مطالعے دا مضمون نمبر 17
ماؤں—یُونیکے دی مثال توں سکھو
اپنی ماں دی تلیم نُوں نہ بُھلیں کیونکہ اوہ تیرے سر لئی سوہنا تاج تے تیرے گلے لئی گہنا اے۔—امثال 1:8، 9۔
گیت نمبر 137: وفادار عورتاں دی ودھیا مثال
مضمون تے اِک نظر a
تیمُتھیُس دی ماں یُونیکے تے نانی لوئس، تیمُتھیُس نُوں بپتسمہ لیندے ہوئے ویکھ کے بڑیاں خوش ہو رہیاں نیں۔ (پیراگراف نمبر 1 نُوں ویکھو۔)
1، 2. (الف) یُونیکے کون سی تے اوہنوں کیہڑی مشکل دا سامنا کرنا پیا؟ (ب) پہلے صفحے دی تصویر تے گل کرو۔
بائبل چ تیمُتھیُس دے بپتسمے بارے کجھ نئیں دَسیا گیا پر اَسی سوچ سکنے آں کہ جیس دن اوہدا بپتسمہ ہویا ہوئے گا تے اوہدی ماں یُونیکے کِنّی خوش ہوئی ہوئے گی! (امثال 23:25) ذرا ایس منظر بارے سوچو: تیمُتھیُس بپتسمہ لین لئی پانی چ کھلوتا اے۔ یُونیکے نُوں اپنے پُتر تے بڑا مان اے، اوہدیاں اَکھاں خوشی نال چمک رہیاں نیں۔ اوہ مسکرا رہی اے تے اوہدے کول ای تیمُتھیُس دی نانی لوئس کھلوتی اے۔ جیویں ای تیمُتھیُس پانی چ ڈُبکی لیندا اے، یُونیکے خوشی نال اپنی ماں دا ہتھ پھڑ لیندی اے۔ فیر تیمُتھیُس پانی چوں باہر نکل دا اے۔اوہدے چہرے تے خوشی ای خوشی اے تے یُونیکے دِیاں اَکھاں چ خوشی دے مارے اتھرو آ گئے نیں۔ یُونیکے نے اپنے پُتر نُوں یہوواہ خدا تے یسوع بارے سکھان لئی جیہڑی محنت کیتی اوہ رنگ لے آئی۔ پر اوہدے لئی ایتھے تک پونچنا اسان نئیں سی۔ اوہنوں کجھ مشکلاں دا سامنا وی کرنا پیا۔ ایہہ کیہڑیاں مشکلاں سن؟
2 تیمُتھیُس دے ماں پیو دا مذہب فرق فرق سی۔ اوہدا پیو یونانی سی تے اوہدی ماں تے نانی یہودی سن۔ (اعمال 16:1) شاید تیمُتھیُس اوہدوں جوان ای سی جدوں یُونیکے تے لوئس مسیحی بنیاں۔ پر تیمُتھیُس دا پیو مسیح دا شاگرد نئیں بنیا۔ تیمُتھیُس کیس مذہب نُوں اپناندا؟ لگدا اے کہ اوہ آپ ایہہ فیصلہ کرن جوگا ہو گیا سی کہ اوہ کیس مذہب دا حصہ بنے گا۔ کیہہ اوہ اپنے پیو دا مذہب چُنے گا؟یاں کیہہ اوہ اوہناں یہودی رویتاں مطابق اپنی زندگی گزارے گا جنہاں بارے اوہنے بچپن توں سکھیا سی؟ یاں فیر کیہہ اوہ یسوع دا شاگرد بنے گا؟
3. امثال 1:8، 9 دے مطابق ماواں یہوواہ دے دوست بنن چ اپنے بچیاں دی مدد کرن لئی جیہڑی محنت کردیاں نیں، اوہدے بارے یہوواہ کیہہ سوچدا اے؟
3 یُونیکے وانگوں اَج وی یہوواہ دی عبادت کرن والیاں ماواں اپنے گھر والیاں نُوں بوہت پیار کردیاں نیں۔ اوہناں لئی سب توں اہم ایہہ ہوندا اے کہ اوہناں دے بچے یہوواہ دے سچے دوست بنن تے اِنج کرن لئی اوہ جیہڑی محنت کردیاں نیں، یہوواہ اوہدی بڑی قدر کردا اے۔ (امثال 1:8، 9 نُوں پڑھو۔) یہوواہ نے بوہت ساریاں ماواں دی مدد کیتی اے تاکہ اوہ اپنے بچیاں نُوں یہوواہ نال محبت کرنا تے اوہدی عبادت کرنا سکھا سکن۔
4. اَج ماواں نُوں کیہڑیاں مشکلاں دا سامنا کرنا پیندا اے؟
4 کدی کدی شاید کسے ماں دے دل چ ایہہ خیال آئے: ”پتہ نئیں میرا بچہ تیمُتھیُس وانگوں یہوواہ دی عبادت کرن دا فیصلہ کرے گا یاں نئیں؟“ اِنج سوچنا حیرانی دی گل نئیں اے کیونکہ ماں پیو نُوں پتہ ہوندا اے کہ بچیاں نُوں شیطان دی ایس بُری دُنیا چ کِنّیاں مشکلاں دا سامنا کرنا پیندا اے۔ (1-پطرس 5:8) کجھ ماواں لئی اِک مشکل ایہہ وی ہوندی اے کہ اوہ کلّے اپنے بچیاں نُوں پال رہیاں ہوندیاں نیں تے یہوواہ بارے سکھا رہیاں ہوندیاں نیں۔ ایہدی وجہ ایہہ ہو سکدی اے کہ اوہناں دا شوہر یاں تے اوہناں نُوں چھڈ کے چلا گیا ہوندا اے یاں فیر یہوواہ دی عبادت نئیں کردا۔ مثال لئی، کرسٹین b ناں دی اِک بھین کہندی اے: ”میرا شوہر مینوں تے بچیاں نُوں بڑا پیار کردا سی۔ پر اوہ ایس گل تے بالکل راضی نئیں سی کہ ساڈے بچے یہوواہ دے گواہ بنن۔ میں ایہہ سوچ سوچ کے بڑا رونی ساں کہ پتہ نئیں میرے بچے یہوواہ دی عبادت کرن گے یاں نئیں۔“
5. ایس مضمون چ اَسی کیہڑیاں گلاں تے غور کراں گے؟
5 ماوؤ، جے تُسی یہوواہ دی عبادت کردیاں او تے ایس گل تے بھروسہ رکھو کہ تُسی وی یُونیکے وانگوں اپنے بچیاں دی مدد کر سکدیاں او تاکہ اوہ یہوواہ نال پیار کرن تے اوہدی عبادت کرن۔ ایس مضمون چ اَسی ویکھاں گے کہ یُونیکے وانگوں تُسی اپنیاں گلاں تے کماں توں اپنے بچیاں نُوں کیویں سکھا سکدیاں او۔ اَسی ایہہ وی ویکھاں گے کہ یہوواہ تواڈی مدد کیویں کرے گا۔
اپنیاں گلاں توں اپنے بچیاں نُوں سکھاؤ
6. 2-تیمُتھیُس 3:14، 15 دے مطابق تیمُتھیُس مسیحی کیویں بنیا؟
6 جدوں تیمُتھیُس چھوٹا سی تے اوہدی ماں نے اوہنوں پاک صحیفیاں بارے دَسیا تے اوہنوں یہودی مذہب دے مطابق ایہناں دی تلیم دِتی۔ بے شک اوہنوں ساریاں گلاں دا نئیں پتہ سی کیونکہ اوہ یسوع بارے کجھ وی نئیں جان دی سی پر ایہناں صحیفیاں دے ذریعے تیمُتھیُس چ اینی سمجھ ضرور آ گئی سی کہ اوہ یسوع نُوں مسیح دے طور تے قبول کر سکے۔ پر کیہہ اوہنے اِنج کیتا؟ اوہ ایناں وڈا ہو گیا سی کہ اوہ آپ ایہہ فیصلہ کر سکے کہ اوہ مسیح دا شاگرد بنے گا یاں نئیں۔ اوہنوں مسیح تے ایمان لئی لیان لئی قائل کیتا گیا تے بےشک ایہدے چ اوہدی ماں نے اوہدی بڑی مدد کیتی ہوئے گی۔ (2-تیمُتھیُس 3:14، 15 نُوں پڑھو۔) یقیناً یُونیکے ایس گل تے بڑی خوش ہوئی ہوئے گی کہ اوہ مشکلاں دے باوجود اپنے پُتر نُوں یہوواہ بارے سکھان چ کامیاب ہوئی اے۔ یُونیکے اپنے ناں تے پوری اُتری جیہڑا اِک ایہو جہے لفظ توں آیا اے جدا مطلب اے ”فتح۔“
7. یُونیکے نے تیمُتھیُس دی مدد کیویں کیتی ہوئے گی تاکہ اوہ بپتسمے توں بعد وی اِک چنگا مسیحی بنن لئی محنت کردا رہوے؟
7 بپتسمہ لے کے تیمُتھیُس نے اپنی زندگی دا بڑا ای اہم قدم چُکیا۔ پر یُونیکے دِیاں پریشانیاں اوتھے ای ختم نئیں ہوئیاں۔ شاید اوہدے ذہن چ ایہہ سوال آئے ہون: ”بپتسمہ لین توں بعد میرا پُتر اپنی زندگی کیویں گزارے گا؟ کِتے اوہ بُرے لوکاں نال ملنا جلنا تے نئیں شروع کردے گا؟ کیہہ اوہ تلیم حاصل کرن لئی شہر ایتھنز جائے گا، تے بُتاں دی پوجا کرن والے فلاسفراں دی تلیم نُوں قبول کر لے گا؟ کیہہ اوہ اپنا سارا وقت، طاقت تے جوانی امیر بنن چ لا دے گا؟“ تیمُتھیُس نے اپنے فیصلے آپ کرنے سن، پر یُونیکے چنگے فیصلے کرن چ اوہدی مدد ضرور کر سکدی سی۔ اوہ اِنج کیویں کر سکدی سی؟ سانوں یقین اے کہ اوہ تیمُتھیُس نُوں ایہہ سکھان لئی محنت کردی رہی کہ اوہ اپنی پوری زندگی یہوواہ نال محبت کرے تے اوہناں کماں لئی یہوواہ تے یسوع دا شکر کردا رہوے جیہڑے اوہنے اوہدے تے اوہدے گھر والیاں لئی کیتے نیں۔مشکلاں دا سامنا صرف اوس ماں یاں پیو نُوں ای نئیں کرنا پیندا جدا ساتھی یہوواہ دا گواہ نئیں اے۔ جیہڑ ے ماں تے پیو دونویں یہوواہ دی عبادت کردے نیں، اوہناں لئی وی یہوواہ دے قریب جان چ اپنے بچیاں دی مدد کرنا مشکل ہو سکدا اے۔ ایس بارے ماں پیو یُونیکے توں کیہہ سکھ سکدے نیں؟
8. جے میاں بیوی دونویں یہوواہ دے گواہ نیں تے بیوی اپنے بچیاں نُوں یہوواہ بارے سکھان چ اپنے شوہر دی مدد کیویں کر سکدی اے؟
8 اپنے بچیاں نُوں بائبل توں سکھاؤ۔ بھینو، جے تواڈا شوہر یہوواہ دا گواہ اے تے یہوواہ چاہندا اے کہ تُسی اپنے بچیاں نُوں اوہدے بارے اپنے شوہر نال مل کے سکھاؤ۔ اِنج کرن دا اِک طریقہ ایہہ وے کہ تُسی ہر ہفتے خاندانی عبادت کرن چ اپنے شوہر دا ساتھ دَوو۔ خاندانی عبادت بارے چنگیاں گلاں کرو تے سوچو کہ تُسی کیہہ کر سکدیاں او تاکہ خاندانی عبادت چ ساریاں نُوں مزہ آئے۔ شاید تُسی اپنے شوہر نال مل کے سوچ سکدیاں او کہ تُسی خاندانی عبادت نُوں خاص بنان لئی کیہہ کر سکدے او۔ ایہدے علاوہ جے تواڈا کوئی بچہ ایناں وڈا ہو گیا اے کہ اوہ کتاب ”خوشیاں بھری زندگی پاؤ—ہُن تے ہمیشاں تک“ چوں بائبل کورس کر سکدا اے تے اوہنوں بائبل کورس کران چ اپنے شوہر دی مدد کرو۔
9. اِک ایہو جہی بیوی کدے کولوں مدد لے سکدی اے جدا شوہر یہوواہ دا گواہ نئیں اے؟
9 کجھ ماواں نُوں آپ اپنے بچیاں نُوں بائبل چوں سکھانا پیندا اے کیونکہ یاں تے اوہ کلّے اپنے بچیاں دی پرورش کر رہیاں ہوندیاں نیں یاں فیر اوہناں دا شوہر یہوواہ دا گواہ نئیں ہوندا۔ جے تُسی وی اِنج دے حالاتاں دا سامنا کر رہے او تے حد توں زیادہ پریشان نہ ہووو، یہوواہ تواڈی مدد کرے گا۔ یہوواہ نے اپنی تنظیم دے ذریعے بچیاں نُوں تلیم دین لئی جیہڑیاں کتاباں تے ویڈیوز دِتیاں نیں، اوہناں نُوں چنگی طرحاں استمال کرو۔ تُسی دُوجے ماں پیو کولوں وی پچھ سکدیاں او کہ اوہ ایہناں کتاباں تے ویڈیوز نُوں خاندانی عبادت چ کیویں استمال کردے نیں۔ c (امثال 11:14) یہوواہ تواڈی ایہہ سمجھن چ وی مدد کر سکدا اے کہ تُسی اپنے بچیاں نال کسے موضوع تے چنگی طرحاں گل کیویں کر سکدیاں او۔ (امثال 20:5) تُسی اپنے بچیاں دی مدد کرن لئی اوہناں توں کوئی سادہ جیہا سوال پچھ کے وی گل شروع کر سکدیاں او جیویں کہ ”تینوں سکول چ کیہڑی مشکل دا سامنا کرنا پے رہیا اے؟“
10. تُسی ہور کیہڑے طریقے نال اپنے بچیاں نُوں یہوواہ بارے سکھا سکدیاں او؟
10 ایہو جہے طریقے لبھو جنہاں دے ذریعے تُسی اپنے بچیاں نُوں یہوواہ بارے سکھا سکدیاں او۔ اپنے بچیاں نال یہوواہ بارے تے اوہناں ساریاں نعمتاں بارے گل کرو جیہڑیاں اوہنے توانوں دِتیاں نیں۔ (اِستثنا 6:6، 7؛ یسعیاہ 63:7) اِنج کرنا اوس ویلے بڑا ضروری ہوندا اے جدوں توانوں اپنے بچیاں نال گھر چ باقاعدگی نال گل کرن دا موقع نئیں مل دا۔ بھین کرسٹین جدے بارے اَسی پہلاں وی گل کیتی، کہندی اے: ”مینوں اپنے بچیاں نال یہوواہ بارے گل کرن دا زیادہ وقت نئیں مِلدا سی۔ ایس لئی مینوں جدوں وی موقع مِلدا سی میں اوہناں نال یہوواہ بارے گل کرنی ساں۔ جدوں اَسی ٹُرنپھرن یاں کشتی چلان جانے ساں تے اَسی یہوواہ دِیاں بنائیاں ہوئیاں چیزاں تے ایہو جہیاں گلاں تے غور کرنے ساں جنہاں توں میرے بچے یہوواہ دے دوست بن سکن۔ جیویں ای میرے بچے تھوڑے وڈے ہوئے تے میں اوہناں نُوں کہیا کہ اوہ آپ وی بائبل پڑھن تے ایہدے چ لکھیاں گلاں بارے سوچن۔ میں ماواں نُوں ایہہ مشورہ دواں گی کہ اوہ یہوواہ دی تنظیم تے بھین بھراواں بارے چنگیاں گلاں کرن۔ بزرگاں دی بُرائی نہ کرو۔ تُسی اوہناں بارے جو کجھ وی کہوو گیاں،اوہدی وجہ توں یاں تے تواڈے بچیاں دا دل بزرگاں توں اُٹھ جائے گا یاں فیر اوہ ضرورت دے ویلے اوہناں تے بھروسا کرن گے۔“
11. یعقوب 3:18 دے مطابق ایہہ کیوں ضروری اے کہ تُسی گھر چ صلح رکھو؟
11 گھر چ صلح رکھو۔ اپنے شوہر تے بچیاں نُوں دَسو کہ تُسی اوہناں نال بوہت پیار کردے او۔ اپنے شوہر نال نرمی تے عزت نال گل کرو تے اپنے بچیاں نُوں وی اِنج کرنا سکھاؤ۔ جے تُسی اِنج کرو گیاں تے گھر دا ماحول خوشگوار ہوئے گا تے تواڈے بچیاں لئی یہوواہ بارے سکھنا اسان ہوئے گا۔ (یعقوب 3:18 نُوں پڑھو۔) ذرا بھرا جوزف دی مثال تے غور کرو جیہڑا ملک رومانیہ چ اِک خصوصی پہلکار اے۔ جدوں اوہ چھوٹا سی تے اوہدا ابو اوہنوں، اوہدی امی تے اوہدے بھین بھراواں نُوں یہوواہ دی عبادت کرن توں منع کردا سی تے اوہناں تے بڑی سختی وی کردا سی۔ بھرا جوزف کہندا اے: ”میری امی گھر چ صلح بنائی رکھن لئی بڑی سخت محنت کردی سی۔ ابو جِنّی زیادہ سختی کردا سی، امی اوناں ای زیادہ نرمی توں کم لیندی سی۔اوہ جدوں وی ویکھ دی سی کہ ساڈے لئی ابو دی گل مننا تے اوہدی عزت کرنا مشکل ہو رہیا اے تے اوہ ساڈے نال اِفسیوں 6:1-3 تے گل کردی سی۔ فیر اوہ ساڈا دھیان ابو دِیاں خوبیاں تے دواندی سی تے سانوں سمجھاندی سی کہ اَسی اوہدی قدر کرئیے۔ایس طرحاں ساڈے گھر چ سکون رہندا سی۔“
اپنے کماں توں اپنے بچیاں نُوں سکھاؤ
12. 2-تیمُتھیُس 1:5 دے مطابق یُونیکے دی مثال دا تیمُتھیُس تے کیہہ اثر ہویا؟
12 2-تیمُتھیُس 1:5 نُوں پڑھو۔ یُونیکے نے تیمُتھیُس لئی بڑی چنگی مثال قائم کیتی۔ اوہنے یقیناً تیمُتھیُس نُوں سکھایا ہوئے گا کہ سچا ایمان کماں توں ظاہر ہوندا اے۔ (یعقوب 2:26) تیمُتھیُس نے ایہہ وی ویکھیا ہوئے گا کہ اوہدی امی جو کجھ وی کردی اے، اوہ یہوواہ نال گُوڑھی محبت دی وجہ توں کردی اے تے یہوواہ دی عبادت کرن توں اوہدی ماں نُوں کِنّی خوشی مل رہی اے۔ یُونیکے دی مثال دا تیمُتھیُس تے کیہہ اثر ہویا؟ پولُس رسول نے دَسیا کہ اپنی ماں وانگوں تیمُتھیُس دا ایمان وی بڑا مضبوط سی تے ایہہ کوئی اِتفاق دی گل نئیں سی۔ تیمُتھیُس نے اپنی ماں دی مثال تے غور کیتا جدی وجہ توں اوہدے دل چ اپنی ماں وانگوں بنن دی خواہش پیدا ہوئی۔ یُونیکے وانگوں اَج وی بوہت ساریاں ماواں نے کجھ کہے بغیر ای اپنے گھر والیاں دے دل نُوں چُھو لیا اے۔ (1-پطرس 3:1، 2) تُسی وی اِنج کر سکدیاں او۔ پر کیویں؟
13. اِک ماں نُوں یہوواہ نال اپنی دوستی نُوں سب توں اہم کیوں سمجھنا چاہی دا اے؟
13 یہوواہ نال اپنی دوستی نُوں سب توں زیادہ اہم سمجھو۔ (اِستثنا 6:5، 6) کئی ماواں وانگوں تُسی وی بوہت ساریاں قربانیاں دیندے او۔ تُسی اپنے بچیاں دِیاں ضرورتاں پوریاں کرن لئی اپنا وقت، پیسہ، نیندر تے کئی ساریاں چیزاں قربان کردے او۔ پر توانوں کدی وی ایناں زیادہ مصروف نئیں ہونا چاہی دا کہ تواڈے کول یہوواہ نال اپنی دوستی نُوں مضبوط کرن لئی وقت ای نہ بچے۔ روز کلّے دُعا کرن، بائبل نُوں پڑھن، ایہدے چ لکھیاں گلاں تے سوچوچار کرن تے عبادتاں تے جان لئی وقت کڈھو۔ اِنج کرن نال تُسی یہوواہ دے ہور نیڑے ہو جاؤ گے تے اپنے گھر والیاں تے دُوجیاں لئی چنگی مثال قائم کرو گے۔
14، 15. تُسی بھین لی این، بھین ماریہ تے بھرا جوئیل توں کیہہ سکھیا اے؟
14 ذرا کجھ نوجواناں تے غور کرو جنہاں نے اپنیاں ماواں دی مثال تے دھیان دین توں یہوواہ نال محبت کرنا تے اوہدے تے بھروسہ کرنا سکھیا۔ بھین کرسٹین دی دھی لیا ین کہندی اے: ”جدوں ابو گھر ہوندے سن تے اَسی بائبل بارے گل نئیں کر سکدے ساں۔ پر امی ہر عبادت تے جاندی سی۔ سانوں بائبل بارے بوہتا نئیں پتہ سی پر امی دے کماں تے ایمان نُوں ویکھ کے ساڈا ایمان بڑا مضبوط ہویا۔ سانوں تے عبادتاں تے جان توں بوہت پہلاں ای ایس گل دا یقین ہو گیا سی کہ یہوواہ دے گواہواں دا مذہب ای سچا اے۔“
15 بھین ماریہ دا ابو اپنے گھر والیاں نُوں عبادتاں تے جان دی وجہ توں کدی کدی سزا دیندا سی۔ بھین ماریہ کہندی اے: ”میری امی بوہت دلیر مسیحی اے۔ جدوں میں چھوٹی ساں تے میں کدی کدی کجھ کم کرن توں منع کر دینی ساں کیونکہ میں سوچنی ساں کہ پتہ نئیں لوک کیہہ کہن گے۔ پر جدوں میں ویکھیا کہ امی کِنّی دلیر اے تے اوہ ہمیشاں یہوواہ نُوں اپنی زندگی چ سب توں زیادہ اہمیت دیندی اے تے میں اپنے ڈر تے قابو پا سکی۔“ بھرا جوئیل دے ابو نے سختی نال اپنے گھر والیاں نُوں کہیا سی کہ اوہ گھر چ نہ تے بائبل دا تے نہ ای یہوواہ دا ذکر کرن۔ بھرا جوئیل کہندا اے: ”امی دی جیہڑی گل دا میرے تے بڑا اثر ہویا اوہ ایہہ سی کہ یہوواہ دی عبادت دے سوا اوہ ابو دی خوشی لئی باقی سب کجھ قربان کرن لئی تیار رہندی سی۔“
16. اِک ماں دی مثال دا دُوجیاں تے کیہہ اثر ہو سکدا اے؟
16 ماؤں، یاد رکھو کہ تواڈی مثال دا دُوجیاں تے اثر ہوندا اے۔ کیویں؟ ذرا غور کرو کہ یُونیکے دی مثال دا پولُس رسول تے اثر ہویا۔ اوہنے لکھیا کہ تیمُتھیُس چ اوہ بےریا ایمان سی جیہڑا اوہدی ماں یُونیکے رکھدی سی۔ (2-تیمُتھیُس 1:5) پولُس نے یُونیکے دا ایمان سب توں پہلاں کدوں ویکھیا؟ شاید اوس وقت جدوں اوہ پہلی واری فرق فرق علاقیاں چ خوشخبری سناندے ویلے لِسترہ گیا سی تے اوہدی ملاقات یُونیکے تے لوئس نال ہوئی سی۔ شاید پولُس نے ای مسیح دے شاگرد بنن چ اوہناں دی مدد کیتی سی۔ (اعمال 14:4-18) ذرا سوچو کہ جدوں ایہدے تقریباً 15 سال بعد پولُس نے تیمُتھیُس نُوں خط لکھیا تے اوہنوں اوہدوں وی یاد سی کہ یُونیکے دا ایمان کِنّاں مضبوط سی تے اوہنے یُونیکے دا ذکر اِک ایہو جہی مثال دے طور تے کیتا جدے تے مسیحیاں نُوں چلنا چاہی دا اے۔ یقیناً یُونیکے دی مثال توں پولُس تے اوہدے زمانے دے ہور مسیحیاں نُوں بڑا حوصلہ ملیا ہوئے گا۔ جے تُسی کلّے اپنے بچیاں دی پرورش کر رہے او یاں تواڈا شوہر یہوواہ دا گواہ نئیں اے تے یاد رکھو کہ تواڈے مضبوط ایمان دی وجہ توں دُوجیاں نُوں وی ہمت تے حوصلہ مِلدا اے۔
یہوواہ دے قریب جان چ اپنے بچیاں دی مدد کرن لئی وقت لگدا اے۔ ایس لئی ہمت نہ ہارو! (پیراگراف نمبر 17 نُوں ویکھو۔)
17. جے تواڈیاں سخت کوششاں دے بعد وی تواڈا بچہ یہوواہ دی عبادت نئیں کرنا چاہندا تے توانوں کیہہ کرنا چاہی دا اے؟
17 جے تواڈیاں لکھاں کوششاں دے بعد وی تواڈا بچہ یہوواہ دی عبادت نئیں کرنا چاہندا تے توانوں کیہہ کرنا چاہی دا اے؟ یاد رکھو کہ بچے دی تربیت کرن چ وقت لگدا اے۔ جیویں کہ تصویر چ وکھایا گیا اے، جدوں اَسی بیہ بونے آں تے شاید کدی کدی اَسی سوچئے کہ پتہ نئیں ایس بیہ توں پودا نکلے گا یاں نئیں یاں فیر ایہدے تے پھل لگے گا یاں نئیں۔ بھانویں کہ سانوں ایہہ ساریاں گلاں دا پتہ نئیں ہوندا پر فیر وی اَسی پودے نُوں پانی دیندے رہنے آں تاکہ ساڈے وَلّوں اوس پودے دی دیکھبھال چ کوئی کمی نہ رہوے۔ (مرقس 4:26-29) ایسے طرحاں اِک ماں دے طور تے شاید کدی کدی تُسی سوچو کہ تُسی یہوواہ دے قریب جان چ اپنے بچے دی جیہڑی مدد کر رہے او، پتہ نئیں اوہدا کوئی فائدہ ہو وی رہیا اے یاں نئیں۔تُسی ایہہ تے نئیں جان سکدے کہ تواڈے بچے اَگے چل کے کیہڑا رستہ چُنن گے پر جے تُسی یہوواہ دے دوست بنن چ اوہناں دی مدد کردے رہوو گے تے تواڈے وَلّوں کوئی کمی نئیں رہوے گی۔—امثال 22:6۔
مدد لئی یہوواہ تے بھروسا رکھو
18. یہوواہ تواڈے بچیاں دی مدد کیویں کر سکدا اے تاکہ اوہ اوہدے دوست بنن؟
18 پرانے زمانے توں ای یہوواہ نے کئی نوجواناں دی مدد کیتی اے تاکہ اوہ اوہدے دوست بن سکن۔ (زبور 22:9، 10) جے تواڈے بچے وی یہوواہ دے دوست بننا چاہندے نیں تے یہوواہ اوہناں دی مدد وی کر سکدا اے۔ (1-کُرنتھیوں 3:6، 7) جے توانوں لگدا اے کہ تواڈا بچہ یہوواہ دے قریب نئیں جا رہیا تے یہوواہ اوہدوں وی اوہنوں پیار کردا رہوے گا۔ (زبور 11:4) جے تواڈے بچے نے تھوڑا جیہا وی ظاہر کیتا کہ اوہ یہوواہ دے قریب جانا چاہندا اے تے یہوواہ اوہنوں اپنے وَل لیان لئی ہتھ ودھائے گا۔ (اعمال 13:48؛ 2-تواریخ 16:9) اِنج کرن لئی ہو سکدا اے کہ اوہ تواڈی مدد کرے کہ تُسی اپنے بچے نُوں صحی وقت تے صحی گل کہوو۔ (امثال 15:23) یاں ہو سکدا اے کہ اوہ کلیسیا دے کسے بھین یاں بھرا دے ذریعے اوہدی مدد کرے۔ جے تواڈے بچے جوان ہو کے یہوواہ دی عبادت نئیں کردے تے یہوواہ اوس ویلے وی اوہناں نُوں اوہ گلاں یاد دوا سکدا اے جیہڑیاں اوہناں نے بچپن چ سکھیاں سن۔ (یوحنا 14:26) ایس گل دا یقین رکھو کہ جے تُسی اپنیاں گلاں تے کماں دے ذریعے اپنے بچیاں لئی مثال قائم کردے رہوو گے تے یہوواہ توانوں ایہدا انعام ضرور دَوے گا۔
19. ماؤں، تُسی ایس گل دا یقین کیوں رکھ سکدیاں او کہ یہوواہ تواڈے توں خوش اے؟
19 یہوواہ تواڈے نال محبت ایس لئی نئیں کردا کہ تواڈے بچے کیہڑے فیصلے کردے نیں۔ اوہ تواڈے نال ایس لئی محبت کردا اے کیونکہ تُسی اوہدے نال محبت کردیاں او۔ جے تُسی کلّے اپنے بچیاں دی پرورش کر رہے او تے یہوواہ نے وعدہ کیتا اے کہ اوہ اِک پیو وانگوں تواڈے بچیاں دا خیال رکھے گا تے تواڈی حفاظت کرے گا۔ ایہہ تواڈے ہتھ چ نئیں اے کہ تواڈے بچے یہوواہ دی عبادت کرن گے یاں نئیں۔ پر جے تُسی مدد لئی یہوواہ تے بھروسا کردیاں رہوو گیاں تے اوہدے قریب جان چ اپنے بچیاں دی مدد کرن دی کوشش جاری رکھو گیاں تے یہوواہ تواڈے توں بوہت خوش ہوئے گا۔
گیت نمبر 134: بچے خدا دی امانت نیں
a ایس مضمون چ اَسی ویکھاں گے کہ ماواں تیمُتھیُس دی ماں یُونیکے توں کیہہ سکھ سکدیاں نیں تے اپنے بچیاں دی مدد کیویں کر سکدیاں نیں تاکہ اوہ یہوواہ بارے سکھن تے اوہنوں پیار کرن۔
b ایس مضمون چ کجھ ناں بدل دِتے گئے نیں۔
c مثال لئی، کتاب ”خوشیاں بھری زندگی پاؤ—ہُن تے ہمیشاں تک“ دے سبق نمبر 50 تے اُردو چ یکم اگست 2011 دے ”مینارِنگہبانی“ دے صفحہ نمبر 30 تے مضمون ”خاندانی عبادت یاں ذاتی مطالعے کے سلسلے میں چند مشورے“ نُوں ویکھو۔