1. Wat da sohn spirichwal goalz weh wi ku set?

 BIKAAZ wi da chroo Kristyanz, wi lov Jehoava wahn lat, ahn dat mek wi waahn giv ahn wi veri bes. Bot fi du evriting wi kud fi Jehoava, wi need fi set spirichwal goalz. Wi ku mek it wahn goal fi werk pahn Kristyan kwalitiz, fi laan nyoo skilz, ahn fi luk fi wayz how fi serv adaz. *

2. Wai ih impoatant fi set spirichwal goalz ahn werk haad fi reech dehn?

² Wai wi shuda waahn bee beta servants a Jehoava? Di moas impoatant reezn da bikaaz wi waahn pleez wi lovin hevnli Faada. Jehoava hapi wen wi mek di bes yoos a wi skilz eena wi servis tu hihn. Wahn nada reezn wai wi waahn mek spirichwal proagres da bikaaz wi waahn du moa fi help wi bradaz ahn sistaz. (1 Tes. 4:9, 10) Noh mata how lang wi deh eena di chroot, aala wi ku mek spirichwal proagres. Mek wi diskos how wi ku du dat.

3. Weh di apasl Paal mi inkorij Timoti fi du da 1 Timoti 4:12-16?

³ Bai di taim di apasl Paal mi rait ih fers leta tu Timoti, hihn (Timoti) da-mi don wahn elda wid lata ekspeeryens eevn doa ih mi yong. Eevn soh, Paal mi inkorij ahn fi kantinyu mek spirichwal proagres. (Reed 1 Timoti 4:12-16.) Wen yu reed bowt weh Paal seh, yu wahn noatis dat hihn mi waahn Timoti mek spirichwal proagres eena too wayz. Ih mi waahn ih werk pahn Kristyan kwalitiz laik  lov, fayt, ahn how fi liv wahn kleen laif. An ih mi aalso waahn ih werk haad fi reed beta fronta peepl, fi bee moa inkorijin, ahn fi teech beta. Mek wi diskos Timoti egzampl ahn si how wi ku set goalz weh wi ku reech soh dat wi ku bee beta servants a Jehoava. Wi wahn aalso diskos sohn wayz how wi ku du moa eena wi minischri.

4. Akaadn tu Filipiyanz 2:19-22, wai Timoti mi yoosful tu Jehoava?

⁴ Wai Timoti mi yoosful tu Jehoava? Da mi bikaaz hihn mi ga byootiful Kristyan kwalitiz. (Reed Filipiyanz 2:19-22.) Fahn di way how Paal mi diskraib Timoti, wi ku si dat hihn mi hombl ahn laayal. Hihn mi werk haad, an adaz kuda mi pen pan ahn. Ih mi lovin, an ih mi kay bowt di bradaz ahn sistaz wahn lat. Dat mi mek Paal lov Timoti, an ih neva hezitayt fi chros ahn fi tek kayr a sohn haad asainments. (1 Kor. 4:17) Sayhn way soh, Jehoava wahn lov wee, ahn wi wahn ku du moa fi di kangrigayshan wen wi werk pahn di kwalitiz weh Jehoava lov.—Ps. 25:9; 138:6.

5. (a) How yu ku disaid wich Kristyan kwaliti yu waahn werk pan? (b) Laik weh di picha shoa, how di yonga sista di werk pan ih goal fi shoa moa kompashan fi adaz?

⁵ Chooz wahn spesifik goal yu waahn werk pan. Pray ahn tink bowt weh paat a yu persnaliti yu ku du beta eena. Den pik wahn spesifik kwaliti fi werk pan. Fi egzampl, yu mait disaid dat yu need fi laan how fi shoa moa kompashan er how fi ga wahn schranga dizaiya fi help yu bradaz ahn sistaz. Er yu ku werk haada fi mek pees wid adaz ahn bee moa wilin fi fergiv dehn. Yu ku aks wahn kloas fren fi gi yu sohn sojeshan pahn how yu ku du beta.—Prov. 27:6.

6. How yu ku werk pahn di Kristyan kwaliti weh yu set az wahn goal?

⁶ Werk haad fi reech yu goal. How yu ku du dat? Wan way da fi stodi di kwaliti weh yu waahn werk pan. Fi egzampl, sopoaz yu disaid dat yu waahn bee moa wilin fi fergiv adaz. Maybi yu ku staat owt di reed ahn tink bowt di egzampl a peepl eena di Baibl weh mi wilin fi fergiv adaz ahn bowt peepl weh neva wilin fi fergiv. Tink bowt Jeezas egzampl. Hihn mi wilin fi fergiv adaz. (Look  7:47, 48) Ahn hihn neva foakos pahn dehn mistayk; hihn mi foakos pahn weh dehn ku du. Bot di Farisee dehn da neva laik dat, dehn mi “luk dong pahn ada peepl.” (Look 18:9) Afta yu meditayt pahn dehndeh egzampl, aks yuself: ‘Weh Ai si eena ada peepl? Wich wan a dehn kwalitiz Ai chooz fi foakos pan?ʼ If yu fain it haad fi fergiv sohnbadi, chrai mek wahn lis a aala di gud kwalitiz weh da persn gat. Den aks yuself: ‘Weh Jeezas tink bowt dis persn? Hihn wuda fergiv ahn?ʼ Wahn stodi proajek laik dat ku help wi chaynj di way wi tink. At fers, wi mait haftu werk haad fi fergiv sohnbadi weh ofen wi. Bot if wi kantinyu werk pahn wi goal, wi wahn bee moa wilin fi fergiv.

7. How Proverbs 22:29 shoa wi dat Jehoava yooz peepl weh ga gud skilz tudeh?

⁷ Wahn nada goal weh yu ku set da fi laan wahn skil weh yu ku yooz fi du moa eena yu servis tu Jehoava. Tink bowt humoch werkaz ih tek fi bil di Kingdom Haal dehn, di Asembli Haal dehn, ahn di difrent Betel bildin dehn. Lata dehndeh werkaz laan dehn skilz wen dehn werk lang wid bradaz ahn sistaz weh ga lata ekspeeryens eena dehndeh skil. Laik weh di picha shoa, bradaz ahn sistaz di laan di skilz weh dehn need fi help mantayn di Kingdom Haal an Asembli Haal dehn. Da way, Jehoava Gaad, “di evalastin King,” ahn Krais Jeezas, di “King oava aal dehn wan weh rool az king,” wahn ku yooz dehnya werkaz fi du amayzin tingz. (1 Tim. 1:17; 6:15; reed Proverbs 22:29.) Wee waahn werk haad ahn yooz wi skilz fi aana Jehoava, noh wiself.—Jan 8:54.

8. How yu ku disaid wich skil yu waahn laan?

⁸ Chooz wahn spesifik skil weh yu waahn laan. Wat da wahn skil weh yu ku laan? Aks di eldaz eena yu kangrigayshan ahn maybi yu serkit oavaseeya wat da wahn skil weh dehn tink yu ku laan. Fi egzampl, if dehn sojes dat yu ku du beta eena di way how yu taak ahn di way yu teech, aks dehn fi help yu pik wahn spesifik point weh yu need fi werk pan. Den werk haad fi du beta. How yu ku du dat?

9. How yu ku reech di goal weh yu set fi laan wahn skil?

⁹ Werk haad fi reech yu goal. Sopoaz yu disaid dat yu waahn bee wahn beta teecha. Yu ku stodi di Laan fi Reed ahn Teech Beta broashoar. Wen yu geh wahn asainment pahn di midweek meetin, yu ku aks wahn brada weh ga lata ekspeeryens fi lisn tu yu taak heda taim ahn mek sohn sojeshan pahn how yu ku du beta. Pripyaa yu asainment dehn heda taim soh dat peepl ku si dat yu werk haad ahn dat dehn ku pen pahn yu.—Prov. 21:5; 2 Kor. 8:22.

10. Gi wahn egzampl weh shoa how wi ku kantinyu werk pahn wahn skil weh wi waahn du beta eena. Yooz di egzampl eena di paragraaf.

¹⁰ Weh yu ku du if di skil weh yu waahn laan da sohnting weh yu fain haad fi du? Noh giv op! Wahn brada weh naym Garry mi kyaahn reed gud. Hihn memba how shaym ih mi feel wen ih chrai reed owt lowd wen ih mi deh da di kangrigayshan meetin dehn. Bot ih mi kip di werk haad fi du beta eena ih reedin. Now ih seh dat bikaaz a di chraynin weh ih mi get, hihn ku gi taak da di Kingdom Haal dehn, da di serkit asembli dehn, ahn da di kanvenshan dehn!

11. Laik Timoti, weh wahn help wi fi du moa eena wi servis tu Jehoava?

 ¹¹ Yu tink Timoti mi geh fi bee wahn gud speeka er wahn amayzin teecha? Di Baibl noh tel wi. Bot fi shoar Timoti mi kantinyu fi du ih asainment beta ahn beta bikaaz ih mi fala Paal advais. (2 Tim. 3:10) Sayhn way soh, if wee werk haad fi laan nyoo skilz, wi wahn ku du moa eena wi servis tu Jehoava.

12. How yoo benifit wen adaz help yu?

¹² Aala wi benifit fahn di tingz weh ada peepl du fi wi. Fi egzampl, wen wi deh eena haaspital, wi graytful wen eldaz weh serv pahn di Hospital Liaison Committee er di Patient Visitation Group kohn vizit wi. Wen wi di deel wid wahn tof sichuwayshan eena wi persnal laif, wi graytful wen wahn lovin elda tek di taim fi lisn tu wi ahn gi wi komfert. Ahn wen wi need help wid wahn Baibl stodi, wi hapi wen wahn painyaa weh ga lata ekspeeryens goh lang wid wi pahn di stodi an aafa sojeshanz. Aala dehnya bradaz ahn sistaz hapi fi help wi. Wee ku aalso bee hapi laik dehn if wi du evriting weh wi kud fi help wi bradaz ahn sistaz. Jeezas tel wi: “Wi feel moa hapinis wen wi giv tu adaz dan wen wi get tingz fahn ada peepl.” (Aks 20:35) If yoo waahn du moa fi Jehoava eena dehnya er ada wayz, weh ku help yu fi reech yu goal?

13. Weh wi haftu memba wen wi di set wahn goal?

¹³ Memba fi set spesifik goalz. Fi egzampl, yu mait seh, ‘Ai wuda waahn du moa eena di kangrigayshan.ʼ Bot ih mait bee haad fi noa how fi reech wahn goal laik dat, ahn yu mait nat eevn noa wen yu reech da goal. Soh set wahn spesifik goal. Yu ku eevn rait dong di goal weh yu set ahn how yu plan fi reech it.

14. Wai wi need fi bee redi ahn wilin fi mek chaynjiz wen wi di set goalz?

¹⁴ Wi need fi bee redi ahn wilin fi mek chaynjiz wen wi di set goalz. Wai? Bikaaz wee wahn neva ga kompleet kanchroal oava wi serkomstans. Fi egzampl, di apasl Paal mi help faam wahn nyoo kangrigayshan eena di siti a Tesalonaika. Ahn fi hihn goal da-mi fi stay deh ahn help dehndeh nyoo Kristyanz. Bot peepl weh  mi deh gens ahn, mi foas Paal fi lef di siti. (Aks 17:1-5, 10) If Paal mi stay deh, hihn mi wahn put ih bradaz eena daynja, bot Paal neva giv op. Insteda dat, hihn mi ajos tu di nyoo serkomstans. Laytaraan, hihn mi sen Timoti fi tek kayr a di spirichwal needz a dehndeh nyoo bradaz ahn sistaz da Tesalonaika. (1 Tes. 3:1-3) Dehndeh bradaz ahn sistaz da Tesalonaika mosi mi feel reeli hapi dat Timoti mi wilin fi goh help dehn owt.

15. How wi goalz mait chaynj wen wi serkomstans chaynj? Yooz di egzampl eena di paragraaf.

¹⁵ Wi ku laan fahn weh mi hapm tu Paal da Tesalonaika. Wee mait set wahn goal, bot wi serkomstans ku chaynj ahn stap wi fahn reech wi goal. (Eccl. 9:11) If dat eva hapm tu yoo, bee wilin fi pik wahn difrent goal weh yu ku reech. Dat da weh wahn kopl weh naym Ted ahn Hiedi mi du. Dehn mi haftu lef Betel bikaaz a wahn helt prablem. Bot dehn lov fi Jehoava mi mek dehn luk fi ada wayz fi du moa eena dehn minischri. Fers, dehn mi staat tu regyula painyaa. Afta wahn wail, dehn mi geh fi serv az speshal painyaaz, ahn Ted mi geh chraynin fi bee wahn sobstityoot serkit oavaseeya. Den di ayj limit fi wahn serkit oavaseeya mi chaynj. Soh Ted ahn Hiedi mi riyalaiz dat dehn mi tu oal fi kantinyu serv Jehoava eena da asainment. Dat mi mek dehn feel sad, bot dehn mi andastan dat dehn ku serv Jehoava eena ada wayz. Ted seh, “Wi laan dat wi ku serv Jehoava eena moa dan wan way.”

16. Weh lesn wi ku laan fahn Galayshanz 6:4?

¹⁶ Wi kyaahn kanchroal evriting weh hapm eena wi laif. Soh ih impoatant fi mek wi noh tink dat Jehoava onli valyu wi fi di asainment dehn weh wi gat. Ahn wi aalso need fi memba fi noh kompyaa wiself wid adaz weh ga asainments weh wee noh gat. Hiedi seh: “Yu noh wahn bee hapi if yu kompyaa fi yoo laif wid ada peepl laif.” (Reed Galayshanz 6:4.) Ih impoatant fi mek wi luk fi difrent wayz fi help adaz ahn fi serv Jehoava moa. *

17. Weh yu ku du fi kwalifai fi wahn asainment?

¹⁷ Yu wahn ku du moa eena yu servis tu Jehoava if yu kip yu laif simpl ahn noh baro moni er bai tingz weh yu noh need. Yu ku aalso set smaala goalz weh wahn help yu reech yu biga goalz. Fi egzampl, if yu goal da fi bee wahn regyula painyaa, maybi yu ku staat tu agzilari painyaa evri  mont. If yu goal da fi bee wahn ministeeryal servant, maybi yu ku spen moa taim pahn feel servis ahn di vizit oalda bradaz ahn sistaz an enibadi weh sik eena di kangrigayshan. Di ekspeeryens weh yu geh wahn gi yu moa apachooniti fi geh moa asainments eena di fyoocha. Mek op yu main fi du yu bes eena eni asainment weh yu get.—Roam. 12:11.

18. Weh wi laan fahn Sista Beverley egzampl? (Koment pahn di picha.)

¹⁸ Wi wahn neva bee tu oal fi set ahn reech spirichwal goalz. Tink bowt di egzampl a wahn 75-yaa-oal sista weh naym Beverley. Shee mi ga wahn bad helt prablem weh mi mek it haad fi mek ih waak. Bot shee mi waahn du moa fi sopoat di Memoaryal kampayn. Soh shee set sohn spesifik goalz fi ihself. Wen Sista Beverley mi reech ih goalz fi di kampayn, shee mi veri hapi. Ahn fi shee haad werk mi inkorij adaz fi werk haad eena di minischri tu. Jehoava apreeshiayt di werk weh wi oalda bradaz ahn sistaz du, eevn if dehn kyaahn du az moch az dehn wuda waahnt.—Ps. 71:17, 18.

19. Wat da sohn spirichwal goalz weh wee ku set?

¹⁹ Set goalz weh noh tu haad fi reech. Laan fi werk pahn kwalitiz weh wahn pleez Jehoava. Laan skilz weh wahn help yu fi bee moa yoosful tu Jehoava an ih aaganaizayshan. Luk fi wayz how yu ku du moa fi serv yu bradaz ahn sistaz. * Wid Jehoava blesin, ‘evribadi wahn ku si dat yu di du beta aal di taim,ʼ jos laik Timoti.—1 Tim. 4:15.