1-2. (a) Koai a Eunike, e eaa i ngatā ei iaia kia apii i tana tamaiti no runga ia Iehova e Iesu? (e) E uriuri i te tutu i te kapi mua.

 NOATU kare te Pipiria i akakite mai no runga i to Timoteo papetitoanga, ka rauka ia tatou i te akamanako i te rekareka o tona metua vaine ko Eunike i tera rā. (Mase. 23:25) Kua mataora aia i te kite anga ia Timoteo e tu ra i roto i te vai. E tona tupuna vaine ko Loi e tu ra i te pae ia Eunike. Kua tukituki to Eunike ngakau te ngaro anga a Timoteo ki raro i te vai. Te oki anga mai aia ki runga ma te mata katakata, kua aue a Eunike no tona mataora. Noatu te au turanga ngatā, kua rauka ia Eunike i te apii i tana tamaiti kia inangaro maata ia Iehova e tana Tamaiti ko Iesu. Eaa te au manamanata tei tupu i tona apii anga i tana tamaiti?

² Kua utuutuia a Timoteo i roto i tetai ngutuare e tuke te akonoanga a te nga metua. E tangata Ereni tona metua tane, e ngati Iuda tona metua vaine e te tupuna vaine. (Anga. 16:1) Penei e mapu ua a Timoteo te riro anga mai a Eunike e Loi ei Kerititiano. Inara, kare tona metua tane i riro mai ana ei Kerititiano. Ko teea akonoanga ta Timoteo ka iki? Ka rauka iaia i te rave i tana uaorai ikianga. Ka piri ainei aia ki tona metua tane? Ka rave ainei aia i te au peu ngati Iuda tei apiiia kiaia i tona meangiti anga? Me ka  inangaro ainei aia kia riro mai ei pipi na Iesu?

3. Ia Maseli 1:8, 9, eaa to Iehova manako me tauturu te au metua vaine i ta ratou tamariki kia riro mai ei oa nona?

³ I teia tuatau, e inangaro ana te au metua vaine Kerititiano i to ratou ngutuare. E ka inangaro ratou i te tauturu i ta ratou tamariki kia akavaitata atu kia Iehova. Te mareka ra te Atua i ta ratou tauta anga. (E tatau ia Maseli 1:8, 9.) E maata te au metua vaine ta Iehova i tauturu kia apii i te tuatua mou ki ta ratou tamariki.

4. Eaa te manamanata te tupu ra ki te au metua vaine i teia tuatau?

⁴ E mea natura ua no tetai metua vaine kia manako i tetai au taime, me ka iki rai tana tamariki kia tavini ia Iehova mei ia Timoteo rai. Kua kite te au metua i te māroanga a teia ao o Satani ki runga i ta ratou tamariki. (1 Pete. 5:8) Pera katoa, te ngatā nei i tetai au metua vaine i te utuutu i ta ratou tamariki ko ratou anake ua me kore kare te tane e akamori ana ia Iehova. Ei akaraanga, karanga te tuaine ko Christine: b “E tangata meitaki taku tane e te akono i tona ngutuare tangata, inara kare aia e inangaro i ta maua tamariki kia riro ei Kite no Iehova. Ka aue ua au ma te manako me ka akamori rai taku tamariki ia Iehova.”

5. Eaa ta tatou ka uriuri i roto i teia atikara?

⁵ Me e metua vaine Kerititiano koe, ka rauka ia koe i te tauturu i taau tamariki, mei ia Eunike rai. I teia atikara, ka uriuri tatou akapeea koe me aru i tona akaraanga no te apii i taau tamariki na roto i taau tuatua e taau ka rave. Ka uriuri katoa tatou akapeea a Iehova me tauturu ia koe.

6. Ia 2 Timoteo 3:14, 15, akapeea a Timoteo te riro anga mai ei Kerititiano?

⁶ I to Timoteo meangiti anga, kua apii tona metua vaine iaia i “te tuatua tapu i tataia ra,” tei apiiia ki te ngati Iuda. E tika, kua kotingaia to Eunike kite no te mea kare ana apinga i kite no runga ia Iesu. Ko ta Timoteo i kite mai mei te au Irava, kua tauturu te reira iaia kia riro ei Kerititiano. Inara, ka āriki ainei aia i te reira? Ei tane mapu, ka rauka ia Timoteo i te iki me ka riro aia ei Kerititiano. Kare ekoko e kua irinaki a Timoteo “i tei tukuia atu” kiaia no Iesu no te akaraanga maroiroi o tona metua vaine. (E tatau ia 2 Timoteo 3:14, 15.) Papu roa e kua rekareka a Eunike no tei rauka iaia i te apii i tana tamaiti no runga ia Iehova noatu te ngatā o te reira! Kua “autu” a Eunike i teia turanga, e ko te aiteanga tera o tona ingoa.

7. Akapeea a Eunike te tauturu anga i tana tamaiti i muri ake i te papetitoanga?

⁷ Te papetitoia anga a Timoteo, kare te manamanata o Eunike i akamutu ana. Eaa ta Timoteo ka rave no te toenga o tona oraanga? Ka kapiti ainei aia ki te au oa kino? Ka aere ainei aia ki te apii i Atene e ka āriki i te au apiianga pikikaa i reira? Ka akapou ainei aia i tona taime, te maroiroi e tona oraanga mapu kia rauka maata te moni? Kare e rauka ia Eunike i te rave i te au ikianga na Timoteo, inara ka rauka iaia i te tauturu i tana tamaiti. Akapeea? Ka apii ua rai aia i tana tamaiti kia inangaro maata e kia akameitaki ia Iehova e Tana Tamaiti no ta raua i rave. Kare teia manamanata e tupu ua ana i roto i te ngutuare e tukeke  te akonoanga. E tupu katoa ana te reira ki te au metua i roto i te tuatua mou. Eaa ta te au metua ka apii mai mei te akaraanga o Eunike?

8. Akapeea tetai metua vaine me tauturu i tana tane kia apii i ta raua tamariki no runga Iehova?

⁸ Apii i te Pipiria ki taau tamariki. E te au tuaine, me tei roto taau tane i te tuatua mou, te inangaro ra a Iehova ia koe kia tauturu iaia kia apii i ta korua tamariki. Tetai ravenga, na te turu anga i te akanoonooanga no te Akamorianga Ngutuare. E tuatua i te au mea meitaki no teia akanoonooanga e kia akariro i te reira ei atianga mataora. Penei ka tauturu koe i taau tane i te parani i tetai apii Pipiria ka rave kotou. Pera katoa, me kua tau te tamariki kia apii i te Pipiria na roto i te puka Oraanga Mataora e Tuatau Ua Atu!, penei ka tauturu koe i taau tane i te apii i ta korua tamariki.

9. Eaa te ka tauturu i tetai metua vaine kia apii i tana tamariki me kare tana tane i te Kite?

⁹ Ka apii tetai au metua vaine i te Pipiria ki ta ratou tamariki, penei ko ratou anake ua te metua, me kore kare ta ratou tane i te Kite no Iehova. Me ko toou turanga teia, auraka e taitaia. Ka tauturu a Iehova ia koe. E taangaanga meitaki i te au apinga apii tei orongaia mai e tana akaaerenga no te apii i taau tamariki. E pati ki tetai au metua tukatau no tetai au manako ou no te rave i te akamorianga ngutuare. c (Mase. 11:14) E pure kia Iehova no te tauturu kia kite eaa to roto i te ngakau o taau tamariki. (Mase. 20:5) E maata taau ka kite mai me ui koe ki taau tamariki i teia uianga, ‘Eaa te manamanata maata te tupu nei kia koe i te apii?’

10. Eaa atu taau ka rave no te apii i taau tamariki no runga ia Iehova?

¹⁰ Kimi i tetai atianga no te apii i taau tamariki no runga ia Iehova. E tuatua no runga ia Iehova e te au apinga meitaki tana i rave noou. (Deu. 6:6, 7; Isa. 63:7) E mea puapinga teia me kare e rauka ia koe i te apii putuputu i taau tamariki i te kainga. Karanga a Christine, tei taikuia i mua ana: “Kare e rava ana te tuatau no matou i te tuatua no runga i te au apinga pae vaerua, inara ka kimi au i tetai atianga ke no te rave i te reira. Ka tuatua matou no runga i ta Iehova au mea manea i anga me aaere matou ki tetai ngai, e me oe vaka na runga i te kauvai. Te maata anga mai te tamariki, kua akamaroiroi au ia ratou kia rave i ta ratou uaorai apii Pipiria.” Pera katoa, e tuatua i te au mea meitaki no runga i ta Iehova akaaerenga e te au taeake. Auraka e akaapa i te aronga pakari. Ko taau ka tuatua, ka tauturu te reira i te tamariki kia uri ki teia au taeake me anoano ratou i te tauturu.

11. Ia Iakobo 3:18, eaa i puapinga ai kia akatupu i te ’au i roto i te ngutuare?

¹¹ Akatupu i te ’au i te ngutuare. E akaari putuputu i toou inangaro no taau tane e te tamariki. E tuatua ki taau tane na roto i te reo maru e te tu akangateitei, e te tereni i taau tamariki kia pera katoa. Me rave koe i teia, te akatupu ra koe i te ’au i roto i te ngutuare, e ka māmā i taau tamariki i te apii no runga ia Iehova. (E tatau ia Iakobo 3:18.) Akamanako ana i te akaraanga o Jozsef, te tavini ra ei painia takake i Romania. I tona tamariki anga, kua patoi tona metua tane i  tona metua vaine e ratou te tamariki no te tavini ia Iehova. Karanga a Jozsef: “Ka akatupu ua rai toku mami i te ’au i roto i te ngutuare. Ko te kino atu te patoi anga a tati tane, te maru atu ïa o toku mami. Me ngatā ia matou i te akangateitei e te akarongo ki to matou tati, ka uriuri matou ia Ephesia 6:1-3. E oti ka akakite mai aia i te tu meitaki o tati e te tumu kia akaperepere matou iaia. Kua tauturu teia i te akatupu i te ’au i roto i te ngutuare.”

12. Ia 2 Timoteo 1:5, akapeea to Eunike akaraanga te akakeuanga ia Timoteo?

¹² E tatau ia 2 Timoteo 1:5. Kua akanoo a Eunike i tetai akaraanga meitaki no Timoteo. Apii aia e ko te akarongo mou, ka anoanoia te angaanga. (Iako. 2:26) Kua kite tikai a Timoteo i te aroa o tona metua vaine no Iehova na roto i tana i rave. Kua kite katoa aia i te tu mataora o tona metua vaine i te tavini ia Iehova. Akapeea to Eunike akaraanga te akakeuanga ia Timoteo? Akakite te apotetoro ko Paulo e kua aite to Timoteo akarongo ki tona metua vaine. Kua akara meitaki a Timoteo i tona metua vaine e kua tauta i te aru i tona akaraanga. Mei te reira rai, e maata te au metua vaine tei apii i ta ratou tamariki kia tavini ia Iehova, “auraka atu rai te tuatua.” (1 Pete. 3:1, 2) Ka rauka katoa ia koe i te rave i te reira. Akapeea?

13. Eaa tetai metua vaine ka akariro ei i tona pirianga kia Iehova ei mea puapinga?

¹³ Akariro i toou pirianga kia Iehova ei mea puapinga rava. (Deu. 6:5, 6) Ka anoanoia koe kia akaatinga i tetai au apinga, mei te au metua vaine rai. Ka akaatinga koe i toou taime, taau moni, toou ora moe e tetai apinga ke no te akono i taau tamariki i te pae kopapa. Inara, auraka rava koe e manako e kare oou taime no te akamatutu i toou pirianga kia Iehova. E akanoo putuputu i tetai tuatau no te pure, taau uaorai apii Pipiria e te akapapa no te uipaanga. Me pera koe, ka matutu koe i te pae vaerua e ka akanoo koe i tetai akaraanga meitaki no toou ngutuare e tetai ke.

14-15. Eaa taau ka apii mai mei te akaraanga o Leanne, Maria, e João?

¹⁴ Teia tetai akaraanga no te au mapu tei apii i te inangaro e te irinaki ia Iehova na te akara anga i to ratou metua vaine. Karanga a Leanne, te tamaine a Christine: “Kare e rauka ia matou i te apii i te Pipiria i te kainga. Inara ka aere ua rai to matou mami ki te au uipaanga. Kua tauturu tona akaraanga e tona irinaki i te akamatutu i to matou akarongo. Kite matou e ko te tuatua mou teia i mua ake ka aere ei matou ki te uipaanga.”

¹⁵ Karanga a Maria, kua takinga kino ana tona metua tane ia ratou no te aere ki te uipaanga: “Ko toku mami tetai tuaine ngakau toa rava atu. I toku tamariki anga, kare au e rave i tetai apinga no toku mataku i ta tetai ke ka tuatua. Inara, te kite anga au i te tu ngakau toa o toku mami e te akariroanga aia ia Iehova ei mea mua i tona oraanga, kua tauturu te reira iaku kia kore e mataku i te tangata.” Karanga a João, kua patoi ana tona metua tane ia ratou no te uriuri i te Pipiria: “Pakia toku ngakau i te kite anga e ka akaruke toku mami i te au mea katoatoa—mari ua tona inangaro no Iehova—kia akamareka i toku tati.”

16. Akapeea te akaraanga o tetai metua vaine me akakeu i tetai ke?

 ¹⁶ E te au metua vaine, e akamaara ka akakeu toou akaraanga i tetai ke. Akapeea? Akamanako ana e akapeea te akaraanga o Eunike te akakeuanga i te apotetoro ko Paulo. Tata aia e e akarongo pikikaa kore to Timoteo “tei vai marie i roto . . . ia Eunike.” (2 Timo. 1:5) Inaea a Paulo i kite ei i to Eunike akarongo? Penei kua aravei aia ia Loi e Eunike i Lusetera i tona tere mitinari mua, e penei kua tauturu ia raua kia riro mai ei Kerititiano. (Anga. 14:4-18) Te tataanga a Paulo kia Timoteo—e 15 mataiti i muri mai—kua maara ia Paulo i to Eunike tu tiratiratu e kua taiku iaia ei akaraanga meitaki kia aruia! Mea papu, kua akamaroiroi tona akaraanga i te apotetoro e te au Kerititiano mua. Me ko koe anake ua te utuutu ra i taau tamariki, me kore kare taau tane i roto i te akarongo, e akamaara ka riro toou akaraanga tiratiratu i te akamatutu e te akamaroiroi i tetai ke.

17. Eaa taau ka rave me manako koe e kare taau tamaiti e akarongo mai?

¹⁷ Akapeea i reira me ka manako koe e kare taau tamaiti e akarongo mai? E akamaara, ka pou tetai tuatau no te tereni i tetai tamaiti. Mei tei akaariia i roto i te tutu, me tanu koe i tetai ua, penei ka manako koe me ka tupu rai te reira e ka uua. Noatu e kare koe e kite me ka uua rai te reira, ka rauka ia koe i te tamauu ua rai i te reira kia tupu. (Mare. 4:26-29) Mei te  reira katoa, penei ka manako tetai metua vaine e me ka puapinga rai tana apiianga i te tamariki kia inangaro ia Iehova. Kare koe e kite eaa te ka tupu. Inara kia rave ua rai i taau ka rauka no te tereni ia ratou kia tupu e kia riro mai ei oa no te Atua.—Mase. 22:6.

18. Akapeea a Iehova me tauturu i taau tamariki kia tupu i te pae vaerua?

¹⁸ I te tuatau Pipiria, e maata ta Iehova au mapu i tauturu kia riro mai ei oa nona. (Sala. 22:9, 10) Ka rauka katoa iaia i te tauturu i taau tamariki kia tupu i te pae vaerua me ka inangaro ratou. (1 Kori. 3:6, 7) Ka aroa ua rai a Iehova ia ratou noatu me kare ratou e tavini ngakau katoa iaia. (Sala. 11:4) Me akaari ratou i tetai akairo ei “aronga i akonoia” no te akamareka ia Iehova, ka tauturu aia ia ratou. (Anga. 13:48; 2 Para. 16:9) Ka tauturu aia ia koe kia tuatua i te mea meitaki i te atianga tau. (Mase. 15:23) Me kore ka akakeu i tetai taeake me kore tuaine i roto i te putuputuanga kia tauturu ia ratou. Noatu kua mamaata taau tamariki, ka akaoki mai a Iehova i tetai apinga taau i apii ana ki roto i to ratou manako. (Ioa. 14:26) Me tereni ua rai koe i taau tamariki na roto i taau tuatua e toou akaraanga, ka akameitaki a Iehova ia koe.

19. Eaa koe i papu ei e te mareka maira a Iehova ia koe?

¹⁹ Kare to Iehova aroa noou i akatumuia ki runga i te au ikianga ta taau tamariki ka rave. Inangaro aia ia koe no te mea kua inangaro koe iaia. Me ko koe anake ua te metua, taputou a Iehova kia riro mai aia ei Metua no taau tamariki, e ei Akava me kore ei Paruru noou. (Sala. 68:5) Kare koe e kite me ka iki taau tamariki kia tavini ia Iehova e me kare. Inara, me irinaki ua rai koe i ta Iehova tauturu e te rave i taau ka rauka, ka mareka aia ia koe.