1. Ngaˈay kita patireng to maanan a patosokan?

 O SOˈLIˈLINAY a Krisciyang kita, tangongolay ko olah ci Yihofaan, makalimay patafang to sangaˈayay no niyah Cingranan. Sapihaenaw kita to demak, mamipatireng to pina patosokan, tinakoen palahad to adihayay a ngaˈayay capeling no Krisciyang, minanam to ciepocay a inaneng, ato mikilim to adihayay a toki matayal saki tao.

2. Hano papatireng kita to patosokan, ato misaˈicel palaˈosi to patosokan?

² Hano papadotoc kita macakat hani? Salakat, makalimay kita pakahemek to ciolahay a Wama i kakarayan ci Yihofa. Maˈaraway Ningra ko pisaˈicel ita misaka dademak to inaneng no niyah matayal saki Cingranan, maedeng masemeray. Roma i, makalimayho kita adihay ko sapadama i salikaka. (1 Tisalonika 4:9, 10) Ano hakowato ko halafin ita micada to paputisem, wa ngaˈay padadotoc macakat. Sasamaan padotoc a macakat hani?

3. Itini 1 Timoti 4:12-16, tarokos ci Pawlo pakalalokay ci Timotian sasamaan ko pidemak?

³ Sakinacecay patikami ko tarokos ci Pawlo ci Timotian i, kaemangayho a Timoti o kadofahayto ko nalifetan a malohemay malitengay. Kawra, kamayan ci Pawlo pakalalok cingranan padadotoc macakat. (ˈOsien ko 1 Timoti 4:12-16.) Mikitini kita i sowal ni Pawlo mahapinang, makalimay cingra ci Timotian padadotoc macakat itini tosa pakayraan: saka cecay pakayraan o palahad to capeling no Krisciyang, tinakoen olah, pakasoˈlinay falocoˈ, nika korac no falocoˈ, o roma pakayraan i pacakaten ko inaneng no niyah, tinakoen miasip, sapalimoˈot, inaneng a pasifanaˈ. Dotoc, onini a lalakaw mamilengo to taˈarawan ni Timoti, nengnengen o patirengan a matatodongay a patosokan sasamaan padama kitanan malo sangaˈayay a Krisciyang. Maminengneng kita to o maanan a pakayraan ngaˈay padama kitanan adihay ko pidemak saki Yihofaan.

4. Mikitini Filipi 2:19-22, ci Timoti hano ngaˈay malo idahiyay a sikawdan ni Yihofa?

⁴ Ci Timoti hano ngaˈay malo idahiyay a sikawdan ni Yihofa hani? Samanen adihayay ko makapahay a capeling ningra. (ˈOsien ko Filipi 2:19-22.) Mikitini pitadtad ni Pawlo ngaˈay mahapinang ita, misapoeneray madimadiay ci Timoti, tada malalokay, ngaˈayay pakasoˈlinen. Tada ciolahay cingra to tamdaw, mikifalocoˈay ciharateng to salikaka. Mihaenay, tada maolahay ci Pawlo ci Timotian, rihadayayho pafeli to pasangaray a ˈinorong cingranan. (1 Korinto 4:17) Malecaday, ano palahad kita to kaolahan ni Yihofa a capeling, o mamaolah ci Yihofa kitaanan, wa misaka dademak kitaanan matongal ko tayal i kasakopang.—ˈOlic 25:9; 138:6.

5. (1) Sapipalahadaw to makapahay a capeling mipiliˈ to cecay ihkalay a patosokan, sasamaan ko demak hani? (2) Itini cokaay a kaemangay a fafahiyan salikaka patirengay to patosokan, makalimay matongal ko siniˈadaay falocoˈ i tamdaw, mansa samanay ko pidemak hani?

⁵ Mipiliˈ to cecay ihkalay a patosokan. Ka pitolon ato miharateng to capeling no niyah iraay ko maanan sasalofen, dotoc mipiliˈ to cecay mikiriwiˈay papalahaden iso a capeling. Tinakoen ngaˈay kiso miharateng: “Mamitongal kako to siniˈadaay a falocoˈ i tamdaw han? Misaaliay kako matongal ko kalim padama to salikaka han? Itini picowat to rihadayay ato misodod to tao a pakayraan, misaaliay kako macakat han?” Roma i, ngaˈayho kiso mitahidang to cecay pakasoˈlinan iso a widang pasowal tisowanan, itini maanan a pakayraan ngaˈay ko niyah macakat.—Taneng 27:6.

6. Ano makalimay kiso palahad to cecay a capeling, sasamaan palaˈosi to patosokan hani?

⁶ Misaˈicel palaˈosi to patosokan. Ngaˈay kiso samaan ko pidemak? O cecay pakayraan i mikilim to adihayay a lalakaw, micalep cipinang to papacakaten iso palahad a capeling. Ano pasangaray ko niyah misodod to tao saan kiso miharateng, misaˈosi to sapisalofaw tonini a pakayraan. Ngaˈay kiso salakat miasip ato misongilaˈ miharateng to roma ngaˈayay ato tatiihay a tinakoan i Fangcalay Cudad. Tinakoen, tada makahiay ci Yis misodod to tamdaw. (Luka 7:47, 48) Cowa ka padadotoc cingra misinanot to raraw no tao, pakasoˈlinay cingra to wa ngaˈayto ko pidemak nangra noikor. Cowa ka hecad ci Yisan, o Farisay a tamdaw ‘misakahmaway to tao.’ (Luka 18:9) Miharateng toniya tinakoan ikor, ngaˈay licayen ko niyah: “Samanay ko pinengneng ako to tao hani? Misinanotay kako to maanan a capeling no tao hani?” Ano pasangaray kiso misodod to cecay tamdaw saan miharateng, ngaˈay tanamen mitilid to kangaˈayan no tao, adihay ko mitilidan o mangalef ko kangaˈay. Ikor haratengen: “Samanay ci Yis minengneng cingranan hani? Mamisodod ci Yis cingranan han?” O hatiniay a pakayraan minanam padamaay kitaanan misalof to harateng no niyah. Salakat, o mamisaˈicel kita alatek, ngaˈ ngaˈay misodod to pakararaway kitanan a tamdaw. Kawra ano padadotoc kita a misaˈicel, saikor wa makahito a misodod to tao.

7. Anini misaka dademakan ni Yihofa ko inanengay a mawmahay tamdaw midemak to maanan hani? (Taneng 22:29)

⁷ O roma ngaˈayay patirengen iso a patosokan i, minanam to ciepocay a inaneng. Haratengen hena, patireng to dafong no Pitil, Pitaykayan ato Hongti Kitakit a Kasaˈopoan, misaaliay to ˈalomanay tamdaw. ˈAlomanay mirienangay toniya tayal a tamdaw malacafay to iraay ko nalifetan a salikaka, milifok to adihayay ciepocay a inaneng. Malecad to pitadtad no coka, ano faˈinayan salikaka anca fafahiyan salikaka, maminanam to pina inaneng, mitomadaw to Kasaˈopoan ato Pitaykayan. Cowa ko fafekangay aca a tinakoan, itini adihayay a pakayraan o ‘midaˈocay a Hongti’ ci Yihofa a Kawas ato ‘Hongti no hongti’ ci Kristo misaka dademakay to inanengay a mawmahay tamdaw, palaˈosi to adihayay kasapaan a demak. (1 Timoti 1:17; 6:15; ˈosien ko Taneng 22:29.) Soˈlinay makalim kita misaˈicel misaka dademak to inaneng no niyah paˈodingar ci Yihofaan, cowa ko paˈodingar to niyah.—Yohani 8:54.

8. Itini minanam to faelohay a inaneng a pakayraan, ngaˈay kiso sasamaan patireng to patosokan?

⁸ Mipiliˈ to ihkalay a patosokan. Makalimay kiso minanam to maanan a inaneng hani? Ngaˈay kiso mikilim to malohemay malitengay ato kasakilac kantok pafeli tisowanan to pina sapaini. Ano paini cangra tisowanan misalof to inaneng a somowal ato pasifanaˈ, ngaˈayay licayen cangra mamisinanot kiso to maanan a inaneng, ikor ngaˈayto kiso misaka dademak. Ihkalen ko sowal, wa ngaˈay kiso samaan ko pidemak hani?

9. Itini pinanam to faelohay a inaneng a pakayraan, ngaˈay kiso samaan misaˈicel palaˈosi to patosokan?

⁹ Misaˈicel palaˈosi to patosokan. Ano makalimay kiso misalof to inaneng no niyah a pasifanaˈ, ngaˈay misongilaˈ micekiw to Sarocoden Miasip ato Pasifanaˈ a cudad. Ano manilnilay kiso itini i mitosilay ato nika ˈorip a saˈopo misikay to cecay kamok, ngaˈay kiso mikilim to cecay iraay ko nalifetan a salikaka, miasip to maharekay iso misaday a lalakaw patengil cingranan, ikor pafeli tisowanan to pina sapaini, padama tisowanan macakat ko inaneng. Talaˈayaw kiso misongilaˈ misaday to kamok no niyah, mamahapinang no tao o malalokay o ngaˈayay pakasoˈlinen a tamdaw kiso.—Taneng 21:5; 2 Korinto 8:22.

10. Hadaken ko tinakoan mitadtad, sapinanamaw to roma inaneng sasamaan ko pidemak.

¹⁰ O nananamen iso a inaneng ano pasangaray nanamen saan kiso miharateng, sasamaan aki? Aka pisawad. O cecay faˈinayan salikaka ci Kali, pasangaray cingra miˈosi. Maharatengay ningra isaˈayaw na mitanamay miasip itini saˈopo, kawra cowa ka ngaˈay ko piˈosi, tada kangodoanto saan. Kawra, padotocay cingra misaˈicel misalof. Sanay cingra pakayni picada no niyah to sapahatatanam, mansa nohatini cowa ka itini aca i Kasaˈopoan, ngaˈayho mikimad i pitaykayan.

11. Mitodong kita ci Timotian samaan ko pidemak, wa ngaˈayto mitongal to tayal saki Yihofaan?

 ¹¹ Soˈlin cowa ka pasowal ko Fangcalay Cudad soˈlinay ci Timoti malo ngaˈayay a mikimaday ato singsi hokira, kawra ci Timoti maedeng mitooray to sapalimoˈot ni Pawlo cingranan, mansa ngaˈay itini romaroma katayalan padadotoc a macakat. (2 Timoti 3:10) Malecaday, ano palahad kita ato misalof to inaneng no niyah, wa ngaˈayto mitongal to tayal saki Yihofaan.

12. Na samaanay ko tao padama tisowanan hani?

¹² Kita o polong a tamdaw na milifokay to sapadama no tao. Tinakoen, itini kita i paisingan i, maedeng tada miakoˈiday kita to Mirinnakay to Ising a Iing ato Milisoˈay to Adadaay a Kapot a malohemay malitengay milisoˈ kitaanan. Ano tahalifa kita to pasangaray i, maedeng tada miakoˈiday to sidaˈitay a malohemay malitengay i kasakopang mipalak to toki mitengil to sowal ita ato mihinom kitanan. Ano misikay kita to pacekiwan misaali to sapadama i, o cecay kadofahay ko nalifetan a misakafahay mirienang to pipacekiw, pafeli kitanan to pina sapaini, maedeng tada lipahakay kita. Tada mahemekay konini salikaka itini misaali kita to sapadama i, padama kitanan. Ano misaˈicel kita patafang to niyah matayal saki salikaka, mamitinako to hatiniay a lipahak. Sanay ci Yis: ‘O paladaˈay ikakaay ko hemek to milayapay.’ (Dmak 20:35) Ano makalimay kiso sapitongalaw to tayal saki Yihofaan ato salikaka, sasamaan palaˈosi to patosokan hani?

13. Patireng to patosokan i, haharatengen ko maanan?

¹³ O patirengan ita a patosokan cowa kangaˈay eca ka mahapinang. Tinakoen, o patirengan iso a patosokan ano edengan o “sapitongalaw kako to tayal saki kasakopang,” mihaen papasangar kiso mafanaˈ to sasamaan palaˈosi toniya patosokan, pasangar mihapinang to malaˈosiay ko patosokan hokira. Mihaenay, ihkalen ko patosokan. Ngaˈay tiliden iso ko patosokan ato sasamaan kiso a midemak.

14. Patireng to patosokan i, hano mamakahi kita mifalic to roma pakayraan hani?

¹⁴ Patireng to patosokan i, mamakahi kita mifalic to roma pakayraan. Misamanay hani? Samanen adihayay a demak cowa kangaˈay kita miˈimer. Nengnengen ko tinakoan no tarokos ci Pawlo, itini Tisalonika padamaay cingra patireng to cecay faelohay a kasakopang ikor, maedeng makalimay materek itira, padama to faelohay micada to paputisem a salikaka. Kawra, tahalifaay ci Pawlo to pisafelit, mapacieciay miliyas itira. (Dmak 17:1-5, 10) Ano padadotoc ci Pawlo materek itira, o papaira to katalawan no salikaka alatek. Soˈlin mamiliyas cingra, kawra cowa ka pisawad cingra padama to itiraay a salikaka. Tawlikay cingra misiˈayaw to kafalican, ikor miocor ci Timotian padama to faelohay a salikaka i Tisalonika, paˈicel to pakasoˈlinay falocoˈ nangra. (1 Tisalonika 3:1-3) Patafangay ci Timoti to niyah, ano tatalacowato makahiay tayra. O Tisalonikaay a Krisciyang maˈaraw ci Timoti padama cangranan, maedeng tada lipahakay!

15. Ano pakayni kafalic no pakayraan ecato kalaˈosi ko patosokan, sasamaan kita midemak hani? Hadaken ko tinakoan mitadtad.

¹⁵ Mikitini taˈarawan ni Pawlo mananam ita ko maanan hani? Patirengay kita to patosokan alatek, kawra ikor mifekaday ko cowa ko mamaˈimer a demak, hato cowato ka laˈosi ko patosokan ita. (Patnakay 9:11) Ano mahaenay ko pakayraan iso, mamakahi a misalof, mipiliˈ to roma ngaˈayay malaˈosi iso a patosokan. Ci Teter aci Hayti oniya mararamoday mahaenay ko demak. Pakayni adada no tireng mapacieciay miliyas to Pitil cangra, kawra tangongolay ko olah nangra ci Yihofaan, mansa padadotoc mikilim to roma pakayraan mitongal to tayal saki Cingranan. Satapang malo misakafahay cangra, ikor manilnilay cangra malo mikiriwiˈay misakafahay, ci Teter micadaay to sapahatatanam malo mikotayay a kasakilac kantok. O cecay liyad ikor, o likakawa misalofay to tolas no mihecaan no kasakilac kantok. Mafanaˈ cangra cowato kangaˈay padadotoc materek tonini a katayalan, soˈlin tada tangoˈolay, kawra mafanaˈay cangra wa ngaˈay padadotoc ko niyah tano roma pakayraan matayal saki Yihofaan. Sanay ci Teter: “Mananamay niyam, adihayay ko pakayraan matayal saki Yihofaan, cowa ko cecayay aca ko pakayraan no mita a dademak.”

16. Mikitini i Kalatiya 6:4 mananamay ita ko maanan hani?

¹⁶ Adihayay a demak i kaˈorip awaay ko pakayraan ita miˈimer, mihaenay aka tano katayalan a toki no niyah minengneng to epoc no niyah, anca palalini to tao. Sanay ci Hayti: “O kaˈorip no niyah ano palalinien to tao, mamalahdaw ko rihaday no falocoˈ.” (ˈOsien ko Kalatiya 6:4.) Kalimlaan i, mikilim kita to toki mitongal to tayal saki Yihofaan ato padama to tao. b

17. Sasamaan kiso misaˈicel ira ko tatodong, milifok to adihayay a toki matayal hani?

¹⁷ Kantangen ko kaˈorip iso, hamaan cikiyam, mamadolo to matongal ko tayal saki Yihofaan. Roma i, ngaˈay kiso patireng to caka halafin a patosokan, palalan to halafinay a patosokan. O patosokan iso ano o malo miceriday misakafahay, nohatiniho mitanam padadotoc malo padamaay a misakafahay. O patosokan iso ano o malo dama sikawdan, nohatiniho tongalen ko toki mitosil ato milisoˈ to adadaay anca matoˈasay a salikaka i kasakopang. O matongalay a nalifetan iso nohatini, o papairato adihayay a toki iso a matayal. Ano o mananto a tayal ko sapafeli no kasakopang tisowanan, mamisetek ko falocoˈ iso misaˈicel ngaˈay ko pidemak.—Loma 12:11.

18. Mikitini i taˈarawan no salikaka ci Pifoli mananamay iso ko maanan? (Nengnengen ko coka.)

¹⁸ Ano hakowaayto ko katoˈas ita, ngaˈay patireng ato misaˈicel palaˈosi to patosokan. Nengnengen ko tinakoan no fafahiyan salikaka ci Pifoli. 75 ko mihecaan ningra, iraay ko pakidemay a adada, cowa kangaˈay romakat. Kawra makalimay cingra mirienang to mikiriwiˈay a mitosil a tayal, mitahidangay to tamdaw mirienang to piharatengan to kinafalah ni Yis a saˈopo, mansa patirengay cingra to ihkalay a patosokan. Salikaka ci Pifoli malaˈosi ko patosokan i, tada lipahakay, o ngaˈayay a taˈarawan ningra pakalalokay to roma salikaka misaˈicel mirienang to mitosilay a tayal. Soˈlin matoˈasay a salikaka adihayay ko pasangaray no kaˈorip, cowa ka adihay ko midemakan, kawra ci Yihofa kamayan misalimla to mihadakan nangra a ˈicel.—ˈOlic 71:17, 18.

19. Ngaˈay kita patireng to maanan a patosokan, padama to niyah padadotoc macakat?

¹⁹ Patirengen iso ko ngaˈayay malaˈosi a patosokan, palahaden ko kaolahan ni Yihofa a capeling, ka pinanam to pina a inaneng, mitongal to tayal saki Kawas ato likakawa Ningra, mikilimho to toki matayal saki salikaka. c Mihaen mamalecad kiso ci Timotian milifok to sapalemed ni Yihofa, ‘ta mahapinang no ˈalomanay ko nika cakat no tayal iso.’—1 Timoti 4:15.