1, 2. 1) ¿Pitaj cargan Eunice, y ima pruebacunapataj pasargan? 2) Garancho caycaj dibujupita parlacaramuy.

 TIMOTEO bautizacushganpita Biblia mana wilacunchu, chayno captinpis, chay junaj maman Euniciga alapa cushishgachi taricurgan (Prov. 23:25). Pitapis cushi cushilachi nergan ‘cuyashga wamralä Timoteo bautizacunanpäna caycan’ nir. Y chaylachonachi awilan Loidapis wawan Eunicipa wajtanta taglapan cushicuypita. Euniciga cushicuypita wagananrächi. Y ‘pulchaj’ nir yacuman yaycushganta ricar y yargamushganta ricarpis mayraj ishcancuna ‘graciaslä Tayta Jehová’ nipäcun. Sasa captinpis calpachacärishga Timoteo wamran Jehovatawan Jesusta cuyananpaj. ¿Ima pruebacunaparaj pasargan cay junajman chayamunanpaj?

² Timoteupa taytanga Jehovata adurarganchu. Maman Eunice y awilan Loida judía warmicunami cargan, taytanga mana (Hech. 16:1). Timoteo wamralaraj captinchi Euniciwan Loidaga cristianaman ticracurgan, pero taytan ichanga manami. Timoteo mozuna caycarga quiquinpitanami cargan cristianuman ticrananpaj. ¿Imataraj ruranman? ¿Taytanpa religiunnintachuraj gaticunman? ¿Judío cawashganno jinalachuraj cawanman? ¿O cristianumanchuraj ticracurinman?

3. Proverbios 1:8, 9 nishganno, mama cajcuna wamrancunata Jehovata sirvinanpaj yanapaptin, ¿imanotaj Jehová rican?

³ Eunicinopis cay wichan cristiana mamacunaga familianta cuyan. Imapitapis masga munan wamrancuna  Jehovapa amigun cananpaj. Calpachacärishganta ricar Taytalanchi Jehovaga alapa cushicun (leiriy Proverbios 1:8, 9). Unaypis cananpis quiquin Jehovami achca mamacunata yanapan wamrancuna Payta sirvinanpaj y cuyananpaj.

4. ¿Canan wichan mamacuna ima sasacunapataj pasan?

⁴ Öraga mamacuna yarpachacun ‘¿wamralä Timoteuno Jehovata sirvengachuraj?’ nir. Paycunaga musyanmi wamrancuna cay munducho imayca sasacunapa pasashganta (1 Ped. 5:8). Jinamanpis waquin mamacunaga japalanmi wamrancunata ashman y waquincunapa majanga Jehovata sirvinchu. Paninchi Christine b cayno nin: “Majäga cuyacojmi y ali taytami cargan pero manami munajchu wamräcuna Jehovapa testigunman ticrananta. Öraga wagacoj cä, ‘¿imaylapis wamräcuna Jehovata sirvingachuraj?’ nir”.

5. ¿Imatataj canan yachacushun?

⁵ Cristiana mama carga Eunice rurashganno calpachacunquimanmi wamrayquicunata yanapänayquipaj, paypis Jehovata sirvinanpaj. Canan yachacushun imanopataj wamrayquicunata yanapanquiman parlacushgayquiwan y rurashgayquiwan. Jinamanpis yachacushun imanopataj Jehová yanapäshunqui.

6. 2 Timoteo 3:14, 15 nishganno, ¿imataj Timoteuta yanapargan cristianuman ticrananpaj?

⁶ Euniciga, wamran Timoteo yurishganlachona Diospa Palabranpita tantiashganmanno yachachergan; ichanga Jesuspitaga manami lapanta musyashgarächu cargan. Chayno captinpis, Timoteo Diospa Palabranpita yachacushganga alimi cargan cristianuman ticrananpaj. Y ¿chaytachu rurargan? Payga mozunami cargan quiquin decidinanpaj. Maman calpachacushganga alapami yanapargan Jesuspita ali shongulanwan yachacunanpaj (leiriy 2 Timoteo 3:14, 15). ¡Euniciga alapachi cushicurgan Jehovata sirvinanpaj wamranta ali yachachishganpita! Jutinga “calpachacoj” ninanmi y cawaynincho chayno warmimi cargan.

7. ¿Imanopataj Eunice yanapargan Timoteo bautizaduna caycarpis?

⁷ Timoteo bautizacushganga alimi cargan. Euniciga jinalachi yarpachacuycargan caycunaman: ¿Cananpita imataraj wamrä ruranga?, ¿pïcunawanraj juntacanga?, ¿Atenasman estudiananpaj aywaptenga Diosta mana sirvej yachachicojcunatachuraj chasquicunga? Joven cayninta, yachayniyoj cayninta, cay munducho ¿ricuyänanpächuraj utilizanga? Timoteo imata rurananpaj mana decidirpis, yanapaytaga puedirganmi, chaynopa Jehovata y Jesusta masraj cuyananpaj. Chauraga majan Diosta mana sirvej taytapäga sasarächi canman wanranta yachachinanpäga. Pero ishcan taytacuna Diosta sirviptinpis calpachacunanrächi wanracunata ali caminupa pushananpaj. Chaymi tapucunchi ¿imataj yachacunman tayta mamacuna Eunice cristianapita?

8. Majayquipis cristiano captenga, ¿imataraj ruranquiman wamrayquicunata espiritual cajcho yanapänayquipaj?

⁸ Bibliapita wamrayquiwan yachacäriy. Cristiano majayqui captenga, wamrayquita  espiritual cajcho yanapänayquitami Jehovaga munan. Cada semana familiayquiwan Diosta aduranayquipaj yanapacuy. Shumaj alistapacuy cushi cushila Jehovata aduranayquipaj. Capazchi maygalan tematapis Bibliacho yachacunayquipaj acranquiman. Maygan wamrayquilapis Disfrute de la vida libruta estudianan captenga yachachiy, chaynopa runayquitaga yanaparcunquichi.

9. ¿Ima yanapacuytaj caycan cristiana mamacunapa majan Diosta mana sirviptin?

⁹ Waquin mamacunaga quiquincunami wamrancunata Bibliapita yachachin, runan mana captin o Diosta mana sirviptinpis. Chayno captenga ama laquicäriychu, Jehová listo caycan yanapayculäshunayquipaj. Yargamoj publicaciunninchicunachomi caycan achca yachachicuycuna wamrayquita yanapänayquipaj. Waquin taytacunatapis tapupay imanotaj wamrancunata yachachin chay publicaciuncunawan c (Prov. 11:14). Jinamanpis Jehovata mañacuy wamrayquita ali shimilapa parlapänayquipaj y tantiapänayquipäpis (Prov. 20:5). Caytapis tapupanquiman “¿Ima sasacunapataj escuelayquicho pasaycanqui?”, chaynopa ima pasaycashgantapis wilapäshunquimi.

10. ¿Ima mastataj ruranquiman wamrayquicuna Jehovata reguinanpaj yanapänayquipaj?

¹⁰ Maycho caycar y may horapis wamrayquicunata Jehovapita yachachiy. Paycunata wilapay Jehová imano lapancho yanapashushgayquicunapita (Deut. 6:6, 7; Is. 63:7). Chayga alimi canga wasiquicho wamrayquiwan Bibliata mana estudiaptiquipis. Naga parlashganchi pani Christine cayno nin: “Wasëcho wamräcunata Bibliapita mana yachachiyta puedirpis maycho caycarpis Bibliapitaga yachachej cämi. Maylapapis pasiaj aywar o mayuman aywaycur Jehová camashgancunapita y imano Dios cashganpitapis parlapaj cä. Wamräcuna mozo jipashna caycaptin quiquincuna Bibliata estudiananpaj nergä”. Jinamanpis Diospa marcanpita ali cajcunata parlay; ancianucunapa y hermanunchicunapa washanta ama parlapaychu. Chayno captin wamrayquicunaga hermanucunamanga yäracungami.

11. Santiago 3:18 nishganno, ¿imanirtaj wasiquicho jaucala cawanayquipaj calpachacunquiman?

¹¹ Wasiquicho jaucala cawanayquipaj calpachacuy. Cuyacoj capäcuy majayquiwan y wamrayquicunawan. Respetuwan majayquipita parlay y wamrayquicunatapis chayta yachachiy. Chayta rurarga wasiquicho jaucala cawapäcunqui y Jehovapita wamrayquicunata yachachinqui (leiriy Santiago 3:18). Rumania naciuncho precursor especialno yanapacoj wauguinchi Jozsefpita parlarcushun. Taytanga pasaypa mana munarganchu mamanwan waugui panincunawan Jehovata sirvinanpaj. Paymi cayno nin: “Taytä nogacunawan fiyu captinpis mamänëga imaycacunata rurargan, payta jinala respetananpaj y cuyananpaj. Öraga papänëta respetanapaj y casucunapaj sasami cargan, chaymi mamänëga yanapämaj Bibliawan y leipämaj Efesios 6:1-3 textuta. Nircur papänëpita ali cajcunata parlapämaj y imanir respetanäpa cajtapis nimaj. Chaynopa öraga sasa captinpis jaucala cawapäcoj cä”.

12. 2 Timoteo 1:5 nishganno, ¿Eunice ali rurashganga imanopataj Timoteuta yanapargan?

¹² (Leiriy 2 Timoteo 1:5). Euniciga ali rurashgancunawan Timoteuta yachachergan, y payga tantiarganchi shimilapita yäracoj mana canapaj (Sant. 2:26). Timoteuga ricarganchi maman imano Jehovata cuyashganta. Y cushishgala Jehovata sirvishgantapis. ¿Eunice rurashganga yanaparganchuraj Timoteuta?, aumi; chaychi Pablupis nergan Timoteuga mamanno yäracoj runa cashganta. Chayno cananpäga manami quiquinlapitachu cargan, sinoga maman ali yäracoj cashganraycurmi. Chaynolami canan wichanpis achca mamacuna rurashganwan wamrancunapa shongunman chayashga (1 Ped. 3:1, 2). ¿Imanotaj gampis chayta ruranquiman?

13. ¿Imanirtaj cristiana mamacunaga Jehovapaj cajcunata puntaman churanman?

¹³ Cawayniquicho Jehovapa cajcunata puntaman churay (Deut. 6:5, 6). Gampis waquin mamacunanochi imaycatapis ruranqui wamrayquicunata ali cuidanayquipaj. Y paycunaraycur tiempuyquita camacächinqui, guellayniquitapis gastanqui. Pero imapitapis masga Diosta mañacunayqui, quiquiqui Bibliata estudianayqui y reuniuncunaman mana faltaypa aywanayqui. Chaynopa Jehovawan amistäniqui ali caycanga y wamrayquicunata y waquintapis rurashgayquicunawan yachachinqui.

14, 15. ¿Imata yachacunqui Leanne, María y Joãopita?

¹⁴ Ricärishun waquin mozu jipashcuna imano maman rurashganta ricar Jehovaman yäracärish. Christine paninchipa juc caj wawan Leanne cayno nin: “Papänë wasëcho caycaptenga Bibliapita yachacärej cächu. Pero mamänëga lapan reuniuncunaman mana faltaypa aywaj. Bibliapita alapa mana yachaycarpis, Jehovapa cajcunata puntaman churashganta ricarmi Jehovaman más yäracärergä. Reuniuncunaman manaraj aywarpis mayna cuentata gocarergä rasunpa caj camino cashganta”.

¹⁵ Mariapa taytanpis familianta castigajshi reuniunman aywapäcushganlapita. Paymi cayno nin: “Mamänëga valurcharcurmi imatapis ruraj. Wamrala caycar öraga Jehovapa cajcunata ruraj cächu waquincunata manchacur. Pero mamänëta mana manchacuypa Jehovapa cajcunata rurashganta ricarmi, waquin ima nimashgantapis manchacurgänachu”. João muzupa taytanpis manash munarganchu wasincho Jehovapita parlapäcunanta. Cayno nin: “Mamänëga sasa captinpis taytäta cushichinanpaj imaycatapis rurajmi, pero Jehová Diosta cuyashgantaga imapis ushacächishgachu”.

16. ¿Cristiana mamacuna ali rurashgancunaga waquincunata yanapangachuraj?

¹⁶ Ali rurashgayquega waquinta yanapanmanmi. Apóstol Pablupis Eunice ali rurashganpita yachacurganchi. Chaymi Pablo nergan Timoteuta gampis Jehovaman yäracunqui mamayqui yäracushganno (2 Tim. 1:5). ¿Y imanopataj Pablo chayta musyargan? Capazchi ari Listraman aywar Loidawan Eunicita yanapargan cristianaman ticrananpaj (Hech. 14:4-18). Chaymi 15 watana pasaptinpis Timoteuman cartanta apachiptin Eunice yäracoj cashganpita  yarparaycargan. Chauraga Jehovaman Eunice yaracushganga yanapargan apóstol Pabluta y waquin cristianucunatapis. Gampis japalayqui wamrayquicunata ashmaycarga o majayqui Diosta mana sirviycaptinpis, calpachacushgayquega manami yangalapächu canga, waquincunataga yanapangami.

17. ¿Imata ruranquiman wamrayqui Diospita yachachishgayquita mana chasquicojno captenga?

¹⁷ ¿Y wamrayqui Jehovapita yachachishgayquita mana chasquicojno captin? Tiempuwanrämi ricanqui chasquicushganta o mana. Fotucunacho ricashgayquino juc muruta muruptiquega capazchi tapucunqui ‘¿cay plantaga winarcur wayumungachuraj?’ nir. Imano cananpa cajta mana musyarpis gamga jinala yacuta winapanqui chay planta shumaj winananpaj (Mar. 4:26-29). Chaynolami gampis tapucunquiman Diospita yachachishgayqui wamrayquita shongunman chayashganta o mana. Imano cananpa cajta mana musyarpis gampa jinala calpachacunqui wamrayqui espiritual cajcho pogunanpaj (Prov. 22:6).

18. ¿Imataraj Jehová ruranga wamrayquicuna espiritual cajcho pogunanpaj?

¹⁸ Unaypitami Jehovaga yanapash mozo jipashcuna amigun cananpaj (Sal. 22:9, 10). Chaynolami canan wichanpis  wamrayquicunata yanapanga paycuna munaptenga (1 Cor. 3:6, 7). Wamrayquicuna Jehovapita raquicajno caycaptinpis, payga jinalami cuyacuywan ricaycanga (Sal. 11:4). Y quiquincuna Jehovata casucuyta munaptenga payga listumi caycanga yanapänanpaj (Hech. 13:48; 2 Crón. 16:9). Gamtapis Jehová yanapäshunquimi shumaj tantiarcur ali shimilapa wamrayquicunata parlapänayquipaj (Prov. 15:23). Jehovaga imalatapis rurangami waquin hermanucuna wamrayquicunata cuyacuywan yanapänanpaj. Y pogush mozuna caycaptinpis , Jehovaga yarpächengami wamra caycaptin yachachishgayquita (Juan 14:26). Wamrayquicunata rurashgayquiwan y parlashgayquiwan jinala yachachinayquipaj calpachacuptiquega Jehová bendicishunquimi.

19. ¿Imanirtaj seguro caycanqui Jehová ali nawilanwan ricaycäshushgayquipita?

¹⁹ Wamrayquicuna Jehovata cäsucäriptin o manapis, Jehovaga gamtaga cuyashunquimi. Gam cuyaptiquimi payga cuyashunqui. Wamrayquicunata japalayqui ashmaycarga o majayqui Diosta mana sirviptinpis, ama gongaychu Jehovaga yanapäshunquimi y wamrayquicunapäpis juc taytanomi canga (Sal. 68:5). Wamrayquicuna mozuna captenga quiquincunapitami canga Diosta sirvinanpaj o manapis. Jehovaman jinala yäracurga y sirvinayquipaj calpachacuycarga payga aprobaciunintami goyculäshunqui.