1-2. (a) Suma ben de Enise èn san ben meki en muilek gi en leki mama? (b) Taki fu a prenki tapu a kafti.

 ALADI Bijbel no e taki noti fu a dopu fu Timoteyus, toku a no muilek fu frustan fa en mama Enise ben e prisiri na a dei dati (Odo 23:25). Prakseri fa a ben breiti di a ben e luku Timoteyus di a ben tanapu na ini a watra. Enise e lafu aladi Timoteyus en granmama Lowis e tanapu na en sei èn e brasa en hori. Seiker Enise ben hori en blo eife di den dukrun Timoteyus na ondro watra. Èn di Enise si fa a boi fu en ben e lafu di a opo baka komoto na ini a watra, dan a bigin krei fu di a ben e firi prisiri. Aladi a ben muilek gi Enise, toku a ben man leri a boi fu en fu kon lobi Yehovah nanga en Manpikin Yesus Krestes. San ben meki en muilek gi Enise fu gi a boi fu en leri?

² Timoteyus en papa nanga mama no ben abi a srefi bribi. En papa ben de wan Grikisma èn en mama nanga granmama ben de Dyu (Tori 16:1). A kan taki Timoteyus ben de wan yonguman di Enise nanga Lowis tron Kresten. Ma en papa no tron wan Kresten. A musu de so taki Timoteyus ben owru nofo fu teki en eigi bosroiti. Sortu bribi Timoteyus ben o teki? A ben o teki a bribi fu en papa? A ben o tan hori ensrefi na den Dyu gwenti di a ben leri sensi di a ben pikin? Noso a ben o tron wan disipel fu Yesus Krestes?

3. Soleki fa Odo 1:8, 9 e sori, dan fa Yehovah e si a muiti di mama e meki fu yepi den pikin fu den fu tron en mati?

³ Kresten mama na ini a ten disi lobi na osofamiri fu den tu. Ma a moro prenspari sani gi den, na taki den wani yepi  den pikin fu den fu tron mati fu Yehovah. Èn Yehovah e warderi a muiti di den e meki. (Leisi Odo 1:8, 9.) Yehovah yepi furu mama fu leri den pikin fu den fu kon lobi en èn fu dini en.

4. Sortu broko-ede son mama abi na ini a ten disi?

⁴ Wi kan frustan taki wan mama kan aksi ensrefi son leisi efu den pikin fu en o wani anbegi Yehovah, neleki Timoteyus. Fu taki en leti, papa nanga mama sabi fa a grontapu fu Satan e kwinsi den pikin fu den (1 Petr. 5:8). Boiti dati, furu mama musu kweki den pikin sondro wan masra, noso den abi wan masra di no e anbegi Yehovah. Fu eksempre, wan sisa di nen Christine b e taki: „Mi masra ben de wan bun papa èn a ben lobi na osofamiri fu en, ma a no ben wani kwetikweti taki mi ben kweki den pikin leki Yehovah Kotoigi. Mi krei furu fu a sani dati fu di mi ben e aksi misrefi efu oiti den pikin fu mi ben o anbegi Yehovah.”

5. San wi o luku na ini na artikel disi?

⁵ Efu yu na wan Kresten mama, dan yu kan yepi den pikin fu yu tu fu kon lobi èn dini Yehovah, neleki fa Enise ben du dati. Na ini na artikel disi wi o luku fa yu kan teki na eksempre fu en èn fa yu kan gi den pikin fu yu leri nanga den sani di yu e taki èn e du. Wi o luku tu fa Yehovah o yepi yu.

6. Soleki fa 2 Timoteyus 3:14, 15 e sori, dan san yepi Timoteyus fu tron wan Kresten?

⁶ Di Timoteyus ben de wan pikin boi, dan en mama du ala san a man fu gi en leri fu „den Santa Buku” soleki fa den Dyu ben e frustan den. A no de fu taki dati Enise ben sabi taki a Mesias ben o kon, ma a no ben sabi taki na Yesus ben de a Mesias. Toku den sani di Timoteyus leri fu den Santa Buku ben nofo fu yepi en fu tron wan Kresten. Ma a ben o tron wan Kresten? Now di a ben bigi kaba, dan a ben kan bosroiti gi ensrefi efu a ben o tron wan Kresten. A no de fu taki dati a muiti di Timoteyus en mama ben meki, yepi Timoteyus tu fu kon bribi den tru tori fu Yesus. (Leisi 2 Timoteyus 3:14, 15.) Dati meki Enise ben musu fu breiti taki a ben man leri a boi fu en sani fu Yehovah. Enise en nen e fiti en fu di a nen dati e komoto fu wan wortu di wani taki „wini”.

7. Fa Enise ben kan yepi a boi fu en fu tan go na fesi baka di a dopu?

⁷ Di Timoteyus dopu, dan a doro wan prenspari marki na ini en libi. Ma toku Enise ben e broko en ede ete nanga a boi fu en. San a boi fu en ben o du nanga en libi? A ben o meki takru mati pori en libi? A ben o go na skoro na ini Ateine èn a ben o bigin poti bribi na ini den leri fu den filosofiaman drape? A ben o gebroiki en ten, en krakti nanga den yongu yari fu en fu feti baka gudu? Aladi Enise no ben man teki bosroiti gi Timoteyus, toku a ben man yepi en. Fa so? A ben kan du tranga muiti ete fu yepi a boi fu en fu lobi Yehovah nanga en heri ati èn fu de nanga tangi gi ala sani di Yehovah nanga Yesus ben du gi den. Papa noso mama di abi wan patna di no e anbegi Yehovah, a no den wan-enkri sma di feni en muilek fu yepi den pikin fu den fu kon lobi Yehovah. Awinsi wan trowpaar e anbegi Yehovah èn den abi pikin, toku a kan muilek gi den fu doro na ati fu den pikin so taki den kan  tron futuboi fu Yehovah. San papa nanga mama kan leri fu na eksempre fu Enise?

8. Fa wan mama kan yepi a masra fu en di de na ini waarheid, fu leri den pikin fu den sani fu Yehovah?

⁸ Studeri Bijbel nanga yu pikin. Efu yu na wan sisa èn a masra fu yu de na ini waarheid tu, dan Yehovah wani taki yu yepi en fu gi den pikin fu unu leri. Wan fasi fa yu kan du dati, na te yu e horibaka gi na Osofamiri Anbegi. Taki bun fu a seti dati èn luku san yu kan du fu sorgu taki yu osofamiri e prisiri fu teki prati na a seti disi. Kande yu kan yepi yu masra fu sreka sani so taki unu kan studeri wan spesrutu sani fu Bijbel. Boiti dati, te den pikin fu yu bigi nofo fu studeri a Koloku fu têgo!-buku, dan kande yu kan yepi yu masra nanga dati.

9. Pe wan mama kan feni yepi te a no abi wan patna noso te a masra fu en no de na ini waarheid?

⁹ Son mama musu studeri Bijbel nanga den pikin fu den, fu di den no abi wan patna noso fu di a masra fu den no de na ini waarheid. Efu na so a de nanga yu osofamiri, dan no broko yu ede tumusi. Yehovah o yepi yu. Gebroiki den sani di na organisâsi seti fu studeri nanga den pikin fu yu. Fu san ede yu no e aksi papa nanga mama di abi moro ondrofeni fa yu kan gebroiki den sani disi na a Osofamiri Anbegi fu yu? c (Odo 11:14) Yehovah kan yepi yu tu fu taki moro bun nanga den pikin fu yu. Begi en èn aksi en fu yepi yu fu poti den yoisti aksi gi den pikin fu yu, so taki yu kan kon sabi san den e denki èn fa den e firi (Odo 20:5). Yu kan aksi den sani soleki: ’Fa a e go na skoro?’ Dati kan yepi yu kaba fu bigin wan takimakandra nanga den di kan yepi yu fu kon sabi fa den e denki èn fa den e firi.

10. Sortu tra sani yu kan du fu yepi yu pikin fu kon sabi Yehovah?

¹⁰ Suku fasi fu leri yu pikin sani fu Yehovah. Taki fu Yehovah èn fu den furu bun sani di a du gi yu (Deut. 6:6, 7; Yes. 63:7). A sani disi prenspari srefisrefi te yu no man studeri nanga den pikin fu yu na oso. Christine di wi ben taki fu en kaba, e taki: „Mi no ben abi furu okasi fu taki fu Gado nanga den pikin fu mi èn dati meki mi gebroiki ibriwan momenti di mi ben abi fu taki fu den sani dati. Wi ben gwenti go waka noso wi ben e teki wan pikin boto, dan wi ben pari go na tapu a watra fu taki fu den moi sani di Yehovah meki èn fu furu tra sani di ben o yepi den fu tron mati fu Yehovah. Di den pikin fu mi kon moro bigi, mi gi den deki-ati fu studeri Bijbel den srefi.” Wan tra prenspari sani, na fu taki bun fu Yehovah en organisâsi èn fu yu brada nanga sisa. No krutu den owruman. Den sani di yu e taki fu den kan yepi den pikin fu yu fu go suku yepi na den te den abi rai fanowdu.

11. Soleki fa Yakobus 3:18 e sori, dan fu san ede a prenspari fu sorgu taki freide de na ini na oso?

¹¹ Du muiti fu sorgu taki freide de na oso. Abi a gwenti fu sori yu masra nanga yu pikin taki yu lobi den. Taki na wan switi fasi èn na wan lespeki fasi fu yu masra èn leri den pikin fu yu fu du a srefi. Te yu e du disi, dan a o moro makelek gi den pikin fu leri sani fu Yehovah. (Leisi Yakobus 3:18.) Luku na eksempre fu Jozsef, di e dini leki spesrutu pionier na ini Rumeinia. Di a ben gro kon bigi, dan en papa ben meki en muilek gi en, en mama, nanga en brada nanga sisa fu dini Yehovah.  Jozsef e taki: „Mi mama du ala san a man fu sorgu taki freide ben de na oso. O moro mi papa ben muilek, o moro mi mama ben e sori switifasi. Te a ben e si taki a ben muilek gi wi fu lespeki mi papa èn fu gi yesi na en, dan a ben e taki nanga wi fu Efeisesma 6:1-3. Baka dati a ben e taki nanga wi fu den bun fasi fu mi papa èn a ben e sori wi fu san ede wi ben musu lobi en. Na dati meki taki freide tan na ini wi osofamiri.”

12. Soleki fa 2 Timoteyus 1:5 e sori, dan sortu krakti na eksempre fu Enise ben abi tapu Timoteyus?

¹² Leisi 2 Timoteyus 1:5. Enise ben de wan bun eksempre gi Timoteyus. A musu fu de so, taki a ben leri Timoteyus taki wi musu du sani fu sori taki wi abi trutru bribi (Yak. 2:26). A no de fu taki dati Timoteyus ben man si taki den sani di en mama ben e du, ben de fu di a ben lobi Yehovah nanga en heri ati. Seiker Timoteyus ben si taki en mama ben e prisiri fu di a ben e dini Yehovah. Sortu krakti na eksempre fu Enise ben abi tapu Timoteyus? Soleki fa na apostel Paulus ben taki, dan Timoteyus ben abi a srefi tranga bribi leki di fu en mama. A sani disi no ben kon fu ensrefi. Timoteyus ben si na eksempre fu en mama èn a bosroiti fu teki na eksempre fu en. Na so a de tu na ini a ten disi, taki furu mama ben man yepi na osofamiri fu den fu tron futuboi fu Yehovah èn den du dati nanga na eksempre fu den (1 Petr. 3:1, 2). Yu kan du a srefi. Fa so?

13. Fu san ede wan mama musu sorgu taki a matifasi di a abi nanga Yehovah na a moro prenspari sani gi en?

¹³ A matifasi di yu abi nanga Yehovah musu de a moro prenspari sani gi yu (Deut. 6:5, 6). Neleki fa a de nanga furu mama, a e aksi furu fu yu fu man sorgu gi den pikin fu yu. Yu e gebroiki yu ten, yu moni, yu e lasi sribi, èn yu e du tra sani tu. Ma noiti yu musu abi so furu fu du taki yu no abi ten fu tranga a matifasi di yu abi nanga Yehovah. Abi a gwenti fu meki ten fu begi, fu studeri Bijbel èn fu go na den gemeente konmakandra. Te yu e du dati, dan yu o tron wan moro bun mati fu Yehovah èn yu o de wan bun eksempre gi yu osofamiri èn gi trawan.

14-15. San yu e leri fu na eksempre fu Leanne, Maria nanga João?

¹⁴ Luku wan tu eksempre fu yonguwan di leri fu lobi Yehovah èn fu frutrow na en tapu fu di den luku na eksempre fu den mama. Christine en umapikin Leanne, e taki: „Wi no ben man studeri Bijbel na oso. Ma ala ten mi mama ben e go na den konmakandra. Aladi wi no ben sabi furu fu Bijbel, toku na eksempre fu en yepi wi fu kon abi wan tranga bribi. Langa ten fosi wi bigin go na den konmakandra, wi ben e frustan kaba taki na Yehovah Kotoigi abi a waarheid.”

¹⁵ Maria en papa ben e kosi en frow nanga pikin son leisi noso a ben e naki den te den ben go na den konmakandra. Maria e taki: „Mi mama na wan fu den moro deki-ati sisa di mi sabi. Di mi ben pikin, dan son leisi mi no ben wani du son sani fu di mi ben frede san tra sma ben o taki. Ma di mi si a deki-ati fu mi mama èn fa a ben poti Yehovah na a fosi presi na ini en libi ala ten, dan dati yepi mi fu no frede libisma moro.” João en papa no ben wani taki na osofamiri fu en taki fu Bijbel noso fu Yehovah na oso. João e taki: „Mi denki taki a sani di yepi mi, na taki mi mama  ben de klariklari fu du ala sani fu plisi mi papa, ma noti no ben kan tapu en fu lobi Yehovah.”

16. Sortu krakti na eksempre fu wan mama kan abi tapu trawan?

¹⁶ Un mama, hori na prakseri taki na eksempre fu yu abi krakti tapu trawan. Fa so? Luku fa na eksempre fu Enise ben gi na apostel Paulus deki-ati. A ben skrifi taki Timoteyus ben abi wan tranga bribi fu di „Enise ben abi so wan bribi fosi” (2 Tim. 1:5). O ten Paulus kon si a bribi fu Enise? A kan taki a ben si a bribi fu en di a miti en nanga Lowis na Listra na a ten fu a fosi zendelingwaka fu en. A kan tu taki na en yepi den uma disi fu tron Kresten (Tori 14:4-18). Prakseri taki di Paulus skrifi Timoteyus so wan 15 yari baka dati, dan Paulus ben sabi ete sortu moi sani Enise ben du èn a gi sma deki-ati fu teki na eksempre fu en. A de krin taki noiti na apostel Paulus ben o man frigiti na eksempre fu Enise èn furu tra Kresten fu a ten dati no ben o frigiti na eksempre fu en tu. Efu yu e kweki yu pikin sondro wan patna noso efu a patna fu yu no de na ini waarheid, dan yu kan de seiker taki a bun eksempre fu yu o tranga a bribi fu trawan èn a o gi den deki-ati.

17. San yu musu du efu a gersi leki yu pikin no wani dini Yehovah, aladi yu du tranga muiti fu gi en leri?

¹⁷ Ma san yu kan du efu a gersi leki a muiti di yu e meki fu leri yu pikin sani fu Yehovah, no e yepi? Hori na prakseri taki  a e teki ten fu gi wan pikin leri fu Yehovah. Soleki fa a prenki e sori, dan te yu e prani wan siri yu kan aksi yusrefi son leisi efu a o gro kon tron wan bon di e gi froktu. Aladi yu no kan sabi efu a bon o gi froktu, toku yu e tan gi en watra fu yepi en fu gro bun (Mark. 4:26-29). Na so a de tu taki yu leki mama kan aksi yusrefi son leisi efu yu e doro na ati fu den pikin fu yu. Yu no sabi sortu bosroiti den o teki. Ma efu yu e tan du ala san yu man fu gi den leri, dan na so yu o yepi den fu tron Gado mati.​—Odo 22:6.

18. Fa Yehovah kan yepi yu pikin fu tron mati fu en?

¹⁸ Sensi Bijbel ten, Yehovah yepi bun furu yonguwan fu tron en mati (Ps. 22:9, 10). Yehovah kan yepi den pikin fu yu tu fu tron en mati efu den wani dati (1 Kor. 3:6, 7). Awinsi a gersi leki den pikin fu yu no e dini Yehovah fayafaya, toku a o tan lobi den (Ps. 11:4). Te den e sori na awinsi sortu fasi taki den wani plisi Yehovah, dan a o de klariklari fu yepi den fu tron en mati (Tori 13:48; 2 Kron. 16:9). A kan yepi yu fu taki den yoisti sani na a ten te den pikin fu yu abi dati tranga fanowdu (Odo 15:23). Noso a kan meki wan brada noso wan sisa fu a gemeente poti prakseri na a pikin fu yu, fu di a e broko en ede nanga en. Srefi baka te den pikin fu yu kon bigi, Yehovah kan meki den memre wan sani di yu ben leri den di den ben pikin (Yoh. 14:26). Te yu e tan gi den pikin fu yu leri nanga den sani di yu e taki èn e du, dan Yehovah o blesi yu.

19. Fu san ede yu kan de seiker taki Yehovah o feni yu bun?

¹⁹ Yehovah lobi yu, awinsi sortu bosroiti den pikin fu yu teki. A lobi yu fu di yu lobi en. Efu yu e kweki yu pikin yu wawan, dan Yehovah e pramisi taki a o de wan Papa gi yu pikin èn taki a o kibri yu (Ps. 68:5). Yu no kan sabi efu den pikin fu yu o bosroiti fu dini Yehovah. Ma efu yu tan abi a frutrow taki Yehovah o yepi yu èn efu yu e du ala san yu man, dan a o feni yu bun.