1. Finshi twingapanga ukucita mu mulimo wa kwa Lesa?

 FWE BENA Kristu ba cine twalitemwa sana Yehova. Tulafwaisha ukulabombesha mu mulimo wa kwa Yehova. Nomba pa kuti tubombe apapelele amaka yesu mu mulimo wa kwa Yehova, tulingile ukupanga ifya kucita pamo nga, ukuba ne mibele iyo Umwina Kristu alingile ukuba nayo, ukusambililako imilimo imo, e lyo no kwishiba ifyo twingabombela aba bwananyina.

2. Mulandu nshi tulingile ukupangila ifya kucita mu mulimo wa kwa Lesa e lyo no kubombesha pa kuti tufifishepo?

² Mulandu nshi tulingile ukulafwaisha ukubombesha mu mulimo wa kwa Lesa? Mulandu wa kuti tulafwaya ukulenga Shifwe wa ku muulu ukulasekelela. Yehova alasekelela nga amona ukuti tulebomfya imilimo twaishiba pa kumubombela. Na kabili tulabombesha mu mulimo wa kwa Lesa pantu tulafwaya ukulabombela bamunyinefwe na bankashi. (1 Tes. 4:9, 10) Temulandu ne myaka twabombela Yehova Lesa, bonse kuti twatwalilila ukulunduluka. Natumone ifyo twingacita pa kuti tuletwalilila ukulunduluka.

3. Finshi Paulo akoseleshe umutumwa Timote ukucita? (1 Timote 4:12-16)

³ Timote ali mwaice ilyo umutumwa Paulo amulembeele kalata ya kubalilapo, lelo ninshi palipita inshita ukutula apo abelele eluda. Na lyo line Paulo alimukoseleshe ukulalunduluka mu mulimo wa kwa Lesa. (Belengeni 1 Timote 4:12-16.) Ilyo mulebelenga amashiwi Paulo aebele Timote, mwalamona ukuti alandile pa fintu fibili ifyo Timote alingile ukulundulukamo. Ica kubalilapo,  kuba ne mibele iyo Umwina Kristu alingile ukukwata pamo nga ukutemwa, icitetekelo, e lyo no kusanguluka. Ne calenga bubili, kuwamyako ukubelenga pa cintubwingi, ukukonkomesha, e lyo no kusambilisha. Twalalanda pa fyo Timote acitile ifyalalenga twishibe umulandu ukupangila ifya kucita mu mulimo wa kwa Lesa kwingalengela twalunduluka. Kabili twalasambilila ne fyo twingalabombesha mu mulimo wa kubila imbila nsuma.

4. Ukulingana na Abena Filipi 2:19-22, cinshi calengele Timote alebombela sana Yehova?

⁴ Cinshi calengele Timote alebombesha mu mulimo wa kwa Yehova? Pantu alikwete imibele iisuma iyo Umwina Kristu alingile ukukwata. (Belengeni Abena Filipi 2:19-22.) Ukulingana ne fyo umutumwa Paulo alondolwele, Timote ali uwaicefya, uwa cishinka, uwacincila, kabili uwashintililwapo. Alitemenwe sana aba bwananyina kabili alebasakamana. Ne ci calengele Paulo atemwe sana Timote kabili alemupeela ne milimo iyakosa. (1 Kor. 4:17) Na ifwe bene Yehova akatutemwa kabili tukalabombela sana aba mu cilonganino nga tuli ne mibele iyo Lesa atemwa.—Amalu. 25:9; 138:6.

5. (a) Bushe kuti mwaishiba shani imibele iyo mulingile ukuwamyako iyo Umwina Kristu alingile ukukwata? (b) Nga fintu tulemona pa cikope, bushe nkashi alebombela shani pa kuba ne nkumbu ku babwananyina?

⁵ Mulesala imibele iyo mulefwaya ukukwata. Mulepepa kabili muletontonkanya pa mibele iyo mulefwaya ukuwamyako. Mulebombela pa mibele imo na imo iyo mwasanga ukuti mulingile ukuwamyako. Ku ca kumwenako, kuti mwapingulapo ifyo mwingacita pa kuti mube sana ne nkumbu nelyo pa kuti mulefwaisha ukula-afwa aba bwananyina. Ne lyo kuti mwafwaisha ukuba aba mutende no kulaelela abantu. Kuti mwaipusha cibusa wenu pa kuti amwebe umo mulingile ukuwamyako.—Amapi. 27:6.

6. Kuti mwacita shani pa kuti muwamyeko imibele imo iyo Umwina Kristu alingile ukukwata?

⁶ Mulebombesha ukufishapo ifyo mwapanga. Bushe kuti mwacita shani ifyo? Cimo ico mwingacita kulasambilila pa mibele iyo mulefwaya ukuwamyako. Tutile mulefwaya ukubombela pa kulabelela abantu uluse. Kuti mwabalilapo ukusambilila no kutontonkanya pa bantu balembwa mu Baibolo ababelele uluse abantu bambi e lyo na bakeene ukubelela bambi uluse. Tontonkanyeni pali Yesu. Alebelela abantu uluse. (Luka 7:47, 48) Talebika amano ku fyo  balelufyanya lelo alebika amano ku fisuma ifyo balecita. Lelo abaFarise abaliko mu nshiku sha kwa Yesu, bena balemona “bambi . . . kwati tapali ifyo bali.” (Luka 18:9) Nga mwatontonkanya pa bantu twalandapo, yipusheni amuti: ‘Finshi mona mu bantu? Mibele nshi iyo bakwata iyo mbikako sana amano?’ Nga cilamukosela ukubelela abantu uluse, mulelemba imibele iisuma iyo bakwata. Lyena muleipusha no kuti: ‘Bushe Yesu amumona shani uyu muntu? Bushe kuti amwelela?’ Nga muleisambilisha muli iyi nshila, muli no kwalula ifyo mutontonkanya. Pa kubalilapo mulingile ukubombesha pa kuti mulebelela uluse abamulufyenye. Lelo mu kupita kwa nshita, cikalamwangukila ukubelela abantu uluse nga bamulufyanya.

7. Bushe Amapinda 22:29 yalanga shani ukuti Yehova alabomfya abaishibisha ukubomba imilimo muno nshiku?

⁷ Na cimbi ico mwingapanga ukucita mu mulimo wa kwa Lesa, kusambililako imilimo imo. Tontonkanyeni pa bantu ubwingi abalefwaikwa pa kukuula ama Bethel, Ifikuulwa fya Kulonganinamo Ukulongana Kukalamba, e lyo na Mayanda ya Bufumu. Abengi pali aba bamunyinefwe na bankashi basambilila ifya kubomba nga balebomba na ba bwananyina abaishiba iyo milimo. Bamunyinefwe na bankashi balasambilila imilimo iingalenga balawamyako Ifikuulwa fya Kulonganinamo Ukulongana Kukalamba e lyo na Mayanda ya Bufumu, nga fintu tulemona pa cikope. Yehova Lesa “Imfumu ya muyayaya,” e lyo na Kristu Yesu “Imfumu ya shamfumu,” balebomba imilimo iyacindama ukubomfya bamunyinefwe abaishibisha imilimo. (1 Tim. 1:17; 6:15; belengeni Amapinda 22:29.) Tufwile ukubombesha mu milimo twaishiba ukucindika Yehova te kufwaya abantu baletulumbanya.—Yoh. 8:54.

8. Cinshi mwingacita pa kuti mwishibe apo mulingile ukubombela?

⁸ Saleni ifyo mulefwaya ukubombelapo. Finshi mwingatemwa ukubombelapo? Kuti mwaipushako baeluda mwaba nabo mu cilonganino nelyo kangalila wa muputule pa kuti bamwebe apo mufwile ukubombela. Ku ca kumwenako, nga bamweba ukuti mulekabila ukuwamyako ifyo mulanda ne fyo musambilisha, bepusheni bamwebe mu kulungatika apo mulekabila ukubombela. Lyena mufwile ukubombela pa fyo bamweba. Cinshi mwingacita pa kuti mubombele pa fyo bamweba?

9. Cinshi mwingacita nga mwalipanga ukuwamyako ifyo musambilisha?

⁹ Mulebombesha ukufishapo ifyo mwapanga. Tutile mulefwaya ukwishiba ifya kusambilisha bwino. Kuti mwabelenga broshuwa itila Mulebika Amano ku Kubelenga na ku Kusambilisha. Nga bamupeela ilyashi mu kulongana kwa Mikalile, lyena mwapwisha ukupekanya, kuti mwaebako uwa bwananyina uulanda bwino amalyashi ukuti akutikeko ku fyo mupekenye. Lyena amwebe no mo mulingile ukuwamyako. Mulepekanya amalyashi ilyo kucili nshita pa kuti aba bwananyina balemona ukuti mwalicincila kabili mwalishintililwapo.—Amapi. 21:5; 2 Kor. 8:22.

10. Landeni pa ca kumwenako icilelangilila ifyo mwingacita nga mulefwaya ukusambilila fimo.

¹⁰ Nomba kuti mwacita shani nga ca kuti mulefwaya ukusambilila fimo ifyamukosela ukusambilila? Te kwesha ukunenuka! Ku ca kumwenako, munyinefwe Garry talebelenga bwino. Alebukisha ifyo aleumfwa insoni ilyo ale-esha ukubelenga pa kulongana. Lelo alitwalilile ukubombesha pa kuti eshibe ukubelenga bwino. Alandile ukuti ifyo aba bwananyina bamusambilishe e lyo ne fyo asambilila mu mpapulo fyalilenga pali ino nshita alelanda amalyashi mu Ng’anda ya Bufumu, pa kulongana kwa muputule, e lyo na pa kulongana kwa citungu!

11. Nga filya cali kuli Timote, cinshi mwingacita pa kuti balemupeelelapo imilimo na imbi mu cilonganino ca kwa Lesa?

 ¹¹ Bushe Timote alishileishiba bwino sana ukulanda amalyashi e lyo no kusambilisha? Baibolo tayalandapo nangu cimo. Ukwabula no kutwishika Timote afwile alitwalilile ukulabomba bwino imilimo bamupeele pantu alikonkele ifyo Paulo amupandileko amano. (2 Tim. 3:10) Na ifwe bene nga tulebomba bwino imilimo batupeela mu cilonganino ca kwa Yehova, bakatupeelelapo na imbi.

12. Finshi ifyo aba bwananyina bamucitilapo?

¹² Bonse fye tulomfwa bwino nga kuli abaletwafwa. Nga natulwala tulatasha sana nga ca kuti baeluda abapempula abalwele nelyo ababa muli Komiti ya Kumfwaninamo ne Fipatala baisa mu kutumona. Nga natukwata sana amafya tulatemwa nga ca kuti eluda uwaba ne cikuuku, alekutika ku fyo tulelanda kabili aletukoselesha. Nga tulefwaya ukwishiba ukutungulula bwino isambililo, tulatemwa sana nga twabomba na painiya uwaishiba ukusambilisha bwino kabili atwebako ne fyo twingacita pa kuti na ifwe tulesambilisha bwino. Kanshi aba bonse aba bwananyina balaba ne nsansa nga baletwafwilisha. Na ifwe kuti twaba ne nsansa nga ca kuti tuleitemenwa ukubombela aba bwananyina. Yesu atile: “Mwaba insansa ishingi mu kupeela ukucila ishaba mu kupokelela.” (Imil. 20:35) Finshi mwingacita nga ca kuti mulefwaya ukubombesha muli ifi twalandapo nelyo muli fimbi?

13. Nga twapanga ukucita fimo, finshi tulingile ukulaibukisha?

¹³ Mwilapanga ukucita ifintu ifyo mushishibe bwino bwino. Ku ca kumwenako, kuti mwatila ‘ndefwaya ukulabombesha mu cilonganino.’ Lelo kuti camwafya ukwishiba ifya kucita pa kuti mufishepo ifyo mupangile kabili te kuti mwishibe ne lyo mukafishapo ifyo mupangile. Kanshi mulepanga ukucita ifintu ifyo mwishibe kabili ifyo mwingafishapo. Kuti mwalemba ifyo mulepanga ukucita e lyo ne fyo mulepanga ukufifishapo.

14. Mulandu nshi tulingile ukuitemenwa ukwaluka ilyo tulepanga ifya kucita?

¹⁴ Tulingile no kuitemenwa ukwaluka ilyo tulepanga ifya kucita. Mulandu nshi? Pantu limo tatukwatapo amaka pa fintu ificitika. Umutumwa Paulo alibombeleko umulimo  wa kupanga icilonganino icipya mu musumba wa Tesalonika. Kabili ukwabula no kutwishika afwile alefwaisha ukutwalilila ukwikala kulya kwine ku Tesalonika, pa kuti alebombela pamo na baishileba Abena Kristu. Nomba abalekaanya balengele Paulo afuma muli ulya musumba. (Imil. 17:1-5, 10) Paulo atwalilila ukwikala muli ulya musumba, nga aliletelele aba bwananyina. Nangu ca kuti Paulo alifumine muli ulya musumba, talekele ukwafwa aba bwananyina. Na lyo line, Paulo alyalwike mu fyo apangile ukucita. Pa numa atumine Timote ku Tesalonika ukuti aleya akoseleshe Abena Kristu abali abapya pa kuti babe ne citetekelo icakosa. (1 Tes. 3:1-3) Abena Tesalonika balitemenwe filya Timote aipeeleshe ukwafwa bonse abalekabila ubwafwilisho.

15. Bushe ifyo twapanga ukucita kuti fya-aluka shani nga ca kuti ifintu fya-aluka? Langilileni.

¹⁵ Kuti twasambililako ku fyacitikile Paulo ilyo ali mu Tesalonika. Nalimo kuti twapanga ifya kucita mu mulimo wa kwa Yehova, lelo ifintu kuti fya-aluka ica kuti twafilwa no kufishapo ifyo twapanga. (Luk. Mil. 9:11) Ifi nga fyacitika, muleitemenwa ukwaluka no kupanga ukucita fimbi ifyo mwingafishapo. Ifi e fyacitile ba Ted na bena mwabo ba Hiedi. Pa mulandu no kulwalilila balilekele ukubombela pa Bethel. Apo balitemenwe Yehova, balitontonkenye pali fimbi ifyo bengacita pa kuti balebombesha mu mulimo wakwe. Ica kubalilapo, balitendeke bupainiya bwa nshita yonse. Ilyo papitile inshita, balibasontele ukuba bapainiya baibela, kabili ba Ted balibasambilishe pa kuti babe ba kafwa ba kwa kangalila wa muputule. Nomba icilonganino ca kwa Lesa calyalwile imyaka iyo umuntu alingile ukubomba nga kangalila wa muputule. Ba Ted na ba Hiedi baishileishiba ukuti te kuti babombe uyu mulimo pantu imyaka bakwete yalicilile pa yalekabilwa pa kuti umuntu abombe uyu mulimo. Nangu ca kuti balyumfwile ububi, balishibe ukuti kwaliba imilimo na imbi iyo bengabombela Yehova. Ba Ted batile: “Twalisambilila ukuti kwaliba imilimo iingi iyo twingabombela Yehova.”

16. Finshi twingasambilila ku mashiwi yaba pa Abena Galatia 6:4?

¹⁶ Tatwakwatapo amaka pa fitucitikila mu bumi. Kanshi tatulingile ukutontonkanya ukuti umulimo twakwata e ulenga Yehova aletumona ukuti twalicindama nelyo ukulalinganya imilimo twakwata ku yo aba bwananyina bambi babomba. Ba Hiedi batile: “Nga ca kuti muleilinganya ku bantu bambi, kuti mwaleka ukuba ne nsansa.” (Belengeni Abena Galatia 6:4.) Calicindama ukulatontonkanya pa fyo twingafwa abantu e lyo no kulabombela Yehova. *

17. Finshi mwingacita nga ca kuti mulefwaya ukufikapo ukubomba imilimo imo mu cilonganino?

 ¹⁷ Kuti mwabombako mu mulimo wa kwa Lesa nga ca kuti tamuleifushisha ifya kucita kabili tamulekwata sana inkongole. Mulepanga ukucitako fimo ifinono ifingamwafwa ukufikilisha ifikalamba ifyo mufwaya ukucita. Ku ca kumwenako, nga ca kuti mulafwaya ukuba bapainiya ba nshita yonse, nalimo pali ino nshita kuti mwabombako bupainiya ba kwafwilisha mu kutwalilila. Nga ca kuti mulafwaisha ukubomba nga ababomfi batumikila, mulebombesha mu mulimo wa kubila imbila nsuma kabili muletandalilako abalwala e lyo na bakoloci ababa mu cilonganino mwaba. Ifyo mulesambilila pali ino nshita fikalenga bakamupeele imilimo na imbi ku ntanshi. E ico mulebombesha mu mulimo onse uo bamupeela.—Rom. 12:11.

18. Nga fintu mulemona pa cikope, finshi mwingasambilila ku fyacitile bankashi Beverley?

¹⁸ Kuti twapanga ifya kucita no kufifishapo na lintu tukulile. Natulandeko pali ba Beverley, bankashi abali ne myaka 75. Balilwele ubulwele ubwalelenga balefilwa ukwenda bwino. Lelo balefwaya ukubombesha ilyo kwali ukwita abantu pa kuti bakesesangwa ku Cibukisho. E ico balipangile fimo ifya kucita. Ilyo bafishishepo ifyo bapangile, bali sana ne nsansa. Ifyo bacitile fyalengele na bambi mu cilonganino balabombesha mu mulimo wa kubila imbila nsuma. Yehova alatasha sana pa mulimo bamunyina na bankashi abakalamba babomba, nangu ca kuti pali ino nshita te kuti babombe nge fyo balebomba kale.—Amalu. 71:17, 18.

19. Finshi twingapanga ukucita mu mulimo wa kwa Lesa?

¹⁹ Mulepanga ukucita ifyo mwingafishapo. Muleba ne mibele iilenga Yehova asekelela. Mulesambilila ukubomba imilimo imo iingalenga mwalabombesha mu cilonganino ca kwa Lesa. Muletontonkanya pa fyo mwingacita pa kubombela sana bamunyinenwe na bankashi ababa mu cilonganino cenu. * Nga filya fine cali kuli Timote, Yehova akamupaala ica kuti ‘bonse bakalamona ukulunduluka kwenu.’—1 Tim. 4:15.