1, 2. ა) მი რდჷ ევნიკე დო მუ სირთულეს შეხვად თიქ, მუჭოთ დიდაქ? ბ) გეჭარით სურათ გალენ გვერდის.

 მართალ რე, ბიბლიას ვა რე ეჭარილ ტიმოთეშ ნათუა, მარა ძნელ წარმოსადგენ ვა რე, მუნერ ხიოლ აღვენუდ თიმ დღას თიშ დიდას, ევნიკეს (იგავ. 23:25). წერმიდგინით, მუნერ გახარებულ უჯინე თინა ტიმოთეს, ნამუთ წყარს ინორე. თინა ტიმოთეშ ბებიშ, ლოისიშ, გვერდით გერე დო გოძიცებულო უჯინე მუშ სქუას. ტიმოთე ინწყუ წყარს დო სოიშახ დუდის ეშაჭოფუანდას, ევნიკეს სუნთქვა ხოლო მეტებულ აფჷ. ტიმოთე ბედნერ სახეთ ეშურს წყარშე. თე დროს ევნიკეს ხიოლიშ ჩილამურეფ ელაჸუნუ თოლეფს. პრობლემეფიშ უმკუჯინუო, ევნიკექ ქიმიოჭირინუ წარმატებას დო ტიმოთეს იეჰოვაშ დო იესო ქრისტეშ ჸოროფა ქელუდვჷ გურშა. მუ სირთულეეფშა აჸუ ევნიკეს გარზებელქ?

² ტიმოთექ რელიგიურო გორთილ ოჯახის ირდჷ. თიშ მუმა ბერძენ რდჷ დო დიდა დო ბებ იუდეველეფ რდეს (საქ. 16:1). საეგებიოთ, ტიმოთე გვალო ჭიჭე ბაღანა ვეჸუაფუდ, მუჟამსით ევნიკე დო ლოისიქ რელიგია დითირეს დო ქრისტიანობა მიღეს. თინა შილებე უკვე მეჭირნაფილ რდუკო თი ხანშა, მუჟამსით მუშით შეულებუდ გადაწყვეტილებეფიშ მეღება. ნამ შარას გიოდირთუდ ტიმოთე? მუმაშ რელიგიას გიშეგორუნდჷ, იუდაურ ტრადიციეფიშ ართგურ დოსქიდუდ დოვარ ქრისტეშ მიმაჸუნალ იჸუაფუდ?

3. მუჭოთ იგავეფიშ 1:8, 9-შე იძირე, მუჭო უჯინე იეჰოვა თი დიდალეფიშ ხანდას, მით სქუალეფს ღორონთწკუმა მეგობრობაშ გავითარებას ოხვარნა?

³ ევნიკეცალო, ქრისტიან დიდალეფს უჸორა მუნეფიშ ოჯახ. თინეფს ირფელიშ უმოსო ოკონა, სქუალეფს იეჰოვაწკუმა მეგობრობაშ გავითარებას ქიმეხვარან. ჩქინ ღორონთ  მანგარო აფასენს თინეფიშ მონდომას (წეკითხით იგავეფიშ 1:8, 9). იეჰოვაქ ბრელ დიდას მეხვარ, სქუალეფიშ გურეფშა ჭეშმარიტება ქინუდვალუდკო.

4. მუ სირთულეს შეხვადუ ნამთინე დიდა ამდღა?

⁴ მინშა დიდას შილებე ოეჭვუდას, გეგშეგორუნს დო ვარ მუშ სქუა იეჰოვაშ მსახურებას, მუჭოთ თენა ტიმოთექ აკეთ. მშობლეფს უჩქუნა, სატანაშ ქვეყნიერებაშ მუშმადიდა გავლენაწკუმა უხვადნა მუნეფიშ სქუალეფს ბრძოლა (1 პეტ. 5:8). თეს გეძინელ, ბრელ დიდაშო მანგარ ძნელ რე სქუალეფიშ რდუალა ქომონჯიშ უმშო ვარდა თიცალ ქომონჯწკუმა, მით ვამსახურ იეჰოვას. მაგალთო, ართ და, სახელო ქრისტინა, * იჩიებ: „ჩქიმ ქომონჯ ჯგირ მუმა დო ოჯახიშ დუდ რდჷ, მარა მანგარო მოწინააღმდეგუდ სქუალეფშა ჭეშმარიტებაშ დოგურაფას. წანეფიშ დინახალე ბრელ ჩილამურ დომბუნ თიშე ფიქრით, დღას გეგშეგორუნდეს დო ვარ ჩქიმ სქუალეფ იეჰოვაშ თაყვანიშცემას“.

5. მუს გუვარჩიენთ თე სტატიას?

⁵ ევნიკეცალო, თქვა ხოლო შეილებნა თქვან სქუალეფს იეჰოვა ქუჸოროფუათ. თე სტატიას გუვარჩიენთ, მუჭო შეილებნა მიაჸუნათ ევნიკეშ მაგალითის დო თქვან სიტყვათ დო საქმეთ დაგურუათ სქუალეფს. თეს გეძინელ, ქობძირუნთ, მუჭო მიგეხვარებნა იეჰოვა.

6. მუჭოთ 2 ტიმოთეშ 3:14, 15-შე იძირე, მუჭო გინირთჷ ტიმოთექ ქრისტიანო?

⁶ ბაღანობას ტიმოთეს მუშ დიდა წმინდა წერილეფს ოგურუანდჷ თეშ, მუჭოთ თენა იუდეველეფს არჩქილედეს. მუშო ოკო რაგად, ევნიკეს მუთუნ ვა უჩქუდ იესო ქრისტეშ გურშენ, მარა მუთ ტიმოთეს წმინდა წერილეფშე დაგურუ, ქიმეხვარებუდ თის ქრისტიანობაშ მეღებას. ტიმოთეს შეულებუდ მუშით გეგნოჭყვიდკო, ნამ შარას გიოდირთუდ, მარა თიქ იესო ქრისტეშ მიმართ რწმენა გავითარუნ, თეშა დიდ ხანდა მიშუძუდ ევნიკეს (წეკითხით 2 ტიმოთეშ 3:14, 15). მუ ბედნერ იჸუაფუდ ევნიკე, ნამდა შეიალებუ სირთულეეფშა გერჯგინაქ დო მუშ სქუაშ გურშა იეჰოვაშ ჸოროფაშ ელადვალაქ! ევნიკე მართალო ამართლენდჷ მუშ სახელიშ მნიშვნელობას, ნამუთ მოურს სიტყვაშე „გერჯგინა“.

7. მუჭო შილებე ევნიკე ოხვარუდკო ტიმოთეს ნათუაშ უკულ ხოლო სულიერო წიმი ულას?

⁷ ნათუა მნიშვნელოვან გადაწყვეტილება რდჷ ტიმოთეშ ცხოვრებას, მარა ევნიკეშ ოფიქრებელ ალბათ თეთ ვეთებუდ. ტიმოთეს კინ აფუდ ცხოვრებას მნიშვნელოვან გადაწყვეტილებეფ მიოღებელ. გლახა საზოგადოებაწკუმა ხომ ვა დეკინენდჷ თინა ურთიერთობას? ათენს ხომ ვა დიჭყანდჷ ფილოსოფოსეფშე განათლებაშ მეღებას? ვარდა სიმდიდრეშ შაყარუას ხომ ვა დუთმენდჷ მუშ ახალგაზრდულ წანეფს? მუშო ოკო რაგად, ევნიკე ვემიღენდჷ ტიმოთეშ მანგიორო გადაწყვეტილებეფს, მარა ქიმეხვარებუდ თის. მაგალთო, გაგრძელენდჷ თიშო ხანდას, ნამდა მანგარო ქუჸოროფუკო იეჰოვა დო გიშაჸიდირალიშ მარდულ ჸოფედკო. სირთულეეფ ხვალე რელიგიურო გორთილ ოჯახეფს ვა უღნა; თიმწკუმა ხოლო, მუჟამსით ჟირხოლო მშობელ ჭეშმარიტებას რე, იშენით შილებე ძნელ რდას ბაღანაშ გურს იეჰოვაშ ჸოროფაშ გავითარება. მუშ გურაფა შეულებნა მშობლეფს ევნიკეშ მაგალითშე?

8. მუჭო შეულებნა დიდალეფს, ქელუდირთან მუნეფიშ მეუღლეეფს სქუალეფიშ სულიერ საჭიროებეფშე ზრუნვას?

⁸ ქუდაგურეთ სქუალეფს ბიბლია. დალეფ, თქვან მეუღლეეფ ჭეშმარიტებას ქორენან-და, იეჰოვას ოკო, ნამდა ქელუდირთათ თინეფს სქუალეფიშ სულიერ საჭიროებეფშე ზრუნვას. ართ-ართ საშვალება რე, ქიმეხვარათ მეუღლეს,  რეგულარულო ჩატარას ოჯახურ თაყვანიშცემა. ირიათო დადებითო იჩით ოჯახურ თაყვანიშცემაშ გურშენ დო ქიფიქრით, მუჭო შეილებნა თე დროს ხე ქეშუნწყუათ სასიამოვნო გარემოს. თქვა შეილებნა მეუღლეწკუმა ართო დაგეგმათ საინტერესო აქტივობეფ ბიბლიაშ გურაფაშო. თეს გეძინელ, მუჟამსით თქვან სქუალეფშე ნამთინე ქიმიოჭირინუანს თი ასაკის, ნამდა შეილებნა ბიბლია ქუდაგურუათ წიგნით „მარადიულო გეხარით ცხოვრებათ!“, ქიმეხვარით თქვან მეუღლეს ბიბლიაშ გურაფაშ ჩატარებას.

9. სოვრეშე შეულებნა მოხვარა მიღან დიდალეფქ, მით რელიგიურო გორთილ ოჯახეფს ცხოვრენა?

⁹ მინშა დიდალეფს აფნა სქუალეფშა ბიბლიაშ გურაფა ოტარებელ, მუშენდა მეუღლე ვა ჸუნა ვარდა რელიგიურო გორთილ ოჯახის ცხოვრენა. თქვა ხოლო თეშნერ სიტუაციას ქორეთ-და, ვენერვიანათ, იეჰოვა ქიმგეხვარებნა. გეგმირინეთ ოგურაფალ საშვალებეფ, ნამდგას იეჰოვაშ ორგანიზაცია მარზენა. ჯგირ იჸუაფ, რჩევა თი მშობლეფს ხოლო ქელაკითხუათ, მით ირინუანა თე საშვალებეფს ოჯახურ თაყვანიშცემაშ დროს * (იგავ. 11:14). თქვა შეილებნა იეჰოვას ქოთხუათ მოხვარა, ნამდა გეგმირინუათ სწორ კითხვეფ თიშ გაგებელო, მუს ფიქრენა დო მუს გინაფლენა თქვან სქუალეფ (იგავ. 20:5). უბრალო კითხვას, მუნერით რე: „მუჭო მეურს საქმეეფ სკოლას?“, შილებე ჯგირ ჩიებაქ გეიაჸუნას დო ბრელ მუთუნ ქიგეგათ თქვან სქუაშ გურშენ.

10. ხოლო მუ საშვალებეფით შეილებნა მეხვარათ თქვან სქუალეფს, ქიდიგურუან იეჰოვაშ გურშენ?

¹⁰ დოგორით საშვალებეფ, ნამდა ქეჩუათ სქუალეფს იეჰოვაშ გურშენ. ქეჩით იეჰოვაშ დო თიშ გურშენ, მუ აფჷ თის თქვანო ნაკეთებ (კან. 6:6, 7; ეს. 63:7). თენა განსაკუთრებულო მნიშვნელოვან თიმწკუმა რე, მუჟამსით ვეშეილებნა რეგურალურო ჩუტარათ თქვან სქუას ბიბლიაშ გურაფა ჸუდეს. ჟიშე მოშინაფილ ქრისტინა იჩიებ: „სქუალეფწკუმა იეჰოვაშ გურშენ ჩიებაშ საშვალება ირო ვამღუდ, ათეშენ ნამთინ მომენტის ხეშე ვა უტენდჷ. სეირნობაშ დროს, კუჩხით იჸიდუო დოვარ ნავით, თინეფს ვეჩიებუდ იეჰოვაშ სარკო გუნაჭყეფუეფიშ დო შხვა ბრელ სულიერ საკითხიშ გურშენ. ბაღანეფქ გამწირდესინ, ელუჩანდჷ, მუნეფიშით ქუდუგურუაფდესკო ბიბლია“. ირო ჯგირ იჩით იეჰოვაშ ორგანიზაციაშ დო და დო ჯიმალეფიშ გურშენ. ვა გაკრიტიკათ უხუცესეფ. თინეფიშ გურშენ მუს თქუანთინ თექ, შილებე გინაჭყვიდირაფუას თქვან სქუალეფს, ქიმერთან დო ვარ უხუცესეფშა, მუჟამსით თინეფიშ მოხვარა დესაჭირებნა.

11. მუჭოთ იაკობიშ 3:18-ს ბკითხულენთ, მუშენ რე მნიშვნელოვან ოჯახის მშვიდობას ქეშუნწყუათ ხე?

¹¹ ხე ქეშუნწყით ოჯახის მშვიდობას. ირიათო გეგმოხანტით მეუღლეშ დო სქუალეფიშ ჸოროფა. დადებითო დო პატიცემათ იჩით მეუღლეშ გურშენ დო სქუალეფს ხოლო ქუდაგურეთ თაშ მოქციება. თეშნერო ოჯახის მშვიდობიან გარემო გაღვენუნა დო უმოს ადვილ გაჸინა სქუალეფშა იეჰოვაშ გურშენ გურაფა (წეკითხით იაკობიშ 3:18). გუვარჩუათ ჯოზეფიშ მაგალით, მით რუმინეთის სპეციალურ პიონერო მსახურენს. თიშ მუმა ირფელს ორთუდ, ნამდა ჩილ დო სქუას იეჰოვაშ მსახურებაშ საშვალება ვემეჩკო. ჯოზეფ იჩიებ: „ჩქიმ დიდა ირნერო ოცადუდ, ოჯახის მშვიდობიან გარემო მიღდესკო. მუთ უმოს მკაცრ რდჷ თინა, თით უმოს მშვიდას დო გემუანო ოქცუდ ჩქიმ დიდა თის. მუჟამსით ქოძირუნდჷ, ნამდა მუმაშ მიმართ პატიცემაშ დო მორჩილებაშ გიმორჩქინა მიჭირდეს, ეფესოელეფიშ 6:1—3-ს არჩიენდჷ ჩქინწკუმა ართო. უკულ ჩქინ  მუმაშ ჯგირ თვისებეფშა გინუღუდ ჩქინ ყურადღება დო მოხვარდეს თიშ ენონჭაფას, მუშენ ოკო დუვაფასითკო თინა. თეშნერო ჩქიმ დიდა ხეს უნწყუნდჷ ოჯახის მშვიდობას“.

12. მუჭოთ 2 ტიმოთეშ 1:5-ის ჭარჷ, მუჭო იმოქმედ ევნიკეშ მაგალითიქ ტიმოთეშა?

¹² წეკითხით 2 ტიმოთეშ 1:5. ევნიკექ ჯგირ მაგალით მეჩჷ ტიმოთეს. თინა ალბათ ქუდაგურუანდჷ, ნამდა ნამდვილ რწმენაშა საქმეეფ მიშურს (იაკ. 2:26). ტიმოთე, მუშო ოკო რაგად, ქოძირუნდჷ, ნამდა მუშ დიდას იეჰოვაშ ძალიერ ჸოროფა გინაჭყვიდირაფუანდჷ მოქმედებას, მუდგას თიშა ხიოლ მოუღუდ. მუჭო იმოქმედ ევნიკეშ მაგალითიქ ტიმოთეშა? მუჭოთ მოციქულ პავლექ მიშინუ, ტიმოთექ გევითარ მუშ დიდაცალ რწმენა. თენა შემთხვევით ვა მოხვალამე. თიქ გინოჭყვიდ, მიაჸუნკო მუშ დიდაშ მაგალითის. თეშნერო, ამდღა ხოლო ბრელ დიდა „უსიტყვოთ“, მუშ საქმეეფით, ოხვარ ოჯახიშ წევრეფს, გინირთან იეჰოვაშ თაყვანიშმცემელეფო (1 პეტ. 3:1, 2). თქვა მუჭო შეილებნა თეშ კეთება?

13. მუშენ ოკო გიორინუას დიდაქ იეჰოვაწკუმა ურთიერთობა მნიშვნელოვან ადგილს?

¹³ იეჰოვაწკუმა ურთიერთობა თქვან ცხოვრებას მნიშვნელოვან ადგილს ქიგიორინეთ (კან. 6:5, 6). დიდალეფიშ უმენტაშცალო, თქვა ხოლო ბრელ მუდგარენს ორთუთ თქვან სქუალეფშო; თქვა ირკენთ დროს, სახსრეფს, ლურს დო შხვა მუდგარენეფს ხოლო, ნამდა ქიზრუნათ სქუალეფიშ ფიზიკურ საჭიროებეფშე, მარა იეჰოვაწკუმა ურთიერთობა მუთუნით ვეშეწირათ მსხვერპლო სქუალეფიშ საჭიროებეფშე ზრუნვას. რეგურალურო გეგმურთით დრო პირად ლოცვას, ბიბლიაშ გურაფას დო კრებაშ შეხვალამეფს. თეშნერო სულიერო გემანგარებუთ დო ჯგირ მაგალითის ქიმეჩანთ მუჭოთ ოჯახიშ წევრეფს, თეშ შხვეფს ხოლო.

14, 15. მუ დიგურეთ ლინიშ, მარიაშ დო ჟუანიშ მაგალითეფშე?

¹⁴ გუვარჩუათ მუსხირენ ახალგაზრდაშ მაგალით, მიდგაქ იეჰოვაშ ჸოროფა დო ნდობა დიდაშ დაკვირებათ გევითარ. ქრისტინაშ უნჩაშ ძღაბ, ლინი, იჩიებ: „ჩქი ხვალე ტყობაშე შემლებდეს ბიბლიაშ გურაფა, მარა ჩქიმ დიდა მუთუნით ვაჩილითუანდჷ კრებაშ შეხვალამეფს. მართალ რე, ბრელ მუთუნ ვა მიჩქუდეს ბიბლიაშ გურშენ, მარა თიშ საქმეეფქ მიმეხვარეს, მიღდესკო ძალიერ რწმენა. ჭეშმარიტება ბრელ ხანით ადრე მიჩქუდეს, სოიშახ შეხვალამეფიშ დასწრებას დიბჭყანდით“.

¹⁵ მარია, მიდგაშ მუმა ოჯახის შეხვალამეფშა გილულაშ უფლებას ვარზენდჷ, იჩიებ: „მა მუსხირენ მანგარ გაბედულ დას იფჩინენქ დო თინეფშე ართ-ართ ჩქიმ დიდა რე. ბაღანობას მინშა მუდგარენეფიშ კეთებაშე ვარიას იფჩიებუდ, მუშენდა მოშქურუდ, შხვეფ მუს თქუანდეს. მარა თიშ გაბედულებაქ დო თიშ ძირაფაქ, მუჭო გეურდჷ იეჰოვა ირო პირველ ადგილშა, მიმეხვარ, გივორჯგინკო კოჩიშ შიშის“. ჟუან, ნამდგაშ მუმა უფლებას ვარზენდჷ ოჯახის, ბიბლიურ თემეფიშ გურშენ ქიჩისკო, ჭარუნს: „ალბათ, არძაშ უმოსო მუდგაქ ჩქიმ გურს შეხუ, რდჷ ჩქიმ დიდაშ მზადყოფნა, დათმუკო ირფელ, იეჰოვაშ ჸოროფაშ მეტ, ნამდა გურ გუხარკო ჩქიმ მუმას“.

16. მუჭო შილებე დიდალეფიშ მაგალითიქ იმოქმედას შხვეფშა?

¹⁶ დიდალეფ, რშუდან, ნამდა თქვან მაგალით შხვეფშა მოქმედენს. მაგალთო, გუვარჩუათ, მუჭო იმოქმედ ევნიკეშ მაგალითიქ მოციქულ პავლეშა. თიქ ჭარჷ, ნამდა „უთვალთმაქცო რწმენა“ ტიმოთეშახ ევნიკეს უღუდ (2 ტიმ. 1:5). მუჟამ ძირჷ პავლექ პირველო ევნიკეშ რწმენა? მუჭოთ იძირენ, თენა თიშ პირველ მისიონერულ მოგზაურობაშ დროს რდჷ,  მუჟამსით ლისტრას ლოის დო ევნიკეს შეხვად. თე დროს შილებე პავლექ თინეფს ქრისტიანო გინორთას მეხვარკო (საქ. 14:4—18). დეფიქრით, პავლექ ტიმოთეს 15 წანაშ უკულ მეჭარ დო თის კინ შუდჷ ევნიკეშ რწმენაშ საქმეეფ დო მაგალითო მოჸუნდჷ თინა! არგამა რე, ნამდა თიქ დადებითო იმოქმედ მოციქულ პავლეშა დო, მუჭოთ იძირე, შხვა თანაქრისტიანეფშა ხოლო. სქუალეფს მეუღლეშ უმშო ვარდა რელიგიურო გორთილ ოჯახის ქორდუნთ-და, დარწმუნებულ რდათ, ნამდა თქვან რწმენაშ მაგალით ამანგარენს დო უმოსიშ კეთებას გინაჭყვიდირაფუანს შხვეფს.

17. მუ ოკო აკეთათ, მუჟამსით ირფელს ორთუთ, მარა სქუაშე იშენით ვეძირე მონდომა?

¹⁷ შილებე დიდა ირფელს ორთუდას, მარა სქუაშე იშენით ვეძირედას მონდომა. თქვან შემთხვევას ხოლო თაშ ქორენ-და, რშუდან, ნამდა თეშო დრო რე საჭირო. მუჭოთ ილუსტრაციაშე იძირე, მუჟამსით მუდგარენ ხილს დოთასუნთ, მინშა შილებე გოეჭვუდან, მირდუნო თინა დო გემკიღანსო ნაყოფის. მართალ რე, ვა გაღვენუნა გარანტია, ნამდა ნაყოფის აუცილებერო მიღენთ, მარა იშენით გაგრძელენთ თიშა წყარიშ ელაბუნას, ნამდა ორდალო ირნერ საშვალება უღდას (მარ. 4:26—29). თეშნერო, მუჭოთ დიდას, მინშა შილებე თქვა ხოლო გოეჭვუდან, ქალგადვინეს დო ვარ თქვან სქუაშ გურშა იეჰოვაშ ჸოროფაქ. თქვა ვაგგაკონტროლებენა, მუ გადაწყვეტილებეფს მიღენა თქვან სქუალეფ. თინეფიშ ოგურაფალო ირფელს გაკეთენთ-და, სულიერო რდუალაშ მეტ საშვალებას ქიმეჩანთ (იგავ. 22:6).

18. მუჭო შეულებ იეჰოვას თქვან სქუალეფს მეხვარას სულიერო წიმი ულას?

¹⁸ ბიბლიურ დროშე მოჸუნაფილ იეჰოვაქ ბრელ ახალგაზრდას მეხვარ, გინირთკო მუშ მეგობარო (ფსალმ. 22:9, 10). თქვან სქუალეფს სულიერო რდუალა ქაკონან-და, თინა აუცილებერო ქიმეხვარებ (1 კორ. 3:6, 7). თიმწკუმა ხოლო, მუჟამსით თეშ იძირე, ნამდა თქვან სქუალეფ მთელ გურით ვა რენა იეჰოვაწკუმა, ღორონთ თინეფს იშენ ჸოროფაშ თოლით უჯინე (ფსალმ. 11:4). მუჟამსით თინეფ აკაფცხათ ვარა ქაძირანა, ნამდა ოკონა ღორონთიშ გურიშ გახარება, იეჰოვა მზათ რე, მუშ მეგობრეფო გინორთას ქიმეხვარას (საქ. 13:48; 2 მატ. 16:9). თინა მიგეხვარებნა, საჭირო დროს ქოთქუათ თიცალ მუდგარენ, მუთ თქვან სქუალეფს არძაშ უმოსო ოსაჭირნა (იგავ. 15:23). ვარდა შილებე კრებაშე მზრუნველ დას ვარდა ჯიმას გინაჭყვიდირაფუას, განსაკუთრებულ ინტერეს გეგმირჩქინას თინეფიშ მიმართ. თქვან სქუალეფ მირდუნან თიშ უკულ იეჰოვაქ შილებე ქუგაშინას თიცალ მუდგარენ, მუდგას ულირს ოგურუანდით (იოან. 14:26). სიტყვათ დო საქმეთ სქუალეფიშ გურაფას ვემიოტენთ-და, იეჰოვა გაკურთხენა.

19. მუშენ შეილებნა რდათ დარწმუნებულ, ნამდა იეჰოვაშ მოწონა გიღნა?

¹⁹ თქვან მიმართ იეჰოვაშ ჸოროფა დამოკიდებულ ვა რე არჩევანშა, ნამდგას თქვან სქუალეფ ორთნა. თის უჸორთ, მუშენდა თქვა გიჸორა თინა. ხვალახე მშობელ ქორეთ-და, იეჰოვა გოპირნა, ნამდა მუმა იჸუაფ თქვან სქუალეფშო დო დორთხილანა (ფსალმ. 68:5). თქვა ვაგგაკონტროლებენა, თქვან სქუალეფ სწორ გადაწყვეტილებას მიღენა დოვარ არასწორს, მარა ირიათო იეჰოვაშ იმენდ ქუგაღვენნა დო ნამ შეილებნან თის გაკეთენთ-და, თიშ მოწონას მიღენთ.