1, 2. 1) ¿Máax Eunice, yéetel baʼax tu aktáantaj utiaʼal u kaʼansik u hijo? 2) Tsol baʼax ku chíikpajal teʼ dibujo yaan tu yáax páginail le revistaaʼ.

 KEX le Biblia maʼatech u tʼaan tiʼ le kʼiin ka okjaʼanaj Timoteooʼ, jach kiʼimakchaj wal u yóol u maama le ka okjaʼanajoʼ (Pro. 23:25). Chéen máans ta tuukul bix tu yuʼubiluba Eunice le ka tu yilaj jach taʼaytak u yokjaʼ u hijooʼ. Maʼ xaaneʼ Loida, u abuela Timoteoeʼ, náatsʼ tu yiknal Euniceeʼ ka tu méekʼaj. Euniceeʼ tu yuʼubaj wal u kukulankil u puksiʼikʼal le ka tu yilaj u tʼuʼubul Timoteo ichil le jaʼoʼ. Maʼ xaaneʼ hasta káaj u yáalal u jaʼil u yich le ka tu yilaj u jóokʼol u hijo ichil le jaʼ jach kiʼimak u yóoloʼ. Kex maʼ chéen chʼaʼabileʼ páajchaj u yáantik Timoteo u yaabilt Jéeoba bey xan Jesucristo. Chéen baʼaleʼ, ¿baʼax problemail yanchaj u aktáantik utiaʼal u yáantik u hijo?

² U papá yéetel u maama Timoteoeʼ maʼ junpʼéeliliʼ u religiónoʼob kaʼachiʼ. U papáeʼ griego yéetel u maama bey xan u abuelaeʼ judíaʼob (Hech. 16:1). Maʼ xaaneʼ le ka tu beetuba cristianail Eunice yéetel Loidaeʼ, Timoteoeʼ tsʼoʼok u chan nojochtal. Le oʼolal jeʼel u páajtal kaʼach u chʼaʼtuklik wa yaan u seguertik u religión u maamaeʼ wa u religión u papá. ¿Baʼax túun tu beetaj? ¿Tu seguertaj wa u religión u papá? ¿Seguernaj wa u beetik le baʼaxoʼob kaʼansaʼabtiʼ desde tu chichnil  ichil u religión le judíoʼoboʼ wa tu beetuba u discípulo Cristo?

3. Jeʼex u yaʼalik Proverbios 1:8, 9, ¿bix u yilik Jéeoba tuláakal le baʼax ku beetik le maamatsiloʼob utiaʼal u yáantik u paalaloʼob u bisubaʼob tu yéeteloʼ?

³ Jeʼex Euniceeʼ teʼ kʼiinoʼobaʼ le kiikoʼoboʼ jach u yaabiltmaj xan u familiaʼob. Le oʼolal ku yilik u yáantik u paalaloʼob u bisubaʼob yéetel Jéeoba, letiʼeʼ jach ku kiʼimaktal u yóol kéen u yil baʼax ku beetkoʼob (xok Proverbios 1:8, 9). Jéeobaeʼ tsʼoʼok u yáantik yaʼab maamatsiloʼob utiaʼal u yáantik u paalaloʼob u yaabiltoʼob u jaajil.

4. ¿Baʼax ku aktáantik yaʼab maamatsiloʼob teʼ kʼiinoʼobaʼ?

⁴ U jaajileʼ yaan kʼiineʼ le maamatsiloʼobo ku máansik tu tuukuloʼob wa yaan u chʼaʼtuklik u paalaloʼob u meyajtikoʼob Jéeoba jeʼex tu beetil Timoteooʼ. Letiʼobeʼ u yojloʼobeʼ yaʼab baʼaloʼob ku aktáantik u paalaloʼob teʼ tu kʼasaʼan yóokʼol kaab Satanásaʼ (1 Ped. 5:8). Tsʼoʼoleʼ yaʼab maamatsiloʼobeʼ chéen tu juunal ku líiʼsik u paalaloʼob, yaan kʼiineʼ tumen minaʼan u yíichamoʼob wa tumen u yíichamoʼobeʼ maʼ u testigo Jéeobaiʼ. Juntúul kiik ku kʼaabaʼtik Christineeʼ, b ku yaʼalik: «In wíichameʼ juntúul maʼalob taatatsil yéetel jach u yaabiltmoʼon, chéen baʼaleʼ maʼatech u chaʼik in kaʼansik tiʼ in paalaloʼob ka u meyajtoʼob Jéeoba. Yaʼab u téeneleʼ kin wokʼol yéetel kin máansik tin tuukul wa yaan u kʼuchul u kʼiinil u meyajtaʼal Jéeoba tumen in paalal».

5. ¿Baʼax ken k-il teʼ xookaʼ?

⁵ Wa maamatsilecheʼ jeʼel u páajtal a wáantik a paalal u yaabiltoʼob yéetel u meyajtoʼob Jéeoba jeʼex tu beetil Euniceoʼ. Teʼ xookaʼ yaan k-ilik bix jeʼel a seguertik u ejemplo Eunice utiaʼal a kaʼansik a paalal yéetel baʼax ka waʼalik bey xan yéetel baʼax ka beetik. Tsʼoʼoleʼ yaan xan k-ilik bix jeʼel u yáantkech Jéeobaeʼ.

6. Jeʼex u yaʼalik 2 Timoteo 3:14, 15, ¿baʼax áant Timoteo u beetuba u discípulo Jesús?

⁶ Desde tu chichnil Timoteoeʼ, Euniceeʼ tu yilaj u kaʼansiktiʼ u Tʼaan Dios jeʼex u naʼatik kaʼach le judíoʼoboʼ. Euniceeʼ maʼ u yojel mix baʼal kaʼach yoʼolal Jesucristoiʼ. Kex beyoʼ le baʼax tu kaʼansaj tiʼ Timoteooʼ le kun áantik kaʼach u beetuba u discípulo Cristo. Timoteoeʼ tsʼoʼok u chan nojochtal le oʼolal jeʼel u páajtal kaʼach u chʼaʼtuklik baʼax ken u beet yéetel u kuxtaleʼ. Le baʼaxoʼob tu beetaj u maamaoʼ le áant u creert u jaajil yoʼolal Jesús (xok 2 Timoteo 3:14, 15). ¡Jach kiʼimakchaj wal u yóol Eunice úuchik u yáantik u hijo u kʼaj óolt Jéeobaeʼ! Le kʼaabaʼ Euniceoʼ u kʼáat u yaʼal «ganar», bey túunoʼ letiʼeʼ ganarnaj jeʼex u yaʼalik u kʼaabaʼoʼ.

7. ¿Bix áantaʼabik Timoteo tumen Eunice utiaʼal u seguer u progresar ka tsʼoʼok u yokjaʼ?

⁷ Timoteoeʼ tu chʼaʼtuklaj u yokjaʼ, chéen baʼaleʼ yaan uláakʼ baʼaxoʼob preocupartik kaʼach Eunice. ¿Baʼax ken u beet beora Timoteoaʼ? ¿Yaan wa u chaʼik u kʼaskúuntaʼal u tuukul tumen le máaxoʼob yéetel ku biskubaoʼ? ¿Yaan wa u bin xook Atenas yéetel u páakʼaltiʼ le baʼaxoʼob ku kaʼansaʼal teʼeloʼ? ¿Yaan wa u xupik u tiempo, u muukʼ yéetel u táankelmil chéen utiaʼal u kaxtik ayikʼaliloʼob? Timoteo unaj u chʼaʼtuklik kaʼach baʼax ken u beete, chéen baʼaleʼ Euniceeʼ jeʼel u páajtal kaʼach u yáantik u yaabilt Jéeobaeʼ bey xan Jesús. U jaajileʼ kex le taatatsil yéetel le maamatsil ku meyajtikoʼob Diosoʼ deporsi maʼ chéen chʼaʼabil u yáantik u paalaloʼob u meyajtoʼob Jéeobaiʼ. Le oʼolaleʼ, ¿baʼax jeʼel u páajtal u kanik le taatatsiloʼob yéetel le maamatsiloʼob tiʼ Euniceoʼ?

8. Juntúul atantsileʼ, ¿bix jeʼel u múul meyaj yéetel u yíicham utiaʼal u yáantkoʼob u paalaloʼob u natsʼubaʼob yiknal Dioseʼ?

 ⁸ Xakʼalxokt le Biblia yéetel a paalaloʼ. Wa a wíicham juntúul Testigoeʼ Jéeobaeʼ u kʼáat ka a wáant utiaʼal a kaʼanskeʼex u jaajil tiʼ a paalaleʼex. Junpʼéel bixeʼ letiʼe a wáantik u beet le adoración ich familia cada semanaoʼ. Eʼes jatsʼuts a wilik le xookoʼ yéetel tukult baʼax jeʼel u páajtal a beetik utiaʼal u disfrutartaʼal tumen tuláakal le familiaoʼ. Maʼ xaaneʼ jeʼel u páajtal a wáantik a wíicham utiaʼal a wilkeʼex baʼax unaj a xakʼalxoktikeʼex teʼ Bibliaoʼ wa uláakʼ baʼax kʼaʼanaʼan a wilkeʼex. Tsʼoʼoleʼ wa ka wilkeʼex tsʼoʼok u pʼiistal a paalaleʼex utiaʼal u tsʼaʼabal xook tiʼob yéetel le libro Disfrutart le kuxtaloʼ, jeʼel u páajtal a wáantik a wíicham u tsʼáa le xookoʼ.

9. ¿Baʼaxoʼob jeʼel u yáantik juntúul maamatsil chéen tu juunal ku kaʼansik u paalaleʼ?

⁹ Jujuntúul maamatsiloʼobeʼ letiʼob tsʼáaik xook tiʼ u paalaloʼob tumen minaʼan u yíichamoʼob wa tumen u yíichamoʼobeʼ maʼatech u meyajtikoʼob Jéeoba. Wa bey u yúuchultechoʼ maʼ a preocuparkaba Jéeoba kun áantkech. Ilawil u meyajtech tuláakal le baʼaxoʼob ku tsʼáaik u kaajal Dios utiaʼal a xakʼalxook yéetel a paalaloʼ. Jeʼel xan u páajtal a tsikbal yéetel uláakʼ maamatsiloʼob wa taatatsiloʼob utiaʼal a kʼáatiktiʼob bix táan u meyajtiʼob le baʼaxoʼob u tsʼaamaj u kaajal Diosoʼ c (Pro. 11:14). Kʼáat tiʼ Jéeoba ka u yáantech a wojéelt baʼax ku tuklik a paalal yéetel bix u yuʼubikubaʼob (Pro. 20:5). Maʼ xaaneʼ utiaʼal u káajal a tsikbal yéetel juntúul a paaleʼ jeʼel u páajtal a kʼáatiktiʼeʼ: «¿Baʼax problemasil ku yantaltech teʼ escuelaoʼ?».

10. ¿Baʼax uláakʼ jeʼel u páajtal a beetik utiaʼal a wáantik a paalal u kʼaj óoltoʼob Jéeobaeʼ?

¹⁰ Kaxt súutukiloʼob utiaʼal a wáantik a paalal u kʼaj óoltoʼob Jéeoba. Tsikbalttiʼob bix Jéeoba yéetel baʼaxoʼob tsʼoʼok u beetik ta woʼolal (Deu. 6:6, 7; Isa. 63:7). Lelaʼ maas kʼaʼanaʼan a beetik wa maʼ tu páajtal a xook yéetel a paalal ta wotoch. Christine, le kiik t-chʼaʼchiʼitaj teʼ párrafo 4, ku yaʼalik: «Como óoliʼ maʼ tu páajtal in xokik le Biblia yéetel in paalaloʼ kin wilik in aprovechartik tuláakal súutukil utiaʼal in kaʼanskoʼob. Yaan horaeʼ k-jóokʼol xíimbal wa maʼeʼ k-naʼakal tiʼ junpʼéel chan canoa, mientras táan k-bin ichil le jaʼoʼ k-tsikbal tiʼ le baʼaxoʼob u beetmaj Jéeobaoʼ wa yoʼolal uláakʼ baʼaloʼob jeʼel u yáantik in paalal u natsʼubaʼob tu yiknaleʼ. Le ka chan nojochchaj in paalaleʼ tin waʼalajtiʼob ka u xokoʼob le Biblia tu juunaloʼoboʼ». Maʼalob xan ka tʼaanakoʼon maʼalob tiʼ u kaajal Dios bey xan tiʼ le sukuʼunoʼoboʼ. Maʼ unaj xan k-criticartik le ancianoʼoboʼ. Wa ka tʼaan maʼalob tiʼ letiʼobeʼ a paalaleʼ jeʼel u kʼáatkoʼob áantaj tiʼ letiʼob kéen kʼaʼabéetchajkeʼ.

11. Jeʼex u yaʼalik Santiago 3:18, ¿baʼaxten unaj k-ilik ka yanak jeetsʼelil ichil k-otoch?

¹¹ Áantajnen utiaʼal ka yanak jeetsʼelil ta wotoch. Suukak a waʼalik tiʼ a wíicham yéetel tiʼ a paalal jach a yaabiltmoʼob. Tʼaanen maʼalob tiʼ a wíicham yéetel respetarte. Tsʼoʼoleʼ kaʼans xan tiʼ a paalal ka u beetoʼob beyoʼ. Leloʼ yaan u yáantaj utiaʼal ka yanak jeetsʼelil ta wotoch, yéetel maas yaan u páajtal a wáantik a paalal u natsʼubaʼob yiknal Jéeoba (xok Santiago 3:18). Koʼoneʼex ilik baʼax úuch tiʼ Jozsef, juntúul precursor especial ku yáantaj tu luʼumil Rumania. Tu chichnileʼ letiʼ, u maama, u kiik yéetel u yíitsʼinoʼobeʼ ku meyajtikoʼob Jéeoba, chéen baʼaleʼ u papáeʼ u pʼeek. Jozsefeʼ ku yaʼalik: «In maamaeʼ ku beetik kaʼach tuláakal le ku páajtal utiaʼal ka yanak jeetsʼelil ichil  k-otoch. Le kéen u yil tsʼíik in papáeʼ maas ku yeʼesik u yutsil. Le kéen u yil ku chan talamtaltoʼon k-respetartik yéetel k-obedecertik in papáeʼ ku xakʼaltik t-éetel le baʼax ku yaʼalik Efesios 6:1 tak 3. Le kéen tsʼoʼokkeʼ ku yaʼaliktoʼon le jatsʼuts modos yaan tiʼ in papáoʼ yéetel ku yáantkoʼon k-naʼat baʼaxten unaj k-respetartik. Bey áantajnajik utiaʼal u yantal jeetsʼelil ichil k-otochoʼ».

12. Jeʼex u yaʼalik 2 Timoteo 1:5, ¿bix áantaʼabik Timoteo tumen u ejemplo Eunice?

¹² (Xok 2 Timoteo 1:5). Euniceeʼ tu tsʼáaj junpʼéel maʼalob ejemplo tiʼ Timoteo. Tu kaʼansajtiʼeʼ u fe máakeʼ ku yeʼesik yéetel baʼax ku beetik (Sant. 2:26). Timoteoeʼ tu yileʼ u maamaeʼ tu yeʼesaj jach u yaabiltmaj Jéeoba yéetel le baʼax ku beetkoʼ yéetel jach kiʼimak u yóol u meyajtik. ¿Bix áantaʼabik tumen le ejemplo tsʼaʼabtiʼ tumen u maamaoʼ? Apóstol Pabloeʼ tu yaʼaleʼ Timoteoeʼ yaantiʼ kaʼach junpʼéel fe jeʼex le yaan tiʼ u maamaoʼ. Tu yilaj le baʼax ku beetik u maamaoʼ ka tu beetaj xan beyoʼ. Teʼ kʼiinoʼobaʼ yaʼab maamatsiloʼob xaneʼ tsʼoʼok u kʼuchloʼob tu puksiʼikʼal u familiaʼob kex maʼ tu yaʼalikoʼob mix baʼal (1 Ped. 3:1, 2). ¿Bix jeʼel u páajtal a beetik beyoʼ? Koʼox ilik.

13. ¿Baʼaxten le maamatsiloʼ unaj u tsʼáaik táanil Jéeoba ichil u kuxtal?

¹³ Tsʼáa táanil Jéeoba ichil a kuxtal (Deu. 6:5, 6). Jeʼex u beetik yaʼab maamatsiloʼobeʼ maʼ xaaneʼ techeʼ utiaʼal a tsʼáaik baʼax kʼaʼabéet tiʼ a paalaleʼ ka xupik a tiempo, a muukʼ yéetel a taakʼin. Kex jach maʼalob a beetik leloʼ ilawil maʼ a tsʼáaik juntséelil Jéeoba. Jóoʼs tiempo utiaʼal a orar, utiaʼal a xakʼalxoktik le Bibliaoʼ yéetel utiaʼal a bin teʼ muchʼtáambaloʼoboʼ. Beyoʼ yaan a biskaba maas maʼalob yéetel Jéeoba yéetel yaan a tsʼáaik junpʼéel maʼalob ejemplo tiʼ a familia bey xan tiʼ uláakʼ máakoʼob.

14, 15. ¿Baʼax ka kanik tiʼ u ejemplo Leanne, María yéetel João?

¹⁴ Koʼoneʼex tʼaan tiʼ jujuntúul paalaloʼob kʼuch u yaabiltoʼob Jéeoba yéetel confiarnajoʼob tiʼ letiʼ úuchik u yilkoʼob u ejemplo u maamaʼob. Leanne, juntúul tiʼ u hijaʼob Christineeʼ, ku yaʼalik: «Wa tiaʼan in papá tin wotocheʼ maʼ tu páajtal kaʼach k-xokik le Bibliaoʼ. Chéen baʼaleʼ in maamaeʼ mix juntéen pʼáat maʼ u bin teʼ muchʼtáambaloʼoboʼ. Kex maʼ yaʼab baʼaloʼob k-ojel kaʼach tiʼ le Bibliaoʼ le maʼalob ejemplo tu tsʼáajtoʼon in maamaoʼ jach tu yáantoʼon utiaʼal ka muʼukʼaʼanchajak k-fe. Táanil tiʼ u káajal k-bin teʼ muchʼtáambaloʼoboʼ tsʼokaʼaniliʼ k-tsʼáaik cuenta letiʼe u jaajiloʼ».

¹⁵ Beoraaʼ koʼoneʼex tʼaan tiʼ María, juntúul x-chʼúupal yaan kʼiin ku castigartaʼaloʼob tumen u papá le kéen xiʼikoʼob muchʼtáambal. Letiʼeʼ ku yaʼalik: «In maamaeʼ juntúul tiʼ le máaxoʼob meyajtik Dios jach maʼ sajakoʼ. Tin chichnileʼ jach saajken in burlartaʼal tumen u maasil, le oʼolaleʼ yaan baʼaloʼob maʼalobtak unaj in beetkeʼ maʼ tin beetiʼ. Chéen baʼaleʼ úuchik in wilik maʼ sajak in maama yéetel mantatsʼ ku tsʼáaik táanil Jéeobaeʼ jach tu yáanten utiaʼal maʼ in chʼaʼik saajkil». João, juntúul sukuʼun maʼ tu chaʼabaltiʼob kaʼach u tsikbaloʼob yoʼolal le Biblia tu yotochoʼ, ku yaʼalik: «Tin wileʼ in maamaeʼ utiaʼal u kiʼimakkúuntik u yóol in papáeʼ dispuesta u beet jeʼel baʼaxakeʼ, menos u xuʼulul u yaabiltik Jéeoba».

16. ¿Bix u yáantaj le ejemplo ku tsʼáaik juntúul maamatsiloʼ?

¹⁶ Maʼ u tuʼubultecheʼ le baʼax ka beetkoʼ jach jeʼel u yáantik u maasileʼ. Koʼox ilik bix tu yilil le apóstol Pablo le ejemplo tu  tsʼáaj Euniceoʼ. Letiʼeʼ tu tsʼíibteʼ le fe ku yeʼesik Timoteooʼ bey jeʼex le fe yaan kaʼach tiʼ Euniceoʼ (2 Tim. 1:5). ¿Baʼax kʼiin ka tu yilaj Pablo le fe yaan kaʼach tiʼ Euniceoʼ? Maʼ xaaneʼ tu kʼaj óoltaj Loida yéetel Eunice tu kaajil Listra, le yáax ka kʼuch bey misioneroil teʼ kaajoʼ. Maʼ xaaneʼ letiʼ áantoʼob utiaʼal ka u beetubaʼob u discípulaʼob Cristo (Hech. 14:4-18). Quince años úuchuk lelaʼ, le ka tu túuxtaj junpʼéel carta tiʼ Timoteoeʼ, Pabloeʼ láayliʼ kʼajaʼantiʼ le fe tu yeʼesaj Euniceoʼ yéetel tu yaʼaleʼ junpʼéel jach maʼalob ejemplo. Jeʼex k-ilkoʼ Pabloeʼ jach kaanbalnaj tiʼ u ejemplo Eunice yéetel maʼ xaaneʼ bey xan tu beetil uláakʼ sukuʼunoʼoboʼ. Wa chéen ta juunal ka líiʼsik a paalal bey xan wa a wíicham maʼatech u meyajtik Jéeobaeʼ maʼ u tuʼubultecheʼ le ejemplo ka tsʼáaikoʼ jach jeʼel u yáantik u maasileʼ.

17. ¿Baʼax unaj a beetik wa ka tuklik chéen kunel baʼax ka beetik yoʼolal a paalal?

¹⁷ ¿Kux túun wa ka tuklik chéen kunel baʼax ka beetik yoʼolal a paalal? Maʼ u tuʼubultecheʼ ku bisik tiempo u kaʼansaʼal juntúul paal. Jeʼex u chíikpajal teʼ dibujoʼoboʼ le kéen u pakʼ máak junpʼéel chan semillaeʼ maʼ xaaneʼ ku máansik tu tuukul wa yaan u jóokʼol bey xan wa yaan u tsʼáaik u yich. Kex beyoʼ ku jóoyabtik máak tumen taak u yáantik utiaʼal ka nojochchajak yéetel ka u tsʼáa u yich (Mar. 4:26-29). Bey túun xanoʼ maʼ xaaneʼ techeʼ yaan kʼiin ka máansik ta tuukul wa táan u kʼuchul tu puksiʼikʼal a paal le baʼax ka kaʼansiktiʼoʼ. Kex maʼ tu páajtal a wojéeltik baʼax ken u  chʼaʼtukult kéen nojochchajkeʼ wa ku seguer a kaʼansikeʼ yaan a wáantik utiaʼal ka u maas natsʼuba yiknal Jéeoba (Pro. 22:6).

18. ¿Bix jeʼel u yáantaʼal a paalal tumen Jéeoba utiaʼal u progresaroʼobeʼ?

¹⁸ Desde úuchjeakileʼ Jéeobaeʼ tsʼoʼok u yáantik yaʼab táankelmoʼob utiaʼal ka u bisubaʼob tu yéetel (Sal. 22:9, 10). Letiʼeʼ jeʼel u páajtal xan u yáantik a paalal wa letiʼob u kʼáatoʼobeʼ (1 Cor. 3:6, 7). Kex ka a wil bey táan u náachtaloʼob tiʼ Jéeobaeʼ letiʼeʼ mix bikʼin ken u pʼatoʼob tu juunaloʼob (Sal. 11:4). Le kéen u yil taak u natsʼkubaʼob tu yiknaleʼ tu séebaʼanil ken u yáantoʼob (Hech. 13:48; 2 Cró. 16:9). Jéeobaeʼ jeʼel u yáantkech xan a wil baʼax jeʼel u páajtal a waʼalik tiʼ a paalal teʼ súutuk kʼaʼabéettiʼoboʼ (Pro. 15:23). Jeʼel u péeksik xan juntúul sukuʼun wa juntúul kiik utiaʼal u yáantik a paalaleʼ. Kex tsʼoʼok u nojochtaloʼobeʼ Jéeobaeʼ jeʼel u yáantkoʼob u kʼaʼajsoʼob jujunpʼéel tiʼ le baʼaxoʼob ta kaʼansajtiʼob tu chichniloʼoboʼ (Juan 14:26). Wa maʼ tu xuʼulul a kaʼansik a paalal yéetel baʼax ka waʼalik bey xan yéetel baʼax ka beetkeʼ Jéeobaeʼ jach yaan u bendecirkech.

19. ¿Baʼaxten jeʼel u páajtal k-aʼalikeʼ maʼalob yanikech tu táan Jéeoba?

¹⁹ Le yaabilaj ku yuʼubik Jéeoba ta woʼolaloʼ maʼ tu depender tiʼ le baʼax ku chʼaʼtuklik u beetik a paalaloʼ. Letiʼeʼ u yaabiltmech tumen techeʼ a yaabiltmaj xan. Wa ta juunal ka líiʼsik a paalal bey xan wa a wíicham maʼ Testigoeʼ kʼaʼajaktecheʼ Jéeobaeʼ u prometermaj u kanáantkech yéetel yaan u beetkuba bey juntúul taatatsil tiʼ a paalaleʼ (Sal. 68:5). U jaajileʼ techeʼ maʼ tu páajtal a wojéeltik wa a paalaleʼ yaan u chʼaʼtuklikoʼob u meyajtikoʼob Dios, chéen baʼaleʼ wa maʼ tu xuʼulul a confiar tiʼ Jéeoba yéetel ka wilik a wáantkoʼobeʼ tu táan letiʼeʼ maʼalob yanikech.