1, 2. a) Euniceca ¿pita carca? Paica ¿ima jarcaicunatata charirca? b) Callari paginapa fotopa revistapica ¿imatata ricupangui?

 TIMOTEO bautizarishcamandaca Bibliapica na imatapash nijunllu. Timoteo bautizarijpica paipa mamaca ninandami cushijurianga (Prov. 23:25). Timoteo ña bautizaringapaj yacupi shayajujta ricushpaca, paipa mamaca ninandami cushijushcanga. Timoteo ña bautizarigrijujpi paipa mama cushijushpa asishpa ricushpa shayajujpi, paipa abuela Loidapash paipaman quimirishpa Timoteopa mamata ugllarishpa shayarijushcapi, Timoteo ña bautizarishpa yacumanda llujshijpi cushijuimanda paipa mama huacashpa ricujushcapi pensaripashunchi. Timoteoman Jehová Diosmanda yachachina na fácil cajpipash, Jehová Diosta juyanata, Jesusta juyanatami paica yachachi ushashca. Timoteopa mamaca ¿ima jarcaicunatata mishai usharca?

² Timoteopa mama, paipa abuelaca judiocunami carca. Cutin, paipa taitaca griegomi carca. Timoteopa mamallami Jehová Diostaca sirvirca (Hech. 16:1). Timoteopa mama Eunice, paipa abuela Loida Jehová Diosta sirvi callarijpica, Timoteoca chairalla viñaj jovenmi cashcanga. Timoteopa taitaca Jehová Diosta sirvingapaca na munarcachu. Timoteo chairalla viñaj joven cashpapash Jehová Diosta sirvinata o na sirvinata decidingapaca ñami suficiente edadta charirca. Shinaca Timoteoca ¿imatashi rurarca? ¿Paipa taitapa religionda catinatacha decidirca? ¿Judiocunapa costumbreta catinatacha decidirca? O na cashpaca ¿Jehovata sirvinatacha decidirca?

3. Proverbios 1:8, 9​pi nishcashnaca, huahuacunata ayudangapaj mamacuna ninanda esforzarijtaca Jehová Diosca ¿imashinata ricun?

³ Eunice huarmigu cuendallatami Jehová Diosta sirvij mamacunaca paicunapa familiataca juyan. Chaimandami paicunapa huahuacunata Jehová Diospa amigo tucuchun ayudangapaj munaita charin. Chaica Jehová Diospa ricuipica ninan valishcami can (Proverbios  1:8, 9​ta liipangui). Jehová Diosca ashtaca mamacunatami huahuacunata Jehová Diosta juyashpa sirvinata yachachi ushachun ayudashca.

4. Cunanbi huaquin mamacunaca ¿ima llaquicunatata charin?

⁴ Timoteoshna Jehová Diosta ñuca huahuacunapash sirvingachu imashi nishpa, mamacuna huaquinbi pensarinaca normalmi can. Shinapash paicunapa huahuacuna cai mundopi ashtaca jarcaicunata charinataca alimi yachan (1 Ped. 5:8). Huaquinbicarin huaquin mamacunaca, paicunallami paicunapa huahuacunataca viñachina tucushca. Cutin huaquinbica huaquin panigucunapa cusacunaca Jehová Diostaca na sirvinllu. Por ejemplo Christine b paniguca: “Ñuca cusaca ali taitami carca, paica ñucanchitaca ninandami juyan carca. Pero ñuca huahuacunata Jehová Diosmanda yachachichunga na munanllu carca. Chaimandami huaquinbica, ñuca huahuacunaca ima horapash Jehová Diosta sirvingachu imashi yashpa huacan carcani” ninmi.

5. Cai yachajuipica ¿imata yachajugripanchi?

⁵ Quiquinbash Eunice huarmigu cuendallata, quiquinba huahuacuna Jehová Diosta juyashpa sirvichun ayudaitaca ushapanguimi. Cai yachajuipica imashina Eunice huarmigupa ejemplota catinamanda, shinallata imashina ñucanchipa ejemplohuan ñucanchi huahuacunaman yachachinatami ricugripanchi. Shinallata ñucanchi huahuacunata ali yachachichun, Jehová Dios imashna ayudajtapashmi ricugripanchi.

6. 2 Timoteo 3:14, 15​pi nishcashnaca ¿imashnata Timoteoca Jehová Diosta sirvi usharca?

⁶ Timoteo chairalla nacirishcamandapachami paipa mama Euniceca, Taita Diospa yachachishcacunata yachachingapaca ninanda esforzarirca. Timoteopa mamaca judía caimandami, Taita Diospa shimimandaca ña ashaguta yachashca carca. Pero Taita Diosmanda huaquinguta yachashpapash tucuitaca na yacharcachu, Jesusmandacarin nimata na yacharcachu. Shinapash paica Timoteomanga, Jehová Diosta sirvij tucuchunga ali yuyaicunatami yachachirca. Shinaca, Timoteoca Jehová Diosta sirvinata ¿decidircachu? Timoteoca paimandallata Jehová Diosta sirvinata o na sirvinata decidingapaca ñami edadta charirca. Timoteotaca, paipa mamapa yachachishcacunami Jesusmanda cabalta yachachishcacunapi crichunga ayudarca (2 Timoteo 3:14, 15​ta liipangui). Timoteopa mama Euniceca Jehová Diosmanda paiman yachachita ushashcamandaca ninandami cushijurianga. Eunice shutica huaquin jarcaicunata mishashcatami nijun. Eunice huarmiguca paipa churi Timoteota Jehová Diosmanda yachachingapaca huaquin jarcaicunatami mishana tucurca.

7. Timoteo bautizarishca jipa ashtahuan Jehovata sirvichunga ¿imashinata paipa mamaca ayudarca?

⁷ Timoteo Jehová Diosta sirvingapaj ña bautizarirca nishpallapash paipa mamaca na yangata chaipi saquircachu. Paica cunanmanda vichaica Timoteoca ¿imatashi ruranga? Nali cumbacunaiman pandachingapashchari. Atenas llactapi estudiangapaiman rishpa, panda yachachishcacunataraiman catingapashchari. Paipa tiempota, paipa joven cashca causaitapash yanga desperdiciashpa, culquipiraiman empeñaringapashchari yashpami pensarishpa quedashcanga. Shina preocuparijushpapash Timoteo imata ruranata paipa mama deciditaca na usharcachu. Pero pai na decidina cashpapash Jehová Diosta juyanata, Jesusta agradicinata yachachishpami ayudaita usharca. Taitamamacuna, ishcandi testigo de Jehovacuna cajpipashmi huahuacunata Jehová Diosta tucui shungu sirvinata yachachinaca shinlli ricurin. Shinaca, Eunice huarmigumandaca taitamamacunaca ¿imatata yachajui ushapan?

8. Testigo Jehová cusata charishpapash huarmiguca ¿imashinata huahuacunata Jehovamanda yachachinapica cusata ayudaitaca ushan?

⁸ Huahuacunahuan Bibliata yachajungapaj tiempoguta llujchipai. Cusa testigo de Jehová cajpipash huahuacunata Jehovamanda yachachingapaca huarmicunapash ayudachunmi Jehová  Diosca munan. Huarmicunaca cada semana familiahuan Bibliata estudiangapaj tiempoguta llujchingapaj apoyashpa, familiahuan Bibliata estudiana minishtirishca cashcata ricuchishpa, familiahuan Bibliata estudiajuj horas tucuicuna cushilla, tranquilo yalingapaj arreglocunata rurashpami ayudaita ushan. Shinallata, familiahuan imata estudianata ricushpapashmi cusataca ayudaita ushan. Huahuacunaca na tucuillaca igualchu can. Huaquinbica shuj huahuaca ashtahuan yachachinatami minishtin. Chaita ricushpaca huarmigupash, Para siempre cushilla causapashunchi nishca librota huahuaman yachachishpa cusataca ayudanallami can.

9. Huahuacunata ali viñachingapaca cusacuna na testigo cajpipash mamacunaca ¿ima ayudacunatata charin?

⁹ Huaquin mamacunaca cusata na charishcamanda o cusacuna na testigo cashcamandami huahuacunamanga paicuna Jehová Diosmanda yachachina responsabilidadta charin. Quiquin chashna rurana tucujpica, ama preocuparipaichu Jehová Diosmi ayudanga. Huahuacunata Jehová Diosmanda yachachingapaj Jehová Diospa organización llujchishca publicaciongunata aliguta aprovechapai. Shinallata, shuj taitamamacuna paicunapa huahuacunata yachachingapaj imashna Jehová Diospa organización llujchishca informacionda utilizanajujtapash tapupai c (Prov. 11:14). Huahuacuna imata pensajta, imata sintijta ali intindi ushangapaj ayudahuai nishpa Jehová Diosta mañapangui (Prov. 20:5). Talvez, “escuelapica imata ashtahuan difícil ricurin” nishpa tapunami, ali parlocunata charichun ayudaita ushanga.

10. Huahuacuna Jehová Diosta rijsichunga ¿imashinata ashtahuan ayudaita ushapangui?

¹⁰ Huahuacunaman Jehová Diosmanda yachachina oportunidadta mascapai. Jehová Diosmanda, Jehová imashina ayudashcacunamandami huahuacunamanga parlana capangui (Deut. 6:6, 7; Is. 63:7). Huahuacunaman huasipi Bibliamanda yachachina difícil cajpica, siempremi maipi cashpapash Bibliamanda yachachingapaj oportunidadta mascana can. Párrafo 4​pi parlashca Christine paniguca: “Huahuacunaman huasipi Jehová Diosmanda yachachina na fácil cajpimi, maipi cashpapash Jehová Diosmanda parlangapaj tiempoguta aprovechan carcani ninmi. Ñucaca puringapaj llujshishpa, huaquinbica canoapi tiarishpa, canoapi carullaguta rishpami, ñuca huahuacunamanga, Jehová Dios juyailla imacunatapash rurashcacunamanda, shuj shuj cosascunata Jehová Dios rurashcacunamanda parlangapaj aprovechan carcani ninmi. Shinallata, ñuca huahuacuna ashtahuan ña jatunllagucuna cajpica, paicunallata Bibliaguta yachajuchunmi animan carcani” ninmi. Huahuacunamanga Jehová Diospa organizacionmanda, anciano huauquicunamandaca ali cosascunatami parlana capangui. Shinami paicuna ima horapash ayudata minishtishpaca, tranquilo anciano huauquicunapa ayudata mascaita ushanga.

11. Santiago 3:18​pi nishcashnaca huasipi ama fiñanajuicuna tiachun ayudanaca ¿imashpata importante can?

¹¹ Huasipi ama fiñanajuicuna tiachun ayudapai. Quiquinba cusata, huahuacunata siempre juyaihuan parlana costumbretami charina capangui. Quiquinba cusahuan parlajushpaca juyaihuan respetohuanmi parlana capangui. Quiquimba huahuacunapash taitata shinallata tratachunmi yachachina capangui. Shina rurajpimi huasipi na fiñanajuicuna tiashpa, Jehová Diosmanda yachajungapapash ashtahuan facillla capanga (Santiago 3:18​ta liipangui). Jozsef huauquipa ejemplota ricupashunchi. Paica Rumania llactapimi precursor especial can. Paipa taitaca, pai uchillagu cajpica paicunata Jehová Diosta sirvichun saquingapaca nimamanda na munanllu cashca. Jozsef huauquica: “Ñuca mamitaca huasipi ama fiñanajuicuna tiachunga ninandami esforzarin carca. Ñuca papito culira cajpica, ñuca mamitaca ashtahuan ali ali cashcata ricuchingapajmi ninanda esforzarin carca ninmi. Ñuca papitota cazungapaj, respetangapaj na munanajujpica, ñuca mamitaca Efesios  6:1-3​ta ñucanchiman yachachishpami, mamitaca papito tauca cosascunapi ali cashcata intindichishpa, papitota respetana cashcata yachachin carca. Shinami mamitaca huasipi tranquilo causaita charichun ayudan carca” ninmi.

12. 2 Timoteo 1:5​pi nishcashnaca ¿imashinata Timoteotaca paipa mamapa ejemploca ayudarca?

¹² (2 Timoteo 1:5​ta liipangui). Eunice shuti huarmiguca paipa churi Timoteomanga ali ejemplohuanmi yachachirca. Eunice huarmiguca, Taita Diospi crishcataca ñucanchi rurashcacunahuan ricuchina cashcatami Timoteomanga yachachirca (Sant. 2:26). Timoteoca paipa mamita Jehová Diosta ninanda juyaimanda, Jehová Diosta sirvingapaj esforzarijtami ricurca. Shinallata Jehová Diosta sirvishpa paica cushilla cajtami cuenta urmashcanga. Chai ali ejemplocunaca ¿imashinata Timoteotaca ayudarca? Apóstol Pabloca Timoteoca paipa mamashnallatami Taita Diospica tucui shungu feta charij nircami. Timoteoca paipa mamapa ejemplota catimandami shina carca. Ashtaca mamacunami Timoteopa mamashna paicunapa ali ejemplohuan paicunapa familiataca Taita Diospi crichun ayudashca (1 Ped. 3:1, 2). ¿Quiquinga imashinata quiquinba ali ejemplohuan ayudapanguiman?

13. Mamacunapaca ¿imamandata Jehová Dioshuan ali amigo cana ashtahuan importante cana can?

¹³ Tucuimandaca Jehová Dioshuan ali amigo canami ashtahuan importante cana can (Deut. 6:5, 6). Como tucui mamacunashnallatami quiquinbash seguramente quiquinba familiata cuidangapaca ninanda esforzarijupangui. Huaquinbica samanata, quiquinba tiempotapash huashaman saquishpami huahuacunapa minishtirishcacunapica ocuparina tucupashcangui. Shuj shuj cosascunatami huaquinbica saquina tucushca. Shina ashtaca cosascunapi ocupado cashpapash Jehová Dioshuan ali amigo cangapaj tiempoguta llujchinataca nunca na saquinachu capangui. Jehová Diosta mañangapaj, estudio personalta rurangapaj, Bibliata liingapaj, reuniongunaman ringapaca siempremi tiempoguta llujchina capangui. Shinami Jehová Dioshuan ashtahuan ali amigo tucushpa quiquinba familiapa, shuj gentecunapa ricuipipash ashtahuan ali ejemplo caita ushapangui.

14, 15. Leanne, María, shinallata João shuti huauquigumandaca ¿imatata yachajuita ushapanchi?

¹⁴ Mamacunapa ejemplota catishpa, Jehová Diosta juyanata, Jehovapi confianata yachajushca huaquin jovengunamanda parlapashunchi. Christine panigupa ushi Leannega: “Ñuca papitoca huasipi Bibliata yachajuchunga nimamanda na saquinllu carca. Shinapash ñuca mamitaca reuniongunamanga nunca na faltanllu carca. Bibliamanda na ashta ali yachashpapash, ñuca mamitapa rurashcacunata ricuna, paipa ejemplota catinami Jehová Diospi tucui shungu feta charichunga ayudarca ninmi. Shinallata ñucanchicunaca reuniongunamanbash nara rishpallatami testigo de Jehovacuna ciertota yachachijtaca seguro carcanchi” ninmi.

¹⁵ María shuti panigupa taitaca, reuniongunaman rishcamandami paicunataca castigan carca. María paniguca: “Ñuca mamitaca tucuita aguantashpa, na manllashpa Jehová Diosta sirvijtami ricurcani. Ñuca uchillagu cashpaca gentecuna imatapash ninataca ninandami manllan carcani. Pero ñuca mamita tucuita aguantashpa Jehová Diospa mandashcacunata primero churangapaj esforzarijta ricunami, ñucatapash chai manllaicunata ladoman saquichun ayudahuarca” ninmi. Cutin João shuti huauquiguca, paipa taita prohibishcamandami, paipa familiahuan huasipi Jehová Diosmanda parlaitaca nimamanda na ushan carca. João shuti huauquiguca: “Ñuca papito huasipi ama culirarijuchun, ñuca mamita tucuita rurashpapash Jehová Diosta sirvinataca nunca na huashaman saquinllu carca” ninmi.

16. Mamacunapa ali ejemplocunaca ¿imashinata shuj huauquipanicunatapash ayudaita ushan?

¹⁶ Ñucanchipa ejemplocunaca shujcunaman ashtacatami yachachita ushan. Apóstol Pablo Eunice huarmigumanda imata nishcata yaripashunchi.  Apóstol Pabloca Timoteopa mamami shinlli feta Taita Diospi charishcataca primeroca ricuchirca nishpami escribirca (2 Tim. 1:5). Eunice huarmigu tucui shungu Taita Diospi feta charishcataca, apóstol Pabloca ¿ima horata ricushcanga? Talvez Apóstol Pabloca, Loida shuti huarmiguta, Eunice shuti huarmigutaca llactacunata primera vez visitai callarijushpami, Listra llactapi paicunataca rijsirianga. Seguramente paicuna bautizarishpa Jehová Diosta sirvichunga apóstol Pablomi ayudarianga (Hech. 14:4-18). Apóstol Pablo 15 huatacuna jipa Timoteoman escribijushpaca, Eunice huarmigu tucui shungu Taita Diospi feta charishcataca yarijurcarami. Chaimandami paipa ejemplota catichun escribirca. Eunice shuti huarmigupa ejemploca, apóstol Pablotaca seguromi ninanda ayudarianga. Shinallata, chai tiempopica shuj huauquipanicunatapash ninandami ayudarianga. Cunan tiempopipash cusacuna na testigo cajpi, mamacunalla huahuacunata Jehovamanda yachachishpa viñachingapaj esforzarishcacunaca shujcunataca ninandami ñaupaman catichun ayudanga.

17. Jehová Diospa yachachishcacuna huahuacunapa shunguman na chayajujta sintishpaca ¿imatata rurai ushapangui?

¹⁷ Jehovamanda yachachishpa esforzarijujpipash huahuacunapa shunguman na chayajujtashna sintishpaca, huahuacunapa shunguman chayangapaca jatun esfuerzo minishtirishcatami yaipi charina capangui. Cai dibujopi ricushcashnaca, shuj plantaguta ima horapash tarpushpaca, chai plantagu ciertopacha ninanda fucunatapash na seguro yachaita ushapanchichu. Fucunata o na fucunata na seguro cashpapash, yacugucunata siempre plantagupi churashpa catijpimi plantaguca aliguta viñashpa catin (Mar. 4:26-29). Plantaguta cuidajuj cuendallatami huaquinbica mamacunaca,  huahuacuna Taita Diospa yachachishcacunata shungupi charichun ayudajunichu imashi yashpa pensarin. Huahuacunata Taita Diosmanda yachachingapaj ninanda esforzarijpica, shuj plantagu aliguta viñajuj cuendami huahuacunapash Taita Diosta sirvingapaca ali yachachishca yuyaicunahuan viñanga (Prov. 22:6).

18. Huahuacuna Jehová Diospa amigo tucuchunga ¿imashinata Jehová Diosca ayudanga?

¹⁸ Jehová Diosca pundamandapachami ashtaca jovengunata paipa amigo tucuchun ayudashca (Sal. 22:9, 10). Shinaca quiquinba huahuacunapash Jehová Diospa amigo tucungapaj munajpica, Jehová Diosllatami ayudanga (1 Cor. 3:6, 7). Huahuacuna Jehová Diosta sirvina munaita charishcata na ricuchijpipash Jehová Diosca siempremi paicunataca ricurianga (Sal. 11:4). Jehová Diosca huahuacuna paita sirvina munaita ashagutallapash ricuchijpica, Jehová Diosca paicunata ayudangapaca listomi can (Hech. 13:48; 2 Crón. 16:9). Shinallata huahuacuna minishtijujpipacha ima shimicunata quiquin ni ushachunbash Jehová Diosmi ayudanga (Prov. 15:23). Huahuacunata juyaihuan ayudangapaca Jehová Diosca congregacionmanda huauquipanicunatami utilizaita ushan. Mamacuna huahuacuna uchillagu cajpi yachachishcacunataca ashtaca huatacuna yalijpipash, Jehová Diosca mamacuna yachachishcacunata yarichunga ayudangallami (Juan 14:26). Quiquinba huahuacunata quiquinba rurashcacunahuan, ali ejemplota cushpa yachachijpica Jehová Diosca ninandami bendicianga.

19. Quiquinba esfuerzomanda Jehová Dios bendicianataca ¿imamandata seguro capangui?

¹⁹ Jehová Diosta tucui shungu juyashcamandaca quiquinba huahuacuna ima decisionda japijpipash, Jehová Diosca siempremi quiquindaca juyanga. Quiquinba cusa na testigo cajpi, quiquinlla quiquinba huahuacunaman Jehová Diosmanda yachachina tucujpica, Jehová Diosmi quiquinba huahuacunataca taita cuenda ayudanga (Sal. 68:5). Quiquinba huahuacuna Jehová Diosta sirvichun quiquin deciditaca na ushapanguichu. Pero Jehová Diospa ayudapi confiashpa, huahuacunata Jehovamanda yachachingapaj ninanda esforzarijpica Jehová Diosca bendiciangami.