1-2. (a) Eunisi aari taani, ni maxupo heeni owo ovirihaawe ntoko maaye? (b) Mukomentari moovarihana ni elataratho ya vakaapani.

 BIBLYA khanthaliha moota waaraaya obatizo wa Timotheyo. Mene khoiyono wooxupa wuupuwelela moota yaaraya amayawe ni amunnawe Timotheyo. (Mir. 23:25) Nkamuupuweleni Eunisi moota aahakalanlaawe amoonaka Timotheyo areene mmaihini weera abatiziwe. Amayawe Timotheyo annatheya evareliweene ni amunnawe Timotheyo. Eunisi onnaittha iphumu emaara Timotheyo aanelihinwaawe mmaahini. Emaara yeeyo aakhummawe mmaahini atheyaka, amayawe khayawenre ovilela, awo yaamoriha maithori. Eunisi aakhalano maxupo mantxipale, mene owo aawera oomukhavihera omusivela Yehova ni Yesu Kristu. Maxupo heeni owo aavirihaawe?

² Timotheyo aahuuwale etthoko yaari atthu ovirikana ittiini. Apapawe yaari muGrego, amayawe ni amunnawe yaari ayuda. (Mit. 16:1) Oweharu emaara Timotheyo aaraawe mmiravo, Eunisi ni Loide yaakhala makristu—nto apapawe khayaakhanle mukristu. Tiivi yeera ekhale yoothanla ya Timotheyo? Owo aakhalano iyaakha soophwanelela weera apakeke soothanla sawe. Neereke owo aamuthanla ettiini ya apapawe? Naari aarowa othanla otthara sookhovelela sa ayuda? Kapena aarowa othanla okhala mutthareli a Yesu Kristu?

3. Moovarihana ni Miruku 1:8, 9, Yehova onuupuwela eheeni woohima sa asimaaye ootheene aniilipihera weera yaaxuttihe anamwane aya ekhaikhai?

³ Asimaaye akristu amahukwaano tho annasiveliha ni etthoko saya. Yootthunaawe ori waakhavihera anamwane aya okhalano onthamwene woolipa ni Yehova. Moohihovela, Yehova onnahela mwiitti wiilipihera waya. (Mmusome Miruku 1:8, 9.) Yehova onnaakhavihera asimaaye antxipale waaxuttiha anamwane aya omusivela yoowo ni onvarela muteko.

4. Maxupo heeni asimaaye mahukwaano anvirihaaya?

 ⁴ Mene emaara ekina asimaaye pooti wiikoha wakhala weera anamwane aya anoorowa onvarelaka muteko Yehova ntoko Timotheyo. Asitiithi aasuwela maxupo anamwane aya anvirihaaya elapo ela ya Satana. (1 Ped. 5:8) Opwaha mwa yeyo, asimaaye antxipale annaahuwa anamwane meekhaaya, naari ni aiyaya ahimulapelaka Yehova. Mwa ntakihero, murokora oneeriwa Christine * enre: “Aiyaka yaari mutthu oreera murima, ni yannasivela emusi aya. Mene awo, khayaatthuna weera naari mwanaya mmoha akhale Namoona a Yehova. Mpuwa mwa iyaakha sintxipale, miyo kanninla kiikhupanyeraka mwaha wooweera nkaasuwela wakhala weera anamwane ahu anoonvarela muteko Yehova.”

5. Eheeni ninkelaahu woona yoosoma ela?

⁵ Mwaarene maaye, nyuwo munoowera waakhavihera anamwane anyu omusivela Yehova ni onvarela muteko ntoko Eunisi. Mpuwa mwa yoosoma ela, ninkela woona moota nyuwo munkelaanyu otthara ntakihero nawe mwaaxuttihaka anamwane anyu, itthu iye munuulumaanyu ni mumpakaanyu. Nave-tho, nnimoona moota Yehova onrowaawe wookhaviherani.

6. Moovarihana ni 2 Timotheyo 3:14, 15, eheeni yaamukhavihenre Timotheyo okhala mukristu?

⁶ Emaara Timotheyo aaraawe mwaana amayawe yaapaka ele anweraaya weera emuxuttihe “soolempwa sootteela,” moovarihana ni ettiini ya ayuda. Ekhaikhai weera osuwela wawe waari vakhaaniini mwaha wooweera khaasuwenle etthu woohima sa Yesu. Naari vaareene hiiho, itthu Timotheyo aaxuttenraawe woohima sa soolepa, saamweeriha okhalano mathipelo weera akhale mukristu. Mene neereke weera owo aamukhala mukristu? Timotheyo aakhalano idaade soophwanela othanla okhala mukristu. Mweekhaikhai Timotheyo “aaxuttera” ekhaikhai woohima sa Yesu mwaha woowiilipihera wa amayawe. (Mmusome 2 Timotheyo 3:14, 15.) Eunisi aahakalala vantxipale mwaha woomuxuttiha ekhaikhai mwanawe nnamweera aakumanano maxupo! Nsina nooweera Eunisi ninwa wa masu antaphulela “conquistar.” Ni owo onnavarihana ni nsina nawe.

7. Eheeni Eunisi eeraawe apake weera amukhavihere Timotheyo obatiziwakaru?

⁷ OBatizo wa Timotheyo naari nivalo nootthuneya mwekumini mwawe. Eunisi annaxupeya ni mukhalelo wa mwanawe. Aarowa ovarela hayi muteko mahuku a ekumi awe? Neereke owo aamwaathanla asinthamwene yeera emweerihe opaka itthu soonanara? Neereke owo amurowa osoma ecidade ya w’Atena ni waakhulela sooxuttiha sa mafiloosofu? Neereke owo amuyeeha ehuhu awe ni omiravo awe atthimakelaka waasaasa musurukhu? Eunise khaarowa ompakela soothanla mwanawe. Owo anwera omukhavihera, nto aarowa omukhavihera hayi mwanawe? Owo anwera ovara muteko vantxipale weera amukhavihere mwanawe omusivela Yehova ni oxukurela itthu sootheene Yehova ni Yesu yaapankaaya weera ekhavihere emusi. Asitiithi makristu anaaxuttiha meekhaaya anamwane aya, khekhanle meekhaaya anviriha maxupo awo. Asitiithi ootheene pooti okhala mweekhaikhaini mene onkhala wooxupa waavara murima anaaya weera awo-tho envareleke muteko Yehova. Eheeni asitiithi anxutteraaya ni ntakihero na Eunisi?

8. Moota heeni maaye mukristu onrowaawe waakhavihera aiyawe ari mwekhaikhaini waaxuttiha anamwane woohima sa Yehova?

⁸ Mmusomeke Biblya ni anamwane anyu. Yehova ontthuna weera athiyana akristu  yaakhavihereke asiiyaya waaxuttiha anamwane aya ekhaikhai. Moota woopaka eyo ori okhavihera ehuhu ya omulapela Muluku vatthokoni. Muulumeke woohima sa olapela wa vatthokoni moohakalala, ni mweerereke opaka etthu weera ehuhu ele ekhaleke yoohakalaliha. Araaya nyuwo pooti waakhavihera aiyinyu oreherera etthu munrowaanyu othokorora yoosoma ya vatthokoni. Opwaha mwa yeyo, pooti okhala wooreera wa anamwene anyu akina arinono idaade soophwanelela waasomiha Biblya nvarelaka muteko eliivuru Mukhaleno ekumi yoohimala! Nto nyuwo ni aiyinyu pooti ovara wamoha weera mwaakhavihere anamwane anyu.

9. Asimaaye anaahuwa anamwane meekhaaya mweekhaikhaini, ankela ophwanya woowini nikhavihero?

⁹ Asimaaye akina onnatthuneya omusoma Biblya ni anamwane aya, mwaha wooweera anaahuwa anamwane meekhaaya, naari mwaha wooweera aiyaya khaiyono mukristu. Wakhala weera eyo ennaweereelani muhixupeye, Yehova onimookhaviherani. Nvareleke muteko ikaruma nivahiwaahu muteko sa mareherero a Yehova weera musome ni anamwane anyu. Nyuwo-tho, pooti waakoha asitiithi akina arinono sookumanano moota anvarihelaaya muteko ikaruma iyo? * (Mir. 11:14) Munvekeleke Yehova, nvekaka weera ookhavihereni osuwela mirima sa anamwane anyu ni osuwela itthu anuupuwelaaya. (Mir. 20:5) Mwaapakelaka nikoho ntoko nla ‘etthu heeni enooxupani oxikola?’ Nikoho nna pooti ohula ephiro weera mutthekule vantxipale.

10. Eheeni nyuwo munkelaanyu opaka weera mwaakhavihere anamwane anyu oxuttera woohima sa Yehova?

¹⁰ Muttottele mureerelo ehuhu anyu weera mwaaxuttihe anamwane anyu woohima sa Yehova. Muulumeke woohima sa Yehova ni itthu owo oopakenlaaweni. (Ol 6:6, 7; Yes. 63:7) Eyo etthu yootthuneya wakhala weera yookhala etthu enawootxeelihani omusomiha mwaninyu Biblya. Christine oromoliwe woopatxerani ohimme ha: “Miyo kaakhalanne eparakha vakhaaniini weera kuulume ni anaaka woohima sa Yehova. Mwa yeeyo, miyo kannattottela mureerelo ehuhu kaakhalaakano. Emaara yeeyo kaakuxaaka nrowaka weettakasa kannakhalano eparakha yoowaaxuttiha woohima sa Soopattuxiwa sa Yehova ni itthu ikina sa omunepani. Anamwanaaka yunnuwakaru kaawooperera weera emusomeke Biblya meekhaaya.” Ni onnatthuneya owuuluma nnene asinna a mmulokoni ni mareherero a Yehova. Muhiwuulumeke moonanara asitokweene a mmulokoni. Etthu nyuwo munuulumaanyu woohima sa asitokweene a mmulokoni pooti waakhavihera anamwane anyu waasa nikhavihero wa asitokweene awo kapena hooye, yaatthunaka.

11. Moovarihana ni Yakobe 3:18, mwaha wa heeni oraaya wootthuneya oruuhela murettele vatthokoni?

¹¹ Mukhalihe murettele vatthokoni vanyu. Mpakeke ele munweraanyu weera, nwoonihere anamwene anyu ni aiyinyu weera munnasivela. Muulumeke ni aiyinyu moowareerela murima ni nttittimiho, nave-tho, mwaaxuttiheke anamwane anyu opaka emoha-moharu. Weera haawo, munnaruhela murettele ni onimookhweelani waaxuttiha anamwane anyu woohima sa Yehova. (Mmusome Yakobe 3:18.) Moone ntakihero na Jozsef, yoowo onvara muteko wa opiyoneiro oRomenia. Apapawe yannapaka ele yaaweraaya weera owo, amayawe ni asinnawe ehinvareleke muteko Yehova. Jozsef ohimme ha: “Amaaye, yahiilipihera vantxipale weera nikhaleno murettele owaani. Emaara yeeyo apapa yaatepaaya oxupiha itthu, amaaye yannapaka itthu mooreera murima. Nto emaara awo yoonelenlaaya weera  kannaattittimiha apapa, awo yannuuluma ni hiyo woohima sa Aefeso 6:1-3. Avinyaka yannuuluma mikhalelo sooreera apapa yaaraayano ni yannanikhavihera woona mwaha wa heeni waaraaya wootthuneya waattittimiha ni waasivela. Mwa yeeyo, hiyo nannakhalano murettele owaani.”

12. Moovarihana ni 2 Timotheyo 1:5, ntakihero na Eunisi naamukhavihenre hayi Timotheyo?

¹² Mmusome 2 Timotheyo 1:5. Eunisi aanvaha ntakihero nooreera Timotheyo. Aamuxuttiha Timotheyo weera nroromelo neekhaikhai nooneya ni miteko. (Yak. 2:26) Timotheyo ahoona weera miteko sa amayawe, seettiihiwa ni nsivelo noolipa yaakhalannaaya ni Yehova. Ni owo, annawera woona weera amayawe yaari oohakalala mwaha wooweera yaannanvarela muteko Yehova. Ntakihero na Eunisi namokhavihenre hayi Timotheyo? Ntoko murummwa Paulo ohimmaawe, Timotheyo aakhalano nroromelo noolipa ntoko naamayawe. Eyo khaiyono etthu yaasa weereya. Timotheyo aatthara ntakihero naamayawe. Emoha-moharu, asimaaye antxipale a mahukwaano annaaxuttiha anamwane aya woohima sa Yehova “yaavahaka ntakihero.” (1 Ped. 3:1, 2) Nyuwo pooti opaka etthu emoharu. Moota heeni?

13. Eheeni maaye otthuneeyaawe opaka weera alipihe onthamwene awe ni Yehova?

¹³ Muheleke nipuro noopatxera onthamwene anyu ni Yehova. (Ola. 6:5, 6) Ntoko asimaaye akina, nyuwo munniilipihera weera mukhosoope sootthuna sa weerutthuni sa anamwane anyu. Nyuwo munnawera oleva ikuru sanyu, musurukhu ni ikhove. Naari mwaatteliwaka miteko, nyuwo munnatthuneya wiisunkera ehuhu weera mulipihe onthamwene anyu ni Yehova. Muhihiyerere ovekela, omusoma Biblya ni woonela mithukumano. Mweera haawo, nyuwo munoolipiha onthamwene anyu ni Yehova, ni munoovaha ntakihero nooreera watthokoni ni atthu akina.

14-15. Eheeni nyuwo muxuttenraanyu ni ntakihero na Leanne, Maria, ni João?

¹⁴ Nwehe ntakihero na amiravo akina yaaxuttenre omusivela Yehova ni omuroromela mwaha wooweha ntakihero na asimayaya. Leanne mwanawe Christine ohimme ha: “Nkaawera omusoma Biblya apapa ereene owaani. Mene amaaye yaari oororomeleya khayatxompela mithukumano. Nkaasuwenle itthu sintxipale woohima sa Biblya. Mene naari vaari hiiho, khaakhalano nroromelo noolipa, mwaha woowoona ntakihero naya. Naasuwela weera Anamoona a Yehova yaakhalano ekhaikhai nihinnakuve opatxera woonela mithukumano.”

¹⁵ Murokora oneeriwa Maria, aakhala ni apapawe yaari namavaanyiha ni khayaatthuna weera emusi aya yooneleke mithukumano. Maria onahima ha: “Amayaka murokora oolipa murima kimusuwenlaaka. Emaara karaaka mwaana kannoova opaka etthu, koovaka etthu atthu akina yaarowaaya ohima. Mene woona olipa murima wa amayaka ni woona moota yaamuhelaaya nipuro noopatxera Yehova, waakhikhavihera ohiwoova atthu.” João, aakhalano apapawe yaawo yaakhottihera etthoko wuuluma itthu soomunepani owannyaya, owo oneera: “Etthu yaatepa okitikiniha yaari yooweera, amaaye yannapaka ele yaaweraaya weera yahakalalihe apaapa—ehihiyaka onvarela muteko Yehova.”

16. Etthu heeni eneera ekhumelele mwaha wa ntakihero nooreera na asimaaye?

¹⁶ Asimaaye, musuweleke weera ntakihero nanyu ninnavoleela atthu akina. Moota heeni? Moone ntakihero na Eunisi moota naamukhavihenraaya murummwa Paulo. Owo olempe weera nroromelo na Timotheyo ‘aapatxenre  woonihera ti . . . Eunisi.’ (2 Tim. 1:5) Yaari ehuhu heeni Paulo oonelenlaawe weera Eunisi aakhalano nroromelao noolipa? Oweharu, yaari ekwahaawe yoopatxera ya omisionariyu amusuwenlaawe Loidi ni Eunisi oListra, apaale aahaakhavihera athiyana ala okhala makristu. (Mit. 14:4-18) Nkuupuwelani nnene etthu ela, seera sivinreene iyaakha 15—Paulo amulepenlaawe Timotheyo—nlelo owo era uupuwelelaka nroromelo na Eunisi nave-tho annamoona Eunisi okhala ntakihero nooreera otthariwa! Ntakihero na Eunisi naamulipiha vantxipale murummwa ni akristu antxipale yaakhala ehuhu ele. Waari weera nyuwo munnaahuwa anamwane anyu meekhaanyu, naari atthu a vate vanyu kaakhanle mweekhaikhaini, muupuweleke ela: ntakihero na nroromelo nanyu, ninnaalipiha atthu akina.

17. Munaapake eheeni moonelela weera mwaninyu khasimmusivela itthu soomunepani?

¹⁷ Nnaamweera nyuwo mwiilipiheraka, ankha mwaninyu aahitthunaka otthara mikhalelo sa omunepani? Musuweleke weera omuxuttiha mwaana entthuneya ehuhu. Ntoko enooniharaaya elataratho, vaavawo mutthu onaalaawe mmiso, khansuwela wakhala weera mwiri owo onimwiima kapena hooye. Nave khansuwela wakhala weera mwiri onimunnuwa kapena hooye, naamwi vareene hiiho, owo onnavirelela ohelela. Nave, owo onnapaka ele onweraawe weera mwiri owo wunnuwe. (Mar. 4:26-29) Emoha-moharu, emaara ekina maaye pooti wiikoha wakhala weera wiilipihera wawe onnamukhavihera mwanawe. Nyuwo khamunsuwela wakhala weera onoothanla onvarala muteko  Yehova naari hooye. Mene nyuwo wakhala weera munnapaka ele munweraanyu weera anamwene anyu exuttere eekhaikhai, munoowera waakhavihera wuunuwa moomunepani.—Mir. 22:6.

18. Yehova onkela waakhavihera hayi anamwane anyu wunnuwa moomunepani?

¹⁸ Yehova ohaakhavihera amiravo antxipale okhala asinthamwene awe. (Nsal. 22:9, 10) Wakhala weera mwaninyu onimwaakhulela, Yehova tho onoomukhavihera wunnuwa moomunepani. (1 Akor. 3:6, 7) Pooti nyuwo moonaka weera mwaninyu khemmusivela ekhaikhai, mene Yehova khanhiya omusivela. (Nsal. 11:4) ‘Otthuna’ wanyu onvarela muteko Yehova ni wiilipihera wanyu, Yehova onoomokolela ntata nawe weera amukhavihere. (Mit. 13:48; 2 Sow. 16:9) Yehova pooti wookhaviherani ohima etthu yoonvara murima ehuhu—mwaniyu onhawelaawe wiiwa etthu eyo. (Mir. 15:23) Nave Yehova tho, pooti onvarela muteko munna naari murokora weera amukhavihere mwaninyu. Nnaamwera anamwaniinyu yunnunweene, Yehova pooti waakhavihera wuupuwelela itthu seiyo nyuwo mwaaxuttihaanyu ereene anamwane. (Yoh. 14:26) Moohihovela, Yehova onimooreelihani mwavirelela waaxuttiha anamwane anyu ni masu ni miteko.

19. Mwaha wa heeni muntthuneyaanyu ororomela weera Yehova onnoosivelani ni onnawaakhulelani?

¹⁹ Nsivelo Yehova okhalannaawe ni nyuwo, khaninlipa ni ele anamwane anyu anthanlaaya. Yehova onnoosivelani mwaha wooweera nyuwo munnamusivela. Mwaahuwaka anamwane meekhanyu, muroromeleke weera Yehova onookhala asitithaya ni onoorowa wookosoopani. (Nsal. 68:5) Khamunwera osuwela wakhala weera anamwane anyu anonvarela muteko Yehova kapena hooye. Mene nyuwo mwavirelela ororomela nikhavihero na Yehova ni opaka ele munweraanyu, mweekhaikhai nyuwo munimwaakhuleliwa ni Yehova.