1, 2. a) ¿Tuu nga Eunice, ne xi guendanagana bidxaagalube dxi cusiniisibe xiiñibe? b) Bizeeteʼ xi cazaaca lu imagen ni zeeda lu portada.

 NECA qué ruzeeteʼ Biblia dxi guyuunisa Timoteo, peru zanda guxuíʼlunu pabiáʼ biecheʼ jñaabe, Eunice, dxi que (Prov. 23:25). Nánnanu nayecheʼ guyuube ora bíʼyabe ziyuu xiiñibe ndaaniʼ nisa que ne mayaca chúʼnisa. Laga cayuuyadxibe, bidxiña Loida, jñaabiidaʼ Timoteo, ne gudiidxi laabe. Dede gucuaalaʼdxiʼ Eunice ora biʼyaʼ caguucabe Timoteo ndaaniʼ nisa. Ne bidá nisa lube ora bíʼyabe cabeecabe xiiñibe ndaaniʼ nisa ne nayecheʼ nuu. Neca bidxaagalú Eunice guendanagana, peru gunda bisiidibe Timoteo gannaxhii Jehová ne Xiiñiʼ, Jesucristu. ¿Xii nga ca guendanagana bidxaagalú Eunice yaʼ?

² Gadxé religión gupa bixhoze ne jñaa Timoteo. Bixhózebe la? griegu laa ne jñaabe ne jñaabiidabe la? judía laacaʼ (Hech. 16:1). Zándaca maʼ joven Timoteo nga dxi guca Eunice ne Loida xpinni Cristu. Peru bixhózebe qué nuchaa de religión. Yanna, ¿xi decisión guicaa Timoteo yaʼ? ¿Zinándabe religión stiʼ bixhózebe la? ¿Zinándabe ca tradición stiʼ ca judíu, ni biziidibe dxi nahuiinibe la? ¿O zácabe discípulo stiʼ Cristu?

3. Casi ná Proverbios 1:8, 9, ¿ximodo ruuyaʼ Jehová stipa ni runi ca hermana para gacanecaʼ ca xiiñicaʼ gaca xhamígucaʼ laabe?

³ Cásica Eunice, laaca nadxii ca hermana stinu familia  sticaʼ. Ne laaca racaláʼdxicabe gacanécabe xiiñicabe gaca xhamígucaʼ Jehová. Ne nánnanu guizáʼ rusisaca Dios stinu stipa ni rúnicabe (biindaʼ Proverbios 1:8, 9). Huayacané Jehová stale hermana gusiidicaʼ xiiñicaʼ gannaxhiicaʼ laabe ne gúnicaʼ ni nabe.

4. ¿Xi guendanagana ridxaagalú stale hermana tiempu riʼ?

⁴ Zándaca guiníʼ ique ti hermana pa zuni xiiñiʼ ni ná Jehová cásica biʼniʼ Timoteo. Nanna ca padre cumu nabáninu lu guidxilayú malu stiʼ Binidxabaʼ la? nga runi ridxaagalú xiiñicaʼ stale guendanagana (1 Ped. 5:8). Ne stale hermana rápacaʼ guendanagana purtiʼ stúbisicaʼ o qué runi xheelacaʼ ni ná Jehová. Guidúʼyanu xi bizeeteʼ ti hermana láʼ Christine *, laa guníʼ: «Nachaʼhuiʼ xheelaʼ ne nadxiibe laadu, peru qué nudiibe lugar nusiideʼ ca xiiñeʼ de Jehová. Stale biaje dede ruunaʼ maʼ caníʼ iqueʼ pa ziuu dxi zuni ca xiiñeʼ ni ná Jehová».

5. ¿Xi zadúʼyanu lu artículo riʼ?

⁵ Hermana caʼ, pa cusiniisitu xiiñitu, zanda gacanetu laacabe gannaxhiicabe ne gúnicabe ni ná Jehová, cásica biʼniʼ Eunice. Lu artículo riʼ zadúʼyanu ximodo zanda chinándatu ejemplu stibe ne gusiiditu xiiñitu pur ni riniʼtu ne ni rúnitu. Laaca zadúʼyanu ximodo zacané Jehová laatu.

6. Casi ná 2 Timoteo 3:14, 15, ¿ximodo beeda gaca Timoteo xpinni Cristu?

⁶ Dede dxi gule Timoteo, biʼniʼ Eunice stipa gusiidiʼ laabe «ni cá lu Stiidxaʼ Dios», modo bisiidiʼ ca judíu ni dxiqué. Dxandíʼ, huaxiéʼ gunna Eunice purtiʼ qué ñánnabe gastiʼ de Jesucristu. Neca zaqué, ni biziidiʼ Timoteo de lu Stiidxaʼ Dios zanda gacaneni laa para gaca xpinni Cristu. Peru ¿zúnibe ni la? Para tiempu riʼ, maʼ huaniisibe ne maʼ zanda guni decidirbe xi gúnibe lu xquendanabánibe. Nánnanu gucané stipa ni biʼniʼ Eunice que Timoteo guni cré de guidubi ladxidóʼ ni biziidiʼ de Jesús (biindaʼ 2 Timoteo 3:14, 15). ¡Nanna pabiáʼ nayecheʼ guyuu Eunice purtiʼ gucané xiiñiʼ gunibiáʼ Jehová yaʼ! Lá Eunice riníʼ ni «ni guni ganar», ne nga peʼ nga ni biʼniʼ gunaa riʼ.

7. ¿Xi biʼniʼ Eunice para gucané xiiñiʼ guni progresar despué de guyuunisa?

⁷ Nabé risaca ngue ni biʼniʼ Timoteo ora guyuunisa. Peru guyuuruʼ Eunice xizaa pur laabe. ¿Xi guni xiiñibe despué de maʼ guyuunisa yaʼ? ¿Ñee zaca xhamígube binni ni qué runi ni ná Dios la? ¿Ñee ziguni estudiarbe ndaaniʼ guidxi Atenas ne zuni crebe guiráʼ ni rusiidiʼ ca filósofo ni qué runi ni ná Dios la? ¿Zaquiiñebe tiempu ne stipa stibe para guyúbibe gápabe stale cosa risaca la? Qué zanda guni decidir Eunice pur Timoteo, peru zanda gacanebe laa. ¿Ximodo yaʼ? Zanda gacanebe laa gannaxhii Jehová jma ne gusisaca ni biʼniʼ Jesús. Dxandíʼ, nagana nga gacané ti hermanu o ti hermana xiiñiʼ gaca xpinni Jehová ora stubi si cayuni ni. Peru laaca rácani nagana ora guirópacabe rúnicabe ni ná Jehová. Yanna, ¿xi zanda guiziidiʼ ca hermanu de ejemplu stiʼ Eunice yaʼ?

8. ¿Ximodo zanda gacané ti hermana xheelaʼ ni naca Testigu gusiidiʼ ca xiiñiʼ de Dios?

⁸ Biʼniʼ estudiarné ca xiiñiluʼ Biblia. Hermana caʼ, pa laaca xpinni Cristu xheelatu, racalaʼdxiʼ Jehová gacanetu  laabe gusiiditu ca xiiñitu de Dios. Ti cosa ni zanda gúnitu nga gacanetu xheelatu gaca adoración en familia guiráʼ semana ne guníʼ ique xi zanda gúniluʼ para chuulaʼdxiʼ ca xiiñitu ni. Gudxi laacabe pabiáʼ galán nga gápatu adoración en familia. Zanda gacaneluʼ xheelaluʼ guninetu ca xiiñitu ti proyectu ra naquiiñeʼ guni estudiartu Biblia o guninetu laacabe sti actividad. Yanna, pa maʼ ziniisi xiiñiluʼ ne maʼ zanda guicaabe estudiu lu libru ¡Zanda guibániluʼ nayecheʼ!, zanda gacaneluʼ xheelaluʼ para gudiitu estudiu xiiñitu.

9. ¿Xi zanda gacané ti hermana ni cadi xpinni Cristu xheelaʼ?

⁹ Nuu hermana laa rudii estudiu xiiñiʼ purtiʼ qué gapa xheelaʼ o purtiʼ cadi xpinni Cristu xheelaʼ. Pa nga nga ni cazaacaluʼ la? cadi chuʼluʼ xizaa, nuu Jehová listu para gacané lii. Ne zúnibe ni. Biquiiñeʼ ca herramienta ni rudii xquídxibe laanu para guni estudiárneluʼ ca xiiñiluʼ. Laaca zanda guinabadiidxaluʼ xcaadxi hermanu ximodo huaquiiñecaʼ ca herramienta riʼ lu adoración en familia sticaʼ * (Prov. 11:14). Zanda guinábaluʼ Jehová gacané lii guiníʼneluʼ ca xiiñiluʼ para gánnaluʼ xi runi sentírcabe ne xi riníʼ íquecabe (Prov. 20:5). Zanda guinabadiidxaluʼ laacabe: «¿Ñee nápaluʼ xiixa guendanagana ra scuela la?». Zanda gacané ndiʼ lii para güíneluʼ laacabe diidxaʼ.

10. ¿Xiruʼ zanda gúniluʼ para gacaneluʼ ca xiiñiluʼ gunibiaʼcaʼ Jehová?

¹⁰ Biiyaʼ pora zanda gusiidiluʼ ca xiiñiluʼ de Jehová. Guniʼné laacabe de Jehová ne de ca cosa galán ni huayuni pur laatu (Deut. 6:6, 7; Is. 63:7). Nabé risaca gúnitu ni pa qué ganda guni estudiárnetu ca xiiñitu ra lídxitu. Sicaríʼ guníʼ Christine, hermana ni bizéʼtenu lu párrafo tapa que: «Cumu huaxiéʼ gunda gunieniaʼ ca xiiñeʼ de Dios la? ngue runi bineʼ aprovechar ora zanda guneʼ ni, riniáʼ laacabe xiixa lugar o riguíbadu lu ti canuá ne rixélehuiinidu de ruaa nisa que para ganda guinieniaʼ laacabe de guirá cosa ni bizáʼ Jehová ne de xcaadxi cosa ni ruzeeteʼ Biblia. Ne dxi maʼ biniisi ca xiiñeʼ, guluaaʼ gana laacaʼ gúʼndacaʼ Biblia stúbicaʼ». Biʼniʼ stipa guiniʼluʼ cosa galán de xquidxi Jehová ne de ca hermanu ne cadi guni criticarluʼ ca ancianu. Pa guiniʼluʼ cosa galán de ca ancianu, zacaneni ca xiiñitu guidxíñacaʼ laacabe ora gápacaʼ xiixa guendanagana.

11. Casi ná Santiago 3:18, ¿xiñee nabé risaca guyúbitu chuʼ familia stitu tobi si?

¹¹ Gucané familia stiluʼ chuʼ tobi si. Gupa costumbre gábiluʼ xheelaluʼ ne ca xiiñiluʼ nadxiiluʼ laacaʼ. Guníʼ cosa galán de xheelaluʼ ne biʼniʼ ni né respetu, ne bisiidiʼ ca xiiñiluʼ gúnicaʼ zaqueca. Zacané ndiʼ ca xiiñiluʼ chuuláʼdxicaʼ guiziidicaʼ de Jehová (biindaʼ Santiago 3:18). Guidúʼyanu ni bizaaca Jozsef, ti precursor especial ni cayuni servir ndaaniʼ guidxi Rumania. Dxi nahuiinibe qué niná bixhózebe ñuni familia stibe ni ná Jehová. Sicaríʼ guníʼ Jozsef: «Biyubi jñaaʼ modo chuʼ familia stidu tobi si. Dxi guca bixhozeʼ jma naduxhuʼ, jma nachaʼhuiʼ guca jñaaʼ. Ora ruuyaʼ jñaaʼ raca nagana para laadu guni respetardu ne guzúʼbadu stiidxaʼ bixhózedu, ruundanebe laadu Efesios 6:1-3. Despué rábibe laadu ca cualidad  galán ni napa bixhozeʼ ne racanebe laadu guiénedu xiñee naquiiñeʼ guni respetardu laa. Zaqué bíʼnibe para cadi chuʼ guendaridinde lu familia stidu stale biaje».

12. Casi ná 2 Timoteo 1:5, ¿ximodo gucané ejemplu stiʼ Eunice Timoteo?

¹² (Biindaʼ 2 Timoteo 1:5). Guca Eunice ti ejemplu galán para Timoteo. Nánnanu bisiidibe laa zanda gusihuinni napa fe pur ca obra stiʼ (Sant. 2:26). Biiyaʼ Timoteo guiráʼ ca cosa ni biʼniʼ jñaa, biʼniʼ ni purtiʼ guizáʼ nadxii Jehová. Laaca biiyabe guyuu jñaabe nayecheʼ purtiʼ biʼniʼ ni ná Jehová. ¿Ximodo gucané ejemplu stiʼ Eunice Timoteo? Apóstol Pablo bizeeteʼ gupa Timoteo fe cásica gupa jñaa. Yenándabe ejemplu stiʼ jñaabe ngue runi guca fe stibe naguidxi. Zaqueca nga rizaaca tiempu riʼ, stale hermana né ejemplu si stiʼ huayacané xfamilia guiziidiʼ de Dios (1 Ped. 3:1, 2). Lii laaca zanda gúniluʼ ni. ¿Ximodo yaʼ?

13. ¿Xiñee jma naquiiñeʼ gusisaca ti hermana ni napa xiiñiʼ gaca xhamigu Jehová?

¹³ Ni jma risaca para lii nga gaca xhamíguluʼ Jehová (Deut. 6:5, 6). Cásica guiráʼ gunaa ni napa xiiñiʼ, zándaca ni jma risaca para lii nga gudiiluʼ ni caquiiñeʼ ca xiiñiluʼ lugar de gúniluʼ xcaadxi cosa. Guzéʼtenu ti ejemplu, nuuluʼ dispuesta gunítiluʼ tiempu stiluʼ, bueltu stiluʼ, gúniluʼ dxiiñaʼ ne xcaadxi cosa pur laacabe. Peru laaca naquiiñeʼ cueeluʼ tiempu para chuʼluʼ gaxha de Jehová. Gulee tiempu para guni orarluʼ, gápaluʼ estudiu personal stiluʼ ne cheluʼ reunión. Pa gúniluʼ ni, jma zaca xhamíguluʼ Jehová ne zudiiluʼ ti ejemplu galán familia stiluʼ ne xcaadxi binni.

14, 15. ¿Xi riziidiluʼ de ni bizaaca Leanne, María ne João?

¹⁴ Guidúʼyanu ni guníʼ caadxi joven ni biziidiʼ gannaxhii Jehová ne gapa confianza laabe purtiʼ yenándacaʼ ejemplu stiʼ jñaacaʼ. Sicaríʼ guníʼ Leanne, tobi de ca xiiñiʼ Christine: «Ora nuu bixhózedu ra yoo, qué randa runi estudiardu Biblia. Peru qué riaadxaʼ jñaadu reunión. Neca huaxiéʼ nánnadu de lu Biblia, gucané ejemplu stibe laadu gápadu ti fe naguidxi. Dede ante guzulú chuudu reunión bidiʼdu cuenta dxandíʼ ni rusiidiʼ ca testigu stiʼ Jehová».

¹⁵ Guzéʼtenu ni bizaaca María, guyuu biaje biʼniʼ castigar bixhózebe familia stibe purtiʼ riécabe reunión. Sicaríʼ guniʼbe: «Jñaaʼ nga tobi de ca hermana ni jma nadxibalú. Dxi nahuiineʼ, guyuu biaje qué ninaʼyaʼ ñuneʼ ni ná Jehová purtiʼ bidxibeʼ xi guiníʼ binni. Peru ora biiyaʼ pabiáʼ nadxibalú jñaaʼ ne siempre rúnibe ni ná Jehová primé lu xquendanabánibe, gucané ni naa maʼ cadi guidxibeʼ binni». Guzéʼtenu ni bizaaca João ne familia stiʼ, biʼniʼ prohibir bixhózebe guiníʼcabe de Dios ra lídxicabe. Sicaríʼ guníʼ João: «Ni jma gucané naa nga ora biiyaʼ guyuu jñaaʼ dispuesta gusaana caadxi cosa para ganda gusiecheʼ bixhozeʼ, peru qué nusaana de ñánnaxhiibe Jehová».

16. ¿Ximodo zanda gacané ejemplu stiʼ ti hermana xcaadxi hermanu?

¹⁶ Hermana caʼ, cadi guiaandaʼ laatu zanda gacané ejemplu stitu xcaadxi. ¿Xi modo yaʼ? Guníʼ ique ximodo gucané ejemplu stiʼ Eunice apóstol Pablo. Laabe guniʼbe biʼniʼ cré Timoteo Dios de  guidubi ladxidóʼ purtiʼ biʼniʼ Eunice ni primeru (2 Tim. 1:5). ¿Padxí nga biʼyaʼ Pablo napa Eunice fe yaʼ? Zándaca dxi bíʼnibe primé viaje misional stibe guyebe guidxi Listra, ne raqué nga binibiaʼbe Loida ne Eunice ne zándaca gucanebe laacaʼ gácacaʼ xpinni Cristu (Hech. 14:4-18). Gudiʼdiʼ si 15 iza, dxi bicaabe ra nuu Timoteo rietenaláʼdxirube pabiáʼ fe gupa Eunice ne bizeetebe naca ti ejemplu. Rihuinni dxiichiʼ ca bidxagayaa apóstol Pablo ejemplu stiʼ gunaa riʼ ne laaca zándaca bidxagayaa xcaadxi xpinni Cristu ni bibani lu primé siglu ni. Pa stúbiluʼ cusiniisiluʼ ca xiiñiluʼ o qué runi xheelaluʼ ni ná Jehová, cadi guiaandaʼ lii racané fe ni rusihuínniluʼ ca hermanu ni runibiáʼ lii.

17. ¿Xi naquiiñeʼ gúniluʼ pa qué naʼ xiiñiluʼ guni progresar?

¹⁷ Peru ¿pa cadi cayuni progresar xiiñiluʼ yaʼ? Cadi guiaandaʼ lii riné tiempu para gusiidiʼ binni xiiñiʼ. Casi rihuinni lu ca imagen ca. Ora rudxiibaʼ tuuxa ti semiáhuiiniʼ, zándaca guiníʼ ique pa zeeda gácani ti yaga ni gudii cuananaxhi. Neca qué gánnabe pa zudiini cuananaxhi, peru ruzeebe ni para guiroobaʼ ni galán (Mar. 4:26-29). Zacaca nga zanda guizaaca ca hermana ni napa xiiñiʼ, zándaca guiníʼ íquecabe pa cayacanécabe chindá Stiidxaʼ Dios ndaaniʼ ladxidóʼ xiiñicabe. Dxandíʼ, qué zanda cuitu xi decisión guicaa ca xiiñitu. Peru pa gúniluʼ stipa gusiidiluʼ laacabe de Jehová la?  zanda gacané ni laacabe gaca xhamígucabe Dios (Prov. 22:6).

18. ¿Ximodo zanda gacané Jehová ca xiiñiluʼ gaca xhamígucaʼ laabe?

¹⁸ Dede tiempu gucuá Biblia, huayacané Jehová stale joven para gácacaʼ xhamígube (Sal. 22:9, 10). Nga runi, pa gudii ca xiiñitu lugar, zanda gacané Jehová laacaʼ chuʼcaʼ gaxha de laabe (1 Cor. 3:6, 7). Neca ruluíʼ caxeleʼ ca xiiñitu de lu neza stiʼ Jehová, peru laabe nuube listu para gacanebe laacaʼ né cariñu (Sal. 11:4). Ne ora guʼyaʼ Jehová racaláʼdxicabe gúnicabe ni ná, laabe nuube listu para gacanebe laacaʼ gaca xhamígucaʼ laabe (Hech. 13:48; 2 Crón. 16:9). Laaca zanda gacanebe lii guidxélaluʼ diidxaʼ ni gábiluʼ ca xiiñiluʼ ne ora peʼ caquiiñecabe ni (Prov. 15:23). Laaca zanda iquiiñeʼ Jehová ti hermanu o ti hermana de congregación stitu para guizaalaʼdxiʼ laacabe. Ne ora maʼ huaniisicabe, zanda gacané Jehová laacabe guietenaláʼdxicabe xiixa ni bisiidiluʼ laacabe dxi nahuiinicabe (Juan 14:26). Pa qué gusaana de gusiidiluʼ ca xiiñiluʼ pur ni riniʼluʼ ne ni rúniluʼ, zaguu Jehová ndaayaʼ stipa stiluʼ.

19. ¿Xiñee zanda chuʼluʼ seguru qué zusaana Jehová de gannaxhii lii pur stipa ni cayúniluʼ?

¹⁹ Intiica si decisión guicaa ca xiiñitu, cadi pur laani zusaana Jehová de gannaxhii lii. Nadxiibe lii purtiʼ nadxiiluʼ laabe. Pa stúbiluʼ cusiniisiluʼ ca xiiñiluʼ o qué runi xheelaluʼ ni ná Dios, cadi guiaandaʼ lii zapa Jehová lii ne zeeda gácabe casi ti padre para ca xiiñiluʼ (Sal. 68:5). Qué zanda guni obligarluʼ ca xiiñiluʼ gúnicaʼ ni ná Dios. Peru, pa qué gusaana de gápaluʼ confianza Jehová ne gúniluʼ stipa pur gusiidiluʼ ca xiiñiluʼ, ziechenebe lii.