1, 2. 1) ¿Imaraykutaj Eunice mana atillarqachu wawanman Jehovata, Jesusta ima munakuyta yachachiyta? 2) ¿Imatataj kay revistaj tapanpi rikunchej? Sutʼinchariy.

 TIMOTEO bautizakushasqanpi piensarina. Bibliaqa mana imatapis chaymanta parlanchu. Jinapis maman Euniceqa, chay día may kusisqachá kasharqa (Pro. 23:25). Payqa wawan bautizakunanpaj yakupiña kashasqanta rikuspa, maytapunichá kusikorqa. Chayllapitaj Timoteoj awelitan Loida qayllaykuspa abrazaykorqa. Eunicej sonqonqa mayta wawayarerqa, Timoteo yakuman chʼultiykuchikushajtin. Chantapis kusiymanta waqarikorqa, wawanta kusisqata yakumanta llojsimojta rikuspa. Euniceqa maytapuni kallpachakorqa, wawanman Jehovata, Jesucristota ima munakuyta yachachinanpaj. Imajtinchus mana facilchu paypaj karqa.

² Timoteoj tatasnenqa mana kikin religionniyojchu karqanku. Tatanqa griego karqa, mamanwan awelitanwantaj judías karqanku (Hech. 16:1). Timoteoqa jovencitoñasina kasharqa maman Eunicewan, awelitan Loidawan cristianasman tukushajtinku. Jinapis tatanqa mana cristianoman tukorqachu. Timoteotaj imatachus ruwayta munasqanta ajllananpaj jina edadniyojña karqa. ¿Imatá ruwanman karqa? ¿Tatanpa religionnintachu ajllanman karqa? ¿Wawamantapacha judiospa costumbresninta yachakusqanman jina kausakuytachu ajllanman  karqa? Chayri, ¿Cristoj discipulon kaytachu ajllanman karqa?

3. Proverbios 1:8, 9 nisqanman jina, ¿imaynatá Jehová qhawan mamas wawasninkuta paypa amigosnin kanankupaj yanapasqankuta?

³ Kay tiempomanta cristiana mamaspis, Eunice jinallataj familiankuta mayta munakunku. Astawanqa wawasninkuta yanapayta munanku Jehovaj amigosnin kanankupaj. Jehovataj chayta ruwanankupaj mayta kallpachakusqankuta jatunpaj qhawan (Proverbios 1:8, 9 leey). Jehovaqa ashkha mamasta yanapan wawasninkuman payta munakuyta, sirviyta ima yachachinankupaj.

4. ¿Imapitaj ashkha mamas rikukunku?

⁴ Mamasqa wakin kutis llakikunkupuni wawasninku Timoteo jina Jehovata sirvinankumantachus manachus. Jinapis tatasqa sumajta yachanku, wawasninku kay Satanaspa mundonpi sajra imasta ruwayman tanqasqas kanankuta (1 Ped. 5:8). Mana chayllachu ashkha mamasqa, sapallanku wawasninkuta uywanku chayrí paykunaj qosasninkoqa mana testigoschu kanku. Hermana Cristina b nin: “Qosayqa sumaj tata karqa, maytataj munakuwarqayku. Jinapis mana saqewarqachu wawasniyman Jehovamanta yachachinayta. Ashkha watasta waqarqani imaynatachus wawasniyta yanapanaymanta Jehovata sirvinankupaj”, nispa.

5. ¿Imastá kay yachaqanapi qhawarisun?

⁵ Qan cristiana mama kanki chayqa, Eunice jina wawasniykita yanapawaj Jehovata munakunankupaj, sirvinankupajtaj. Kay yachaqanapi qhawarisun imaynatachus Eunice jina ruwanaykita, wawasniykimantaj parlasqaykiwan ruwasqaykiwan ima yachachinaykita. Qhawarillasuntaj imaynasmantachus Jehová yanapasunanta.

6. Kay 2 Timoteo 3:14, 15 nisqanman jina, ¿imaynamantá Timoteo cristianoman tukorqa?

⁶ Euniceqa mayta kallpachakorqa Timoteoman nacekusqanmantapacha “Diospa qhelqasqa Palabranta” yachachinanpaj, judíos entiendesqankuman jina. Euniceqa Jesucristomanta ni imata yacharqachu. Jinapis Timoteo Diospa Palabranmanta yachakusqanqa, yanapanman karqa cristianoman tukunanpaj. ¿Timoteo chayta ajllanmanchu karqa? Payqa aterqaña ajllayta imatachus kausayninwan ruwananta. Timoteoqa Jesuspi creerqa, maman paymanta yachachinanpaj kallpachakusqanrayku (2 Timoteo 3:14, 15 leey). Euniceqa maytachá kusikorqa wawanta Jehovata rejsinanpaj yachachisqanmanta. Payqa sutinman jinapuni ruwarqa, imajtinchus sutenqa “atipay” niyta munan.

7. ¿Imatá Eunice ruwarqa wawanta yanapanallanpajpuni bautizakojtinñapis?

⁷ Timoteoqa sumajtapuni ruwarqa bautizakuspa. Jinapis Euniceqa wawanmanta llakikullarqapuni. ¿Imatá Timoteo chaymantapacha ruwanman karqa? ¿Mana allin amigosnin jinallatajchu ruwayta munanman karqa? ¿Atenasmanchu rinman karqa estudiaj? ¿Chaypi yachayniyoj runas yachachisqankutachu japʼikunman karqa? Qhapajyayta munasqanrayku, ¿tiemponta, kallpanta, joven kasqantapis usuchinmanchu karqa? Euniceqa mana niyta aterqachu imatachus Timoteo ruwananta. Jinapis payqa atillarqapuni wawanman yachachiyta Jehovata munakuyta, Jesusmantaj agradecekuyta. Chaywanpis mana sapallanku Jehovata sirvej tatamamasllachu Eunice jina rikukunku. Manaqa qhariwarmi Jehovata sirvejkunapis. Chayrayku tatamamasqa Eunicemanta mayta yachakunkuman.

8. ¿Imastá uj mama ruwanman testigo qosanta yanapananpaj?

 ⁸ Wawasniykiwan Bibliata estudiay. Qosayki testigo chayqa, Jehová munan payta yanapanaykita wawasniykiman Bibliamanta yachachispa. Chaytataj ruwawaj sapa semana familiapi Diosta yupaychanapaj tantakuyta ruwananpaj yanapaspa. Chay tantakuymanta allinta parlay, piensariytaj imatachus ruwanaykipi chay tantakuy kʼachitu, familiata kallpachananpaj jinataj kananpaj. Ichapis qosaykita yanapawaj imatachus Bibliamanta estudianaykichejpaj, chayrí waj imata ruwanaykichejpaj ajllaysispa. Chantapis ujnin wawaykita Wiñaypaj kusisqa kausakuy librota estudiay yanapananta reparanki chayqa, qan estudiachiwaj. Ajinamanta qosaykita yanapanki.

9. ¿Ima yanapastaj tiyan mana testigo qosayoj mamaspaj?

⁹ Wakin mamasqa sapallanku wawasninkuman Bibliamanta yachachinku, mana qosayoj kasqankurayku chayrí qosanku mana testigochu kasqanrayku. Qanpis ajinapi rikukunki chayqa ama llakikuychu, Jehová yanapasonqa. Payqa llajtannejta ashkha yanapasta qowanchej wawaswan estudianapaj. Chaykunawan yanapachikuy. Chantapis waj tatasta tapurikuwaj imaynatachus chay yanapaswan familiapi Diosta yupaychanapaj tantakuyta ruwasqankuta c (Pro. 11:14). Jehovamanta yanapata mañakuy wawasniykiwan allinta parlarinaykipaj. Ajinamanta yachanki imatachus paykuna yuyasqankuta, imaynachus kashasqankutapis (Pro. 20:5). Ichá wawaykita tapuriwaj: “¿Imastaj escuelapi astawan llakichisunki?”, nispa. Chayta tapurejtiykeqa ichá willarisonqa imachus llakichishasqanta.

10. Mamas, ¿imastawantaj ruwawajchej wawasniykichejman Jehovamanta yachachinaykichejpaj?

¹⁰ Imaynallamantapis wawasniykiman Jehovamanta yachachiy. Wawasniykiwan parlariy Jehovamanta, imastachus qankunapaj ruwasqanmantapis (Deu. 6:6, 7; Isa. 63:7). Wasipi wawasniykiman Bibliamanta yachachejta mana saqesojtinkupis, yachachinaykipuni tiyan. Cristinamanta párrafo cuatropi parlarerqanchej. Pay nin: “Wawasniywanqa wasipi mana Bibliamanta parlariyta atillajchu kani. Chayrayku mayta kallpachakoj kani, imaynallamantapis paykunaman Diosmanta yachachinaypaj. Puriykacharej rej kayku chayrí canoaman wichariykuspa yaku kantuman rej kayku. Chaypitaj parlarej kayku Jehová kʼachitu imasta ruwasqanmanta, imaschus paykunata Jehovaman qayllaykunankupaj yanapananmanta ima. Wawasniy jatuchajña kajtinkutaj paykunaman nerqani sapallankumantaña Bibliata estudianankuta”, nispa. Chantapis Jehovaj llajtanmanta, hermanosmanta ima allinta parlay. Ama ancianospaj rimaychu. Paykunamanta allinta parlajtiyki wawasniykeqa, yanapata necesitaspa paykunawan yanapachikonqanku.

11. Santiago 3:18 nisqanman jina, ¿imapajtaj familiapi kallpachakunanchej tiyan?

¹¹ Familiaykipi allin kausay kananpaj yanapakuy. Qosaykitawan wawasniykitawanqa sapa kuti munakusqaykita niy. Qosaykimanta parlay allinta, respetowantaj, wawasniykimanpis chayllatataj yachachiy. Chaytaj familiapi allinta kausakunaykichejpaj yanapasonqachej. Wawasniykipis Jehovamanta yachakuyta atillanqanku (Santiago 3:18 leey). Jozsefmanta parlarina. Payqa Rumaniapi precursor especial jina sirvishan. Pay wawa kashajtin maman, hermanosnin, pay ima  mana Jehovata sirviyta atillarqankuchu, tatan mayta paykunaman churanakusqanrayku. Jozsef nin: “Mamayqa mayta kallpachakoj familiapi allinta kausakunaykupaj. Tatay mayta phiñakojtenqa, mamayqa aswan kʼacha karqa. Mamayqa tatayta mana respetayta, nitaj kasukuyta munajtiyku, Efesios 6:1-3 versiculosmanta parlariwaj kayku. Chantá niwaj kayku tatay kʼacha kasqanta, entiendechiwajtaj kayku imajtinchus payta respetanayku kasqanta. Ajinamanta familiaypeqa allinta kausakorqayku”, nispa.

12. Kay 2 Timoteo 1:5 nisqanman jina, ¿imaynatataj Eunicej ruwasqan Timoteota yanaparqa?

¹² (2 Timoteo 1:5 leey). Timoteoqa maytachá mamanmanta yachakorqa. Mamanqa yachachinman karqa ruwasqasninchejwan creeyninchejta rikuchina kasqanta (Sant. 2:26). Timoteoqa sutʼita rikorqa maman mayta Jehovata munakusqanta, chaytataj Euniceqa ruwasqasninwan rikucherqa. Payqa rikullarqatajchá maman Jehovata sirvispa kusisqa kasqanta. ¿Imaynatá Timoteota yanaparqa mamanpa ruwasqan? Apóstol Pabloqa nerqa Timoteo maman jina sinchʼi creeyniyoj kasqanta. Timoteoqa chay jina creeyniyoj karqa mamanpa ruwasqasninta rikusqanrayku, pay jinataj ruwasqanrayku. Ashkha mamaspis, Eunice jinallataj familiankuta yanapanku ni imata nispalla (1 Ped. 3:1, 2). Qanrí, ¿imatá ruwawaj familiaykita yanapanaykipaj? Chayta qhawarina.

13. ¿Imajtintaj uj mama Jehovata yupaychayta ñaupajman churanan tiyan?

¹³ Jehovata sirviyta ñaupajman churay (Deu. 6:5, 6). Qanqa ashkha mamas jinallatajchá wawasniykiman tukuy ima necesitasqankuta qonaykipaj mayta kallpachakunki. Chaypajqa maymantapis tiempota, qolqeta ima orqhonki. Wakin kutisqa ichá mana sumajtachu puñukunki, waj imastawantaj ruwanki. Jinapis orakunaykipaj, sapallaykipi Bibliata estudianaykipaj, reunionesman rinaykipajpis tiempochakunallaykitaj tiyan. Chay imasta ruwaytaqa amapuni saqeychu. Ajinamanta astawan Jehovaman qayllaykunki. Familiaykiwan wajkunawantaj chayta ruwasqaykimanta mayta yachakonqanku.

14, 15. ¿Imatá yachakunchej Lenymanta, Mariamanta, Juanmanta ima?

¹⁴ Wakin jovenesqa Jehovata munakuyta, paypi confiayta ima mamankumanta yachakorqanku. Cristinaj ujnin warmi wawan Leny nin: “Tatayku wasipi kashajtenqa mana Bibliata estudiayta atejchu kayku. Jinapis mamayqa reunionesman ni jaykʼaj faltakojchu. Noqaykoqa Bibliamanta pisillata yachakorqayku. Jinapis mamay Bibliaj nisqanman jina kausakusqanqa, sinchʼi creeyniyoj kanaykupaj yanapawarqayku. Ajinamanta niraj reunionesman rishaspa, yacharqaykuña testigosqa cheqa kajtapuni yachachisqankuta”, nispa.

¹⁵ Mariamantañataj parlarina. Paypa tatanqa reunionesman rejtinku familiantinta castigaj. Pay nin: “Mamayta jinaqa ni pita rejsinichu. Wawa kashajteyqa wajkuna imatachus ninankuta manchachikuspa, mana wakin imasta ruwayta munajchu kani. Jinapis mamay mana manchachikusqanta, Jehovatataj ñaupajman churasqanta rikuspaqa, niña runasta manchachikorqanichu”, nispa. Juanwan familianwanqa wasipi mana Jehovamanta parlayta atejchu kanku. Imajtinchus tatanqa wasipi ni pita chayta ruwajta saqejchu. Pay nin: “Mamayqa tatayta kusichinanrayku tukuy ima nisqanta ruwaj. Jinapis Jehovata sirviytaqa nipuni saqerqachu, chaytaj mayta tʼukuchiwarqa”, nispa.

16. ¿Imaynatataj mamas ruwasqankuwan wajkunata yanapankuman?

 ¹⁶ Mamas, wajkunaqa qankunamanta mayta yachakunkuman. Apóstol Pablopis Eunicemanta mayta yachakorqa. Payqa Timoteomanta nerqa: ‘Yuyarikuni tukuy sonqo creesqaykimanta. Chay jina creeyqa ñaupajta rikukorqa, mamayki Eunicepi’, nispa (2 Tim. 1:5). ¿Maykʼajtaj Pablo repararqa Eunice sinchʼi creeyniyoj kasqanta? Ichapis payqa Loidata, Eunicetawan rejserqa Listraman ñaupaj kutipi misionero jina risqanpi. Cristianasman tukunankupajpis ichá payllataj yanaparqa (Hech. 14:4-18). Pabloqa 15 watasninman jina Timoteoman qhelqashajtin Eunicej creeyninmanta yuyarikullarqapuni. Wajkuna Eunicemanta mayta yachakuyta atisqankutataj nerqa. Eunicej ruwasqanqa apóstol Pablota mayta kallpacharqa. Maytachá kallpachallarqataj chay tiempomanta waj cristianostapis. Qan sapallayki wawasniykita uywashanki chayrí qosayki mana testigochu chayqa, sinchʼi creeyniyoj kasqaykeqa wajkunata kallpachan, yanapantaj.

17. ¿Imatá ruwawaj wawaykiman Diosmanta yachachinaykipaj kallpachakusqayki qhasilla kasqanta yuyaspa?

¹⁷ Ichapis wawaykiman Diosmanta yachachinaykipaj kallpachakusqayki qhasilla kasqanta yuyanki. Jinapis wawasqa unaypipuni yachakunku. Kay parrafopaj dibujospi rikunchej jina, uj mujituta tarpuspaqa mana yachanchejchu poqonantachus manachus. Jinapis qarpallanchejpuni mana chʼakirpananpaj, wiñanallanpajpunitaj (Mar. 4:26-29).  Ajinallatataj mamaspis mana yachankuchu wawasninkuman Diosmanta yachachisqanku sonqonkuman chayashasqantachus manachus. Chaywanpis wawasninkuman yachachinankupaj kallpachakullanqankupuni chayqa, wawasninkoqa atillanqanku Jehovaman qayllaykuyta, payta sirviytapis (Pro. 22:6).

18. ¿Imaynatá Jehová wawasniykita yanapanman amigosnin kanankupaj?

¹⁸ Jehovaqa unaymantapacha jovenesta yanapan paypa amigosnin kanankupaj (Sal. 22:9, 10). Wawasniyki Jehovamanta yachakuyta munanku chayqa, paykunatapis yanapallanmantaj (1 Cor. 3:6, 7). Ichapis wawasniykeqa Jehovata mana tukuy sonqochu sirvishanku. Jinapis Jehovaqa mana paykunamanta qonqaponqachu (Sal. 11:4). Wawasniyki allin sonqoyoj kasqankuta rikuchejtinkukama Jehovaqa chay rato paykunata yanapanqa (Hech. 13:48; 2 Cró. 16:9). Qantapis yanapasunkiman wawasniyki yanapata necesitashajtinkupuni maychus tiemponpi allinta paykunawan parlanaykipaj (Pro. 15:23). Chantapis Jehovaqa congregacionmanta hermanosta tanqanman wawasniykiwan kʼachallamanta, munakuywantaj parlarinankupaj. Wawasniyki kuraj runasña kajtinkupis, Jehovaqa yuyarichinman imatachus wawas kashajtinku yachachisqaykita (Juan 14:26). Wawasniykiman parlasqaykiwan ruwasqaykiwan ima yachachillankipuni chayqa, Jehová bendecisonqa.

19. ¿Imata ruwajtiykitaj Jehová allinpaj qhawasonqa?

¹⁹ Wawasniyki mana Jehovata sirvejtinkupis, payqa munakusunki. Jehovaqa munakusunki qan payta munakusqaykirayku. Ichapis sapallayki wawasniykita uywashanki chayrí qosayki mana testigochu. Jinapis Jehová kutikusonqa, wawasniykipajpis uj tata jina kanqa (Sal. 68:5). Qanqa mana ajllayta atinkichu wawasniyki Jehovata sirvinankutachus manachus. Jinapis Jehová yanapasunanpi atienekullaypuni, tukuy atisqaykitataj ruwallaypuni. Ajinamanta payqa allinpaj qhawasonqa.