1-2. a) Azovy ma i Eonika, avio ino raha sarotro niain̈any? b) Hazavà sary amy fon̈ony gazety ty.

 BAIBOLY tsy mikoran̈a momba batisany Timoty. Kanefa ny raha azontsika antoko, ravoravo mare i Eonika, mamany Timoty, tamy fotoan̈a io. (Ohab. 23:25) Miniminia hely baka! Ravoravo mare i Eonika mizaha zanany io mitsangana an̈aty rano. Marikitry izy iô i Loisa, dadiny Timoty, mitana izy. Mimoe i Eonika. Lera zanany io najibiky tan̈atiny rano, misaora nitana fahin̈ana hely i Eonika. In̈y amy zay i Timoty niarin̈y baka tan̈aty rano sady ravoravo mare. Misaora niran̈aran̈a hely ranomasony Eonika taminio! Vitany fo nampianatra zanany ho tia Jehovah ndreky ho tia Jesosy Kristy, ndray tsy nora taminany raha zen̈y. Ino aby problemo tsy maintsy niriseny taminizy nampianatra zanany?

² Griky papany Timoty, fa mamany ndraiky Jiosy, ke tsy nitovy foeky fivavahan̈andro. (Asa. 16:1) Mbala manafolahy i Timoty, taminy Eonika ndreky Loisa nanjary Kristianin̈y. Kanefa, babany tsy nan̈araka fivavahan̈a kristianin̈y. Hay be fa Timoty ndraiky taminio efa ampy taon̈o, ke izy tsy maintsy nifidy azovy ny arehany. Han̈araka fivavahan̈any babany ma izy? Sa izy han̈araka Fivavahan̈a Jiosy, lay nampianarin̈y izy rango mbala hely? Sa izy hifidy han̈aradia Jesosy Kristy?

3. Maro reny miezaka man̈ampy zanakandro ho tia Zan̈ahary, ke akory fahitany Jehovah ezakandro zen̈y? (Ohabolana 1:8, 9)

³ Tia vady amanjanaka koa renimpianakavian̈a kristianin̈y. Ny raha ten̈a maventy amindro, tiandro hanjary kamaradiny Jehovah zanakandro. Ary ezakandro zen̈y ten̈a mamparavoravo Jehovah  Zan̈aharintsika. (Vakia Ohabolana 1:8, 9.) Efa maro renimpianakavian̈a nampiany Jehovah, ke nahavita nan̈ampy zanakandro ho tia izy ndreky hanompo izy.

4. Ino aby raha manahiran̈a renimpianakavian̈a amy zioty?

⁴ Ndraikindraiky, miasaloha hely renimpianakavian̈a mieritreritry asa zanakandro mba hanompo Jehovah karaha nataony Timoty in̈y. Normaly asalohandro zen̈y. Hainy raimandreny baka fa, doniany Satana ty ten̈a miforse zanakandro han̈ano safidy ratsy. (1 Pet. 5:8) Sôsoko zen̈y koa, maro reny tokanten̈a mitarimy zanakandro manokan̈a, na koa misy vady fo iro fa ramosendro tsy manompo Jehovah. Karaha zen̈y i Christine. b Karaha ty ho izy: “Vadiko ten̈a tia vady amanjanaka, fa tsy imboàny foeky zaho han̈ampy iry zanako hanjary Vavolombelon̈o Jehovah. Ke matetiky zaho nitomoan̈y, sady tan̈atiny taon̈otaon̈o. Niasaloha fo zaho asa mbala hanompo Jehovah edy iry zanako andra araiky!”

5. Ino ma raha hidinihintsika ato?

⁵ Niezaka i Eonika nampianatra zanany, baka tamy raha nivolan̈iny ndreky raha nataony. Ke izikoa anao renimpianakavian̈a, matokisa fa ho vitanao han̈ampy zanakanao ho tia Jehovah ndreky hanompo izy, karaha nataony Eonika in̈y. Hidinihintsika ato akory mety hangalanao tahaka raha nataony Eonika. Ho hitantsika ato koa fomba han̈ampiany Jehovah anao.

6. Izikoa 2 Timoty 3:14, 15 zahan̈a, akory nahavy i Timoty nanjary Kristianin̈y?

⁶ Tamy Timoty mbala hely, nifen̈y fo mamany nampianatra izy “Soratra Masin̈y”, eraka fazahoandro Jiosy aby io izio. Ke tamy zen̈y, nisy limitiny raha hainy Eonika, fotony tsisy raha hainy foeky momba Jesosy Kristy. Ndray zen̈y, raha jiaby nampianariny Eonika i Timoty nan̈ampy i Timoty hanjary Kristianin̈y. Timoty koa fa nahaibe, izy afaka nifidy hanjary pan̈aradia Kristy. Ke azo antoko fa, baka taminy ezakany Eonika nahavy i Timoty ‘resy lahatra ndreky nino’ fa marin̈y raha nianarany momba Jesosy. (Vakia 2 Timoty 3:14, 15.) Ravoravo i Eonika nampianatra zanany raha momba Jehovah, ndray tsy nora taminany nan̈ano raha zen̈y. Dikany an̈aran̈a “Eonika” zen̈y “mandresy.” Ke tondrany Eonika ankitin̈y an̈aran̈anany io.

7. Ndray Timoty efa vita batisa, akory nataony Eonika beky Timoty handroso arapan̈ahy fo?

⁷ Batisa dingana maventy tamy fiainan̈any Timoty. Izy ndray efa vita batisa, mbala nisy raha fo nampiasaloha i Eonika. Handeha hampiasainy Timoty aminino ma fiainan̈anany nanomboko tiô? Hiaraka amy namandratsy ma izy? Handeha hianatra a Athènes ma izy ke han̈araka fampianaran̈andro filôzaofy panompo sampy aby io? Hamory fanan̈ana ma handaniany fotoan̈anany, angovonany ndreky fahatanoran̈anany? Marin̈y fa tsy afaka nanapakevitry tamy plasiny Timoty foeky i Eonika. Kanefa, mbala nisy raha fo azony natao nan̈ampiany zanany io. Ino izio? Azony Eonika natao fo nan̈ampy zanany ho tia Jehovah amy fô jiaby ndreky hankasitraka raha nataony Jesosy. Marin̈y fa tsy nitaiza zanany manokan̈a i Eonika; fa ndray zen̈y, tsy nora taminany nan̈ampy zanany. Ary ndray panompony Jehovah olo aroe fivadiany, mbala tsy mora amindro fo han̈ampy zanakandro hanjary panompony Jehovah tsy mivadiky, fotony mila ampidirindro an̈atiny fôny zanakandro raha ampianarindro. Kanefa raha zen̈y tsy mora. Ino raha mety ianarany raimandreny baka aminy ohatra tsarany Eonika?

8. Izikoa Vavolombelon̈o Jehovah vadiny ranabavy araiky, akory mety han̈ampiany vadiny, lera rahalahy io mampianatra zanakandro raha momba Jehovah?

 ⁸ Mianara Baiboly miaraka amy zanakanao. Ranabavy, Vavolombelon̈o Jehovah ma vadinao? Mifen̈y ma izy man̈ampy zanakanaro hianatra raha momba Jehovah? Izikoa zen̈y, tiany Jehovah han̈ampy vadinao anao. Afaka man̈ano zen̈y anao, lera Fotoampivavahan̈any Fianakavian̈a. Anao aza mikritìky fomba fitaritany izio foeky, fa diniha ino raha azonao atao beky ho ravoravo aby anaro jiaby fehiny. Avio, ampia vadinao mitady hevitry mety dinihin̈y amy fotoampivavahan̈a. Akory fo basy izikoa zanakanaro sasany efa amy taon̈ony tsaiky mety ampianarin̈y Baiboly amy boky Mankafiza Fiain̈ana Tsisy Farany!? Anao afaka man̈ampy vadinao mampianatra iro.

9. Azovy afaka man̈ampy anao, izikoa vadinao tsy manompo Jehovah?

⁹ Misy renimpianakavian̈a sasany mitahiza manokan̈a zanakandro. Misy ndraiky manambady fa ramosendro tsy manompo Jehovah, ke tsy maintsy iro mampianatra Baiboly zanakandro. Izikoa karaha zen̈y anao, aza miasaloha, fotony Jehovah han̈ampy anao. Misy fitaovan̈a fampianaran̈a tsara mare naboakany fandaminan̈a, ke ampiasà iro io lera anao mampianatra zanakanao. Anao mety mangataka fan̈ampian̈a na torohevitry amy raimandreny efa ampy traikefa, amy zen̈y ho hainao raha mety hatao fotoampivavahan̈any fianakavian̈a. c (Ohab. 11:14) Vitany Jehovah koa man̈ampy anao hifampikoran̈a tsara amy zanakanao. Ke mivavaha beky izy han̈ampy anao hahay raha an̈atiny fô ndreky an̈atiny jeriny zanakanao. (Ohab. 20:5) Ndraikindraiky, fan̈ontanian̈a tsotra fo efa ampy hanombohan̈a koran̈a. Ohatra: ‘Ino ma problemo nandalo taminao ta lekaoly tan̈y?’

10. Ino koa fomba hafa mety hampianaranao zanakanao raha momba Jehovah?

¹⁰ Mitadiava hevitry hampianaran̈a zanakanao raha momba Jehovah. Koràn̈a raha momba Jehovah zanakanao, avio koràn̈a aminany koa fomba maro nan̈ampiany Jehovah anao. (Deot. 6:6, 7; Isaia 63:7) Ten̈a mila man̈ano zen̈y anao, intsaka eky izikoa anao tsy afaka mampianatra zanakanao matetiky, antran̈o. Karaha ty ho Christine, lay nikoran̈intsika taloha in̈y: “Tsy be fotoan̈a han̈anaovanay mianaka raha miaraka, ke isaka zahay tafiaraka, zaho efa man̈araraotro mikoran̈a raha momba Jehovah aminazy edy. Ohatra iziô, lera zahay miaraka mitsangatsangana na miondran̈a lakan̈a, zahay mikoran̈a raha arapan̈ahy na raha niasainy Jehovah. Izikoa fa nahaibe zanako, nampirisiko izy hianatra Baiboly manokan̈a.” Mbala misy raha hafa koa mety hataonao. Raha tsara momba fandaminan̈any Jehovah ndreky piaramanompo fo koràn̈a aminany. Aza mankaratsy antipan̈ahy foeky. Izikoa zen̈y raha ataonao, ho moramora amy zanakanao hangataka fan̈ampian̈a amindro afara an̈y, lera izy misy problemo.

11. Izikoa dinihin̈y Jakoba 3:18, nan̈ino ma ten̈a ilain̈a man̈ano raha hisiany fihavanan̈a an̈atiny tokantran̈o?

¹¹ Ataova raha hisiany fihavanan̈a an̈atiny tokantran̈onao. Ataova tsapany vadinao ndreky iry zanakanao fa tianao mare iro. Ke lera anao mikoran̈a amy vadinao, aboà fo fa anao tsara fan̈ahy sady man̈aja izy, avio ampià iry zanakanao han̈ano karaha zen̈y koa. Izikoa anao man̈ano zen̈y, hilamin̈y tsarabe tokantran̈onaro, ke ho mora amy zanakanao hianatra raha momba Jehovah. (Vakia Jakoba 3:18.) Diniha baka tantarany Jozsef, rahalahy pisava lalan̈a manokan̈a a Romania an̈y. Taminizy mbala  hely, nanohitry mare babany ke sarotro tamindro efatra mianadahy ndreky mamandro nanompo Jehovah. Ho izy: “Nifen̈y fo mamako beky ho tsara fihavanan̈a fo zahay tran̈o araiky. Papa koa fa nan̈ajima mare, mama tsara fan̈ahy fo. Azony mamako onon̈o fa sarotro taminay nan̈aja papanay ndreky nan̈araka volan̈anany, ke nidinihiny mamako niaraka taminay raha koran̈iny Efesianina 6:1-3. Avio nikoran̈iny taminay toetry tsarany papa. Ke nanjary nazava taminay fa tokony ho tianay fo papanay. Zen̈y koa nahavy zahay tran̈o araiky nanjary nihavan̈a tsarabe.”

12. Izikoa 2 Timoty 1:5 zahan̈a, ino vokatrany modely tsara nambelany Eonika tamy Timoty?

¹² Vakia 2 Timoty 1:5. Ten̈a modely tsara nalainy Timoty tahaka i Eonika. Tsy maintsy nampianariny i Timoty iziô ohatra, fa ten̈a finoan̈a zen̈y mila aboaka amy raha atao. (Jak. 2:26) Hitany Timoty fa fitiavan̈a Jehovah nandrisiky mamany han̈ano raha. Ravoravo i Eonika nanompo Jehovah, ary hay be fa hitany Timoty raha zen̈y. Ino ma vokatranizen̈y taminany? Nivolan̈a apostoly Paoly fa nanjary nanan̈a finoan̈a matanjaka i Timoty, karaha i Eonika fo. Tsy navinavy ho azy raha zen̈y. Nandiniky ohatra tsarany Eonika i Timoty, ke nanjary tihangala tahaka mamany io izy. Maro koa avahizo, reny man̈ano karaha nataony Eonika in̈y. Mifen̈y iro ho modely tsara, ‘tsy amy volan̈a’ fo fa amy raha atao koa, ke nanjary panompony Jehovah koa fianakavian̈andro. (1 Pet. 3:1, 2) Mety man̈ano karaha zen̈y koa anao.

13. Nan̈ino ma tokony ho raha ten̈a maventy amy reny araiky fihavanan̈anany amy Jehovah?

¹³ Ataova raha farany maventy aminao fihavanan̈anao amy Jehovah. (Deot. 6:5, 6) Mahafoe raha maro anao, karaha renimpianakavian̈a maro. Anao mahafoe fotoan̈a, vola, tôromaso ndreky raha maro hafa beky iry zanakanao hahazo raha ilaindro. Ndray zen̈y, anao aza rikian̈a loatra amy fikarakaran̈a tsaiky. Nan̈ino? Fotony tsy hahita fotoan̈a hankafataran̈a fihavanan̈anao amy Jehovah anao izikoa zen̈y fo raha mahasôfy anao. Manokàn̈a fotoan̈a tsy tapaka hivavahan̈a mitokan̈a, hianaran̈a Baiboly ndreky hivorian̈a. Ho tsara fihavanan̈a amy Jehovah anao izikoa man̈ano zen̈y, sady hanjary ohatra tsara amy fianakavian̈anao ndreky aminolo hafa.

14-15. Ino raha ianaranao baka amy tantarany Leanne, Maria, avio João?

¹⁴ Maro tanora nianatra ho tia Jehovah sady natoky izy, iro koa fa nandiniky ohatra tsarany mamandro. Handiniky sasany amy zen̈y atsika. Karaha ty ohatra nambarany Leanne, zanakany Christine: “Papa koa fa tantran̈o, zahay tsy afaka nianatra Baiboly. Fa mamanay tsiary vôly nivory. Marin̈y fa tsy be raha hainay momba Baiboly, kanefa modely tsara nambelany mamanay nan̈ampy zahay hanan̈a finoan̈a matanjaka. Efa hainay fa marin̈y raha ampianariny Vavolombelon̈o Jehovah, ndray tamy zahay mbala tsy honohono nandeha nivory.”

¹⁵ Tsy manompo Jehovah papany Maria. Neloko nifaotafaota babany io, isaka izy ndreky mamany baka nivory. Ho Maria: “Mamako an̈isany olo misy korazy mare. Tamy zaho mbala hely, tsy nan̈eky han̈ano raha sasany zaho ndraikindraiky fotony zaho navozo tsao volan̈inolo. Fa tafara, zaho efa tsy navozo olo eky, fotony hitako fa mamako ten̈a nisy korazy. Tsisy raha natakalony i Jehovah foeky.” Tsy nimboàny babany hikoran̈a raha arapan̈ahy koa iry João, koa fa tantran̈o. Karaha ty ho João: “Nan̈ampy zaho mare modely tsarany mama. Izy vôn̈ono hilefitry amy raha jiaby beky papa ho ravoravo, fa raha araiky fo tsy niliferiny: Fitiavany i Jehovah.”

16. Misy vokany aminolo hafa ma modely tsara ambelany renimpianakavian̈a? Hazavà.

 ¹⁶ Anaro reny, alevanaro onon̈o fa misy vokany aminolo hafa raha ataonaro. Diniha baka i Eonika. Nisy vokany taminy apostoly Paoly modely tsara nambelany. Nivolan̈a foeky i Paoly fa nanan̈a finoan̈a tsy mitsaravelatsihy i Eonika, ke nifindra tamy Timoty zanany raha zen̈y. (2 Tim. 1:5) Rango ombian̈a ma i Paoly nahita finoan̈any Eonika io? Mety tamy dia misionera voanalohany nataony donko izy nitraotro taminy Eonika ndreky Loisa, ta Lystra. Ary mety izy donko nan̈ampy iro io hanjary Kristianin̈y. (Asa. 14:4-18) Ino amy zay raha nandalo 15 taon̈o tafara? Nanoratra tamy Timoty i Paoly, fa mbala azony on̈ono fo finoan̈any Eonika, avio nivolan̈a koa izy fa tsara alain̈a tahaka ranabavy io. Hita baka amy zen̈y fa nisy vokany tsara taminy apostoly Paoly ndreky tamy Kristianin̈y hafa tamy taonjato voanalohany ankitin̈y finoan̈any Eonika. Ke izikoa anao mitarimy zanakanao manokan̈a, na vadinao tsy panompony Jehovah, matokisa fa mankahery olo hafa ndreky mandrisiky iro han̈ano raha tsara tsy fivadihan̈anao ndreky modely tsara ambelanao.

17. Ino raha tokony hataonao izikoa tsapanao fa tsy mieritreritry hanompo Jehovah foeky zanakanao, ndray anao efa mifen̈y mare man̈ampy izy?

¹⁷ Akory fo basy izikoa efa nifen̈y angôvo jiaby anao nan̈ano zay vitanao, fa karaha tsisy vokany amy zanakanao foeky ezakanao aby zen̈y? Tsaraova fa mampiofan̈a tsaiky zen̈y tsy vita betibetiky, fa mila fotoan̈a. Izio miran̈a anao mambôly ambeo, karaha hitantsika amy  sary io. Mety ho lôso eritreritry anao: ‘Raha mba hitombo edy ambeo in̈y ke hamoa afarafara an̈y?’ Ndray tsy hainao izio haniry va tsy haniry, rozenao matetiky fo izio beky mitombo. (Mar. 4:26-29) Karaha zen̈y koa raha mety ho tsapanao, izikoa anao renimpianakavian̈a. Mety hiasaloha anao izikoa ten̈a han̈ampy zanakanao ho tia Jehovah ankitin̈y ezaka jiaby ataonao sa karakory. Marin̈y ndraiky fa anao tsy afaka manapakevitry amy plasiny zanakanao. Kanefa, izikoa anao man̈ano zay vitanao hampiofanan̈a iro, mety hanjary kamaradiny Zan̈ahary fo iro andra araiky an̈y.​—Ohab. 22:6.

18. Akory ataony Jehovah man̈ampy zanakanao hanjary kamaradiny?

¹⁸ Efa rango ela Jehovah nan̈ampy tanora marobe hanjary kamaradiny. (Sal. 22:9, 10) Avio izikoa zanakanao tiho kamaradiny, Izy afaka man̈ampy zanakanao. (1 Kor. 3:6, 7) Ary ndray zanakanao zahan̈a karaha niala Jehovah, mbala tia izy fo Jehovah ke hitsinjo izy. (Sal. 11:4) Miaraka Jehovah mahita ‘raha tsara an̈atiny fônany’ ao, ndray hely fo, Jehovah efa vôn̈ono handray izy edy. (Asa. 13:48; 2 Tan. 16:9) Mety hataony Jehovah raha hahavy anao hivolan̈a raha manohin̈y fôny zanakanao, amy fotoan̈a ten̈a ilavany zanakanao raha zen̈y. (Ohab. 15:23) Na mety hataony Jehovah koa raha hahavy rahalahy na ranabavy araiky be fitiavan̈a hikarakara izy. Ndray efa olobe zanakanao, mbala mety hampatsiarôviny Jehovah izy fo raha nampianarin̈y izy taminizy mbala hely. (Jaona 14:26) Izikoa mifen̈y anao mampianatra zanakanao, tsy amy raha volan̈inao fo fa amy raha ataonao koa, Jehovah tsy maintsy hitahy anao.

19. Nan̈ino ma anao matoky fa anao ankasitrahiny Jehovah?

¹⁹ Fitiavany Jehovah anao tsy miankin̈y amy safidiny zanakanao. Anao tiany, fotony anao tia izy. Ke izikoa anao mitarimy zanakanao manokan̈a, aleva onon̈o raha nampan̈antin̈ainy Jehovah amy Salamo 68:5 ao. Mivolan̈a Jehovah ao fa izy hanjary Baba hikarakara zanakanao, ndreky Piaro anao. Anao tsy afaka hiforse zanakanao han̈ano safidy tsara. Kanefa, hahazo rady amy Jehovah anao, izikoa anao mitavandra izy sady tsy vôly man̈ano ny farany tsara vitanao.