1, 2. а) Эвниканың дугайында чүнү билир бис база ол оглун кижизидип тургаш, кандыг бергеге таварышкан? б) Журналдың даштында чурукту тайылбырлаптыңар.

 БИЖИЛГЕДЕ Тимофейниң сугга суктуруп турганын биживээн-даа болза, авазы Эвникага ол хүн эң аас-кежиктиг болган деп, чигзинмейн барып болур бис (У. ч. 23:35). Тимофей сугже кирип бар чыдырда, авазы олче канчаар көрүп турарын сагыштаалаптыңар. Оглу дээш чоргаарланган иениң карактары чырып, арнындан хүлүмзүрүг дүшпейн турар. Тимофейниң кырган-авазы Лоида уруун кужактап алган турар. Тимофейни канчаар сугже суп турарын Эвника аажок кичээнгейлиг көрүп турар. Ам-на өөрээнинден чайынналып турар Тимофейни акывыс сугдан уштуп эккээрге, ооң авазы карааның чажын тудуп чадап турар. Чеже-даа хөй бергелер турза, Эвника оглун Иеговага болгаш Иисус Христоска ынак кылдыр өстүрүп шыдаан!

² Тимофейниң ада-иези ийи аңгы чүдүлгелиг турган. Ооң ачазы грек, а авазы биле кырган-авазы еврей сөөктүг чораан (Аж.-ч. 16:1). Тимофей элээди турда, Эвника биле Лоида Иисустуң өөреникчилери апарган чадавас. Ынчалза-даа ооң ачазы алыс шынны хүлээвээн. А Тимофей канчаар? Ол өзүп келген болгаш, шиитпирлерни боду хүлээп шыдаар турган. Ол ачазының талазын эжелеп аар бе? Чок болза, чажындан тура билир иудей ёзу-чаңчылдарга шынчы боор бе? Азы, авазы ышкаш, Иисустуң өөреникчизи апаар бе?

3. Ажы-төлүн Иеговага ынак болур кылдыр кижизидип турар угбаларывыска Иегова кандыг хамаарылгалыгыл? (Чугаалар 1:8, 9).

³ Ажы-төлдүг угбаларывыс, Эвника дег, өг-бүлелеринге аажок ынак. Оларның шупту ажы-төлү Иегованың өңнүктери апаар кылдыр, ол авалар күзеп чоруур. Олар ажы-төлүн кижизидер хүлээлгезинге харыысалгалыг боорга, Иегова оларга өөрүп четтирип турар. (Номчуптуңар: Чугаалар  1:8, 9.) Бурган дыка хөй угбаларывыска ажы-төлүн алыс шынга ынак апаар кылдыр, кижизидеринге дузалаан.

4. Угбаларывыс ажы-төлүн кижизидип тургаш, кандыг бергелерге таваржып турар?

⁴ Ие бүрүзү: «Мээң ажы-төлүм, Тимофей ышкаш, Иеговага бараалгаар ирги бе?» деп дүвүреп чоруур. Эрликтиң делегейинде чаш ажы-төлдү кайы хире хөй айыыл манап турарын ада-иелер кымдан-даа артык билир (1 Пет. 5:8). Оон аңгыда, чамдык угбаларывыс ажы-төлүн чааскаан азы Иеговага бүзүревес ашаа-биле өстүрүп турар. Кристинаның b чижээн көрээлиңер. Ол мынча дээн: «Мээң ашаам дыка эки ада база өг-бүлези дээш сагыш човаар турган. Ынчалза-даа ажы-төлүвүстү алыс шынга өөредир дээримге, ол шуут удур турган. Ажы-төлүм Иеговага кажан-бир бараалгаар бе дээш, сагыжым аарып, та чеже карак чажын бо чылдар дургузунда төкпээн деп мен!»

5. Бо статьяга чүнү сайгарар бис?

⁵ Ажы-төлдүг угбаларывыс, силер база, Эвника дег, үлегерлиг иелер бооп шыдаар силер. Эвникадан чүнү өөренип ап болуруңарны база ажы-төлүңерни чугаа-сөс болгаш ажыл-херек кырынга канчаар кижизидерин бо статьядан билип алыр силер. Оон Иегованың силерге канчаар дузалап турарын көөр бис.

6. Тимофейге Иисустуң өөреникчизи апаарынга чүү дузалаан? (2 Тимофейге 3:14, 15).

⁶ Эвника Тимофейни чажындан тура Ыдыктыг Бижилгеге өөредирин кыскан. Ол үеде Эвниканың билиглери четче эвес турган, чүге дизе ол Иисус Христостуң дугайында чүнү-даа дыңнаваан. Ындыг-даа бол, Тимофейге христиан чүдүлгени хүлээп алырынга ол билиглер четчир турган. Ынчаарга ол Иисус Христостуң өөреникчизи болуксай бээр бе? Ол ону боду шиитпирлээр ужурлуг турган. Чугаажок, Тимофейниң Иисусту эдерер дээн шиитпиринге Эвника үлүүн киирген. (Номчуптуңар: 2 Тимофейге 3:14, 15.) Ол бергелерге торулбайн, Иеговага ынакшылды оглунга өстүрүп шыдааны дээш, аажок өөрүп турган. Шынап-ла, Эвника «чаалап алыр» деп уткалыг адынга дүгжүп турган.

7. Тимофейниң сугга суктурганының соонда безин, Эвника аңаа канчаар дузалап болур турган?

⁷ Тимофей сугга суктуруп алгаш, дыка чугула базымны кылган. Ынчалза-даа Эвника оглу дээш дөмей-ле дүвүреп турган. Ол канчаар улаштыр чурттаар? Багай эш-өөр-биле катчы бербес бе? Канчап билир, ол афин школаже кирип алгаш, меге бурганнарга чүдүүр философтарның өөредиинге алзыптар болза канчаар? Азы байып аар дээш, бүгү күжүн, үезин, аныяк чылдарын ынаар чарып туруп бербес бе? Эвниканың Тимофейниң орнунга шиитпирлер хүлээр эргези чок турган-даа болза, ол аңаа дузалап болур турган. Канчаар? Ол оглунуң чүрээнге моон-даа соңгаар Иеговага ынакшылды өстүреринге база Иисус Христоска өөрүп четтирген хөөннү сайзырадырынга дузалап болур турган. Амгы үеде Иеговага ийилээ бараалгап турар ада-иелер безин, шак бо бергелерге таваржып турар. Ажы-төлүнүң сеткил-чүрээн эки билип, оларга Иегованың талазын эжелээринге дузалаары белен эвес. Ада-иелер Эвниканың үлегерин канчаар өттүнүп болур?

8. Угбалар ажы-төлүн алыс шынга өөредир дээш, ашактарынга канчаар дузалап болур?

⁸ Ажы-төлүңер-биле Библияны өөрениңер. Угбалар, ажы-төлүңерни алыс шынга өөредиринге ашааңарга дузалаарыңарны  Иегова күзеп турар. Ону кылыр бир арга — доктаамал өг-бүле мөгейиишкинин эрттирери-дир. Өг-бүлеңер-биле кады Библияны өөрениринге ынак силер деп чугаа-сөзүңерден көскү болзун. Авалар, бажыңарга чылыг-чымчак байдалды канчаар тургузуп болуруңарны боданып көрүңер. Өг-бүле мөгейиишкинин канчаар солун кылдыр эрттирип болурун ашааңарга эпчоксунмайн, чугаалаңар. Оон аңгыда, уругларыңар шору өзүп келген болза, төл бүрүзү-биле «Аас-кежиктиг мөңге чуртта!» деп ном-биле ашааңарга библейжи кичээлди эрттиреринге дузалажыңар.

9. Чааскаан ажы-төлүн өстүрүп турар угбаларда кандыг дуза бар?

⁹ Бистиң аравыста ажы-төлүн чааскаан өстүрүп турар база Иеговага чүдүвес ашактарлыг угбалар хөй. Олар ажы-төлүнге Библияны боттары өөредип турар. Силер база оларның бирээзи болзуңарза, ынча дыка дүвүревеңер. Иегова силерни дуза чокка черле арттырбас. Ол организациязы таварыштыр онзагай өөредилге материалдарын берип турар. Ону ажыглаңар! Оон ыңай өг-бүле мөгейиишкинин оон-даа солун кылдыр канчаар эрттирип болурун өске ада-иелерден айтырыңар (У. ч. 11:14) c. Иегова силерге ажы-төлүңерниң сеткил-чүрээн билип алырынга, ында бар бодалдарны «узуп» алырынга дузалаар кылдыр дилеңер (У. ч. 20:5). Чижээ: «Сеңээ школага чүү эң берге-дир?» деп төлүңерден айтырар болзуңарза, ол сеткил-чүрээн силерге ажыдып бээр чадавас.

10. Ажы-төлүңер Иегованың дугайында билип аар кылдыр, оон ыңай чүнү кылып болур силер?

¹⁰ Ажы-төлүңерге Иегованың дугайында чугаалаар аргаларны дилеңер. Иегованың дугайында база Ооң силерге кайы хире хөйнү кылганын ажы-төлүңерге чугаалаңар (Ы. х. к. 6:6, 7; Иса. 63:7). Бо сүме уруглары-биле Библияны бажыңынга өөренип шыдавас угбаларга ылаңгыя ажыктыг. Кырында чугаалашканывыс Кристина мынча дээн: «Ашаамның чанынга ажы-төлүм-биле Бурганның дугайында чугаалажыры шуут болдунмас турган. Ынчангаш арга бүрүзүн ажыглаарын кызып турган мен. Ажы-төлүм-биле Иегованың чаяалгаларын болгаш өске-даа чүүлдерниң дугайында чугаалажыр дээш, олар-биле агаарлап азы хемеге эжиндирип селгүүстээр турган мен. Кажан олар өзүп кээрге, боттары хууда Библияны өөренир кылдыр деткип турган мен». Оон аңгыда, Иегованың организациязы болгаш акы-угбаларның дугайында багай чүүл чугаалавас болза эки. Удуртукчуларны шүгүмчүлевеңер, оон башка ажы-төлүңерге дуза херек апаарга, олар удуртукчулардан ону дилевес боор.

11. Иаков 3:18-тен алырга, бажыңга тайбың байдалды тургузары чүге чугула?

¹¹ Бажыңыңарга тайбың байдалды тургузуңар. Чоок улузуңарга «мен сеңээ ынак мен» деп үргүлчү чугаалап туруңар. Ашааңарны уруг-дарыг мурнунга бактавайн, харын-даа аңаа хүндүткелдиг болуңар. Оон ыңай ажы-төлүңерни ачазын хүндүлээр кылдыр өөредиңер. Ынчаар бажыңыңарга оожум, тайбың байдалды тургузуп алыр силер. Оон ажы-төлүңерге Иегованың дугайында чугаалаары белен боор. (Номчуптуңар: Иаков 3:18.) Румынияда тускай эгелекчи кылдыр бараалгап чоруур Йожефтиң чижээн көрээлиңер. Ол бичии турда, ачазы аңаа, ооң авазынга болгаш кады төрээннеринге Иеговага бараалгаарынга шаптыктап турган. Йожеф үлешкен: «Авам бар-ла күжү-биле бажыңга тайбың байдалды тургузар  дээш кызып турган. Ачавыс кадыг-дошкун кылдыр алдынган санында-ла, авам аңаа эрге-чассыг хамаарылга көргүзер турган. Кезек үе дургузунда ачавысты хүндүлээри база дыңнаары берге турган. Ынчан ававыс Эфесчилерге 6:1—3-тү биске тайылбырлааш, ачавыстың эки талаларын чугаалап, аңаа чүге ынак боор ужурлуувусту айтып берген. Ынчаар авам өг-бүлевисте дүвүрелдиг байдалды чавырылдырып, хөй-ле бергелерни чайлаткан».

12. Эвниканың үлегери Тимофейге кандыг салдар чедирген? (2 Тимофейге 1:5).

¹² Номчуптуңар: 2 Тимофейге 1:5. Эвника Тимофейге дыка эки үлегерни көргүскен. «Бүзүрел ажыл-херек чокта өлүг» деп бодалды ол оглунга дамчыдарын кыскан (Иак. 2:26). Авазының ажыл-херектери Иеговага улуг ынакшылын бадыткап турган. Оон ыңай авазының Бурганга кайы хире өөрүшкүлүг бараалгап чоруурун Тимофей ылап көрген. Эвниканың үлегери аңаа кандыг салдар чедирген? Павел элчин: «[Аваңныы] дег бүзүрел сенде база бар» деп анаа эвес бижээн. Тимофей авазын көргеш, ол ышкаш болуксап турган. Бөгүн база хөй угбалар артык чугаа-сөс чокка чоок улузунуң чүректерин чаалап ап турар (1 Пет. 3:1—2). Силер база ону кылып шыдаар силер! Аңаа чүү дузалаар?

13. Ие кижи Иегова-биле хамаарылгазын чүге бирги черге салыр ужурлуг?

¹³ Иегова-биле хамаарылгаңарны бирги черге салыңар (Ы. х. к. 6:5, 6). Шупту авалар дег, силер база хөй-ле чүүлден ойталап турар силер. Ажы-төлүңерни ашкарып-чемгерип, хепкерер дээш, уйгу-дыжыңарны бодавайн, хөй күжүңерни болгаш акша-төгерииңерни чарып турар силер. Ындыг-даа болза, өг-бүле ажаанзыралдары Иегова-биле хамаарылганы быжыктырар дээн үени чивес ужурлуг. Ынчангаш Бурган-биле хүннүң-не чугаалажып, Библияны доктаамал өөренип, чыыштарны үспеңер. Ынчан Иегова-биле найыралыңар кошкавас. Ол ышкаш силер чоок улузуңарга болгаш долгандыр улуска эки үлегер болур силер.

14, 15. Лиананың, Марияның болгаш Жоаунуң сөстеринде силерге чүү солун болду?

¹⁴ Авазының ачызында Иеговага ынак апаргаш, Аңаа ынанып өөренип алган ажы-төлге сөстен берээлиңер. Кристинаның уруу Лиана мынча деп үлешкен: «Библияны хостуг өөренири болдунмас турган. Ынчалза-даа чыыштарга хамаарыштыр авам дыка шиитпирлиг турган. Библияның дугайында билиивис эвээш турган-даа болза, авамның үлегери болгаш быжыг бүзүрели кандыг-даа сөстерден артык дээштиг турган. Чыыштарже боттарывыс барып эгелээнивистиң мурнунда-ла, авам биске алыс шынны өөредип турган деп билип каан бис».

¹⁵ Марияның ачазы бүгү өг-бүлезин чыыштарже барганы дээш чамдыкта кончуп, эттээр турган. Ол мынча деп үлешкен: «Мээң авам — эң-не дидим кижиниң бирээзи. Мен бичиимде улустуң чүү дээринден корткаш, кылыр ужурлуг чүүлдерни кылбас турган мен. А авам эрес-дидим болгаш Иегова-биле найыралын чүден артык үнелеп турган. Ооң үлегер-чижээ меңээ коргуушкунну ажып эртеринге дузалаан. А Жоаунуң ачазы Иегованың болгаш Библияның дугайында чугааларын безин хоруп турган. «Меңээ чүү эң-не дээштиг болган деп бодаар силер? Ачамны муңгаратпас дээш, авам чүнү-даа кылырынга белен турган. Ынчалза-даа ол Иегова-биле найыралынче кымны-даа, чүнү-даа чара кирерин чөпшээревес турган» — деп, ол чугаалаан.

16. Ажы-төлүн кижизидип турар угбаларның үлегери өске улуска кандыг салдар чедирип болур?

 ¹⁶ Угбалар, силер чүгле ажы-төлүңерге эвес, а өске-даа улуска эки үлегер-чижек бооп болур силер. Канчаар? Эвниканың үлегери Павел элчинни кайы хире магадатканын бодап көрүңер даан. Эвникада дег, сеткилиниң ханызындан бүзүрел Тимофейде база бар деп, ол бижээн (2 Тим. 1:5). Ам Павел Эвниканың бүзүрелин кажан эскерип каан? Листраже бирги миссионер аян-чоруунуң үезинде. Ынчан ол Лоида биле Эвникага бир дугаар ужурашкан. Павел оларга Иисустуң өөреникчилери апаарынга дузалаан чадавас (Аж.-ч. 14:4—18). Солун чүүл, 15 чыл ажыг эрткенде, Павел Тимофейге чагаазынга Эвниканың бүзүрелин өскелерге үлегер кылдыр салган. Оон алырга, ол Павелче болгаш өске-даа христианнарже улуг салдар чедирген чадавас. Ынчангаш, угбалар, бир эвес ажы-төлүңерни чааскаан алыс шынга өөредип турар болзуңарза, силерниң бүзүрелиңерни өскелерге үлегер-чижек кылдыр база салып болур.

17. Канчаар-даа кызарыңарга, төлүңерниң Бурган-биле хамаарылгазы быжыкпайн турар ышкаш болза канчаар?

¹⁷ А бир эвес канчаар-даа кызарыңарга, төлүңерниң Бурган-биле хамаарылгазы быжыкпайн турар ышкаш болза канчаар? Ажы-төлдү кижизидеринге хөй үе херек деп утпаңар. Бердинген чурукту көрээлиңер. Үрезинни тарып каарга, ол өзүп келгеш, дүжүттү албан бээр бе? Чок, ол чүүл кижиден хамаарышпас. Бистиң хүлээлгевис — ону суггарып, ооң өзүлдезинге таарымчалыг  байдалды тургузары-дыр (Мк. 4:26—29). Ону ажы-төлүвүстүң Бурган-биле хамаарылгазынга дөмейлеп болур. Төлүмнүң чүрээнге чедир өөредип турар мен бе дээш, ие кижи дүвүреп болур. Ынчалза-даа ооң төлү өзүп келгеш, шиитпирлерни боду хүлээр апаар. Бир эвес ие кижи төлүн шын кижизидер дээш, бар-ла күжүн үндүрер болза, ол ооң Бурган-биле хамаарылгазынга дузалаар таарымчалыг байдалды тургузар (У. ч. 22:6).

18. Иегова ажы-төлүңерге Ооң-биле найыралды быжыктырарынга канчаар дузалап болур?

¹⁸ Иегова дыка хөй санныг оолдар-кыстарга Ооң-биле быжыг найыралды тударынга дузалаан (Ыд. ыр. 21:10, 11). Ол силерниң төлүңерге, ооң күзели бар-ла болза, база дузалаар (1 Кор. 3:6, 7). Бир эвес уругларыңар Бурганга ынча дыка улуг күзел чок бараалгап турар болза, Ол оларга дөмей-ле ынак (Ыд. ыр. 10:4). Бурган төлүңерниң алыс шынны хүлээп алыр хензиг-даа күзелин эскерип каар болза, Ол оларга өзүп-мандыырынга дузалаар (Аж.-ч. 13:48; 2 Чыл. 16:9). Иегова силерге шын сөстерни шилип алгаш, ону уругларыңарга херек үеде чугаалаарынга дузалаар (У. ч. 15:23). Чок болза, Бурганывыс сагыш човангыр акыйны азы угбайны оларга тускай кичээнгей көргүзеринче оттурар. Ажы-төлүңер өзүп кээр-даа болза, Иегова оларга чажында силерден дыңнаан чүүлдү сагындырыптар күштүг (Ин. 14:26). Бир эвес силер уруг-дарыыңарны чугаа-сөзүңер болгаш ажыл-херектериңер-биле өөредир болзуңарза, Иегова оларга Ооң-биле найыралды быжыктырарынга дузалаар.

19. Иегова угбаларывыска чүүлзүнүп турар деп, олар чүге чигзинмес ужурлуг?

¹⁹ Эргим угбай, ажы-төлүң кандыг-даа шиитпир хүлээп алза, Иегова дөмей-ле сеңээ ынак. Сен Аңаа ынак бооруңга, Ол сеңээ ынак. А бир эвес ажы-төлүңнү чааскаан азырап турар болзуңза, Иегова оларга Ада болуп, а сеңээ болчурун аазап турар (Ыд. ыр. 67:6). Чуртталгазын шын ажыглаар кылдыр ажы-төлүңнү албадап шыдавас сен. Ынчалза-даа сен Иегованың дузазынга ынанып, бүгү чүүлдү шыдаар шааң-биле кылып чоруур болзуңза, Ол сеңээ чүүлзүнүп турар!