1-2. (a) Bekangubani Yunisi, futsi yini leyenta kwaba matima ngaye kufundzisa indvodzana yakhe ngaJehova nangaJesu? (b) Ungatsini ngalesitfombe lesisekhasini lekucala?

 NANOBE liBhayibheli lingasitjeli ngekubhajatiswa kwaThimothi, kodvwa siyaciniseka kutsi make wakhe lokunguYunisi, wajabula kakhulu ngalelo langa. (Taga 23:25) Mbone ngeliso lengcondvo, emehlo akhe agcwele injabulo njengobe Thimothi asekhatsi emantini. Uyamamatseka njengobe Lowisi, lokungugogo waThimothi ambambile. Yunisi udvonsa umoya kancane njengobe Thimothi acwila emantini. Kuvakala umsindvo wemanti njengobe avumbuka emantini amamatseka, futsi kugeleta tinyembeti tenjabulo kumake wakhe. Yunisi uphumelele kufundzisa indvodzana yakhe kutsi itsandze Jehova kanye naJesu Khristu, nanobe bekulukhuni. Ngubuphi bumatima lokudzingeke kutsi abuncobe nakasetama kufundzisa indvodzana yakhe?

² Batali baThimothi bebasetinkholweni letingafani. Babe wakhe bekangumGriki, kani makwakhe nagogo wakhe bebangemaJuda. (Imis. 16:1) Kungenteka Thimothi bekaseminyakeni yekutfomba ngesikhatsi Yunisi naLowisi baba ngemaKhristu. Kodvwa babe wakhe akazange abe ngumKhristu. Bekatawukhetsa yiphi inkholo Thimothi? Kungenteka besekakhule ngalokwenele kutsi angatentela sakhe sincumo. Bekatawukhetsa inkholo yababe wakhe yini? Bekatawuchubeka nemasiko emaJuda yini lebekafundziswe wona kusukela asemncane?  Nobe bekatawuba ngumlandzeli waJesu Khristu?

3. Ngekusho kweTaga 1:8, 9, Jehova utiva njani ngemsebenti lowentiwa bomake kuze basite bantfwana babo kutsi babe bangani bakhe?

³ Ngendlela lefanako, bomake labangemaKhristu lamuhla bayayitsandza imindeni yabo. Bakufuna kakhulu kusita bantfwababo kutsi babe nebuhlobo lobuhle naJehova. Nkulunkulu uyajabula ngemetamo yabo. (Fundza Taga 1:8, 9.) Jehova usite bomake labanyenti kutsi bafundzise bantfwana babo kutsi bamtsandze nekutsi bamkhonte.

4. Ngutiphi tinkinga bomake labanyenti lababhekana nato lamuhla?

⁴ Kungulokuvamile kutsi bomake batibute kutsi bantfwana babo batawukhetsa kukhonta Jehova yini, njengobe kwenta Thimothi. Batali bayati kutsi lelive laSathane libacindzetela kanganani bantfwana babo. (1 Phet. 5:8) Ngetulu kwaloko, bomake labanyenti bakhulisa bantfwana babodvwa nobe utfole kutsi bayeni babo abamkhonti Jehova. Sibonelo nje, lomunye dzadze lokutsiwa nguChristine * utsi: “Indvodza yami beyingubabe lokahle futsi beyiwutsandza umndeni wayo, kodvwa beyingafuni kutsi bantfwana betfu babe BoFakazi BaJehova. Kuyo yonkhe leminyaka bengikhala tikhatsi letinyenti, ngitibuta kutsi bantfwana bami bayoke bamkhonte yini Jehova.”

5. Sitawucoca ngani kulesihloko?

⁵ Nangabe ungumake longumKhristu, ungaphumelela njengaYunisi. Kulesihloko, sitawucoca ngekutsi ungasilingisa njani sibonelo sakhe nawufundzisa bantfwana bakho ngaloko lokushoko nangaloko lokwentako. Sitawuphindze sibone kutsi Jehova angakusita njani.

6. Njengobe kusho 2 KuThimothi 3:14, 15, yini leyasita Thimothi kutsi abe ngumKhristu?

⁶ Ngesikhatsi Thimothi angumfanyana, make wakhe wenta konkhe langakhona kukwenta kuze amfundzise ‘imibhalo lengcwele,’ amfundzisa ngendlela emaJuda lebekayicondza ngayo. Kuliciniso kutsi lwati lwakhe beluluncane ngobe bekangati lutfo ngaJesu Khristu. Nobe kunjalo, loko Thimothi lakufundza emiBhalweni kwamniketa lwati laludzingako kutsi angaba ngumKhristu. Bekatawuba ngumKhristu yini? Njengobe bekasemusha, bekanelilungelo lekukhetsa kutsi uba ngumKhristu yini nobe cha. Siyaciniseka nekutsi imetamo yamake wakhe ‘yamsita kutsi akholwe’ kuJesu. (Fundza 2 KuThimothi 3:14, 15.) Yunisi wajabula kakhulu ngekutsi wakhona kusita umntfwana wakhe kutsi afundze ngaJehova nanobe bekumatima! Yunisi wavele wenta njengobe kusho ligama lakhe, lelisho “kuncoba.”

7. Yunisi bekangayisita njani indvodzana yakhe kutsi itfutfuke ngemuva kwekubhajatiswa?

⁷ Ngesikhatsi Thimothi abhajatiswa, wafinyelela umgomo lobalulekile ekhuphileni kwakhe, kodvwa Yunisi bekasolo akhatsatekile ngendvodzana yakhe. Beyitakwentani ngekuphila kwayo? Beyitawuba nebangani lababi yini? Beyitawuya iyofundza e-Athene yini futsi ikholelwe emafilosofi ebantfu labangamkhonti Nkulunkulu? Beyitawusebentisa emandla ayo yini, sikhatsi sayo kanye nebusha bayo isebenta kamatima kuze injinge? Yunisi bekangeke amncumele Thimothi, kodvwa bekangamsita. Kanjani? Bekangachubeka etama kamatima kumfundzisa kutsi atsandze Jehova futsi amfundzise kutsi abonge ngako konkhe Jehova naJesu lababentele kona. Akusibo batali labashade  nebantfu labangasibo boFakazi kuphela labanetinkinga tekusita bantfwana babo kutsi bakhonte Jehova. Ngisho nobe bobabili batali bakhonta Jehova, bangahle bakutfole kumatima kusita bantfwana babo kutsi bakhonte Jehova. Yini batali labangayifundza esibonelweni saYunisi?

8. Make angayisita njani indvodza yakhe lengumKhristu kutsi bafundzise bantwana babo ngaJehova?

⁸ Dadisha liBhayibheli nebantfwana bakho. Nine bodzadze, nangabe bayeni benu baBoFakazi BaJehova, Jehova ufuna nibasite nifundzise bantfwana benu ngaye. Lenye indlela leningakwenta ngayo loku kutsi nikusekele Kukhonta Kwemndeni. Khulumani kahle ngako futsi nibuke kutsi yini leningayenta kuze kube mnandzi. Ningasita bayeni benu ngekutsi nihlele kwenta lokutsite lokuseBhayibhelini ningumndeni. Ngetulu kwaloko, nangabe labanye bantfwana benu sebakhule ngalokwenele kutsi bangafundza incwadzi letsi Jabulela Kuphila Kuze Kube Phakadze!, mhlawumbe ningabasita bayeni benu ngekutsi niciniseke kutsi bantfwana benu bayafundza.

9. Make lonemyeni longasuye Fakazi angalutfola kuphi lusito?

⁹ Labanye bomake kudzingeka bahole ekudadisheni liBhayibheli nebantfwana babo ngenca yekutsi bakhulisa bantfwana babo babodvwa, nobe ngenca yekutsi bayeni babo abasibo boFakazi. Nangabe usesimeni lesifanako, ungakhatsateki kakhulu. Jehova utakusita. Sebentisa emathulusi lesiwanikwa yinhlangano yakhe kuze udadishe nebantfwana bakho. Ungabuta batali labaphumelele kukhulisa bantfwana babo kutsi bawasebentise njani lamathulusi ekukhonteni kwemndeni? * (Taga 11:14) Jehova angakusita nangekutsi ukhone kukhulumisana nebantfwana bakho. Mcele akusite utfole kutsi bacabangani nekutsi yini lesetinhlitiyweni tabo. (Taga 20:5) Umbuto lomelula lofana nalotsi ‘Nguyiphi inkinga lobhekana nayo esikolweni?’ ungakusita kutsi nicoce kahle.

10. Nguyiphi lenye indlela longabasita ngayo bantfwana bakho kutsi bafundze ngaJehova?

¹⁰ Buka ematfuba ekufundzisa bantfwana bakho ngaJehova. Khuluma ngaJehova nangetintfo letinyenti letinhle lakwentele tona. (Dut. 6:6, 7; Isa. 63:7) Kubaluleke kakhulu kutsi ukwente loku nawungakhoni kufundza nebantfwana bakho ekhaya. Christine, lesike sakhuluma ngaye utsi: “Bekamancane ematfuba ekutsi ngikhulume ngaJehova ngako bengiwasebentisa onkhe ematfuba lengiwatfolako. Besihle sihambahamba nebantfwana bami kuze sishaywe ngumoya nobe sigibele sikebhe kuze sicoce ngendalo yaJehova nangaletinye tintfo lebetitawubasita kutsi babe bangani bakhe. Ngesikhatsi bantfwabami sebakhulile, ngabakhutsata kutsi batifundzele liBhayibheli.” Ngetulu kwaloko, khuluma kahle ngenhlangano yaJehova nangebazalwane nabodzadze. Ungakhulumi kabi ngalabadzala belibandla. Loko lokushoko ngabo kutawuncuma kutsi bantfwana bakho batakuya yini kubo nabadzinga lusito.

11. Ngekusho kwaJakobe 3:18, kubaluleke ngani kutsi sente kube nekuthula ekhaya?

¹¹ Yenta kutsi kube nekuthula ekhaya. Hlale ukhombisa kutsi uyayitsandza indvodza yakho nebantfwana bakho. Khuluma kahle ngendvodza yakho futsi uceceshe bantfwana bakho kutsi nabo bente lokufanako. Nawenta njalo, kungaba melula kutsi bantfwana bakho bafundze ngaJehova. (Fundza Jakobe 3:18.) Cabanga ngesibonelo saJozsef, lolihlahlandlela lelikhetsekile eRomania. Ngesikhatsi asakhula, babe wakhe bekenta kube matima  ngaye, ngamake wakhe nangebantfwana bakubo kutsi bakhonte Jehova. Jozsef utsi: “Make beketama kamatima kutsi kube nekuthula ekhaya. Ngaso sonkhe sikhatsi babe nakacinisa sandla, make bekaba nemusa kakhulu. Nakabona kutsi asimhloniphi babe futsi asimlaleli, bekacoca natsi ngembhalo waKubase-Efesu 6:1-3. Bekasitjela ngebuntfu lobuhle baBabe futsi asisite sibone sizatfu sekumtsandza. Loku bekusita kutsi kube nekuthula ekhaya.”

12. Ngekusho kwa-2 KuThimothi 1:5, sibonelo saYunisi samsita njani Thimothi?

¹² Fundza 2 KuThimothi 1:5. Yunisi wambekela sibonelo lesihle Thimothi. Kungenteka wamfundzisa kutsi kukholwa mbamba kubonakala ngetento. (Jak. 2:26) Thimothi bekaciniseka kutsi tento tamake wakhe betikhombisa kutsi umtsandza mbamba Jehova. Wabona kutsi kukhonta Jehova bekwenta make wakhe ajabule. Sibonelo saYunisi samsita njani Thimothi? Umphostoli Pawula watsi Thimothi bekanekukholwa lokucinile njengamake wakhe. Akuzange kumane kutentakalele kutsi Thimothi abe nalokukholwa. Thimothi wabona sibonelo samake wakhe futsi wancuma kusilingisa. Ngendlela lefanako, bomake labanyenti lamuhla basite emalunga emindeni yabo kutsi akhonte Jehova “ngaphandle kwemavi.” (1 Phet. 3:1, 2) Nawe ungenta lokufanako. Kanjani?

13. Yini leyenta kudzingeke kutsi make ente buhlobo bakhe naJehova bute kucala ekuphileni kwakhe?

¹³ Yenta kukhonta Jehova kute kucala ekuphileni kwakho. (Dut. 6:5, 6) Njengabomake labanyenti, udzela tintfo letinyenti. Udzela sikhatsi sakho, imali yakho, butfongo bakho naletinye tintfo kuze unakekele tidzingo tebantfwana bakho. Kodvwa akukafaneli ube matasatasa kakhulu uze ube bete sikhatsi sekucinisa buhlobo bakho naJehova. Hlale utibekela sikhatsi sekuthantaza, sekutidadishela liBhayibheli nesekuya emihlanganweni yelibandla. Nawenta njalo, utawucinisa buhlobo bakho naJehova futsi uwubekele sibonelo lesihle umndeni wakho kanye nalabanye.

14-15. Yini loyifundza esibonelweni saLeanne, saMaria nesaJoão?

¹⁴ Cabanga nganati tibonelo letimbalwa tebantfu labasha labafundze kutsandza Jehova futsi bametsembe ngekutsi babuke loko lokwentiwa bomake babo. Indvodzakati yaChristine lokutsiwa nguLeanne itsi: “Besingakhoni kudadisha liBhayibheli babe nakasekhaya. Kodvwa make bekahlale aya emihlanganweni. Loko lakwenta kwasisita saba nekukholwa lokucinile ngisho nobe kukuncane besikwati ngeliBhayibheli. Besati kutsi leli liciniso ngisho nobe besingakake saya emihlanganweni.”

¹⁵ Babe waMaria bekahle awujezisa umndeni wakhe nawuye emihlanganweni, Maria utsi: “Make ungulomunye wabodzadze labanesibindzi lengibatiko. Ngesikhatsi ngisengumntfwana bengihle ngala kwenta letinye tintfo ngobe bengesaba kutsi labanye bantfu batawutsini. Kodvwa nangibona indlela make bekanesibindzi ngayo nendlela bekenta ngayo Jehova kutsi ete kucala ekuphileni kwakhe, kwangisita kutsi ngingasabesabi bantfu.” Babe waJoão bekangafuni kutsi umndeni wakhe ukhulume ngaJehova nobe ngeliBhayibheli ekhaya. João utsi: “Lokwangitsintsa kakhulu kubona kutsi make bekakulungele kulahlekelwa ngunobe yini kuze ajabulise babe, ngaphandle kwelutsandvo bekanalo ngaJehova.”

16. Sibonelo lesihle samake singabatsintsa njani labanye?

 ¹⁶ Nine bomake, khumbulani kutsi sibonelo senu siyabatsintsa labanye. Kanjani? Cabanga ngendlela sibonelo saYunisi lesamtsintsa ngayo umphostoli Pawula. Wabhala watsi kukholwa kwaThimothi lokute kutentisa ‘kwacala kuYunisi.’ (2 Thim. 1:5) Pawula wacala nini kubona kutsi Yunisi unekukholwa? Kungenteka kungalesikhatsi acala kuba sitfunywa selivangeli futsi ahlangana naLowisi naYunisi eListra, futsi kungenteka wabasita kutsi babe ngemaKhristu. (Imis. 14:4-18) Cabanga nganaku: Ngesikhatsi Pawula abhalela Thimothi ngemuva kweminyaka lengaba ngu-15, Pawula bekasolo akukhumbula loko lokwentiwa nguYunisi lebekukhombisa kutsi unekukholwa futsi wakhuluma ngaye kulabanye kutsi usibonelo sekulingiswa. Kusebaleni kutsi sibonelo sakhe samkhutsata kakhulu umphostoli Pawula kanye nalamanye emaKhristu lebekaphila ngaleso sikhatsi. Nangabe ukhulisa bantfwana bakho uwedvwa nobe usemndenini lonetinkholo letingafani, ciniseka kutsi sibonelo sakho lesihle siyabacinisa labanye futsi siyabakhutsata.

17. Yini lokufanele uyente nawubona ngatsi bantfwana bakho abasitakali nawetama kubacecesha?

¹⁷ Kutsiwani nangabe umntfwana wakho angasitakali ngisho nobe wetama kamatima kumsita? Khumbula kutsi kutsatsa sikhatsi kucecesha umntfwana. Njengobe ubona kulesitfombe, nawuhlanyela inhlanyelo, ungahle utibute kutsi itawumila yini futsi ikhule igcine itselile. Nanobe ungati kutsi kutawentekani, uyachubeka uyinisela, uyinikete litfuba  lekutsi ikhule. (Mak. 4:26-29) Ngendlela lefanako, nawungumake kungenteka uhle utibuta kutsi loko lokwentako kuyabasita yini bantfwana bakho kutsi batsandze Jehova. Angeke ukulawule loko lokutawuncunywa bantfwana bakho. Kodvwa nawuchubeka wenta konkhe longakwenta kuze ubaceceshe, ubaniketa litfuba lekutsi babe bangani baNkulunkulu.—Taga 22:6.

18. Jehova angabasita njani bantfwana bakho kutsi babe bangani bakhe?

¹⁸ Kusukela ngetikhatsi tekubhalwa kweliBhayibheli, Jehova usite labasebasha labanyenti kutsi babe bangani bakhe. (Hla. 22:9, 10) Angabasita nebantfwana bakho kutsi bamtsandze, nangabe bafuna. (1 Khor. 3:6, 7) Ngisho nobe bangamkhonti Jehova ngenhlitiyo yabo yonkhe, utawuchubeka abatsandza. (Hla. 11:4) Nabakhombisa timphawu letincane tekutsi bafuna kujabulisa Jehova, utawube akulungele kubasita kutsi babe bangani bakhe. (Imis. 13:48; 2 Khr. 16:9) Angakusita kutsi usho intfo lekahle ngesikhatsi lesikahle, lokuyintfo bantfwana bakho lebebadzinga kakhulu kuyiva. (Taga 15:23) Nobe angasebentisa umzalwane nobe dzadze ebandleni kutsi abanake. Ngisho nobe sebakhulile, Jehova angabakhumbuta loko lowabafundzisa kona basebancane. (Joh. 14:26) Nawuchubeka ucecesha bantfwana bakho ngalokushoko nangalokwentako, usuke unika Jehova lokutsite langakubusisa.

19. Yini lekwenta uciniseke kutsi Jehova uyajabula ngawe?

¹⁹ Tincumo letentiwa bantfwana bakho atiyitsintsi indlela Jehova lakutsandza ngayo. Uyakutsandza ngobe nawe uyamtsandza. Nangabe ukhulisa bantfwana uwedvwa, Jehova wetsembisa kutsi utawuba nguBabe webantfwana bakho futsi akuvikele. (Hla. 68:5) Angeke ubancumele bantfwana bakho kutsi batamkhonta yini Jehova nobe cha. Kodvwa nawuchubeka wetsembela kuJehova futsi wente konkhe lokusemandleni akho, Jehova utawujabula.