ALATIKE AKO 17
Kotea Te ʼu Ako ʼe Taʼofi e Te ʼu Faʼe Mai Te Faʼifaʼitaki ʼa Enise?
“ ʼAua naʼa ke siʼaki te ʼu ako ʼae neʼe foaki atu e tau faʼe. ʼE ko he pale teu matalelei ki tou ʼulu, pea mo he kahoa taulekaleka ki tou kia.”—TAAG. 1:8, 9.
KATIKO 137 Te ’u Fafine Kilisitiano Agatonu
TE ʼU MANATU FAKANOUNOU a
1-2. (1) Neʼe ko ai ia Enise? He koʼe neʼe faigataʼa kia ia tana akoʼi tana kiʼi tama ke ina iloʼi ia Sehova mo Sesu? (2) Fakamatala te pāki ʼo te takafi.
LOGO LA ʼe mole talanoa ʼi te Tohi-Tapu ki te papitema ʼa Timoteo, kae ʼe feala ke tou fakakaukauʼi te fiafia neʼe logoʼi e tana faʼe ko Enise ʼi te ʼaho ʼaia. (Taag. 23:25) Fakakaukauʼi age muʼa ia tana fiameʼameʼa ʼi tana sio ki te tuʼu ʼa Timoteo ʼi te vai. ʼE malimali pea ʼe tuʼu ovi age pe ki ai te kui ʼa Timoteo ko Loise. ʼI te sio leva ʼae ʼa Enise ki te fakauku ʼo Timoteo, neʼe mole kei kovi he meʼa kia ia. Neʼe mole he fakatatau ia ʼo tona fiafia. Pea ʼi te hake fakafiafia ake ʼa Timoteo mai te vai, neʼe tagi siʼana faʼe. ʼE ha mai ai, neʼe lavaʼi e Enise ia tana haga ʼae ʼo akoʼi kia Timoteo ke ʼofa kia Sehova mo tona ʼAlo ia Sesu Kilisito. Kae kotea te ʼu aluʼaga faigataʼa ʼae neʼe tau mo ia?
2 Neʼe mole lotu tahi te ʼu matuʼā ʼa Timoteo. Ko tana tamai neʼe ko te Keleka pea ko tana faʼe mo tana kui neʼe ko te ʼu Sutea. (Gaue 16:1) Neʼe lagi kei tupulaga ia Timoteo ʼi te liliu ʼa Enise mo Loise ko he ʼu tisipulo ʼa Sesu. Kae neʼe mole liliu ia tana tamai ko he tisipulo ʼa Sesu. Kotea ka fai e Timoteo? Neʼe kua lahi feʼauga pe ia Timoteo ke ina toʼo he tonu. ʼE ina filifili anai koa te lotu ʼae ʼe alu ai tana tamai? Peʼe ina muliʼi anai koa te ʼu talatisio Fakasutea ʼae neʼe akoʼi age talu tana kei veliveli? Peʼe toe liliu anai koa mo ia ko he tisipulo ʼa Sesu?
3. Ka tou lau ia Taʼaga Lea 1:8, 9, kotea te manatu ʼa Sehova ʼo ʼuhiga mo te ʼu faiga ʼa te ʼu faʼe ke natou tokoni ki ʼanatou fanau ke kaumeʼa mo ia?
3 ʼE toe ʼoʼofa te ʼu tuagaʼane ʼae kua faʼe ʼi ʼonatou famili. ʼE natou loloto tafito ke natou tokoni ki ʼanatou fanau ke natou kaumeʼa mo Sehova. Pea ʼe maʼuhiga ʼaupito kia Sehova ʼanatou faiga. (Lau ia Taʼaga Lea 1:8, 9.) Neʼe lahi te ʼu faʼe neʼe tokoni ki ai ia Sehova ke natou akoʼi ʼanatou fanau ke ʼoʼofa pea mo tauhi kia te ia.
4. Kotea ʼae ʼe tuʼania ki ai ia te tokolahi ʼo te ʼu faʼe ia ʼaho nei?
4 ʼI ʼihi temi, ʼe feuiʼaki e te ʼu tuagaʼane ʼae kua faʼe pe ʼe filifili anai e ʼanatou fanau ke natou tauhi kia Sehova, ohage ko Timoteo. Pea ko te ʼuhiga ia ʼaia ʼo te ʼu faʼe. ʼE iloʼi e te ʼu tehina mo tuagaʼane ʼae kua maʼu fanau ʼe lahi te ʼu fakaneke ʼe fai e te malama ʼa Satana ki ʼanatou fanau. (1 Pet. 5:8) Pea tahi, ʼe lahi te ʼu faʼe ʼe natou pusiaki tokotahi ʼanatou fanau peʼe natou pusiaki mo honatou ʼohoana ʼe mole tauhi kia Sehova. ʼE ui fenei e totatou tuagaʼane ko Christine b: “Neʼe agalelei toku ʼohoana pea neʼe ko he pule famili lelei kae neʼe ina tapuʼi mai taku palalau ki te moʼoni ki ʼamā fanau. Neʼe tuʼa lahi taku tagi mamahi. Neʼe au feuiʼaki ʼe mole feala anai ʼi he temi ke tauhi ʼaku fanau kia Sehova.”
5. Kotea ka tou vakaʼi ʼi te alatike ʼaeni?
5 Kapau ko koe ko he faʼe, ʼe feala hau tokoni ki ʼau fanau ke natou ʼoʼofa mo tauhi kia Sehova ohage ko tona fai e Enise. ʼI te alatike ʼaeni, ʼe tou vakaʼi anai tana faʼifaʼitaki. ʼE tou vakaʼi anai pe koʼe ʼe maʼuhiga te meʼa ʼae ʼe ke ui pea mo te ʼu meʼa ʼae ʼe ke fai. Pea ʼe tou toe talanoa anai ki te tokoni ʼe feala ke foaki atu e Sehova.
ʼE MAʼUHIGA TE ʼU MEʼA ʼAE ʼE KE UI
6. Ka tou lau ia 2 Timoteo 3:14, 15, neʼe liliu feafeaʼi ia Timoteo ko he tisipulo ʼa Sesu?
6 ʼI te kei veliveli ʼa Timoteo, neʼe fai e tana faʼe ia meʼa fuli ke ina akoʼi ki ai “te ʼu Tohi Taputapu,” ohage ko tona mahino ki ai te kau Sutea. Neʼe ʼi ai pe te ʼu tuʼakoi ʼo te ʼatamai malama ʼae neʼe ina maʼu ʼo ʼuhiga mo te ʼu Tohi Taputapu ʼaia. Kotea tona tupuʼaga? He neʼe mole ina iloʼi he meʼa ʼo ʼuhiga mo Sesu. Kae neʼe kua mahino feʼauga pe ia Timoteo ki te Tohi-Tapu ke ina toʼo ai he tonu. ʼE liliu anai koa ko he tisipulo ʼa Sesu? Kua liliu leva ia Timoteo ko he tahi kua lahi pea kua feala hana filifili pe ʼe liliu anai ko he tisipulo ʼa Sesu. Kotea ʼae neʼe ina filifili? Neʼe tui ia Timoteo ki te moʼoni ʼo ʼuhiga mo Sesu. ʼE mahino ia, neʼe hoko te faʼahi ʼuhi pe ko te ʼu faiga malohi ʼo siʼana faʼe. (Lau ia 2 Timoteo 3:14, 15.) Neʼe fiafia ʼosi ia Enise ʼi tana lava akoʼi ia Sehova mo Sesu ki tana kiʼi tama, maʼia pe neʼe faigataʼa. Koia, neʼe tonu pe tona fakahigoaʼi ko Enise he ʼe haʼu tona higoa mai he kupu ʼe fakaʼuhiga ki te “malo.”
7. Kotea neʼe feala ke fai e Enise moʼo tokoni ki tana kiʼi tama ke haga tuputupu hili tana papitema?
7 Ko te papitema neʼe ko he faʼahi maʼuhiga ia neʼe fai e Timoteo ʼi tona maʼuli. Kae ʼe hoko atu pe anai koa te tuʼania ʼa Enise ki te ka haʼu ʼo tana kiʼi tama? ʼE lagi feala ke feuiʼaki fenei: Kotea leva ka ina fai? ʼE fakatahi anai koa mo ni hahaʼi ʼe fua kovi anai kia ia? ʼE ina hoko atu anai koa tana ako ʼi Ateni pea mo kamata tui leva ki te ʼu akonaki fakafilosofia ʼa te kau pagani? ʼE ina fakaʼaogaʼi kovi anai koa tona temi, mo tona malohi pea mo tona temi tupulaga ke liliu ʼo koloaʼia? Neʼe mole feala ke toʼo e Enise he ʼu tonu maʼa tana kiʼi tama kae neʼe feala pe ke tokoni ki ai. ʼO feafeaʼi? ʼAki pe tana hoko atu tana tokoni ki ai ke malohi tuʼumaʼu tona ʼofa kia Sehova pea mo tana lotofakafetaʼi ki te ʼu meʼa fuli neʼe fai e Sehova mo Sesu maʼa natou. ʼE mole gata pe ki te ʼu matuʼā ʼae ko tonatou hoa ʼe mole ʼi te moʼoni, ʼe faigataʼa tanatou tokoni ki ʼanatou fanau ke ʼoʼofa kia Sehova. Kae ʼe toe kau ai mo te ʼu matuʼā ʼae ʼe tauhi toko lua kia Sehova. ʼE toe faigataʼa kia natou tanatou tokoni ki ʼanatou fanau ke natou tauhi kia Sehova. Koia, kotea te ʼu ako ʼe feala ke maʼu e te ʼu matuʼā mai te faʼifaʼitaki ʼa Enise?
8. ʼE lava tokoni feafeaʼi he faʼe ko tona hoa ʼe ʼi te moʼoni ki te akoʼi ʼo ʼanā fanau ʼo ʼuhiga mo Sehova?
8 Kotou ako fakatahi te Tohi-Tapu mo ʼakotou fanau. Kapau ko koe ko he faʼe kae ʼe ʼi te moʼoni tou hoa, ʼe loto e Sehova ke ke tokoni ki ai ke kolua akoʼi ki ʼakolua fanau ia ia. ʼE feala tau lagolago lelei ki te fai ʼo te Ako Fakafamili. ʼE feala ke ke palalau lelei ʼo ʼuhiga mo te ako fakafamili pea mo fakakaukauʼi pe kotea ʼe feala ke ke fai ke fakatupu fiafia te kiʼi temi ʼaia. ʼE feala tau tokoni ki tou hoa ki te filifili ʼo he manatu ka vakaʼi ʼi te ako fakafamili peʼe ko te fai ʼo he ʼu kiʼi gaue. Pea kapau kua feala ki ʼihi ʼo ʼakolua fanau ke natou ako te tohi Ke Ke Fiafia ʼo Heʼe Gata, ʼe feala tau tokoni ki tou hoa ke fai he ako ʼo ʼakolua fanau.
9. Kofea ʼae ʼe lava maʼu ai e he faʼe ʼe mole tauhi tona hoa kia Sehova he ʼu tokoni moʼo akoʼi ʼana fanau?
9 ʼE akoʼi tonu e ʼihi faʼe te Tohi-Tapu ki ʼanatou fanau ʼuhi he ʼe natou pusiaki tokotahi ʼanatou fanau peʼe ʼuhi ko te mole tauhi kia Sehova ʼonatou ʼohoana. Kapau ʼe feia tou aluʼaga, ʼaua naʼa ke hoha fau ki te faʼahi ʼaia. ʼE tokoni atu anai ia Sehova. Ke ke fakaʼaogaʼi te ʼu meʼa gaue ʼe ina foaki atu ʼaki tana kautahi moʼo akoʼi ʼau fanau. Pea ʼe feala hau fakalavelave ki he ʼu matuʼā kua fakalaka ʼi te aluʼaga ʼaia pe ʼe natou fakaʼaogaʼi feafeaʼi te ʼu meʼa gaue ʼaia ʼi tanatou ako fakafamili. c (Taag. 11:14) ʼE toe tokoni atu ia Sehova ke ke maʼu he ʼu felogoi lelei mo ʼau fanau. Ke ke kole tona laumalie ke ke fai he ʼu fehuʼi ʼe feala ai ke ke iloʼi ʼanatou manatu mo te ʼu meʼa ʼae ʼe natou logoʼi moʼoni. (Taag. 20:5) Ohage la ʼe feala ke ke fehuʼi age ki ai: ‘Kotea te meʼa ʼae ʼe faigataʼa kia koe ʼi te fale ako?’ Ka ke fai he fehuʼi feia, ʼe feala ke kamata ai he faipalalau ʼo feala ke lahi age te ʼu meʼa ʼe ke mahino ki ai.
10. Kotea te tahi aluʼaga ʼe feala ke fai e he faʼe moʼo akoʼi ʼana fanau ke natou iloʼi ia Sehova?
10 Kumi he ʼu faigamalie ke ke palalau ai ki ʼau fanau ʼo ʼuhiga mo Sehova. Ke ke fakaha age kia natou pe ko ai ia Sehova pea mo te ʼu meʼa lelei fuli neʼe ina fai maʼa koe. (Tet. 6:6, 7; Esa. 63:7) ʼE maʼuhiga te faʼahi ʼaia, tafito la mo kapau ʼe mole feala hau akoʼi tuʼumaʼu te Tohi-Tapu kia natou ʼi fale. ʼE ui fenei e Christine, ʼae neʼe tou talanoa ki ai ʼi muʼa atu: “Neʼe tahitahiga taku lava palalau mo ʼaku fanau ki te moʼoni. Kae ka au maʼu hoku faigamalie pea ʼe au foimo fakaʼaogaʼi te faigamalie ʼaia. Ka matou olo ʼo haʼele lalo fakatahi pea mo olo ʼi he ʼu kiʼi vaka ʼo matou mamaʼo ʼosi mai uta, ʼe matou faipalalau ki te fakatupu taulekaleka ʼa Sehova pea mo ʼihi atu manatu fakalaumalie. ʼI te kua lalahi leva ʼaku fanau, ʼe au fakalotomalohiʼi natou ke natou ako pe e natou totonu te Tohi-Tapu.” Ke ke palalau lelei ki te kautahi ʼa Sehova ʼo feia mo ʼou tehina mo tuagaʼane. ʼAua naʼa ke fatufatuʼi te kau tagata ʼafeā. Manatuʼi ko te ʼu palalau ʼe ke fai ʼo ʼuhiga mo natou, ʼe tokoni ai ki ʼau fanau ke olo ʼo palalau kia natou moka natou tau mo ni faigataʼaʼia.
11. Ka tou lau ia Sakopo 3:18, he koʼe ʼe maʼuhiga ki he faʼe ke ina kumi te tokalelei ʼi te loto fale?
11 Ke maʼu te tokalelei ʼi te loto fale. Ke ke fakaha tuʼumaʼu tou ʼofa ki tou ʼohoana mo ʼau fanau. Ke ke palalau lelei tuʼumaʼu ʼo ʼuhiga mo tou ʼohoana pea ʼaki he fakaʼapaʼapa. Pea ke ke toe ʼakoʼi ʼau fanau ke natou toe fai feia. Kapau ʼe ke fai te faʼahi ʼaia, ʼe faigafua anai ki ʼau fanau tanatou ako ke natou iloʼi ia Sehova. (Lau ia Sakopo 3:18.) Tou vakaʼi te faʼifaʼitaki ʼa Jozsef. ʼE pionie makehe ʼi Roumanie. ʼI tana kei veliveli, neʼe faiga tuʼumaʼu tana tamai ke ina taʼofi tana tauhi kia Sehova, ʼo feia mo tana faʼe mo tona tokolua pea mo ʼona tehina. ʼE ina ui fenei: “Neʼe fai e taku faʼe ia meʼa fuli ke maʼu te tokalelei ʼi fale. Ka agakovi taku tamai, pea ʼe toe ʼasili age te agalelei ʼo taku faʼe. Ka tokagaʼi e taku faʼe ʼe faigataʼa tamatou fakaʼapaʼapa mo fakalogo ki tamatou tamai, ʼe faipalalau mo matou ki te vaega ʼo Efeso 6:1-3. Pea ʼe ina fakamanatuʼi mai ʼona kalitate pea mo te ʼu tupuʼaga ʼae ke matou ʼoʼofa ʼi ai. ʼI tana fai te faʼahi ʼaia, neʼe tokoni ai ki te maʼuli tokalelei ʼo tomatou kiʼi famili.”
ʼE MAʼUHIGA TE ʼU MEʼA ʼAE ʼE KE FAI
12. Ka tou lau ia 2 Timoteo 1:5, neʼe fua lelei feafeaʼi kia Timoteo te faʼifaʼitaki ʼa tana faʼe?
12 Lau ia 2 Timoteo 1:5. Neʼe tuku e Enise he faʼifaʼitaki lelei ki tana kiʼi tama. Neʼe ina akoʼi age ki ai ʼe tonu ke ha ʼi ʼatatou gaue ia tatatou tui. (Sakp. 2:26) Neʼe lagi tokagaʼi e Timoteo neʼe ko te ʼofa ʼo tana faʼe kia Sehova ʼae neʼe ina fakaha ʼi ʼana gaue. ʼE mahino ia, neʼe sio ia Timoteo ki te fiafia ʼae neʼe ina maʼu ʼi tana tauhi kia Sehova. Neʼe fua lelei feafeaʼi kia Timoteo te faʼifaʼitaki ʼa tana faʼe? Neʼe ui e Paulo neʼe ina toe maʼu he tui malohi ohage pe ko tana faʼe. Kae neʼe mole hoʼi maʼu feia pe e Timoteo he tui malohi. Neʼe tuku e Enise he faʼifaʼitaki lelei koia ʼae neʼe fia faʼifaʼitakiʼi ai e Timoteo. ʼO toe feia pe ia ʼaho nei, ʼe lahi te ʼu faʼe ʼe natou tokoni ki ʼonatou famili ke natou tauhi kia Sehova ‘ ʼo mole ʼaki pe ʼanatou palalau. (1 Pet. 3:1, 2) ʼE feala hau toe fai feia mo koe. ʼO feafeaʼi?
13. He koʼe ʼe tonu ke fakamuʼamuʼa e he faʼe ʼana felogoi mo Sehova?
13 Ke ke fakamuʼamuʼa ʼau felogoi mo Sehova. (Tet. 6:5, 6) ʼE lahi te ʼu sakilifisio ʼe ke fai ohage pe ko te faʼe fuli. Ohage la, ʼe ke fakaʼaogaʼi tou temi mo tau foʼi falā ke ke tokaga ki ʼau fanau, ʼo mole kei feʼauga ai tau malolo. Kae ʼe mole tonu ke ke maʼumaʼua fau ki te ʼu faʼahi ʼaia he ʼe mole ke maʼu ai hou temi ke ke fakamalohiʼi ʼau felogoi mo Sehova. Ke ke toʼo tuʼumau he temi ke ke faikole ai kia Sehova, mo fai hau ako tokotahi pea mo kau ki te ʼu fono. Kapau ʼe ke fai feia, ʼe ke fakamalohiʼi ʼau felogoi mo Sehova pea ʼe ke tuku ai he faʼifaʼitaki lelei ki tou famili pea mo te kokelekasio.
14-15. Kotea ʼe tou ako mai te ʼu tala manatu ʼa Leanne, mo Maria, pea mo João?
14 Tou vakaʼi he ʼu tala manatu ʼa ʼihi tupulaga. Neʼe natou ako ke natou ʼoʼofa ia Sehova pea mo falala kia te ia ʼuhi ko tanatou tokagaʼi te faʼifaʼitaki lelei ʼo tanatou faʼe. ʼE ui fenei e te taʼahine ʼa Christine ko Leanne: “Neʼe tonu ke matou ako fakafufu te Tohi-Tapu ʼi fale. Kae neʼe kau tuʼumaʼu taku faʼe ki te ʼu fono. Logo foki la neʼe mole lahi te ʼu meʼa ʼae neʼe matou iloʼi ʼo ʼuhiga mo te Tohi-Tapu, kae neʼe tokoni mai tana faʼifaʼitaki ke matou maʼu he tui ʼe malohi. Neʼe matou iloʼi neʼe ko te moʼoni ʼaia ʼi muʼa pe la ʼo tamatou kau ki te ʼu fono.”
15 Neʼe toe malave kia Maria te faʼifaʼitaki ʼa tana faʼe. Ka liliu ki fale mo ʼana tamaliki ʼi te ʼu ʼosi fono, ʼe tau gaohi koviʼi ia ia e tona ʼohoana. ʼE ui fenei e Maria: “ ʼE kau taku faʼe ʼi te ʼu fafine lototoʼa. ʼI taku kei veliveli, neʼe au fakafisi ʼi te fai ʼo ʼihi meʼa he neʼe au mataku pe kotea te manatu ʼa ʼihi. Kae neʼe au lava tauʼi toku mataku ʼi taku sio ki te lototoʼa ʼo taku faʼe. ʼE ina fakamuʼamuʼa tuʼumaʼu ia Sehova ʼi tona maʼuli.” Neʼe tapuʼi e te tamai ʼa João ia te palalau ʼo ʼuhiga mo Sehova peʼe ko te Tohi-Tapu ʼi fale. ʼE ui fenei e João: “Neʼe lotolelei taku faʼe ke fakafisi kia meʼa fuli moʼo fakafiafiaʼi taku tamai. Kae gata pe ki tona ʼofa kia Sehova neʼe mole feala ke fakafisi ki ai. Pea ko te aluʼaga la ʼaia neʼe malave ʼaupito kia au.”
16. ʼE malave feafeaʼi anai te faʼifaʼitaki ʼa he faʼe ki te kokelekasio?
16 ʼU faʼe, kotou manatuʼi ʼe toe feala pe ke malave ʼakotou faʼifaʼitaki ki te kokelekasio. Ohage la, neʼe tokagaʼi e Paulo ia te faʼifaʼitaki ʼa Enise. Ne’e ina tohi ko te tui ʼa Timoteo ʼae ʼe mole malualoi ‘neʼe ʼuluaki maʼu ia e Enise.’ (2 Tim. 1:5) Ko te temi fea ʼae neʼe tokagaʼi ai e Paulo ia te tui ʼa Enise? Neʼe ina tokagaʼi ʼi tana ʼuluaki folau misionea, ʼae neʼe felaveʼi ai mo Loise pea mo Enise, ʼi Lisitia. Neʼe lagi nā iloʼi ai te logo lelei ʼuhi ko ia pea mo nā liliu ai ko he ʼu tisipulo ʼa Sesu. (Gaue 14:4-18) Fakakaukauʼi age muʼa koe te aluʼaga ʼaeni, neʼe faitohi ia Paulo kia Timoteo hili ki ai taʼu ʼe 15. Kae neʼe kei ina manatuʼi pe te tui ʼa Enise pea neʼe ina ui ʼe tuha ke faʼifaʼitakiʼi te fafine ʼaia. ʼE mahino ia, neʼe malave tana faʼifaʼitaki ki te apositolo ko Paulo pea mo ʼihi tehina mo tuagaʼane ʼo tona temi. Koia, kapau ʼe ke taupau tokotahi ʼau fanau peʼe ko tou ʼohoana ʼe mole ʼi te moʼoni, manatuʼi ʼe ke fakalotomalohiʼi anai ʼou tehina mo tuagaʼane ʼuhi ko tau tui.
17. Kotea ʼe feala ke ke fai mo kapau ʼe mole fia tali e tau fanau te ʼu moʼoni ʼae ʼe ke akoʼi age?
17 Kotea ʼe feala ke ke fai mo kapau ʼe mole fia tali e tau fanau te ʼu moʼoni ʼae ʼe ke akoʼi age? Ke ke manatuʼi ʼe ʼaoga he temi ke kita akoʼi ai he fanau. Ohage ko tatatou sio ki ai ʼi te pāki ʼae ʼe alu tahi mo te palakalafe ʼaeni, ka tou nunusi he pulapula, ʼe mole tou iloʼi pe ko te fuʼu ʼakau ʼae ka maʼuli ʼe fua anai. ʼE mole fakalogo ia kia tatou kae ʼe tou fakavai tuʼumaʼu anai ke feala ke maʼuli. (Mko. 4:26-29) Pea ʼe toe feia pe, ʼi ʼihi temi ʼe feuiʼaki e he faʼe pe ʼe tokoni moʼoni anai ʼana faiga ki ʼana fanau ke natou ʼoʼofa ia Sehova. ʼE mole feala ke ke toʼo he tonu maʼa natou pe ʼe natou tauhi kia Sehova peʼe kailoa. Kae kapau ʼe ke haga fai ia meʼa fuli ke ke akoʼi age te ʼu pelesepeto Fakatohi-tapu, ʼe ke tuku age kia natou ia faigamalie fuli ke natou tuputupu ʼi te faʼahi fakalaumalie.—Taag. 22:6.
KE KE FALALA KIA SEHOVA
18. ʼE tokoni feafeaʼi ia Sehova ki ʼau fanau ke natou tuputupu ʼi te faʼahi fakalaumalie?
18 ʼI te temi muʼa, neʼe lahi te kau tupulaga neʼe tokaga lelei ki ai ia Sehova. Pea neʼe natou liliu ai ko ʼona kaumeʼa. (Pes. 22:9, 10) ʼE feala ke toe tokoni ki ʼau fanau ke natou tuputupu ʼi te faʼahi fakalaumalie mo kapau ʼe natou loto ki ai. (1 Ko. 3:6, 7) Tatau aipe pe ʼe fakamamaʼo ʼau fanau ʼi te moʼoni, kae ʼe tokaga pe anai ia Sehova kia natou. (Pes. 11:4) Ka ina tokagaʼi ʼe ʼi ai he aluʼaga ia natou ʼe natou fia fetogi, ʼe tokoni anai kia natou. (Gaue 13:48; 2 Klk. 16:9) ʼE feala ke ina foaki atu te poto ke ke fai he ʼu palalau lelei ʼi tona temi totonu, ko tona fakaʼuhiga te temi ʼae ʼe ʼaoga tafito ai ki ʼau fanau. (Taag. 15:23) Pe ʼe ina uga anai he tehina peʼe ko he tuagaʼane ke tokaga kia natou. Ka lalahi ʼau fanau, ʼe feala ke fakamanatuʼi age e Sehova he kiʼi manatu Fakatohi-tapu neʼe kua ke akoʼi age. (Soa. 14:26) ʼE tapuakinaʼi anai koe e Sehova moka ke haga ako ʼau fanau, tatau aipe pe ʼe ke fai te faʼahi ʼaia ʼaki ʼau palalau peʼe ko tau faʼifaʼitaki.
19. He koʼe ʼe ke tui papau ʼe ke maʼu anai te ʼofa ʼo Sehova?
19 ʼE mole fakalogo te ʼofa ʼo Sehova kia koe ki te ʼu tonu ʼae ʼe toʼo e ʼau fanau. ʼE ʼofa ia koe he ʼe ke ʼofa ia ia. Kapau ʼe ke taupau tokotahi ʼau fanau, ʼe fakapapau atu e Sehova ʼe liliu anai ko hanatou Tamai pea ʼe ina puipui anai koe. (Pes. 68:5) ʼE mole feala ke ke toʼo he tonu maʼa tau ʼu fanau pe ʼe natou tauhi anai kia Sehova peʼe kailoa. Kae kapau ʼe ke haga tuku tau falala kia Sehova pea mo fai ia meʼa fuli ʼe ke lavaʼi, ʼe ke maʼu anai tona ʼofa.
KATIKO 134 Ko Te Fanau ’e Ko He Tofi’a Mai Te ʼAtua
a ʼE tou talanoa anai ʼi te alatike ʼaeni ki te faʼe ʼa Timoteo ko Enise. ʼE tou vakaʼi anai pe ʼe kotea te ʼu ako ʼe feala ke taʼofi e te ʼu tuagaʼane ʼae kua faʼe mai tana faʼifaʼitaki, pea ʼe feafeaʼi hanatou tokoni ki ʼanatou fanau ke natou iloʼi ia Sehova mo ʼoʼofa ia te ia.
b Ko ʼihi higoa neʼe fetogi.
c Ohage la, vakaʼi te kapite 50 ʼo te tohi Ke Ke Fiafia ʼo Heʼe Gata pea mo te alatike “Des idées pour le culte familial et l’étude individuelle,” ʼo Te Tule Leʼo (Fakafalani) ʼaho 15 ʼo ʼAukusito 2011, p. 6-7.