1. ¿Diosar serviñan kunanak lurañsa amtsna?

 CHEQPACH cristianonakajja, Jehová Diosarojj wal munastanjja, ukatwa jupar jukʼamp sum serviñ muntanjja. Ukampis jupar jukʼamp serviñatakejj amtanakanïñasawa. Sañäni, suma cristianöñatakiw chʼamachasiñasa, kunanaktï jan lurirïktan ukanak lurañwa amtañasa, kunjamanakatsa mayninakar yanaptʼsna ukwa amtañasaraki.

2. ¿Kunatsa Diosar serviñan amtanakanïñasa, ukat ukanak phoqañatak chʼamachasiñasaraki?

² ¿Kunatsa Diosar serviñan amtanakanïñasa, ukat ukanak phoqañatak chʼamachasiñasaraki? Nayraqatjja, alajjpachankiri munasir Awkisaruw kusisiyañ muntanjja. Kunanaktï sum lurañ yatktan ukanakamp Jehová Diosar sirvtan ukhajja, jupajj wal kusisi. Ukatjja jilat kullakanakasar yanaptʼañatakejj jukʼamp suma cristianöñatakiw chʼamachasiñ munaraktanjja (1 Tes. 4:9, 10). Qhawqha tiemposay Diosar serviskstanjja, taqeniw Diosar serviñan jiltaskaksna, kunjamsa uk lursna uk jichhajj uñjañäni.

3. 1 Timoteo 4:12-16 textonjja, ¿kamsasas Pablojj Timoteor ewjjtʼäna?

³ Pablojj nayrïr cartap Timoteor qellqkäna ukhajja, Timoteojj waynäskänwa, ukampis ancianjamajj experiencianëjjänwa. Ukhamäkchïnsa, Jehová Diosar jukʼamp sum serviñapatak chʼamachasiskakiñapatakiw Pablojj jupar chʼamañchtʼäna (1 Timoteo 4:12-16 liytʼäta). Pablon arunakapat amuykiptʼañäni ukhajja, Timoteojj aka pä toqenakan chʼamachasispa uk Pablojj munatapwa amuyañäni: maya, cristianjamajj munasirïñataki, ewjjtʼañataki, Diosar confiyañataki, sum sarnaqañatak chʼamachasiñapwa munäna. Paya, mayninak nayraqatan jukʼamp sum liytʼañataki, ewjjtʼañataki, yatichañatak chʼamachasiñapwa munarakïna. Kunjamsa Timoteot yateqasiñajj kunanaktï phoqerjamäktan  ukanak lurañ amtañatak yanaptʼistaspa ukwa yatjjataskañäni, ukaw Diosar serviñan jiltaskakiñatak yanaptʼistani. Kunjamanakatsa Jehová Diosar jukʼamp sirvsna, ukwa mä qhawqhanak yatjjataskarakiñäni.

4. Filipenses 2:19-22 textorjamajja, ¿kunatsa Jehová Diosajj Timoteor privilegionak churpachäna?

⁴ ¿Kunatsa Jehová Diosajj Timoteor privilegionak churpachäna? Kuna laykutejj suma cristianönwa (Filipenses 2:19-22 liytʼäta). Pablojj Timoteot parlkäna ukarjamajja, Timoteojj humilde chuymanïtapa, jan jaytjasirïtapa, wali trabajtʼirïtapa, confiykayätapwa amuytanjja. Jilat kullakanakarojj munasiñampiw uñjäna, jupanakatsa llakisirakïnwa, ukatwa Pablojj Timoteor wal munasïna, chʼama asignacionanak churañatakis confiyarakïna (1 Cor. 4:17). Jehová Diosar kusisiyki ukham chuymanïñatak chʼamachasiñäni ukhajja, jupajj munasistaniwa, congregacionans jukʼamp privilegionakwa churarakistani (Sal. 25:9; 138:6).

5. 1) ¿Cristianjamajj kunanakansa chʼamachasiñasa uk kunjamatsa yatsna? 2) ¿Foton uñjaski uka tawaq kullakajj sinttʼasirïtap uñachtʼayañatakejj kunsa luraski?

⁵ Walja amtanakanïkstansa may lurañatakiw amtañasa. May lurañ amtasajja, uk lurañatakiw chʼamachasiñasa. ¿Mayninakat sinttʼasiñat faltpachïstu, jan ukajj mayninakar yanaptʼaña munañach faltpachïstu? ¿Mayninakamp sumankaña thaqañat faltpachïstu, jan ukajj mayninakar perdonañatak dispuestokïñach faltpachïstu? Jiwasatï uka toqenakat payachasstan ukhajja, confiyktan uka amigosaruw kunsa jiwasat amuyi uk jisktʼsna (Prov. 27:6).

6. Kun lurañtï amtktan uk phoqañatakejja, ¿kun lurañas yanaptʼistaspa?

⁶ Kun lurañtï amtktan uk phoqañatakiw chʼamachasiñasa. ¿Kunjamsa uk lursna? Kunjam chuymanïñatakis chʼamachasiñ muntan uka toqet yatjjatasaw qalltsna. Mayninakar perdonañatak dispuestokïñsa munksna ukham amuytʼañäni. Ukhamächi ukhajja, Diosar servirinakat khitinakatï mayninakar perdonapkäna, jan perdonapkarakïna ukanakatwa liytʼsna, lupʼiraksna. Perdonañ toqetjja, Jesusajj wali yateqaskayawa. Jupajj mayninakar perdonänwa (Luc. 7:47, 48). Janiw mayninakan pantjasitanakap uñchʼukirïkänti, jan ukasti kunanaktï sum lurapkaspa uk wali valoranitwa uñjäna. Ukampis fariseonakajj “yaqhanakarojj janis kunäpkaspa” ukhamwa uñjapjjerïna  (Luc. 18:9). ¿Ukjjarojj kunsa lurañasaraki? Inas akham jisktʼasiñasajj wakischispa: “¿Kunjamsa mayninakar uñjtjja? ¿Mayninakajj kunjam chuymanïpjjesa uk valoranit uñjañatakit chʼamachastjja?” sasa. Ukampis maynir perdonañatï jiwasatak chʼamächi ukhajja, jupajj kunjam suma chuymanisa ukanak mä listar qellqtʼasiñasaw wakisispa, ukat akham jisktʼasiñasarakïspawa: “¿Kunjamsa Jesusajj jupar uñji? ¿Jupar perdonaspati?” sasa. Ukanakat yatjjatañaw jan nayrjam amuyjjañatak yanaptʼistaspa. Qalltanjja chuym ustʼaykistu ukar perdonañajj chʼamakïspawa, ukampis chʼamachasiñäni ukhajja, perdonañ yatjjañäniwa.

7. Proverbios 22:29 textorjamajja, ¿kunanaktï sum lurañ yatipki uka jilat kullakanak toqejj kunanaksa Jehová Diosajj jichhürun luraski?

⁷ Maysa toqetjja, may lurañwa yateqsna. Taqe khitinakatï sucursalanaka, Salones de Asambleas, Tantachasiñ Utanak lurañan yanaptʼapki ukanakat amuytʼañäni. Uka jilat kullakanakat jilapartejja, khitinakatï wali experiencianïpki jupanakamp chik trabajisaw kunanaktï yatipki ukanak yateqawayapjje. Kunjamtï fotonakan uñjaskejja, Salones de Asambleas ukat Tantachasiñ Utanak mantenimiento lurañatakiw jilat kullakanakajj yateqasipki. ‘Wiñay Reyïki’ uka Jehová Diosana, ukhamarak ‘reyinakjam apnaqapki ukanakan Reyipäki’ uka Jesusan yanaptʼapampiw waljanak lurasipki (1 Tim. 1:17; 6:15; Proverbios 22:29 liytʼäta). Ukatwa wal trabajiñ muntanjja, kunanaktï sum lurañ yatktan ukanakampis Jehová Diosaruw jachʼañchañ muntanjja, janiw jiwas pachparuk jachʼañchasiñ munktanti (Juan 8:54).

8. ¿Kun lurañatakis chʼamachasiñasa uk amtañatakejj kun lurañasasa?

⁸ Walja amtanakanïkstansa may lurañatakiw amtañasa. ¿Kun lurañsa yateqsna? Ukatakejj congregacionankir ancianonakampi jan ukajj superintendente de circuito jilatampiw parltʼsna, jupanakaw kunansa chʼamachasiñasa uk sapjjestani. Jupanakatï suma discurso arstʼañataki jan ukajj sum yatichañatak chʼamachasim sapjjestani ukhajja, kunan chʼamachasiñajas wakisispa sasaw jisktʼaraksna. Ukatjja ewjjtʼanakaparjam lurañatakiw chʼamachasiñasa. ¿Kunjamsa uk lursna?

9. ¿Jumatï suma yatichirïñ munsta ukhajj uka amtam phoqañatakejj kunsa lurasma?

⁹ Kun lurañtï amtktan uk phoqañatakiw chʼamachasiñasa. Suma yatichirïñsa munkasma ukham amuytʼañäni. Ukatakejja, Sum liytʼañataki yatichañataki chʼamachasiñäni sat folletotwa sum yatjjatasma. Semanan utjki uka tantachäwin janïr mä asignacionam phoqkasajja, experienciani mä jilataruw jumar istʼañapatak mayisma, jupaw kunansa chʼamachasiñama uk siristam. Jumatï jayäkipan asignacionanakam wakichtʼasjjäta ukhajja, suma yatichirëjjätawa. Mayninakas wali trabajtʼirïtama, confiykayätamwa amuyapjjarakini (Prov. 21:5; 2 Cor. 8:22).

10. Mä kunan chʼamachasiñ munstan ukhajj kunsa lursna uk mä uñachtʼäwimp qhanañchtʼam.

¹⁰ Mä kun lurañas jiwasatak chʼamächi, ukat ukan chʼamachasiñ munarakstan ukhajja, ¡jan qarjtañäniti! Garry jilatat parltʼañäni, jupatakejj liytʼañajj chʼamakïnwa, ukatwa tantachäwinakan liytʼañajj waktʼkäna ukhajj wal phenqʼasïna, ukwa jupajj amti. Ukampis janiw qarjtkänti, sum liytʼañatakejj chʼamachasiskakïnwa. Jilatanakan yanaptʼapampisa, Bibliat apstʼat qellqatanakan yanaptʼapampis jichhajj tantachäwinakana, asambleas de circuito ukat asambleas regionales ukanakanwa discursonak arstʼjje.

11. Timoteo waynjam jukʼamp asignacionanak katoqañatak wakichtʼatäñatakejja, ¿kunas yanaptʼistani?

¹¹ ¿Timoteojj discursonak sum arstʼiri ukat  suma yatichirëjjpachänti? Bibliajj janiw uka toqet kamskisa, ukampis Pablon ewjjtʼanakaparjamaw lurpachäna. Jukʼat jukʼat ukanak sumwa lurjjpachäna, asignacionanakapsa jukʼamp sumwa phoqjjarakpachäna (2 Tim. 3:10). Jiwasatï mä kuns sum lurañatak chʼamachasiñäni ukhajja, Timoteo waynjamarakiw jukʼamp asignacionanak katoqañatak wakichtʼatäñäni.

12. ¿Kunjamsa mayninakajj jumar yanaptʼawayapjjtam?

¹² ¡Mayninakajj yanaptʼkistu ukhajj wal kusistanjja! Usuntasin hospitalankasktan ukhajja, Comité de Enlace con los Hospitales jan ukajj Grupo de Visita a Pacientes ukan yanaptʼir jilatanakajj visittʼapkistu ukajj wal chʼamañchtʼistu. Jan walin uñjasktan ukhajj mä ancianojj jiwasar istʼañataki, chuymachtʼañatak tiempo apstʼasi ukhajj wal yuspärtanjja. Experienciani mä precursor jilatasa jan ukajj mä kullakas Bibliat maynir yatichañatak compañtʼistu, kunjamsa suma yatichirïsna uka toqet ewjjtʼarakistu ukhajja, wal kusistanjja. Jesusajj akham sänwa: “Katoqañat sipansa churañanwa jukʼamp kusisiñajj utji” sasa (Hech. 20:35). Uka jilat kullakanakajj jiwasar yanaptʼasajj kusisitäpjjewa. Jiwasatï mayninakar yanaptʼarakiñäni ukhajja, ukham kusisitaw jikjjatasirakiñäni. Ukhamanakata jan ukajj yaqha toqenakat Jehová Diosar jukʼamp serviñ munstan ukhajja, ¿kunjamsa uk phoqsna?

13. Mä kun lurañ amtkasajja, ¿kunsa amuytʼasiñasa?

¹³ Janiw may maya amtanakanïñasäkiti, jan ukasti mä amtanikïñasawa. Inas jiwasajj “congregacionan wal yanaptʼañ munirista” sasin sisstan. Ukham amuysna ukhajj janiw congregacionan kunjam yanaptʼañsa puedksnati, kunansa yanaptʼjjtan jan ukajj janich yanaptʼktan uk amuyañas jiwasatak chʼamakïspawa. Ukhamajj waljanak lurañ amtanakanïkasas mayak lurañ amtañaw walïspa. Kunsa lurañäni uk qellqtʼasiñasaw walïspa, kunjamsa uka amtas phoqañäni uksa qellqtʼasiñasarakïspawa.

14. ¿Mä kun amtkasas kun amuyañasas wakisi?

¹⁴ Jakäwisajj mayjtʼaspawa, janiw kunjamtï munktan ukhamapunëjjaspati, ukhamajj mä amtar purkasajj uk amuyañasawa. Sañäni, apóstol Pablojj Tesalónica congregación uttʼayasiñapatakiw yanaptʼäna. Uka machaq jilat kullakanakar yanaptʼañatakejja, inas mä qhawqha tiempo ukan quedasiñ amtarakchïna.  Ukampis enemigonakap kawsaw uka markat escapjjäna (Hech. 17:1-5, 10). Ukantï quedasiskakispänjja, enemigonakapajj congregacionaruw jan waltʼayapjjaspäna. Ukampis Pablojj janiw aynachtʼkänti, antisas uka cambiorojj yatinoqtänwa. Qhepatjja uka cristianonakar Diosar confiyasipkakiñapatak chʼamañchtʼañatakiw Timoteor uka markar khitäna (1 Tes. 3:1-3). Kawkjantï yanaptʼajj munaski ukar sarañatak Timoteon jankʼakïtap uñjasajja, Tesalónica markankir cristianonakajj wal kusisipjjpachäna.

15. Jakäwisajj mayjtʼaspa ukhajja, ¿kunanaktï lurañ munkayätan ukampejj kunas pasaspa? Uk mä uñachtʼäwimp qhanañchtʼam.

¹⁵ Pablojj kuna jan walintï Tesalónica markan uñjaskäna ukat walja askinakwa yateqsna. Jakäwisajj mä akatjamatwa mayjtʼaspa, janiw kuntï lurañ amtkayätan uk phoqañ puedjjsnati (Ecl. 9:11). Ukhamïpan ¿kunsa lurañäni? Puedktan ukarjamaw yaqh lurañ amtsna. Ukwa Ted jilatampi Hiedi kullakampejj lurapjjäna. Jupanakat maynin usuntatap laykuw Betelat sarjjapjjäna. Ukampis niyakejjay Jehová Diosar wal munasipjjchïnjja, yaqha toqenakat jupar serviñwa amtapjjäna. Nayraqatajj precursor regularjamaw servipjjäna, ukatsti precursor especialatwa uttʼayapjjarakïna. Ukjjarusti Ted jilatarojj superintendente de circuiton sustitutopjam serviñapatakiw wakichtʼapjjarakïna. Ukampis qhawqha marankamatï superintendente de circuitot servipkaspa ukajj cambiänwa. Ukhamätapatjja Ted jilatampi Hiedi kullakampejj janiw uka asignacionan serviñ puedjjapjjänti. Qalltan mä jukʼa desanimasipkchïnsa, yaqha toqenakatwa Jehová Diosar servipjjaspäna, uk jupanakajj yatipjjänwa. Ted jilatajj akham siwa: “Jehová Diosarojj janiw mä asignacionanak serviskaspati, ukwa yateqawayapjjta” sasa.

16. ¿Kunsa Gálatas 6:4 textot yateqsna?

¹⁶ Kuna cambionakas jakäwisan utjani uk janiw yatksnati. Ak amtañasawa, janiw kuna asignacionanaktï katoqktan ukarjamajj Jehová Diosajj valoranit uñjkistuti. Kuna asignacionanaktï jiwasat sipans mayninakajj katoqapki uk janiw asignacionasamp igualayañasäkiti. Hiedi kullakajj akham siwa: “Jiwasan jakäwistï mayninakan jakäwipamp igualaysna ukhajja, janiw kusisitäjjsnati” sasa (Gálatas 6:4 liytʼäta). Ukatwa kunjam toqenakatsa Jehová Diosar serviskaksna, kunjamsa mayninakar yanaptʼaraksna uk thaqaskakiñasa. b

17. ¿Jukʼamp asignacionanak katoqañatakejj kunsa lursna?

¹⁷ Jiwasatejj kunatï wakiski ukampik jakasiñäni, janirak jan wakiskipan manur mantkañäni ukhajja, jukʼamp privilegionak katoqañatakejj  jankʼakïtaswa uñachtʼayañäni. Kunanak lurañatï jutïrin jukʼamp privilegionak katoqañatak yanaptʼkistaspa uk lurañ jichhajj amtapjjañäni. Jumatï precursor regularjam serviñ munsta ukhajja, ¿janit mä qhawqha tiempojj precursor auxiliarjam sirvkasma? Siervo ministerialjam serviñ munsta ukhajja, ¿janit jukʼamp predickasma, janit congregacionankir jilïr jilat kullakanakarusa usutanakarus visittʼir sarkasma? Kunanak lurañtï jichhajj yateqkäta ukajja, jutïrin jukʼamp privilegionak katoqañatakiw yanaptʼiristam. Ukhamajj kuna asignacionsay katoqawaystajja, uk sum phoqañatak chʼamachasim (Rom. 12:11).

18. ¿Kunsa Beverley kullakan sarnaqäwipat yateqsna? (Foto uñjjattʼarakim).

¹⁸ Jehová Diosar jukʼamp serviñ amtañatakisa, uk phoqañatakis janiw sinti jilïrëjjsnas ukham amuyasiñasäkiti. 75 marani Beverley kullakat parltʼañäni. Jupajj usutätap laykojj janiw sum sarnaqañ puedkänti, ukampis Jesusan jiwatap amtañataki campañanjja, wal yanaptʼañ munäna. Uk phoqañatakejj kunanaksa luraspa ukwa Beverley kullakajj amtäna. Amtanakap phoqasajj wal kusisïna. Ukham chʼamachasitapajja, mayninakarojj jukʼamp predicapjjañapatakiw chʼamañchtʼäna. Jilïr jilat kullakanakajj janis nayrjam lurañ puedjjapjjchejja, kun lurañatakitï chʼamachasipki uk Jehová Diosajj wali valoranitwa uñji (Sal. 71:17, 18).

19. ¿Jehová Diosar jukʼamp serviñatakejj kunanak lurañsa amtsna?

¹⁹ Kunanak lurañtï puedktan ukanak lurañ amtapjjañäni. Jehová Diosar kusisiyki ukham chuymanïñatak chʼamachasipjjañäni. Jehová Diosampiru markapampir yanaptʼañatakejj jukʼamp lurañanak yateqapjjañäni. Kunjamanakatsa jilat kullakanakar yanaptʼsna uk amtapjjañäni. c Ukhamtï lurañänejja, Jehová Diosajj bendisistaniwa, kunjamtï Timoteon ‘nayrar sartatap taqeni uñjapkänjja’, ukhamarakiw jiwasan nayrar sartatas taqeni uñjapjjani (1 Tim. 4:15).