EMHUOGHAẠPH ITUUGHẠ PHỌ 18
Ilọ Ophighi Kụ Oteẹny Asiigbu Okumuom AZihova
“Seere iphẹn phọ ologhi anạ, akuọm loor phọ anạ, pidị oomo awe omiịn eghimọm aghisigh phọ anạ.”—1 TIM. 4:15.
AḌUỌR PHỌ 84 Reaching Out
OGHAẠPH OOKARAGH *
1. Ighẹn asiigbu okumuom aZihova kụ edị yira kotue opighi?
IDIPHỌ abugey aKristẹn yira opomoghiạn aZihova agey. Yira rowạ ongọ odị ipẹ ekạr bọ enhighẹ. Orue oḍighi ipẹ yira rowạ bọ, pọ ewạ mọ ophighi siigbu, omhoọgh raagharạ aKristẹn, otuughạ sighalhanyạ, oḅihẹ owạ reten okumu ghan abunhọn. *
2. Uḍighi ika kụ yira kopighi bọ siigbu okumuom Enhaạn oḅilhẹ olọgh inyaạm oteẹny?
2 Uḍighi ika kụ yira kowạ bọ oghiọm aghisigh rukumuan phọ ayira? Eḅẹl esi phọ, yira rowạ oḅaalhamhị olhoghi Odẹ k’akẹ phọ ayira. Reḅaạl ghan olhoghi aZihova mem dị amhiịn dị yira osighẹ sighalhanyạ r’inyaạm ayira rokumuom nyodị. Oḅarạm isiphẹ, yira rowạ ghan ophoph oghị aghisigh pidị yira okạr otue ologhonhaạn ḍighaạgh bumor r’abumaranhi phọ. (1 Tẹs. 4:9, 10) Etigheri siạ phọ anạ siẹn igey phọ, nạ katue ni aḅilhẹ abughẹ rukumuan phọ nạ rangọ bọ aZihova. Uguạ omhiịn idị yira kotue oḍighi iduọn phọ.
3. Odaphạn 1 Timoti 4:12-16, otelhedom mọ aPọl aromha Timoti oḍighi eeghe?
3 Mem mọ otelhedom mọ aPọl agẹ bọ ḍiḅẹl aḍinyạ phọ aghiọm Timoti, aTimoti aḍighi ni oḍoọgh, kuolọ maḍighi ni okumor oye ookpomhoghan dị asilor. Kuolọ aPọl aromha nyodị mọ aphoph aghị ghisigh. (Bạl 1 Timoti 4:12-16.) Nạ aphogh ikpo onhụ phọ aPọl, nạ kamiịn ni mọ odị awạ mọ aTimoti aghị ghisigh esi iyạl areten: esi omhoọgh araagharạ aKristẹn idiphọ ephomhoghiạn, omheeraam, r’osererẹ, ḅilhẹ r’omhoọgh asighalhanyạ idiphọ ibạl esi ogbo, iromoghiom, r’itughemhị. Yira kooḅeghiọn eḍeenhaan phọ aTimoti omiịn idị otuụgh asiigbu ophighi keḍighi idị yira kokị ghisigh oḍighi bugey arebenhẹ aZihova. Yira koḅilhẹ kẹn ooḅeghiọn reten obughẹ arukumuan phọ ayira.
MOỌGH RAAGHARẠ AKRISTẸN
4. Odaphạn Filipai 2:19-22, eeghe kụ iḍighi bọ Timoti ogey ebenhẹ aZihova?
4 Eeghe kụ iḍighi bọ Timoti ogey ebenhẹ aZihova? Imạ araagharạ aKristẹn phọ odị. (Bạl Filipai 2:19-22.) Odaphạn ipẹ aPọl aghaạph bọ ilọ aTimoti, yira omiịn mọ odị asooromhi ni loor, aḅạr, akuọm loor, aḅilhẹ akpẹ oḍuomolhoghi. Odị amhoọgh ephomhoghiạn r’ogbolhomaam abumor phọ. Iphẹn phọ iḍighi idị aPọl aphomhoghiạn Timoti bịn u/kiilhaan ongọ odị iiḍighi ghalhamọ r’idị ekpạr. (1 Kọr. 4:17) Iniin phọ kẹn ni, mem dị yira omhoọgh raagharạ aKristẹn aZihova kuphomhoghiạn iyira, yira oḅilhẹ omoọgh maạr oḍighinhom siẹn ookpomhoghan phọ.—Ps. 25:9; 138:6.
Wạ eegharạ aKristẹn dị keḅeraạn nyinhạ omhoọgh obughẹ (Miịn siikpịgh phọ 5-6)
5. (a) Ika kụ idị nạ kalegheri eegharạ aKristẹn dị ewạ mọ bughẹ? (b) Odaphạn afoto phọ, ika kụ idị oḍoọgh onyọ umaranhi rabughẹ eegharạ oḍeenhaan ghan oseenyạn phọ odị?
5 Gbon eegharạ dị nạ akạr amhoghi. R’iiḅereghị kiririom aphogh eegharạ dị ewạ mọ moọgh abughẹ. Saḅạr eniin eegharạ bịn agbon ophorogh oteẹny. Esi omaạm, nạ amoghi obughẹ eegharạ oseenyạn phọ anạ obobọ ḍiḅeraạn phọ anạ olhoghonhaạn ghan aḍighaạgh bumor phọ ḍughụm? Nạ amoghi obughẹ eegharạ owạ ghan eephọ r’osạr owilhenhaạn ḍughụm? Etue ni elọgh ḍighaạgh opuru oyaghirị dị akpẹ oḍuomolhoghi ilọ eegharạ dị emhoghi mọ bughẹ.—Prov. 27:6.
6. Ika kụ idị nạ katue ateẹny ḍiigbu omhoọgh eegharạ aKristẹn?
6 Lọgh inyaạm oteẹny aḍiigbu phọ anạ. Nạ kaḍighi ika? Eniin eten pọ tuughạ ilọ eegharạ phọ nạ rawạ bọ obughẹ phọ. Oḅẹm mọ nạ rawạ obughẹ eegharạ osạr ghan owilhenhaạn. Eeni nạ atue ni amiigh aạl oḅilhẹ ogbirima ilọ awe aBaibul dị osạr ghan owilhenhaạn oopho r’abudị u/sạr ghan. Tuutughiạn eḍeenhaan phọ aZizọs. Odị asạr ghan awilhenhaạn bunhọn oopho. (Luk 7:47, 48) Odị aphogh ghan atenhom opiomạn phọ kụ amhiịn ghan imạ phọ oye phọ katue bọ aḍighi. Mem mọ aZizọs, aFarisi phọ ‘uḍaghạ ghan bunọn.’ (Luk 18:9) Nạ rogbirima reḍeenhaan phọ iphẹn, kụ apuruan loor mọ: ‘Mị ramiịn ghan eeghe esi abunhọn? Eghẹn eegharạ abidị kụ iḅeraạn imhị ophogh ghan?’ Eḍighi maạr dị ekparanhaạn nyinhạ osạr owilhenhaạn oye, pọ kparaghạ ogẹ olhọgh esi imạ araagharạ oye phọ dị nạ alhegheri. Kụ apuruan loor mọ: ‘AZizọs amiịn ika oye phọ? AZizọs kasạr ri abilenhaạn nyodị ḍughụm?’ Nạ aḍighi iphẹn phọ, pọ kelọgh ni ḍighaạgh onme iitughiạn phọ anạ. Eḅẹl amem mọ, kemoghi ni inyaạm orue osạr owilhenhaạn oye dị upiomạn iyira. Kuolọ eḍighi maạr dị yira olhọgh ikuph, esighẹ rekị bịn keḍigh ni iḅaạl ayira.
TUUGHẠ SIGHALHANYẠ DỊ EMHOỌGH MAẠR OḌIGHINHOM
Miteom loor atuughạ ilọ oselhemhi aKindọm Họl phọ anyinha (Miịn ekpịgh phọ 7) *
7. Odaphạn Proverbs 22:29, ighẹn areten kụ edị aZihova asighẹ we asighalhanyạ raḍighinhom rodon?
7 Aḍinhọn aḍiigbu dị nạ katue apighi pọ otuughạ aḍighalhanyạ dị emhoọgh maạr oḍighinhom. Tuutughiạn ilọ onhụ abạl awe phọ rowạ bọ mọ omiteom loor odoghoḍi asiKindọm Họl r’Asisembli Họl. Ibadị abuẹn phọ romoọgh ghan sighalhanyạ phọ abidị esi ogbor okumuan r’abumor dị omhaạr iiḍighi araghaạgh. Iduọn yira omhiịn bọ siphẹ afoto phọ, abumor r’abumaranhi phọ rotuughạ ghan sighalhanyạ dị emhoghi oselhemhiom ghan asiKindọm Họl r’Asisembli Họl. Dị eego esi areten phọ iphẹn phọ r’inhọn, aZihova Enhaạn, “Odaạm-emạ orụgh k’orụgh phọ,” r’aZizọs Kraist, “Odaạm emạ” phọ, osighẹ ni we asighalhanyạ roḍighinhom iikiạ araraạr. (1 Tim. 1:17; 6:15; bạl Proverbs 22:29.) Yira rowạ ni oḍighi oomo ipẹ yira kotue bọ osighẹ asighalhanyạ phọ ayira oghuenhiom aZihova, ka/loor ayira.—Jọn 8:54.
8. Ika kụ idị nạ katue aselẹ ḍighalhanyạ dị nạ katuughạ?
8 Gbon ḍiniin aḍighalhanyạ. Eeghe aḍighalhanyạ kụ edị nạ kagbon? Nạ atue ni apuru ikumor awe ookpomhoghan anyinha ḅilhẹ r’opoghom eghir ilọ aḍighalhanyạ dị bidị ootughiạn mọ nạ katue ni amoọgh. Esi omaạm, eḍighi maạr dị bidị oḅenhị nyinhạ mọ nighemhị ḍighalhanyạ oghaạph r’itughemhị phọ anạ, pọ ḅenhị bidị omạ esi ituughạ phọ emhoghi bọ dị nạ kasilor. Kụ agbariọn radạ oḍighi idị nạ kasilor. Ika kụ idị nạ katue bọ aḍighi iduọn phọ?
9. Ika kụ idị nạ kaḍighi orue oteẹny aḍiigbu otuughạ aḍighalhanyạ?
9 Lọgh inyaạm oteẹny aḍiigbu phọ anạ. Oḅẹm mọ nạ rawạ onhighemhị aḍighalhanyạ itughemhị phọ anạ. Nạ atue ni amiigha loor atuughạ ḍinyạ phọ Kuọm Loor Esi Ibạl r’Itughemhị. Mem dị ongọ nyinhạ asaimẹnt siphẹ ituughạ ogboku awiki phọ, nạ atue ni aḅenhị onyọ umor dị asianhaan onhaghạn asaimẹnt phọ anạ pidị odị amaaghị riisi dị emhoghi dị nạ kanighemhị kụ egbi oteẹny amem ituughạ phọ. Nuụn ghan aakolhobian asaimẹnt phọ, pidị awe omhiịn mọ nạ ulhọgh ni inyaạm ookolhobian oḅilhẹ oḍuom nyinhạ olhoghi.—Prov. 21:5; 2 Kọr. 8:22.
10. Ngọ eḍeenhaan idị yira koḍighi kụ opoph okị ghisigh oteẹny ḍighalhanyạ dị yira rowạ?
10 Kokaạph ika eḍighi maạr dị aḍighalhanyạ phọ nạ rawạ bọ omhoọgh phọ ekparanhaạn nyinhạ? Nyinhạ ki/phẹr! Onyọ umor dị oghol mọ Garry o/mhaạr ghan aạl agey. Umugholoor asiph ni nyodị eniin amem dị odị aphoophe ḍighaạgh aạl iyaạr Kindọm Họl kụ u/tue. Kuolọ odị aghiọm ni ghisigh akuọm loor. Odị aḅẹm mọ, loor esi itughemhị phọ ongọ bọ nyodị, nyiidiphọ odị katue ni angọ oghaạph Kindọm Họl, asembli, ḅilhẹ r’aroookpomhoghan eephugh!
11. Idiphọ aTimoti, eeghe kụ kilhoghonhaạn iyira ḍighaạgh orue ophạm inhọn iiḍighi?
11 ATimoti aḍighi ni okaaphọm dị amhaạr ongọ oghaạph obobọ otughemhiạ dị agbatanhaạn ḍughụm? ABaibul phọ o/ghaạph. Kuolọ iikia i/lo, aTimoti asilor ri esi oomo arukumuan phọ odị, iduọn odị adaphạn ghan bọ oromha phọ aPọl. (2 Tim. 3:10) Igina phọ kẹn, eḍighi maạr dị yira onhighemhị sighalhanyạ phọ ayira, kinyaamhị ni iyira ophạm inhọn iiḍighi siẹn arukumuan phọ aZihova.
WẠ GHAN RETEN OKUMU ONGỌ ABUNHỌN
12. Ika kụ idị nạ mamhooghọm suọ rukumuan abunhọn?
12 Oomo ayira romooghọm ghan ni suọ mem dị abunhọn okumu ungọ iyira. Esi omaạm, mem dị yira odi otu arookonhom, olhoghi ayira raḅaạl ghan ni mem dị ikumor awe phọ abuphẹ odi bọ Hospital Liaison Committees obobọ Patient Visitation Groups oru uphogh iyira. Mem dị yira osoman iiḅaghamhị, yira rosereghiạn ghan ni mem dị okumor oye ookpomhoghan dị amhoọgh ogbolhomaam, awạ mem alher rurụ ungọ iyira aḅilhẹ uudereghị iyira. Mem dị yira rowạ oye dị kudạph iyira akị otughemhị oye Baibul, olhoghi ayira raḅaạl ghan ni mem dị okọy eten amheera odạph ayira oghị kụ aḅilhẹ asogh aani iitughiạn ilọ odị. Oomo abumor r’abumaranhi phọ abuẹn phọ oḅaạl li olhoghi olhoghonhaạn ayira ḍighaạgh. Yira kotue ni omoọgh aani odọ phọ ibo phọ abidị lọ yira omiteom loor okumu ongọ aani bumor phọ ayira. AZizọs aḅẹm mọ, “ibo k’Enaạn edianaan buphẹ rongọ bọ epu buphẹ roboọr bọ.” (Iiḍighi 20:35) Eḍighi maạr dị nạ rawạ obughẹ arukumuan phọ anạ reten phọ iphẹn phọ, eeghe kụ kelhoghonhaạn nyinhạ ḍighaạgh oteẹny asiigbu phọ ipẹ phọ?
13. Ewạ mọ yira olhọgh elhegh eeghe mem dị yira ropighi ḍiigbu?
13 U/gbon ghan siigbu ewalalaạny. Esi omaạm, eeni nạ raḅẹm ghan mọ, ‘kiḅeraạn imhị oḍighi obughẹ siẹn ookpomhoghan phọ.’ Kuolọ etue ni ekpạr olhegheri ipẹ nạ katue bọ ateẹny ḍiigbu phọ aḍiphẹ phọ, ḅilhẹ kẹn eeni nạ ka/tue alegheri mem dị nạ mateẹny. Kụ iḍighi kụ, gbon ḍiniin aḍiigbu mem. Nạ atue ni agẹ aseere esi ḅilhẹ r’ipẹ nạ katue bọ ateẹny.
14. Eeghe kụ iḍighi kụ emhoghi bọ dị yira kookolhobian ooḅenhion araraạr mem dị yira ropighi siigbu?
14 Ewạ mọ yira ookolhobian kẹn ooḅenhion araraạr mem dị yira rowạ ophighi asiigbu. Eeghe kụ iḍighi? Loor esi dị yira ko/tue ooḅakị sidọl phọ ayira. Esi omaạm: Otelhedom mọ aPọl malhoghonhaạn ḍighaạgh amiteom omhoom ookpomhoghan epẹ Tesalonikạ. Eeni odị amhoọgh ni ḍiigbu orọl epẹ phọ olhoghonhaạn aḍighaạgh bumhoom aKristẹn phọ abuphẹ phọ. Kuolọ abuọ isophoghom ungọ ni iiḅaghamhị nyodị bịn odị aḍuạ emhạ phọ. (Iiḍighi 17:1-5, 10) M’aPọl m”uḍuạ bọ, obọ odị mulọgh sighuḍum abumor phọ esi ooto r’osooromineen. Kuolọ i/pẹr Pọl owạ areten olhoghonhaạn abumor phọ ḍighaạgh. Odị aaḅenhion ni raraạr orue odaphạn asidọl phọ menmia bọ. Onyebel roten, odị arom ni Timoti oghị okparamhị omheeraam abumhoom abumor phọ epẹ Tesalonikạ. (1 Tẹs. 3:1-3) P’eeghe idị olhoghi abuọ aTesalonikạ phọ aḅaạl omhiịn dị aTimoti amiteom loor oghị okumu angọ abidị!
15. Ika kụ idị asidọl dị yira ko/tue opamaghạn ketir siigbu ayira? Kaạph amaaniọm.
15 Yira kotue ni otuughạ iyaạr esi ipẹ emitenhaan bọ Pọl epẹ Tesalonikạ. Eeni yira roporogh ghan oteẹny eepoogh arukumuan, kuolọ asidọl dị yira u/tue upamaghạn i/meera yira oteẹny. (Eccl. 9:11) Nạ asoman iphẹn phọ, pọ wạ enhọn eepoogh arukumuan dị nạ katue ni ateẹny. Iphẹn phọ kụ idị olom r’anhịr dị oghol mọ Ted r’aHiedi oḍighi. Bidị uwilhẹ rukumuan aBetẹl loor e/moon. Kuolọ ephomhoghiạn abidị esi aZihova inyu ni bidị owạ inhọn areten obughẹ arukumuan phọ abidị. Bidị umhiighom okọy eten opọ oomo amem mọ. Idiphọ amem mọ rekị bọ, omạ bidị idiphọ abukọy eten dị ogbatanhaạn, ḅilhẹ otughemhị Ted oḍighi otum opoghom eghir. Uuḅenhion ni onhụ asiạ dị oye amhạn ka/ḍighi mun opoghom eghir. Esi iduọn phọ, aTed r’aHiedi uru ni olhọgh elhegh mọ bunọ u/sianhaan mun eepoogh phọ ephẹn phọ loor asiạ phọ abidị. Ii, bidị ulhoghoma ni mabi, kuolọ bidị ulhọgh elhegh mọ bidị otue ni okumu aZihova inhọn areten. ATed aḅẹm mọ, “Yoor motuughạ idị yoor ko/gbon ghan eniin eten okumu aZihova.”
16. Eeghe iyaạr kụ edị yira otuughạ siẹn Galetia 6:4?
16 Yira ko/tue opamaghạn oomo araraạr dị kemite siẹn aghuḍum mọ ayira. Esi iduọn phọ, kuu/tughiạn mọ aroopoogh dị yira rokelhọm kụ iḍighi iyaạr dị yira omhạn maạr esi aZihova, ḅilhẹ kẹn ku/maaniọm ghan siloor bunhọn. AHiedi aḅẹm mọ, “Oḅaạl olhoghi phọ anạ kaḍim ni eḍighi maạr dị nạ asighẹ dọl anạ amaaniọm dọl abunhọn.” (Bạl Galetia 6:4.) Owạ ghan reten oḍighi ipẹ aḍighaạgh ayira esi bọ siẹn arukumuan phọ aZihova. *
17. Nạ kaḍighi ika kụ asianhaan roopoogh arukumuan?
17 Dughe dọl aghuḍum mọ anạ, awilhẹ kẹn olheeghi iimhụgh dị i/kạr imoghi, pidị nạ arue amiteom loor oteẹny aroopoogh arukumuan dị edi. Miighom ophighi ibạm asiigbu dị kelhoghonhaạn nyinhạ ḍighaạgh oteẹny igbogh asiigbu. Esi omaạm, eḍighi maạr dị nạ rawạ okọy eten opọ oomo amem mọ, pọ nạ atue ni amiighom opọ ekulha amem mọ. Nạ rawạ ni oḍighi oniin odị raloghonhaạn ghan ḍighaạgh ikumor awe phọ? Pọ kenighẹ ni dị nạ kabughẹ mem mọ anạ epẹ erugh phọ aḅilhẹ akị ghan aaphoghogh budị u/moon r’ikumor awe. Olhegheri iyaạr phọ nạ kamoọgh bọ kangọ nyinhạ eepoogh ophạm inhọn iiḍighi ghisigh. Sopha ni oḍighi oomo ipẹ nạ katue bọ esi atorobọ arukumuan dị ongọ nyinhạ.—Rom. 12:11.
Gbon ḍiigbu dị nạ katue ni ateẹny (Miịn ekpịgh phọ 18) *
18. Odaphạn afoto phọ, nạ atuughạ eeghe esi eḍeenhaan phọ aBeverley?
18 Asiạ ayira ke/tue ikikima iyira ophighi r’oteẹny asiigbu. Ooḅeghiọn eḍeenhaan umaranhi dị amhạn 75 asiạ, dị oghol mọ Beverley. Odị amhoọgh iiḅaghamhị e/moon dị ekparanhaạn nyodị orelhe. Odị awạ ophinhom aani abin odi aḍinyạ aḍimhạgh aMemorial phọ. Kụ odị aphighi siigbu. Mem dị aBeverley ateẹny bọ siigbu phọ odị, olhoghi aḅaạl agey. Ikuph phọ odị inyu ni bunhọn olhọgh aani ikuph epẹ erugh phọ. AZihova amaghamhị ni maạr rukumuan abumor r’abumaranhi phọ ayira asiạ meghị bọ, ghalhamọ asidọl phọ ighome ni ipẹ bidị kotue bọ oḍighi.—Ps. 71:17, 18.
19. Eeghe kụ iniin asiigbu dị yira kotue opighi siẹn arukumuan phọ aZihova?
19 Pighi siigbu dị nạ katue ni ateẹny. Neeneghị raagharạ dị kekọm idị nạ kaḅeraạn aZihova. Tuughạ sighalhanyạ dị nạ katue ni asighẹ akumuom aZihova r’ookpomhoghan phọ. Wạ ilọ obughẹ areten phọ nạ rakumu ghan bọ kangọ bumor r’abumaranhi phọ anạ. * Idiphọ aTimoti, r’aḍisẹph aZihova oomo awe komiịn ni “eghimọm aghisigh phọ anạ.”—1 Tim. 4:15.
AḌUỌR PHỌ 38 He Will Make You Strong
^ ATimoti aḍighi ni okaaphọm iiḅi iinhaghạn phọ dị asilor. Kuolọ, otelhedom mọ aPọl aḅilhẹ ni aromha nyodị ophoph oghị aghisigh. Odị adaphạn oroma phọ aPọl, pọ aZihova kakuamhị ni asighẹ nyodị aḍighinhom, odị aḅilhẹ akuamhị aloghonhaạn ḍighaạgh agey bumor r’abumaranhi phọ. Idiphọ aTimoti, nạ rawạ ni okuamhị okumu aZihova r’abumor r’abumaranhi phọ ḍughụm? Iikia i/lo, nạ rawạ ni. Ighẹn asiigbu kụ kelhoghonhaạn nyinhạ ḍighaạgh oḍighi iduọn phọ? Ophighi oḅilhẹ oteẹny asiigbu phọ iphẹn phọ eḅaramaạm eeghe?
^ IKPO ONHỤ DỊ OGBẠ: Asiigbu okumuom aZihova eḅaramaạm torobọ iyaạr dị nạ alhọgh inyaạm oḍighi, orue okuamhị okumu aZihova eten dị kengọ nyodị oḅaạl olhoghi.
^ Miịn “Serving Where the Need Is Greater” siphẹ aḍinyạ phọ Organized to Do Jehovah’s Will, emhuoghaạph phọ 10, siikpịgh phọ 6-9.
^ Miịn esi ituughạ phọ 60, “Kiọm Ghisigh Akparamhị Ghan Siya Arighirị Phọ Anạ r’AZihova,” siphẹ aḍinyạ phọ Kelhọm Ghuḍum K’agee-pọ!
