1-2. a) Ia Eonika io, le manino ro nisarotsy taminy ty nampianatsy ani-anakilahiny iny mikasiky ani-Jehovah noho Jesosy? b) Ino ty azonao resahy mikasiky ani-sary amy fononi-gazety toy io?

 TSY miresaky mikasiky ty batisani-Timoty ty Baiboly. Fe ndre zay, le tsy sarotsy amintsika ty mandiniky ty hafalea nitsapani-Eonika reniny tamy andro io. (Ohab. 23:25) Mba alao sary an’eritseritsy hoe io ie, falifaly manenty ani-Timoty mitsanga anaty rano ao. Mihehihehy avao ie lafa mandrakoky azy Loisa bebeni-Timoty. Lafa najobo anaty rano ao amy zay Timoty, le nifoay moramora Eonika sady tanjatanjahiny avao ty ainy tsy no hitany. Falifaly biby ie lafa naboaky baka ao Timoty ka tsy nitanjakiny sasy ty ranomasony. Tsy nimora tamy Eonika ty nampianatsy ani-anakilahiny io ho tea ani-Jehovah noho Jesosy Kristy, fe nivitany soa avao raha zay. Fe ino ty raha sarotsy natrehini-Eonika tamy ie nampianatsy ani-anakilahiny io?

² Samby nana ty fivavahany ty ray aman-drenini-Timoty. Grika babany, fa reniny noho bebeny Jiosy. (Asa. 16:1) Mety mbo nikelikely vasa Timoty le fa nilasa Kristiana Eonika noho Loisa. Fe babany tsy nanaraky ty fivavaha kristiana. Aia zany ty harahini-Timoty? Afaky nanapa-kevitsy ie lafa nibe. Hanaraky ty finoani-babany va ie? Sa hanaraky ty lilini-Jiosy, satria fa zay ty nitezà azy liany ie vo nateraky? Sa ie hanaraky fivavaha vaovao, azy mino ani-Jesosy Kristy toy?

3. Laha hentea ty Ohabolana 1:8, 9, manao akory ty fahitani-Jehovah ty ezaky ataoni-reny mba hanampea ty anan-drozy ho lasa namani-Jehovah?

³ Tea ty fianakaviany koa ty reny kristiana, ka tena teany ty hanampy ty anany hifandramby marìny amy Jehovah. Lafovily  amy Ndranaharintsika iny ezaky ataon-drozy zay. (Vakio Ohabolana 1:8, 9.) Fa maro biby ty ampela manan’anaky nampeani-Jehovah ka nahavita nampianatsy ty anany ho tea ani-Jehovah noho hanompo azy.

4. Ino ty raha sarotsy atrehini-reny henanizao?

⁴ Ara-dalàna laha miasa loha ty reny kindraiky hoe: ‘Hifily hanompo ani-Jehovah avao va lahy anako toy, manahaky ani-Timoty?’ Haini-ray aman-dreny fa miatriky raha sarotsy maro ty anan-drozy amy tontoloni-Satana toy eto. (1 Pet. 5:8) Ankoatsini-zay, maro ty ampela miteza raiky ty anany satria vasa tsy manambaly ie, na mety manambaly avao koa ie fe tsy manompo ani-Jehovah ty valiny. Zao, ohatsy, ty raha nivolanini-ranabavy mana anara Christine b zay: “Olo soa valiko sady tea anay, fe tena tsy teany laha ampianary Baiboly ananay reo. Nitany avao aho matetiky, sady nieritseritsy hoe akory ty hataoko mba hahavy ani-anako reo hanompo ani-Jehovah.”

5. Ino ty hodinihintsika amy lahatsoratsy toy ato?

⁵ Manan’anaky va iha? Afaky hanahaky ani-Eonika koa iha, zany hoe ho vitanao ty hanampy ty ananao ho tea ani-Jehovah noho hanompo azy. Hodinihintsika amy lahatsoratsy toy ato hoe akory ty azonao anahafa ani-Eonika noho hampianaranao ty ananao amy alalani-raha volaninao noho ataonao. Ho hitantsika koa hoe akory ty hanampeani-Jehovah anao.

6. Laha hentea ty 2 Timoty 3:14, 15, akory ty nahavy ani-Timoty ho lasa Kristiana?

⁶ Mbo nikely Timoty, le fa niezaky reniny nampianatsy azy “ty Soratsy Masy” mifanaraky amy fahazoani-Jiosy azy. Mazava ho azy fa tsy ampy ty raha nihaini-reniny tamy zay satria mbo nivavaky tamy fivavaha jiosy ie ka tsy nisy raha nihainy mikasiky ani-Jesosy Kristy ndre raiky. Fe ndre zay, ampy hahavy ani-Timoty ho lasa Kristiana ty raha nianarany tamy Soratsy Masy ao. Fe lasa Kristiana vatany va ie? Lafa nibe Timoty le afaky nifily hoe hanaraky fomba fiaina kristiana va ie sa tsy hanaraky. Azo antoky fa niezaky nandresy lahatsy ani-Timoty reniny, ka zay ro nahavy azy nino ty fahamarina mikasiky ani-Jesosy. (Vakio 2 Timoty 3:14, 15.) Tena nifalifaly Eonika fa nampianatsy ani-anany iny mikasiky ani-Jehovah, ndre tsy nimora aza ty nanao ani-zay. Ty anara hoe Eonika le baka amy safà midika hoe “mandresy.” Nahavita nandresy raha sarotsy vatany ie mba hanampea ani-Timoty ho tea ani-Jehovah noho hanompo azy.

7. Ino ty nataoni-Eonika mba hanampea ani-anany iny handroso avao tafarani-batisany?

⁷ Nahavita dingana bevata tamy fiainany Timoty lafa natao batisa. Fe ndre zay, mbo niasa loha mikasiky azy avao Eonika. Hanao akory ty hampiasany ty fiainany? Tsy no hinama amy naman-draty ie? Handeha hanohy fianara a Atena any va ie ka lasa hino ty fampianarani-filozofy mpanompo sampy any rey? Handany ty fotoany, ty heriny, noho ty hatanorany amy asa mafy hahazoa drala be va ie? Tsy nanapa-kevitsy ho ani-Timoty Eonika, fe nampeany ie mba hahay hanapa-kevitsy. Tamy fomba akory? Niezaky nampianatsy ani-anany iny avao ie mba hahavy azy ho tena tea ani-Jehovah noho hankasitraky ty raha iaby nataoni-Jehovah noho Jesosy ho an-drozy. Tsy mora raha zay satria tsy manompo ani-Jehovah valiny. Fe ndre samby manompo ani-Jehovah aza ty mpivaly, le mety mbo ho sarotsy amin-drozy avao ty manampy  ty anan-drozy hanompo ani-Jehovah. Ino ty azoni-ray aman-dreny ianara baka amy Eonika?

8. Ino ty azoni-ranabavy atao mba hanampea ty valiny lafa mampianatsy ty anan-drozy mikasiky ani-Jehovah ie?

⁸ Miaraha mianatsy Baiboly amy ananao. Ho ahi-ty anabavy: Laha manompo ani-Jehovah koa valinao le ampeo ie hampianatsy ani-ananareo reo. Zay ty raha teani-Jehovah hataonao. Afaky manao ani-zay, ohatsy, iha lafa manoha ty fandahara nataonareo mba hanaova Fotoam-pivavahani-Fianakavia. Miresaha raha soa mikasiky ani-fandahara io, le eritsereto hoe ino ty azonao atao mba ho soasoa noho hahafalifaly fotoa io. Azonao atao koa vasa ty manampy ani-valinao hanoma ty raha hianara na hatao. Ankoatsini-zay, laha fa afaky mianatsy amy boky Ho Azonao Tavy ty Fiaina Zisiky Farany! ty sisany amy ananareo rey, le azonao atao ty manampy ani-valinao amy zay samby afaky mianatsy rozy.

9. Ino ty afaky manampy ty ampela hahay hampianatsy ty anany laha tsy Vavolombeloni-Jehovah valiny?

⁹ Tsy maintsy mampianatsy Baiboly ty anany ty ampela sisany, satria ie raiky avao ro miteza ty anany na tsy manompo ani-Jehovah valiny. Laha zay ty raha misy amy fianakavianareo eo, le ka matahotsy. Hanampy anao Jehovah. Ampiasao ze fitaova ameany amy alalani-fandaminany mba hampianara ty ananao. Azonao atao koa ty manontany ray aman-dreny fa nahabe anaky rey hoe manao akory ty nampiasan-drozy ani-fitaova rey tamy fotoam-pivavaha mba hahavy ty anan-drozy ho hendry. c (Ohab. 11:14) Afaky manampy anao hahay hiresaky amy ananao reo koa Jehovah. Angataho ie hanampy anao hametraky fanontanea mety soa, mba hahaiza ty raha eritseretin-drozy noho tsapan-drozy. (Ohab. 20:5) Azonao atao ty mametraky fanontanea tsotra hahavy anareo hiresaky, ohatsy hoe: ‘Ino ty raha tena manahira hitanao an-dakilasinareo any?’

10. Ino koa ty raha azonao atao mba hanampea ty ananao hahay mikasiky ani-Jehovah?

¹⁰ Milà hevitsy hampianara ty ananao mikasiky ani-Jehovah avao. Miresaha mikasiky ani-Jehovah noho ty raha maro nataony ho anao. (Deot. 6:6, 7; Isaia 63:7) Tena vatan-draha raha zay sirtò laha tsy afaky mianatsy matetiky miaraky amy ananareo reo an-trano ao iha. Hoy Christine, azy niresahintsika taloha teroy iny: “Tsy de mana fahafaha hiresaky mikasiky ani-Jehovah amy anako reo aho, ka hararaotiko iaby ze fotoa iarahanay. Lafa mandeha mitsangatsanga zahay, na mandehandeha laka le miresaky ty raha soasoa nataoni-Jehovah noho miresaky raha maro hafa hanampy an-drozy ho lasa namani-Jehovah. Lafa nibe amy zay rozy le nampirisihiko handiniky ty raha resahini-Baiboly.” Ankoatsini-zay, miresaha raha soa mikasiky ty fandaminani-Jehovah noho ty mpiara-manompo. Ka mikinokino anti-panahy. Arakaraky ze raha resahinao mikasiky an-drozy ro hanampy ani-ananao reo hiresaky amin-drozy lafa mila fanampea ananao reo.

11. Laha hentea ty Jakoba 3:18, manino ro tena ilà ty hoe mampisy filongoa an-trano ao?

¹¹ Miezaha hampisy filongoa an-trano ao. Asehò amy valinao noho ananao reo avao hoe teanao rozy. Miezaha ho soa fanahy noho hanaja lafa miresaky mikasiky ani-valinao, le ampianaro hanao manahaky ani-zay koa ty ananao. Laha manao ani-zay iha, le ho  tamà an-trano ao ajà reo sady ho moramora amin-drozy ty hianatsy mikasiky ani-Jehovah. (Vakio Jakoba 3:18.) Zay mihintsy ty raha niainani-Jozsef, mpisava lala manoka a Romanỳ any. Tamy ie mbo nikely, le nataoni-babany ze hahavy an-drozy amy mamany, noho tam-po raiky aminy rey tsy hanompo ani-Jehovah. Hoy Jozsef: “Nataoni-mamako ze hahavy anay trano raiky hifanaraky soa avao. Nasiaky babako, fe mamako nisoa fanahy avao. Lafa nihitani-mamako hoe somary tsy de nanaja noho tsy nanoriky ty safàni-babako zahay, le niarahany nidiniky aminay ty Efesianina 6:1-3. Bakeo niresahiny aminay ty toetsy soani-Baba sady nampeany zahay hahay hoe manino zahay ro tokony ho tea azy. Nahavy ty fianakavianay hilamy soa avao raha zay.”

12. Laha hentea ty 2 Timoty 1:5, nanao akory Timoty lafa nahita ty modelini-Eonika?

¹² Vakio 2 Timoty 1:5. Nanome modely soa ho ani-Timoty Eonika. Tsy maintsy nampianariny azy, ohatsy, hoe mila aseho amy atao ty finoa. (Jak. 2:26) Azo antoky fa nihitani-Timoty hoe ty fitiava ani-Jehovah ro nahavy ani-reniny nanao raha. Nihitany koa hoe falifaly reniny lafa nanompo ani-Jehovah. Ino ty vokatsini-raha nataoni-Eonika rezay tamy Timoty? Nivola apostoly Paoly fa nana finoa matanjaky manahaky ani-reniny Timoty. Tsy niaviavy ho azy avao raha zay. Nandiniky ty modely nameany Timoty ka lasa ta hanahaky azy. Maro koa henanizao ty reny nanampy ty fianakaviany hanompo ani-Jehovah ndre tsy mivola aza. (1 Pet. 3:1, 2) Afaky manao manahaky ani-zay koa iha. Amy fomba akory?

13. Manino ty reny ro tsy tokony hanao ambanin-draha ty fifandrambesany amy Jehovah?

¹³ Ka atao ambanin-draha ty fifandrambesanao amy Jehovah. (Deot. 6:5, 6) Manahaky ty ankamaroani-reny, le mila mahafoy raha maro iha. Mahafoy fotoa, hery, torimaso, noho raha hafa, ohatsy, iha mba hikarakarà ty raha ilàni-ananao. Fe tsy tokony ho tandrena marè amy fikarakarà zay iha ka lasa tsy hanam-potoa hanatanjaha ty fifandrambesanao amy Jehovah. Manokana fotoa mba hivavaha, hanaova fianara am-bata, noho hanatreha fivoria. Anovo tsy tampaky raha reo. Laha manao ani-zay iha, le hifandramby marìny amy Jehovah sady hanome modely soa ho ani-fianakavianao noho ty olo hafa.

14-15. Ino ty ianaranao baka amy raha niainani-Leanne, Maria, noho João?

¹⁴ Maro ty tanora lasa nitea ani-Jehovah noho natoky azy lafa nandiniky ty raha nataoni-reniny. Ndao tsika handiniky ohatsy vitsivitsy. Hoy Leanne, anakampelani-Christine: “Tsy afaky nianatsy Baiboly zahay lafa tan-trano ao babanay. Fe nandeha avao Mama saky avy ty fotoa fivoria. Tsy tena nahay ze raha volanini-Baiboly aloha zahay, fe nanampy anay hana finoa matanjaky ty raha nataony. Mbo tsy nivory zahay le fa nihainay hoe io ty fahamarina.”

¹⁵ Toy koa misy ohatsy hafa. Maria ty anarany. Nisazini-babany avao matetiky ty fianakavian-drozy lafa nandeha nivory. Zao ty nivolanini-Maria: “Maro aloha ty rahavavy be herim-po haiko fe hafa avao mamako. Tamy zaho mbo nikely, le tsy nimety aho kindraiky lafa nisy raha nampanaovy ahy satria natahotsy ty raha hovolanin’olo. Fe nanampy ahy handresy ani-tahotsiko zay ty fahitako hoe tena be herim-po ie le nataony tamy pilasy voalohany tamy fiainany avao Jehovah.”  Mbo mitovitovy amy zay koa ty raha nivolanini-João. Tsy azo niresaha mikasiky ani-Jehovah noho ty Baiboly tan-tranon-drozy ao, hoasani-babany. Hoy João: “Tena nidosiky ty foko ty raha nataoni-mamako. Niparè hamoy ty raha iaby ie mba hampifalefalea ani-babako. Fe tsy nafoiny mihintsy ty fitiavany ani-Jehovah.”

16. Ino ty vokany lafa manome modely soa ty ampela manan’anaky?

¹⁶ Tiarovo fa misy vokany amin’olo hafa ty modely soa ameanao. Manao akory zao? Diniho ty vokatsini-modely nameani-Eonika tamy apostoly Paoly. Nieky Paoly fa ‘tamy Eonika’ ro nahavy ani-Timoty nana finoa tsy miatsaravelatsihy. (2 Tim. 1:5) Nombia ty nahitani-Paoly hoe nanam-pinoa Eonika? Mety tamy lia misionera voalohany nataony iny vasa ie ro nifankahita tamy Loisa noho Eonika ta Lystra any, le mety ho ie ro nanampy an-drozy ho lasa Kristiana. (Asa. 14:4-18) Mba eritereto moa: Lafa nanoratsy tamy Timoty amy zay Paoly, 15 tao tafara atoy, le mbo nitiarony ty tsy fivalihani-Eonika ka nivola Paoly hoe modely soa hotahafy ie. Tena nampahery ani-Paoly ty modely nameany sady nampahery ty Kristiana maro tamy taonjato voalohany koa. Reny miteza raiky ty ananao va iha sa tsy Vavolombeloni-Jehovah valinao? Matokisa fa mampahery ani-ze olo manodidy anao ty mahita ty tsy fivalihanao sady mandrisiky an-drozy hanao raha.

17. Ino ty tokony hataonao ndre atao raha tsy misy vokany amy ananao iny aza ty ezaky ataonao mba hampianara azy?

 ¹⁷ Manao akory laha atao raha tsy misy vokany amy ananao ty ezaky ataonao? Tiarovo hoe mitaky fotoa ty mampianatsy ajà. Atoroni-sary io hoe mitovy amy mamboly io raha zay. Lafa mamboly, ohatsy, iha, le mety hieritseritsy kindraiky hoe ho be avao va raha iny, le hisy voany. Tsy azonao antoky aloha hoe hitiry raha iny, fe tondratondrahanao avao ie mba hahafahany mitombo. (Mar. 4:26-29) Manahaky ani-zay koa fa mety hieritseritsy ty reny kindraiky hoe mba hanampy ani-anany rey ho tea ani-Jehovah avao va ty ezaky ataony. Tsy afaky manapa-kevitsy ho ani-ananao reo iha. Fe laha tsy vozaky iha fa miezaky manao ze azonao atao avao mba hampianara an-drozy, le manampy an-drozy ho lasa nama-Ndranahary iha amy zay.​—Ohab. 22:6.

18. Akory ty anampeani-Jehovah ty ananao mba ho lasa namany?

¹⁸ Fa maro biby ty tanora nampeani-Jehovah mba ho lasa namany taloha tany. (Sal. 22:9, 10) Azony atao koa ty manampy ani-ananao reo handroso ara-panahy laha zay ty fanirian-drozy. (1 Kor. 3:6, 7) Ndre tsy tena manompo ani-Jehovah amy fon-drozy aza ananao reo, le mbo tea an-drozy avao Jehovah. (Sal. 11:4) Lafa asehon-drozy hoe ta hanao raha mahafalifaly ani-Jehovah rozy ndre kelikely avao aza, le parè hanampy an-drozy ho lasa namany ie. (Asa. 13:48; 2 Tan. 16:9) Mety hanampy anao hivola raha soa amy fotoa mety ie, lafa tena mila maharè ani-zay ty ananao. (Ohab. 15:23) Na mety hampiasa rahalahy noho anabavy amy fiangona eo ie mba hikarakara an-drozy. Ndre fa be aza ty ananao, le mety mbo hampitiarovini-Jehovah an-drozy avao raha nampianarinao an-drozy taloha rey. (Jaona 14:26) Laha miezaky avao iha mampianatsy ty ananao amy alalani-raha volaninao noho ty raha ataonao, le tena hitahy anao Jehovah.

19. Manino iha ro afaky matoky hoe mahazo hatò amy Jehovah?

¹⁹ Tsy mianky amy ty safidy ataoni-ananao ro itiavani-Jehovah anao. Teany iha satria tea azy. Laha miteza raiky ty ananao iha, le mampitamà Jehovah fa ho Baba ho ani-ananao reo ie sady ho Mpiaro anao. (Sal. 68:5) Tsy afaky mamantatsy mialoha iha hoe hifily hanompo ani-Jehovah va ananao reo sa tsy hanompo azy. Fe laha miezaky miantehitsy amy fanampeani-Jehovah avao iha sady manao ze fara herinao, le hahazo hatò amy Jehovah.