1-2. (a) Chi che l’era Eunisse e che dificoltà la ga infrontà? (b) Parla sora la ilustrassion dela prima pàgina.

 LA BÌBLIA no la parla come l’è stà el batésimo de Timòteo, ma semo boni de imaginar come Eunisse, la so mare, la se ga sentio in quela ora. (Pro. 23:25) Sicuro che la era drio sentir tanto orgòlio de Timòteo quando lu l’era rento l’àqua par batesarse. Ela la era tanto contenta insieme con Loide, che la era la nona de Timòteo. Intanto che Timòteo l’è ndato soto l’àqua fursi Eunisse la ga fin tegnesto el fià, e quando lu l’è vegnesto fora, fursi la ze restada tanto contenta che la ga scominsià a piander. Eunisse la ga infrontà tante dificoltà nela vita, ma la ze stata bona de insegnar el so fiol a amar a Geovà e a Gesù. Che dificoltà la ga infrontà?

² El pare de Timòteo no’l servia a Geovà come so mare. So mare e so nona le era giudee, ma so pare l’era greco. (Ati 16:1) Eunisse e Loide fursi le ze deventade dissìpole de Gesù quando Timòteo l’era un toso. Ma el pare de Timòteo no l’è deventà dissìpolo de Gesù. Come Timòteo l’era belche un toso, lu el podaria scòlier cossa che el ndaria far. Sarà che lu el ndaria drio al so pare? El seitaria a far tuto quel che el gavea imparà dei giudei? O el ndaria deventar un dissìpolo de Cristo?

3. De acordo con Proverbi 1:8, 9, cossa che Geovà el pensa sora el sforso che le mare le fà par insegnar i so fioi?

³ La mare che la serve a Geovà la ama tanto la so fameia  e la vol che anca i so fioi i sìpia amighi de Geovà. Sicuro che Geovà ghe dà tanto valor al sforso che queste sorele le fà par insegnar i so fioi sora lu. (Ledi Proverbi 1:8, 9. b) E Geovà anca ghe giuta a farlo.

4. Che dificoltà arquante mare le infronta?

⁴ Sicuro che una mare la seita a preocuparse se i so fioi i ndarà servir a Geovà come Timòteo. I genitori i sa che ghe fà fadiga ai gióveni infrontar el mondo de Sàtana. (1 Pie. 5:8) E pol esser che una mare la ga de slevar su i so fioi ela sola o col so sposo che no’l serve mia a Geovà. Par esémpio, la sorela Christine c la ga dito: “Me omo l’era tanto bravo coi nostri fioi, ma lu no’l volea che lori deventesse Testimònie de Geovà. Mi piandea tanto e restea preocupada se me fioi i ndaria servir a Geovà o nò.”

5. Cossa che ndaremo veder in questo stùdio?

⁵ Le mare le pol giutar i so fioi a amar e a servir a Geovà compagno Eunisse la ga fato. In questo stùdio, ndaremo veder come che lore le pol far compagno a Eunisse e come che le pol insegnar i so fioi par meso de quel che le parla e le fà. Ndaremo anca veder come Geovà el pol giutarle.

6. De acordo con 2 Timòteo 3:14, 15, cossa ga giutà Timòteo a deventar un dissìpolo de Gesù?

⁶ Quando Timòteo l’era picinin, Eunisse la ga fato el meio che la podea par insegnarghe sora le Scriture. Ela la ghe ga insegnà le Scriture de acordo con quel che la religion dei giudei la disea, parché no la savea gnancora gnente sora Gesù. Anca cossita, quel che Timòteo el ga imparà lo giutaria a deventar un dissìpolo de Gesù. Ma sarà che quando Timòteo el gavesse la età par scòlier deventar un dissìpolo de Gesù el ndaria farlo? Quel che Eunise ghe ga insegnà lo ga giutà a esser sicuro de quel che l’era drio imparar sora Gesù. (Ledi 2 Timòteo 3:14, 15. d) Sicuro che Eunisse la ze restada tanto contenta parché la ga insegnà el so fiol a amar a Geovà anca cole dificoltà. La parola Eunisse la vol dir “esser brava de”. Alora, podemo dir che Eunisse la ze stata brava de giutar so fiol a amar a Geovà.

7. Cossa Eunisse la podea far par giutar Timòteo anca dopo del batésimo?

⁷ Timòteo el ga volesto batesarse, e questa la ze stata una dessision tanto importante. Ma la so mare ancora la restea preocupada con quel che lu el ndaria far dopo. Fursi la se domandesse: ‘Come che Timòteo el va doperar la so vita? Sarà che lu el gavarà bruti amighi? Lu el ndarà studiar nela cità de Atena e ndarghe drio a quel che studiosi i dise? O sarà che el ndarà doperar tuto el so tempo e la so forsa par guadagnar soldi?’ L’è vera che Eunisse no la podea scòlier cossa el so fiol ndaria far, ma la podea giutarlo. Come? Ela la podea sforsarse tanto par giutar Timòteo a amar cada volta de pi a Geovà e a dar valor a tuto quel che Gesù el gavea fato. Come ghemo belche visto,  pol esser fadiga insegnar i fioi a servir e a amar a Geovà quando una mare la serve a Geovà ela sola. Ma anca i genitori che i serve a Geovà insieme i infrontà dificoltà par farlo. Alora cossa i genitori i pol imparar del esémpio de Eunisse?

8. Come una mare la pol giutar el so omo a insegnar i fioi sora Geovà?

⁸ Stùdia la Bìblia coi to fioi. Geovà el vol che la mare la giute el so omo a insegnar ai so fioi. Par esémpio, la pol giutarlo a far la adorassion in fameia. Come che la pol farlo? La pol mostrar che la ze premosa par far el stùdio in fameia e pensar in bele maniere de farlo. Fursi la pol anca giutar el so omo a pensar cossa studiar cola fameia. E se un dei fioi el ga belche la età par studiar el libro Te pol viver felice par sempre!, la pol giutar el so omo a farlo.

9. Cossa che pol giutar una mare che la sleva i so fioi ela sola?

⁹ Fursi una mare la ga de far el stùdio dela Bìblia ai so fioi, parché no la ga el omo o parché el so omo no’l serve a Geovà. Se questo l’è drio suceder con ti, no stà restar massa ansiosa parché Geovà el ndarà giutarte. Dopera le robe che la organisassion la ga par studiar la Bìblia coi to fioi. Te pol anca domandar a bravi genitori come che lori i ze drio doperarle nela adorassion in fameia. e (Pro. 11:14) Prega a Geovà e domanda che el te giute a cognosser el cuor dei to fioi e a capir quel che lori i sente e i pensa. (Pro. 20:5) Te pol anca domandarghe: ‘Cossa sito drio infrontar nela scola?’. Domande cossita pol giutarte a ciacolar de pi coi to fioi.

10. Cossa che ancora te pol far par giutar i to fioi a imparar sora Geovà?

¹⁰ Parla sempre che te pol sora Geovà ai to fioi. Parla sora Geovà e sora tute le robe bone che el ga belche fato par ti. (Deu. 6:6, 7; Isa. 63:7) L’è ancora pi importante farlo se no te pol mia studiar la Bìblia coi to fioi. L’era questo che sucedea con Christine. Varda cossa che la ga dito: “L’era poche volte che mi podea parlar sora Geovà ai me fioi. Alora, quando camineino o ndeino a spasso, mi sempre parlea sora quel che Geovà el gavea creà e sora altre robe che li giutaria a esser so amighi. E quando i me fioi i ze vegnesti pi grandi, li go incoraià a studiar la Bìblia lori soli.” Le mare le ga anca de parlar robe bone sora la organisassion de Geovà e sora i fradei. Alora, no stà mia parlar mal dei ansiani. Ricòrdate che quel che te parli ai to fioi ndarà giutarli a domandar el aiuto dei ansiani quando ghe ocore, o nò.

11. De acordo con Tiago 3:18, parché che l’è importante giutar la fameia a viver in pace?

¹¹ Giuta la to fameia a viver in pace. Sfòrsate par mostrar al to omo e ai to fioi che te li ami. Mostra rispeto e bontà al to omo e insegna i to fioi a far compagno. Cossita, ghen sarà pace nela vostra fameia e sarà pi fàcile insegnar sora Geovà ai vostri fioi. (Ledi Tiago 3:18. f) Varda el esémpio de Jozsef che l’è pioniero spessial nela Roménia. El so pare el ga proà intrigar lu, i so fradei e la so mare de servir a Geovà. Jozsef el ga dito: “La me mama la volea tanto che vivessino in pace. Quando el nostro pare el proea intrigarne de far qualcossa par Geovà, la  me mare la ghe mostrea sempre tanta bontà. Quando la vedea che no erino drio rispetarlo e obedirlo, la ne mostrea Efesi 6:1-3. Ela anca la parlea sora le bele qualità del nostro pare e la ne giutea a capir che l’era tanto importante amarlo e rispetarlo. Par quela che ghen’era pace là casa.”

12. De acordo con 2 Timòteo 1:5, come che el bel esémpio de Eunise ga giutà Timòteo?

¹² Ledi 2 Timòteo 1:5. g Eunisse la era un bel esémpio par Timòteo. Par esémpio, ela la ghe ga insegnà che una persona che la ga fede la ga de mostrarla. (Tiago 2:26) Sicuro che Timòteo el ga visto che la so mare la mostrea el so amor par Geovà in tuto quel che la fea. Lu el ga anca visto che la era tanto contenta de servir a Geovà. Come el bel esémpio de Eunisse el ga giutà Timòteo? Lu el ga visto el so bel esémpio e el ga volesto far compagno. Come el apòstolo Paolo el ga dito, Timòteo el ga bio una forte fede come so mare. Ancoi, tante mare anca le ze bone de insegnar i so fioi a amar a Geovà par meso del so esémpio. (1 Pie. 3: 1, 2) Come che te pol far compagno?

13. Parché che una mare la ga de far cada volta pi forte la so amicìssia con Geovà?

¹³ La roba pi importante dela to vita la ga de esser la to amicìssia con Geovà. (Deu. 6:5, 6) Se te ghè fioi, te doperi tanto del to tempo, dei to soldi e dela to forsa par tender de tuto quel che lori i ga de bisogno. Anca con tanti laori da far, te ghè de tor del to tempo par far pi forte la to amicìssia con Geovà. Come che te pol farlo? Sfòrsate de tor del to tempo par pregar a Geovà, studiar la Bìblia e ndar ale riunion. Cossita, te vè far pi forte la to amicìssia con Geovà e dar un bel esémpio par la to fameia e par i altri.

14-15. Cossa che te ghè imparà col esémpio de Leanne, Maria, e João?

¹⁴ Arquanti gióveni i ga imparà a amar e a fidarse in Geovà par via del esémpio de so mare. Varda un per de esempi. Leanne, fiola de Christine, la ga dito: “Noantri no podeino studiar la Bìblia quando me pare l’era casa. Ma la me mare la ndea sempre ale riunion. Noantri saveino poco sora la Bìblia, ma gaveino una forte fede par via del esémpio dela nostra mare. Èrino sicuri che le Testimònie de Geovà le insegnea la verità sora la Bìblia ancora prima de ndar ale riunion.”

¹⁵ Varda anca el esémpio dela sorela Maria. El so pare no’l volea che ela, so fradei e so mare i servisse a Geovà e i ndesse ale riunion. Ela la ga dito: “La me mare la ze una dele sorele pi coraiose che mi go belche cognossesto. Servir a Geovà l’è stà sempre la roba pi importante nela so vita e la ga sempre mostrà tanto coraio. Quando mi ero toseta, mi me tirea indrio de far arquante robe parché gavea paura de quel che i altri i ndaria parlar. Ma el esémpio dela me mare me ga giutà a dàrghene fora cola paura.” Varda adesso el esémpio de João. El so pare no’l assea che la so fameia la parlesse sora Geovà casa. João el ga dito: “Me ricordo fin ancoi che la me mare la volea far tuto quel che la podea par assar me pare contento. Ma una roba che mai la ndaria far l’era fermarse de servir a Geovà.”

16. Come el esémpio de una mare el pol giutar i altri?

 ¹⁶ Se te sì mare, ricòrdate che el to bel esémpio pol giutar tanto i altri. Varda come el esémpio de Eunisse el ga incoraià el apòstolo Paolo. Lu el ga dito che Timòteo el gavea una vera fede par via del esémpio de Eunisse. (2 Tim. 1:5) Quando che Paolo el ga visto che Eunisse la gavea una forte fede? Fursi l’è stà quando el ga cognossesto ela e Loide in Listra nel so primo viaio par predicar e incoraiar le congregassion. E pol esser anca che lu el ga giutà queste done a deventar dissìpole de Cristo. (Ati 14:4-18) Quando Paolo el ga scrito a Timòteo intorno de 15 ani dopo, lu ancora el ga parlà del bel esémpio de fede de Eunisse. Sicuro che el esémpio de Eunisse ga incoraià el apòstolo Paolo e tanti altri fradei de quela època. Alora, se te ghè de slevar ti sola i to fioi o se el to omo no’l serve mia a Geovà, ricòrdate che el to bel esémpio pol incoraiar tanto i altri.

17. Cossa che te ghè de far se te pensi che el to fiol no’l vol pi imparar sora Geovà?

¹⁷ Fursi te te ghè sforsà tanto par insegnar i to fioi sora Geovà, ma te par che lori no i vol mia imparar sora lu. Alora cossa pol giutarte? Te ghè de ricordarte che ghe mete tempo par insegnar un fiol. La medèsima roba la sucede quando te pianti una semensa. Anca che no te sàpia se la ndarà butar e dar fruti, te seiti a darghe  àqua. (Mar. 4:26-29) Fursi te te domandi se quel che te sì drio far par el to fiol l’è pròpio drio giutarlo a amar e a servir a Geovà. L’è vera che no te pol far le scólie nel posto del to fiol, ma se te seiti a farlo te podarè giutarlo a esser un amigo de Geovà. — Pro. 22:6.

18. Come Geovà el pol giutar i to fioi a deventar so amighi?

¹⁸ Geovà el ga belche giutà tanti gióveni a deventar so amighi. (Sal. 22:9, 10) E se el to fiol el vol pròpio, Geovà el pol giutar anca lu. (1 Cor. 3:6, 7) Anca se te pensi che el to fiol no’l vol servir a Geovà, Geovà el seitarà a amarlo. (Sal. 11:4) E quando lu el mostra sol un pochetin de voia de imparar sora Geovà, lu el volerà giutarlo. (Ati 13:48; 2 Cró. 16:9) Geovà el pol anca giutarte a parlar al to fiol quel che ghe ocore nela ora giusta. (Pro. 15:23) Lu el pol anca doperar un fradel o una sorela par giutar el to fiol. Anca quando el vien grando, Geovà el pol giutarlo a ricordarse de una roba che lu el ga imparà quando l’era pi gióveno. (Gioani 14:26) Sicuro che Geovà el ndarà benedirte tanto se te seiti a insegnar i to fioi par meso de quel che te parli e de quel che te fè.

19. Parché te pol esser sicura che Geovà el te ama e l’è contento con ti?

¹⁹ L’è vera che no te sè se i to fioi i ndarà scòlier servir a Geovà. Ma te ghè de ricordarte che Geovà el te ama parché ti te lo ami e no par via dele scólie dei to fioi. Se te slevi ti sola i to fioi, Geovà el promete che el sarà un Pare par lori e che el ndarà darte la protession che te ghè de bisogno. (Sal. 68:5) Alora, se te seiti a fidarte nel aiuto de Geovà e a far el to meio par servirlo, te assarè Geovà tanto contento.