1. Unsang espirituwal nga mga tumong ang puwede natong kab-oton?

 KAY tinuod tang mga Kristohanon, gihigugma nato pag-ayo si Jehova. Gusto natong ihatag kaniya ang atong pinakamaayo. Pero aron mahimo nato nâ, kinahanglang naa tay espirituwal nga mga tumong, sama sa pag-ugmad ug Kristohanong mga hiyas, pagkat-on ug mapuslanong mga skill, ug pagpangitag paagi nga makatabang sa uban. *

2. Nganong angay tang maghimog espirituwal nga mga tumong ug maningkamot nga makab-ot kana?

² Nganong angay tang maghunahuna nga mouswag sa espirituwal? Ang kinalabwang rason mao nga gusto natong mapalipay ang atong mahigugmaong Amahan sa langit. Malipay si Jehova kon makita niya nga gigamit gyod nato ang atong mga talento ug abilidad sa pag-alagad kaniya. Dugang pa, gusto natong mouswag sa espirituwal aron mas matabangan nato ang mga igsoon. (1 Tes. 4:9, 10) Bisan unsa na ta ka dugay sa kamatuoran, kitang tanan puwede pang mouswag sa espirituwal. Hisgotan nato kon unsaon nato nâ paghimo.

3. Base sa 1 Timoteo 4:12-16, unsay gidasig ni apostol Pablo nga himoon ni Timoteo?

³ Dihang gisulat ni apostol Pablo ang iyang unang sulat kang Timoteo, kining sulondang batan-on eksperyensiyado na nga ansiyano. Pero gidasig gihapon siya ni Pablo nga padayong mouswag sa espirituwal. (Basaha ang 1 Timoteo 4:12-16.)  Mamatikdan nimo sa giingon ni Pablo nga gusto niyang mouswag si Timoteo sa duha ka paagi: pinaagi sa pag-ugmad sa Kristohanong mga hiyas parehas sa gugma, pagtuo, ug moral nga kahinlo, ug pinaagi sa pagpauswag sa iyang publikong pagbasa, pagpanambag, ug pagpanudlo. Base sa ehemplo ni Timoteo, atong konsiderahon kon sa unsang paagi ang paghimog mga tumong nga kayang kab-oton makatabang nato nga mouswag sa espirituwal. Hisgotan pod nato ang pipila ka paagi nga mapauswag nato ang atong ministeryo.

4. Base sa Filipos 2:19-22, nganong gigamit pag-ayo ni Jehova si Timoteo?

⁴ Nganong gigamit pag-ayo ni Jehova si Timoteo? Tungod sa iyang nindot kaayong Kristohanong mga hiyas. (Basaha ang Filipos 2:19-22.) Base sa giingon ni Pablo, makita nato nga si Timoteo mapainubsanon, maunongon, kugihan, ug kasaligan. Mahigugmaon siya ug mapinanggaon kaayo sa mga igsoon. Tungod ana, pinangga ni Pablo si Timoteo ug wala siya magduhaduha sa paghatag niyag bug-at nga mga responsibilidad. (1 Cor. 4:17) Kita pod, mahalon ta ni Jehova ug mas magamit ta sa kongregasyon kon ugmaron nato ang mga hiyas nga gusto niya.​—Sal. 25:9; 138:6.

5. (a) Unsay imong himoon aron mahibaloan nimo kon unsang Kristohanong hiyas ang kinahanglan nimong ugmaron? (b) Base sa hulagway, unsay gihimo sa batabatang sister aron makab-ot niya ang iyang tumong nga mas makapakitag empatiya?

⁵ Pagpilig espesipikong tumong. Pag-ampo aron makita nimo kon unsang bahina sa imong personalidad ang angay nimong pauswagon. Pagpokus sa usa ka espesipikong hiyas. Pananglitan, gusto ba nimong mas makapakitag empatiya o mahimong mas matinabangon sa mga igsoon? Gusto ba nimo nga mahimong mas buotan ug mapinasayloon? Maayo tingali nga pangutan-on nimo ang imong suod nga higala kon unsay puwede nimong pauswagon.​—Prov. 27:6.

6. Unsaon nimo pagkab-ot ang imong tumong nga makaugmad ug Kristohanong hiyas?

⁶ Paningkamoti nga makab-ot ang imong tumong. Unsaon nimo nâ paghimo? Puwede nimong tun-an pag-ayo ang hiyas nga gusto nimong pauswagon. Pananglitan, gusto nimo nga mahimong mas mapinasayloon. Puwede tingali nimo ning sugdan pinaagi sa pagbasa ug pagpamalandong sa mga pananglitan sa Bibliya bahin niadtong nagpasaylo  ug wala magpasaylo. Konsideraha ang ehemplo ni Jesus. Kinasingkasing niyang gipasaylo ang uban. (Luc. 7:47, 48) Nagpokus pod siya dili sa ilang kasaypanan, kondili sa ilang kayang himoon. Lahi kaayo si Jesus sa mga Pariseo sa iyang panahon, kinsa “nag-isip sa uban ingong walay pulos.” (Luc. 18:9) Human nimo mapamalandong ang maong mga pananglitan, pangutan-a ang imong kaugalingon: ‘Unsang mga kinaiya ang akong nakita sa uban? Pero sa unsa ko nagpokus?’ Kon naglisod kag pasaylo sa usa ka tawo, testingig sulat ang tanan niyang maayong kinaiya. Dayon pangutan-a ang imong kaugalingon: ‘Unsay pag-isip ni Jesus kaniya? Pasayloon kaha siya ni Jesus?’ Kana nga paagi sa pagtuon makatabang nga mausab ang atong panghunahuna. Tingali sa primero, malisdan ta sa pagpasaylo niadtong nakapasakit nato, pero kon padayon tang maningkamot, mahimong mas sayon na ang pagpasaylo.

7. Base sa Proverbio 22:29, giunsa paggamit ni Jehova ang mga igsoon nga naay skill?

⁷ Ang laing tumong nga puwede nimong kab-oton mao ang pagkat-on ug mapuslanong skill. Hunahunaa ang daghang igsoon nga nagboluntaryo sa pagtukod sa mga pasilidad sa Bethel, Assembly Hall, ug Kingdom Hall. Daghan nila ang nakakat-on ug skill tungod sa pagtrabaho kauban sa hanas nga mga igsoon. Base sa gipakita sa hulagway, ang mga brader ug sister nakakat-on ug mga skill nga gikinahanglan aron mamentinar ang mga Assembly Hall ug Kingdom Hall. Niining paagiha ug sa uban pa, si Jehova nga Diyos, ang “Hari nga walay kataposan,” ug si Kristo Jesus, ‘ang Hari sa mga hari,’ naggamit niining hanas nga mga igsoon sa pagpalampos ug daghang butang. (1 Tim. 1:17; 6:15; basaha ang Proverbio 22:29.) Gusto natong magkugi ug gamiton ang atong mga skill aron himayaon si Jehova, dili ang atong kaugalingon.​—Juan 8:54.

8. Unsay imong himoon aron mahibalo ka kon unsa nga skill ang imong tun-an?

⁸ Pagpilig espesipikong tumong. Unsang skill ang gusto nimong makat-onan? Pangutan-a ang inyong mga ansiyano ug tingali ang inyong tigdumala sa sirkito kon unsa nga skill ang puwede nimong tun-an. Pananglitan, kon moingon sila nga kinahanglan nimong pauswagon ang imong paagi sa paghatag ug pakigpulong ug pagtudlo, pangutan-a sila kon unsay espesipiko nimong pauswagon bahin niana. Dayon paningkamot nga mouswag. Unsaon nimo ni paghimo?

9. Unsaon nimo pagkab-ot ang imong tumong nga makakat-on ug skill?

⁹ Paningkamot nga makab-ot ang imong tumong. Ibutang ta nga gusto nimong pauswagon ang imong paagi sa pagtudlo. Puwede nimong tun-an ang brosyur nga Mahimong Hanas sa Pagbasa ug Pagpanudlo. Dihang hatagan kag bahin sa midweek nga tigom, puwede kang magpa-rehearse sa eksperyensiyadong brader ug pangutan-a siya kon unsay imong pauswagon. Andamag maayo ang imong asaynment. Pinaagi ana, makita sa uban nga kugihan ka ug kasaligan.​—Prov. 21:5; 2 Cor. 8:22.

10. Paghatag ug pananglitan kon unsaon nga mouswag ta sa skill nga atong ginatun-an.

¹⁰ Komosta man kon lisod ang skill nga gusto nimong tun-an? Ayawg surender! Konsideraha ang brader nga si Garry. Sa una, nalisdan kaayo siya sa pagbasa. Nahinumdom siya nga maulaw kaayo siyang mobasag kusog diha sa tigom. Pero padayon siyang naningkamot. Karon, miingon siya nga tungod sa nadawat niya nga pagbansay, nagahatag na siyag pakigpulong  sa Kingdom Hall, sirkitong asembliya, ug kombensiyon!

11. Parehas kang Timoteo, unsay makatabang nga mas daghan tag mahimo sa pag-alagad kang Jehova?

¹¹ Nahimo kahang hawod nga mamumulong o magtutudlo si Timoteo? Walay giingon ang Bibliya. Pero segurado nga miuswag si Timoteo sa pagtuman sa iyang mga asaynment kay gisunod niya ang tambag ni Pablo. (2 Tim. 3:10) Kon ato pong pauswagon ang atong mga skill, mas daghan tag mahimo sa pag-alagad kang Jehova.

12. Sa unsang paagi ka nakabenepisyo sa tabang sa uban?

¹² Kitang tanan makabenepisyo sa tabang sa uban. Dihang maospital ta, mapasalamaton ta sa pagbisita sa mga ansiyano nga membro sa Hospital Liaison Committee o sa Patient Visitation Group. Dihang naa tay problema, malipay gyod ta kon paminawan ug hupayon ta sa mapinanggaong ansiyano. Dihang magkinahanglan tag tabang sa pag-Bible study, malipay ta dihang ubanan ta sa eksperyensiyadong payunir ug mohatag siyag sugyot. Kini nga mga igsoon malipayng motabang nato. Mobati pod ta ana nga kalipay kon motabang ta sa mga igsoon. Si Jesus miingon: “Dunay labaw nga kalipay sa paghatag kay sa pagdawat.” (Buh. 20:35) Kon gusto nimong mas makatabang niining paagiha o sa uban pang paagi, unsaon nimo pagkab-ot ang imong tumong?

13. Dihang mohimog tumong, unsay angay natong hinumdoman?

¹³ Kon maghimo kag tumong, ayaw nang dili espesipiko. Pananglitan, tingali maghunahuna ka, ‘Gusto nakong mohimog dugang sa kongregasyon.’ Kon ingon ana ang imong tumong, lisod mahibaloan kon unsaon nimo nâ pagkab-ot o kon imo na ba nang nakab-ot. Busa maayo kon klaro ug espesipiko ang imong tumong. Puwede pa gani nimong isulat kon unsay imong tumong ug kon unsaon nimo ni pagkab-ot.

14. Dihang mohimo tag tumong, nganong angay nga andam tang mo-adjust?

¹⁴ Kinahanglan pod nga andam tang mo-adjust dihang mohimo tag tumong. Ngano? Kay naay mga kahimtang nga dili nato kontrolado. Hunahunaa ni: Si apostol Pablo mitabang sa pagpormag bag-ong kongregasyon  sa siyudad sa Tesalonica. Segurado nga tumong niya nga magpabilin didto ug tabangan ang bag-ong mga Kristohanon. Pero napugos siya sa pagbiya tungod sa mga magsusupak. (Buh. 17:1-5, 10) Kon wala mobiya si Pablo, mabutang niya sa peligro ang mga igsoon. Pero wala siya moundang sa pagtabang nila. Hinuon, mi-adjust siya. Sa ulahi, iyang gipadala si Timoteo sa pag-atiman sa espirituwal nga panginahanglan sa bag-ong mga Kristohanon sa Tesalonica. (1 Tes. 3:1-3) Seguradong nalipay ang mga taga-Tesalonica kay si Timoteo andam moalagad bisan asa siya gikinahanglan!

15. Nganong ang kahimtang nga dili nato kontrolado makausab tingali sa atong tumong? Iilustrar.

¹⁵ Naa tay makat-onan sa eksperyensiya ni Pablo sa Tesalonica. Tingali naay pribilehiyo sa pag-alagad nga gusto natong makab-ot, pero wala nato ni madawat tungod sa mga kahimtang nga dili nato kontrolado. (Eccl. 9:11) Kon mao nay imong kahimtang, sulayi ang laing tumong nga kaya nimong kab-oton. Mao nay gihimo sa magtiayong si Ted ug Hiedi. Tungod sa sakit, kinahanglan silang mobiya sa Bethel. Pero tungod sa ilang gugma kang Jehova, nangita gihapon silag mga paagi nga mapauswag ang ilang ministeryo. Una, nag-regular payunir sila. Sa ulahi, nahimo silang mga espesyal payunir, ug si Ted gibansay ingong substitute circuit overseer. Unya miabot ang panahon nga naa nay limit ang edad sa mag-alagad ingong tigdumala sa sirkito. Busa nakita ni Ted ug Hiedi nga tigulang na sila para ani nga asaynment. Bisag naguol sila, nahibalo sila nga puwede silang makaalagad kang Jehova sa laing mga paagi. Si Ted miingon, “Nakat-onan namo nga dili mi angayng magpokus sa usa lang ka pribilehiyo sa pag-alagad.”

16. Unsay atong makat-onan sa Galacia 6:4?

¹⁶ Dili nato kontrolado ang tanang kahimtang. Busa ang atong mga pribilehiyo dili nato himoong basehanan kon importante ba ta kang Jehova o dili, ug dili pod nato itandi ang atong mga pribilehiyo sa pribilehiyo sa uban. Si Hiedi miingon, “Mawala ang imong kalipay kon itandi nimo ang imong kinabuhi sa kinabuhi sa uban.” (Basaha ang Galacia 6:4.) Importante nga mangita tag paagi nga mas magamit ta ni Jehova. *

17. Unsay imong himoon aron mahimo kang kuwalipikado para sa mga pribilehiyo?

¹⁷ Aron andam kang modawat sa bisan unsang pribilehiyo, pasimpleha ang imong kinabuhi ug likayi ang wala kinahanglanang pagpangutang. Paghimog ginagmayng tumong  nga makatabang nimo nga makab-ot ang dagkong tumong. Pananglitan, aron makab-ot nimo ang tumong nga mahimong regular payunir, puwede ba kang mag-continuous auxiliary pioneer? Aron makab-ot nimo ang imong tumong nga mahimong ministeryal nga alagad, puwede ba nimong dugangan ang imong panahon sa ministeryo ug sa pagbisita sa mga naay sakit ug mga tigulang sa inyong kongregasyon? Pinaagi ani, mabansay ka ug mahimong andam sa pagdawat ug dugang mga pribilehiyo. Himoa ang imong pinakamaayo sa bisan unsang asaynment nga imong madawat.​—Roma 12:11.

18. Base sa hulagway, unsay imong makat-onan sa ehemplo ni Beverley?

¹⁸ Bisag tigulang na ta, puwede gihapon tang mangab-ot ug espirituwal nga mga tumong. Konsideraha ang 75 anyos nga sister nga si Beverley. Naa siyay grabeng sakit maong maglisod siyag lakaw. Pero gusto niyang mas masuportahan ang kampanya sa Memoryal, maong naghimo siyag espesipikong mga tumong. Dihang nakab-ot ni Beverley ang iyang mga tumong, nalipay kaayo siya. Tungod sa iyang maayong ehemplo, nadasig ang uban nga maningkamot pod sa ilang ministeryo. Gipabilhan ni Jehova ang ginahimo sa atong tigulang nga mga igsoon, bisag limitado na silag mahimo tungod sa ilang kahimtang.​—Sal. 71:17, 18.

19. Unsang espirituwal nga mga tumong ang puwede natong kab-oton?

¹⁹ Paghimog mga tumong nga kaya nimong kab-oton. Ugmara ang mga hiyas nga makapasuod nimo kang Jehova. Pagkat-og mga skill aron mas magamit ka sa atong Diyos ug sa iyang organisasyon. Pangitag mga paagi nga mas makatabang ka sa mga igsoon. * Sa tabang ni Jehova, “ang imong pag-uswag klarong makita sa tanan,” parehas kang Timoteo.​—1 Tim. 4:15.