1. Met sókkun mettóch lón pekin ngún sia tongeni achocho le tikeri?

 POKITEN kich Chón Kraist mi enlet, sia fókkun tongei Jiowa. Sia achocho úkúkún ach tufich lón ach angang ngeni. Nge, ika sia mochen fang ngeni Jiowa minne mi múrinné seni meinisin, a lamot sipwe isetiw met sipwe achocho ngeni lón pekin ngún, áwewe chék ren ach émúrinnéló napanapach kewe napanapen Chón Kraist, káé och angang are tufich mi álilliséch, me ppii ifa usun sia tongeni álisi ekkewe ekkóch.

2. Pwata a lamot ach sipwe isetiw met sipwe achocho ngeni, me achocho le tikeriir?

² Pwata a lamot ach sipwe mochen wiliti emén néún Jiowa chón angang mi lipwákéch? Ewe áeúin popun, pún sia mochen apwapwaai Semach na mi tong lón láng. A pwapwa lupwen a kúna ach unusen áeá sileach me tufichich kewe lón ach angang ngeni. Pwal och, sia mochen feffeitá lón pekin ngún pwe epwe lapóló ach álisi chienach kewe Chón Kraist. (1 Tes. 4:9, 10) Ese lifilifil ttamen ach nóm lón ewe enlet, nge kich meinisin sia chúen tongeni feffeitá lón pekin ngún. Iei, sipwele ppii ifa usun sia tongeni féri ena.

3. Me ren 1 Timoty 4:12-16, met aposel Paulus a pesei Timoty an epwe féri?

³ Lupwen ewe aposel Paulus a makkeei néún we áeúin taropwe ngeni Timoty, ena alúwél Timoty a fen emén mwán mi ásimaw mi lipwákéch. Nge Paulus a pesei an epwe sópweló le feffeitá pwe epwe wiliti emén chón angang ngeni Jiowa mi lipwákéch. (Álleani 1 Timoty 4:12-16.) Atun ka álleani alon Paulus keei, kopwe kúna pwe i a mochen án Timoty epwe feffeitá lón ruu mettóch. Epwe ámááraatá napanapen Chón  Kraist kewe, áwewe chék ren tong, lúkú, me an eáni manaw mi limeliméch, me epwe angangéchúló lón tufichin kewe, áwewe chék ren an álleánawu masouen ekkewe taropwe mi pin, pesei aramas, me asukuler. Sipwele pwóróus wóón án Timoty leenien áppirú mi tongeni áiti ngenikich ifa usun ach isetiw met sipwe achocho ngeni a tongeni álisikich le lipwákéchúló lón ach angang ngeni Jiowa. Sipwe pwal pwóróus wóón ekkóch mettóch sia tongeni féri pwe sipwe alapaaló ach angangen afalafal.

4. Me ren Filipi 2:19-22, met a efisi án Jiowa epwe néúnéú Timoty lón an angang?

⁴ Met a efisi án Jiowa epwe néúnéú Timoty lón an angang? An napanapeni napanapen Chón Kraist kewe. (Álleani Filipi 2:19-22.) Sia tongeni kúna pwe Timoty i emén mi tipetekison, tuppwél, tinikken, me alúkúlúk, seni met Paulus a erá usun i. Timoty a fókkun tongei me chúngú chienan kewe Chón Kraist. Ina popun Paulus a tongei me ese pireir le ewisa ngeni wis mi chou. (1 Kor. 4:17) Pwal ina usun ren kich, Jiowa epwe tongekich me néúnéú kich lón ewe mwichefel, ika sia ámááraatá ekkewe napanap a aúcheani.​—Kölf. 25:9; 138:6.

5. (a) Ifa usun kopwe filatá menni lein napanapen Chón Kraist ka mochen ámááraatá? (b) Ifa usun ei fépwúl lón ei sasing a achocho le tikeri an mochen alapaaló an tongei me weweiti meefien ekkewe ekkóch?

⁵ Fili eú mettóch ka mochen achocho ngeni. Ekieki fiti iótek menni lein napanapom kewe a lamot óm kopwe émúrinnéló. Fili eú me leir ka mochen émúrinnéló. Áwewe chék, eli ka tongeni filatá óm kopwe káé le alapaaló óm tongei me weweiti meefien ekkewe ekkóch are mochen álisi chienom kewe Chón Kraist. Are ka tongeni alapaaló óm achocho le awora kinamwe me óm omusaaló tipisin ekkewe ekkóch. Eli epwe álilliséch ngonuk óm eisini emén chienom ka lúkúlúkú ika met ka tongeni féri pwe kopwe émúrinnéló napanapom kewe.​—SalF. 27:6.

6. Ifa usun ka tongeni ámááraatá eú napanap?

⁶ Achocho le tikeri met ka mochen achocho ngeni. Ifa usun kopwe féri ena? Eú alen óm féri ena, ina ren óm káéfichi usun ewe napanap ka mochen émúrinnéló. Áwewe chék, ika ka filatá óm kopwe angang wóón óm alapaaló óm omusaaló tipisin ekkewe ekkóch, ka tongeni poputá le álleani me ekilonei pwóróusen chókkewe lón Paipel iir mi tipemecheres  le omusaaló tipisin aramas me chókkewe rese. Ekieki usun án Jesus leenien áppirú. I a tipemecheres le omusaaló tipisin aramas. (Luk. 7:47, 48) Ese pwal nefótófót wóón mwáálliir kewe, nge a nefótófót wóón met ra tongeni féri. I a sokkoló seni ekkewe Farisi lón fansoun we, pún ra “aücheangaua aramas.” (Luk. 18:9) Mwirin óm ekilonei ekkena pwóróus, pwisin eisinuk: ‘Met sókkun napanap ua kúna seni ekkewe ekkóch? Menni lein napanaper kewe upwe filatá le nefótófót wóón?’ Ika a weires óm kopwe omusaaló tipisin emén, ka tongeni makkeetiw meinisin ekkewe napanap mi múrinné ena emén a napanapeni. Mwirin pwisin eisinuk: ‘Ifa ekiekin Jesus usun eménnei? Itá epwe omusaaló tipisin?’ Ika sia féri ena, sia tongeni ekkesiwili ekiekich. Eli me akkomwan, a lamot ach sipwe angang weires le omusaaló tipisin emén mi asongakich. Nge ika sia achocho le émúrinnéló napanapach kewe, ekis me ekis, sipwe tipemecheresiló le omusaaló tipis.

7. Ifa usun Än Salomon Fos 22:29 a pwári pwe Jiowa a néúnéú chón angang mi lipwákéch lón ei fansoun?

⁷ Pwal eú mettóch ka tongeni achocho le tikeri, ina óm káé eú sókkun angang mi álilliséch. Ekieki usun úkúkún lamoten álillisin chómmóng chón angang fán iten kaúún ekkewe imw fán iten Bethel, Leenien Mwichelap, me Leenien Mwich. Chómmóng me lein ekkena chón angang ra fen káé och sókkun angang seni ar angangfengen me chiener kewe Chón Kraist mi lipwákéch. Usun met sia kúna lón ei sasing, ekkeei Chón Kraist mwán me fefin ra káé ekkewe angang mi lamot ngeni túmúnún ekkewe Leenien Mwichelap me Leenien Mwich. Jiowa Kot, “ewe King mi nonom tori feilfeilachök,” me Kraist Jesus, ‘ewe Kingen . . . king meinisin,’ ra apwénúetá chómmóng angang mi amwarar ren ar néúnéú ekkena chón angang mi lipwákéch. (1 Tim. 1:17; 6:15; álleani Än Salomon Fos 22:29.) Sia mochen angang weires me áeá tufichich kewe le elingaaló Jiowa, nge esap pwisinkich.

8. Ifa usun kopwe filatá met kopwe lipwákéchúló wóón?

⁸ Fili eú mettóch ka mochen achocho ngeni. Met ka mochen lipwákéchúló wóón? Eisini ekkewe mwán mi ásimaw lón óm we mwichefel me eli ewe chónemmwen mi wisen sáifetál ika met meefier ren met sókkun mettóch ka tongeni lipwákéchúló wóón. Áwewe chék, ika ra erenuk pwe mi éch óm kopwe lipwákéchúló wóón óm tufichin kapas me asukul, iwe tingorer ar repwe erenuk ika menni napanap a lamot óm kopwe angang wóón. Mwirin, kopwe fókkun achocho le angang wóón. Ifa usun kopwe féri ena?

9. Met kopwe féri pwe kopwe tikeri óm mochen lipwákéchúló lón och mettóch?

⁹ Achocho le tikeri met ka mochen achocho ngeni. Áwewe chék, ika ka mochen lipwákéchúló lón óm tufichin asukul, ka tongeni káéfichi ewe brochure Achocho lón Óm Állea me Asukul. Atun a wor óm kinikin lón mwich, ka tongeni tingorei emén Chón Kraist mwán mi lipwákéch an epwe aúseling óm na kinikin me mwen óm eáni lón mwich me erenuk met ka tongeni angang wóón. Kopwe ammólnaéchúetá óm kewe kinikin pwe chón mwich repwe kúna pwe en emén mi tinikken me alúkúlúk.​—SalF. 21:5; 2 Kor. 8:22.

10. Apwóróusa eú pwóróus mi pwári ifa usun sia tongeni káé eú mettóch sise sipeéch wóón.

¹⁰ Met ka tongeni féri ika a weires óm kopwe lipwákéchúló wóón ewe mettóch ka mochen achocho ngeni? Kosap fókkun fangetá! A weires ngeni emén Chón Kraist mwán itan Garry an epwe pwúngúpwúngéch an állea. A chemeni  úkúkún sáwin atun a kan állea lón ekkewe mwich. Nge a sópweló le émúrinnéló an állea. A erá pwe án chienan kewe Chón Kraist mi sipeéch ákkáiti, pwal ren álillisin néúch kewe puk me video, iei a tongeni eáni afalafal lón mwich me lón mwichelap.

11. Met epwe álisikich pwe epwe lapóló met sia tongeni féri lón án Jiowa angang usun chék Timoty?

¹¹ Itá Timoty a wiliti emén mi fókkun angangéch le eáni afalafal me chón asukul mi lipwákéch? Ewe Paipel ese pwal apasa, nge ese wor tipemwaramwar pwe Timoty a lipwákéchúló lón wisan kewe pokiten a apwénúetá án Paulus pesepes ngeni. (2 Tim. 3:10) Pwal ina usun ren kich, epwe lapóló met sia tongeni féri lón án Jiowa angang ika sia émúrinnéló tufichich.

12. Ifa usun ka feiéch seni án ekkewe ekkóch álisuk?

¹² Kich meinisin sia kúna feiéch ren met ekkewe ekkóch ra féri. Atun sia lúing pioing, sia kilisou ren án ekkewe mwán mi ásimaw mi chóni ewe Hospital Liaison Committee are ewe Patient Visitation Group etto áámwaakich. Atun a wor ach osukosuk, sia kilisou ren án emén mwán mi ásimaw áfánnikich ren an awora an fansoun le aúseling ngeni meefiach me oururukich. Atun a lamot ngenikich álillis lón ach káé ngeni néúch chón káé, sia pwapwa atun emén pioneer mi lipwákéch a fitikich me awora ngenikich kapasen pesepes. Meinisin chienach kana Chón Kraist ra pwapwa le álisikich. Sia pwal tongeni pwapwa ika sia tipemecheres le álisi chienach kewe Chón Kraist. Jesus a erá: “Sia feiöch ren ach fang lap seni ach angei.” (Föf. 20:35) Ika ka mochen alapaaló óm angang ngeni Jiowa ren óm féri ekkena are pwal ekkóch mettóch, met epwe álisuk le féri ena?

13. Met a lamot sipwe chechchemeni atun sia filatá met sia mochen achocho ngeni?

¹³ Kopwe tichiki eú mettóch ka mochen achocho le tikeri. Áwewe chék, neman kopwe ekieki, ‘Ua mochen alapaaló ai angang fán iten ewe mwichefel.’ Nge eli epwe weires óm kopwe silei ifa usun kopwe féri ena me eli esap tufich óm kopwe silei ika ka fen tikeri. Ina popun kopwe filatá me tichiki met ena ka mochen achocho ngeni. Ka pwal mwo nge tongeni makkeetiw met ena ka mochen achocho ngeni me met kopwe féri pwe kopwe tikeri.

14. Pwata a lamot ach sipwe tipemecheres atun sia isetiw met sia mochen achocho ngeniir?

 ¹⁴ A pwal lamot ach sipwe tipemecheres atun sia isetiw met sia mochen achocho ngeniir. Pwata? Pún sise tongeni unusen nemeni nónnómuch. Áwewe chék: Ewe aposel Paulus a álillis le poputááni eú mineféén mwichefel lón Tesalonika. Me ese mwáál a mochen nómwotiw me álisi ekkena mineféén Chón Kraist. Nge ekkewe chón oputa Paulus ra echchimwa an epwe ló seni ena leeni. (Föf. 17:1-5, 10) Ika a nómwotiw a tongeni atolonga chienan kana Chón Kraist lón feiengaw. Nge Paulus ese úkútiw le álisiir, a fen tipemecheres le siwil pokiten nónnómun lón ena atun. Mwirin ekis fansoun, a tinaló Timoty ren ekkena mineféén Chón Kraist Tesalonika pwe epwe apéchékkúla ar lúkú. (1 Tes. 3:1-3) A ifa me pwapwaan ekkena chón Tesalonika ren án Timoty tipemecheres le álillis ikewe a osupwangen álillis ie!

15. Ifa usun siwilin nónnómuch a tongeni siwili minne sia achocho le tikeri? Apwóróusa eú pwóróus.

¹⁵ Sia tongeni káé seni pwóróusen Paulus me lón Tesalonika. Eli sia achocho ngeni eú mettóch, nge a siwil nónnómuch, iwe a pinekich ach sipwe tikeri. (SalAf. 9:11) Ika ina met a pwal fis ngonuk, kopwe tipemecheres le filatá eú mettóch kopwe achocho ngeni nge ka tongeni tikeri. Ina met eú pean pwúpwúlú iter Ted me Hiedi ra féri. Ra towu seni Bethel, pokiten ra semmwen. Nge ar tongei Jiowa a amwékútúúr le kútta pwal ekkóch alen ar repwe alapaaló ar angangen afalafal. Akkomw, ra fiti angangen regular pioneer. Ekiseló mwirin, ra kefil pwe repwe special pioneer, nge Ted a káit an epwe kan wii ewe chónemmwen mi wisen sáifetál. Mwirin, a siwil úkúkún ierin chókkewe mi mumu ngeniir ar repwe chónemmwen mi wisen sáifetál. Ted me Hiedi ra mirititi pwe a kon luló ieriir ar repwe wiseni ena wis. Inaamwo ika ra lichippúng, nge ra mirititi pwe ra tongeni angang ngeni Jiowa lón pwal ekkóch wis. Iei met Ted a erá, “Aua silei pwe aua tongeni angang ngeni Jiowa lón sókkopaten angang.”

16. Ifa ewe lesen sia tongeni káé seni Kalatia 6:4?

¹⁶ Sise tongeni nemeni meinisin met mi fis lón manawach. Ina popun a lamot ach sisap ekieki pwe sia chék aúchea me ren Jiowa pokiten ekkewe wis sia wiseni, me sisap apépékich ngeni chókkewe mi wiseni ekkewe wis sise wiseni. Hiedi a erá, “Kosap tongeni pwapwa ika ka apépééi manawom ngeni manawen ekkewe ekkóch.” (Álleani Kalatia 6:4.) A lamot ach sipwe kútta alen ach sipwe angang ngeni Jiowa me álisi ekkewe ekkóch. *

17. Met kopwe féri pwe kopwe tongeni wiseni pwal ekkóch wis?

 ¹⁷ Kopwe tongeni alapaaló óm angang ngeni Jiowa ika ka ámecheresaaló nónnómun manawom me túmúnuk seni watteen liwinimmang. Isetiw ekkewe mettóch mi mecheres óm kopwe tikeriir pwe epwe álisuk le tikeri ekkewe mettóch epwe ekis ttam me mwirin óm kopwe tikeriir. Áwewe chék, ika regular pioneer ina met ka mochen achocho ngeni, ka tongeni akkomw auxiliary pioneer ren fitu maram? Ika ka mochen wiliti emén chónálillisin mwichefel, ka tongeni alapaaló óm angangen afalafal me áámwa ekkewe mi semmwen me mi chinnap lón óm we mwichefel? Minne ka káé iei, a tongeni atufichuk le eáni pwal ekkóch wis lón ekkan fansoun repwe feito. Kopwe tipeppós le achocho úkúkún óm tufich lón ese lifilifil angang ka kewis ngeni.​—Rom 12:11.

18. Met ka káé seni pwóróusen Beverley usun met a pwá me lón ei sasing?

¹⁸ Inaamwo ika sia ierin chinnap, nge sia chúen tongeni isetiw met sipwe achocho ngeni. Áwewe chék ren pwóróusen emén Chón Kraist itan Beverley 75 ierin. A úri watteen semmwen, me a áweiresi an epwe fetál. Nge a fókkun mochen alapaaló an álillis lón ewe angangen etiwetiw fán iten ewe Áchechchem. Iwe, a tichiki met epwe achocho ngeni. Lupwen neminna a tikeri met ekkewe a achocho ngeni lón ena angangen etiwetiw, a fókkun pwapwa. An achocho a amwékútú ekkewe ekkóch ar repwe pwal achocho lón ewe angangen afalafal. Jiowa a aúcheani minne chienach kewe Chón Kraist chinnap ra féri inaamwo ika a aúkúk minne ra tongeni féri pokiten nónnómur.​—Kölf. 71:17, 18.

19. Ikkefa ekkóch mettóch sia tongeni achocho le tikeriir lón pekin ngún?

¹⁹ Isetiw met ekkewe ka mochen achocho ngeni nge ka tongeni tikeri. Ámááraatá ekkewe napanap mi apwapwaai letipen Jiowa. Káé ekkewe sókkun tufich me angang epwe efisi án Jiowa epwe néúnéú en lón an we mwicheich. Kútta alen óm kopwe alapaaló óm angang fán iten pwiium kewe Chón Kraist. * Ren án Jiowa álillis, “aramas meinisin repwe küna om fefeitä” usun chék Timoty.​—1 Tim. 4:15.