1-2. (a) Ihs Iunis, oh soangen kahpwal dah kan me e ahneki nin duwen nohno men? (b) Menlau kawehwe kilel me mi ni kilin Kahn Iroir wet.

 MENDAHKI Paipel sohte padahkihong kitail duwen ahn Timoty papidaislao, kitail kak medewehla uwen peren me ineo Iunis ahneki rahno. (Lep. Pad. 23:25) Medewehla uwen Iunis eh pohlki kilang Timoty eh kesihnen nan pihlo. E sirei ni ahn Timoty nohno kahlapo, Lois, kesihnen limwah oh koledi ih. Iunis koledi eh esingek ni eh kilang sounpapidaiso kaduhdi Timoty nan pihlo. Ni Timoty eh pwuradahsang nan pihlo, e sirei, oh Iunis tepida sengiseng pwehki e uhdahn peren. Iunis uhdahn pweida ni eh powehdi kahpwal en padahkihong nah pwutako en poakohng Siohwa oh sapwellime Ohlo Sises Krais. Kahpwal dah kan me e anahne powehdi ni eh padahki nah pwutako?

² Ahn Timoty nohnou oh eh pahpao sohte kin iang pelien lamalam tehieu. Eh pahpao mehn Krihk, oh eh nohnou oh eh nohno kahlapo mehn Suhs. (Wiewia 16:1) Timoty ele sounpar eisek samwa ni ahnsou me Iunis oh Lois wiahla Kristian kei. Ahpw eh pahpao sohte wiahla Kristian men. Mehnia pelien lamalam me Timoty pahn pilada en iang? Timoty ele lelehr sounpar en pein wiahda eh pilipil. E pahn pilada pelien lamalam me eh pahpao iang? E pahn idawehn tiahk en mehn Suhs kan me e sukuhlki sangete ni eh seri? De e pahn wiahla emen sapwellimen Sises Krais tohnpadahk?

3. Nin duwen me Lepin Padahk 1:8, 9 mahsanih, dahme Siohwa kin ketin medewehki doadoahk laud me nohno kan kin wia pwehn sewese neirail seri kan en wiahla kompoakepah?

³ Nohno Kristian kan rahnwet pil kin poakohng arail peneinei. Irail kin men sewese neirail seri kan en kakairada nanpwungmwahu keren rehn Siohwa. Oh Koht kin ketin kesempwalki  arail nannanti. (Wadek Lepin Padahk 1:8, 9.) Siohwa ketin sewesehier nohno tohto en padahkihong neirail seri kan en poakohng oh papah ih.

4. Kahpwal dah kan me nohno kan ahneki rahnwet?

⁴ Nohno kan kin ekei pak medewe ma neirail seri kan pahn pilada en papah Siohwa, duwehte me Timoty wia. Pahpa nohno kan ese ia uwen laud en ahn Sehdan sampah kin kasonge neirail seri kan. (1 Pit. 5:8) Patehng met, nohno tohto me sohte arail pwoud de arail pwoud sohte kin papah Siohwa, kin apwalki apwalihada neirail seri kan. Karasepe, sister men me adaneki Christine * koasoia: “Ei pwoudo wia pahpa mwahu men nan at peneineio, ahpw e sohte mweidohng ie en apwalihada nait seri ko en wiahla Sounkadehdehn Siohwa. Erein sounpar tohto I kin kalapw sengiseng, oh medemedewe ma nei seri ko pahn papah Siohwa.”

5. Dahme kitail pahn koasoiapene nan iren onop wet?

⁵ Ma kowe emen nohno Kristian, ke kak sewese noumw seri kan en poakohng oh papah Siohwa, duwehte me Iunis wia. Nan iren onop wet, kitail pahn koasoiapene ia duwen atail kak alasang eh mehn kahlemeng ni omw padahkih noumw seri kan sang dahme ke kin nda oh wia. Kitail pahn pil kilang ia duwen Siohwa eh pahn ketin seweseiuk.

6. Nin duwen me 2 Timoty 3:14, 15 mahsanih, ia duwen Timoty eh wiahla Kristian men?

⁶ Ni ahnsou me Timoty kisin pwutak, eh nohnou kin wia uwen eh kak en padahkihong ih “nting sarawi kan” nin duwen me mehn Suhs kan wehwehki. Ahpw Iunis sohte uhdahn ese duwen met pwehki e sehse duwen Sises Krais. Ahpw dahme Timoty sukuhlkihsang Nting Sarawi kan padahkihong ih dahme e anahne ese pwehn wiahla Kristian men. Ahpw ia duwe, e pahn wiahla Kristian men? Pwehki ih mwahnakapw men, Timoty kak pilada ma e pahn wiahla Kristian men. Timoty ele “kamehlelehier” padahk mehlel duwen Sises pwehki dahme eh nohnou ekis padahkihong ih. (Wadek 2 Timoty 3:14, 15.) Iunis uhdahn perenki eh padahkihong nah pwutako duwen Siohwa mendahki met apwal! Iunis uhdahn kapwaiada wehwehn edeo, me kohsang ni lepin lokaia ehu me wehwehki “kalowehdi.”

7. Ia duwen Iunis eh kak sewese nah pwutako en pousehlahte wia Kristian mwahu men mwurin eh papidaisla?

⁷ Ni ahnsou me Timoty papidaisla, e lel mehn akadei kesempwal ehu nan eh mour. Ahpw Iunis pwunodkihte nah pwutako mwurin eh papidaisla. Dahme nah pwutako pahn wiahiong eh mour? Ia duwe, e pahn kompoakepahnkihla aramas akan me sohte pahn wia mehn kahlemeng mwahu ong ih? E pahn kohla iang sukuhl nan Adens oh tepida kamehlele padahk en sounpadahk kan me sohte kin kamehlele duwen Koht? E pahn kauwehla mwahl eh ahnsou, kehl, oh pwulopwul ni eh doadoahk laud pwehn kepwehpwehla? Iunis sohte kak wiahda ahn Timoty pilipil, ahpw e kak sewese ih. Ia duwen? E kak doulahte kasukuhliong nah pwutako en uhdahn poakohng Siohwa oh en kalahnganki soahng koaros me Siohwa oh sapwellime Ohlo ketin wiahda. Kaidehn papah nohno kante me arail pwoud sohte kin papah Siohwa me kin ahneki kahpwal en sewese neirail seri kan en poakohng Siohwa. E pil kak apwal ong papah nohno kan me mi nan padahk mehlel en sewese neirail seri kan en papah Siohwa. Dahme pahpa nohno kan kak sukuhlkihsang mehn kahlemeng en Iunis?

8. Ia duwen nohno men eh kak sewese eh pwoudo me pil mi nan padahk mehlel en apwalih ahn neira seri kan nanpwungmwahu rehn Siohwa?

 ⁸ Onopki Paipel rehn noumw seri kan. Riat lih Kristian kan, ma amwail pwoud mi nan padahk mehlel, Siohwa ketin kupwurki kumwail en sewese ih en apwalih ahn noumwail seri kan nanpwungmwahu rehn Siohwa. Ehu ahl me ke kak wia met iei sang ni omw kin kaukaule utung amwail Kaudok en Peneinei. Koasoia soahng mwahu kan duwen amwail kaudok en peneineio, oh medewehda dahme ke kak wia pwehn wiahiong amwail kaudok en peneineio en meleilei oh kaperen. Mwein ke kak sewese omw pwoudo en pilahnehda mehkot me kumwail kak wia nan amwail kaudok en peneinei. Patehng met, ma ekei seri ko lelehr sounpar en kakehr paiekihda arail pein onopki pwuhko Enjoy Life Forever!, ele ke kak sewese omw pwoudo sewese seri ko.

9. Ia wasa me nohno men me eh pwoudo kaidehn Sounkadehde kak diar sawas?

⁹ Ekei nohno anahne onop Paipel rehn neirail seri kan, pwehki sohte arail pwoud de pwehki arail pwoudo kaidehn emen Sounkadehdehn Siohwa. Ma ih omw irairo met, dehr nohn pwunod. Siohwa pahn ketin seweseiuk. Doadoahngki mehn sawas kan me sapwellime pwihn kin kihda pwehn onop rehn noumw seri kan. Ke kak peki rehn pahpa nohno teikan me koahieklahr ia duwen arail doadoahngki mehn sawas pwukat ong arail kaudok en peneinei. * (Lep. Pad. 11:14) Ke kak kapakap oh peki rehn Siohwa en ketin seweseiuk doadoahngki peidek konehng kan pwehn diarada madamadau oh pepehm en noumw seri kan. (Lep. Pad. 20:5) Peidek mengei me duwehte ‘Dahme ke keieu apwalki nan sukuhl?’ kak tapiada amwa koasoi oh kak seweseiuk en esehda soahng tohto.

10. Dahme ke pil kak wia pwehn sewese noumw seri kan sukuhlki duwen Siohwa?

¹⁰ Rapahki ahl teikan pwehn padahkihong noumw seri kan duwen Siohwa. Koasoia duwen Siohwa oh soahng mwahu tohto me e ketin wiahda ong uhk. (Deud. 6:6, 7; Ais. 63:7) Met uhdahn kesempwal ma ke sohte kin kalapw onop rehn noumw seri ko ni imwomwo. Christine me kitail koasoiapene mwoweo, koasoia: “I sohte kin ahneki ahnsou laud en koasoia duwen Siohwa, eri I kin isaneki ahnsou sohte lipilipil me se kak. Se kin kohla alu de se kin douda pohn wahr pwoat oh seisang ni oaroahro pwehn koasoia duwen sapwellimen Siohwa kepikipik kaselel kan oh pil soahng tohto teikan me kak sewese irail en kompoakepahnkihla Siohwa. Ni ahnsou me nei seri ko laudla, I kin kangoangehkin irail en pein onopki Paipel.” Patehng met, koasoia soahng mwahu kan duwen sapwellimen Siohwa pwihn oh pil riomw Kristian kan. Dehr kauwe elder kan. Dahme ke koasoiahki irail kak sewese noumw seri ko en koasoiong irail ni ahnsou me re anahne sawas.

11. Nin duwen me Seims 3:18 mahsanih, dahme kahrehda e kesempwal en wiahda popohl nan imwomwo?

¹¹ Wiahda popohl nan imwomw. Kaukaule kasalehiong omw pwoudo oh noumw seri kan me ke poakohng irail. Koasoia duwen omw pwoudo ni ahl kadek oh wahu, oh kaiahne noumw seri kan en pil wia soahngohte. Ni omw wia met, ke kak kahrehda meleilei oh pil kamengeiong noumw seri kan en sukuhlki duwen Siohwa. (Wadek Seims 3:18.) Medewehla mehn kahlemeng en Jozsef, emen pioneer tohrohr nan Romania. Nin doken eh wie kekeirda, eh pahpao kin kahrehiong en uhdahn apwal ong ih, eh nohnou, oh rie ko en  papah Siohwa. Jozsef koasoia: “Ei nohnou kin nanti laud en wiahda popohl nan imwato. Ni pahpa eh kin kalaudehla eh lemei, ei nohnou pil kin kalaudehla eh kadek ong ih. Ni nohno eh kilang me se kin apwalki wauneki oh peikiong at pahpao, e kin koasoiaiong kiht Episos 6:1-3. Mwuhr, e pahn koasoiaiong kiht duwen irair kaselel kan me Pahpa ahneki oh sewesei kiht en wehwehki dahme kahrehda se anahne kesempwalki ih. Met sewese at peneineio en ahneki meleilei.”

12. Nin duwen me 2 Timoty 1:5 mahsanih, dahme ahn Iunis mehn kahlemeng wiahiong Timoty?

¹² Wadek 2 Timoty 1:5. Iunis wiahda mehn kahlemeng mwahu ong Timoty. E anahne padahkihong Timoty me pwoson mehlel kin sansalda sang ni wiewia. (Seims 2:26) Timoty kak kilang me ahn eh nohnou wiewia kan kin kohsang eh limpoak laud ong Siohwa. Timoty uhdahn kilang me papah Siohwa kin kahrehiong eh nohnou peren. Dahme ahn Iunis mehn kahlemeng wiahiong Timoty? Wahnpoaron Pohl koasoia me Timoty ahneki pwoson laud duwehte eh nohnou. Timoty sohte uhdahte ahneki pwoson laud. Ahpw e kilang ahn eh nohnou mehn kahlemeng oh pilada en alasang. Duwehte rahnwet, nohno tohto sewesehier arail peneinei kan en papah Siohwa ‘kaidehn sang ni arail lokaia.’ (1 Pit. 3:1, 2) Ke pil kak wia soahngohte. Ia duwen?

13. Dahme kahrehda nohno men anahne wiahki eh nanpwungmwahu rehn Siohwa en keieu kesempwal?

¹³ Wiahki omw nanpwungmwahu rehn Siohwa me keieu kesempwal. (Deud. 6:5, 6) Duwehte pali laud en nohno kan, ke kin wiahda tounmetei tohto. Ke kin tounmeteikihla ahnsou, mwohni, meir, oh soahng teikan pwehn apwalih anahn en noumw seri kan. Ahpw ken dehr nohn kedirepwkihla apwalih soahng pwukat me kahrehda sohla omw ahnsou en kakehlaka pein omw nanpwungmwahu rehn Siohwa. Kaukaule wiahda pein omw ahnsou en kapakap, omw onop Paipel, oh mihting en mwomwohdiso kan. Ni omw wia met, ke pahn karanihala Siohwa oh wia mehn kahlemeng mwahu ong omw peneinei oh meteikan.

14-15. Dahme ke sukuhlkihsang mehn kahlemeng en Leanne, Maria, oh João?

¹⁴ Medewehla ekei karasepen me pwulopwul me sukuhlki en poakohng Siohwa oh likih ih sang ni arail kin kilang arail nohno. Nein Christine serepeino Leanne koasoia: “Se sohte kak onopki Paipel ni ahnsou me pahpa mi nihmwo. Ahpw nohno kalapw iang towehda mihting kan. Mendahki se sohte nohn ese duwen Paipel, eh wiewia kan sewesei kiht en ahneki pwoson laud. Se ese me Sounkadehdehn Siohwa kan kin padahngki padahk mehlel mwohn at tepida towehda mihting kan.”

¹⁵ Maria me eh pahpao kin ekei pak kaloke eh peneineio pwehki arail kin iang towehda mihting kan, koasoia: “Ei nohnou iei emen sister me keieu eimah me I ese. Ni ahnsou me I tikitik, I kin ekei pak kahng wia soahng kan pwehki I masak dahme meteikan pahn nda. Ahpw ei kin kilang uwen nohno eh eimah oh uwen eh kin ahnsou koaros mwohneki mahs Siohwa nan eh mour, met sewese ie en powehdi ei masak aramas.” João, me eh pahpao keinepwihsang eh peneineio en koasoia duwen Siohwa de Paipel nan imwarailo, koasoia: “Mwein dahme keieu kangoange ie iei me ei nohnou kin men tounmeteikihla soahng koaros pwehn kaperenda ei pahpao, ahpw ihte eh limpoak ong Siohwa me soh.”

16. Dahme mehn kahlemeng en nohno men kak wiahiong meteikan?

¹⁶ Nohno kan, tamataman me amwail mehn  kahlemeng kin kamwakid meteikan. Ia duwen? Medewehla ia duwen ahn Iunis mehn kahlemeng eh kamwakid wahnpoaron Pohl. E ntingihedi me ahn Timoty pwoson mehlel tepisang rehn Iunis. (2 Tim. 1:5) Iahd me Pohl tehkada ahn Iunis pwosono? Mwein nin doken eh wia tepin eh seiloak en misinerio me e tuhwong Lois oh Iunis nan Listra, oh ele e sewese ira en wiahla Kristian kei. (Wiewia 14:4-18) Song medewehla: Ni ahnsou me Pohl ntinglahng Timoty sounpar 15 mwuhr, e tamatamante ahn Iunis wiewia lelepek kan oh doadoahngki ih nin duwen mehn kahlemeng mwahu ehu me koaros en alasang! E sansal me eh mehn kahlemeng uhdahn kangoange wahnpoarono oh pil tepin Kristian tohto teikan. Ma ke kin kelehpw apwalih noumw seri de mi rehn peneinei ehu me sohte iang pelien lamalam tehieu, kamehlele me omw mehn kahlemeng en lelepek pahn kakehlaka oh kamwakid irail kan me mi rehmw.

17. Dahme ke anahne wia ma e mwomwen me noumw serio sohte mwekidki omw kaiahn?

¹⁷ Ia duwen ma e mwomwen me noumw serio sohte mwekidki omw nannanti en sewese? Tamataman me kaiahne seri men kin anahne ahnsou laud. Nin duwen me kilelo kasalehda, ni omw padokedi werentuhke ehu, ele ekei pak ke kin medewe ma e pahn keirda oh wa. Mendahki ke sohte ese ma tuhkeo uhdahn pahn wa, ke pahn pousehlahte kalamwurih pwehn kihong ahnsou mwahu en keirda. (Mark 4:26-29) Duwehte met, ekei pak nohno men kakete medewe ma eh nannanti kin uhdahn sewese nah seri ko en poakohng Siohwa.  Ke sohte kak kaunda pilipil kan me noumw seri kan wiahda. Ahpw ma ke pousehlahte wia uwen omw kak koaros pwehn kaiahne irail, ke kin kihong irail ahnsou mwahu en wiahla kompoakepahn Koht.—Lep. Pad. 22:6.

18. Ia duwen Siohwa eh kak ketin sewese noumw seri kan en wiahla kompoakepah?

¹⁸ Sangete mahso nan Paipel, Siohwa ketin sewesehier me pwulopwul tohto ren wiahla kompoakepah. (Mel. 22:9, 10) E pil kak ketin sewese noumw seri kan en wiahla kompoakepah ma re mwahuki. (1 Kor. 3:6, 7) Mehnda ma noumw seri kan sohte men papah Siohwa ni mohngiong unsek, e pahn ketin pousehlahte poakohng irail. (Mel. 11:4) Ma re ekiste kasalehda me re “ahneki mohngiong mwahu,” e pahn ketin sewese irail en wiahla kompoakepah. (Wiewia 13:48; 2 Kron. 16:9) Ele e pahn ketin seweseiuk en nda dahme pwung ni ahnsou me noumw serio keieu anahne rong. (Lep. Pad. 15:23) De ele e kak ketin doadoahngki brother de sister limpoak men nan mwomwohdiso pwehn kasalehda me re nsenohkin irail. Pil mwurin noumw seri kan ar laudla, ele Siohwa pahn ketin katamankihong irail mehkot me ke padahkihong irail mahso. (Sohn 14:26) Ni omw pousehlahte kaiahne noumw serio sang dahme ke kin nda oh omw mehn kahlemeng, Siohwa pahn ketin kapaiaiukada.

19. Dahme kahrehda ke kak uhdahn kamehlele me Siohwa pahn ketin kupwurperenkin uhk?

¹⁹ En Siohwa limpoak ong uhk sohte kohsang pilipil kan me noumw seri kan wiahda. E ketin poakohng uhk pwehki ke poakohng ih. Ma kowe nohno de pahpa kiripw men, Siohwa ketin inoukihda en wia Sahm ong noumw seri kan oh Sounsilepomw. (Mel. 68:5) Ke sohte kak kaunda ma noumw seri kan pilada en papah Siohwa de soh. Ahpw ma ke pousehlahte likih sapwellimen Siohwa sawas oh wia uwen omw kak, ke pahn ale sapwellime kupwuramwahu.