1, 2. (α) Κον ισινέ η Ευνίκη, ντα καγιά δύσκολη μπουτί τθερέλας τι κερέλ σαρ ντάι; (β) Βακερέν χάνικ λάφια ι φωτογραφιάκε σο ισί κι ανγκλαϊνί σελίδα.

 Η ΓΡΑΦΗ να βακερέλα σο αβιλό-πες κάνα μπολντιλό ο Τιμόθεος, αλλά νανέ δύσκολος τι ανάς αμαρέ γκοντιάτε καζόμ χαρά τθερέλας οντουβά ντιβές λέσκι ντάι, η Ευνίκη. (Παρ. 23:​25) Ανέν τουμαρέ γκοντιάτε ότι λάκε γιακχά λένα-πες ντα καμαρώνελα ι Τιμοθεός καζόμ τζάλα κο πανί. Η Ευνίκη ασάλα ντα η Λωίδα, η μπάμπα ι Τιμοθεόσκι, ισί πασέ λάτε ντα ντέλα-λα ανγκάλι. Η καρδιά ι Ευνικιάκι ντέλα μπουτ καζόμ ο Τιμόθεος τσσουβέλα-πες τελάλ κατά πανί. Κάνα νικιόλα, τθερέλα εκ μπαρό ασαπέ, ντα η Ευνίκη ναστί ατσσικιαρέλα πο δάκρυα. Παρόλο σο νακχλάς δυσκολίες, σικλιαρντάς πι τσσαβές τι μανγκέλ ι Ιεχωβάς ντα λέσκε Τσσαβές, ι Ιησού Χριστός. Καλά ισινέ ανταλά δυσκολίες;

² Ο ντατ ι Τιμοθεόσκο ντα λέσκι ντάι να τθερένας ίδια θρησκεία. Λέσκο ντατ ισινέ Μπαλαμό, αλλά λέσκι ντάι ντα λέσκι μπάμπα ισινέ Ιουδαίες. (Πράξ. 16:1) Ο Τιμόθεος μπέκιμ ισινέ ατζέ τερνό κάνα η Ευνίκη ντα η Λωίδα αβιλέ Χριστιανές. Όμως, λέσκο ντατ να αβιλό Χριστιανός. Καβά ντρομ κα τραμπίνελας ο Τιμόθεος; Ντικχίντιβελα ότι να ισινέ αζόμ χουρντό, οτθάρ μπορίνελας τι τραμπίνελ κορκορό. Κα τσσίντελας πι νταντέσταρ σο να ισινέ Χριστιανός; Κα ατσσόλας κο έθιμα κι Ιουδαιόνγκε σο σικλιλόας κάνα ισινέ χουρντό; Ή κα αβέλας Χριστιανός σο αζομάν ισινέ εκ νεβί θρησκεία;

3. Σαρ ντικχέλα ο Ιεχωβά ι μπουτί σο κερένα ο νταγιά για τι βοηθίνεν πουμαρέ τσσαβέν τι αβέν λέσκε αμαλά σαρ ντικχίντιβελα κο εδάφια Παροιμίες 1:8, 9;

³ Αντιβές-ντα, ο νταγιά σο ισί Χριστιανές μανγκένα πουμαρέ φαμιλίν. Οντουβά σο μανγκένα πο μπουτ ισί τι βοηθίνεν πουμαρέ τσσαβέν τι αβέν λατσσέ αμαλά ι Ιεχωβάσαρ. Αμαρό Ντεβέλ εκτιμίνελα-λεν μπουτ οντουλένγκε σο κερένα. (Διαβάνεν  Παροιμίες 1:8, 9) Ο Ιεχωβά τθερέλα βοηθιντό μπουτέ νταΐν τι σικλιαρέν πουμαρέ τσσαβέν τι λεν λέσκο ντρομ.

4. Καλά δυσκολίες τθερένα ο νταγιά αντιβές;

⁴ Ισί λογικός τι πουτσέλ-πες μπάζιμα εκ ντάι άμα λάκε τσσαβέ κα τραμπίνεν τι υπηρετίνεν ι Ιεχωβάς σαρ κερντάς ο Τιμόθεος. Ο νταντά ντα ο νταγιά τζανένα ότι ι Μπενγκέσκο ντουνιάς ζορισκιαρέλα μπουτ λένγκε τσσαβέν. (1 Πέτρ. 5:8) Η μπουτί μερικέ νταΐνγκι ισί ατζέ πο δύσκολη σόσκε μπαριαρένα πουμαρέ τσσαβέν μπι πουμαρέ ρομέσκο ή πουμαρέ ρομέσαρ σο να υπηρετίνελα ι Ιεχωβάς. Για παράδειγμας, εκ πφεν, η Κριστίν, b βακερέλα: «Μο ρομ ισινέ λατσσό ντατ ντα πφαμπόλας αμένγκε, αλλά να μανγκέλας ιτς τι μπαριαράβ αμαρέ τσσαβέν σαρ Μάρτυρες ι Ιεχωβάσκε. Ροβάβας μπουτ οντουλά μπρεσά σόσκε να τζανάβας άμα κα αβέλας ο ντιβές σο μο τσσαβέ κα υπηρετίνενας ι Ιεχωβάς».

5. Σο κα ντικχάς ανταλέ μαθημάστε;

⁵ Άμα ισινέν ντάι, μπορίνενα τι βοηθίνεν τουμαρέ τσσαβέν σαρ η Ευνίκη. Ανταλέ μαθημάστε, κα ντικχάς σαρ μπορίνενα τι μοιάζεν λάτε καζόμ σικλιαρένα τουμαρέ τσσαβέν τουμαρέ λαφίντζαρ ντα τουμαρέ παραδειγμάσαρ. Κα σικλιάς επίσης σαρ κα βοηθίνελ-τουμέν ο Ιεχωβά.

6. Σαρ αβιλό Χριστιανός ο Τιμόθεος σαρ σικαβένα ο εδάφια 2 Τιμόθεο 3:​14, 15;

⁶ Κάνα ο Τιμόθεος ισινέ χουρντό, λέσκι ντάι κερντάς σο νακχέλας λάκε βαστένταρ για τι σικλιαρέλ-λες «ο άγια βιβλία», σαρ αγαβένας-λεν ο Ιουδαίοι. Αζομάν η Ευνίκη τθερέλας ι θρησκεία ι Ιουδαιόνγκι, οτθάρ να τζανέλας τίποτα ι Ιησού Χριστόσκε. Αλλά οντουλά σο σικλιλό ο Τιμόθεος κατά Γραφή ερεσένας για τι μπορίνελ τι αβέλ Χριστιανός. Κα αβέλας όμως; Κάνα μπαριλό, ισινέ λέσκε βαστέστε τι τραμπίνελ-λες ανταβά. Σίγουρα, οντουλά σο κερντάς η Ευνίκη βοηθιντέ ι Τιμοθεός τι πακιάλ ι αλήθεια ι Ιησούσκε. (Διαβάνεν 2 Τιμόθεο 3:​14, 15) Καζόμ χαρούμενη πρέπει τι ισινέας η Ευνίκη σο σικλιαρντάς πι τσσαβές ι Ιεχωβάσκε παρόλο σο ανταβά ισινέ δύσκολος! Η Ευνίκη κερντάς μπαγιά οντουβά σο βακερέλα λάκο ναβ σο νικιόλα κατά μπαλαμανό λάφι «νικώ».

7. Σαρ κα μπορίνελας η Ευνίκη τι βοηθίνελ πι τσσαβές σοράν λέσκε μπολντιμάσταρ;

⁷ Ο μπολντιπέ ισινέ κάτι μπουτ σημαντικός σο κερντάς ο Τιμόθεος, αλλά η Ευνίκη να τσσιναντάς τι ανησυχίνελ λέσκε. Σο κα κερέλας λάκο τσσαβό πι ζωγιάτε σοράν πι μπολντιμάσταρ; Κα κερέλας μπέτι παρέες; Κα τζάλας τι σπουδάνελ κι Αθήνα ντα κα επηρεάντιβελας οντουλένταρ σο σικλιαρένας οτθέ ο φιλόσοφοι σο πακιάνας γιαβερέ ντεβλέντε; Κα χαλαβέλας πο σαάτι, πι ζορ ντα πο τερνικανέ μπρεσά για τι αβέλ χουλανό; Η Ευνίκη ναστί τραμπίνελας βόι σο κα κερέλας ο Τιμόθεος, αλλά μπορίνελας τι βοηθίνελ-λες. Σαρ; Άμα να κα τσσιναβέλας τι μαρέλ-πες για τι σικλιαρέλ πι τσσαβές τι μανγκέλ μπουτ ι Ιεχωβάς ντα τι εκτιμίνελ λέσκε Τσσαβές. Δυσκολίες να τθερένα σάντε οντουλά σο λένγκο ρομ ή λένγκι ρομνί να υπηρετίνελα ι Ιεχωβάς. Ατζέ-ντα κάνα ο ντούι-ντα ισί κι αλήθεια, μπέκιμ τι αβέλ δύσκολος τι ερεσέν κο γκι πουμαρέ τσσαβένγκο για τι αβέν πιστοί υπηρέτες ι Ιεχωβάσκε. Σο σικλιόνα ο νταντά ντα ο νταγιά κατά Ευνίκη;

8. Σαρ μπορίνελα εκ ντάι τι βοηθίνελ πι ρομές τι σικλιαρέλ πι τσσαβέν ι Ιεχωβάσκε;

⁸ Σικλιαρέν-τουμέν κατά Γραφή τουμαρέ τσσαβέντζαρ. Πφενιάλεν, άμα τουμαρό ρομ ισί κι αλήθεια, ο Ιεχωβά μανγκέλα τουμένταρ τι βοηθίνεν-λες κο σικλιαριπέ τουμαρέ τσσαβένγκο. Εκ τρόπος για τι κερέν-λες  ανταβά ισί τι βοηθίνεν τι αβέλ-πες η Φαμιλιάκι Λατρεία κάθε εβδομάδα. Τουμαρέ λαφίντζαρ, σικαβέν σόσκε ισί αζόμ λατσσό τι αβέλ-πες η Φαμιλιάκι Λατρεία, ντα σκεφτίνεν σο μπορίνενα τι κερέν για τι μπεϊντίνεν-λα σαρέ. Μπέκιμ μπορίνενα τι βοηθίνεν τουμαρέ ρομές τι τραμπίνελ σο κα κερέν κι Φαμιλιάκι Λατρεία ντα σαρ κα κερέν-λες. Ντα άμα τθερένα πο μπαρέ τσσαβέν σο κα βοηθίντιβενας κατά βιβλίος Μπουτ Σουκάρ Ζωή για Πάντα!, μπέκιμ τι βοηθίνεν τουμαρέ ρομές κι μελέτη τουμαρέ τσσαβένγκι.

9. Κάι μπορίνελα τι αρακχέλ βοήθεια εκ ντάι σο λάκο ρομ να υπηρετίνελα ι Ιεχωβάς;

⁹ Μερικά νταγιά χρειαζίντιβελα τι σικλιαρέν βον πουμαρέ τσσαβέν κατά Γραφή σόσκε είτε μπαριαρένα-λεν κορκορέ είτε λένγκο ρομ νανέ κι αλήθεια. Άμα ανταβά αβέλα-πες τουμαρέ-ντα φαμιλιάτε, μα τσσουβέν μπουτ τουμαρέ γκίστε. Ο Ιεχωβά κα βοηθίνελ-τουμέν. Χρησιμοποιήνεν ο λατσσέ εργαλεία σο ντέλα-αμέν αντράλ πι οργανωσιάταρ για τι σικλιαρέν τουμαρέ τσσαβέν. Κα αβέλας λατσσό τι πουτσέν γιαβερέν σο τθερένα μπρεσά τσσαβέν σαρ χρησιμοποιήνενα βον ανταλά εργαλεία κι φαμιλιάκι λατρεία. c (Παρ. 11:​14) Ο Ιεχωβά μπορίνελα ατζέ τι βοηθίνελ-τουμέν τι κερέν λάφι τουμαρέ τσσαβέντζαρ. Μανγκέν λέσταρ τι βοηθίνελ-τουμέν τι αγαβέν σο τθερένα πουμαρέ γκοντιάτε ντα πουμαρέ γκίστε. (Παρ. 20:5) Άμα για παράδειγμας κα πουτσέν τουμαρέ τσσαβές: “Καγιά ισί η πο μπαρί δυσκολία σο τθερέσα κο σχολείος;” μπέκιμ τι αγαβέν μπουτ πράγματα λέσκε.

10. Καλέ γιαβερέ τροπόσαρ μπορίνενα τι βοηθίνεν τουμαρέ τσσαβέν τι σικλιόν ι Ιεχωβάσκε;

¹⁰ Ρόντεν ευκαιρίες για τι σικλιαρέν τουμαρέ τσσαβέν ι Ιεχωβάσκε. Κερέν λένγκε λάφι ι Ιεχωβάσκε ντα ι μπουτέ λατσσέ πραγματένγκε σο κερντάς τουμένγκε. (Δευτ. 6:6, 7· Ησ. 63:7) Ανταβά ισί ατζέ πο σημαντικός άμα κχερέ ναστί σικλιαρένα-τουμέν τουμαρέ τσσαβέντζαρ. Η Κριστίν βακερέλα: «Τθεράας μπουτ χάνικ ευκαιρίες τι κεράς λάφι ι Ιεχωβάσκε, οτθάρ κεράβας ο πο λατσσό κάνα-ντα μπορίναβας. Τζάας τι πφιράς ή τσσουβάας-αμέν εκχέ βαρκάτε ντα τζάας χάνικ πο ντουρ για τι κεράς λάφι ι σουκάρ πραγματένγκε σο λατσσαρντάς ο Ιεχωβά ντα μπουτέ γιαβερέ πνευματικέ πραγματένγκε. Κάνα μο τσσαβέ μπαριλέ, βακεράβας λένγκε τι σικλιαρέν-πες κορκορέ κατά Γραφή». Βακερέν λατσσέ λάφια τουμαρέ τσσαβένγκε ι Ιεχωβάσκε οργανωσιάκε ντα ι πφραλένγκε. Μα τι νικιόλ τουμαρέ μόσταρ μπέτι λάφι ι πρεσβυτερόνγκε. Οντουλά σο ασουνένα τουμένταρ τουμαρέ τσσαβέ ι πρεσβυτερόνγκε μπορεί τι τσσίντεν-λεν είτε τι μανγκέν ι βοήθεια ι πρεσβυτερόνγκι είτε μα τι μανγκέν-λα.

11. Σόσκε ισί σημαντικός τι ανέν ειρήνη τουμαρέ κχερέστε σαρ βακερέλα ο εδάφιος Ιακώβου 3:18;

¹¹ Ανέν ειρήνη κο κχερ. Σικαβέν τουμαρέ ρομέσκε ντα τουμαρέ τσσαβένγκε ότι μανγκένα-λεν. Κάνα πουτρένα τουμαρέ ρομέσκε, κερέν λατσσό ντα σεβαστικός λάφι ντα σικλιαρέν τουμαρέ τσσαβέν τι κερέν-λες βον-ντα ανταβά. Αντικάς, κα ανέν ειρήνη τουμαρέ κχερέστε ντα τουμαρέ τσσαβέ κα βοηθίντιβεν τι σικλιόν ι Ιεχωβάσκε. (Διαβάνεν Ιακώβου 3:​18) Σκεφτίνεν ο παράδειγμας ι Γιοζεφίσκο, σο ισί ειδικός σκαπανέας κι Ρουμανία. Κάνα ισινέ χουρντό, ισινέ δύσκολος λέσκε, λέσκε νταγιάκε ντα λέσκε πφραλένγκε τι υπηρετίνεν ι Ιεχωβάς σόσκε λένγκο ντατ τζάλας λέντζαρ κόντρα. Ο Γιόζεφ βακερέλα: «Μι ντάι μαρέλας-πες για τι τθεράς ειρήνη αμαρέ κχερέστε. Καζόμ πο μπέτι συμπεριφερίντιβελας μο ντατ, αζόμ πο μπουτ λατσσιπέ σικαβέλας μι ντάι. Κάνα ντικχέλας ότι ζορίντιβαας τι σικαβάς σεβασμός αμαρέ νταντέσκε  ντα τι ντας-λες καν, κερέλας αμέντζαρ λάφι κατά εδάφια Εφεσίους 6:​1-3. Σοράν, βακερέλας αμένγκε ο λατσσέ ιδιότητες αμαρέ νταντέσκε ντα βοηθίνελας-αμέν τι αγαβάς σόσκε έπρεπε τι μανγκάς-λες. Αντικάς, βοηθίνελας τι αβέλ ειρήνη αμαρέ φαμιλιάτε».

12. Σαρ βοηθισάλο ο Τιμόθεος κατά παράδειγμας πι νταγιάκο σαρ σικαβέλα ο εδάφιος 2 Τιμόθεο 1:5;

¹² Διαβάνεν 2 Τιμόθεο 1:5. Η Ευνίκη μουκχλάς λατσσό παράδειγμας ι Τιμοθεόσκε. Σαρ ντικχίντιβελα, σικλιαρντάς-λες ότι η αληθινή πίστη σικάντιβελα οντουλέντζαρ σο κεράσα. (Ιακ. 2:​26) Ο Τιμόθεος σίγουρα ντικχέλας ότι σο-ντα κερέλας λέσκι ντάι κερέλας-λες σόσκε μανγκέλας μπουτ ι Ιεχωβάς. Ντα αγαβέλας ότι η υπηρεσία ι Ιεχωβάσκι ντέλας-λα χαρά. Σαρ βοηθισάλο ο Τιμόθεος κατά παράδειγμας πι νταγιάκο; Σαρ βακερντάς ο απόστολος Παύλος, ο Τιμόθεος τθερέλας πίστη σαρ πι νταγιάκι. Ανταγιά πίστη να αβιλί κορκορί. Ο Τιμόθεος ντικχλάας λάκο παράδειγμας ντα τραμπιντάς τι μοιάζελ λάτε. Αντικάς αντιβές-ντα, μπουτ νταγιά βοηθιντέ πουμαρέ φαμιλίν χωρίς τι βακερέν καέκ λάφι. (1 Πέτρ. 3:1, 2) Τουμέν-ντα μπορίνενα τι κερέν-λες ανταβά. Σαρ;

13. Σόσκε πρέπει εκ ντάι τι τσσουβέλ ανγκλάλ πι φιλία ι Ιεχωβάσαρ;

¹³ Τσσουβέν ανγκλάλ τουμαρί φιλία ι Ιεχωβάσαρ. (Δευτ. 6:5, 6) Σαρ ο πο μπουτ νταγιά, αντικάς τουμέν-ντα κερένα μπουτ θυσίες. Ντένα τουμαρέ σαατίσταρ, τουμαρέ λοβένταρ ντα μουκχένα τουμαρό σοϊπέ ντα γιαβερά πράγματα για τι ανέν ο αναγκαία τουμαρέ τσσαβένγκε. Αλλά ποτές δεν πρέπει τι ντεν αζόμ μπουτ σαάτι ανταλέ πραγματένγκε σο να κα ερεσέλ-τουμέν τι μπαριαρέν τουμαρί φιλία ι Ιεχωβάσαρ. Ντεν τουμαρέ σαατίσταρ για τι προσευχίντιβεν, τι σικλιαρέν-τουμέν κατά Γραφή ντα ι συναθροισιένγκε. Αντικάς, κα αβέν πο πασέ κο Ιεχωβά ντα κα ντεν ο λατσσό παράδειγμας τουμαρέ φαμιλιάτε αλλά κο γιαβερά-ντα.

14, 15. Σο σικλιόνα κατά Λιάν, κατά Μαρία ντα κατά Ζουάου;

¹⁴ Ακανά κα βακεράς χάνικ παραδείγματα τερνένγκε σο σικλιλέ τι μανγκέν ι Ιεχωβάς ντα τι ντεν μπέσα λέστε σόσκε ντικχένας οντουλά σο κερέλας λένγκι ντάι. Η τσσάι ι Κριστινάκι, η Λιάν, βακερέλα: «Ναστί σικλιαράας-αμέν κατά Γραφή κάνα ισινέ μο ντατ κχερέ. Αλλά μι ντάι να χασαρέλας ποτές ο συναθροίσεις. Παρόλο σο να τζανάας μπουτ πράγματα ι Γραφιάκε, οντουλά σο κερέλας βοηθίνενας-αμέν τι τθεράς ζουρανί πίστη. Τζανάας ότι ανταγιά ισινέ η αλήθεια πριν ατζέ τι αρχίνας τι τζας κο συναθροίσεις».

¹⁵ Η Μαρία, σο βόι ντα λάκι φαμιλί τσσίντενας μπουτ πουμαρέ νταντέσταρ κάνα τζάνας κι συνάθροιση, βακερέλα: «Μι ντάι ισί εκ κατά πο μπίνταρανε πφενιά σο τζανάβα. Κάνα ισινόμας χουρντί, μπάζιμα να μανγκάβας τι κεράβ κάποια πράγματα σόσκε νταράβας σο κα βακερένας ο γιαβερά. Όμως, κάνα ντικχάβας καζόμ μπίνταρανι ισινέ βόι ντα σαρ τσσουβέλας ανγκλάλ ι Ιεχωβάς πι ζωγιάτε, τσσιναντόμ τι νταράβ κατά τζενέ». Ο Ζουάου, σο λέσκο ντατ να μουκχέλας τι κερέλ λάφι λέσκι φαμιλί ι Ιεχωβάσκε ή ι Γραφιάκε κχερέ, βακερέλα: «Οντουβά σο μπέκιμ ντινάς-μαν πο μπουτ ζορ ισινέ ότι μι ντάι ισινέ έτοιμη τι μουκχέλ σο-ντα χρειαζίντιβελας​—εκτός κατά μανγκιπέ σο τθερέλας ι Ιεχωβάσκε—​για τι κερέλ μι νταντέσκο γκι».

16. Σαρ μπορίνελα τι βοηθίνελ ι γιαβερέν ο παράδειγμας εκχέ νταγιάκο;

¹⁶ Νταγιάλεν, ντεν-τουμέν γκοντί ότι τουμαρό παράδειγμας επηρεάνελα ι γιαβερέν. Σαρ; Ανέν τουμαρέ γκοντιάτε σαρ επηρεαντάς ο παράδειγμας ι Ευνικιάκο ι απόστολε Παυλός.  Βοβ αγαντάς ότι η πίστη ι Τιμοθεόσκι σο να ισινέ ντουέ μουένγκι “τθερέλας-λα πο τζανγκλέ λέσταρ . . . η Ευνίκη”. (2 Τιμ. 1:5) Κάνα ντικχλάς πρώτη φαρ ο Παύλος ι πίστη ι Ευνικιάκι; Ντικχίντιβελα ότι γνωριντάς ι Λωιδά ντα ι Ευνικιά κο Λύστρα κάνα κερντάς ο πρώτος ιεραποστολικός ταξίδι ντα μπέκιμ βοηθιντάς-λεν τι αβέν Χριστιανές. (Πράξ. 14:​4-18) Σκεφτίνεν: Κάνα ο Παύλος γραφιντάς ι Τιμοθεόσκε περίπου 15 μπρεσά πο σοράν, ντέλας-πες γκοντί ατζέκ ατζέκ ι πίστη σο σικαβέλας η Ευνίκη ντα βακερντάς ότι ισινέ μπουτ λατσσό παράδειγμας ι γιαβερένγκε! Σίγουρα, λάκο παράδειγμας ντινάας μπουτ ζορ ι Παυλός, ντα μπέκιμ μπουτέ γιαβερέ-ντα Χριστιανόν σο τζουβντιόνας αζομάν. Άμα μπαριαρένα τουμαρέ τσσαβέν μπι τουμαρέ ρομέσκο ή τουμαρέ ρομέσαρ σο να υπηρετίνελα ι Ιεχωβάς, τι αβέν σίγουρες ότι τουμαρό πιστός παράδειγμας ντέλα ζορ ι γιαβερέν ντα βοηθίνελα-λεν.

17. Σο πρέπει τι κερέν άμα ντικχίντιβελα ότι τουμαρέ τσσαβέ να μανγκένα τι υπηρετίνεν ι Ιεχωβάς παρόλο σο μαρένα-τουμέν τι σικλιαρέν-λεν;

¹⁷ Σο αβέλα-πες άμα ντικχίντιβελα ότι τουμαρέ τσσαβέ να μανγκένα τι υπηρετίνεν ι Ιεχωβάς; Μα μπιστρέν ότι ο σικλιαριπέ εκχέ τσσαβέσκο μανγκέλα σαάτι. Σαρ σικαβέλα η φωτογραφία, κάνα εκ τζενό φυτίνελα εκ σπόρος, μπέκιμ σκεφτίνελα άμα κα μπαριόλ ντα κα νικαβέλ καρπός. Παρόλο σο ναστί κερέλα κουμάντος σο κα αβέλ-πες, να τσσιναβέλα τι τσσουβέλ λέσκε πανί σόσκε αντικάς κα αβέλ πο σίγουρος ότι κα μπαριόλ. (Μάρκ. 4:​26-29) Αντικάς τουμέν-ντα, νταγιάλεν, μπέκιμ σκεφτίνενα άμα τουμαρό σικλιαριπέ ερεσέλα κο γκι τουμαρέ τσσαβένγκο. Ναστί κερένα  κουμάντος σο κα τραμπίνεν τουμαρέ τσσαβέ. Αλλά άμα να τσσιναβένα τι κερέν σο νακχέλα τουμαρέ βαστένταρ για τι σικλιαρέν-λεν, κα αβέλ πο σίγουρος ότι τουμαρέ τσσαβέ κα μανγκέν ι Ιεχωβάς.​—Παρ. 22:6.

18. Σαρ μπορίνελα ο Ιεχωβά τι βοηθίνελ τουμαρέ τσσαβέν τι αβέν λέσκε αμαλά;

¹⁸ Κατά πουρανέ μπρεσά μέχρι αντιβές, ο Ιεχωβά τθερέλα βοηθιντό μπουτέ τερνέν τι αβέν λέσκε αμαλά. (Ψαλμ. 22:9, 10) Μπορίνελα τι βοηθίνελ τουμαρέ-ντα τσσαβέν τι αβέν λέσκε αμαλά άμα βον μανγκένα-λες ανταβά. (1 Κορ. 3:6, 7) Ατζέ-ντα άμα ντικχίντιβελα ότι τουμαρέ τσσαβέ νασένα κατά Ιεχωβάσκο ντρομ, βοβ να κα τσσιναβέλ τι μανγκέλ-λεν. (Ψαλμ. 11:4) Κάνα κα σικαβέν τουμαρέ τσσαβέ ατζέ-ντα χάνικ ότι “λένγκο γκι μανγκέλα τι σικλιόλ ι αλήθεια”, ο Ιεχωβά ισί έτοιμος τι βοηθίνελ-λεν τι αβέν λέσκε αμαλά. (Πράξ. 13:​48· 2 Χρον. 16:9) Μπέκιμ τι βοηθίνελ-τουμέν τι βακερέν ο σωστός πράγμας κο σωστός σαάτι​—κάνα τουμαρέ τσσαβέ τθερένα πο μπουτ ανάγκη τι ασουνέν-λες. (Παρ. 15:​23) Ή μπέκιμ τι τσσίντελ εκχέ λατσσέ πφραλές ή πφενιά κι κχανγκιρί τι βοηθίνελ-λεν. Ατζέ-ντα άμα κα μπαριόν τουμαρέ τσσαβέ, ο Ιεχωβά μπέκιμ τι ανέλ λένγκε γκοντιάτε κάτι σο σικλιαρντένας-λεν ανγκλέ. (Ιωάν. 14:​26) Κάνα να τσσιναβένα τι σικλιαρέν τουμαρέ τσσαβέν τουμαρέ λαφίντζαρ ντα τουμαρέ παραδειγμάσαρ, ο Ιεχωβά κα ευλογίνελ-τουμέν.

19. Σόσκε μπορίνελα εκ ντάι τι αβέλ σίγουρη ότι τθερέλα ι ευλογία ι Ιεχωβάσκι;

¹⁹ Ο μανγκιπέ ι Ιεχωβάσκο τουμένγκε να τθερέλα τι κερέλ οντουλέντζαρ σο τραμπίνενα τουμαρέ τσσαβέ. Μανγκέλα-τουμέν σόσκε τουμέν μανγκένα-λες. Άμα μπαριαρένα κορκορέ τουμαρέ τσσαβέν, ο Ιεχωβά ντέλα-τουμέν πο λάφι τι αρακχαβέλ-τουμέν ντα τι αβέλ Ντατ τουμαρέ τσσαβένγκε. (Ψαλμ. 68:5) Νανέ τουμαρέ βαστέστε άμα τουμαρέ τσσαβέ κα τραμπίνεν ή να κα τραμπίνεν τι υπηρετίνεν ι Ιεχωβάς. Άμα όμως τουμέν να κα τσσιναβέν τι ντεν μπέσα κι βοήθεια κι Ιεχωβάσκι ντα τι κερέν σο νακχέλα τουμαρέ βαστένταρ, κα τθερέν λέσκι ευλογία.