1. Watwero keto yub me cwiny macalo mene?

 MACALO Lukricitayo, wamaro Jehovah adada. Wamito ni wami ki Jehovah gin maber loyo ma watye kwede. Ento wek watim gin maber loyo ma watwero pi Jehovah, mitte ni waket yub me cwiny, calo dongo kit pa Lukricitayo, pwonyo diro manyen, ki yenyo yo me tic pi jo mukene. *

2. Pingo omyero waket yub me cwiny dok wati matek me cobogi?

² Pingo omyero wabed ki miti me medo ticwa pi Jehovah? Tyen lok ma pire tek loyo aye ni wamito yomo cwiny Wonwa me polo. Jehovah cwinye bedo yom ka en neno watiyo ki dirowa maber i ticce. Medo i kom meno, wamito dongo i yo me cwiny wek wabed ki kare me konyo omegiwa ki lumegiwa. (1 Tec. 4:9, 10) Kadi dong warii i ada pi mwaki mapol, wan ducu watwero dongo i yo me cwiny. Kong dong wanenu kit ma watwero timo kwede meno.

3. Gin ango ma lakwena Paulo ocuko cwiny Temceo me timone? (1 Temceo 4:12-16)

³ Kadi bed ni Temceo onongo pud bulu i kare ma lakwena Paulo ocoyo waragane mukwongo bote, ento Temceo onongo dong otiyo macalo laelda pi kare mo. Kadi bed kit meno, Paulo ocuko cwinye me medde ki dongo i yo me cwiny. (Kwan 1 Temceo 4:12-16.) Ka iwoto ki tam i kom lok pa Paulo, ibineno ni en onongo mito ni Temceo  omedde ki dongo i yo aryo: me acel, ki dongo kit pa Lukricitayo calo mar, niye, ki bedo maleng ki dong me aryo, dongo dirone me kwan i nyim lwak, tito lok, ki pwony. Wabinyamo labol pa Temceo wek wanen kit ma keto yub ma watwero cobone bikonyowa me dongo i yo me cwiny. Wabineno bene yo mogo ma watwero medo kwede cawawa i tic me tito kwena.

4. Ma lubbe ki Jo Pilipi 2:19-22, ngo ma oweko Temceo obedo latic pa Jehovah ma pire tek?

⁴ Ngo ma oweko Temceo obedo latic pa Jehovah ma pire tek? Kite mabeco macalo Lakricitayo. (Kwan Jo Pilipi 2:19-22.) Ki i kit ma Paulo oloko kwede i kom Temceo, watwero neno ni en onongo obedo ngat mamwol, lagen dok tiyo matek. En onongo ngat ma lamar dok paro pi omege adada. Macalo adwogine, Paulo onongo maro Temceo dok pe lworo mine mot me tic matego. (1 Kor. 4:17) I yo acel-lu, Jehovah bimarowa dok wabibedo ki kero me konyo jo me kacokke ka wadongo kit mogo ma en marogi.—Jab. 25:9; 138:6.

5. (a) Itwero yero kit pa Lukricitayo ma imito dongone nining? (b) Kit ma kinyuto kwede i cal-li, laminwa matidi-ni tye ka tic i kom yubbe me nyuto kica bot jo mukene nining?

⁵ Yer kit acel mo ma imito tic iye. Leg kun itamo matut i kom kiti mene ma mito ayuba. Yer kiti mo acel ma imito timo alokaloka iye. Me labolle, iromo yero me pwonyo kit ma itwero nyuto kwede cwiny me kica nyo me dongo miti me konyo omegini ki lumegini. Nyo iromo tute me pwonnye me yubo wat ki jo mukene ki me timo kica. Twero bedo me kony ka ipenyo laremi mo ma igeno me mini tam i kom yo ma itwero dongo kwede.—Car. 27:6.

6. Iromo tute matek me cobo yubbi me dongo kit moni nining?

⁶ Tute matek me cobo yubbi. Itwero timo meno nining? Yo acel aye ki kwanyo kare me kwano matut lok i kom kit moni ma imito dongone. Ket kong ni imito dongo cwiny me timo kica ki jo mukene. Iromo cako ki kwano kacel ki lwodo lok i kom labol pa dano mogo i Baibul ma onongo gingene pi timo kica, ki jo ma onongo pe lutim kica. Tam kong i kom labol pa Yecu. En onongo kare ducu  tye atera me weko bal pa jo mukene. (Luka 7:47, 48) En pe oketo cwinye i kom balgi ento i kom jami ma onongo gitwero cobone. Ki tungcel, Luparicayo ma i kare pa Yecu onongo “gicayo jo mukene.” (Luka 18:9) I nge lwodo lok i kom labol magi, pennye kekeni ni: ‘An aneno jo mukene nining? Kitgi mene ma an aketo iye cwinya tutwal?’ Ka itye ka nongo tek me timo kica ki ngat mo, tem coyo kite mabeco ducu piny. I nge meno pennye kekeni ni: ‘Yecu mono neno ngat-ti nining? Tika en onongo bitimme kica?’ Ka watimo man, watwero loko tamwa woko. I acakkine, twero mitte ni wati matek me timo kica ki ngat mo ma ocwero cwinywa. Ento ka wamedde ki tute me timo alokaloka man, i nge kare mo wabinongo ni timo kica dong odoko yot.

7. Ma lubbe ki Carolok 22:29, i yo ma nining ma Jehovah tiyo ki lutic ma ludiro i kare-ni?

⁷ Yub mukene ma itwero ketone aye obedo me pwonyo diro mo ma weko ibedo me kony. Tam kong i kom wel lutic ma mitte me gero gangi pa Lubetel, Odi me Gure, ki Odi me Ker. Pol pa lutic magi gupwonyo dirogi ki tic kacel ki omege ki lumege ma ludiro tic. Kit ma kinyuto kwede i cal-li, omege ki lumege mapol gitye ka pwonyo diro ma mitte me miyo kony pi roco Odi me Gure ki Odi me Ker. I yo meno ki mukene, Lubanga Jehovah, “Kabaka ma loyo kare ducu,” ki Yecu Kricito “Kabaka pa luker ducu” gitye ka tic ki lutic makwiri me cobo jami madongo. (1 Tem. 1:17; 6:15; kwan Carolok 22:29.) Wamito ni wati matek kun watiyo ki dirowa me kelo deyo bot Jehovah, pe i komwa kekenwa.—Jon 8:54.

8. Itwero ngeyo diro ma myero ipwony nining?

⁸ Yer diro ma imito pwonyone kikome. Diro mene ma itwero pwonyone? Peny luelda me kacokkewu nyo laneno me adwolwu wek gutitti diro mene ma itwero dongone. Me labolle, ka gumini tam ni idong dironi me lok ki pwony, penygi wek gunyutti diro me lok mene kikome ma myero iti iye. I ngeye, ti matek me dongo diro meno. Itwero cobo man nining?

9. Iromo tute matek me cobo yubbi me dongo diro moni nining?

⁹ Tute matek me cobo yubbi. Ket kong ni imito dongo dironi me pwony. Itwero keto cwinyi ka kwano brocuwa me Dong Dironi me Kwan ki Pwony. Ka kimini pwony mo i cokke me dye cabit, itwero penyo omego mo ma lapwony mucwiny me winyo pwonyi ma peya imiyo i cokke wek otitti ka ma myero iyubbi. Yub pwonyi con wek dano gunen ni in latic matek dok ma genne.—Car. 21:5; 2 Kor. 8:22.

10. Mi labol ma nyuto kit ma watwero dongo kwede diro mo ma mitte.

¹⁰ Ngo ma iromo timone ka diro ma imito pwonyone-ni kwako gin mo ma timone tek adada piri? Pe iil cingi woko! Omego mo ma nyinge Garry onongo pe twero kwan maber. Wiye po ni lewic onongo make adada ka etye ka kwan i nyim lwak me kacokke. Ento en omedde ki tute matek me dongo dirone me kwan. En owaco ni pwony ma enongo ki bot omege ma ludiro kacel ki i bukkewa oweko dong i kare-ni etwero miyo pwony i Ot me Ker, i gure me adwol, kadi wa i gure madongo bene!

11. Calo Temceo, ngo ma bikonyowa me bedo ki kero me medo ticwa pi Jehovah?

 ¹¹ Tika Temceo odoko lapwony nyo lalok mucwiny adada? Baibul pe wacciwa. Ento labongo akalakala mo, Temceo odoko ladiro i cobo ticce pien en olubo tam pa Paulo. (2 Tem. 3:10) I yo acel-lu, ka wadongo dirowa, wabibedo ki kero me medo ticwa pi Jehovah.

12. I yo ma nining ma jo mukene dong gukonyi kwede?

¹² Wan ducu wanongo adwogi maber ka jo mukene gukonyowa. Me labolle, ka kigengowa i ot yat, wabedo ki pwoc ka luelda ma gitiyo i Komitti ma Kubu kin Lucaden ki Ludaktari nyo ki Patient Visitation Groups gulimowa. Ka watye ki peko mo i kwowa, cwinywa bedo yom ka laelda mo ma lamar okwanyo kare me winyo lokwa ki cuko cwinywa. Ka wamito tam mo me konyo latin kwanwa me Baibul, cwinywa bedo yom ka lapainia mo mucwiny ocito kwedwa pi kwan man dok ominiwa tam. Omege ki lumege magi ducu cwinygi yom me konyowa. Watwero nongo yomcwiny meno ka wan bene wajalle me konyo utmegiwa. Yecu owaco ni, “Miyo mot kelo gum [yomcwiny] makato gamo agama.” (Tic 20:35) Ka imito medo ticci pi Jehovah i yo magi ki mukene, ngo ma bikonyi me timo meno?

13. Ka watye ka keto yub, ngo ma omyero wiwa opo iye?

¹³ Gwokke ki keto yub ma kwako jami mapol tutwal. Me labolle, itwero keto yub ni, ‘Amito medo ticca i kacokke.’ Ento twero bedo tek adada me ngeyo kit me cobo yub meno, dok pe ibiniang ka icobo. Pi meno, yer yub ma ibitiyo iye kikome. Itwero bene coyo yub man piny kacel ki kit ma ibicobone kwede.

14. Pingo pe omyero wabed lugingi tutwal ka watye ka keto yub?

¹⁴ Pe mitte ni wabed lugingi tutwal ka watye ka keto yub. Pingo? Pien pe watwero doro jami ducu ma timme i kwowa. Me labolle: Lakwena Paulo onongo okonyo me cako kacokke manyen i boma me Tecalonika. Dok labongo akalakala mo, en onongo tye ki yub  me bedo kunnu ki konyo Lukricitayo manyen magi. Ento lumone guweko Paulo oa woko ki i boma man. (Tic 17:1-5, 10) Ka onongo Paulo omedde ki bedo kunnu, en onongo biketo kwo pa utmegine ka mading. Ento Paulo pe ojuko tutene me konyogi. Me ka meno, en olokke ma lubbe ki gin mutimme. Lacen, en ocwalo Temceo me konyo Lukricitayo manyen ma i Tecalonika wek gubed ki niye matek. (1 Tec. 3:1-3) Lukricitayo ma i Tecalonika nen calo cwinygi obedo yom adada ni Temceo obedo atera me cito ka ma onongo kimito iye kony!

15. I yo ma nining ma yubwa twero lokke ka kwowa olokke? Mi labol.

¹⁵ Watwero nongo pwony ki i gin mutimme i kom Paulo i Tecalonika. Watwero keto yub mo, ento kwowa romo lokke woko ci gengowa ki cobo yub meno. (Latit. 9:11) Ka meno aye gin ma otimme i komi, bed atera me keto yub mukene ma iromo cobone. Man aye gin ma omego mo ma nyinge Ted ki dakone Hiedi gutimo. Pi peko me yotkom, onongo mitte ni guwek ticgi i Betel woko. Ento margi pi Jehovah otugo cwinygi me yenyo yo mukene me medo ticgi pi Jehovah. Mukwongo, gucako tic macalo painia marii. I nge kare mo, kicimogi me tic macalo painia keken, dok Ted onongo pwonnye me tic macalo lakony kor laneno me adwol. Ci kiloko mwaka ma omyero luneno me adwol guwek kwede ticgi. Ted ki Hiedi gunongo ni guteggi woko ma pe dong gitwero medde ki tic pi Jehovah i yo man. Kadi bed cwinygi otur, guniang ni pud gitwero medde ki tic pi Jehovah i yo mukene. Ted owaco ni, “Wapwonyo ni watwero tic pi Jehovah i yo mapol mapatpat.”

16. Pwony ango ma watwero nongo ki i Jo Galatia 6:4?

¹⁶ Pe watwero doro jami ducu ma timme i kwowa. Pi meno, pire tek ni pe watam ni konywa tye bot Jehovah keken ka watye ki mot me tic, dok pe omyero wapore ki jo mukene ma gitye ki mot me tic ma wan wape kwede. Hiedi otito ni, “Ibirwenyo yomcwinyi woko ka iporo kwoni ki kwo pa jo mukene.” (Kwan Jo Galatia 6:4.) Pire tek ni wayeny yo me tic pi Jehovah kun bene wakonyo jo mukene. *

17. Ngo ma itwero timone wek ibed ma ipore me nongo mot me tic i dul pa Jehovah?

¹⁷ Ibibedo ki kare me cobo tic mapol i dul pa Jehovah ka ikwo kwo ma rwomme  lapiny dok igwokke ki donyo i banya. Ket yub matinotino ma gibikonyi me cobo yubbi ma pire tek loyo. Me labolle, ka yubbi ma pire tek obedo me doko painia marii, tika itwero tic macalo painia pi tutunu dwe ki dwe? Ka yubbi tye me tic macalo lakony kor tic, tika itwero medo cawani i tic me pwony kacel ki limo lutwo ki jo muteggi ma i kacokkewu? Ngec ma inongo kombeddi twero yabbi yo me nongo mot me tic mukene i kare me anyim. Mok tammi me timo gin maber loyo ma itwero ki mot me tic mo keken ma kimiyo boti.—Rom. 12:11.

18. Gin ango ma ipwonyo ki i labol pa Beverley? (Nen bene cal ma tye)

¹⁸ Pe waromo waco ni dong wati woko ma pe watwero keto ki cobo yub me cwiny. Nen kong labol pa laminwa ma nyinge Beverley ma tye ki mwaka 75. En tye ki two malit ma weko nongo tek adada me wot. Ento en onongo tye ki miti me medo ticce i kare me rwec me Nipo. Pi meno, en oketo yub ma mito cobone kikome. I kare ma Beverley ocobo yubbe pi rwec me Nipo, cwinye obedo yom adada. Tutene ocuko cwiny jo mukene bene me medo ticgi. Jehovah pwoyo tic pa omegiwa ki lumegiwa ma guteggi matek, kadi bed pekki ma gitye kwede gengogi cobo tic mapol.—Jab. 71:17, 18.

19. Yub me cwiny ango ma watwero ketone?

¹⁹ Ket yub ma itwero cobone. Dong kit pa Lukricitayo ma biweko Jehovah marri. Pwony diro ma biweko ibedo me kony bot Lubangawa ki dulle. Yeny yo me konyo omegini ki lumegini. * Calo Temceo, ki kony pa Jehovah ‘dano ducu gibineno kit ma itye ka wot kwede anyim.’—1 Tem. 4:15.