1-2. (a) Hin-o hi Eunice, ngan ano nga kakurian an iya gin-atubang sugad nga nanay? (b) Komentuhi an piktyur ha kobre.

 BISAN kon diri ginsusumat han Biblia an pagbawtismo kan Timoteo, maiimadyin naton an kalipay han iya nanay nga hi Eunice hito nga adlaw. (Prob. 23:25) Imadyina kon ano hiya ka-proud samtang ginkikita hi Timoteo nga natindog ha tubig nga tubtob hawak an kahilarom. Nahiyom hiya samtang an lola ni Timoteo nga hi Loida natindog sapit niya ngan ginkakaptan hiya. Naginhawa hiya hin hilarom samtang gintutunlob hi Timoteo. Daku an tunog han pagtapsik han tubig paggawas ni Timoteo nga may daku nga hiyom, ngan waray na mapugngi ni Eunice an iya mga luha. Bisan kon makuri, naglampos hi Eunice pagtutdo ha iya anak nga higugmaon hi Jehova ngan an Iya Anak, hi Jesu-Kristo. Ano nga mga kakurian an kinahanglan niya malamposan basi makaabot hito nga takna?

² Diri magkapariho hin relihiyon an mga kag-anak ni Timoteo. Griego an iya tatay, ngan mga Judio an iya nanay ngan lola. (Buh. 16:1) Posible nga tin-edyer hi Timoteo han nagin Kristiano hira Eunice ngan Loida. Pero waray magin Kristiano an iya tatay. Ano an pipilion ni Timoteo? Posible nga aada na hiya ha sakto nga edad ha paghimo han iya kalugaringon nga desisyon. Pipilion ba niya an relihiyon han iya tatay? Susundon ba niya an mga tradisyon han mga Judio nga igintutdo ha iya tikang ha kabata? O magigin disipulo ba hiya ni Jesu-Kristo?

3. Sumala ha Proberbios 1:8, 9, ano an panhunahuna ni Jehova ha ginbubuhat han mga nanay basi buligan an ira mga anak nga magin iya mga sangkay?

³ Hinigugma liwat han Kristiano nga mga nanay yana an ira pamilya. Labaw ha ngatanan, karuyag nira buligan an ira mga anak  nga magkaada duok nga pakigsangkay kan Jehova. Ngan gin-aapresyar gud han aton Dios an ira mga pangalimbasog. (Basaha an Proberbios 1:8, 9.) Damu na nga nanay an gin-giyahan ni Jehova samtang ginbubuligan nira an ira mga anak nga karawaton an kamatuoran.

4. Ano nga mga kakurian an gin-aatubang han mga nanay yana?

⁴ Natural la nga maghunahuna usahay an usa nga nanay kon pipilion ba han iya mga anak nga mag-alagad kan Jehova, pariho han ginbuhat ni Timoteo. Maaram an mga kag-anak kon ano kadaku nga presyur an gin-aatubang han ira mga anak ha kalibotan ni Satanas. (1 Ped. 5:8) Dugang pa, damu nga nanay an nakukurian ha pagpadaku han ira mga anak kay waray hira bana, o kon may bana man diri nagsisingba kan Jehova. Pananglitan, an sister nga hi Christine * nagsiring: “Maopay nga tatay ngan makipamilya an akon bana, pero nadiri gud hiya nga padakuon ko an amon mga anak nga magin mga Saksi ni Jehova. Damu ka beses ako nga nagtangis ha paglabay han mga tuig, kay naghuhunahuna ako kon an akon ba mga anak magsisingba kan Jehova.”

5. Ano an aton hihisgotan hini nga artikulo?

⁵ Kon Kristiano ka nga nanay, mahimo ka magin malampuson pariho kan Eunice. Hini nga artikulo, hihisgotan naton kon paonan-o mo masusubad an iya ehemplo ngan matutdoan an imo mga anak pinaagi ha imo ginsisiring ngan ginbubuhat. Hihisgotan liwat naton kon paonan-o ka bubuligan ni Jehova.

6. Sugad han iginpapakita ha 2 Timoteo 3:14, 15, paonan-o nagin Kristiano hi Timoteo?

⁶ Han bata pa hi Timoteo, ginhimo han iya nanay an iya pinakamaopay basi tutdoan hiya han “baraan nga mga sinurat,” uyon ha pagsabot hito han mga Judio. Syempre, limitado la an iya kahibaro kay waray hiya hinbabaroan mahitungod kan Jesu-Kristo. Bisan pa hito, an nahibaroan ni Timoteo tikang ha Kasuratan naghatag ha iya hin maopay nga basihan nga karawaton an Kristianidad. Pero magigin Kristiano ba hiya? Sugad nga batan-on, may katungod hiya nga magpili kon magigin Kristiano ba hiya. Sigurado nga an usa nga nakabulig kan Timoteo nga ‘makombinse nga toohan’ an kamatuoran mahitungod kan Jesus amo an pangalimbasog han iya nanay. (Basaha an 2 Timoteo 3:14, 15.) Sigurado nga mapasalamaton gud hi Eunice nga natutdoan niya an iya anak mahitungod kan Jehova bisan kon makuri ito! Nagkinabuhi gud hi Eunice uyon ha iya ngaran nga nagtikang ha pulong nga nangangahulogan “magdaog.”

7. Paonan-o mabubuligan ni Eunice an iya anak nga mag-uswag katapos han iya bawtismo?

⁷ An bawtismo importante nga pitad ha kinabuhi ni Timoteo, pero diri pa tapos an kabaraka ni Eunice. Paonan-o gagamiton han iya anak an iya kinabuhi? Makikig-upod ba hiya ha magraot nga kasangkayan? Maeskwela ba hiya ha Atenas ngan kakarawaton an mga katutdoan han pagano nga mga pilosopo didto? Magpapauripon ba hiya ha karikohan ngan kakaragan an iya panahon, kusog, ngan pagkabatan-on? Diri makakadesisyon hi Eunice para kan Timoteo, kondi makakabulig hiya ha iya. Paonan-o? Maipapadayon niya an iya pangalimbasog nga ipasilsil ha iya anak an daku nga gugma kan Jehova ngan pagkamapasalamaton ha Iya Anak. Diri la an mga kag-anak nga diri tumuroo an padis an may sugad hini nga problema. Bisan an mga kag-anak nga pariho tumuroo mahimo makurian ha pagbulig ha ira mga anak nga magin matinumanon nga mga magsiringba ni Jehova. Ano an mahibabaroan  han mga kag-anak tikang ha ehemplo ni Eunice?

8. Paonan-o mabubuligan han usa nga nanay an iya tumuroo nga bana nga atamanon an espirituwal nga panginahanglan han ira mga anak?

⁸ Admi an Biblia kaupod an imo mga anak. Mga sister, kon Saksi an iyo bana, karuyag ni Jehova nga buligan mo hiya nga atamanon an espirituwal nga panginahanglan han iyo mga anak. Usa nga paagi nga mabubuhat mo ini amo an regular nga pagsuporta ha kahikayan han Pagsingba han Pamilya. Pagyakan hin positibo mahitungod hito nga kahikayan, ngan hunahunaa kon ano an imo mahihimo basi magin makalilipay ito. Bangin mabuligan mo an imo bana ha pagplano hin espesyal nga activity o proyekto han pag-aram ha Biblia. Labot pa, kon an pipira han iyo mga anak aada na ha sakto nga edad para magpahimulos hin personal nga pag-aram ha Biblia ha libro nga Mabuhi hin Malipayon ha Waray Kataposan!, bangin mabuligan mo an imo bana ha pag-Bible study ha ira.

9. Diin makakabiling hin bulig an usa nga nanay nga diri tumuroo an bana?

⁹ An iba nga nanay kinahanglan manguna ha pag-Bible study ha ira mga anak, tungod kay solo hira nga kag-anak o tungod kay diri tumuroo an ira bana. Kon ito an kahimtang ha iyo pamilya, ayaw sobra nga kabaraka. Bubuligan ka ni Jehova. Gamita ha pag-Bible study ha imo mga anak an epektibo nga mga garamiton ha pagtutdo nga iya igintagana pinaagi han iya organisasyon. Mahimo mo pakianhan an iba nga eksperyensyado nga mga kag-anak kon paonan-o nira ito ginagamit ha ira pagsingba han pamilya. * (Prob. 11:14) Hi Jehova makakabulig liwat ha imo ha pakig-istorya ha imo mga anak. Hangyoa hiya nga buligan ka nga magamit an tama nga mga pakiana basi mahibaroan an ira ginhuhunahuna ngan gin-aabat. (Prob. 20:5) An simple nga pakiana sugad han ‘Ano an pinakadaku nga presyur nga imo gin-aatubang ha eskwelahan?’ mahimo magresulta hin mapulsanon nga pag-istorya.

10. Ano pa an imo mahihimo basi matutdoan an imo mga anak mahitungod kan Jehova?

¹⁰ Paghimo hin mga oportunidad nga matutdoan an imo mga anak mahitungod kan Jehova. Pag-istorya parte kan Jehova ngan ha damu nga mag-opay nga butang nga ginbuhat niya para ha iyo. (Deut. 6:6, 7; Isa. 63:7) Labi na nga importante ini kon diri mo regular nga naba-Bible study an imo mga anak ha iyo balay. Hi Christine, nga gin-unabi na, nagsiring: “Gutiay gud la an akon oportunidad nga ipakiistorya an espirituwal nga mga butang, salit ginsalingabot ko an bisan ano nga panahon nga kaupod ko hira. Namamasyada kami o nasakay ha baluto basi pag-istoryahan an mag-opay nga linarang ni Jehova ngan an damu nga espirituwal nga butang. Han dagku na an akon mga anak, gin-aghat ko hira nga maglugaring pag-aram ha Biblia.” Dugang pa, pagyakan hin positibo mahitungod ha organisasyon ni Jehova ngan ha kabugtoan. Ayaw pagin kritiko ha mga tigurang. An imo ginsisiring parte ha ira makakabulig ha imo mga anak nga dumaop ha ira ha mga panahon han panginahanglan.

11. Sumala ha Santiago 3:18, kay ano nga importante nga bumulig nga matipigan an kamurayawan ha pamilya?

¹¹ Bulig nga matipigan an kamurayawan ha pamilya. Pirme ipakita ha imo bana ngan ha imo mga anak nga hinigugma mo hira. Pag-istorya mahitungod ha imo bana ha buotan ngan matinalahuron nga paagi, ngan i-train an imo mga anak nga buhaton liwat ito. Kon ginbubuhat mo ini, ginhihimo mo nga mamurayawon an kahimtang salit mas masayon para ha  ira nga mahibaro parte kan Jehova. (Basaha an Santiago 3:18.) Pansina an ehemplo ni Jozsef, usa nga espesyal payunir ha Romania. Samtang nagtutubo hiya, nakurian gud hira han iya nanay ngan kabugtoan nga mag-alagad kan Jehova tungod han iya tatay. Siring ni Jozsef: “Nangalimbasog gud hi Nanay nga himoon nga mamurayawon an amon pamilya. Kon nagigin mas mapintas hi Tatay, nagigin mas buotan hi Nanay. Kon napapansin niya nga nakukurian kami pagrespeto ngan pagsugot kan Tatay, ginhihisgotan niya ha amon an Efeso 6:1-3. Katapos, ginsusumatan niya kami han mag-opay nga kalidad ni Tatay ngan ginbubuligan kami nga masabtan kon kay ano nga angay namon hiya higugmaon. Damu nga tensyonado nga sitwasyon an iya napakalma hito nga paagi.”

12. Sumala ha 2 Timoteo 1:5, ano an epekto kan Timoteo han ehemplo ni Eunice?

¹² Basaha an 2 Timoteo 1:5. Hi Eunice nagpakita hin maopay nga ehemplo kan Timoteo. Sigurado nga gintutdoan niya hiya nga an tinuod nga pagtoo nag-uupod hin mga buhat. (San. 2:26) Waray ruhaduha nga nakita ni Timoteo nga an mga buhat han iya nanay resulta han iya marig-on nga gugma kan Jehova. Sigurado nga nakita ni Timoteo nga an pag-alagad kan Jehova nakapalipay ha iya nanay. Ano an epekto kan Timoteo han ehemplo ni Eunice? Sugad han gin-unabi ni apostol Pablo, hi Timoteo may pagtoo pariho ha iya nanay. Diri ini kay basta la nahitabo. Naobserbaran ni Timoteo an iya ehemplo ngan napagios nga subaron ito. Sugad man yana, damu nga nanay, bisan “waray pulong,” an nakabulig ha ira mga kapamilya nga mag-alagad kan Jehova. (1 Ped. 3:1, 2) Mahihimo mo liwat ito. Paonan-o?

13. Kay ano nga dapat iprayoridad han usa nga nanay an iya relasyon kan Jehova?

¹³ Iprayoridad an imo relasyon kan Jehova. (Deut. 6:5, 6) Pariho han kadam-an nga nanay, damu an imo ginhihimo nga sakripisyo. Iginsasakripisyo mo an imo panahon, kwarta, katurog, ngan an iba pa nga butang basi maataman an pisikal nga panginahanglan han imo mga anak. Pero diri ka gud dapat magin sobra ka-busy ha pag-ataman hito nga mga panginahanglan nga mapapabay-an mo na an imo relasyon kan Jehova. Regular nga maghatag hin panahon para ha personal nga pag-ampo, pag-aram ha Biblia, ngan pag-atender ha mga katirok. Ha pagbuhat hito, mapaparig-on mo an imo espirituwalidad ngan magigin maopay ka nga ehemplo ha imo pamilya ngan ha iba.

14-15. Ano an imo nahibaroan tikang ha ehemplo nira Leanne, Maria, ngan João?

¹⁴ Aadi an pipira nga ehemplo han mga batan-on nga nahibaro paghigugma kan Jehova ngan pagsarig ha iya pinaagi ha pag-obserbar ha ira nanay. An anak nga babaye ni Christine nga hi Leanne nagsiring: “Diri kami nakakag-Bible study kon aada hi Tatay ha balay. Pero hi Nanay pirme gud naatender ha mga katirok. Bisan kon kulang kami hin kahibaro ha Biblia, an iya ehemplo nakabulig ha amon nga magkaada marig-on nga pagtoo. Maiha pa antes kami makaatender hin mga katirok, maaram na kami nga ini an kamatuoran.”

¹⁵ Hi Maria, nga an tatay usahay nagsisirot ha pamilya tungod ha pag-atender ha mga katirok, nagsiring: “An akon nanay an usa han pinakamaisugon nga mga sister nga akon kilala. Han bata pa ako, usahay may mga ginlilikayan ako nga buhaton kay nahahadlok ako ha isisiring han iba. Pero nabuligan ako nga malamposan an akon kahadlok ha tawo kay nakita ko nga maisugon gud hiya ngan pirme gin-uuna hi Jehova.” Hi João, nga an tatay nagdiri ha iya  pamilya nga mag-istorya parte ha espirituwal nga mga butang kon aada hira ha balay, nagsiring: “Bangin an nakabantad gud ha akon amo an pagin andam ni Nanay nga himoon an ngatanan para mapalipay hi Tatay basta diri la maisakripisyo an iya gugma kan Jehova.”

16. Ano an mahimo magin epekto ha iba han ehemplo han usa nga nanay?

¹⁶ Mga nanay, hinumdumi nga an iyo ehemplo may epekto ha iba. Paonan-o? Hunahunaa an epekto kan apostol Pablo han ehemplo ni Eunice. Ginkilala niya nga an diri hipokrito nga pagtoo ni Timoteo ‘nakita siyahan kan Eunice.’ (2 Tim. 1:5) Kakan-o siyahan naobserbaran ni Pablo an pagtoo ni Eunice? Posible nga nakilala niya hira Loida ngan Eunice ha Listra ha iya siyahan nga pagbiyahe sugad nga misyonero, ngan bangin nakabulig hiya ha ira nga magin Kristiano. (Buh. 14:4-18) Hunahunaa ini: Han nagsurat hi Pablo kan Timoteo​—paglabay hin mga 15 ka tuig—​nahinunumdoman la gihapon ni Pablo an pagkamatinumanon ni Eunice ngan gin-gamit hiya sugad nga ehemplo nga angay subaron! Klaro nga an iya ehemplo nakadasig gud ha apostol ngan posible ha damu pa nga Kristiano ha siyahan nga siglo. Kon ginpapadaku mo an imo mga anak nga waray ka bana o diri tumuroo an imo padis, sarig nga an imo matinumanon nga ehemplo nakakaparig-on ngan nakakadasig ha iba.

17. Ano an angay mo buhaton kon an imo anak baga hin diri nagios uyon ha imo pag-train ha iya?

¹⁷ Ano man kon an imo anak baga hin diri nagios uyon ha imo mga pangalimbasog? Hinumdumi  nga an pag-train ha usa nga bata nagkikinahanglan hin panahon. Sugad han makikita ha piktyur, kon nagtanom ka hin liso, bangin may mga panahon nga maghunahuna ka kon matubo ba ito ngan magigin tanom nga namumunga. Bisan kon diri mo kontrolado an magigin resulta, padayon nga ginsasaribohan mo ito basi mahatagan ito han pinakamaopay nga oportunidad nga tumubo. (Mar. 4:26-29) Ha pariho nga paagi, sugad nga nanay, usahay bangin maghunahuna ka kon naaabot mo ba an kasingkasing han imo mga anak. Diri mo kontrolado an ira mga desisyon. Pero kon padayon mo nga bubuhaton an ngatanan nga imo mahihimo basi i-train hira, gintatagan mo hira han pinakamaopay nga oportunidad nga mag-uswag ha espirituwal.​—Prob. 22:6.

18. Paonan-o mabubuligan ni Jehova an imo mga anak nga mag-uswag ha espirituwal?

¹⁸ Tikang pa ha panahon han Biblia, damu na nga batan-on an ginbuligan ni Jehova nga magin sangkay niya. (Sal. 22:9, 10) Mabubuligan liwat niya an imo mga anak nga mag-uswag ha espirituwal kon ito an ira karuyag. (1 Cor. 3:6, 7) Bisan kon an imo mga anak baga hin nahisisimang, padayon nga hihigugmaon hira ni Jehova. (Sal. 11:4) Kon magpapakita hira han pinakagutiay nga tigaman han pagkaada “husto nga disposisyon,” andam hiya bumulig ha ira nga magin iya sangkay. (Buh. 13:48; 2 Cron. 16:9) Mahimo ka niya buligan nga iyakan an tama nga butang ha panahon nga kinahanglan gud ito mabatian han imo mga anak. (Prob. 15:23) O mahimo niya pagiuson an usa nga mahigugmaon nga brother o sister ha kongregasyon basi magpakita hin espesyal nga atensyon ha ira. Bisan kon an imo mga anak magin adulto na, mahimo ipahinumdom ha ira ni Jehova an usa nga butang nga igintutdo mo ha ira hadto. (Juan 14:26) Kon padayon mo nga ginti-train an imo mga anak pinaagi han imo ginsisiring ngan han imo ehemplo, gintatagan mo hi Jehova hin damu nga rason nga bendisyonan ka.

19. Kay ano nga makakasiguro ka nga may-ada ka han pag-uyon ni Jehova?

¹⁹ An gugma ni Jehova ha imo diri nakadepende ha mga desisyon han imo mga anak. Hinigugma ka niya kay hinigugma mo hiya. Kon solo ka nga kag-anak, nagsasaad hi Jehova nga magigin Tatay hiya ha imo mga anak ngan Parapanalipod ha imo. (Sal. 68:5) Diri mo kontrolado kon hihimoon ba han imo mga anak an tama nga desisyon o diri. Pero kon padayon ka nga masarig ha bulig ni Jehova ngan bubuhaton an imo pinakamaopay, makakarawat mo an iya pag-uyon.