1, 2. a) ¿Pin Eunice karan, imata ruwaymi Eunicepaq sasa kanman karan? b) Tapanpi kaq dibujopi rikusqanchis jina, ¿imatan Eunicepas Loidapas Timoteopas ruwashanku?

 MANAÑA Bibliapi willanchu Timoteoq bautizakusqanmanta chaypas mamitan Euniceqa anchatachá kusikuran wawanpa bautizakusqanta rikuspaqa (Prov. 23:25). Timoteoq abuelan Loidapas kusisqachá chay p’unchayqa kasharan. Ichaqa manapaschá Eunicepaqqa facilchu karan wawan Timoteoman Jehová Diosmanta Jesusmantawan yachachiyqa.

² Timoteoq tayta-mamanqa manan kaq religionniyoqchu karanku. Mamitan Eunicepas abuelan Loidapas judía warmikunan karanku, taytanmi ichaqa griego runa karan (Hech. 16:1). Tiempowanqa Jesuspa qatikuqninkunan Eunicepas Loidapas kapuranku. Yaqachus jina chay kutipaqqa waynachaña Timoteoqa kasharan. Chaymi ajllakunan karan mamitan jinachus Jesusta qatikuyta munaran, icha papan jinachus griego runa kayta munaran chayta.

3. Proverbios 1:8, 9 nisqan jina, ¿imaynatan Jehová Dios qhawarin hermananchiskuna wawankuman Diosmanta yachachisqankuta rikuspa?

³ Kay tiempopi wawayoq hermananchiskunapas Eunice jinan anchata wawankuta munakunku, chaymi kallpachakunku wawankuman Diosmanta yachachinankupaq. Chay ruwasqankuta rikuspaqa anchatachá Jehová Diosqa kusikun (leey Proverbios 1:8, 9). Sasaña wakin hermananchiskunapaq wawankuta  uyway kanman chaypas Jehová Diosmi paykunataqa yanapashan.

4. ¿Ima sasachakuykunapin kay tiempopi wawayoq hermananchiskuna tarikunku?

⁴ Wawayoq hermananchiskunaqa maytachá munanku llapa wawanku Jehová Diosta servinankuta. Ichaqa kay tukukuy p’unchaykunapi wawankuta uywayqa manan facilchu, Satanasmi kay tiempopiqa wawakunata imaymanamanta engañashan (1 Ped. 5:8). Chaymantapas wakin hermananchiskunaqa sapallankun wawankuta uywanku otaq qosanku mana testigochu kanku. Chaymi paykunapaqqa sasa kallanmantaq wawankuta uyway, Diosmanta yachachiypas. Christina hermananchismanta yachasun. b Paymi nin: “Qosayqa anchatan noqatapas wawaykunatapas munakuwanku, ichaqa manan munaqchu wawaykunaman Diosmanta yachachinayta. Chaymi wawaykunata mana yanapayta atispa waqaqraq kani”, nispa.

5. ¿Imakunamantan kay yachachikuypi yachasunchis?

⁵ Mamakuna, qankunaqa atiwaqchismi Eunice jina wawaykichista iñiyninkupi yanapayta, chhaynapi Jehová Diosta servinankupaq. Kay yachachikuypin yachasunchis imaynatas mamakuna Eunice jina rimasqankuwan ruwasqankuwan wawankuta iñiyninkupi yanapankuman chayta. Chaymantapas yachasunmi imaynatas Jehová Diospas mamakunata yanapan wawankuta uywanankupaq chayta.

6. 2 Timoteo 3:14, 15 nisqan jina, ¿pin Timoteota yanaparan allin iñiyniyoq kananpaq?

⁶ Euniceqa kallpachakuranmi wawan Timoteoman juch’uychanmantapacha Diosmanta yachachinanpaq. Chay tiempopi pisillataña Jesusmanta yacharan chaypas tukuy tiempon yachachishallaran. Chaymi Timoteoqa tiempowan allin iñiyniyoq kapuran, jinaspa Jesuspa qatikuqnin kapuran. Euniceq ruwasqanqa manan yanqapaqchu karan, payqa allintan Timoteota yanaparan (leey 2 Timoteo 3:14, 15). Eunice sutiqa “atipay” ninantan nin. Chay sutinpa nisqanman jinan Euniceqa kallpachakuran sasachakuykunata atipaspa Timoteota iñiyninpi yanapananpaq.

7. ¿Imakunapin Eunice wawan Timoteota yanaparan iñiyninpi wiñarishanallanpaq?

⁷ Kusisqaña Eunice kasharan wawan Timoteo bautizakusqanmanta chaypas yanapashallaranmi aswan allin iñiyniyoq kananpaq, mana allin amigokunamanta cuidakunanpaq, allinta piensaspa imatapas ruwananpaq, Atenas llaqtapi estudiaymantaqa Jehová Diosta astawan servinanpaq. Chaymantapas yanaparanmi Jehová Diosta Jesustawan astawan munakushanallanpaq. Mamakuna, sapallaykichisña otaq qosaykichiswanña wawaykichista uywashankichis chaypas manapaschá facilchu kanqa paykunata iñiyninkupi yanapayqa. Ichaqa, ¿imakunata ruwaspan qankunapas Eunice jina wawaykichista iñiyninkupi yanapawaqchis?

8. ¿Imaynatan esposakuna qosankuta yanapankuman wawankuta iñiyninkupi yanaparinankupaq?

⁸ Wawaykichiswan kuska Bibliata estudiaychis. Mamakuna, sichus qosaykichis Jehová Diosta servishan chayqa paykunata yanapaychis Bibliata familiapi sapa semana estudianaykichispaq. Jinaspapas chay p’unchaypi estudianaykichispaq allinta preparakuychis, chhaynapin wawaykichispaq allin ejemplo kankichis. Chaymantapas qosaykichista yanapaychis imamantas sapa semana familiapi  estudiawaqchis chayta qhawarinaykichispaq. Sichus wawaykichis atinmanña Kusisqa kausay nisqa librota estudiayta chayqa qosaykichista yanapaychis kuska wawaykichisman yachachinaykichispaq.

9. ¿Imakunata ruwaymi hermananchiskunata yanapanman wawankuta allinta uywanankupaq?

⁹ Wakin hermananchiskunaqa yaqapaschá sapallanku wawankuta uywashanku. Chhaynaña kaqtinpas kallpachakunankun wawankuman Bibliamanta yachachinankupaq, chayta ruwaqtinkuqa Jehová Diosmi paykunata yanapashallanqa. Chaymantapas Diospa llaqtanpi qelqanchiskunatan wawankuwan kuska estudiankuman. Chaypaqqa iñiq t’aqapi tayta-mamakunatan tapurikunkuman ima qelqakunas paykunata yanaparan wawankuta iñiyninkupi yanapanankupaq chayta c (Prov. 11:14). Chaymantapas mamakunaqa Jehová Diospa yanapaynintan mañakunanku wawankuta allinta reqsinankupaq. Chay qhepamantaq wawankuta tapurinanku imayna kashasqankuta, chhaynapin paykunata allinta yanapanqaku (Prov. 20:5).

10. ¿Imakunatan mamakuna ruwanallankutaq wawanku Jehová Diosta munakunankupaq?

¹⁰ Maypiña kashaspapas Jehová Diosmanta wawaykichisman yachachiychis. Mamakunaqa kallpachakunankun wawankuman maypiña kashaspapas Jehová Diosmanta rimapayanankupaq. Wawankumanmi willankuman imaynatas Jehová Dios paykunata yanaparan chayta. Chayta ruwaspan wawankuta yanapanqaku Jehová Diosta munakunankupaq (Deut. 6:6, 7; Isa. 63:7). Wakin hermananchiskunaqa manapaschá wawankuman wasipi Jehová Diosmanta yachachiyta atinkuchu. Chhayna kaqtinqa Christina hermananchismanta yachaymi paykunataqa yanapanman. Paymi nin: “Qosayqa manan munaranchu wawaykunaman Jehová Diosmanta yachachinayta. Chhaynaña kaqtinpas kallpachakuranin wawaykunawan paseaq rinapaq. Mayninpiqa lamar-qochatan riq kayku Jehová Diospa kamasqankunamanta wawaykunaman yachachinaypaq. Chaymantapas wiñasqankuman jinan kallpacharani Bibliata estudianankupaq”, nispa. Chaymantapas mamakunaqa kallpachakunankun Jehová Diosmanta llaqtanta pusariq umalliqkunamantapas allinta rimanankupaq. Chayta ruwaspan wawankuta yanapanqaku umalliqkunapi confianankupaq, tiempowanqa yaqapaschá umalliqkunaq yanapayninta maskhankuman.

11. Santiago 3:18 nisqan jina, ¿imatan mamakuna ruwananku familiankuwan thaj kausanankupaq?

¹¹ Familiaykichiswan thajpi kausanaykichispaq yanapakuychis. Mamakunaqa rimasqankuwan ruwasqankuwan iman rikuchinanku qosankutapas wawankutapas munakusqankuta. Chayta ruwanqaku chayqa thajpin familiankuwan kausanqaku, wawankumanpas facil-llatan Diosmanta yachachinqaku (leey Santiago 3:18). Yachasun Rumania nacionpi tukuy tiemponwan Jehová Diosta serviq Jozsef hermanonchismanta. Papanqa manas munasqachu paypas mamitanpas kinsantin wayqenkunapas Bibliata estudianankuta. Paymi nin: “Manaña papay munaranchu Bibliata estudianaykuta chaypas mamitayqa anchatan papayta respetaq. Chaymantapas wayqeykunatawanmi yanapawaranku papayta respetanaykupaq kasukunaykupaq ima, chaypaqmi leepuwaqku  Efesios 6:1-3 textokunata. Mamitayqa allintan papaymanta rimaq, chhayna kasqanmi yanapawaranku familiapi thaj kausanaykupaq”, nispa.

12. 2 Timoteo 1:5 nisqan jina, ¿iman Timoteota yanaparan allin iñiyniyoq kananpaq?

¹² (Leey 2 Timoteo 1:5). Euniceqa allin ejemplon wawan Timoteopaq karan, payqa ruwasqanwanmi wawanta yanapallarantaq allin iñiyniyoq kananpaq (Sant. 2:26). Timoteoqa repararanchá mamitanqa Jehová Diosta munakusqanta kusisqa servisqantapas, chaymi Timoteotaqa yanaparan allin iñiyniyoq kananpaq, chaytan apóstol Pabloqa sut’ita repararan. Chhaynatan kay tiempopi wakin mamakunapas ejemplonkuwan wawankuta yanapashanku allin iñiyniyoq kanankupaq (1 Ped. 3:1, 2).

13. ¿Imaraykun mamakuna Jehová Dios serviyta ñaupaqman churananku?

¹³ Jehová Dios serviytan ñaupaqman churanaykichis (Deut. 6:5, 6). Mamakunaqa imaymanatan ruwanku wawankuman necesitasqankuta qonankupaq, chaymi mayninpiqa manaña tiemponku kanchu samarinankupaqpas. Chhaynaña kaqtinpas kallpachakunankun sapa p’unchay Jehová Diosmanta mañakunankupaq, Bibliata leenankupaq, juñunakuykunamanpas rinankupaq. Chay ruwaykunata ñaupaqman churanqaku chayqa allin iñiyniyoqmi kanqaku, wawankupaqpas allin ejemplon kanqaku.

14, 15. ¿Imatan yachasunman Leanne, María, João iñiqmasinchiskunaq willakusqankumanta?

¹⁴ Mamakunaqa ejemplonkuwanmi wawankuta yanapankuman allin iñiyniyoq kanankupaq. Christina hermananchispa Leanne ususinmi nin: “Manaña papay munaranchu wasipi Bibliata estudianaykuta chaypas mamitayqa manan jayk’aqpas juñunakuykunamanqa faltakuqchu. Payqa allin iñiyniyoqmi karan, chhayna kasqanmi yanapawaranku noqaykupas allin iñiyniyoq kanaykupaq. Noqaykuqa sut’itan repararayku Jehová Diospa testigonkunaqa cheqaq religión kasqankuta”, nispa.

¹⁵ María hermananchismi nillantaq: “Papayqa manan munaranchu juñunakuykunaman rinaykuta, chaymi mayninpiqa juñunakuykunaman riqtiyku castigawaqku. Chaywanpas mamitayqa Jehová Dios serviytan ñaupaqman churaran, chaymi noqatapas yanapawaran imaña kaqtinpas Jehová Diosta servishanallaypaq”, nispa. João iñiqmasinchismi nillantaq: “Papayqa manan munaranchu wasipi Diosmanta rimanaykuta. Mamitayqa anchatan papayta munakuran, ichaqa Jehová Diostan astawanqa munakuran. Chaymi imaymanata ruwaran Jehová Diosta servinanpaq”, nispa.

16. ¿Imaynatan mamakunaq ejemplon jujkunata yanapanman?

¹⁶ Euniceq ejemplonqa anchatan apóstol Pablotapas yanaparan. Chaymi Timoteota niran: “Yuyarillanipunin tukuy sonqo iñiq kasqaykita, chhayna iñiqmi karan jatun mamayki Loidapas mamayki Eunicepas”, nispa (2 Tim. 1:5). Apóstol Pabloqa yaqapaschá chayllaraq Listra llaqtaman rishaspa Eunicetapas Loidatapas reqsiran. Yaqapaschá chay kutipi repararan Eunicepas Loidapas allin iñiyniyoq kasqankuta, jinaspa paykunata yanaparan Jesuspa qatikuqnin kanankupaq (Hech. 14:4-18). Apóstol Pabloqa 15 watakuna qhepamanpas carta apachisqanpin Timoteota niran mamitan Eunice allin iñiyniyoq kasqanta. Euniceq  ejemplonqa anchatachá juj cristianokunatapas yanaparan. Kay tiempopipas wakin hermananchiskunaqa Eunice jinan allin iñiyniyoq kanku, wawankutapas yanapankun Jehová Diosta servinankupaq. Chhayna kasqankuqa anchatan juj iñiqmasinchiskunatapas iñiyninkupi yanapan.

17. ¿Imaraykun mamakuna kallpachakushanallanku iñiyninkupi wawankuta yanapanankupaq?

¹⁷ Anchataña mamakuna kallpachakunkuman wawankuta iñiyninkupi yanapanankupaq chaypas manapaschá yachachisqankuman jinachu imatapas ruwanqaku. Chhayna kaqtinqa manan pisikallpayanankuchu, wawakunata yachachinapaqqa tiempotan necesitakun. Dibujokunapi rikusqanchis jina ima mujutapas t’akaspaqa yaqapaschá nisunman: “Kay t’akasqay mujuqa manapaschá wiñamunqachu”, nispa. Chhaynataña piensasunman chaypas chay mujutaqa qarpashallanchismi jatunta wiñanankama (Mar. 4:26-29). Mamakunapas yaqapaschá ninkuman: “Manapaschá allintachu wawaytaqa Jehová Diosmanta yachachishani”, nispa. Llapa mamakunapas munankun wawanku Jehová Diosta servinankuta, chayraykun kallpachakushanallanku wawankuta iñiyninkupi yanapanankupaq (Prov. 22:6).

18. ¿Imakunata ruwaspan Jehová Dios wawaykichista yanapanqa?

¹⁸ Jehová Diosqa ñaupa tiempomantapachan wayna-sipaskunata yanapashan paywan  allin amigontin kanankupaq (Sal. 22:9, 10). Mamakuna, chhaynatan Jehová Diosqa wawaykichistapas yanapanqa iñiyninkupi wiñarinankupaq (1 Cor. 3:6, 7). Jehová Diosmantaña wawaykichis t’aqakunman chaypas manan saqerparinqachu (Sal. 11:4). Jehová Diosqa liston kashan wawaykichista yanapananpaq (Hech. 13:48; 2 Crón. 16:9). Mamakuna, Jehová Diosmi yanapasunkichis rimasqaykichiswan ruwasqaykichiswan wawaykichista yanapanaykichispaq (Prov. 15:23). Chaymantapas Jehová Diosqa juj hermanokunawanmi wawaykichista yanapanman. Kuraqña wawaykichis kapuqtinpas Jehová Diosmi paykunata yanapanqa yachachisqaykichista yuyarinankupaq (Juan 14:26). Chayrayku kallpachakushallaychis rimasqaykichispi ruwasqaykichispi allin ejemplo kanaykichispaq, chhaynapin Jehová Diospas bendecisunkichis.

19. Mamakuna, ¿imata ruwanaykichispaqmi kallpachakushanallaykichis?

¹⁹ Mamakuna, manaña wawaykichis Jehová Diosta servinkumanchu chaypas Jehová Diosqa anchatan munakusunkichis. Wakinniykichisqa yaqapaschá sapallaykichis wawaykichista uywashankichis otaq qosaykichis Jehová Diosta mana servinchu. Chhaynaña kaqtinpas Jehová Diosmi yanapasunkichis wawaykichista iñiyninkupi yanapanaykichispaq (Sal. 68:5). Imaymanataña ruwarankichis wawaykichista yanapanaykichispaq chaypas paykunan ajllakunanku kanqa Jehová Diosta servinqakuchus icha manachus chaytaqa. Chaywanpas kallpachakushallaychis wawaykichista yanapanaykichispaq, chhaynapin Jehová Diosqa allinpaq qhawarisunkichis.