1. ?Ninnge benin wie mun yɛ e kwla sunnzun kɛ é yó be-ɔ?

 E MƆ e ti Klisifuɛ kpa’n, e klo Zoova dan. Yɛ e kunndɛ kɛ é tú e klun é sú i kpa. Kɛ ɔ ko yo naan y’a kwla yo sɔ’n, ɔ fata kɛ e sunnzun kɛ é yó ninnge wie mun i sulɛ’n nun. I wie yɛle kɛ e kwla kunndɛ kɛ é yí nzuɛn kpakpa wie’m be nglo kpa trá laa’n annzɛ é súan ninnge wie’m be yolɛ annzɛ é úka aniaan’m be kpa ekun.

2. ?Ngue ti yɛ ɔ fata kɛ e wɔ e ɲrun Ɲanmiɛn sulɛ nun-ɔn?

² ?Ngue ti yɛ ɔ fata kɛ e wɔ e ɲrun Ɲanmiɛn sulɛ nun-ɔn? I klikli’n yɛle kɛ e kunndɛ kɛ e Si m’ɔ o ɲanmiɛn su lɔ’n i klun jɔ e wun. Kɛ Zoova wun kɛ e fa ninnge nga e si be yo’n e su i kpa’n, ɔ yo i fɛ. I nɲɔn su’n yɛle kɛ sɛ e kɔ e ɲrun Ɲanmiɛn sulɛ nun’n, é kwlá úka aniaan’m be kpa ekun. (1 Tes. 4:9, 10) Kannzɛ bɔbɔ e su Zoova w’a cɛ sɛ’n, sanngɛ ɔ fata kɛ e kwlaa e wɔ e ɲrun Ɲanmiɛn sulɛ’n nun titi. Maan e nian e wafa nga e kwla yo sɔ’n.

3. ?Kɛ nga 1 Timote 4:12-16 fa kan sa’n, ngue yɛ akoto Pɔlu wlali Timote i fanngan kɛ ɔ yo-ɔ?

³ Kɛ akoto Pɔlu klɛ́ Timote i fluwa klikli’n, nn Timote si asɔnun kpɛnngbɛn junman’n i di kpa. Ɔ nin i sɔ’n ngba’n, Pɔlu wlɛli i fanngan kɛ ɔ wɔ i ɲrun Ɲanmiɛn sulɛ nun titi. (An kanngan 1 Timote 4:12-16 nun.) Kɛ e fa e ɲin e sie i ndɛ nga Pɔlu kannin’n su kpa’n, e sie i nzɔliɛ kɛ ɔ seli Timote kɛ ɔ yo ninnge cinnjin nɲɔn. I klikli’n yɛle kɛ ɔ yi nzuɛn kpakpa’m be nglo tra laa’n. Yɛle kɛ ɔ klo Ɲanmiɛn nin sran, ɔ lafi Ɲanmiɛn su kpa yɛ nán ɔ yo sa tɛ. I nɲɔn su’n yɛle kɛ ɔ wɔ i ɲrun fluwa nun kannganlɛ nzra nun nin sran’m be  afɔtuɛ manlɛ ɔ nin sran’m be like klelɛ nun. É wá fá e ɲin é síe i Timote i ajalɛ’n su. I sɔ’n úka e naan y’a sunnzun kɛ é yó ninnge wie mun Ɲanmiɛn sulɛ’n nun. Asa ekun’n, é wá kán ninnge nga e kwla yo be naan y’a di Ɲanmiɛn i junman’n i kpa y’a tra laa’n be ndɛ.

4. ?Kɛ nga Filipufuɛ Mun 2:19-22 fa kan’n sa’n, ngue ti yɛ Zoova fali Timote dili junman kpa-ɔ?

⁴ ?Ngue ti yɛ Zoova fali Timote dili junman kpa-ɔ? Afin ɔ yili nzuɛn kpakpa’m be nglo. (An kanngan Filipufuɛ Mun 2:19-22 nun.) Timote i su ndɛ nga Pɔlu kannin’n kle kɛ Timote ti wun ase kanfuɛ, ɔ tu i klun di junman yɛ be kwla lafi i su. Asa’n, ɔ klo aniaan’m be kpa yɛ ɔ yili i nglo kɛ be ndɛ lo i. I sɔ’n ti’n, Pɔlu kloli i sa kpa yɛ w’a sisimɛn i bo naan w’a mɛn i junman cinnjin wie mun. (1 Kor. 4:17) E kusu sɛ e yi nzuɛn kpakpa’m be nglo’n, Zoova kló e yɛ é kwlá úka aniaan’m be kpa.—Jue. 25:9; 138:6.

5. (1) ?Ngue yɛ e kwla yo naan y’a wun nzuɛn nga e kwla yi i nglo kpa’n i wlɛ-ɔ? (2) ?Kɛ nga e fa wun i foto’n su sa’n, ngue yɛ aniaan bla’n yo naan w’a yo i wiengu’m be ye w’a tra laa’n niɔn?

⁵ Maan e fa e ɲin e sie i nzuɛn trele kun su. Maan e bu ninnge ng’ɔ fata kɛ e kaci e sa be yolɛ’n nun’n be akunndan kpɛkun e srɛ Ɲanmiɛn. Asa’n, maan e fa e ɲin e sie i nzuɛn trele kun su. I wie yɛle kɛ e kwla sunnzun kɛ é yó e wiengu’m be ye trá laa’n. Annzɛ e kwla kunndɛ kɛ é yó naan e nin sran mun e nuan sɛ tra laa’n, yɛ sɛ be yo e sa’n é yáci cɛ́ be ndɛndɛ. I sɔ yolɛ nun’n, e kwla se aniaan kun m’ɔ ti e janvuɛ kpa’n kɛ ɔ uka e.—Nya. 27:6.

6. ?Sɛ e sunnzunnin kɛ é yí nzuɛn kpa kun i nglo’n, ngue yɛ e kwla yo naan y’a yi i nglo sakpa-ɔ?

⁶ Maan e mian e ɲin e yi nzuɛn sɔ’n i nglo. ?Wafa sɛ yɛ e kwla yo sɔ-ɔ? Maan e bo e ɲin ase e suan nzuɛn nga e waan é yí i nglo kpa’n i su like kpa. Wienun-ɔn, e kunndɛ kɛ é yáci e wiengu’m be wun sa’n é cɛ́ be ndɛndɛ trá laa’n. I lɛ nun’n, e kwla kanngan be nga Biblu’n kan be ndɛ mɔ be yacili be wiengu’m be wun sa’n cɛli be’n ɔ nin be nga b’a yoman sɔ’n be su ndɛ’n nun. Kpɛkun maan e bu su akunndan. E kwla fa e ɲin e sie i Zezi i su ndɛ’n su. Ɔ  yacili i wiengu’m be wun sa’n cɛli be klun ufue su. (Lik. 7:47, 48) Asa’n, w’a fɛmɛn i ɲin w’a siemɛn i be fɔnlɛ’n su. Sanngɛ ɔ fɛli i ɲin sieli i be nzuɛn kpa’n su. Sanngɛ Farizifuɛ’m be liɛ’n, ‘b’a buman sran onga’m be wie.’ (Lik. 18:9) Kɛ e ko bu sran sɔ’m be su akunndan’n, maan e usa e wun kɛ: ‘?Wafa sɛ yɛ n bu min wiengu mun-ɔn? ?Be nzuɛn benin su yɛ n fa min ɲin n sie-ɔ?’ Sɛ sran kun yo e sa naan i yaci cɛlɛ’n ti kekle e sa nun’n, maan e klɛ sran sɔ’n i nzuɛn kpakpa mun e sie. Kpɛkun maan e usa e wun kɛ: ‘?Wafa sɛ yɛ Zezi bu sran sɔ’n niɔn? ?Sɛ ɔ ti Zezi’n, ɔ́ yáci cɛ́ i?’ Sɛ e yo i kwlaa sɔ’n, é káci e akunndan bulɛ wafa’n. I bo bolɛ nun’n, ɔ su yoman pɔpɔ. Sanngɛ sɛ e mian e ɲin’n, kɛ ɔ́ kɔ́ i ɲrun’n é yáci sa cɛ́ ndɛndɛ trá laa’n.

7. ?Ngue yɛ ɔ kle kɛ Zoova fa aniaan nga be si ninnge wie’m be yo’n di junman andɛ-ɔ? (Nyanndra Mun 22:29)

⁷ Like uflɛ mɔ e kwla sunnzun kɛ é yó’n yɛle kɛ e kwla suan ninnge wie’m be yolɛ. Maan e bu aniaan nga be kplan Betɛli mun nin Ɲanmiɛn Sielɛ Sua mun nin Aɲia dandan yowlɛ’m be akunndan kan e nian. Aniaan sɔ’m be nun sunman be nin aniaan nga be si junman sɔ’n i di kpa’n, be dili junman likawlɛ. I sɔ’n ti’n, be kusu be wa sili junman sɔ’n i di wie. Yɛ kɛ nga e fa wun i foto’n su sa’n, i yasua-o, i bla-o, be suan Ɲanmiɛn Sielɛ Sua mun nin Aɲia dandan yowlɛ’m be lika nianlɛ. I kwlaa sɔ’n kle weiin kɛ Zoova m’ɔ ti “Famiɛn m’ɔ o lɛ titi’n” ɔ nin Klisi Zezi m’ɔ ti “famiɛn’m be Famiɛn’n” be fa aniaan nga be si ninnge wie’m be yo’n be di junman dan. (1 Tim. 1:17; 6:15; an kanngan Nyanndra Mun 22:29 nun.) Kɛ e fa like nga e si i yo’n e di junman’n, nán kɛ e kunndɛ kɛ sran’m be manman e ti-ɔ. Sanngɛ e kunndɛ kɛ é mánmán Zoova.—Zan 8:54.

8. ?Ngue yɛ e kwla yo naan y’a wun like nga e kwla suɛn i yolɛ’n i wlɛ-ɔ?

⁸ Maan e fa e ɲin e sie i like trele kun su. ?Ngue yɛ e kwla sunnzun kɛ é súɛn i yolɛ-ɔ? I lɛ nun’n, e kwla usa asɔnun kpɛnngbɛn mun annzɛ akpasua sunianfuɛ’n. Sɛ be se e kɛ e mian e ɲin naan e si nzra nun ijɔ annzɛ e si like kle’n, maan e usa be like trele nga e kwla yo naan y’a yo sɔ’n. Kpɛkun e mian e ɲin e nanti afɔtuɛ nga be man e’n su. ?Wafa sɛ yɛ e kwla yo sɔ-ɔ?

9. ?Sɛ e sunnzunnin kɛ é súan like wie yolɛ’n, ngue yɛ e kwla yo naan y’a si i yo-ɔ?

⁹ Maan e mian e ɲin e yia like sɔ’n i nuan. Wienun-ɔn, e kunndɛ kɛ é sí like kle kpa. I lɛ nun’n, e kwla suan fluwa pɛplɛpɛ Mian ɔ ɲin naan si kanngan yɛ si like kle i nun like. Asa’n, sɛ be man e junman lemɔcuɛ afiɛn aɲia’n i bo’n, e kwla se aniaan bian kun m’ɔ si like kle kpa’n kɛ ɔ uka e. Maan e di e junman’n i ɲrun, yɛ e fa afɔtuɛ ng’ɔ́ mán e’n su. Kɛ be man e junman’n, maan e siesie e wun kpa ka naan y’a di. I liɛ’n, aniaan’m bé wún kɛ e tu e klun e di junman. Ɔ maan bé láfi e su.—Nya. 21:5; 2 Kor. 8:22.

10. Amun kan sran kun m’ɔ miɛnnin i ɲin naan w’a si like wie yo’n i ndɛ.

¹⁰ ?Yɛ sɛ like nga e sunnzunnin kɛ é yó’n i yolɛ’n ti kekle kpa man e nin? Nán maan e sa sin bubu e. Be flɛ aniaan bian kun kɛ Gari. Kannganlɛ’n ti kekle kpa mɛn i. I sɔ’n ti’n, kɛ ɔ kanngan fluwa nun aɲia’m be bo’n ɲannzuɛn kun i. Sanngɛ ɔ miɛnnin i ɲin suannin kannganlɛ’n titi. Ɔ seli kɛ i sɔ mɔ yoli’n ti’n, siɛn’n ɔ kwla ijɔ nzra nun asɔnun aɲia mun nin akpasua kun aɲia mun ɔ nin nvle kun aɲia’m be bo.

11. ?Kɛ Timote sa’n, ngue yɛ ɔ kwla uka e naan y’a di Zoova i junman’n i kpa y’a tra laa’n niɔn?

 ¹¹ ?Kɛ Timote fali Pɔlu i afɔtuɛ’n su’n, ɔ sili nzra nun ijɔ yɛ ɔ sili like kle kpa? Biblu’n tɛman kosan sɔ’n su trele. Sanngɛ like nga e si i’n yɛle kɛ, kɛ ɔ fali Pɔlu i afɔtuɛ’n su’n, ɔ dili i junman’n i kpa trali laa’n. (2 Tim. 3:10) E kusu, sɛ e mian e ɲin naan e si ninnge wie’m be yo’n, é kwlá dí Zoova i junman’n i kpa trá laa’n.

12. ?Wafa sɛ yɛ aniaan’m be ukali wɔ-ɔ?

¹² Kɛ aniaan’m be uka e’n, ɔ yo e fɛ kpa. I wie yɛle kɛ, kɛ be la e dɔɔtrɔ mɔ aniaan nga be nian tukpacifuɛ’m be osu’n annzɛ asɔnun kpɛnngbɛn nga be o Komite ng’ɔ nin Dɔɔtrɔfuɛ’m be di junman’n nun’n be ko nian e osu’n, ɔ yo e fɛ. Asa’n, kɛ sa kekle o e su mɔ asɔnun kpɛnngbɛn kun sie i su e nuan bo yɛ ɔ fɔnvɔ e’n, e wla gua ase. Asa kusu’n, sɛ sran kun i Biblu’n nun like klelɛ’n ti kekle man e naan atin bofuɛ kun m’ɔ si sran’m be like kle kpa ko sunman e’n, e wun kpaja e. Kɛ aniaan sɔ’m be uka e’n, be di aklunjɔɛ. Sɛ e kusu e uka e niaan mun’n, é dí aklunjɔɛ wie. Zezi seli kɛ: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.” (Yol. 20:35) ?Sɛ e kunndɛ kɛ é úka aniaan’m be kpa’n, ngue yɛ e kwla yo-ɔ?

13. ?Sɛ e waan é yó like kun’n, ngue yɛ ɔ fata kɛ e yo-ɔ?

¹³ Sɛ e sunnzun kɛ é yó like kun’n, ɔ fata kɛ e wun like trele nga e waan é yó’n i wlɛ. I wie yɛle kɛ aniaan kun kwla se kɛ: ‘N kunndɛ kɛ ń úka aniaan’m be kpa.’ Sanngɛ sɛ ɔ siman like trele ng’ɔ fata kɛ ɔ yo’n, i sɔ yolɛ’n yó kekle mɛ́n i. I kpa bɔbɔ’n sɛ ɔ yo like sɔ’n, ɔ su wunmɛn i wlɛ kɛ w’a yo. I sɔ’n ti’n, maan e wun like trele nga e waan é yó’n i wlɛ. I kpa bɔbɔ’n, maan e klɛ like sɔ’n nin ninnge nga é yó be naan y’a yia like sɔ’n i nuan’n be su ndɛ e sie.

14. ?Sɛ e sunnzunnin kɛ é yó like kun’n, ngue ti yɛ ɔ ju wie’n ɔ fata kɛ e kaci e sa-ɔ?

¹⁴ Sɛ e sunnzunnin kɛ é yó like kun’n, nán e wla fi su kɛ ɔ ju wie’n ɔ fata kɛ e kaci e sa. ?Ngue ti-ɔ? Afin sa nga y’a sunnzunman’n be kwla tɔ e su. Akoto Pɔlu i su ndɛ’n kle sɔ weiin. Blɛ wie nun’n, ɔ takali asɔnun bo kun Tesaloniki lɔ. Ɔ kunndɛli kpa kɛ ɔ́ ká klɔ sɔ’n su naan ɔ́ úka Klisifuɛ  uflɛuflɛ sɔ mun. Sanngɛ i kpɔfuɛ’m be ti’n, ɔ tuli klɔ’n su. (Yol. 17:1-5, 10) Sɛ ɔ ti kɛ Pɔlu seli kɛ saan fii ɔ́ ká klɔ’n su’n, nn atrɛkpa’n i ti’n sa ɲɛnnin i niaan mun. Pɔlu i sa sin w’a bubumɛn i. Ɔ fali ajalɛ uflɛ naan w’a kwla ukɛ i niaan mun. Yɛle kɛ ɔ sunmannin Timote Tesaloniki lɔ naan ɔ ko wla aniaan’m be fanngan. (1 Tes. 3:1-3) Kɛ Timote ko ukali be kusu’n, ɔ yoli be fɛ kpa.

15. ?Sɛ e sunnzunnin kɛ é yó like kun naan sa kun mɔ y’a sunnzunman’n tɔ e su’n, ngue yɛ ɔ fata kɛ e yo-ɔ? An fa sa kun be yiyi nun.

¹⁵ Sa ng’ɔ juli Pɔlu su Tesaloniki lɔ’n man e afɔtuɛ kun. Yɛle kɛ e kwla kunndɛ kɛ é dí Ɲanmiɛn i junman wie. Sanngɛ sa kun mɔ y’a sunnzunman’n kwla tɔ e su. Ɔ maan e kwlá diman junman sɔ’n kun. (Aku. 9:11) Sɛ i sɔ sa liɛ’n ju’n, maan e fa e ɲin e sie i like uflɛ mɔ e kwla yo’n, i su. I sɔ yɛ aniaan bian kun m’ɔ suan Tɛdi nin i yi Yedi be yoli-ɔ. Tukpacɛ’n ti’n, be yacili Betɛli lɔ junman dilɛ. Sanngɛ kɛ mɔ be klo Zoova dan’n ti’n, be fali be ɲin be sieli i Ɲanmiɛn junman uflɛ su. I klikli nun’n, be kacili titi atin bofuɛ. I sin’n, be seli be kɛ be ko di ngunmin atin bolɛ junman’n. Kpɛkun be kleli Tɛdi i like naan ɔ kaci akpasua sunianfuɛ’n i janunfuɛ. Sanngɛ i sin’n, be kacili afuɛ ng’ɔ fata kɛ aniaan kun ɲɛn i naan w’a di akpasua sunianlɛ junman’n. Kɛ mɔ Tɛdi i afuɛ’n w’a tra su’n ti’n, w’a kwlá kaciman akpasua sunianfuɛ kun. Kannzɛ i sɔ’n bubuli be sa sin kan’n, sanngɛ be fali be ɲin be sieli i Zoova i junman uflɛ su. Aniaan bian Tɛdi seli kɛ: “E wunnin i wlɛ kɛ ɔ fataman kɛ e fa e ɲin e sie i Ɲanmiɛn i junman kunngba su.”

16. ?Afɔtuɛ benin yɛ Galasifuɛ Mun 6:4 man e-ɔ?

¹⁶ Sa nga y’a sunnzunman’n be kwla tɔ e su. I sɔ’n ti’n, nán e bu i kɛ junman nga e di i anuannzɛ’n nun’n ti yɛ e le ɲrun-ɔn. Kpɛkun nán e fa e junman nga e di’n e sunnzun e wiengu’m be liɛ’n. Aniaan bla Yedi seli kɛ: “Sɛ e fa e wun e sunnzun e wiengu mun’n, e su diman aklunjɔɛ kun.” (An kanngan Galasifuɛ Mun 6:4 nun.) Ɔ maan ɔ ti cinnjin kpa kɛ e fa e ɲin e sie i Zoova i junman nga e kwla di be’n be su. *

17. ?Ngue yɛ e kwla yo naan y’a kwla di Zoova i junman uflɛ wie mun-ɔn?

¹⁷ Kɛ ɔ ko yo naan y’a kwla di Zoova i junman wie mun’n, nán maan e kunndɛ ninnge kaka, yɛ nán e fa kalɛ ngbɛnngbɛn. Asa’n, sɛ e sunnzun kɛ é yó like kun’n, maan e yo ninnge kanngan wie mun naan y’a kwla yia like sɔ’n i nuan. I wie yɛle kɛ sɛ e kunndɛ é káci titi atin bofuɛ’n,  e kwla di cɛn kunngun atin bolɛ junman’n anglo kwlaa nun. Asa’n, sɛ aniaan bian kun kunndɛ kɛ ɔ́ káci asɔnunfuɛ’m be ukafuɛ’n, maan ɔ bo jasin fɛ’n dɔ kaka yɛ ɔ ko nian asɔnun’n nun aniaan nga be kpinndinman’n ɔ nin aniaan oke’m be osu. Ninnge nga e si be yo dɔ nga su’n bé úka e naan y’a kwla di junman nga bé fá mán e e ɲrun lɔ’n i kpa. I sɔ’n ti’n, maan e tu e klun e di junman kwlaa nga be fa man e’n, i kpa.—Rɔm. 12:11.

18. ?Ngue yɛ aniaan bla Bevɛɛli i su ndɛ’n kle e-ɔ? (An nian foto’n wie.)

¹⁸ Kannzɛ bɔbɔ y’a yo oke’n, sanngɛ e kwla sunnzun kɛ é yó ninnge wie mun Ɲanmiɛn i sulɛ’n nun. Aniaan bla kun mɔ be flɛ i kɛ Bevɛɛli’n i su ndɛ’n kle sɔ weiin. Ɔ le afuɛ 75, yɛ tukpacɛ kekle kun kle i yalɛ. I sɔ’n ti’n, nantilɛ’n ti kekle i sa nun. Sanngɛ ɔ kunndɛli kɛ ɔ́ yía sran kaka e Wla Kpɛnlɛ aɲia’n i bo. Ɔ maan ɔ fali ajalɛ trele wie mun. I sɔ m’ɔ yoli’n ti’n, ɔ kwla yiali sran kaka e Wla Kpɛnlɛ aɲia’n i bo. Yɛ i sɔ’n yoli i fɛ kpa. I ajalɛ kpa’n ɲannin ta aniaan wie’m be su. Ɔ maan be wa wlali be wun ase be boli jasin fɛ’n i kpa. Kannzɛ sa wie’m be ti’n, e niaan oke’m be kwlá suman Zoova kɛ nga be fa klo’n sa’n, sanngɛ Zoova bu junman nga be di’n i like dan.—Jue. 71:17, 18.

19. ?Ninnge benin wie mun yɛ e kwla sunnzun kɛ é yó be-ɔ?

¹⁹ Like nga e wunmiɛn ju nun’n yɛ ɔ fata kɛ e sunnzun kɛ é yó-ɔ. Maan e yi nzuɛn kpakpa’m be nglo naan Zoova i klun jɔ e wun. Maan e suan ninnge wie’m be yolɛ naan Zoova nin i anuannzɛ’n be fa e di junman. Kpɛkun maan e bu wafa nga e kwla uka aniaan’m be kpa’n i akunndan. * Sɛ e yo sɔ’n, Zoova fanngan nun’n, ‘sran’m be kwlaa bé wún kɛ e su kɔ e ɲrun Ɲanmiɛn sulɛ’n nun’ kɛ Timote sa.—1 Tim. 4:15.