedam e betik a rengul er a telungalek er kemam engdi ngdimlak el soal a kumekeroul er a rengelekam el mo mesiou er a Jehovah. Ngmle betok el taem el di klangel el melatk el kmo te mekera rengelekek e mo mesiou er a Jehovah.”

5. Ngera kede mo mesaod er tia el suobel?

⁵ A lsekum ke Kristiano el chedil, e ngsebechem el mo ua Eunice e ngosuterir a rengelekem el mo mesiou er a Jehovah. Ngar tia el suobel e kede mo mesaod a rolel e ngsebechem el oukerebai er ngii sel molisechakl er a rengelekem loeak a tekingem me a omerellem. Kede dirrek el mo omes er a rolel e a Jehovah mo ngosukau.

6. Ngmilekera Timothy e mlo Kristiano el ua losaod a 2 Timothy 3:14, 15?

⁶ A Timothy er a lekekerei e a delal a mlora tkurrebab el sebechel el osisecheklii er a “Chedaol Llechukl” el oltirakl er a klemedengei er a Rechijudea. Nguaisei el delal a dimlak a kmal klemedengei er ngii le ngdimlak lodengelii a Jesus Kristus. Engdi aike el lullisechakl er a Timothy a milsang a ungil omekedecheraol el mo kongei er a Klekristiano. Engdi ngmo meruul uaisei? A Timothy a mle kekerei el chad me ngmle sebechel el melilt el kmo ngmo Kristiano. Ngulterekokl a Timothy el mlo “oumerang” er a klemerang el kirel a Jesus e le delal a ngilsuir. (Monguiu er a 2 Timothy 3:14, 15.) A Eunice a ulterekokl el kmal mle dmeu a rengul e le ngmle sebechel el osisecheklii a ngelekel el kirel a Jehovah alta ngmle meringel. Ngkmal ultutii a ngklel el mengai er a tekoi el belkul a kmo “mo mesisiich.”

7. Ngera mle sebechel a Eunice el meruul er ngii el ngosuir a ngelekel el olengeriakl er a uriul er a techolb?

⁷ A techolb a mle klou a ultutelel el bakes er a klengar er a Timothy me nguaisei engdi a Eunice a dirk mla er ngii a lebekikl el kirel. Ngera ngmo meruul er ngii a ngelekel er a klengar er ngii? Ngmo teloi a mekngit el klausechelei? Ngmora skuul er a Athens e mo kongei a osisecheklir a rechellimosk el chad er isei? Ngmo ousbech a temel, klisichel, me a klengeasek er ngii el oltoir a tekoi er a kerruul? A Eunice a dimlak el sebechel melilt el kirel a Timothy engdi ngsebechel el ngosuir. Ngoeak a ngera el rolel? Ngmle sebechel melemolem el dolemii er a rengul a ngelekel a dmolech el bltikerreng el mora Jehovah me a omereng el saul el kirel a Jesus. Chouaika el omelsemai a diak di lechelebangel a telungalek el kakerous a klechelid er ngii. Ngmo lmuut me a lsekum a ruungalek a ngar er a klemerang me ngdirrek el meringel er tir a ngosuterir a rengelekir el mo mesiou er a Jehovah. Ngera sebechir a ruungalek el suubii er a Eunice?

8. Ngmekera chedil e ngosuir a bechil el omekerreu er a tekoi er a klereng er a rengelekir?

 ⁸ Mosuub a Biblia lobengterir a rengelekem. Rudos, a lsekum a rebechemiu a ngar er a klemerang, e a Jehovah a soal omngesuterir el omekerreu er a tekoi er a klereng er a rengelekiu. A ta er a rolel e ngsebechiu el meruul er tiang a oeak sel bo blechoel support er a temel a Omengull el Telungalek. Bo lungil a tekingem el kirel e molatk aike el sebechem el remuul me ngmo sebechiu el oldeu a rengmiu er ngii. Alta ngsebechem el ngosuir a bechim el mdesuii a project er a omesubel a Biblia. Me a lmuut el tang, a lsekum a rengelekiu a mo ngmai a klungiolir er a omesubir er a Biblia lousbech er a Enjoy Life Forever! el babier, e nglocha sebechem el oureor el obengkel a bechim el kutmeklii tiang.

9. A chedil el bechil a diak el ngar er a klemerang ngsebechel el ngmai a ngeso er ker?

⁹ A rebebil chedil a kirir el mesuub a Biblia el obengterir a rengelekir e le te mesobil me a lechub e a becherir a diak el ngar er a klemerang. A lsekum tia melutk er kau, e lak bo el sebek a rengum. A Jehovah a mo ngosukau. Mousbech aike el dongu el kirel a osisechakl el bla leketmokl a cheldebechelel el mo mesuub el obengterir a rengelekem. Ngdirrek el sebechem el olengit a ngeso er a remeketeketang loungalek er a rolel a lousbech aika el dongu er a temel a omengull el telungalek er tir. * (Osi. 11:14) Ngsebechem el meluluuch el mora Jehovah e olengit er ngii me lengesukau el ousbech a ungil ker el mo medengei aike el mera el ngar er a uldesuir me a rengrir. (Osi. 20:5) A ker el ua ‘Ngera kot el klou el omelsemai el omchelebangel er ngii er a skuul?’ a kmal klou a sebechel rullii.

10. Ngera dirrek el sebechem el meruul er ngii el olisechakl er a rengelekem el kirel a Jehovah?

¹⁰ Mosiik a techall el osisecheklterir a rengelekem el kirel a Jehovah. Mouchais el kirel a Jehovah me aike el betok el ungil tekoi el bla leruul el kirem. (Dut. 6:6, 7; Isa. 63:7) Tiang a ileakl el klou a ultutelel a lsekum e ngdiak el sebechem el blechoel mesuub lobengterir a rengelekem sel omngar er a blai. A Christine el dulsaod er ngii er a uchei a kmo: “Ngdimlak a kmal techellek el mesaod a tekoi er a klereng lobengterir a rengelekek me ak kuluusbech a bek el techall el ngar ngii. Sel ki mdak el merael me a lechub e ki mngar er a canoe el melikes el mo er cheroid e aki mesaod el kirel a klebokel el blebelel a Jehovah me a betok el tekoi er a klereng. Me sera bo lemeklou e ak millisiich er tir el di mo tir el mesuub er a Biblia.” Me a lmuut el tang, bo lungil a tekingem el kirel a cheldebechelel a Jehovah me a rudam me a rudos. Lak molaes er a remechuodel. A rolel omosaod er tir a mo oterekeklii el kmo a rengelekem te mo olengit a ngeso er tir me a lechub e ngdiak.

11. Ngera uchul me ngklou a ultutelel a doleketek a budech er a blid el ua lolekoi a Jakobus 3:18?

¹¹ Moleketek a budech er a blimiu. Bo blechoel louchais er a bechim me a rengelekem el kmo ngbetik a rengum er tir. Moba delemedemek me a omengull el mengedecheduch er a bechim, e mosisecheklterir a rengelekem el mo meruul uaisei. Sel moruul er tiang, e ngmo beot er a rengelekem a mesuub el kirel a Jehovah. (Monguiu er a Jakobus 3:18.) Molatk er a Jozsef el mesiou el special pioneer er a Romania. Sera lekekerei el mo klou e a demal a rirellii el kmal mo meringel er ngii me a delal me a rebebil er ngii el mesiou er a Jehovah. Ngmelekoi el kmo: “A delak a mlora tkurrebab  el sebechel el rullii a blimam el mo er ngii a budech er ngii. Me sel lesal mo mekngit a blekerdelel a demak, e a delak a mengal mo ungil a blekerdelel. Sera lesa el kmo ngmeringel er kemam a mengull e olengesenges er a demmam e ngmilsaod er a Efesus 6:1-3 el obengkemam. Ngmilsaod a ungil blekerdelel e ngilsukemam el mo medengelii a uchul me ngkiram el mengull er ngii. Ngmle betok el taem el loruul er tiang el omudech er a delengcheklam.”

12. A kerebil a Eunice ngera ngrirellii er a Timothy el ua losaod a 2 Timothy 1:5?

¹² Monguiu er a 2 Timothy 1:5. A Eunice a mle ungil kerebai el kirel a Timothy. Ngulterekokl el ulsisecheklii el kmo a klaumerang a mocholt er a omeruul. (Jak. 2:26) Me a Timothy mle sebechel mesa el kmo a delal a mirruul a tekoi e le ngii el kmal mle betik a rengul er a Jehovah. Ngmilsa el kmo a delal a kmal mle dmeu a rengul el mesiou er a Jehovah. Me a kerebil a Eunice ngera ngrirellii el mora Timothy? Ngua lullekoi a Paulus, a Timothy a mle mesisiich a klaumerang er ngii el di ua delal. E tia dimlak di lengii el duubech. A Timothy a ulemes er a delal e mlo soal oukerebai er ngii. Me ngdi osisiu, a rebetok el chedil a di ‘diak a ngeral lolekoi’ e mla ngosuterir a rechedal a telungalek er tir el mo mesiou er a Jehovah. (1 Pe. 3:1, 2) Kau me ngsebechem el meruul uaisei. Ngoeak a ngera el rolel?

13. Ngera uchul me a chedil a kirel rullii a deleuill er ngii me a Jehovah el mo kot el klou a ultutelel?

¹³ Mrellii a deleuill er kau me a Jehovah el mo kot el klou a ultutelel. (Dut. 6:5, 6) Kau a di ua rebek el chedil el betok a kirem el mengoit. Ke mengoit a taem, udoud, me a lmuut el bebil er a tekoi e diak bo mungil mechiuaiu e le ke omekerreu aike el lousbech a rengelekem. Me nguaisei engdi ngdiak el kirem el kmal mo mechesang er aika el tekoi me ngmo diak a temem el olekeed er kau er a Jehovah. Bo lengar ngii a temem el meluluuch, mesuub er a Biblia el di kau el tang, e ngar er a miting. Sel moruul uaisei, e ke smisichii a deleuill er kau me a Jehovah e kutmeklii a ungil kerebai el kirel a telungalek er kau me a rebebil.

14-15. Ngera ke suubii er a Leanne, Maria, me a João?

¹⁴ Molatk er a rebebil mekekerei el chad el siluubii el mo betik a rengrir er a Jehovah e oumerang er ngii loeak sel lomes er a rederrir. A ngelekel a Christine el Leanne a kmo: “Ngdimlak el sebecham el mesuub sel lengar er a blai a demak. Engdi delak a dimlak a ta el longoit a miting. Me alta ngdimlak ki modengei a betok el kirel a Biblia, engdi a omerellel a ngilsukemam el mo er ngii a mesisiich el klaumerang er kemam. Me a uchei er a ki momais el ngar er a miting, e kemam a mla mo medengei el kmo a Resioning er a Jehovah a olisechakl er a klemerang.”

¹⁵ A Maria el demal a lebebil e ngmle meringel lomtok er tir e le te mlora miting a kmo: “A delak a ta er a kot el bekeu el odos el kudengelii. Sera kkekerei, e a lebebil e ngdimlak kurruul a tekoi e le ak mle bekikl a uldesuir a rechad. Engdi sel kumes er a blekengel a delak me ngii el blechoel el nguu a Jehovah el mo kot e tia ngilsukak el mo diak kmedakt er a rechad.” A João el demal a milerrob er tir me lak losaod a tekoi er a klereng er a blai a kmo: “Sel kot el riretechii a renguk a sel blekerdelel a delak el alta ngkilengei el chemoit a rokui el tekoi el mo odeuir a rengul a demak, engdi ngkmal dimlak lekengei el choitii a Jehovah.”

16. Ngera ngsebechel rullii a kerebai er a rechedil?

¹⁶ Rechedil, lak mobes el kmo a kerebai er kau a ngar ngii a lerellii er a rebebil. Ngoeak  a ngera el rolel? Molatk er a kerebil a Eunice el mla er ngii a lerellii er a apostol Paulus. Ngika miltebengii el kmo a klaumerang er a Timothy el dimlak a klsuul er ngii a ‘di ua ia . . . delal er a Eunice.’ (2 Ti. 1:5) A Paulus ngmlo medengelii a klaumerang er a Eunice er oingerang? Sera kot el omerollel el missionari e nglocha mlo medengelii a Lois me a Eunice er a Listra, e ngii a locha ngilsuterir el mo Kristiano. (Rel. 14:4-18) Momtab er tiang, a Paulus er sera loluches el mora Timothy er a bekord el 15 el rak er uriul, e ngdirk millatk er a blakerreng er a Eunice e uluusbech er ngii el kerebai el kired el oltirakl er ngii. A kerebai er ngii a kmal millisiich er a apostol me a dirrek el locha betok el Kristiano er sel taem. Me a lsekum ke omekeroul er a rengelekem el di kau el tang me a lechub a bechim a diak el ngar er a klemerang, e bo lulterekokl a rengum el kmo a blakerreng er kau a kmal melisiich er tirke el iliuekl er kau.

17. Ke mo mekerang a lsekum a ngelekem a kora diak loltirakl a tekoi el molisechakl?

¹⁷ Engdi ngkuk mekerang a lsekum a ngelekem a kora diak loltirakl a tekoi el molisechakl? Lak mobes el kmo ngousbech a taem el olisechakl er a ngalek. Ngua domes er ngii er a siasing, sel mdelmii a tane e a lebebil e ke mo melatk el kmo tia ngmukeroul el mo kerrekar lourodech me a lechub e ngdiak. Me alta ngdiak modengei, engdi ke di melemolem el melubs er ngii el msa techellel el mukeroul. (Mk. 4:26-29) Me ngdi osisiu, kau el chedil a lebebil e ke mo melatk el kmo a tekoi el moruul ngmo ngosuir a ngelekem el mo  betik a rengul er a Jehovah me a lechub e ngdiak. Ngdiak a klisichem er aike el bo loruul a ngelekem. Me nguaisei engdi omolemolem el meruul aike el rokui el sebechem el osisecheklii, e ke msang a kot el ungil techall el mukeroul er a tekoi er a klereng.​—Osi. 22:6.

18. Ngmekera Jehovah e ngosuterir a rengelekem el mukeroul er a klereng?

¹⁸ Sera taem er a Biblia el mei er chelechang e a Jehovah mla ngosuterir a rebetok el ngeasek el mo sechelil. (Psa. 22:9, 10) Ngsebechel ngosuterir a rengelekem el mukeroul er a klereng a lsekum e ngsorir. (1 Ko. 3:6, 7) Ngmo lmuut me a lsekum te kora ua bo el cheroid er a Jehovah, engdi ngii a melemolem el oubltikerreng el mo er tir. (Psa. 11:4) Me sel lochotii el kmo ngdirk sorir el odeuir a rengul, e a Jehovah a kltmokl el ngosuterir el mo sechelil. (Rel. 13:48, NW; 2 Kr. 16:9) Ngsebechel ngosukau el mo dulii a ungil tekoi er a ungil taem el lousbech a rengelekem el rongesii. (Osi. 15:23) Me a lechub e ngsebechel odbechii a ta er a odam me a lechub e ngodos el mo olecholt a klemeriarreng er tir. Ngmo lmuut me a bla bo lemeklou a rengelekem me a Jehovah sebechel lomeklatk er tir er a tekoi el mulsisecheklterir. (Jn. 14:26) Me sel molemolem el olisechakl er a rengelekem loeak a tekingem me a omerellem, e a Jehovah mo omekngeltengat er kau.

19. Ngera uchul me ngsebechel mo ulterekokl a rengum el kmo ke oba kengei er a Jehovah?

¹⁹ A bltkil a rengul a Jehovah el kirem a diak lultuil er a omelilt el loruul a rengelekem. Ngbetik a rengul er kau e le kau el betik a rengum er ngii. A lsekum ke mesobil el chedil, e a Jehovah tibir el kmo ngmo Demerir a rengelekem e mo Osebecheklem. (Psa. 68:5) Ngdiak a klisichem er a omelilt el bo loruul a rengelekem. Engdi a omolemolem el ultuil er a ngeso el lomeskau a Jehovah e moruul er sel kot el sebechem, e ke nguu a kengei er ngii.