1-2. (a) Unike akaba nuwe oha, kandi habwaki kitamwanguhire kwegesa omwana hali Yahwe na Yesu? (b) Bazaaho ekisisani ekiri ha kyesweko.

 N’OBUKIRAABA ngu Baibuli tetugambira ebyabaireho ha kubatizibwa kwa Timoseo, nitusobora kutekerezaaho okusemererwa okw’amaani Unike nyina okuyatungire ha kiro eki. (Nfu. 23:25) Teramu akasisani orole omulingo arukwehurra obwarukuba narora Timoseo ayemeriire omu maizi. Asemeriirwe kandi h’akaire nuko kamu nyinenkuru Timoseo, Loi, ayemeriire haihi Unike amukwasire. Unike atiinamu kake obwarora Timoseo naburra hansi y’amaizi. Timoseo obubamwimukya omu maizi arugayo asemeriirwe kandi nyina atandika kurra habw’okusemererwa muno. N’obukiraaba ngu kibaire kigumire, Unike asoboire kwegesa Timoseo kugonza Yahwe hamu n’Omwana we Yesu Kristo. Bizibu ki ebiyarabiremu obwakaba namwegesa?

² Bazaire ba Timoseo bakaba batali omu diini emu. Ise akaba ali Muyonaani kandi nyina na nyinenkuru bakaba bali Bayudaaya. (Eng. 16:1) Nikizooka Timoseo akaba ali musigazi nambere Unike na Loi bafokiire Bakristaayo. Baitu ise atafooke Mukristaayo. Hati diini ki Timoseo eyakukomeremu? Yakukomeremu ediini ya ise? Yakuhondiire emigenzo y’Ekiyudaaya eyiyayegesiibwe kuruga omu buto? Rundi yakwikiriize kufooka omwegeswa wa Yesu?

3. Kusigikirra ha Enfumo 1:8, 9, Yahwe arora ata omulimo banyaanya itwe bakora kwegesa abaana baabo kumugonza?

³ N’omu kasumi kanu banyaanya itwe abaine abaana nabo bagonza muno ab’omu maka gaabo. Kandi kukira muno bagonza  kukonyera abaana baabo kutunga enkoragana enungi na Yahwe. Kandi Ruhanga waitu asiima muno habw’amaani abarukuteekamu. (Soma Enfumo 1:8, 9.) Yahwe akonyire banyaanya itwe baingi kwegesa abaana baabo kumugonza hamu n’okumuheereza.

4. Bizibu ki banyaanya itwe abaine abaana ebibarabamu kasumi kanu?

⁴ Kya buli kiro munyaanya itwe obwire obumu kwekaguza abaana be obubaraaba nibaija kucwamu kuheereza Yahwe nk’oku Timoseo yakozere. Habwokuba abazaire bamanyire omulingo ensi ya Sitaani esindikiriza abaana baabo. (1 Pet. 5:8) Ekindi, banyaanya itwe baingi nibakuza abaana bataine bukonyezi bwa baisebo, rundi abandi baibabo tibarukuramya Yahwe. Ekyokurorraho, munyaanya itwe Christine * nagamba ati: “Iba nyowe akaba ali taata omurungi kandi ayafaahoga eka ye, baitu akahakaniriza kimu eky’okukuza abaana baitu nk’Abakaiso ba Yahwe. Nkarra muno kumara emyaka nyingi, ninyekaguza omulingo abaana bange bakusoboire kuramya Yahwe.”

5. Nitugenda kubazaaho ki omu kicweka kinu?

⁵ Obworaaba oli munyaanya itwe ow’aine abaana, naiwe nosobora kukonyera abaana baawe kugonza kandi n’okuheereza Yahwe nk’oku Unike yakozere. Omu kicweka kinu, nitugenda kubazaaho omulingo osobora kwegera ha kyokurorraho kye, omu kwegesa abaana baawe kurabira omu bigambo hamu n’ebikorwa byawe. Nitwija n’okurora omulingo Yahwe arakukonyeramu.

6. Kusigikirra ha 2 Timoseo 3:14, 15, Timoseo akafooka ata Mukristaayo?

⁶ Timoseo obwakaba akyali mwana muto, nyina akakora kyona ekyarukusobora kumwegesa “ebyahandikirwe ebirukwera,” nk’oku Abayudaaya bakaba nibabyetegereza. Ky’amananu ngu, akaba amanyire bike habwokuba akaba ataine eky’amanyire hali Yesu Kristo. Baitu Timoseo ebiyayegere kuruga omu Byahandiikirwe, nibyo byakumukonyire kwikiriza kufooka Omukristaayo. Baitu yakwikiriize kufooka Mukristaayo? Timoseo akaba aine obugabe obwokucwamu kufooka Mukristaayo. Hataroho kugurukyagurukya, amaani nyina Timoseo yatairemu nikyo kimu ha bintu ebyakonyire Timoseo ‘kwetegereza’ amananu agarukukwata hali Yesu. (Soma 2 Timoseo 3:14, 15.) Unike akasemererwa muno habw’okusobora kwegesa mutabani we hali Yahwe n’obukiraaba ngu kyali kitanguhire. Mali Unike akahikiriiza amakuru g’ibara lye, erirukumanyisa “kusingura.”

7. Unike yakusoboire kukonyera ata mutabani we kugumizaamu nakurakurana hanyuma y’okubatizibwa?

⁷ Okubatizibwa rwali rutambu rukuru muno omu bwomeezi bwa Timoseo, baitu kweralikirra kwa Unike kutagarukire aho. Mutabani we yakukozeseze ata obwomeezi bwe? Yakutungire abanywani ababi? Yakugenzere kusomera omu Asene kandi atandike kwikiririza omu nyegesa z’abafirisofa abakafiiri ab’oku? Yakusiisire obwire bwe, amaani, hamu n’obusigazi bwe kwekamba kutunga itungo? Unike akaba atarukusobora kukorra Timoseo encwamu, baitu akaba nasobora kumukonyera. Omu mulingo ki? Akaba nasobora kugumizaamu nayekamba kwegesa mutabani we kugonza Yahwe hamu na Yesu. Ebizibu tibiri byabo bonka abarukwikara omu maka agarumu enyikiriza ezirukwahukana. N’obukiraaba ngu abazaire boona bali omu mananu, nikisobora kubagumira kukonyera abaana baabo kuheereza Yahwe. Kiki abazaire ekibasobora kwega kuruga omu kyokurorraho kya Unike?

8. Munyaanya itwe nasobora ata kukonyera iba kufaaho ebyetaago by’omwoyo eby’abaana baabo?

 ⁸ Yegesa abaana baawe Baibuli. Banyaanya itwe, musaija wawe obwaraaba ali omu mananu, Yahwe nagonza omukonyere omu kufaaho ebyetaago eby’omwoyo eby’abaana banyu. Omulingo gumu ogw’osobora kukikoramu nugwo ogw’okusagika butoosa entekaniza ey’okuramya kw’eka. Bazaaho kurungi okuramya okw’eka kandi otekerezeeho n’eby’osobora kukora kukusobozesa kweyongera kubamu okusemererwa. Rundi n’osobora kukonyera musaija wawe kuteekaniza ekintu eky’embaganiza ekimurakora rundi ekimurayega kuruga omu Baibuli omu kuramya kwanyu okw’eka. Ekindi, abamu h’abaana banyu obubaraaba bakuzire ekirukumara kusobora kugasirwa omu kitabu Wegondeze Omu Bwomeezi Ebiro n’Ebiro, n’osobora kukonyera musaija wawe kurora ngu basoma.

9. Ninkaha nambere munyaanya itwe ow’aine omusaija ow’atali omu mananu asobora kwiha obukonyezi?

⁹ Abamu ha banyaanya itwe nubo begesa abaana baabo Baibuli, obundi habwokuba nibakuza abaana baabo bataine obukonyezi bwa baisebo rundi habwokuba basaija baabo tibali omu mananu. Obukiraaba nukwo kiri omu ka yaawe, oteralikirra ekihinguraine. Yahwe naija kukukonyera. Kozesa ebikwato ebisemeriire eby’okwegesa eby’atuhaire kurabira omu kitebe kye kwegesa abaana baawe. Kandi nosobora kwekaguzaaho abazaire abakugu omulingo bakozesaamu ebikwato binu omu kuramya kwabo okw’eka. * (Nfu. 11:14) Yahwe nasobora n’okukukonyera kumanya omulingo osobora kubazaamu n’abaana baawe. Musabe akukonyere kumanya ebikaguzo eby’osobora kukozesa kumanya abaana baawe ekibarukutekereza n’ekiri omu mutima gwabo. (Nfu. 20:5) Ekikaguzo ekyanguhire nka ‘Kiki ekikizire kukutalibaniza ha isomero?’ nikisobora kukukonyera kutandika kubaza na uwe kandi n’okumanya bingi.

10. Biki ebindi eby’osobora kukora kukonyera abaana baawe kwega hali Yahwe?

¹⁰ Serra emiringo erukwahukana ey’osobora kwegesa abaana baawe hali Yahwe. Bazaaho Yahwe hamu n’ebintu ebingi ebirungi ebyakukoliire. (Bir. 6:6, 7; Is. 63:7) Kinu kikuru muno kakuba oba otarukusobora kwegesa abaana baawe butoosa omu ka. Christine, otusangirwe tubalizeeho nagamba ati: “Nkaba nyine emigisa nke muno ey’okubaza hali Yahwe, nahabweki buli kagisa koona akanatungaga nkaba nyine kukakozesa kurungi. Twabazaahoga ebintu Yahwe ebiyahangire hamu n’ebintu ebindi bingi eby’omwoyo obutwabaga tugenzere kurubataho rundi obutwabaga tuli omu lyato ha nyanja. Abaana bange obubakuzire, nk’abekambisa kwesomeraga Baibuli bonka.” Ekindi, bazaaho kurungi ekitebe kya Yahwe, hamu n’ab’oruganda na banyaanya itwe. Otabazaaho kubi abagurusi. Ebyobabazaaho nibisobora kuleetera abaana baawe kubaza n’abagurusi obubarukuba nibetaaga obukonyezi rundi kutabaza nabo.

11. Kusigikirra ha Yakobo 3:18, habwaki kikuru kukurakuraniza obusinge omu ka?

¹¹ Kurakuraniza obusinge omu ka. Butoosa yoleka musaija wawe hamu n’abaana baawe ngu n’obagonza. Baza na musaija wawe omu mulingo ogw’embabazi kandi ogw’ekitiniisa, kandi otendeke n’abaana baawe kukora nikyo kimu. Obworakikora, nikiija kuleetaho obusinge omu ka ekirakusobozesa kwanguhirwa kwegesa abaana baawe hali Yahwe. (Soma Yakobo 3:18.) Tekerezaaho ekyokurorraho kya Jozsef, arukuheereza nka payoniya ow’embaganiza omu Romania. Obwakaba nakura, ise  akalengaho muno kumulemesa, n’okulemesa nyina hamu n’abagenzi be kuheereza Yahwe. Jozsef nagamba ati: “Nyina nyowe akalengaho muno kuleetaho obusinge omu ka. Isiitwe obuyayeyongeraga kuba mukaali, nyina itwe yayongeraga kumwoleka embabazi. Obuyakyetegerezaaga ngu nikitugumira kuteekamu isiitwe ekitiinisa n’okumworobera, yabazaahoga naitwe Abefeso 6:1-3. Hanyuma yabazaahoga naitwe emiringo ya Isiitwe emirungi kandi atukonyera kwetegereza habwaki tusemeriire kumugonza. Eki kikakonyera eka yaitu kubamu obusinge.”

12. Kusigikirra ha 2 Timoseo 1:5, ekyokurorraho kya Unike kikakwataho kita Timoseo?

¹² Soma 2 Timoseo 1:5. Unike akateeraho Timoseo ekyokurorraho ekirungi. Aine kuba yamwegeseze ngu okwikiriza okw’amananu nikutwarramu ebikorwa. (Yak. 2:26) Busaho kugurukyagurukya, Timoseo akakirora ngu ebikorwa bya nyina byasigikirraga ha kugonza okw’amaani okwakaba ainiire Yahwe. Timoseo aine kuba yakirozere ngu kuheereza Yahwe kukaleetera nyina okusemererwa. Ekyokurorraho kya Unike kikakwataho kita Timoseo? Nk’oku omukwenda Paulo yagambire, Timoseo akaba aine okwikiriza okw’amaani nk’okwa nyina. Kinu kitabeho bubaho kyonka. Timoseo akaba arozere ekyokurorraho kya nyina kandi yacwamu kukyegeraho. Omu mulingo nugwo gumu, n’omu kasumi kanu banyaanya itwe baingi basoboire kukonyera ab’omu maka gaabo kuheereza Yahwe batakozeseze kigambo kyona. (1 Pet. 3:1, 2) Naiwe nosobora kukora nikyo kimu. Omu mulingo ki?

13. Habwaki munyaanya itwe ow’aine abaana asemeriire kufoora enkoragana ye na Yahwe ekintu ekirukukirayo obukuru?

¹³ Foora enkoragana yaawe na Yahwe ekintu ekirukukirayo obukuru. (Bir. 6:5, 6) Kusisanaho na banyaanya itwe baingi abaine abaana, naiwe oyefereza ebintu bingi. Oyefereza obwire, sente, oturo, hamu n’ebindi kusobora kufaaho ebyetaago by’omubiri eby’abaana baawe. Baitu tosemeriire kwemarra muno omu kuserra ebyetaago byabo, okaburwa obwire obw’okugumya enkoragana yaawe na Yahwe. Butoosa wetereho obwire obw’okusaba, kwesomesa Baibuli, n’okugenda omu nsorrokano. Obworakikora, noija kugumya enkoragana yaawe na Yahwe kandi oteereho eka yaawe hamu n’abantu abandi ekyokurorraho ekirungi.

14-15. Kiki ekyorukwega kuruga omu kyokurorraho kya Leanne, Maria, hamu na João?

¹⁴ Tekerezaaho ebyokurorraho binu, eby’abato abamu abaakonyirwe ekyokurorraho ekya banyinabo kwega kugonza n’okwesiga Yahwe. Muhara wa Christine arukwetwa Leanne nagamba ati: “Tukaba tutarukusobora kwega Baibuli isiitwe obuyabaga ali omu ka. Baitu nyina itwe tiyayosaaga ensorrokano. N’obukiraaba ngu tukaba tutamanyire bingi ebirukukwata ha Baibuli, ebikorwa bye bikatukonyera kuba n’okwikiriza okugumire. Tukaba tukimanyire ngu ganu nugo amananu, n’obukiraaba ngu tukaba tutakagendaga omu rusorrokano rwona.”

¹⁵ Obwire obumu, ise Maria yafubiraga ab’omu ka ye habw’okugenda omu nsorrokano. Maria nagamba ati: “Nyina nyowe nuwe omu ha banyaanya itwe abarukukirayo obumanzi abamanyire. Obunkaba nkyali muto, obwire obumu nayangaga kukora ebintu habw’okutiina abandi ekibaragamba. Baitu habw’okurora obumanzi obwa nyina nyowe, kandi n’omulingo yaikaraga nayebembeza Yahwe omu bwomeezi bwe, kikankonyera kuleka kutiina abantu.” Ow’oruganda João, ise ayatangire eka yabo kubazaaho ebintu eby’omwoyo, nagamba ati: “Ekyakizire kunkwataho nukwo kurora ngu  nyina nyowe akaba ayetekaniize kuleka ekintu kyona kusobora kusemeza ise nyowe, baitu akaba atasobora kuleka kugonza Yahwe.”

16. Ekyokurorraho kya munyaanya itwe ow’aine abaana nikisobora kukwataho kita abandi?

¹⁶ Banyaanya abaine abaana, mwijuke ngu ekyokurorraho kyanyu kikwataho abandi. Omu mulingo ki? Tekerezaaho omulingo ekyokurorraho kya Unike kyakwasireho omukwenda Paulo. Akakyetegereza ngu okwikiriza kwa Timoseo okutaine bugobya ‘kukabanza ira omu . . . Unike.’ (2 Tim. 1:5) Nidi Paulo obuyabandize kurora okwikiriza kwa Unike? Nikizooka omu rugendo rwe orw’okubanza nk’omu misani nubwo yatangatangaine Loi hamu na Unike omu Lusitura kandi nasobora kuba nuwe yabakonyire kufooka Bakristaayo. (Eng. 14:4-18) Kitekerezeeho: Nambere Paulo yahandiikire ebbaruha hali Timoseo, hakaba harabireho emyaka 15, baitu Paulo akaba nakyaijuka ebikorwa bya Unike eby’okwikiriza kandi akamukozesa nk’ekyokurorraho abandi ekibasemeriire kwegeraho. Hataroho kugurukyagurukya, ekyokurorraho kye kikagarramu muno Paulo amaani hamu n’Abakristaayo abandi ab’omu kyasa eky’okubanza. Obworaaba n’okuza abaana oli wenka rundi oli omu ka ey’erumu enyikiriza ezirukwahukana, kigumye ngu ekyokurorraho kyawe eky’obwesigwa nikigarramu amaani kandi nikyekambisa abo abakwetoroire.

17. Kiki eky’osemeriire kukora kakuba kizooka ngu omwana wawe tarukufaayo h’amaani agorukutamu kumutendeka?

¹⁷ Kiki eky’osobora kukora kakuba kizooka ngu omwana wawe tarukufaayo h’amaani agorukuteekamu?  Ijuka ngu kutendeka omwana kitwara obwire. Nk’oku kyolekerwe omu kisisani, obw’obyara embibo, obwire obumu nosobora kwekaguza obweraaba niija kukura kandi eyane ebijuma. N’obukiraaba ngu tosobora kugumya ngu niija kukura, ogumizaamu nogiseserra amaizi nukwo esobole kukura kurungi. (Mar. 4:26-29) Omu mulingo nugwo gumu, munyaanya itwe obwire obumu, nasobora kwekaguza amaani agarukutamu mali obugaraaba nigakonyera abaana be kugonza Yahwe. Tosobora kucwamu ekirarugamu. Baitu kakuba okora kyona ekyorukusobora kugumizaamu kubatendeka, noija kubaha omugisa ogw’okukura omu by’omwoyo.​—Nfu. 22:6.

18. Yahwe nasobora ata kukonyera abaana baawe kukura omu by’omwoyo?

¹⁸ Kurugira kimu omu busumi bwa kara, Yahwe akonyire abato baingi kufooka banywani be. (Zab. 22:9, 10) Nasobora n’okukonyera abaana baawe kukura omu by’omwoyo obukiraaba nikyo barukugonza. (1 Kol. 3:6, 7) N’obukiraaba ngu nikizooka abaana baawe batandikire kuhuguka, Yahwe habw’okugonza naija kubaikazaaho eriiso lye. (Zab. 11:4) Kakuba booleka akokurorraho koona akarukwoleka ngu baine “entekereza enungi,” Yahwe ayetekaniize kubakonyera kufooka banywani be. (Eng. 13:48, NWT; 2 Byom. 16:9) Rundi nasobora kukukonyera kubaza ekintu ekihikire omu kasumi konyini omwana wawe arukukyetaagiramu kukihurra. (Nfu. 15:23) Rundi nasobora kuleetera ow’oruganda rundi munyaanya itwe omu kitebe ow’arukufaayo kufoora abaana baawe banywani be. Hanyuma y’abaana baawe kufooka bantu bakuru, Yahwe nasobora kubaijukya kimu ha bintu ekiwabegeseze obukaba bakyali bato. (Yoh. 14:26) Obworagumizaamu kutendeka abaana baawe, kurabira omu bigambo hamu n’ekyokurorraho kyawe, Yahwe naija kukuha empeera.

19. Habwaki nosobora kukigumya ngu nosiimwa omu maiso ga Yahwe?

¹⁹ Okugonza Yahwe okwakwiniire tikusigikirra ha ncwamu abaana baawe ezibakora. Akugonza habwokuba naiwe n’omugonza. Obworaaba n’okuza abaana oli wenka, Yahwe naraganiza kuba Isebo, kandi Omulinzi wawe. (Zab. 68:5) Tosobora kucweramu abaana baawe kuheereza Yahwe. Baitu kakuba ogumizaamu noyesiga obukonyezi kuruga hali Yahwe n’okukora kyona ekyorukusobora, noija kusiimwa omu maiso ge.