1, 2. а) Мае ми тодӥськомы Евника сярысь но со сярысь, кыӵе шуг-секытъёсын со пумиськиз, пизэ будэтыкуз? б) Вералэ, мар возьматэмын вылбамысь суредын.

 БИБЛИЫН Тимофейлэн пылатӥськемез сярысь уг вераськы. Но валамон, солэн анаез, Евника, туж шудо вал та нуналэ (Мад. 23:25). Пуктэ син азяды, кызьы Евника учке Тимофей шоры, кудӥз пылатӥськон понна вуэ пыре. Анаез туж шумпотэ. Солэн Лоида песянаез Евникаен артэ сылэ но сое ӟыгыртэ. Евника учке, кызьы Тимофей быдэсак вуэ пыре. Собере агай пальпотӥсь Тимофеез вуысь ӝутэ. Анаез синкылиоссэ кутыны уг быгаты ни. Евникалэн трос шуг-секытъёсыз вал ке но, со быгатӥз пизэ дышетыны Иеговаез но Иисусэз яратыны.

² Тимофейлэн анаезлэн но атаезлэн пӧртэм осконзы вал. Атаез грек вал, нош анаез но песянаез — иудейёс (Ап. уж. 16:1). Тимофей быдэ вуэмын ӧй вал на, дыр, куке Евника но Лоида христианъёс луизы. Но жаляса верано луэ, солэн атаез христиан мурт ӧз луы. Нош мае быръёз Тимофей? Со пичи пинал ӧй вал ини. Соин ик со ачиз ужпум кутыны быгатэ вал. Кариськоз-а со атаез пала? Улоз-а иудей сям-йылолъёсъя, кудъёсызлы со пичи дырысеныз ик дышетэмын вал? Яке со, анаез сямен, Иисус Христослэн дышетскисез луоз?

3. Мадёнъёсын 1:8, 9 гожтэмъя, кызьы Иегова учке анайёслэн тыршемзы шоры, кудъёсыз пиналъёссылы юртто зэмлык сюрестӥ мыныны?

 ³ Евника сямен, сузэр-апайёс, кудъёсызлэн пиналъёссы вань, семьяоссэс вань сюлмысьтызы ярато. Соослэн туж потэ, котькуд пиналзы Иеговалэн эшез мед луоз шуыса. Инмысь Атаймы туж дунъя соослэсь тыршемзэс. (Лыдӟе Мадёнъёсты 1:8, 9.) Иегова трос анайёслы юрттӥз ини пиналъёссэс дышетыны зэмлык сюрестӥ мыныны.

4. Кыӵе шуг-секытъёсын пумиськыло анайёс, нылпиоссэс будэтыкузы?

⁴ Номыр умойтэмез ӧвӧл, куке анайёс сюлмасько, нылпиоссы, Тимофей сямен, Иеговалы ужалозы-тыршозы-а яке уз-а шуыса. Анай-атайёс туж умой тодо, макем кышкыт Шайтанлэн дуннеез (1 Пётр 5:8). Со сяна, тросэзлэн сузэръёслэн картъёссы Иеговалэн Адӟись-Ивортӥсьёсыз ӧвӧл, нош куд-огъёсыз нылпиоссэс огназы будэто. Кылсярысь, тани мар вераз Кристина b сузэр: «Мынам картэ — туж умой атай. Но со туж пумит вал, нылъёсмы но пимы Иеговалэн Адӟись-Ивортӥсьёсыз мед луозы шуыса. Мон туж сюлмаськи, нылпиосы куке но Иеговалы ужалозы-тыршозы-а, уз-а шуыса. Тодэ вал, кӧня мон со понна бӧрдыса улӥ».

5. Мае ми эскеромы та статьяын?

⁵ Сузэръёс, Евника сямен, тӥ быгатӥськоды нылпиостэс дышетыны Иеговаез яратыны но солы ужаны-тыршыны. Та статья возьматоз, кызьы, Евникалэсь адӟем карыса, нылпиосты кылъёсын но ужъёсын дышетоно. Озьы ик ми адӟомы, кызьы Иегова тӥледлы юрттоз.

6. Мар юрттӥз Тимофейлы Христослэн дышетскисез луыны? (2 Тимофейлы 3:14, 15).

⁶ Куке Тимофей пичи вал, Евника тыршиз сое Священной Гожтэмъёсын тодматыны. Евника ачиз но ваньзэ ӧз тоды, малы ке шуоно Иисус Христос сярысь солэн номыр кылэмез ӧй вал. Озьы ке но Тимофей тырмыт тодон-валан басьтӥз, христиан сюрес вылэ султон понна. Нош потоз-а солэн христиан мурт луэмез? Пиезлы юрттон понна, Евника трос лэсьтӥз ке но, Тимофей ачиз бырйыны быгатэ вал, кинлы осконо. (Лыдӟе 2 Тимофейлы 3:14, 15.) Евника туж шумпотӥз, шуг-секытъёсты вормиз но пиезлы Иеговаез яратыны юрттӥз шуыса. Вераны луоз, Евника лэсьтӥз аслаз нимызъя, кудӥз берыктӥське «вормыны» шуыса.

7. Кызьы Евника Тимофейлы пылатӥськемез бере но юрттӥз?

⁷ Тимофей пылатӥськиз ке но, Евника азьло сямен ик со понна сюлмаськиз. Кыӵе ужпумъёс кутоз солэн пиез азьланяз? Уз эшъяськы-а со урод адямиосын? Афиныысь школае дышетскыны пыриз ке, уз кутскы-а со философъёслэн дышетонъёссылы оскыны? Узырмыны тыршыса, кужымзэ но егит дырзэ юнме уз быдты-а? Евника ӧз быгаты Тимофей понна ужпумъёс кутыны. Нош со быгатӥз солы юрттыны. Кызьы? Со пиезлы юрттыны быгатӥз Иеговаез эшшо но юнгес яратыны но Иисус Христослы тау карыны. Со семьяосын но, кытын анайзы но, атайзы но Иеговалы ужало-тыршо, таӵе ик шуг-секытъёс кылдо. Пиналъёслы юрттыны Иегова пала кариськыны котьку ик капчи ӧвӧл. Кызьы анай-атайёс Евникалэсь адӟем карыны быгато?

8. Кызьы сузэръёс Адӟись-Ивортӥсь луись картъёссылы юрттыны быгато нылпиоссылэсь осконзэс юнматыны?

 ⁸ Пиналъёсыныды Библиез эскере. Сузэръёс, Иегова ӧте тӥледыз, Адӟись-Ивортӥсь луись картъёстылы юрттыны пиналъёстылэсь осконзэс юнматыны. Со понна юрттыны быгатэ семьяен йыбырттон. Тӥляд кылъёсысьтыды мед адӟиськоз, тӥледлы семьяеныды ӵош Библиез эскерыны кельше шуыса. Анайёс, малпаське, мар тӥ карыны быгатӥськоды, семьяен йыбырттонды ваньмызлы шумпотон мед ваёз шуыса. Картъёстылы вералэ, кызьы семьяен йыбырттондэс тунсыкогес карыны луысал. Со сяна, пиналъёсты кӧня ке будӥзы ни ке, тӥ картъёстылы юрттыны быгатоды котькуд пиналэныды Библиез эскерыны «Пумтэм вапумъёс ӵоже шумпотыса улэ!» книгая.

9. Мар юрттыны быгатоз сузэръёслы, кудъёсыз пиналзэс огназы будэто?

⁹ Вань на сыӵе сузэръёс, кудъёсыз пиналъёссэс огназы будэто яке картсы Адӟись-Ивортӥсь ӧвӧл. Соослы асьсэлы пиналэнызы Библиез дышетоно луэ. Тӥляд но сыӵе ик учырды ке, эн сюлмаське. Иегова тӥледыз уз кельты. Уже кутэ сое, мае Иегова сётэ организациез пыр пиналъёстэс дышетон понна. Со сяна, мукет анай-атайёслэсь но юалляськыны луоз, кызьы соос семьяен йыбырттонзэс ортчытъяло (Мад. 11:14) c. Вӧсяське Иеговалы но куре сое тӥледлы юрттыны нылпидылэсь малпанъёссэ но шӧдонъёссэ валаны (Мад. 20:5). Кылсярысь, юаны луоз: «Мар тыныд секытгес сётӥське школаын?» Таӵе юан пиналдылэсь сюлэмзэ усьтоз, дыр.

10. Кызьы эшшо тӥ юрттыны быгатоды пиналъёстылы Иегова сярысь тодыны?

¹⁰ Утчалэ амалъёс, кызьы пиналъёстылы Иегова сярысь вераны быгатоды. Вералэ соослы Иегова сярысь но мае со тӥ понна лэсьтӥз (К. Зак. 6:6, 7; Ис. 63:7). Тужгес но со кулэ со сузэръёслы, кудъёсыз доразы пиналъёсынызы Библиез дышетыны уг быгато. Кристина, кудӥзлэн кылъёсыз гожтэмын вал ини, вера: «Картэ азьын Инмар сярысь вераськыны уг луы вал. Соин ик мон пӧртэм амалъёсты утчай. Иегова но солэн кылдытэмъёсыз сярысь вераськон понна, ми нылъёсыным но пиеным кыре потамы яке пыжен уямы. Нош куке нылпиосмы кӧня ке будӥзы, мон соослэсь мылкыдзэс ӝутӥ, соос асьсэос Библиез мед эскерозы шуыса». Со сяна, туж кулэ Иеговалэн организациез сярысь, озьы ик вын-агайёсмы но сузэр-апайёсмы сярысь умойзэ вераны. Эн пыкылэ тӧроосты, соку нылпиостылы шуг-секытъёссы дыръя тӧроослы вазиськыны капчигес луоз.

11. Иаковлэн 3:18 гожтэмъя, малы туж кулэ семьяямы тупаса улон вайыны?

¹¹ Тырше семьяяды тупаса улон вайыны. Нылпиостылы но карттылы ӵемгес вералэ, тӥ соосты яратӥськоды шуыса. Картты сярысь веракуды, сое гажамды мед шӧдӥськоз. Талы ик дышетэ нылпиостэс но. Соку тӥляд дорады тупаса улон луоз но тӥледлы капчигес луоз нылпиостылы Иегова сярысь вераны. (Лыдӟе Иаковлэсь 3:18.) Озьы ик вал Йожеф агайлэн семьяяз но, кудӥз али Румыниын нимысьтыз пионер луыса ужа-тырше. Солэн пичи дырыз капчи ӧй вал. Атаез  люкетӥз солы, анаезлы, апаезлы но кык вынъёсызлы Иеговалы ужаны-тыршыны. Йожеф тодаз вае: «Анае туж тыршиз семьяямы тупаса улон вайыны. Куке атае лекъяськиз, анае ассэ лякытэн возьыны тыршиз. Одӥг вакытэ милемлы туж секыт вал атаймес гажаны но солэсь кылзӥськыны. Соку анае милемын ӵош эскериз Ефесъёслы 6:1—3. Собере со вераз атаймылэн умой сямъёсыз сярысь но юрттӥз милемлы валаны, малы ми атаймес яратыны кулэ. Озьы со семьямес трос шуг-секытъёслэсь утиз».

12. Кыӵе пайда вайиз Евникалэн примерез Тимофейлы? (2 Тимофейлы 1:5).

¹² Лыдӟе 2 Тимофейлы 1:5. Евника Тимофейлы умой адӟем карон возьматӥз. Со солы валэктыны тыршиз, дыр, осконэз ужъёсын возьматоно шуыса (Иак. 2:26). Тимофей адӟиз, анаез, Иеговаез яратэменыз, ужа-тырше но та сое шудо каре шуыса. Кыӵе пайда вайиз Евникалэн примерез Тимофейлы? Апостол Павел пусйиз, Тимофейлэн, анаезлэн кадь ик, юн осконэз вал шуыса. Талы паймонэз ӧвӧл, малы ке шуоно Тимофей адӟиз, кызьы Евника ассэ возиз, но солэсь адӟем каремез потӥз. Туннэ но тросэз сузэръёс, номыр вератэк но, семьязылэсь мылкыдзэ ӝуто Иеговалы ужаны-тыршыны (1 Пётр 3:1, 2). Мар кароно, тӥляд но озьы ик мед пӧрмоз шуыса?

13. Малы анайёслы Иеговаен кусыпъёссэс нырысетӥ интые пуктоно?

¹³ Иеговаен кусыпъёстэс нырысетӥ интые пуктэ (К. Зак. 6:5, 6). Анайёс пиналъёссылы троссэ сётыны дась. Кылсярысь, пиналъёссылэн ваньмыз кулэез мед луоз шуыса, анайёс трос дырзэс но кужымзэс быдто, уйёссэс но изьытэк пото. Но номырлы но эн лэзе Иеговаен кусыпъёстэс лябӟытыны. Соин ик тырше котькуд нунал Иеговаен вераськыны, ялан Библиез эскерыны но кенешлэн пумиськонъёсаз ветлыны. Соку тӥляд Иеговаен кусыпъёсты юнмалозы. Озьы ик тӥ умой адӟем карон возьматоды семьядылы но, мукетъёсызлы но.

14, 15. Малы тӥ дышетскиды Лианалэсь, Мариялэсь но Жоау агайлэсь?

¹⁴ Табере вераськомы пиналъёс сярысь, кудъёсыз, анайзылэсь адӟем карыса, Иеговаез яратӥзы но солы оскыны кутскизы. Тани мар вера Кристиналэн нылыз, Лиана: «Дорамы атаймы азьын Библиез дышетыны ми ӧм быгатэ. Но анаймы кенешлэсь пумиськонъёссэ ноку но ӧз кельтылы. Ми, пиналъёс, Библия сярысь ӧжыт тодӥмы ке но, анаймылэн ужъёсыз осконмес будэтӥзы. Пумиськонъёсы ветлэммылэсь азьло ик ини ми валамы, анаймы милемыз зэмлыклы дышетӥз шуыса».

¹⁵ Мариялэн атаез туж лекъяськиз, куке семьяез пумиськонъёсы ветлӥз. Тани мар вера Мария: «Анае — туж кышкасьтэм сузэр. Пичи дыръям мыным секыт вал шонерзэ лэсьтыны, малы ке шуоно мон кышкай, мар вералозы мукетъёсыз. Нош анае кышкасьтэм вал. Со Иеговаен кусыпъёссэ нырысетӥ интые пуктӥз. Солэн примерез юрттӥз мыным кышканме вормыны». Жоау агай, кудӥзлэн атаез Иегова но Библия сярысь кыл поттыны ик ӧз лэзьы, вера: «Тодӥськоды-а, мар мынам тужгес но сюлмам пыриз? Атае понна анае дась  вал котьмар лэсьтыны, но со номырлы ӧз лэзьы Иеговаен кусыпъёссэ лябӟытыны».

16. Кызьы анайёс мукетъёсызлы но адӟем карон возьмато?

¹⁶ Сузэръёс, мукетъёсыз но тӥлесьтыд адӟем карыны быгато. Кызьы? Малпаське, кызьы Евникалэн учырез апостол Павелэз паймытӥз. Со гожтӥз, Тимофейлэн, анаезлэн кадь ик, юн осконэз вал шуыса (2 Тим. 1:5). Нош ку Павел адӟиз солэсь осконзэ? Нырысетӥзэ пӧртэм шаеръёстӥ тодытыса ветлыкуз, со Листрае но вуылӥз. Ӵапак отын со Лоидаез но Евникаез нырысьсэ пумитаз, вылды. Ачиз Павел соослы христианъёс луыны юрттӥз, дыр (Ап. уж. 14:4—18). Табере малпаське: ог 15 ар ортчыса, Павел Тимофейлы гожтэт гожтэ но Евникалэсь осконзэ адӟем карыны косэ. Евника Павелэз но мукет христианъёсты туж паймытӥз, луоз. Соин ик, сузэръёс, тӥ пиналдэс Иеговалэн курон-косонъёсызъя огнады будэтӥськоды ке, тодады возе: тӥлесьтыд оскондэс мукетъёсыз но адӟем карыны быгато.

17. Мар кароно анайёслы, куке соос малпало, тыршемзы нокыӵе пайда уг вайы шуыса?

¹⁷ Куддыръя анайёс малпало, тыршемзы нокыӵе пайда уг вайы шуыса. Соку мар кароно? Тодады возе: нылпиосты будэтон кема кыстӥське. Кызьы возьматэмын суредын, кидыс мерттӥськомы ке, ми ум тодӥське: будоз-а со, уз-а. Но ми быгатӥськомы со вылэ ву киськаны  но сое утялтыны (Марк 4:26—29). Озьы ик анайёс но куддыръя сюлмасько, быгатозы-а соос пиналзэс дышетыны Иеговаез яратыны. Соос пиналзы понна быръён лэсьтыны уг быгато. Но анай лэсьтӥз ке ваньзэ, мае быгатэ, соку пиналызлэн Иеговалэсь сюрессэ быръемез луоз (Мад. 22:6).

18. Кызьы Иегова пиналъёстылы юрттыны быгатэ соин эшъяськыны?

¹⁸ Иегова трос егитъёсын эшъяськиз ини (Пс. 21:10, 11). Со тӥляд пиналэныды но эшъяськоз, пиналдылэн мылкыдыз луиз ке (1 Кор. 3:6, 7). Пиналъёсты Инмарлы мылзы потытэк ужало-тыршо ке но, со соосты яратэмысь уг дугды (Пс. 10:4). Пиналдылэн Иеговалы ужамез-тыршемез потӥз ке, Иегова сое адӟоз но солы юрттоз (2 Пар. 16:9; Ап. уж. 13:48, ВД). Инмар юрттоз тӥледлы пиналдылы ас дыраз тупась кылъёс вераны (Мад. 15:23). Оло нош, со кыӵе ке агайлэсь яке сузэрлэсь мылкыдзэ ӝутоз пиналдылы саклык висъяны. Будэмзы бере но Иегова пиналъёстылы тодазы вайытоз, мае соос пичи дыръязы кылӥзы вал (Иоанн 14:26). Тӥ азьланяз но пиналъёстэс кылъёсыныды но ужъёсыныды дышетӥды ке, Иегова тӥледыз бакель кароз.

19. Малы сузэръёс оскыны быгато, соос шоры учкыса, Иегова шумпотэ шуыса?

¹⁹ Дуно сузэр, пиналъёсыд кыӵе гинэ быръён медаз лэсьтэ, Иегова тонэ яратэ. Со яратэ тонэ, малы ке шуоно тон сое яратӥськод. Тон пиналъёстэ огнад будэтӥськод ке, Иегова кылзэ сётэ соослы Атай луыны, нош тыныд — Утись (Пс. 67:6). Тон уд быгатӥськы пиналъёстэ косыны Иеговалэсь сюрессэ бырйыны. Но тон Иеговалэн юрттэмезлы оскиськод ке но лэсьтӥськод ке ваньзэ, мае быгатӥськод, оскы: Иегова шумпотэ.