1-2. (a) Ewuniki ali ndi, na mazibu gahi alwisize ye nka muzire? (b) Oganirire enfoto eri oku cijalada c’eyi gazeti.

 CIRU akaba Ebibliya erhaganiriri okubiyerekire obubatizo bwa Timoteyo, kurhali kuzibu okurhanya omwishingo nnina Ewuniki abire nago erhi omugala abatizibwa. (Mig. 23:25) Obone omu bwenge bwawe gurhi ali acidina amango Timoteyo ayimanzire omu mishi. Ewuniki ali amwemwerhwa amango Loisi, nakulu wa Timoteyo ayimanzire aha burhambi bwage. Erhi bayubiza Timoteyo omu mishi, Ewuniki ahumûka erhi ashiiii. Timoteyo ayubuluka erhi anali amwemwerhwa, na nnina alaka enyanya z’omwishingo. Ciru akaba kurhali kulembu, Ewuniki ayigiriza omugala okuzigira Yehova na Yezu Kristu. Mazibu gahi alwisize ly’ahikira aho?

² Timoteyo aleragwa na babusi babirhi bagwerhe ngasi muguma elyage idîni. Ishe ali Mugiriki, na nnina na nakulu bali Bayahudi. (Ebj. 16:1) Nkaba Timoteyo ali mwana w’omushuko erhi nnina Ewuniki na nakulu Loisi baja omu lindi idîni, k’okuderha, idîni ly’Ecikristu. Cikone, ishe yehe arhabaga Mukristu. Idîni lihigi Timoteyo akacishozire? Byanahashikana kw’eyo myaka, Timoteyo alikola agwerhe obuhashe bw’okucishoga elyage idîni. K’akacishozire idîni ly’ishe orhali mwemezi? K’akacishwekire oku nkomêdu z’Eciyahudi ayigirizibagwa kurhenga eburho? Erhi akayemire okuba mwanafunzi wa Yezu Kristu?

3. Nk’oku biyerekinwe omu lwandiko lw’Emigani 1:8, 9, gurhi Yehova abona omukolo abazire bajira lyo barhabala abana babo bahikire aha baba bîra bage?

³ Ene, abazire Bakristu nabo baba bazigire emilala yabo. Kulusha  ebindi byoshi, baba balonzize barhabale abana babo babe n’obwîra bwa hofi-hofi haguma na Yehova. Na Nnâmahanga wirhu anashagalukire obushiru bwabo. (Osome Emigani 1:8, 9.) Yehova arhabire bazire banji bayigirize abana babo okumuzigira n’okumukolera.

4. Mazibu gahi bazire baguma na baguma bagwerhe ene?

⁴ Kanji-kanji, omuzire anakacidosa erhi abana bage bayish’icishoga okukolera Yehova nk’oku Timoteyo ajiraga. Ababusi baba bamanyire oku abana babo banalwise mashumi manji mw’er’igulu lya Shetani. (1 Pt. 5:8) Na kandi, bazire banji bajira amazibu g’okulera abana babo bulya barhacijira b’iba erhi bulya b’iba barhaba bakozi ba Yehova. Kwa lwiganyo, mwali wirhu muguma ohamagalwa Christine * adesire ntya: “Ibanie aba mulume mwinja anaba azigire bwenene omulala gwirhu, cikone arhalonzagya nyigirize abana birhu okuli. Hagezire myaka minji ndi nalaka bulya nakag’icidosa gurhi abana bani bakayish’ihikiramwo aha baba Bahamirizi ba Yehova.”

5. Bici rhwaganirira mw’eci cigabi?

⁵ Erhi akaba oli muzire Mukristu, wanahash’irhabala abana bawe bahikire aha bamanya Yehova n’okumukolera nk’oku Ewuniki ajiraga. Mw’eci cigabi, rhwaganirira gurhi wakayigamwo olwiganyo lwa Ewuniki omu kuyigiriza abana bawe kugerera enderho zawe n’ebijiro byawe. Na kandi, rhwayish’ibona gurhi Yehova akakurhabalamwo.

6. Nk’oku biyerekinwe omu 2 Timoteyo 3:14, 15, gurhi Timoteyo ahikiremwo aha aba Mukristu?

⁶ Erhi Timoteyo aciri mwana murho, nnina ajira okwage koshi ly’amuyigiriza “Amandiko Matagatifu,” nk’oku Abayahudi banaligahugûsirwe. Kobinali, obumanye bwage burhali bunji bulya arhal’imanyire kantu koshi-koshi okubiyerekire Yezu Kristu. Cikone, ebi Timoteyo aciyigirizagya kurhenga omu Mandiko, byamurhabala abe n’obumanye al’ilagirireko ly’ayemera idîni ly’Ecikristu. Cikoki, k’akabire Mukristu? Ye nka musole, agwerhe oluhuma lw’okucishoga erhi aba Mukristu. Buzira karhinda, ebi Timoteyo ayigirizibagwa na nnina byo byamurhabire bwenene ‘ayemera buzira kurhindira’ okuli okubiyerekire Yezu. (Osome 2 Timoteyo 3:14, 15.) Ewuniki ashagalusire bwenene okubona ayigirizize omwana wage okubiyerekire Yehova ciru akaba kwali kuzibu! Ewuniki alamire kushimbana n’izino lyage lirhenzire omu luderho luhugwîre “kuhima.”

7. Gurhi Ewuniki akarhabiremwo omugala ly’ajira amajambere enyuma z’okubatizibwa?

⁷ Erhi Timoteyo abatizibwa, ahikiriza omuhigo gw’obulagirire bwenene omu kalamo kage, cikone Ewuniki acir’iyobohire. Gurhi omugala akakolesize akalamo kage? K’akakômerine n’abîra babi? K’akajir’isomera e Atene n’okuyemera enyigirizo z’ecipagani z’efilozofi zakag’iyigirizibwa eyo munda? K’akahezize akasanzi kage, emisi yage, n’obusole bwage omu kukola bwenene ly’alongereza obuhirhi? Ewuniki arhakarhôlire Timoteyo emihigo, cikone akamurhabire. Gurhi akajijiremwo ntyo? Al’ishinganine akole bwenene ly’arhabala Timoteyo azigire Yehova bwenene n’okumuvuga omunkwa kw’ebi ye na Yezu bajirire omulala gwabo. Ababusi b’iba erhi bakabo barhakolera Yehova, arhali bone bajira amazibu g’okurhabala abana babo bazigire Yehova Nnâmahanga. Ciru akaba ababusi bombi baba omu okuli, kwanaba kuzibu okuhuma oku mirhima y’abana babo lyo bahikira aha baba bakozi bishwekerezi ba Yehova. Bici olwiganyo lwa Ewuniki lwakayigiriza ababusi?

8. Gurhi omuzire akarhabala iba oli Mukristu ly’ahikiriza amalagirire g’ekiroho g’abana babo?

 ⁸ Oyigirize abana bawe Ebibliya. We mwali wirhu, erhi akaba balo aba omu okuli, Yehova aba alonzize omurhabale ly’ahikiriza amalagirire g’ekiroho g’abana binyu. Njira nguma wakajiramwo ntyo kuli kukalunga okuboko ngasi mango Enterekêro y’Omulala. Okaderha bwinja okubiyerekire ogo mupango, onarhanye kw’ebi wakajira ly’ako kasanzi kaba ka kushagalusa na kakusimisa. Nkaba wanarhabala balo okupanga mwanzi mulebe gw’Ebibliya mwakaganirira erhi kantu kalebe mwakajira omu Nterekêro y’Omulala. Na kandi, erhi akaba hali abana binyu bakola bagwerhe emyaka eshinganine lyo bayunguka omu kuyiga Ebibliya kugerera ecitabu Oshagalukire Akalamo Ensiku n’Amango!, nkaba wanakacilunga haguma na balo lyo mubarhabala.

9. Bici byakarhabala omuzire iba arhaba Muhamirizi wa Yehova?

⁹ Bazire baguma banayigiriza abana babo Ebibliya bulya barhacijira b’iba erhi bulya b’iba barhaba Bahamirizi ba Yehova. Erhi akaba ntyo kobiyosire omu mulala gwawe, orhayobohaga. Yehova akurhabala. Okolese ebikolanwa by’omwigiriza Yehova arhuhîre kugerera ikubuliro lyage ly’oyigiriza abana bawe Ebibliya. Wanadosa abandi babusi bagwerhe obulenga gurhi bohe bakolesa ebyo bikolanwa omu nterekêro yabo y’omulala. * (Mig. 11:14) Na kandi, Yehova anakurhabala ly’okaganira n’abana bawe. Omuhûne akurhabale ly’omanya ebiri omu bwenge bwabo n’omu mirhima yabo. (Mig. 20:5) Idoso lilembu liri nk’eri: ‘Amazibu madârhi oli walwisa emasomo gali gahi?,’ lyanakurhabala ly’ojira enganiro nyinja haguma n’abana bawe.

10. Bindi bici wakajira ly’oyigiriza abana bawe okubiyerekire Yehova?

¹⁰ Okalonza obulyo bw’okuyigiriza abana bawe okubiyerekire Yehova. Okaganira okubiyerekire Yehova na lugenda ebintu binja akujirire. (Lush. 6:6, 7; Iz. 63:7) Oko kuli kwa bulagirire bwenene erhi akaba orhakahash’iyigiriza abana bawe Ebibliya ahaka ngasi mango. Christine, rhwaganiriraga embere, adesire ntya: “Obulyo bw’okuganirira ebintu by’ekiroho bwali busungunu bwenene n’oko kwakarhuma nakolesa ngasi kasanzi koshi rhwagwerhe. Rhwakagigend’icilambagiza erhi kuja omu bwarho n’okuvugama lyo rhurhenga oku burhambi bw’enyanja na ntyo rhwanaganirira ebintu binja Yehova alemire na bintu binji by’ekiroho. Erhi abana bani bakula, nakabaha omurhima bakayiga Ebibliya bonene.” Na kandi, okaderha ebintu binja okubiyerekire ikubuliro lya Yehova n’okubiyerekire bene wirhu na bali birhu. Orhakag’iderha-derha kubi abagula. Ebi oderha lugenda abagula byanarhabala abana bawe bakagend’ibaganiza amango bali omu bulagirire.

11. Nk’oku biyerekinwe omu Yakobo 3:18, bulya gurhi kuli kwa bulagirire rhugendekeze omurhûla omu mulala?

¹¹ Ogendekeze omurhûla omu mwawe. Ngasi mango, okayereka balo n’abana bawe oku oba obazigire. Okaderha balo omu njira nyinja na ya bukenge onarhabale abana bawe nabo bakajira ntyo. Erhi wakajira ntyo, omu mwinyu mwanaba omurhûla, na kandi kwanakaba kulembu kuli we okuyigiriza abana bawe okubiyerekire Yehova. (Osome Yakobo 3:18.) Rhuganirire olwiganyo lwa Jozsef, oba painiya wa pekee omu cihugo c’e Roumanie. Erhi ali akula, ishe arhuma kwaba kuzibu kuli ye, nnina, mwali wabo mukulu, n’abalumuna babirhi okukolera Yehova. Jozsef adesire ntya: “Nyâma akag’ijira okwage koshi ly’omu mwirhu muja omurhûla. Oku larha agendekire aba mukali, ko na nyâma agendekire aba mutûdu.  Erhi akabwine oku kuli kuzibu kuli rhwe okukenga larha n’okumurhumikira, akag’irhuganirira olwandiko lw’Abefezi 6:1-3. Na buzinda, akag’irhuganirira okubiyerekire amorhere minja ga Larha n’okurhurhabala rhuhugûkwe bulya gurhi rhushinganine rhumuzigire. Omu kujira ntyo, akarhabala omulala gwirhu gubemw’omurhûla.”

12. Nk’oku biyerekinwe omu 2 Timoteyo 1:5, gurhi olwiganyo lwa Ewuniki lwarhabiremwo Timoteyo?

¹² Osome 2 Timoteyo 1:5. Ewuniki ayeresire Timoteyo olwiganyo lwinja. Amuyigirizize oku obuyemere bw’okuli bunabonekane kugerera ebijiro. (Yk. 2:26) Buzira karhinda, Timoteyo abwine oku obuzigire busêzire nnina agwerhe kuli Yehova bo bwakag’ishumya ebijiro byage. Kobinali, Timoteyo abwine oku okukolera Yehova kwarhumire nnina aba n’omwishingo. Gurhi olwiganyo lwa Ewuniki lwarhabiremwo Timoteyo? Nk’oku entumwa Paolo yayerekanaga, Timoteyo agwerhe obuyemere busêzire nk’obwa nnina. Obo buyemere bwa Timoteyo burhayishaga ntya-ntya kone. Timoteyo abwine olwiganyo lwa nnina anahiga okuluyiga. Ko n’oko, bazire banji barhabire “buzira binwa” abantu b’omu mulala gwabo bakolere Yehova. (1 Pt. 3:1, 2) Na nawe wanajira ntyo. Gurhi wakajiramwo ntyo?

13. Bulya gurhi omuzire ashinganine ahire obwîra bwage haguma na Yehova oku nafasi ntanzi omu kalamo kage?

¹³ Ohire obwîra bwawe haguma na Yehova oku nafasi ntanzi omu kalamo kage. (Lush. 6:5, 6) Aka bazire banji, onaciyime bintu binji. Onaciyime akasanzi kawe, ensaranga, iro, n’ebindi bintu ly’oshibirira amalagirire g’omubiri g’abana bawe. Cikone, orhashinganini okakolesa akasanzi kawe koshi ly’ohikiriza ago malagirire n’oko kurhume wayibagira obwîra bwawe haguma na Yehova. Ngasi mango okacihiriraho akasanzi k’okushenga, okujira ifunzo lyawe wene ly’Ebibliya n’okuja oku ntimanano z’ecigamba. Omu kujira ntyo, wanacizibuhya kiroho wananayeresa abantu b’omu mulala gwawe olwiganyo, ciru n’abandi.

14-15. Bici olwiganyo lwa Leanne, Maria, na João lukuyigirizize?

¹⁴ Rhuganirire nyiganyo nsungunu z’emisole yaciyigirizize okuzigira Yehova n’okumulangalira kugerera olwiganyo lwa ba nnina. Leanne, mwali wa Christine adesire ntya: “Rhurhakayizire Ebibliya nka Larha ali ahaka. Cikone, ngasi mango Nyâma akag’ija oku ntimanano. Ciru akaba rhurhal’imanyire binji okubiyerekire Ebibliya, olwiganyo lwage lwarhurhabire rhube n’obuyemere busêzire. Rhwal’imanyire oku Abahamirizi ba Yehova banayigirize okuli ciru n’embere rhurhondere okuja oku ntimanano.”

¹⁵ Maria, ishe akag’ihana omulala gwabo mango malebe bulya bajire oku ntimanano adesire ntya: “Nyâma aba muguma w’omu bakazi b’oburhwali mba manyire. Amango naciri mwana, hali amango nakag’ilahira okujira bintu bilebe bulya nyobohire ebi abandi baderha. Cikone, erhi nkabona gurhi nyâma ali wa burhwali bwenene na gurhi ensiku zoshi akag’ihira Yehova oku nafasi ntanzi omu kalamo kage, oko kwantabala ntacikag’iyoboha abantu.” João, ishe akag’ihanza omulala gwabo oku barhaganiriraga ebintu by’ekiroho ahaka adesire ntya: “Nkaba akantu kakag’impuma oku murhima bwenene kwali kubona oku Nyâma ali mubidu okuleka ngasi kantu koshi ly’ashagalusa larha, cikone obuzigire bwage kuli Yehova bone arhakalesire ciru n’ehitya.”

16. Gurhi olwiganyo lw’omuzire lwakarhabalamwo abandi?

¹⁶ Mwe bazire, mukengere oku olwiganyo lwinyu lwanarhabala abandi. Gurhi lwakabarhabalamwo? Rhulole gurhi olwiganyo lwa Ewuniki  lwarhabire entumwa Paolo. Al’ihugûsirwe oku obuyemere bwa Timoteyo burhalimo bulyalya “bwabaga burhanzi muli . . . Ewuniki.” (2 Tm. 1:5) Mangaci Paolo abonaga oburhangiriza obuyemere bwa Ewuniki? Byanahashikana omu mubalamo gwage murhanzi gw’obumisiyonere mwo arhimananaga na Loisi na Ewuniki e Listra, nkaba anabarhabala baba Bakristu. (Ebj. 14:4-18) Orhanye kuli oku: Erhi Paulo ayandikira Timoteyo amaruba, hali hamagera hofi myaka 15 kurhenga arhimanine na Ewuniki, anacikag’ikengera ebijiro by’obwishwekerezi bya Ewuniki anayerekana oku ali lwiganyo lwinja abandi balʼishinganine bayige! Bibonekine oku, olwiganyo lwage lwahîre Paolo omurhima lwananarhabire abandi Bakristu banji b’omu myaka igana mirhanzi. Erhi akaba oli walera abana bawe wene n’erhi akaba balo arhaba Muhamirizi wa Yehova, oyemere n’obwalagale oku olwiganyo lwawe lw’obwishwekerezi lwanazibuhya abandi n’okubashumya.

17. Gurhi oshinganine ojire erhi akaba oli wajira okwawe koshi ly’oyigiriza omwana wawe cikone arhalonzizi okukolera Yehova?

¹⁷ Gurhigi erhi akaba oli wajira okwawe koshi ly’oyigiriza omwana wawe cikone arhalonzizi okukolera Yehova? Okengere oku okuyigiriza omwana kuba kuhûnyire akasanzi. Nk’oku biyerekinwe oku nfoto, erhi wakarhwera emogomogo, hali amango wakacidosa erhi kobinali yakula ehikire aha gwaba murhi gwakayâna amalehe. Ciru akaba arhali we wakarhuma yaleheka, onagendekere wayibulagirakw’amishi ly’oyiha obulyo bw’okukula. (Mk. 4:26-29) Ko n’oko, we nka muzire hali amango ocidosa erhi kobinali onarhabale abana bawe lyo bazigira  Yehova. Arhali we wakabaseza okukolera Yehova. Cikone, erhi wakagendekera wajira oku wakanahasha ly’obayigiriza, wanabaha obulyo bwinja bw’okukula kiroho.​—Mig. 22:6.

18. Gurhi Yehova akarhabalamwo abana bawe lyo bakula kiroho?

¹⁸ Kurhenga mîra, Yehova arhabire misole minji bwenene ly’ehikira aha yaba bîra bage. (Enna. 22:9, 10) Anarhabala abana bawe nabo bakule kiroho; erhi akaba balonzize okujira ntyo. (1 Kr. 3:6, 7) Yehova anagendekere azigira abana bawe ciru akaba banakabonekana nka barhakamukolera. (Enna. 11:4) Erhi bakayerekana ciru himanyiso hisungunu hyone hy’oku “bagwerhe irala” ly’okumukolera, anaba mubidu okubarhabala lyo bahikira aha baba bîra bage. (Ebj. 13:48, NWT; 2 Nga. 16:9) Anakurhabala oderhe akantu kashinganine omu kasanzi kashinganine amango abana bawe balagirire okukayumva. (Mig. 15:23) Kandi erhi Yehova anashumya mwene wirhu erhi mwali wirhu mulebe w’omu cigamba cinyu ly’abashibirira omu njira yago-yago. Ciru n’amango abana bawe bakola bakulu, Yehova anabakengeza kantu kalebe wabayigirizagya mîra. (Yn. 14:26) Erhi ogendekera wayigiriza abana bawe kugerera enderho zawe n’olwiganyo lwawe, onahe Yehova bintu binji akagisha.

19. Bulya gurhi wanayemera n’obwalagale oku oba oyemirwe na Yehova?

¹⁹ Abana bawe bahige oku bakolera Yehova erhi barhamukolere, Yehova yehe agendekera akuzigira. Aba akuzigire bulya nawe oba omuzigire. Erhi akaba wene oli walera abana bawe, Yehova alaganyize oku aba Ishe wabo n’oku aba Mulanzi wawe. (Enna. 68:5) Arhali we wakaseza abana bawe bacishoge okukolera Yehova erhi nanga. Cikone, erhi wakagendekera walangalira oburhabale bwa Yehova n’okujira okwawe koshi ly’oyigiriza abana bawe, wanayemerwa naye.