1. ?Wanem ol mak long saed blong spirit we yumi save putum?

 YUMI ol tru Kristin yumi lavem Jehova tumas, mo yumi wantem mekem bes blong yumi long wok blong hem. Be blong mekem olsem, yumi mas putum ol mak long saed blong spirit, olsem kam gud moa long ol Kristin fasin, lanem blong gat gudhan blong mekem samting, mo lukaot rod blong givhan long ol narafala. b

2. ?From wanem yumi mas putum ol mak long saed blong spirit mo wok had blong kasem olgeta?

² ?From wanem yumi mas wantem blong kam gud moa long saed blong spirit? Wan risen hemia blong mekem Papa blong yumi long heven i glad. Jehova i glad taem hem i luk we yumi yusum save mo gudhan blong yumi blong mekem wok blong hem. Mo tu, yumi wantem gohed gud long saed blong spirit blong yumi save givhan moa long ol brata mo sista blong yumi. (1 Tes. 4:9, 10) Nating se yumi stap long trutok longtaem finis, be yet yumi evriwan i save kam gud moa long saed blong spirit. I gud yumi luk olsem wanem yumi save mekem samting ya.

3. Folem 1 Timoti 4:12-16, ?aposol Pol i leftemap tingting blong Timoti blong mekem wanem?

³ Timoti i wan yangfala mo i mekem wok blong elda finis taem aposol Pol i raetem faswan leta i go long hem. Nating se i olsem, Pol i leftemap tingting blong hem blong hem i kam gud moa long saed blong spirit. (Ridim 1 Timoti 4:12-16.) Taem yu ridim ol tok ya blong Pol, bambae yu makem se hem i wantem we Timoti i kam gud moa long tu samting. Faswan, hemia blong wokem ol Kristin fasin, olsem lav, bilif, mo fasin  blong stap klin, mo nambatu hemia blong kam gud long fasin blong ridim Baebol, givim advaes, mo tijim man. Folem eksampol blong Timoti, naoia bambae yumi luk olsem wanem blong putum ol mak we i save halpem yumi blong kam gud moa long saed blong spirit. Mo bambae yumi tokbaot sam rod we oli save halpem yumi blong kam gud moa long wok blong prij.

4. Folem Filipae 2:19-22, ?wanem i mekem se Timoti i save mekem moa long wok blong Jehova?

⁴ ?Wanem i mekem se Timoti i save mekem moa long wok blong Jehova? Hemia ol nambawan Kristin fasin we hem i gat. (Ridim Filipae 2:19-22.) Long fasin blong Pol blong tokbaot Timoti, yumi luksave se Timoti i wan man we i gat tingting daon, i holemstrong, i mekem gud ol wok blong hem, mo narafala i save trastem hem. Mo tu hem i kea mo i lavem tumas ol brata mo sista. From samting ya, Pol i lavem Timoti mo i no fraet blong givim sam bigfala wok blong Timoti i mekem. (1 Kor. 4:17) Long sem fasin, taem yumi wokem ol fasin we Jehova i laekem, bambae Jehova i lavem yumi mo yumi save mekem moa wok long kongregesen.—Sam 25:9; 138:6.

5. (1) ?Olsem wanem blong jusum wan fasin blong yu kam gud moa long hem? (2) Folem pija, ?olsem wanem yangfala sista ya i folem mak we hem i putum blong soem sore?

⁵ Jusum wan fasin we yu wantem kam gud moa long hem. Prea mo tingbaot ol fasin we yu wantem kam gud moa long olgeta. Biaen jusum wan fasin mo wok had blong kam gud moa long hem. Eksampol, yu save lanem blong sore moa long narafala o wantem blong givhan long ol brata sista. O yu save traehad moa blong gat pis wetem ol narafala mo fogivim olgeta. Maet i gud tu we yu askem wan fren we yu trastem hem, blong i tokbaot sam samting we yu save kam gud moa long hem.—Prov. 27:6.

6. ?Olsem wanem blong wokem wan fasin we yu jusum?

⁶ Traehad blong wokem fasin we yu jusum. ?Olsem wanem blong mekem samting ya? Wan rod hemia blong stadi long fasin ya. Sipos yu jusum blong kam gud moa long fasin blong fogivim ol narafala, maet fastaem i gud yu ridim mo tingting dip long ol stori blong Baebol we i tokbaot ol man we oli glad blong fogivim narafala, mo olgeta we oli no glad blong mekem olsem. Tingbaot eksampol blong Jisas. Hem i glad nomo blong fogivim ol narafala. (Luk 7:47, 48) Mo tu, hem i no tingbaot  ol mastik blong olgeta, be i tingbaot moa ol gudfala samting we oli save mekem. Hemia i defren long ol Farisi we “oli lukluk ol narafala man se oli nating nomo.” (Luk 18:9) Afta we yu tingting dip long ol eksampol ya, askem yu wan se: ‘?Mi mi luk wanem long ol narafala? ?Weswan long ol fasin blong olgeta nao mi jusum blong tingbaot moa?’ Sipos yu faenem i had blong fogivim wan man, traem raetemdaon wan lis blong ol gudfala fasin we hem i gat. Biaen askem se: ‘?Wanem tingting blong Jisas long man ya? ?Bambae hem i fogivim hem?’ Sipos yumi mekem olsem, yumi save jenisim tingting blong yumi. Fastaem maet i had blong fogivim narafala, be sipos yumi traehad blong kam gud moa long fasin ya, bambae i isi blong yumi fogivim narafala.

7. Folem Ol Proveb 22:29, ?olsem wanem Jehova i yusum olgeta we oli gat gudhan tede?

⁷ Wan narafala mak we yu save putum, hemia blong gat gudhan blong mekem wan samting. Traem tingbaot bigfala namba blong ol man we oli nidim blong bildim ol bilding blong Betel, ol Haos Asembli, mo ol Haos Kingdom. Plante brata sista oli gat gudhan blong mekem ol wok ya from we oli wok wetem ol brata sista we oli gat ekspiriens. Olsem pija i soem, ol brata mo sista oli lanem blong gat gudhan blong mekem ol wok we i givhan blong mekem ol Haos Asembli mo ol Haos Kingdom i stap gud. Hemia nao sam rod we Jehova God, “King blong olwe,” mo Kraes Jisas, “King blong olgeta . . . king,” tufala i stap yusum blong mekem ol man we oli gat gudhan, oli mekem ol bigbigfala wok. (1 Tim. 1:17; 6:15; ridim Ol Proveb 22:29.) Taswe i gud yumi wok had mo yusum gudhan we yumi gat blong leftemap blong Jehova nomo.—Jon 8:54.

8. ?Olsem wanem blong jusum samting we yu wantem kam gud moa long hem?

⁸ Jusum samting we yu wantem gat gudhan long hem. ?Yu yu wantem kam gud long wanem samting? Askem ol elda long kongregesen blong yu mo maet long eria elda, blong oli talem samting we oli ting se yu save kam gud long hem. Eksampol, sipos oli se yu mas kam gud long fasin blong toktok mo tij, i gud yu askem blong oli talem stret wanem samting nao yu nid blong wok long hem. Biaen yu traehad blong kam gud long ol samting ya. ?Olsem wanem blong mekem?

9. ?Olsem wanem yu save traehad blong mekem samting we yu jusum?

⁹ Traehad blong mekem samting we yu jusum. Eksampol, sipos yu wantem kam gud moa long fasin blong tij, i gud yu stadi long buklet ya Kam Gud Moa Blong Rid Mo Tij. Taem yu gat wan haf long miting blong medel wik, i gud yu askem wan brata we i gat ekspiriens blong i lesin fastaem long haf blong yu, mo blong i talem ol samting we yu nid blong kam gud moa long hem. Tekem taem blong rerem gud ol haf blong yu, olsem nao ol narafala bambae oli luksave se yu wok had mo se oli save trastem yu.—Prov. 21:5; 2 Kor. 8:22.

10. ?Olsem wanem blong kam gud moa long samting we yumi no gat gudhan blong mekem? Talem wan eksampol.

¹⁰ ?Yu save mekem wanem sipos samting we yu wantem gat gudhan long hem, i no isi blong mekem? !Yu no mas givap! Tingbaot eksampol blong Garry, wan brata we fastaem i faenem i had blong rid. Hem i tingbaot taem ya we hem i sem, taem hem i traehad blong rid laod long ol miting. Be hem i wok had blong kam gud moa long samting ya. Hem i talem se, from ol trening we hem i kasem, naoia hem i naf blong givim ol tok long Haos Kingdom, long ol smol asembli, mo ol bigfala asembli.

11. Olsem Timoti, ?wanem i save halpem yumi blong mekem moa long wok blong Jehova?

 ¹¹ ?Olsem wanem? ?Timoti i kam wan nambawan man blong toktok mo tij? Baebol i no talem. Be i sua se Timoti i kam gud moa long ol wok blong hem, from we hem i folem advaes blong Pol. (2 Tim. 3:10) Long sem fasin, sipos yumi traehad blong kam gud moa long samting we yumi wantem gat gudhan long hem, bambae yumi naf blong mekem moa long wok blong Jehova.

12. ?Olsem wanem ol narafala oli bin halpem yu?

¹² Yumi evriwan i glad taem narafala i givhan long yumi. Eksampol, taem yumi sik mo yumi stap long hospital, yumi glad tumas we ol elda we oli stap long Komiti Blong Toktok Wetem Dokta o Grup Blong Visitim Ol Sik Man, oli visitim yumi. Taem yumi fesem wan hadtaem long laef, yumi glad tumas taem wan elda i tekem taem blong lesin mo leftemap tingting blong yumi. Mo tu, yumi harem gud tumas taem wan ekspiriens paenia i glad blong joen wetem yumi long stadi blong yumi, mo i serem ol gudfala tingting. Ol brata mo sista ya oli glad nomo blong halpem yumi. Mo yumi tu yumi save kasem glad ya sipos yumi rere blong givhan long ol brata sista. Jisas i talem se: “Man i harem gud moa taem hem i givim samting, i bitim we hem i kasem samting.” (Wok 20:35) Sipos yu wantem mekem moa long wok blong Jehova long rod ya o long sam narafala rod bakegen, ?wanem i save halpem yu blong mekem olsem?

13. ?Yumi mas tingbaot wanem taem yumi wantem putum wan mak?

¹³ Yu no putum wan mak we i no klia. Eksampol, maet yu talem se, ‘mi wantem mekem moa wok long kongregesen.’ Be maet i had blong yu save olsem wanem blong kasem mak ya, mo maet i had blong save tu se wetaem nao yu kasem mak ya. Taswe, yu mas jusum wan mak we i klia gud long tingting blong yu. Maet yu save raetemdaon mak ya mo mekem wan plan we i soem olsem wanem blong kasem mak ya.

14. ?From wanem yumi mas rere blong jenisim ol mak blong yumi?

¹⁴ Mo tu, yumi mas rere blong jenisim ol mak blong yumi. ?From wanem? From we yumi no save kontrolem sam samting we oli hapen long laef blong yumi. Eksampol, aposol  Pol i givhan blong stanemap wan niufala kongregesen long taon blong Tesalonaeka. Mo i sua se hem i putum mak blong stap long ples ya mo halpem ol niufala Kristin ya. Be ol man blong agens oli mekem se Pol i mas aot long taon ya. (Wok 17:1-5, 10) Sipos Pol i bin stap, bambae hem i putum laef blong ol brata sista long denja. Be Pol i no stop blong givhan long olgeta. Hem i gat stret tingting long samting we i hapen. Mo biaen, hem i sanem Timoti blong i go givhan long ol niufala Kristin long Tesalonaeka blong oli gat strong bilif. (1 Tes. 3:1-3) I sua se olgeta long Tesalonaeka oli glad tumas taem oli luk we Timoti i rere blong go givhan long olgeta.

15. ?Olsem wanem situesen blong laef i save jenisim ol mak blong yumi? Talem wan eksampol.

¹⁵ Yumi save lanem samting long ekspiriens blong Pol long Tesalonaeka. Maet yumi putum wan mak, be biaen situesen blong laef i jenis, nao yumi no naf blong kasem mak ya. (Pri. 9:11) Sipos hemia samting we i hapen long yu, i gud yu putum wan narafala mak we yu naf blong kasem. Hemia nao samting we kapol ya, Ted mo Hiedi i mekem. Problem blong helt i mekem se tufala i mas aot long Betel. Be from we tufala i lavem Jehova, tufala i wantem mekem moa long wok blong prij. Fastaem, tufala i mekem wok blong fultaem paenia. Biaen oli putumap tufala olsem spesel paenia, mo Ted i kasem trening blong givhan long wok blong eria elda. Be afta, i gat jenis long saed blong yia blong olgeta we oli mekem wok blong eria elda. Ted mo Hiedi i luksave se tufala i no moa save mekem wok ya from we tufala i olfala. Nating se tufala i harem nogud, be tufala i kasemsave se tufala i save gohed blong mekem wok blong Jehova long ol narafala rod. Ted i talem se: “Mitufala i lanem se yumi save mekem wok blong Jehova long plante defren rod.”

16. ?Yumi lanem wanem long Galesia 6:4?

¹⁶ Yumi no save kontrolem evri samting we i hapen long laef blong yumi. Taswe yumi no mas gat tingting ya se ol asaenmen blong yumi oli mekem yumi sas long ae blong Jehova, mo yumi no mas skelem yumi wetem ol narafala we oli mekem ol wok we yumi no save mekem. Hiedi i talem se: “Sipos yu stap skelem laef blong yu wetem ol narafala, bambae yu no save kasem glad.” (Ridim Galesia 6:4.) Yes i impoten blong lukaot ol rod blong givhan long ol narafala mo blong mekem wok blong Jehova. c

17. ?Yu save mekem wanem blong yu naf blong mekem sam wok long oganaesesen?

¹⁷ Yu save mekem moa long wok blong Jehova  sipos yu mekem laef blong yu i simpol mo yu no kaon olbaot. Putum ol smosmol mak fastaem we i save halpem yu blong kasem ol bigfala mak. Eksampol, sipos mak blong yu hemia blong kam wan fultaem paenia, i gud fastaem yu mekem haftaem paenia evri manis. Sipos mak blong yu i hemia blong kam wan man blong givhan, i gud yu spenem moa taem long wok blong prij, visitim olgeta we oli sik, mo ol olfala long kongregesen. Ekspiriens we yu kasem naoia, maet bambae i openem doa blong yu save kasem moa privilej long fiuja. Yu mas gat strong tingting blong mekem bes blong yu long ol wok we oli givim long yu.—Rom 12:11.

18. Folem pija, ?yu yu lanem wanem long eksampol blong Beverley?

¹⁸ Yumi no mas ting se yumi olfala tumas, nao yumi no putum ol mak long saed blong spirit. Tingbaot eksampol blong wan sista, nem blong hem Beverley we i gat 75 yia. Hem i gat problem blong helt we i mekem se i had blong hem i wokbaot. Be hem i wantem tumas blong joen fulwan long kampen blong Memoriol. So hem i putum sam mak we hem i wantem kasem. Taem Beverley i kasem mak blong hem, hemia blong joen long kampen, hem i glad tumas. Traehad blong hem i pulum ol narafala tu blong oli wok had long wok blong prij. Yes, Jehova i tinghae long wok blong ol olfala brata mo sista, nating se situesen blong laef blong olgeta i jenis.—Sam 71:17, 18.

19. ?Wanem sam mak we yumi save putum long saed blong spirit?

¹⁹ Putum ol mak we yu naf blong kasem. Wokem ol fasin we Jehova i glad long hem. Lanem blong gat gudhan blong mekem wan samting we i save halpem yu blong mekem moa long wok blong God mo oganaesesen blong hem. Lukaot ol rod blong givhan moa long ol brata sista. d Yes, olsem Timoti, Jehova bambae i blesem yu “nao olgeta man bambae oli luk klia nomo se yu stap gohed gud.”—1 Tim. 4:15.