SIJÉ POU LÉTID 18
Sa Ki Kay Édé’w Fè Pwogwé An Sèvis Jéhova
“Twavay sala Bondyé baʼw pou fè-a, sé pou ou mété tout lidéʼw èk tout kouway ou asouʼy, pou tout moun wè pwogwéʼw.”—1 TIM. 4:15.
CHANSON 84 Nou Ka Fè Fòs Kò Nou
SA NOU KAY DISKITÉ AN ATIK SALA *
1. Kisa nou sa fè pou fè pwogwé an sèvis Jéhova?
KON Kwityen ki vwé, nou enmen Jéhova an chay. Épi nou vlé fè tout sa nou pé an sèvis li. Mé pou fè sa, la ni diféwan bagay ki kay édé nou fè pwogwé. Bagay tèl kon: kiltivé bon kawaktè kon Kwityen, apwann diféwan bagay ou sa sèvi an sèvis Jéhova, épi pou gadé pou mannyè ou sa édé sé fwè-a èk sé sè-a. *
2. Pouki nou sipozé twavay wèd pou fè pwogwé an sèvis Jéhova?
2 Pouki nou vlé fè pwogwé an sèvis Jéhova? Pwèmyéman, sé paski nou vlé plè Papa nou ki an syèl. Lè Jéhova wè nou ka sèvi tout abilité nou an sèvis li, sa ka ba’y tjè kontan. An lòt wézon nou vlé fè pwogwé sé paski nou vlé édé sé fwè èk sè-a. (1 Tèsa. 4:9, 10) Konsa, menm si nou an lavéwité-a pou plizyè lanné, nou tout sa fè pwogwé an sèvis Jéhova. Annou wè mannyè nou sa fè sa.
3. Silon 1 Timòfi 4:12-16, kisa zapòt Pòl té ankouwajé Timòfi pou fè?
3 Lè zapòt Pòl ékwi Timòfi pwèmyé lèt-la, Timòfi té ja ni an chay èspéyans kon yon ansyen. Magwé sa, Pòl enkouwajé’y pou kontiné fè pwogwé an sèvis li pou Jéhova. (Li 1 Timòfi 4:12-16.) Kon ou katjilé asou sa zapòt Pòl té di, ou kay òbzòvé i té enkouwajé Timòfi pou fè pwogwé an dé mannyè. I enkouwajé’y pou kiltivé bon kawaktè Kwityen, tèl kon: lanmityé, lafwa, épi pou viv an lavi ki nèt. I osi enkouwajé Timòfi pou fè pwogwé an mannyè i ka li, pwéché èk enstwi lévanjil-la. Kon nou ka konsidiwé ègzanp Timòfi, nou kay wè ki diféwan bagay nou sa fè ki kay édé nou fè pwogwé. Èk osi, nou kay wè déotwa mannyè nou sa fè plis an minis nou.
KILTIVÉ BON KAWAKTÈ KWITYEN
4. Silon Filipay 2:19-22, pouki Jéhova té sa sèvi Timòfi?
4 Jéhova té sa sèvi Timòfi paski I té ni bon kawaktè Kwityen. (Li Filipay 2:19-22.) Silon zapòt Pòl Timòfi té ni imilité, i té fidèl, i té ka twavay wed, épi zapòt Pòl té sa dépan asou’y. Osi, I té ni lanmityé èk i té mélé épi sé fwè èk sè-a an chay. Pou lapéti sa, zapòt Pòl té enmen Timòfi. Épi i té sa ba’y asaynman ki té difisil. (1 Kòr. 4:17) An menm mannyè-a, lè nou kiltivé bon kawaktè kwityen, Jéhova kay enmen nou; épi nou kay sa édé sé fwè èk sè-a an kongwigasyon-an.—Sam 25:9; 138:6.
Idantifyé bon kawaktè ou vlé dévlopé (Gadé pawagwaf 5-6)
5. (a) Ki mannyè ou kay sav ki kawaktè Kwityen ou bizwen dévlopé? (b) Silon pòtwé-a, kisa jenn sè-a ka fè pou édé’y ni pli konpasyon pou lézòt?
5 Chwazi yon kawaktè ou vlé dévlopé. Pwédyé épi katjilé asou sé kawaktè-a ou bizwen fè pwogwé asou. Apwé sa, chwazi yonn an sé kawaktè-a ou vlé twavay asou. Pou ègzanp, ès ou té kay vlé kiltivé pli konpasyon? Èben ès ou té kay vlé fè pli pou édé sé fwè èk sè-a? Ès ou té kay fè pli pou tjenn lapé épi pou pawdonnen lézòt? Pitèt ou sa mandé an bon jan’w pou di’w ki mannyè ou sa fè pli mèyè an kawaktè sala.—Pwov. 27:6.
6. Kisa ou sa fè pou édé’w dévlopé an kawaktè?
6 Twavay pou dévlopé kawaktè-a. Ki mannyè ou sa fè sa? Yon bagay ou sa fè, sé pou pwan tan pou étidyé kawaktè-a ou vlé twavay asou. Pou ègzanp, annou di ou vlé twavay pou pawdonnen lézòt pli. Pitèt ou sa li èk mèdité asou ègzanp ki an Bib-la konsèné moun ki pawdonnen lézòt, èk moun ki pa té pawdonnen lézòt. Lè nou gadé Jézi, I té pawé pou pawdonnen lézòt. (Louk 7:47, 48) I pa fiksé asou lèwè yo. I fiksé asou sa yo té sa fè. Mé sé Fawizyen-an an tan Jézi té ka kwè yo té pli bon pasé tout lézòt moun. (Louk 18:9) Apwé ou mèdité asou sé ègzanp sala, mandé kò’w: ‘Kisa mwen ka wè an lézòt moun? Kilès an se kawaktè yo-a mwen vlé fiksé asou?’ Si i difisil pou pawdonnen yon moun, éséyé pou ékwi tout sé bèl kawaktè-a moun sala ni. Apwé sa mandé kò’w: ‘Ki mannyè Jézi ka gadé moun sala? Ès i té kay pawdonnen’y?’ Lè nou fè sa, sa kay édé nou chanjé katjil nou. An koumansman-an, nou pé ni pou twavay wèd pou pawdonnen yon moun ki ofwansé nou. Mé si nou kontiné twavay asou kawaktè sala, i kay pli ézé pou nou pawdonnen lézòt.
APWANN DIFÉWAN BAGAY OU SA SÈVI AN SÈVIS JÉHOVA
Mandé pou èd pou apwann mannyè pou tjenn Sal Wéyòm ou an bon kondisyon (Gadé pawagwaf 7) *
7. Ki mannyè Pwovèb 22:29, ka moutwé Jéhova ka sèvi moun ki ja apwann diféwan bagay pou wann sèvis an ògannizasyon?
7 An lòt mannyè ou sa fè pli an sèvis Jéhova, sé pou apwann fè diféwan bagay. Katjilé kantité moun nou bizwen pou bati plas Bèfèl, Lasal Asanmblé èk Lasal Wéyòm. An chay di yo apwann léta lè yo té ka twavay épi fwè èk sè ki ni èspéyans asou diféwan pwojé sala. Kon nou wè an pòtwé-a, ni fwè ni sè, ka apwann diféwan bagay yo sa sèvi pou tjenn sé plas adowasyon nou-an annòd. An plizyè diféwan mannyè Jéhova, “Wa pou tout tan”, épi Jézi Kwi, “Wa tout wa”, ka sèvi moun ki ka fè diféwan bagay pou akonpli bagay ki èkstwòdinè. (1 Tim. 1:17; 6:15; li Pwovèb 22:29.) Konsa annou twavy wèd èk sèvi abilité nou pou glowifyé Jéhova, èk pa kò nou.—Jan 8:54.
8. Ki mannyè ou kay désidé kisa pou apwann?
8 Chwazi bagay-la ou vlé fè-a. Ki mannyè ou kay désidé kisa pou apwann? Mandé sé ansyen-an an kongwigasyon-an épi pitèt ansyen-an pou sékyout-lan, ki bagay ou sa twavay asou. Si pou ègzanp, yo di’w, ou bizwen fè pli mèyè an mannyè-a ou ka palé épi enstwi, mandé yo ki pwen ou bizwen twavay asou. Épi twavay wèd pou fè pwogwé. Ki mannyè ou sa fè sa?
9. Kisa ou sa fè pou apwann bagay-la ou chwazi-a pou fè-a?
9 Twavay pou apwann bagay-la ou chwazi-a. Ann di ou vlé vini an pli mèyè titja. Ou sa pwan tan pou étidyé ti liv-la Fè Éfò Pou Apwann Li Èk Enstwi Pli Byen. Si ou ni an pa an mitin-lan an simenn-lan, mandé an fwè pou kouté pa-a avan mitin-lan épi pou di’w sa ou sa fè pli mèyè. Pwépawé pa’w byen èk andavans. Lè sala sé fwè-a kay wè ou ka twavay wèd épi yo sa dépan asou’w.—Pwov. 21:5; 2 Kòr. 8:22.
10. Bay an ègzanp pou moutwé mannyè ou sa fè pwogwé lè ou ka apwann fè on bagay.
10 Kisa ou sa fè si bagay-la ou vlé fè-a, sé yonn ki difisil? Pa doubout, kontiné twavay asou’y. An fwè yo ka kwiyé Gary pa té sa li byen. I ka chonjé lè i té ka li an sé mitin-lan, i té ka hont. Mé i kontiné twavay wèd pou fè pwogwé. Gary di gwanmèsi entwennman i wisivwè, apwézan i ka bay diskou an sé mitin-lan, an asanmblé èk sé konvansyon-an!
11. Menm kon Timòfi, kisa ki kay édé nou fè pli an sèvis Jéhova?
11 Bib-la pa di si Timòfi sété an titja ki èstòdinè. Mé san dout, Timòfi fè pwogwé paski i swiv konsèy-la Pòl té bay. (2 Tim. 3:10) An menm mannyè-a, si nou dévlopé abilité nou, nou kay sa fè pli an sèvis Jéhova.
GADÉ POU MANNYÈ OU SA ÉDÉ SÉ FWÈ ÈK SÈ-A
12. An ki mannyè sé fwè èk sè-a ja édé’w?
12 Sé fwè èk sè-a ja fè an chay bagay pou édé nou tout. Pa ègzanp, nou ka apwésyé lè nou lopital, sé fwè-a ki asou konmité-a pou konminiké épi lopital-la ka vizité nou. Lè nou ka aji épi an difikilté an lavi nou, nou ka apwésyé lè yon ansyen pwan tan pou kouté nou èk konfòté nou. Épi lè nou bizwen èd pou fè yon létid Bib, nou ka kontan lè yon piyonnè édé nou. Menm kon sé fwè èk sè-a ka ni tjè kontan lè yo édé nou, nou osi sa ni tjè kontan lè nou édé lézòt. Paski Jézi di: “Tjè’w ka pli kontan lè ou kay bay pasé lè ou ka wisivwè.” (Twav. 20:35) Konsa si ou vlé fè pli bay Jéhova, kisa ki kay édé’w?
13. Lè ou ka désidé pou fè plis an sèvis Jéhova, kisa ou pa vlé fè?
13 Lè ou ka désidé pou fè plis an sèvis Jéhova fiksé asou bagay ki spèsifik. Pou ègzanp, pa djòs di ou vlé fè pli an kongwigasyon-an, paski i kay difisil pou sav ki koté pou koumansé. Konsa, chwazi yon bagay ki spèsifik. Ou sa jis ékwi sa ou vlé fè èk fè plan pou kontiné twavay asou’y.
14. Pouki nou ni pou pwépawé pou fè chanjman lè nou vlé fè pli an sèvis nou pou Jéhova?
14 Nou ni pou pwépawé pou fè chanjman lè nou vlé fè pli an sèvis nou pou Jéhova paski la ni bagay an lavi nou, nou pa sa kontwolé. Pou ègzanp, zapòt Pòl té édé fòmé an kongwigasyon nèf an vil Tèsalonnika. Dézi’y sété pou wèsté la pou édé sé fwè-a. Mé òpozisyon fòsé’y pou kité vil-la. (Twav. 17:1-5, 10) Si zapòt Pòl té wèsté la, i té kay mété lavi sé fwè-a an danjé. Mé Pòl pa té doubout édé sé fwè èk sè-a. Pito sa i fè chanjman ki té nésésè an lè-a. Konsa pli ta, Pòl voyé Timòfi pou édé sé Kwityen nèf-la bati lafwa yo. (1 Tèsa. 3:1-3) San dout, sé fwè-a an Tèsalonnika té kontan lè Timòfi vini la pou édé yo!
15. Ba yon ègzanp pou moutwé, mannyè sa nou vlé fè bay Jéhova pé chanjé silon sitiwasyon nou.
15 Nou sa apwann hòd èspéyans Pòl an Tèsalonnika. Nou pitèt vlé fè pli an sèvis nou pou Jéhova. Mé si sitiwasyon nou chanjé sa pé anpéché nou fè sa. (Éklé. 9:11) Si sa wivé’w, ès ou pawé pou fè chanjman an sa ou vlé fè bay Jéhova? Sé sa ki té wivé Ted èk madanm li, Heidi. Yo té doubout wann sèvis an Bèfèl paski yo té malad. Mé, lanmityé yo pou Jéhova pousé yo pou gadé pou lòt mannyè pou fè pli an sèvis yo bay Jéhova. Pwèmyéman, yo koumansé wann sèvis kon piyonnè wéglé. Pli ta, yo té ka wann sèvis kon piyonnè spésyal èk Ted wisivwè entwennman pou wann sèvis kon an ansyen pou sékyout-la. Apwé sa, ògannizasyon-an fè chanjman an laj-la yon fwè sa wann sèvis kon ansyen pou sékyout-la. Konsa Ted èk Heidi wéyalizé laj yo pa té ka pèwmité yo pou kontiné wann sèvis an ansayman sala. Magwé yo té dézapwenté, yo wéyalizé yo té sa sèvi Jéhova an diféwan mannyè. Ted di: “Nou ja apwann nou sa wann sèvis bay Jéhova an plizyè diféwan mannyè.”
16. Ki lison nou sa apwann an Galécha 6:4?
16 Nou pa sa kontwolé tout bagay ki ka fèt an lavi nou. Alò, i enpòtan pou nou pa katjilé, ‘sé ansayman nou ki ka fè nou ni valè an zyé Jéhova’. Osi, nou pa sipozé miziwé kò nou épi sa lézòt ka fè. Heidi di: “Si ou konpawé lavi’w épi lavi lézòt, ou pa kay ni tjè kontan.” (Li Galécha 6:4.) Konsa, annou gadé pou diféwan mannyè pou édé lézòt èk kontiné sèvi Jéhova. *
17. Kisa ou sa fè pou pwépawé pou fè pli an sèvis Jéhova?
17 Ou kay sa fè pli an sèvis Jéhova, si ou tjenn lavi’w senp èk ou pa antwé an dèt ki pa nésésè. Osi, koumansé fè pli an sèvis Jéhova piti an piti. Pou ègzanp, si ou vlé wann sèvis kon an piyonnè wéglé, ou sa koumansé kon an piyonnè òkzilè apwézan. Èben si ou vlé wann sèvis kon an sèvant ministiryal, ou sa koumansé pasé pli tan an sèvis-la èk pwan ti tan pou vizité fwè èk sè ki malad èk ki an laj an kongwigasyon-an. Tout sé bagay sala kay ba’w èspéyans ou kay sa sèvi pli ta an sèvis Jéhova. Konsa, toujou fè tout sa ou pé an népòt ansayman ou ni an sèvis Jéhova.—Ronm 12:11.
Chwazi pou fè on bagay ou sav ou sa fè (Gadé pawagwaf 18) *
18. Kon nou ka wè an pòtwé-a, kisa ou apwann an ègzanp Beverley?
18 Nou pa janmen twò vyé pou fè pli bay Jéhova. Konsidiwé ègzanp Beverley, an sè ki té swasant-kenz (75) lanné. Santé’y pa té bon, épi i té difisil pou’y maché. Mé i té vlé fè tout sa i pé pou sipòté kanmpéyn-la pou Mémoriyal-la. Konsa, i twavay wèd, i té ni siksé èk sa ba’y an chay tjè kontan. Ègzanp li ankouwajé lézòt pou fè pli an minis-la. Nou asiwé, Jéhova ka apwésyé tout sa fwè èk sè ki an laj ka fè, menm si yo pa sa fè tout sa yo vlé fè an sèvis li.—Sam 71:17, 18.
19. Kisa nou sa fè pou fè pli an sèvis Jéhova?
19 Éséyé fè pli an sèvis ou bay Jéhova silon sitiwasyon’w. Kiltivé bon kawaktè kwityen pou plè Jéhova. Apwann on bagay ou sa sèvi an sèvis Jéhova. Toujou gadé pou mannyè pou édé sé fwè èk sè-a. * Si ou fè sa, Jéhova kay benni’w, menm kon i té benni Timòfi èk tout moun kay wè pwogwé’w.—1 Tim. 4:15.
CHANSON 38 I Kay Fòtifyé’w
^ Magwé Timòfi té byen abil lè I té ka pwéché bon nouvèl-la, zapòt Pòl ankouwajé’y pou kontiné fè pwogwé. Timòfi swiv konsèy Pòl. Konsa Jéhova té sa sèvi’y pli èk i menm té sa édé sé fwè èk sé sè-a pli. San dout, menm kon Timòfi, ou vlé fè pli an sèvis Jéhova épi édé sé fwè èk sé sè-a pli. Kisa ki kay édé’w fè pwogwé an sèvis ou pou Jéhova?
^ SA MO PAWÒL SALA VLÉ DI: Spiritual goals include anything we work hard to achieve so that we can serve Jehovah more fully and make him happy.
^ See “Serving Where the Need Is Greater” in the book Organized to Do Jehovahʼs Will, chapter 10, pars. 6-9.
^ See lesson 60, “Continue Making Progress,” in the Enjoy Life Forever! book.
