1. Ano an mga puwede tang gibuhon na espirituwal na pasuhan?

 BILANG tunay na mga Kristiyano, namumutan tang marhay si Jehova. Gusto niyato na an ginigibo tang paglilingkod saiya iyo an pinakamarahay na maitatao ta. Pero tanganing magibo ta iyan, kaipuhan tang magkaigwa nin espirituwal na mga pasuhan, arog kan pagpauswag nin Kristiyanong mga kuwalidad, pakanuod nin kapaki-pakinabang na mga kasanayan, asin paghanap nin mga paagi para makapaglingkod sa iba. b

2. Taano ta dapat kitang magkaigwa nin espirituwal na mga pasuhan asin magmaigot na abuton iyan?

² Taano ta gusto tang umuswag sa espirituwal? Panginot na dahil gusto tang mapaugma an satong mamumuton na Ama sa langit. Maugma si Jehova pag nahihiling niyang ginagamit ta nin lubos an satong mga talento asin abilidad sa paglilingkod sa saiya. Apuwera kaiyan, gusto tang umuswag sa espirituwal tanganing mas makatabang kita sa satong mga tugang. (1 Tes. 4:9, 10) Gurano man kita kahaloy nang nasa katotoohan, gabos kita puwedeng umuswag sa espirituwal. Hilingon niyato kun paano ta iyan magigibo.

3. Arog kan mababasa sa 1 Timoteo 4:12-16, dinagka ni apostol Pablo si Timoteo na gibuhon an ano?

³ Kan gibuhon ni apostol Pablo an inot na surat niya ki Timoteo, an mahusay na hoben na iyan saro nang eksperyensiyadong magurang sa kongregasyon. Dawa arog kaiyan, dinagka siya ni Pablo na padagos na umuswag sa espirituwal. (Basahon an 1 Timoteo 4:12-16.) Mantang iniisip-isip mo an sinabi ni Pablo, maririsa  mo na gusto niyang pauswagon ni Timoteo (1) an Kristiyanong mga kuwalidad arog kan pagkamuot, pagtubod, asin kabinian saka (2) an mga kakayahan arog kan pagbasa sa publiko, pagtao nin sadol, asin pagtukdo. Mantang iniisip an halimbawa ni Timoteo, aramon ta kun paano an pagkaigwa nin rasonableng mga pasuhan makakatabang sato na umuswag sa espirituwal. Pag-uulayan ta man an nagkapirang paagi na mapapahiwas ta an satong ministeryo.

4. Sigun sa Filipos 2:19-22, ano an dahilan kaya kapaki-pakinabang na lingkod ni Jehova si Timoteo?

⁴ Ano an dahilan kaya kapaki-pakinabang na lingkod ni Jehova si Timoteo? An marahayon niyang Kristiyanong mga kuwalidad. (Basahon an Filipos 2:19-22.) Mahihiling ta sa mga sinabi ni Pablo manungod ki Timoteo na mapakumbaba ini, maimbod, mahigos, saka maaasahan. Mamumuton siya, saka nagmalasakit siyang marhay sa mga tugang. Kaya, namutan ni Pablo si Timoteo asin dai siya nagduwa-duwa na ipagkatiwala digdi an dipisil na mga asignasyon. (1 Cor. 4:17) Arog ni Timoteo, mas mamumutan man kita ni Jehova asin mas makakatabang sa kongregasyon pag pinapauswag ta an mga kuwalidad na gustong-gusto ni Jehova.—Sal. 25:9; 138:6.

5. (a) Ano an puwede mong gibuhon kun gusto mong magin pasuhan na pauswagon an sarong Kristiyanong kuwalidad? (b) Arog kan mahihiling sa ritrato, paano hinihinguwa kan mas hoben na sister na maabot an pasuhan niyang mas makapahiling nin empatiya sa iba?

⁵ Pumili nin espesipikong pasuhan. May pagpamibing pag-isipan kun arin na mga aspekto kan saimong personalidad an kaipuhan mong pauswagon. Pumili nin sarong espesipikong kuwalidad na gusto mong tawan nin atensiyon. Halimbawa, gusto mo daw mas makapahiling nin empatiya o magkaigwa nin mas makusog na pagmawot na tabangan an mga kapwa parasamba mo? Kaipuhan mo daw na magin mas mapagpatuninong saka mapagpatawad? Tibaad makatabang saimo na maghagad nin mga suhestiyon sa pinagtitiwalaan mong amigo kun paano ka mauswag.—Tal. 27:6.

6. Paano mo maaabot an saimong pasuhan na pauswagon an sarong kuwalidad?

⁶ Hinguwahon na abuton an saimong pasuhan. Paano mo iyan magigibo? An sarong paagi iyo an maingat na pagsiyasat manungod sa kuwalidad na gusto mong pauswagon. Halimbawa, gusto mo ngayang magin mas mapagpatawad sa iba. Puwede mong punan na basahon asin hurop-hurupon an mga halimbawa sa Bibliya kan mga lubos na nagpatawad saka kan mga dai. Pag-isipan an halimbawa ni Jesus. Gikan sa buot  siyang nagpatawad. (Luc. 7:47, 48) Nagpokus siya bako sa mga sala kan mga tawo kundi sa potensiyal ninda. Kabaliktaran kaiyan an mga Fariseo kan panahon niya na “[ibinilang] an iba na daing halaga.” (Luc. 18:9) Pagkatapos hurop-hurupon an mga halimbawang ini, haputon an sadiri: ‘Ano an hinihiling ko sa iba? Arin sa mga kuwalidad ninda an pigpopokusan ko?’ Kun nasasakitan kang patawadon an saro, purbaran na isurat an gabos na marahay na kuwalidad na maiisip mo saiya. Dangan haputon an sadiri: ‘Ano daw an paghiling ni Jesus saiya? Papatawadon niya daw siya?’ Kun gigibuhon ta iyan, makakatabang iyan na mabago an kaisipan ta. Sa primero, tibaad madipisilan kita na patawadon an nakakulog sato. Pero kun padagos kitang mahinguwa, magigin mas pasil na sa sato an magpatawad sa paglihis nin panahon.

7. Kauyon kan Talinhaga 22:29, sa anong mga paagi ginagamit ni Jehova an may kakayahan na mga boluntaryo ngunyan?

⁷ Puwede mo man magin pasuhan an makanuod nin kapaki-pakinabang na kasanayan. Pag-isipan an dakulon na boluntaryo na kaipuhan sa pagtugdok nin mga pasilidad kan Bethel, Assembly Hall, saka mga Kingdom Hall. Dakul sa boluntaryong iyan an nakanuod nin mga kasanayan paagi sa pagtrabaho kaiba nin eksperyensiyadong mga tugang. Arog kan mahihiling sa ritrato, an mga brother saka mga sister nag-aadal nin mga kasanayan na kaipuhan sa pagmentenar nin mga Assembly Hall saka Kingdom Hall. Sa arog kaining paagi asin iba pa, an Diyos na Jehova, an “Hading daing sagkod,” saka si Cristo Jesus, “an Hadi kan mga . . . hadi,” nagsasagibo nin makangangalas na mga bagay paagi sa may kakayahan na mga boluntaryo. (1 Tim. 1:17; 6:15; basahon an Talinhaga 22:29.) Gusto tang maigot na magtrabaho asin gamiton an satong mga kasanayan para pamurawayon si Jehova, bako an satong sadiri.—Juan 8:54.

8. Ano an puwede mong gibuhon kun gusto mong magin pasuhan na makanuod nin sarong kasanayan?

⁸ Pumili nin espesipikong pasuhan. Anong kasanayan an puwede mong adalan? Haputon an mga elder sa saindong kongregasyon asin tibaad an saindong paraataman nin sirkito kun anong kasanayan an sa hiling ninda puwede mong adalan. Halimbawa, kun sabihon ninda na pauswagon mo an kakayahan mo sa pagtaram saka pagtukdo, hagadon sainda na tabangan kang maaraman kun anong espesipikong kuwalidad sa pagtaram an kaipuhan mong pauswagon. Dangan gumibo nin praktikal na mga lakdang para umuswag. Paano mo iyan gigibuhon?

9. Paano mo maaabot an saimong pasuhan na makanuod nin sarong kasanayan?

⁹ Hinguwahon na abuton an saimong pasuhan. Halimbawa, gusto mo ngayang pauswagon an kakayahan mo sa pagtukdo. Puwede mong pag-adalan na marhay an brosyur na Magin Mahusay sa Pagbasa Asin Pagtutukdo. Pag tinawan ka nin kabtang sa pagtiripon sa tahaw kan semana, puwede mong pakiulayan an sarong kuwalipikadong brother na dangugon nguna an saimong presentasyon asin hagadan siya nin mga suhestiyon. Hinguwahon na mas mamidbid ka kan mga tawo bako sana bilang mahusay sa saimong mga kabtang kundi bilang saro na maigot asin maaasahan.—Tal. 21:5; 2 Cor. 8:22.

10. Magtao nin halimbawa kun paano ta mapapauswag an sarong kasanayan.

¹⁰ Paano kun bako ka man talagang mahusay sa kasanayan na gusto mong mapauswag? Dai sumuko! An brother na si Garry nadidipisilan talaga sa pagbasa. Nagigirumduman niya kaidto na supog-supog siya pag nagbabasa siya nin makusog sa mga pagtiripon kan kongregasyon. Pero padagos siyang nagmaigot na umuswag. Sinabi niya na dahil sa mga pagsasanay na inako niya, kaya niya nang magpahayag sa Kingdom  Hall, pansirkitong mga asembleya, saka mga kumbensiyon!

11. Arog ni Timoteo, ano an makakatabang sato para mag-ako nin dagdag na mga responsabilidad?

¹¹ Si Timoteo daw nagin mahusayon na ispiker o matibayon na paratukdo? Mayong sinasabi an Bibliya. Pero siguradong padagos na nagin epektibo si Timoteo sa pagsagibo kan mga responsabilidad niya mantang sinusunod niya an sadol ni Pablo. (2 Tim. 3:10) Kaagid kaiyan, kun papauswagon ta an satong mga kasanayan, magigin mas andam kitang mag-ako nin dagdag na mga responsabilidad.

12. Paano ka nakinabang sa paglilingkod kan iba?

¹² Gabos kita nakikinabang sa paglilingkod kan iba. Pag naospital kita, nagpapasalamat kita sa pagbisita kan mga elder na naglilingkod sa mga Hospital Liaison Committee o sa Patient Visitation Group. Pag may problema kita, ipinagpapasalamat ta pag tinatawan kita nin panahon nin sarong mapagmakulog na elder para dangugon kita saka rangahon. Pag kaipuhan ta nin tabang sa pag-Bible study, nauugma kita pag iniibanan kita nin sarong eksperyensiyadong payunir sa pagkondukta asin sa mga itinatao niyang suhestiyon. An gabos na tugang na ini maugma na tabangan kita. Puwede ta man mamatian an kaugmahan na iyan kun hinihinguwa tang magin andam na maglingkod sa satong mga tugang. “Igwang urog na kaugmahan sa pagtao kisa sa pag-ako,” an sabi ni Jesus. (Gibo 20:35) Kun gusto mong pahiwason an saimong paglilingkod sa kaagid kaiyan na mga paagi, ano an makakatabang saimo na maabot an saimong mga pasuhan?

13. Pag nagpipili nin magigin pasuhan, ano an dapat tang tandaan?

¹³ Dai magpili nin pasuhan na bakong espesipiko. Halimbawa, tibaad isipon mo, ‘Gusto kong mas makakontribwir sa kongregasyon.’ Pero tibaad madipisilan ka sa pag-isip kun paano mo iyan maaabot, saka tibaad imposibleng maaraman mo kun baga naabot mo na iyan. Kaya pumili nin malinaw saka espesipikong pasuhan. Puwede mo nganing isurat an pasuhan na iyan saka kun paano mo planong abuton iyan.

14. Taano ta kaipuhan tang magin andam na mag-adjust pag nagpipili nin magigin pasuhan?

¹⁴ Kaipuhan man na andam kitang mag-adjust pag nagpipili nin magigin pasuhan. Taano? Dahil dai ta lubos na kontrolado an satong kamugtakan. Halimbawa: Nagtabang si apostol Pablo na makabilog nin bagong kongregasyon sa siyudad  nin Tesalonica. Asin siguradong nagin pasuhan niya na magdanay diyan asin tabangan an bagong mga Kristiyano. Alagad dahil sa mga parakontra, napiritan na maghali sa siyudad si Pablo. (Gibo 17:1-5, 10) Kun nagdanay duman si Pablo, maisasapeligro niya kuta an saiyang mga tugang. Pero dai suminuko si Pablo. Imbes, nag-adjust siya sa nagbagong kamugtakan. Pag-abot nin panahon, isinugo niya si Timoteo para asikasuhon an espirituwal na mga pangangaipo kan bagong mga Kristiyano sa Tesalonica. (1 Tes. 3:1-3) Siguradong ugmahon nanggad an mga taga Tesalonica na andam si Timoteo na maglingkod sain man siya kaipuhan!

15. Paano puwedeng makaapekto sa satong mga pasuhan an mga kamugtakan na dai ta kontrolado? Magtao nin halimbawa.

¹⁵ May manunudan kita sa eksperyensiya ni Pablo sa Tesalonica. Tibaad may inaabot kitang sarong pribilehiyo nin paglilingkod, pero dai ta iyan naaabot dahil sa mga kamugtakan na dai ta kontrolado. (Ecl. 9:11) Kun totoo iyan saimo, magin andam na pumili nin ibang pasuhan na kaya mong abuton. Iyan an ginibo kan mag-agom na Ted saka Hiedi. Huli sa problema sa salud, kinaipuhan nindang magluwas sa Bethel. Pero pinahiro sinda kan pagkamuot ninda ki Jehova na maghanap nin ibang mga paagi para mapahiwas an saindang ministeryo. Inot, nagregular payunir sinda. Pag-abot nin panahon, inasignaran sindang magin espesyal payunir, tapos sinanay si Ted na magin kasalihid na paraataman nin sirkito. Dangan nagbago an kahagadan na edad para sa mga paraataman nin sirkito. Narealisar ni Ted saka Hiedi na dai na sinda kuwalipikado para sa pribilehiyong iyan. Dawa ngani namundo sinda, aram ninda na makakapaglingkod pa man giraray sinda ki Jehova sa ibang mga paagi. Sinabi ni Ted, “Nanudan mi na dai mi dapat limitaran an samong sadiri sa saro sanang klase nin paglilingkod.”

16. Ano an manunudan ta sa Galacia 6:4?

¹⁶ Dai ta makokontrol an gabos na bagay na nangyayari sa satong buhay. Kaya, mahalaga na dai ta ibase an satong halaga sa mga pribilehiyo nin paglilingkod na igwa kita o ikumparar an satong mga pribilehiyo sa pribilehiyo kan iba. Sinabi ni Hiedi, “Mawawaran ka nin katuninungan kun ikukumparar mo an buhay mo sa nahihiling mong mga nangyayari sa buhay kan iba.” (Basahon an Galacia 6:4.) Mahalaga na maghanap kita nin mga paagi na makatabang sa iba asin makapaglingkod ki Jehova. c

17. Ano an mga puwede mong gibuhon para makuwalipikar sa mga pribilehiyo nin paglilingkod?

¹⁷ Magin andam para sa mga pribilehiyo nin paglilingkod paagi sa pagpadanay na simple kan saimong buhay asin paglikay sa dai kinakaipuhan na mga utang. Magkaigwa nin saradit na pasuhan  na makakatabang saimo na maabot an darakulang pasuhan. Halimbawa, kun pasuhan mong magin regular payunir pag-abot nin panahon, ano daw kun maglingkod ka nguna ngunyan bilang dagos-dagos na auxiliary payunir? Kun pasuhan mong magin ministeryal na lingkod, puwede ka daw magtao nin mas dakul na panahon sa ministeryo asin sa pagdalaw sa mga may hilang saka sa mga may edad na sa kongregasyon? An nakukua mo ngunyan na mga eksperyensiya puwedeng magbukas nin pinto para sa dagdag na mga pribilehiyo nin paglilingkod sa maabot. Magin determinadong gibuhon an pinakamakakaya mo sa ano man na asignasyon na itao saimo.—Roma 12:11.

18. Arog kan mahihiling sa ritrato, ano an nanudan mo sa halimbawa ni Beverley?

¹⁸ Dawa may edad na kita, dai buot sabihon na dai na kita puwedeng magkaigwa asin mag-abot nin espirituwal na mga pasuhan. Isipon an halimbawa kan 75 anyos na sister na si Beverley. Igwa siya nin malalang hilang kaya dipisil saiya na maglakaw. Pero gusto niyang lubos na makikabtang sa kampanya sa Memoryal. Kaya nagpili siya nin espesipikong mga pasuhan. Kan naabot ni Beverley an saiyang mga pasuhan para sa kampanya, ugmahon siyang marhay. An saiyang mga paghihinguwa nakapahiro sa iba na magmaigot sa ministeryo. Pinapahalagahan ni Jehova an paglilingkod kan satong may edad nang mga brother asin sister, dawa kun limitado na an kaya nindang gibuhon dahil sa saindang kamugtakan.—Sal. 71:17, 18.

19. Anong espirituwal na mga pasuhan an puwede tang pilion?

¹⁹ Magpili nin mga pasuhan na kaya mong abuton. Patalubuon an mga kuwalidad na makakapaugma ki Jehova. Makanuod nin mga kasanayan na makakatabang saimo na magin mas kapaki-pakinabang sa satong Diyos asin sa saiyang organisasyon. Maghanap nin mga paagi na mas lubos na makapaglingkod sa saimong mga tugang. d Arog ni Timoteo, sa tabang ni Jehova “an saimong pag-uswag malinaw na [mahihiling] kan gabos na tawo.”—1 Tim. 4:15.