1, 2. a) Tsáa nindxu̱u̱ Eunice, ga̱jma̱a̱ ndiéjunʼ dí niʼniuu mingíjyúuʼ mu maʼni mbaja̱a̱ a̱ʼdióo xá. b) Arathá xtiʼkhuu dí nakujmaa náa nagi̱ʼdu̱u̱.

 MASKI ajndu náa Biblia na̱nguá eʼthí ga̱jma̱a̱ numuu xóo nijngúun iyááʼ Timoteo, mbáa Eunice bi̱ nindxu̱u̱ ru̱dúu̱ ra̱ʼkhá tháán nidxuu mbiʼi dí ikhaa nijngúun iyááʼ (Prov. 23:25). Gundxa̱ʼwámi̱jna̱ xú káʼnii nidxuu índo̱ ndiʼyoo dí a̱ʼdióo inu majngúun iyááʼ asndu xnduʼwá inuu wíji̱ raʼyoo, ikhú na̱ʼkha̱ Loida bi̱ nindxu̱u̱ xíñúuʼ Timoteo ga̱jma̱a̱ ndayáraʼaa. Eunice naʼngo̱o̱ a̱jkiu̱u̱n dí xámbi̱ya̱ʼ índo̱ Timoteo xtáa rajngúun iyááʼ, mú índo̱ ndiʼyoo dí nadxuu asndu xnduʼwá inuu egájnáa ikhú nimbi̱ya̱ʼ. Maski ajndu niʼniuu mingíjyúuʼ wéñuuʼ, mú niʼngo̱o̱ nimbáyúu Timoteo mu maʼndoo kaʼyoo Jeobá ga̱jma̱a̱ Jesús. Ndiéjuunʼ niʼniuu mingíjyúuʼ mu maʼngo̱o̱ mambáyúu a̱ʼdióo xá.

² Anu̱u̱ ga̱jma̱a̱ ru̱dúu̱ Timoteo tségún mbóó religión. Anu̱u̱ nindxu̱u̱ griego, ru̱dúu̱ ga̱jma̱a̱ xíñúuʼ nindxu̱ún judías (Hech. 16:1). Mbáa Timoteo nikhi̱i̱ má índo̱ Eunice ga̱jma̱a̱ Loida ninindxu̱ún xa̱bi̱i̱ Cristo. Anu̱u̱ na̱nguá niriʼkhu̱u̱ religión ndrígóo. Timoteo nikhi̱i̱ má, ikhaa jngóo ndiyóoʼ maraʼwíí má ikhaa dí maʼni. Ndiéjuunʼ gáraʼwíí maʼni xá. Lá maʼga náa religión ndrígóo anu̱u̱ xáʼ. Lá maʼni má xúʼko̱ dí xóo naguʼwún nuni̱ judíos dí nijmañuu asndu nákha chíʼgíiʼ xáʼ. O mani̱ndxu̱u̱ xa̱bi̱i̱ Cristo dxe̱ʼ.

3. Xó má eʼthí náa Proverbios 1:8, 9, xú káʼnii eʼyoo Jeobá tsiakii dí nuni̱ a̱ngiu̱lú gu̱ʼú wanii mu mumbañún e̱jñu̱ún rí mambaxúún gajmiún ikhaa xá.

³ A̱ngiu̱lú gu̱ʼú wanii bi̱ kúwá dí mbiʼi xúgi̱ nuni̱ xó má Eunice, nandún kuñún bi̱ kúwá náa guʼwún. Rí itháan nandún muni̱ nindxu̱u̱ dí mumbañún e̱jñu̱ún mu mambaxúún májánʼ  gajmiún Jeobá. Ga̱jma̱a̱ Jeobá ndaʼyamajkuu xúgíʼ tsiakii dí ikhiin nuni̱ (atraxnuu Proverbios 1:8, 9). b Ikhaa nambáñún mbaʼiin a̱ngiu̱lú gu̱ʼú wanii mu musngúún e̱jñu̱ún rí maʼndún kuyáá ga̱jma̱a̱ dí muni̱ ñajuunʼ.

4. Ndiéjunʼ dí naʼniún mingíjyúuʼ a̱ngiu̱lú gu̱ʼú wanii dí mbiʼi xúgi̱ rá.

⁴ A̱ngiu̱lú gu̱ʼú wanii nguáná nuraximíjna̱ á mu e̱jñu̱ún muraʼwíi dí muni̱ ñajuunʼ Jeobá xó má niʼni Timoteo. Numuu dí xa̱bu̱ wanii nduyáá májánʼ dí e̱jñu̱ún nuraʼníí mbaʼa tsáʼkhá náa numbaaʼ ndrígóo Gixa̱a̱ (1 Ped. 5:8). Mú raʼkháa i̱ndó rígi̱, mbaʼiin a̱ngiu̱lú naʼniún mingíjyúuʼ munimbanuu e̱jñu̱ún, numuu dí nda̱wa̱a̱ ajmbiu̱ún o numuu dí tséʼni ñajuunʼ Jeobá. Mbá xkri̱da mbáa ndxájulú bi̱ mbiʼyuu Christine c naʼthí: “A̱jmbio̱ʼ nindxu̱u̱ mbáa májáanʼ xa̱bu̱, nandoo kaʼyuxu̱, mú tséniñuʼ dí masngúún e̱ji̱nʼ ga̱jma̱a̱ numuu Jeobá. Mbaʼa nuthu asndu nambi̱ya̱ʼ erajximínáʼ á mu mbóo mbiʼi e̱ji̱nʼ maguánú muni̱ ñajuunʼ Jeobá”.

5. Ndiéjunʼ gúʼyáá náa artículo rígi̱ rá.

⁵ Á mu ikháán nindxa̱a̱ʼ xa̱bi̱i̱ Cristo, ma̱ndoo matambáñún e̱jña̱a̱ʼ maʼndún kuyáá ga̱jma̱a̱ muni̱ ñajuunʼ Jeobá, xó má niʼni Eunice. Náa artículo rígi̱ majmañaaʼ xkri̱da ndrígóo Eunice xú káʼnii gándoo marasngúún e̱jña̱a̱ʼ ga̱jma̱a̱ dí xóo naratá ma̱ngaa dí natani̱. Ma̱ngaa mbuʼyáá xú káʼnii gándoo gámbáyáaʼ Jeobá.

6. Xó má eʼthí náa 2 Timoteo 3:14, 15, xú káʼnii ni̱jkha̱nú ninindxu̱u̱ xa̱bi̱i̱ Cristo Timoteo rá.

⁶ Asndu nákha nigumaa Timoteo, Eunice niʼni tsiakimínáʼ maʼsngóo “ajngá rawuunʼ Dios” xó má dí nunimbu̱ún judíos. Gajkhun má dí na̱nguá ekro̱ʼo̱o̱ xúgíʼ numuu dí tájmañuu ga̱jma̱a̱ numuu Jesucristo. Dí nijmañuu Timoteo asndu nákha chíʼgíiʼ ma̱ndoo mambáyúu mu maʼga̱nú mani̱ndxu̱u̱ xa̱bi̱i̱ Cristo. Lá maraʼwíí maʼni rúʼko̱ xáʼ. Nikhi̱i̱ má, ikhaa jngóo majmaaʼ má maraʼwíí dí maʼni náa vida ndrígóo. Tsiakii dí niʼni ru̱dúu̱ nixkaxi̱i̱ Timoteo mu ‹maʼnimbo̱o̱› dí gajkhun ga̱jma̱a̱ numuu Jesús (atraxnuu 2 Timoteo 3:14, 15). d ¡Ra̱ʼkhá tháán nidxuu Eunice dí niʼngo̱o̱ nimbáyúu a̱ʼdióo mu maʼniniiʼ Jeobá! Gajkhun dí a̱ʼgú nikhi̱i̱ bugi̱ naʼni maguma mba̱a̱ mbiʼyuu, numuu dí mbiʼyuu na̱ʼkha̱ náa ajngáa dí nandoo gáʼthúu̱n “maʼnga̱a̱ʼ”.

7. Ndiéjunʼ niʼni Eunice mu mambáyúu a̱ʼdióo maʼni má xúʼko̱ ñajuunʼ Cristo nda̱wa̱á dí nijngúun iyááʼ rá.

⁷ Ra̱ʼkhá tháán májánʼ nindxu̱u̱ dí Timoteo niraʼwíí majngúun iyááʼ, mú Eunice nixmiéjuunʼ má xúʼko̱ kaʼyoo, numuu dí tséʼyoo dí gáraʼwíí maʼni a̱ʼdióo, á mu maraʼwíin májánʼ bi̱ mambaxúu gajmíi̱n o maʼga Atenas gáʼni gájma̱a̱ ga̱jma̱a̱ maʼnimbo̱o̱ dí nusngáa filósofos bi̱ kúwá ikhí. O majmuu mbiʼi ga̱jma̱a̱ tsiakii ndrígóo mu mbayáʼ dí magiʼdoo. Eunice xándoo maʼthúu̱n Timoteo dí gíʼmaa maʼni, mú ma̱ndoo mambáyúu mu maraʼwíí májánʼ dí maʼni. Xú káʼnii rá. Ma̱ndoo mambáyúu má xúʼko̱ rí ma̱ndoo kaʼyoo Jeobá ga̱jma̱a̱ rí maxnáa núma̱aʼ Jesús ga̱jma̱a̱ numuu rí niʼni. Rí matambáyíí mbáa ada̱ mu maʼga̱nú mani̱ndxu̱u̱ xa̱bi̱i̱ Jeobá raʼkháa i̱ndó naʼniún mingíjyúuʼ bi̱ kúwá ndajkuíín runi̱ mbanuu e̱jñu̱ún náa rí gajkhun. Ma̱ngaa naʼniún mingíjyúuʼ bi̱ nuni̱ ñajuunʼ  Jeobá mbá nájmi̱i̱n. Mú ndiéjunʼ gándoo gajmañún xabuanii xkri̱doo Eunice rá.

8. Xú káʼnii gándoo gámbáyúu ajmbio̱o̱ mbáa a̱ʼgú nikhii mu musngúún e̱jñu̱ún ga̱jma̱a̱ numuu Jeobá rá.

⁸ Atani̱ ga̱jma̱a̱ Biblia gajmiáanʼ e̱jña̱a̱ʼ. Á mu ajmbia̱a̱ʼ xtáa má náa rí gajkhun, Jeobá nandoo rí ikháán matambáyíí mu musngúún e̱jña̱la ga̱jma̱a̱ numuu ikhaa. Mbá rí xóo ma̱ndoo matani̱ nindxu̱u̱ rí matambáyíí índo̱ nunigajma̱a̱ mbá guʼwáanʼ mámbá xmáná. Gutamíjná májánʼ ga̱jma̱a̱ rí mbuya̱a̱ mu xúʼko̱ munigajma̱a̱ májánʼ. Ma̱ndoo matambáyíí ajmbia̱a̱ʼ mu muniratáá mbá rí mu̱nigájma̱a̱ ga̱jma̱a̱ numuu Biblia o i̱mba̱ rí mu̱nila dí gíʼdoo numuu. Á mu mbáa a̱ʼdiála nikhi̱i̱ má mu ma̱ndoo maʼnigájma̱a̱ libro ¡Araxtaa gagi kámuu mbiʼi!, ikhí rí ma̱ndoo matambáyíí ajmbia̱a̱ʼ mu munimbáníí ñajunʼ rígi̱.

9. Ndiéjunʼ gándoo gámbáyúu mbáa ndxájulú á mu ajmbio̱o̱ na̱nguá nindxu̱u̱ xa̱bi̱i̱ Jeobá rá.

⁹ Tikhuun a̱ngiu̱lú gu̱ʼu̱ ndayóoʼ musngúún e̱jñu̱ún ga̱jma̱a̱ numuu Biblia numuu rí nda̱wa̱a̱ ajmbiu̱ún o na̱nguá xtáa náa rí gajkhun. Á mu xúʼko̱ kaʼnii xtaa xáxmiéjuaanʼ, numuu rí Jeobá xtáa mu mambáyáaʼ. Gajmaaʼ májánʼ rí naguwíi xuajñuu mu marasngúún ga̱jma̱a̱ e̱jña̱a̱ʼ. Ma̱ngaa ma̱ndoo matrajxu̱u̱n tikhuun xabuanii xú kaʼnii ejmúún rígi̱ mu munigajmaa mbá guʼwíin e (Prov. 11:14). Atanda̱ʼa̱a̱ Jeobá mambáyáaʼ maratamíjná májánʼ gajmiáanʼ ejña̱a̱nʼ mu xúʼko̱ ma̱ta̱ya̱a̱ ndiéjuunʼ endxaʼwamíjna̱ ga̱jma̱a̱ rí ekumu̱ún (Prov. 20:5). Á mu natrajxi̱i̱ a̱ʼdiáaʼ “ndiéjuunʼ rí naʼniuu mingíjyúuʼ náa escuela”, mbáa rígi̱ gáʼni dí maʼtháanʼ xúgíʼ rí naku̱mu̱u̱.

10. Ndiéjunʼ i̱mba̱ rí ma̱ndoo matani̱ mu matambáñún ejña̱a̱nʼ muniʼniiʼ Jeobá rá.

¹⁰ Atayáʼ mbiʼi mu marasngúún e̱jña̱a̱ʼ ga̱jma̱a̱ numuu Jeobá. Arathún má xúʼko̱ ga̱jma̱a̱ numuu ikhaa, ma̱ngaa arathún xúgíʼ rí niʼni Jeobá ga̱jma̱a̱ numaaʼ (Deut. 6:6, 7; Is. 63:7). Gíʼdoo numuu matani̱ rígi̱ á mu tsíyoo matanigajma̱a̱ gajmiáanʼ náa guʼwáaʼ. Christine bi̱ niʼtálú ga̱jma̱a̱ numuu náa kutriga̱ 4, naʼthí: “Na̱nguá eyoo májánʼ mathu̱u̱n e̱ji̱nʼ ga̱jma̱a̱ numuu Jeobá náa goʼwóʼ, ikha jngóo na̱ni̱ tsiakimínáʼ mathu̱u̱n índo̱ nandoo xóo índo̱ nagájnuʼ gajmíʼ o índo̱ natsimuxu̱ náa canoa nagíʼdu̱u̱ na̱thu̱u̱n ga̱jma̱a̱ numuu xúgíʼ rí mitsaanʼ dí Jeobá niʼniwíi ma̱ngaa ndiéjunʼ gíʼmaa muni̱ mu mambaxún gajmiún ikhaa. Índo̱ ninii, ni̱thu̱u̱n rí munigájma̱a̱ Biblia ndajkuíín”. Arathún ejña̱a̱nʼ rí májánʼ ga̱jma̱a̱ numuu xuajñuu Jeobá ma̱ngaa ga̱jma̱a̱ numún a̱ngiu̱lú. Xárata numún bi̱ kuya̱ edxu̱u̱, dí gárata ga̱jma̱a̱ numún rúʼko̱ gáʼni dí ejña̱a̱nʼ mundu̱ʼu̱u̱n mumbañún índo̱ gáʼñúunʼ.

11. Xó má eʼthí Santiago 3:18, náá numuu rí ndayóoʼ matani̱ marigá dí tsímáá náa guʼwáaʼ rá.

¹¹ Atani̱ marigá dí tsímáá náa guʼwáaʼ. Aguʼwáanʼ ma̱ra̱ta̱a̱n ajmbia̱a̱ʼ rí nandaaʼ xtayáá, xúʼko̱ má ejña̱a̱nʼ mangiin. Aratháán ajmbia̱a̱ʼ ga̱jma̱a̱ gamajkhu ma̱ngaa ajngáa gua̱ba̱ʼ xúʼko̱ má gárasngún ejña̱a̱n muni̱ mangiin. Rígi̱ gáʼni dí xúgiáanʼ makuwáanʼla tsímáá ga̱jma̱a̱ rí xáʼni mingíjyúuʼ majmañala ga̱jma̱a̱ numuu Jeobá (atraxnuu Santiago 3:18). f Guʼyáá xkridoo Jozsef, mbáa precursor especial bi̱ nayambáá náa Rumania. Nákhá chíʼgíiʼ, anu̱u̱ na̱nguá nindoo rí ikhaa ga̱jma̱a̱ ru̱dúu̱ gajmíi̱n a̱ngui̱i̱n muni̱ ñajuunʼ Jeobá. Jozsef naʼthí: “Ru̱dúxu̱ naʼni mbá tsiakii mu marígá  rí tsímáá náa guʼwúxu̱. Índo̱ anu̱ʼ itháan ekiʼnáa ru̱dúʼ itháan májáanʼ a̱jkiu̱u̱n eʼni. Índo̱ ndaʼyoo dí naʼniuxu̱ mingíjyúuʼ muni̱mbuxu̱ ku̱ya̱a̱ ga̱jma̱a̱ mbuyamajkuíí anuxu̱, ikha naʼthúxu̱ rí naʼthí náa Efesios 6:1-3. Nda̱wa̱á naʼthúxu̱ xóo májáanʼ xa̱bu̱ nindxu̱u̱ anuxu̱ ma̱ngaa nambáyúxu mbuya̱a̱ náá numuu rí ndayóoʼ mbuyamajkuíí. Rígi̱ niʼni rí makuwáanʼxu tsímáá mbá xúgiáanʼxu”.

12. Xó má naʼthí náa 2 Timoteo 1:5, xú káʼnii nimbáyúu Timoteo xkridoo Eunice rá.

¹² (Atraxnuu 2 Timoteo 1:5). g Eunice nigíʼ mbá májánʼ xkri̱da náa Timoteo. Niʼsngóo dí raʼkháa i̱ndó maʼthíí dí gíʼdoo fe ma̱ngaa rí gíʼmaa masngájma (Sant. 2:26). Timoteo ndiʼyoo rí naʼni ru̱dúu̱ nindxu̱u̱ numuu rí nandoo kaʼyoo Jeobá. Ma̱ngaa ndiʼyoo dí ru̱dúu̱ nadxuu numuu rí naʼni ñajuunʼ Jeobá. Xú káʼnii nimbáyúu xkri̱doo ru̱dúu̱ xá. Xó má niʼthí apóstol Pablo, Timoteo nigiʼdoo mbá fe xó má rí nigiʼdoo ru̱dúu̱. Rígi̱ na̱nguá nirígá xúʼkhiín. Ikhaa ndiʼyoo xóo eʼni ru̱dúu̱ ikha jngóo ma̱ngaa nindoo mbaʼyáridoo. Ikhaa má kayuuʼ erígá dí mbiʼi xúgi̱, mbaʼiin a̱ngiu̱lú gu̱ʼú wanii naʼngu̱u̱n numbañún bi̱ kúwá náa guʼwún rí asndu ‹tséthún má ga̱jma̱a̱ ajngáa› (1 Ped. 3:1, 2). Ikháán mangáán majmáán matani̱. Xú káʼnii rá.

13. Náá numuu rí mbáa a̱ʼgú nikhii gíʼmaa mbaʼyoo rí itháán gíʼdoo numuu rí mambájxu̱u̱ ga̱jma̱a̱ Jeobá rá.

¹³ Atayáá rí itháán gíʼdoo numuu mambájxáaʼ ga̱jma̱a̱ʼ Jeobá (Deut. 6:5, 6). Xó má eni̱ mbaʼiin gu̱ʼú wanii, mbáa mangáánʼ mbaʼa rí nataníñáá ratani̱ mu xúʼko̱ maraxnu̱u̱n rí nda̱ñúunʼ e̱jña̱a̱ʼ. Xóo mbiʼi ndrígáaʼ, mbújkha̱a̱ʼ, rí mbi̱ya̱a̱ xa̱a̱ʼ. Mú xátatsiʼñáʼ dí ñajunʼ maʼni dí ma̱ta̱ya̱a̱ dí nánguá gíʼdoo numuu rí nambájxáaʼ ga̱jma̱a̱ʼ Jeobá. Atríyaʼ mbiʼi maratajkáan mbáwíín, matanigajma̱a̱ Biblia mbáwíín ma̱ngaa rí mi̱dxu̱ʼ má xúʼko̱ reunión. Rígi̱ gáʼni rí mbaja̱a̱ dí nambájxáaʼ ga̱jma̱a̱ Jeobá ma̱ngaa mataʼgíʼ mbá májánʼ xkri̱da náa guʼwáaʼ ma̱ngaa náa eʼwíinʼ xa̱bu̱.

14, 15. Ndiéjunʼ ejmañaaʼ náa xkridoo Leanne, María ga̱jma̱a̱ João rá.

¹⁴ Guʼyáá xkridún tikhuun jiámá ga̱jma̱a̱ wa̱ʼxa̱ʼ bi̱ niguánú nindúún kuyáá Jeobá ga̱jma̱a̱ nikumu̱ún kuyáá índo̱ ndiyáá rí xóo nini̱ ru̱du̱ún. Leanne wáxioo Christine, naʼthí: “Tsíyoo muni̱ gájmaaxu̱ Biblia náa guʼwúxu̱ índo̱ xtáa anu̱ʼ. Mú ru̱dúʼ tséniñuuʼ ra̱jkha̱ reunión. Maski má tsékru̱ʼu̱xu̱ wéñuuʼ rí naʼthí náa Biblia, mú xkri̱doo nimbáyuxu̱ maguaʼdáá mbá fe gújkhúʼ. Asndu nákhá xóó tséjkuáxu̱ reunión ndi̱ya̱xu̱ dí rígi̱ nindxu̱u̱ gajkhun”.

¹⁵ Anu̱u̱ María, naʼni gíníin bi̱ kúwá náa goʼwóo índo̱ nagún reunión, ikhaa naʼthí: “Ru̱dúʼ nindxu̱u̱ mbáa a̱ʼgu̱ bi̱ tsémíñúu, nákha ikhúúnʼ kaʼnííʼ chíʼgiúnʼ rígá tikhuu rí tsíyóʼ gáni numuu dí namíñúʼ dí gúthi eʼwíinʼ. Mú índo̱ nda̱yo̱o̱ dí ru̱dúʼ tsémíñúu nagíʼ naʼni ginii ñajuunʼ Jeobá rúʼko̱ nimbáyuʼ mú xámiñuʼ ka̱ñu̱u̱n eʼwíinʼ”. João ga̱jma̱a̱ bi̱ kúwá náa goʼwóo na̱nguá xóo muthi ga̱jma̱a̱ numuu Dios náa guʼwún numuu dí anu̱ún tséniñúnʼ, ikhaa naʼthí: “Rí itháan nanigu̱ʼ náa ru̱dúʼ nindxu̱u̱ dí naʼni xúgíʼ dí naʼthúu̱n anu̱ʼ, mú ndaʼyoo dí itháan gíʼdoo numuu dí maʼndoo kaʼyoo Jeobá”.

16. Ndiéjunʼ gándoo gámbañún eʼwíínʼ xkridoo mbáa a̱ʼgú nikhi̱i̱ rá.

¹⁶ Garmáʼáan a̱jkia̱a̱nʼ dí xkri̱da ndrígáaʼ ma̱ndoo mambáñún eʼwíinʼ. Xú káʼnii rá. Gundxa̱ʼwámi̱jna̱ xú káʼnii apóstol Pablo  nimbáyúu xkridoo Eunice. Ikhaa niʼnirámáʼ dí Timoteo nigiʼdoo mbá fe dí ragíʼdoo a̱jma̱ inuu xó má dí nigiʼdoo Eunice (2 Tim. 1:5). Xú káʼnii ni̱jkha̱nú ndiʼyoo Pablo fe dí nigiʼdoo Eunice rá. Mbáa nákha ni̱jkha̱ timbá miʼtsú náa Listra ikhú niʼniniiʼ Loida ga̱jma̱a̱ Eunice, o mbáa asndu ikhaa nindxu̱u̱ bi̱ niʼsngúún mu mani̱ndxu̱ún xa̱bi̱i̱ Cristo (Hech. 14:4-18). Nda̱wa̱á dí 15 tsiguʼ, índo̱ niʼnirámáʼ náa inuu Timoteo ikhaa nirmáʼáan a̱jkiu̱ún fe rí nigiʼdoo Eunice ga̱jma̱a̱ nijmuu xkridoo mu mambáñún eʼwíinʼ. Dí xóo niʼni a̱ʼgu̱ bugi̱ nimbáyúu apóstol Pablo, mbáa ma̱ngaa asndu nimbáñún eʼwíinʼ cristianos bi̱ nikúwá nákha siglo timbá. Á mu mbáwíín xtaa ratani̱ mba̱ji̱i̱n ejña̱a̱n o ajmbia̱a̱ʼ tséʼni ñajuunʼ Jeobá, atayáá gajkhun dí xkri̱da ndrígáaʼ ma̱ndoo mambáñún eʼwíinʼ bi̱ kúwá náa xtaa.

17. Ndiéjunʼ gíʼmaa matani̱ á mu natayáá dí a̱ʼdiáaʼ tségíʼ maʼni rí narasngáá rá.

¹⁷ Lá natayáá dí a̱ʼdiáaʼ tségíʼ maʼnimbánuu dí narasngáá ráʼ. Garmáʼáan a̱jkia̱a̱nʼ rí marasngáá mbáa ada̱ ndayóoʼ mba̱yu̱u̱ʼ mbiʼi. Xó má nakujmaa náa xtiʼkhuu, índo̱ ikháánʼ natadu mbá tsígáʼ, mbáa natraximínáʼ á mu tsígáʼ rígi̱ maʼga̱nú mani̱ndxu̱u̱ mbá ixi̱ mba̱a̱ dí maxná xndúu. Maski má tsítayáá xú káʼnii gánindxu̱u̱, mú nataxíjyáá má xúʼko̱ mú mbaja̱a̱ májánʼ (Mar. 4:26-29). Xúʼko̱ má kayuuʼ, dí maraʼdiin e̱ji̱n, mbáa nguáná natraximínáʼ á mu dí naratháán a̱ʼdiáaʼ na̱jkha̱nú asndu náa a̱jkiu̱u̱n. Gajkhun má dí ikháánʼ xándoo gáta̱ya̱a̱ xú káʼnii gánindxu̱u̱ a̱ʼdiáaʼ. Mú, á mu  ikháánʼ natani̱ tsiakimínáʼ marasngáá má xúʼko̱, mbáa rígi̱ gámbáyúu dí mambaxúu májánʼ ga̱jma̱a̱ Dios (Prov. 22:6).

18. Xú káʼnii Jeobá gándoo gámbañún e̱jña̱a̱ʼ mú mambajxúu gajmíi̱n rá.

¹⁸ Asndu nákha wajyúuʼ, Jeobá nimbáñún jiámá ga̱jma̱a̱ wa̱ʼxa̱ʼ mu mambaxúu gajmíi̱n (Sal. 22:9, 10). Ikha jngóo ma̱ndoo mambáñún ejña̱a̱nʼ mú mambaxúún gajmiún á mu ikhiin nandún (1 Cor. 3:6, 7). Maski ajndu ejña̱a̱nʼ nagájnuti̱ñu̱u̱n náa rí gajkhun, mú Jeobá maxtáa má xúʼko̱ xawii mú mambáñún (Sal. 11:4). Á mu na̱jkha̱nú mbiʼi rí ikhiin nusngajma dí nandún muni̱ rí májánʼ, ikhaa maxtáa xawii mu mambáñún (Hech. 13:48; 2 Crón. 16:9). Jeobá ma̱ndoo mambáyáaʼ mu mataxkamaa ajngáa rí májánʼ marathu̱u̱n ejña̱a̱nʼ índo̱ ikhiin gáʼndún mudxawíín (Prov. 15:23). Ma̱ngaa ma̱ndoo maxkajxi̱i̱ a̱jkiu̱u̱n mbáa ndxájulú bi̱ xtáa náa congregación mu masngájmún rí nandoo kaʼñúún. Tséʼniuu á mu guanii Jeobá ma̱ndoo maʼni rí marmáʼáan a̱jkiu̱ún mbá rí ikháánʼ nirasngúún nákha ginii (Juan 14:26). Á mu narasngúún má xúʼko̱ ejña̱a̱nʼ ga̱jma̱a̱ dí naratá ma̱ngaa rí natani̱ xtaa raraxnáá Jeobá mbá rí maʼni tsajkurámuuʼ.

19. Xú káʼnii gándoo gáta̱ya̱a̱ rí Jeobá gajkhun nandoo kaʼyaaʼ rá.

¹⁹ Rí Jeobá nandoo kaʼyaaʼ raʼkháa ga̱jma̱a̱ numuu rí gúraʼwi̱i̱ muni̱ e̱jña̱a̱ʼ. Ikhaa nandoo kaʼyaaʼ numuu rí ikháánʼ nandaaʼ xtayáá. Á mu mbáwíín xtaa ratani̱ mba̱ji̱i̱n ejña̱a̱nʼ o xtaʼdaa ajmbia̱a̱ʼ mú na̱nguá nindxu̱u̱ xa̱bi̱i̱ Jeobá, garmáʼáan a̱jkia̱a̱nʼ rí Jeobá nakudaminaʼ rí mañe̱wa̱a̱nʼ ga̱jma̱a̱ rí ikhaa mani̱ndxu̱u̱ xóo anu̱ún ejña̱a̱nʼ (Sal. 68:5). Ikháánʼ xándoo matani̱ rí ejña̱a̱nʼ muni̱ ñajuunʼ Dios o na̱nguá, mú á mu naku̱ma̱a̱ʼ xtáyáá má xúʼko̱ rí Jeobá mambáyáaʼ ga̱jma̱a̱ natani̱ xúgíʼ xó má naʼnga̱a̱ʼ. Ikhaa maxtáa má xúʼko̱ ga̱jma̱á nindxa̱a̱ʼ.